കോട്ടയം: കോട്ടയം വടവാതൂരിൽ വാടക വീടിനുള്ളിൽ പ്രവര്ത്തിച്ചിരുന്ന നിരോധിത പുകയില ഉല്പന്നങ്ങളുടെ പാക്കിംഗ് യൂണിറ്റ് എക്സൈസ് കണ്ടെത്തി. കോട്ടയം, പാമ്പാടി എക്സൈസ് യൂണിറ്റുകൾ നടത്തിയ സംയുക്ത പരിശോധനയിലാണ് പാൻ നിർമാണ യന്ത്രവും മദ്യവും കണ്ടെത്തിയത്. വീട് വാടകയ്ക്കെടുത്തിരുന്ന ആളെ അറസ്റ്റ് ചെയ്തു.
വടവാതൂര് ശാസ്താക്ഷേത്രത്തിനടുത്തുള്ള വീട്ടില് നിന്നാണ് ഇരുപത് ലക്ഷം രൂപ വില വരുന്ന നിരോധിത പുകയില ഉല്പന്നങ്ങളും പന്ത്രണ്ട് കുപ്പി വിദേശമദ്യവുമാണ് പിടിച്ചെടുത്തത്. പാൻ നിർമാണ യന്ത്രവും കണ്ടെത്തി. അരുണ് എന്ന യുവാവാണ് ഈ വീട് വാടകയ്ക്ക് എടുത്തിരുന്നത്. അരുണിനെയും എക്സൈസ് അറസ്റ്റ് ചെയ്തു. പുകയില ഉല്പന്നങ്ങള് വന് തോതില് ഈ വീട്ടില് എത്തിച്ച ശേഷം പ്രത്യേക യന്ത്രം ഉപയോഗിച്ച് പായ്ക്ക് ചെയ്താണ് വില്പ്പനയ്ക്കായി എത്തിച്ചിരുന്നതെന്ന് എക്സൈസ് പറഞ്ഞു. രണ്ട് മാസം മുമ്പ് കുറുവിലങ്ങാട്ടും സമാനമായ രീതിയില് പുകയില ഉല്പന്നങ്ങളുടെ പാക്കിംഗ് യൂണിറ്റ് പൊലീസ് കണ്ടെത്തിയിരുന്നു.
