തിരുവനന്തപുരം: നവകേരള സദസിന് തുടർച്ചയായി മുഖ്യമന്ത്രി പിണറായി വിജയൻ നേതൃത്വം നല്കുന്ന ‘മുഖാമുഖം’ പരിപാടിയുമായി സർക്കാർ. വിവിധ മേഖലകളിലുള്ളവരുമായി സംവദിക്കുന്ന പരിപാടി ഫെബ്രുവരി 18 മുതല് മാർച്ച് 3 വരെയാണ് സംഘടിപ്പിക്കുന്നത്.
വിവിധ ജില്ലകളില് നടത്തുന്ന പരിപാടിയില് പങ്കെടുക്കുന്നവർക്ക് ഒരു മിനിട്ട് സംസാരിക്കാനാണ് അനുവാദം. ഫെബ്രുവരി 18നു കോഴിക്കോട് വിദ്യാർഥികളുമായുള്ള സംവാദത്തോടെയാണു പരിപാടി ആരംഭിക്കുക.
വനിതകള്, സാംസ്കാരിക പ്രവർത്തകർ, ആദിവാസി-ദളിത് വിഭാഗങ്ങള്, ഭിന്നശേഷിക്കാർ, വയോജനങ്ങള്, വിവിധ തൊഴില് മേഖലയിലുള്ളവർ, കാർഷിക മേഖലയിലുള്ളവർ, റസിഡൻസ് അസോസിയേഷൻ പ്രതിനിധികള് എന്നിവരുമായും മുഖ്യമന്ത്രി സംവദിക്കും.
സംസാരിക്കാൻ കഴിയാത്തവർക്ക് കാര്യങ്ങള് എഴുതി നല്കാം. എഴുതി നല്കുന്ന കാര്യങ്ങള് ഒരു പേജില് കവിയരുതെന്ന നിർദേശമുണ്ട്. കോഴിക്കോട്, കണ്ണൂർ, തൃശൂർ, എറണാകുളം, തിരുവനന്തപുരം, ആലപ്പുഴ എന്നീ സ്ഥലങ്ങളിലാണു പരിപാടി സംഘടിപ്പിക്കുന്നത്.
