മാനന്തവാടി: മലയോര ഹൈവേ റോഡ് പ്രവൃത്തികളുടെ ഭാഗമായി കോഴിക്കോട് റോഡില് ബസ് കാത്തിരിപ്പ് കേന്ദ്രത്തിന് സമീപമുണ്ടായിരുന്ന പാർക്കിംഗും പൊതുജനങ്ങള്ക്ക് ഏറെ ഉപകാരപ്രദമായിരുന്ന വഴിയും തടസപ്പെടുത്തിയതിനെതിരേ പ്രതിഷേധവുമായി നാട്ടുകാർ.
കോഴിക്കോട് റോഡില് ബസ് ഇറങ്ങുന്ന നിരവധിയാളുകള് വ്യാപാര സ്ഥാപനങ്ങള്ക്കിടയിലുള്ള വഴിയിലൂടെയാണ് മെഡിക്കല് കോളജ്, വില്ലേജ് ഓഫീസ്, നഗരസഭ, രജിസ്ട്രാർ ഓഫീസ്, പോസ്റ്റ് ഓഫീസ് എന്നിവിടങ്ങളിലേക്കെല്ലാം വർഷങ്ങളായി കടന്ന് പോയി കൊണ്ടിരിക്കുന്നത്. സമീപത്തെ കെട്ടിടത്തില് ഇരുചക്ര വാഹനങ്ങള്ക്ക് പാർക്കിംഗ് സൗകര്യവുമുണ്ടായിരുന്നു.
എന്നാല് ഇതെല്ലാം തടസപ്പെടുത്തി കൊണ്ടാണ് റോഡരികില് നിർമാണ പ്രവർത്തികള് നടത്തിയിരിക്കുന്നത്. ഇത് പൊതുജനത്തിനും വ്യാപാരികള്ക്കും ദുരിതമായി മാറിയിരിക്കുകയാണ്. വളരെയെറെ ബുദ്ധിമുട്ടിയാണ് ആളുകള് ഇതിലൂടെ ഇപ്പോള് കടന്ന് പോകുന്നത്. അപകടങ്ങള്ക്കും കാരണമായി മാറുന്നുണ്ട്. അശാസ്ത്രീയമായ റോഡ് പ്രവർത്തികള് നിർത്തി വയ്ക്കണമെന്നാവശ്യപ്പെട്ട് ഇവിടെ ബാനറും സ്ഥാപിച്ചിട്ടുണ്ട്. പ്രശ്നത്തിന് അടിയന്തര പരിഹാരം കാണണമെന്നാണ് ആവശ്യം ഉയരുന്നത്.
