കാത്തിരിപ്പു കേന്ദ്രങ്ങൾക്കു സമീപവും ഓട്ടോസ്റ്റാൻഡ്; ബസുകൾക്ക് സർവീസ് നടത്താൻ ബുദ്ധിമുട്ടെന്നു പരാതി

കോഴിക്കോട് :നഗരത്തിലെ മിക്ക ബസ് കാത്തിരിപ്പു കേന്ദ്രങ്ങൾക്കു സമീപവും ഓട്ടോ സ്റ്റാൻഡുകൾ വന്ന സാഹചര്യത്തിൽ നഗരത്തിനുള്ളിൽ സർവീസ് നടത്താൻ സിറ്റി ബസുകൾക്കു ബുദ്ധിമുട്ടുണ്ടാകുന്നതായി ജില്ല സിറ്റി ബസ് ഓപ്പറേറ്റേഴ്സ് അസോസിയേഷൻ. ഈ സാഹചര്യം തുടർന്നാൽ സിറ്റി ബസുകൾ നഗരത്തിലെ സർവീസ് നിർത്തി വയ്ക്കുമെന്നും മുന്നറിയിപ്പു നൽകി. രാവിലെയും വൈകിട്ടും കാരപ്പറമ്പ്, മലാപ്പറമ്പ്, റെയിൽവേ സ്റ്റേഷൻ, പുതിയ ബസ് സ്റ്റാൻഡ് പരിസരം, പാളയം – കല്ലായി റോഡ് എന്നീ ഭാഗങ്ങളിൽ മണിക്കൂറുകളോളം നീളുന്ന ഗതാഗതക്കുരുക്കാണ്.അനുവദിച്ച സമയത്ത് സിറ്റി ബസുകൾക്കു സമയം പാലിച്ചു സർവീസ് നടത്താൻ കഴിയാത്ത അവസ്ഥയാണ്. കോർപറേഷൻ, പൊലീസ്, ആർടിഒ, ബസ് ഉടമകൾ, ജീവനക്കാർ എന്നിവരുടെ സംയുക്ത യോഗം ചേർന്നു പ്രശ്നത്തിനു പരിഹാരം കാണണമെന്ന് അസോസിയേഷൻ‌ ആവശ്യപ്പെട്ടു. ജില്ലാ പ്രസിഡന്റ് വി.ബിജു, ജനറൽ സെക്രട്ടറി എം.തുളസീദാസ്, കെ.പ്രതീഷ്, എസ്.സന്തോഷ്, കെ.പി.എം.എച്ച്.ഉമ്മർ എന്നിവർ പ്രസംഗിച്ചു.