ടിക്കറ്റ് വില കൂടി, 4 മണിക്കൂർ യാത്രയ്ക്കെടുക്കുന്നത് 10 മണിക്കൂറിലേറെ; സൗദിയിലെ മലയാളി യാത്രികർ ദുരിതത്തിൽ.

റിയാദ്: ഹൂതി മിസൈലാക്രമണത്തെത്തുടർന്ന് റിയാദിൽനിന്ന് കേരളത്തിലേക്ക് യാത്രചെയ്യുന്നവർ നേരിടേണ്ടിവരുന്നത് കടുത്ത ദുരിതം. കേരളത്തിലേക്കുള്ള നാലുമണിക്കൂർ വിമാനയാത്രയ്ക്കായി ചില പ്രവാസികൾക്ക് പത്ത് മണിക്കൂറിലേറെ സമയം ആവശ്യമായി വരുന്നതായാണ് റിപ്പോർട്ട്. റിയാദ് വിമാനത്താവളത്തിലേക്കുള്ള സർവീസുകൾ നിർത്തിവെച്ചതോടെ നാട്ടിലേക്ക് മടങ്ങേണ്ട യാത്രക്കാർ ദമാമിലേക്കോ ബഹ്റൈനിലേക്കോ റോഡുമാർഗം സഞ്ചരിച്ചാണ് കേരളത്തിലേക്കുള്ള വിമാനങ്ങൾ പിടിക്കുന്നത്.ഹൂതി വിമതരുടെ തുടർച്ചയായ ആക്രമണങ്ങളിൽ റിയാദ് വിമാനത്താവളത്തിൽ ആളപായവും കേടുപാടുകളും ഉണ്ടായതിനെത്തുടർന്ന് മുൻകരുതൽ നടപടിയായി എയർ ഇന്ത്യ, എയർ ഇന്ത്യ എക്‌സ്പ്രസ്, ആകാശ എയർ, ഇൻഡിഗോ എന്നിവ റിയാദിലേക്കും തിരിച്ചുമുള്ള എല്ലാ വിമാന സർവീസുകളും ഒക്ടോബർ 24 വരെ നിർത്തിവെച്ചിരുന്നു. എന്നാൽ, സൗദി വിമാനക്കമ്പനികൾ ദമാം, ജിദ്ദ, മദീന എന്നിവിടങ്ങളിൽനിന്ന് ഇന്ത്യയിലേക്കുള്ള സർവീസുകൾ തുടരുന്നുണ്ട്.സർവീസുകൾ റദ്ദാക്കിയതും ലഭ്യമായ സീറ്റുകളുടെ എണ്ണം കുറഞ്ഞതും ടിക്കറ്റ് നിരക്കുകൾ കുത്തനെ ഉയരാൻ കാരണമായി. ഇതോടെ, അടിയന്തരമായി ഇന്ത്യയിലേക്ക് മടങ്ങേണ്ട യാത്രക്കാർ ബസ്സുകളിലോ വാടക കാറുകളിലോ ബുറൈദ, ദമാം എന്നിവിടങ്ങളിലേക്കും ചിലർ ബഹ്റൈനിലേക്കുപോലും യാത്രചെയ്താണ് തുടർവിമാനങ്ങൾ പിടിക്കുന്നത്. വിസയിൽ പ്രവേശിക്കാനുള്ള സമയപരിധി അവസാനിക്കുംമുൻപ് റിയാദിൽ തിരിച്ചെത്തേണ്ടവരും ബഹ്റൈൻ, യു.എ.ഇ. എന്നിവിടങ്ങൾവഴിയാണ് യാത്രചെയ്യുന്നത്.റിയാദിൽനിന്ന് ദമാമിലേക്കോ ബഹ്റൈനിലേക്കോ റോഡുമാർഗമെത്താൻ നാലുമുതൽ ആറുമണിക്കൂർവരെ വേണ്ടിവരും. സൗദി തലസ്ഥാനത്തുനിന്ന് ഏകദേശം 400 മുതൽ 460 കിലോമീറ്റർവരെയാണ് ഈ സ്ഥലങ്ങളിലേക്കുള്ള ദൂരം. ഏകദേശം 1,000 കിലോമീറ്റർ അകലെയുള്ള ജിദ്ദയിലേക്കുള്ള റോഡ് യാത്രയ്ക്ക് ഇതിലും കൂടുതൽ സമയമെടുക്കും.