മെഗാസ്റ്റാർ മമ്മൂട്ടി എട്ട് മാസങ്ങൾക്ക് ശേഷം കേരളത്തിലെത്തിയതിന്റെ ആവേശത്തിലാണ് ആരാധകർ. യുകെയിൽ നിന്നെത്തിയ താരത്തിന് വമ്പിച്ച വരവേൽപ്പാണ് ആരാധകരും രാഷ്ട്രീയ, സാംസ്കാരിക പ്രമുഖരും ചേർന്ന് ഒരുക്കിയത്. കേരളത്തിലെത്തിയ മമ്മൂട്ടിയെ സ്വീകരിക്കാൻ മന്ത്രി എം ബി രാജേഷ് അടക്കമുള്ളവർ നെടുമ്പാശേരി വിമാനത്താവളത്തിൽ എത്തിയിരുന്നു.
ആരാധകരുടെ ‘ലവ് യു മമ്മൂക്ക’ വിളികളുടെ നടുവിലേക്കാണ് പ്രിയ താരം വന്നിറങ്ങിയത്. മമ്മൂട്ടിയെ വരവേൽക്കാൻ വമ്പിച്ച ജനാവലിയാണ് എയർപോർട്ടിൽ ഉണ്ടായിരുന്നത്. മലയാളികളുടെ സ്നേഹത്തിന് നടുവിലേക്ക് പറന്നിറങ്ങിയ മമ്മൂക്ക നിറപുഞ്ചിരിയോടെ ആരാധകർക്ക് അഭിവാദ്യമർപ്പിച്ച് നടന്നുനീങ്ങി. ശേഷം സ്വയം കാറോടിച്ചാണ് മമ്മൂട്ടി വീട്ടിലേക്ക് തിരിച്ചത്.
കഴിഞ്ഞ കുറച്ച് മാസങ്ങളായി നടൻ ചെന്നൈയിലായിരുന്നു. ശേഷം മഹേഷ് നാരായൺ സിനിമയുടെ സെറ്റിലേക്ക് മമ്മൂട്ടി എത്തുകയായിരുന്നു. സിനിമയുടെ രണ്ടാമത്തെ ഷെഡ്യൂൾ ഹൈദരാബാദിലായിരുന്നു, അവിടത്തെ ഷൂട്ടിങ് പൂർത്തിയാക്കിയതിന് ശേഷം താരം യുകെയിലേക്ക് തിരിച്ചിരുന്നു. ഇപ്പോൾ യുകെയിൽ നിന്നാണ് മമ്മൂട്ടി കേരത്തിലെത്തിയിരിക്കുന്നത്.
