9.40 കോടി രൂപയുടെ വാർഷിക പദ്ധതി
തിരുവമ്പാടി : തിരുവമ്പാടി ഗ്രാമ പഞ്ചായത്ത് പതിനാലാം പഞ്ചവത്സര പദ്ധതി രൂപീകരത്തിന്റെ ഭാഗമായി വികസന സെമിനാർ സംഘടിപ്പിച്ചു.സെമിനാർ ബ്ലോക്ക് പഞ്ചായത്ത് പ്രസിഡന്റ് ബാബു കളത്തൂർ ഉദ്ഘാടനം ചെയ്തു. പ്രസിഡന്റ് മേഴ്സി പുളിക്കാട്ട് അദ്ധ്യക്ഷത വഹിച്ചു.
പതിനാലാം പഞ്ചവത്സര പദ്ധതിയുടെ ഭാഗമായി നമ്മുടെ ഗ്രാമത്തെ ദാരിദ്ര്യരഹിതവും ഉയർന്ന ഉപജീവന മാർഗ്ഗമുള്ളതുമായ ഗ്രാമം, ആരോഗ്യ ഗ്രാമം, ശിശു സൗഹൃദ പഞ്ചായത്ത്, ജല പര്യാപ്ത ഗ്രാമം, ഹരിത ഗ്രാമം, സ്വയം പര്യാപ്ത അടിസ്ഥാന സൗകര്യങ്ങളോട് കൂടിയ ഗ്രാമം, സാമുഹിക സുരക്ഷിത ഗ്രാമം, സദ്ഭരണം, ഗ്രാമങ്ങളിൽ ലിംഗ സമത്വം വികസനം, ഗുണമേന്മയുള്ള വിദ്യാഭ്യാസം എന്നീ രംഗത്ത് മികവുറ്റതാക്കാൻ ആവശ്യമായ പദ്ധതികൾക്കാവശ്യമായ തുക പദ്ധതിയിൽ മാറ്റി വെച്ചിട്ടുണ്ടെന്ന് ഗ്രാമ പഞ്ചായത്തിന്റെ വികസന കാഴ്ച്ചപാട് – നയസമീപനവും – വികസന തന്ത്രവും വിശദീകരിച്ച് സംസാരിച്ച വൈസ് പ്രസിഡന്റ് കെ എ അബ്ദുറഹിമാൻ പറഞ്ഞു.
വികസന കാര്യ സ്ഥിരം സമിതി അദ്ധ്യക്ഷ പദ്ധതി അവതരണം നടത്തി.വികസന ഫണ്ട് 2,38,21000 രൂപയിൽ ലൈഫ് ഭവന പദ്ധതിക്കായി 47,64200 രൂപ മാറ്റി വെച്ചിട്ടുണ്ട്. സ്ത്രീകകൂടെ വികസനത്തിനായി 19,05680 രൂപയും, ഭിന്നശേഷി – കുട്ടികൾ -ഭിന്ന ലിംഗകാർ എന്നിവരുടെ വികസനത്തിനായി 9,52,840 രൂപയും വകയിരുത്തിയിട്ടുണ്ട്.ഗ്രാമത്തിന്റെ നാട്ടല്ലായ ഉദ്പാദന മേഖലയിൽ നൂതന പദ്ധതികൾ നടപ്പാക്കുന്നതിനും ക്ഷീരവികസന പദ്ധതിക്കുമായി 57,1740 രൂപ നീക്കിവെച്ചിട്ടുണ്ട്. പച്ചക്കറി പാൽ – മുട്ട എന്നിവയിൽ ഗ്രാമത്തെ സ്വയം പര്യാപ്തമാക്കാൻ സംരംഭങ്ങൾ പ്രോത്സാഹിപ്പിക്കുന്നതിനും തുക മാറ്റി വെച്ചിട്ടുണ്ട്.
സോളാർ പെൻസിംഗ്, മഴമറ, സമഗ്ര പച്ചക്കറി കൃഷി തുടങ്ങിയ പദ്ധതികളും ഉണ്ടാകും. ഫാം ടൂറിസം വികസിപ്പിക്കുന്നതിനായി നൂതന പദ്ധതികൾക്ക് തുക വകയിരിത്തിയിട്ടുണ്ട്.സേവന മേഖലയിൽ അങ്കവാടി വികസനം പോഷകാഹാരം, ഭിന്നശേഷി സ്കോളർഷിപ്പ് , മുച്ചക്ര വാഹനം, സ്കൂൾ കുട്ടികൾക്ക് പ്രഭാത ഭക്ഷണം, വയോജ ക്ഷേമ പദ്ധതി, ജീവിത ശൈലി രോഗ മൊബൈൽ ലാബ്, പാലിയേറ്റിവ് പരിചരണം, അഗതി ആശ്രയ,അതി ദാരിദ്ര്യ സുഷ്മപദ്ധതി, തെരുവ് വിളക്ക് സ്ഥാപിക്കൽ, ഗ്രാമം കേന്ദ്രം സ്ഥാപിക്കൽ തുടങ്ങിയ പദ്ധതികൾക്കായി സേവന മേഖലയിൽ 95,28,400 രൂപ വകയിരുത്തിയിട്ടുണ്ട്.പട്ടികവർഗ വികസനത്തിനായി 6,33000 രൂപയും പട്ടികജാതി വികസനത്തിനായി 37, 80000 രൂപയുടെ പദ്ധതിയും വെച്ചിട്ടുണ്ട്.ഘടക സ്ഥാപനങ്ങളുടെ ഗുണനിലവാരം ഉയർത്തുന്നതിനുമായി 42,08000 രൂപ നീക്കി വെച്ചിട്ടുണ്ട്. അങ്കണവാടികളെ ക്രാഡിൽ അങ്കണവാടികൾക്കി മാറ്റുന്നതിനും , തിരുവമ്പാടി ലൈബ്രററി നവീകരണം, സർക്കാർ സ്കൂളുകൾക്ക് ഫർണിച്ചർ, കുടുംബാരോഗ്യ കേന്ദ്രം ഐ.എസ്. സെർട്ടിഫിക്കേഷൻ തുടങ്ങിയ പദ്ധതികൾ ഇതിന്റെ ഭാഗമായി നടക്കും.
ഗ്രാമ പഞ്ചായത്തിലെ റോഡുകളുടെ പുനരുദ്ധാരണ പ്രവ്യത്തികൾക്കായി 5 കോടി 14 ലക്ഷം രൂപയും നീക്കിവെച്ചിട്ടുണ്ട്. ഗ്രാമ പഞ്ചായത്തിന്റെ തനത് വരുമാനവും വകയിരുത്തിയാണ് പദ്ധതി തയ്യാറാക്കിയിരിക്കുന്നത്. ഇതിൽ ഉൾപെടുത്തി ബസ് സ്റ്റാന്റ് ഷോപിംഗ് സെന്റർ നവീകരണം, ബസ് സ്റ്റാന്റ് ഡ്രൈനേജ് നിർമ്മാണം എന്നീ പദ്ധതികൾക്കാണ് തുക മാറ്റി വെച്ചത്.വികസന സെമിനാറിൽ പങ്കെടുത്ത ഗ്രാമസഭാ പ്രതിനിധികൾ, വർക്കിംഗ് ഗ്രൂപ്പ് അംഗങ്ങൾ, ഘടക സ്ഥാപന മേധാവികൾ, കുടുംബശ്രീ, ആശ, അങ്കണവാടി പ്രവർത്തകർ പതിനാല് വർക്കിംഗ് ഗ്രൂപ്പ് ചർച്ചകൾക്ക് നേതൃത്വം നൽകി.പരിപാടിയിൽ സ്ഥിരം സമിതി അദ്ധ്യക്ഷരായ രാമചന്ദ്രൻ കരിമ്പിൽ , റംല ചോലക്കൽ, ജില്ല പഞ്ചായത്ത് മെമ്പർ ബോസ് ജേകബ്, മുഹമ്മദലി കെ എം , ആസൂത്രണ സമിതി ഉപാധ്യക്ഷൻ കുര്യാച്ചൻ തെങ്ങുമൂട്ടിൽ,സി ഡി എസ് ചെയർപേഴ്സൺ പ്രീതി രാജീവ്,അസി. സെക്രട്ടറി ടി മനോജ് തുടങ്ങിയവർ സംസാരിച്ചു.
