കൊച്ചി : ചൂടുകൂടുന്ന സാഹചര്യത്തില് വാഹനങ്ങള് അഗ്നിക്കിരയാകുന്നതിനെതിരെ മുന്നറിയിപ്പുമായി എംവിഡി. വേനല് കാലത്ത് വാഹനങ്ങള് അഗ്നിക്കിരയാകുന്നത് അപൂർവമായ സംഭവമല്ല എന്നും ഈ അവസ്ഥ ഒഴിവാക്കുന്നതിനുള്ള മുൻകരുതലുകള് സ്വീകരിക്കാമെന്നുമാണ് എം വി ഡി സോഷ്യല്മീഡിയ പേജില് പങ്കുവെച്ച കുറിപ്പില് വ്യക്തമാക്കുന്നത്. അഗ്നിബാധയ്ക്ക് സാധ്യതയുള്ള ഘടകങ്ങള് ഒഴിവാക്കുക എന്നുള്ളതാണ് പ്രാഥമികമായി ചെയ്യേണ്ടുന്ന കാര്യമെന്നും പരിഹാര മാർഗ്ഗങ്ങള് എന്തൊക്കെയാണെന്നും പങ്കുവെച്ചിട്ടുണ്ട്.
എംവിഡിയുടെ പോസ്റ്റ്
ചൂട് കൂടുന്നു…വാഹനങ്ങളിലെ അഗ്നിബാധയും…….വേനല് കടുക്കുകയാണ് സ്വാഭാവികമായും അന്തരീക്ഷ താപനിലയും . വാഹനങ്ങള് അഗ്നിക്കിരയാകുന്നത് അപൂർവമായ സംഭവമല്ല ഇപ്പോള്, അതുകൊണ്ടു തന്നെ നമ്മള് തീർത്തും നിസ്സഹായരായി പോകുന്ന ഈ അവസ്ഥ ഒഴിവാക്കുന്നതിനുള്ള മുൻകരുതലുകള് സ്വീകരിക്കാം..ഇന്ധന ലീക്കേജും ഗ്യാസ് ലീക്കേജും അനധികൃതമായ ആള്ട്ടറേഷനുകളും ഫ്യൂസുകള് ഒഴിവാക്കിയുള്ള ഇലക്ട്രിക് ലൈനുകളും അധിക താപം ഉല്പാദിപ്പിക്കപ്പെടുന്ന ബള്ബുകളും തുടങ്ങി നിർത്തിയിടുന്ന പാർക്കിംഗ് സ്ഥലങ്ങള് വരെ അഗ്നിബാധയ്ക്ക് കാരണമായേക്കാം. അഗ്നിബാധയ്ക്ക് സാധ്യതയുള്ള ഘടകങ്ങള് ഒഴിവാക്കുക എന്നുള്ളതാണ് പ്രാഥമികമായി ചെയ്യേണ്ടുന്ന കാര്യം.
പരിഹാര മാർഗ്ഗങ്ങള്
- കൃത്യമായ ഇടവേളകളില് മെയിന്റനൻസ് ചെയ്യുക. രാവിലെ വാഹനം നിർത്തിയിട്ടിരുന്ന തറയില് ഓയില്/ഇന്ധന ലീക്കേജ് ഉണ്ടൊ എന്ന് പരിശോധിക്കുന്നതും ദിവസത്തില് ഒരിക്കലെങ്കിലും ബോണറ്റ് തുറന്ന് പരിശോധിക്കുന്നത് ശീലമാക്കുക.
- വാഹനത്തിന്റെ പുറം മാത്രമല്ല എൻജിൻ കംപാർട്ട്മെന്റ് വൃത്തിയാക്കി വക്കുന്നതും ഇത് ലീക്കേജ് കണ്ടെത്തുന്നതിനു മാത്രമല്ല ചെറിയ അഗ്നിബാധ ഗുരുതരമായുന്നത് തടയുന്നതിനും ഉപകാരപ്പെടും.
- കൃത്യമായ ഇടവേളകളില് ഗ്യാസ് ലൈനുകളില് പരിശോധന നടത്തുകയും ഗ്യാസ് ലീക്ക് ഉണ്ടോയെന്ന് ഇടയ്ക്കിടെ പരിശോധിക്കുകയും ഗ്യാസിന്റെ മണം അനുഭവപ്പെട്ടാല് സർവീസ് സെൻററില് കാണിച്ച് റിപ്പയർ ചെയ്യുകയും ചെയ്യുക
- വാഹന നിർമ്മാതാക്കള് നിഷ്കർഷിച്ചിട്ടുള്ളതും നിയമവിധേയവുമായ പാർട്സുകള് ഉപയോഗിക്കുന്നതും അനാവശ്യമായ ആള്ട്ടറേഷനുകള് ഒഴിവാക്കുകയും ചെയ്യുക.
- ഇന്ധന കുഴലുകളും വയറുകളും കൃത്യമായി ക്ലിപ്പ് ചെയ്ത് ഉറപ്പിക്കണം
- പാനല് ബോർഡ് വാണിംഗ് ലാംപുകളും , മീറ്ററുകളും സദാ നിരീക്ഷിക്കുകയും കൃത്യമായ ഇടവേളകളില് കൂളന്റും എഞ്ചിൻ ഓയിലും മാറ്റുകയും ചെയ്യുക.
- വലിയ വാഹനങ്ങളില് പ്രൊപ്പല്ലർ ഷാഫ്റ്റിന് ഇരുമ്പ് ബ്രാക്കറ്റുകള് ഘടിപ്പിക്കണം.
- കന്നാസിലും ബോട്ടിലുകളിലും മറ്റും ഇന്ധനം വാങ്ങി സൂക്ഷിക്കുന്നതും കൊണ്ടുപോകുന്നതും കർശനമായി ഒഴിവാക്കണം.
- വളരെ ചൂടുള്ള കാലാവസ്ഥയില് ഡാഷ് ബോർഡില് വച്ചിട്ടുള്ള വാട്ടർ ബോട്ടിലുകള് ലെൻസ് പോലെ പ്രവർത്തിച്ച് സീറ്റ് അപ്ഹോള്സ്റ്ററിയും പ്ലാസ്റ്റിക് ഭാഗങ്ങളും തീ പിടിച്ചിട്ടുള്ള സംഭവങ്ങള് റിപ്പോർട്ട് ചെയ്യപ്പെട്ടിട്ടുണ്ട് അതുകൊണ്ടുതന്നെ വാട്ടർ ബോട്ടിലുകള് സാനിറ്റൈസറുകള് സ്പ്രേകള് എന്നിവ ഡാഷ്ബോർഡില് സൂക്ഷിക്കുന്നത് ഒഴിവാക്കുക.
- വിനോദ യാത്രകളും മറ്റും പോകുമ്പോൾ സ്റ്റൗ ഉപയോഗിച്ച് ഭക്ഷണം പാകം ചെയ്യുന്നത് വാഹനത്തില് വച്ചാകരുത്.
- വാഹനത്തിനകത്ത് ഇന്ധനം തീപ്പെട്ടി, ലൈറ്ററുകള്, സ്ഫോടക വസ്തുക്കള് എന്നിവ സൂക്ഷിക്കുന്നത് ഒഴിവാക്കേണ്ടുന്ന ശീലങ്ങളില് ഒന്നാണ്.
- ആംബുലൻസുകളില് ഓക്സിജൻ സിലിണ്ടറുകള് കൃത്യമായി ബ്രാക്കറ്റുകള് ഉപയോഗിച്ച് ഉറപ്പിക്കുകയും റെഗുലേറ്ററുകള്ക്ക് തകരാറുകള് ഇല്ല എന്ന് ഉറപ്പാക്കുകയും ചെയ്യണം.
- സാധാരണ വാഹനത്തിൻ്റെ സീറ്റുകളും മറ്റും അഗ്നിബാധയെ ചെറുക്കുന്ന രീതിയിലുള്ള മെറ്റീരിയല് ഉപയോഗിച്ചാണ് നിർമ്മിക്കുക എന്നാല് പെട്ടെന്ന് തീ ആളിപ്പിടിക്കുന്ന റെക്സിൻ കവറുകളും പോളിയസ്റ്റർ തുണി കവറുകളും അഗ്നി ആളിപ്പിടിക്കുന്നതിന് കാരണമാകാം എന്നതിനാല് തന്നെ ഒഴിവാക്കേണ്ടതാണ്.
- കൂട്ടിയിടികള് അഗ്നിബാധയിലേക്ക് നയിക്കാം എന്നതിനാല് തന്നെ സുരക്ഷിതമായും ഡിഫൻസീവ് ഡ്രൈവിംഗ് രീതികള് അനുവർത്തിച്ചു കൊണ്ടും വാഹനം ഓടിക്കുക
- എല്ലാ വാഹനങ്ങളിലും ചെറിയ ഫയർ എക്സ്റ്റിംഗ്യൂഷർ (Fire extinguisher )പെട്ടെന്ന് ഉപയോഗിക്കാൻ പറ്റുന്ന രീതിയില് സൂക്ഷിക്കുക.
- വാഹനങ്ങള് നിർത്തിയിടുമ്പോൾ ഉണങ്ങിയ ഇലകളോ പ്ലാസ്റ്റിക്കോ മറ്റ് അഗ്നിബാധയ്ക്ക് സാധ്യതയുള്ളതോ ആയ സ്ഥലങ്ങളോ ഒഴിവാക്കുക.
