പ്രശസ്ത കലാ സംവിധായകനും ചലച്ചിത്ര കലാസംബന്ധമായ വിഷയങ്ങളില് ഗവേഷകനുമായ സാബു പ്രവദ അന്തരിച്ചു. ചലച്ചിത്ര സംബന്ധിയായ ഏറ്റവും മികച്ച ലേഖനത്തിനുള്ള കഴിഞ്ഞ വര്ഷത്തെ സംസ്ഥാന പുരസ്കാരം നേടിയിട്ടുണ്ട്. ഈ മാസം 18ന് തിരുവനന്തപുരത്ത് വെച്ചുണ്ടായ റോഡപകടത്തെ തുടര്ന്ന് അത്യാസന്ന നിലയില് ചികിത്സയിലായിരുന്നു.
രാജാവിന്റെ മകന്, മനു അങ്കിള്, കാട്ടുകുതിര, വഴിയോരക്കാഴ്ചകള്, പത്രം, ലേലം, റണ് ബേബി റണ്, അമൃതം, പാര്വ്വതീ പരിണയം, ഒറ്റയടിപ്പാതകള്, ഫസ്റ്റ് ബെല് തുടങ്ങിയ ചിത്രങ്ങളുടെ കലാസംവിധായകനാണ്. എറണാകുളം കച്ചേരിപ്പടിയിലെ പ്രശസ്തമായ പ്രവദ സ്റ്റുഡിയോ ഇദ്ദേഹത്തിന്റേതാണ്. ഐഎഫ്എഫ്കെ ഉള്പ്പെടെ കേരള സംസ്ഥാന ചലച്ചിത്ര അക്കാദമിയുടെ ഫിലിം ഫെസ്റ്റിവലുകളില് ഡിസൈനറായി സേവനം അനുഷ്ഠിച്ചിട്ടുണ്ട്.
