കോഴിക്കോട്: നഗരത്തില് ഗ്യാസ് പൈപ്പ് ലൈൻ നിർമാണം 56 കിലോമീറ്റർ പൂർത്തിയായി. ഉണ്ണികുളം പഞ്ചായത്തിലെ ഏകരൂരില് നിന്നാരംഭിച്ചു താമരശേരി കൊടുവള്ളി വഴി കുന്ദമംഗലംവരെ എത്തിനില്ക്കുന്ന സ്റ്റീല് മെയിൻ പൈപ്പ് ലൈൻ കുന്ദമംഗലത്തുനിന്ന് കോഴിക്കോട് സിറ്റിയില് എത്തിക്കാനുള്ള പ്രവൃത്തികളാണ് പുരോഗമിക്കുന്നത്.
നിലവില് നല്ലളം, വട്ടക്കിണർ, ബേപ്പൂർ, ചക്കുംകടവ്, മാനാഞ്ചിറ, മാവൂർ റോഡ് ജംഗ്ഷൻ, വെസ്റ്റ് ഹില്, പുതിയങ്ങാടി, പാവങ്ങാട്, ബിലാത്തിക്കുളം, അരയിടത്തുപാലം, കോവൂർ, വാപോളിതാഴം ഏരിയകളില് പൈപ്പ് സ്ഥാപിക്കുന്ന പ്രവൃത്തി 56 കിലോമീറ്റർ ദൂരത്തില് പൂർത്തീകരിച്ചതായാണ് കണക്ക്.
കുന്ദമംഗലത്തുനിന്ന് ആരംഭിച്ച പ്രവൃത്തി വരട്ടിയാക്കല്, മില്മ, സിഡബ്ല്യുആർഡിഎം, മുണ്ടിക്കല്താഴം വഴി കോവൂർ ജംഗ്ഷനിലെ പൈപ്പ് ലൈനുമായി കണക്ട് ആകുന്നതോടെ കോഴിക്കോട് സിറ്റിയിലേക്കുള്ള വാതക വിതരണം ആരംഭിക്കും .
മാർച്ചില് കൂടുതല് വീടുകളില് പദ്ധതിയുടെ ആദ്യഘട്ടം നടപ്പാക്കിയ ഉണ്ണികുളം പഞ്ചായത്തില് നിലവില് അറുന്നൂറോളം വീടുകളില് പാചകവാതകം ലഭ്യമാക്കി. ഉണ്ണികുളത്തിന് പുറമെ കാക്കൂർ, നരിക്കുനി, നന്മണ്ട, കിഴക്കോത്, പനങ്ങാട്, ബാലുശേരി പഞ്ചായത്തുകളില് വാതക വിതരണത്തിനുള്ള എംഡിപിഇ പൈപ്പ് ലൈൻ സ്ഥാപിക്കുന്ന പ്രവൃത്തി പുരോഗമിക്കുന്നു.
മാർച്ച് അവസാനത്തോടെ ഈ പഞ്ചായത്തുകളില് 1000 വീടുകള് കൂടി കണക്ട് ചെയ്യുന്നതോടെ ജില്ലയില് 1600 വീടുകള് പൂർണമായി ഗ്യാസ് സിലിണ്ടറുകള് ഉപേക്ഷിച്ചു പൈപ്പ് ലൈൻ വഴിയുള്ള പാചകവാതകത്തിലേക്കു മാറും.
