തിരുവനന്തപുരം: സംസ്ഥാനത്ത് ഇന്ന് താപനില മൂന്ന് മുതല് നാല് ഡിഗ്രി സെല്ഷ്യസ് വരെ ഉയരാന് സാധ്യതയെന്ന് കേന്ദ്ര കാലാവസ്ഥ വകുപ്പ്. ചൂടിനൊപ്പം അന്തരീക്ഷ ഈര്പ്പവും ഉയര്ന്ന് നില്ക്കുന്നതിനാല് യഥാര്ഥ താപനിലയെക്കാള് കൂടുതല് ചൂട് അനുഭവപ്പെടുന്ന സാഹചര്യമാണ് ഉള്ളത്. തെക്ക് പടിഞ്ഞാറന് മണ്സൂണ് ദുര്ബലമായതാണ് ചൂടുകൂടാന് കാരണം.അതേസയമം ഇപ്പോഴത്തെത് ഉഷ്ണതരംഗ സാഹചര്യമായി വിലയിരുത്തിയിട്ടില്ല.ഇന്നലെ സംസ്ഥാനത്ത് ഏറ്റവും ഉയര്ന്ന ചൂട് പുനലൂരില് രേഖപ്പെടുത്തി. 36.2 ഡിഗ്രി വരെ ചൂട് ഉയര്ന്നു ശരാശരിയെക്കാള് 4.4 ഡിഗ്രി കൂടുതലാണിത്. കോട്ടയം 35, തൃശൂര്, പാലക്കാട് 34.3 എന്നിവിടങ്ങളിലും കൂടുതല് ചൂട് അനുഭവപ്പെട്ടു.
സ്കൂൾ കായികമേളയെ ചരിത്ര സംഭവമാക്കാൻ കോഴിക്കോട്: സിന്തറ്റിക് ട്രാക്ക് നിർമാണം അവസാന ഘട്ടത്തിൽ.
കോഴിക്കോട് : സംസ്ഥാന സ്കൂൾ കായികമേള കോഴിക്കോട്ടു നടത്തുമെന്ന പ്രഖ്യാപനത്തോടെ മലബാറിലെ കായികതാരങ്ങളും കായികപ്രേമികളും ആവേശത്തിൽ. 11 വർഷത്തെ ഇടവേളയ്ക്കുശേഷം കോഴിക്കോട്ടേക്ക് എത്തുന്ന കായികമേളയെ ചരിത്രസംഭവമാക്കുമെന്നാണ് അധ്യാപകർ പറഞ്ഞത്. ഇത്തവണ കായികമേളയ്ക്ക് ഒരുങ്ങുന്നത് എൻഐടിയുടെ മൈതാനത്തെ ‘ബ്രാൻഡ് ന്യൂ’ സിന്തറ്റിക് ട്രാക്കാണ്.
നിർമാണം അവസാനഘട്ടത്തിലെത്തിയ മൈതാനത്തിന്റെ ഉദ്ഘാടനം നടത്തിയ ശേഷമാണ് കായികമാമാങ്കത്തിനായി കൈമാറുക. മുൻപ് ആർഇസി ക്രിക്കറ്റ് മൈതാനം എന്നറിയപ്പെട്ടിരുന്ന സ്ഥലത്താണ് എൻഐടി പുതിയ സ്പോർട്സ് അരീന നിർമിക്കുന്നത്. 43 കോടിയിലധികം രൂപ ചെലവുവരുന്ന ഇൻഡോർ കോർട്ട് കോംപ്ലക്സ് അടക്കമുള്ള പദ്ധതികളും വരാനിരിക്കുന്നുണ്ട്. ഫ്ലഡ് ലൈറ്റുകൾ അടക്കമുള്ള വിവിധ സൗകര്യങ്ങളുടെ നിർമാണം നടക്കാനിരിക്കുന്നതേയുള്ളൂ.ഓട്ടമാറ്റിക് സ്പ്രിംഗ്ലർ സിസ്റ്റം, വിഐപി മുറികൾ, കായിക ഉപകരണങ്ങൾ സൂക്ഷിക്കാനുള്ള സ്റ്റോർ റൂം തുടങ്ങിയവയും നിലവിൽ 8.9 കോടിയോളം രൂപ ചെലവിലാണ് ഇവിടെ സിന്തറ്റിക് ട്രാക്ക്, ഇലവൻസ് ഫുട്ബോൾ ടർഫ് എന്നിവയുടെ നിർമാണം പൂർത്തിയാകുന്നത്.
450 മീറ്റർ സിന്തറ്റിക് ട്രാക്കിൽ 8 ട്രാക്കുളുണ്ട്. ഇവിടെ ലോങ് ജംപ് പിറ്റുകളുടെയും ഹൈജംപ് പിറ്റുകളുടെയും നിർമാണവും അവസാനഘട്ടത്തിലാണ്.രാജ്യാന്തര ഒളിംപിക്സ് മാനദണ്ഡം പാലിച്ചാണ് സിന്തറ്റിക് ട്രാക്ക്, ജംപിങ് പിറ്റ് എന്നിവയുടെ നിർമാണം. ഗാലറിയും മുറികളും സ്റ്റോറേജ് സൗകര്യവും ശുചിമുറികളുമുണ്ട്. ഹൈദരാബാദ് ആസ്ഥാനമായ ഗ്രേറ്റ് സ്പോർട്സ് ടെക് കമ്പനിയാണ് നിർമാണം നിർവഹിക്കുന്നത്.നിലവിൽ പുതിയ സിന്തറ്റിക് ട്രാക്കിനു സമീപത്താണ് എൻഐടിയുടെ ക്രിക്കറ്റ് മൈതാനം. ഇവിടെ രണ്ടു പിച്ചുകളുള്ള പരിസ്ഥിതി സൗഹൃദ ക്രിക്കറ്റ് സ്റ്റേഡിയമുണ്ട്. അടുത്തിടെ രഞ്ജി ട്രോഫി ജൂനിയർ വിഭാഗം മത്സരങ്ങൾ ഇവിടെയാണ് നടന്നത്. പുതിയ സിന്തറ്റിക് ട്രാക്ക് നിർമിച്ച മൈതാനത്താണ് മുൻപ് വിശിഷ്ടാതിഥികളുമായി ഹെലികോപ്റ്ററുകൾ വന്നിറങ്ങിയിരുന്നത്.
നിയന്ത്രണം വിട്ട ബൈക്ക് ഇലക്ട്രിക് പോസ്റ്റിൽ ഇടിച്ച് അപകടം; പൂനൂർ സ്വദേശി മരിച്ചു.
കിഴക്കോത്ത്: കിഴക്കോത്ത് പൂനൂരിൽ ചൊവ്വാഴ്ച രാവിലെ ബൈക്ക് ഇലക്ട്രിക് പോസ്റ്റിൽ ഇടിച്ച് ഉണ്ടായ അപകടത്തിൽ ഒരാൾ മരിച്ചു. പൂനൂർ ഒതയോത്ത് ചാലിൽ പുറായിൽ പ്രകാശൻ (58) ആണ് മരിച്ചത്.രാവിലെ 10 മണിയോടെ പന്നൂർ – നരിക്കുനി റോഡിൽ വച്ച് നിയന്ത്രണം വിട്ട ബൈക്ക് ഇലക്ട്രിക് പോസ്റ്റിൽ ഇടിച്ചായിരുന്നു അപകടം. ഉടൻതന്നെ നാട്ടുകാർ കൊടുവള്ളിയിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. തുടർ നടപടികൾക്കായി മൃതദേഹം കോഴിക്കോട് മെഡിക്കൽ കോളജിലേക്ക് മാറ്റി. അച്ചൻ: പരേതനായ അപ്പുകുട്ടി. അമ്മ: യശോദ. ഭാര്യ: സുനിത. മക്കൾ: അനന്തു, ആരോമൽ, സായിമ. മരുമക്കൾ: അഖിൻ, ഹണിമ. സംസ്കാരം ചൊവ്വാഴ്ച വൈകുന്നേരം 7.30ന് കോരങ്ങാട് ശ്മശാനത്തിൽ നടക്കും.
‘നഷ്ടം 120 കോടി, ഇനി മുന്നോട്ടുപോകാൻ കഴിയില്ല’; സ്വകാര്യ ബസ് ഉടമകൾ സമരത്തിലേക്ക്, സർവീസുകൾ നിർത്തിവെക്കും.
പാലക്കാട്: സ്വകാര്യ ബസ് ഉടമകള് സമരത്തിലേക്ക്. പ്രിയദര്ശിനി പദ്ധതിയുണ്ടാക്കിയ പ്രതിസന്ധി പരിഹരിക്കാന് സര്ക്കാര് ഇടപെട്ടില്ലെന്നും ബസുകള് നിര്ത്തിവെച്ച് അനിശ്ചിതകാല പണിമുടക്ക് ആരംഭിക്കുമെന്നും ബസ് ഉടമകള് പറഞ്ഞു. ബസ് ഓപ്പറേറ്റേഴ്സ് ഓര്ഗനൈസേഷന്റെ സംസ്ഥാന സമിതിയുടേതാണ് തീരുമാനം. സമരത്തിന് മുന്പ് മുഖ്യമന്ത്രിയേയും ഗതാഗത മന്ത്രിയേയും കാണും. പ്രിയദര്ശിനി മൂലം സ്വകാര്യ ബസ് മേഖലയ്ക്ക് 120 കോടിയിലധികം രൂപയുടെ നഷ്ടമുണ്ടായി. ടിക്കറ്റ് നിരക്ക് വര്ധന സര്ക്കാര് പരിഗണിക്കുന്നില്ല. മുഴുവന് ബസുടമകളുമായി ചേര്ന്ന് സമരം നടത്തുമെന്നും ബസ് ഓപ്പറേറ്റേഴ്സ് ഓര്ഗനൈസേഷന്റെ സംസ്ഥാന ജനറല് സെക്രട്ടറി ടി ഗോപിനാഥ് വാര്ത്താസമ്മേളനത്തില് പറഞ്ഞു.വിദ്യാര്ത്ഥികളുടെ യാത്രാ നിരക്ക് വര്ധിപ്പിക്കുക, 2022ല് നിശ്ചയിച്ച സ്വകാര്യ ബസുകളുടെ യാത്രാ നിരക്ക് വര്ധിപ്പിക്കുക, ഡീസലിന് സബ്സിഡി ഏര്പ്പെടുത്തുക തുടങ്ങിയ ആവശ്യങ്ങള് ഉന്നയിച്ചാണ് സ്വകാര്യ ബസ് ഉടമകള് സമരത്തിലേക്ക് കടക്കാന് ഒരുങ്ങുന്നത്. സര്ക്കാരിന്റെ ഭാഗത്ത് നിന്ന് എന്താണ് നിലപാട് എന്ന് അറിഞ്ഞ ശേഷം തുടര്നടപടികള് സ്വീകരിക്കും. ‘നിങ്ങള് മികച്ച സംരംഭകരാണ്, നിങ്ങളുടെ വ്യവസായം ഒഴിവാക്കാന് പറ്റില്ല’ എന്നൊക്കെയാണ് തങ്ങളെ കാണുമ്പോൾ മുഖ്യമന്ത്രിയും ഗതാഗതമന്ത്രിയും സന്തോഷത്തോടെ പറയുന്നത്. സന്തോഷത്തോടെയുള്ള അവരുടെ പെരുമാറ്റം കഴിഞ്ഞ മൂന്ന് മാസമായി കാണുന്നില്ല. അതുകൊണ്ടാണ് തങ്ങൾക്ക് നിലപാട് കടുപ്പിക്കേണ്ടിവന്നതെന്നും ടി ഗോപിനാഥ് ചൂണ്ടിക്കാട്ടി.യാത്രക്കാരെ ബുദ്ധിമുട്ടിക്കണം എന്ന് തങ്ങള്ക്കില്ല. സാഹചര്യം മോശമാണ്. ഓണക്കാലത്ത് ജീവനക്കാര്ക്ക് ശമ്പളമോ ബോണസോ നല്കാന് കഴിഞ്ഞിട്ടില്ല. പണമടയ്ക്കാത്തതുകൊണ്ട് ധനകാര്യ സ്ഥാപനം ബസ് പിടിച്ചെടുക്കുന്ന സാഹചര്യമുണ്ട്. എപ്പോൾ വേണമെങ്കിലും ബസുകൾ പിടിച്ചെടുക്കപ്പെടാം. പശ്ചിമേഷ്യന് സംഘര്ഷത്തിന്റെ പശ്ചാത്തലത്തില് ഡീസലിന് എട്ട് രൂപ 50 പൈസയാണ് കൂട്ടിയത്. അതിന് മുന്പ് ഡീസലിന് സര്ക്കാര് രണ്ട് രൂപ സെസ് കൂട്ടിയിരുന്നു. ഓയിലിന്റെ വില 250 ആയിരുന്നത് 400 ആയി. ഇന്ഷുറന്സ് ഒന്നരലക്ഷം വരെയാണെന്നും ടി ഗോപിനാഥ് പറഞ്ഞു.
നെടുമ്പാശ്ശേരിയിൽ വിമാനത്താവളത്തിലേക്ക് ഇനി ട്രെയിൻ മാർഗവും.
കൊച്ചി: വിമാനയാത്രക്കാരുടെയും നാട്ടുകാരുടെയും ദീർഘകാലത്തെ കാത്തിരിപ്പിന് വിരാമമിട്ട് ആലുവക്കും അങ്കമാലിക്കുമിടയിൽ നെടുമ്പാശ്ശേരി റെയിൽവേ സ്റ്റേഷൻ്റെ നിർമാണ പ്രവർത്തനങ്ങൾ ആരംഭിച്ചു. പദ്ധതി പൂർത്തിയാകുന്നതോടെ കൊച്ചി അന്താരാഷ്ട്ര വിമാനത്താവളവുമായി നേരിട്ട് ബന്ധമുള്ള രാജ്യത്തെ ആദ്യ റെയിൽവേ സ്റ്റേഷനായി ഇത് മാറും. രണ്ടു വർഷത്തിനുള്ളിൽ നിർമാണം പൂർത്തിയാക്കാനാണ് റെയിൽവേ ലക്ഷ്യമിടുന്നത്.ഹാൾട്ട് സ്റ്റേഷൻ രീതിയിലാണ് സ്റ്റേഷന്റെ രൂപകൽപ്പന. വന്ദേഭാരത് അടക്കമുള്ള ട്രെയിനുകൾക്ക് ഇവിടെ സ്റ്റോപ്പ് പ്രതീക്ഷിക്കുന്നു. റെയിൽവേയുടെ സ്വന്തം ഭൂമിയിൽ നിർമിക്കുന്നതിനാൽ പദ്ധതിക്ക് സ്ഥലമേറ്റെടുക്കേണ്ടതായി വന്നിട്ടില്ല. 19 കോടി രൂപയാണ് പ്രതീക്ഷിക്കുന്ന നിർമാണച്ചെലവ്.24 കോച്ചുകൾ ഉൾക്കൊള്ളുന്ന 600 മീറ്റർ നീളമുള്ള രണ്ട് പ്ലാറ്റ്ഫോമുകൾ, ഫൂട്ട് ഓവർ ബ്രിഡ്ജ്, ലിഫ്റ്റ്, എസി വെയിറ്റിങ് ഹാൾ, ടിക്കറ്റ് ബുക്കിങ് ഓഫിസ് എന്നിവയുണ്ടാകും. വിമാനത്താവളത്തിൻ്റെ പടിഞ്ഞാറുഭാഗത്തെ മേൽപാലത്തിന് അടിയിലാണ് സ്റ്റേഷൻ വരുന്നത്. വിമാനത്താവളത്തിലേക്കുള്ള റോഡിലാകും പ്രധാന കവാടം.നെടുമ്പാശ്ശേരിയിൽ വിമാനത്താവളത്തിലേക്ക് ഇനി ട്രെയിൻ മാർഗവും
ഇന്നും നാളെയും ചൂട് കൂടും; നാല് ഡിഗ്രി വരെ ഉയരും, വെള്ളിയാഴ്ചയോടെ സംസ്ഥാനത്ത് മഴയ്ക്ക് സാധ്യത
തിരുവനന്തപുരം : സംസ്ഥാനത്ത് ഉയർന്ന താപനില തുടരുമെന്ന് മുന്നറിയിപ്പ്. ഇന്നും നാളെയും കൂടിയ ചൂട് അനുഭവപ്പെടും. സാധാരണയിലും നാല് ഡിഗ്രി വരെ ഉയർന്ന ചൂടും ആർദ്രതയും അനുഭവപ്പെടും. തെക്ക് പടിഞ്ഞാറൻ മൺസൂൺ ദുർബലമായതാണ് ചൂട് കൂടാൻ കാരണം. അതേസമയം, ഇപ്പോഴത്തേത് ഉഷ്ണതരംഗ സാഹചര്യമായി വിലയിരുത്തിയിട്ടില്ല.അതേസമയം, വരും ദിവസങ്ങളിൽ മഴ കിട്ടുമെന്നാണ് പ്രവചനം. 10, 11 തീയതികളിൽ വ്യാപകമായി മഴ ലഭിക്കുമെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്. 10ന് ആലപ്പുഴ, എറണാകുളം ജില്ലകളിലും 11ന് പത്തനംതിട്ട, കോട്ടയം, ഇടുക്കി, എറണാകുളം ജില്ലകളിലും യെല്ലോ അലർട്ട് പ്രഖ്യാപിച്ചിട്ടുണ്ട്.ചൂട് തുടരുന്ന സാഹചര്യത്തിൽ സൂര്യാഘാതം, സൂര്യാതപം, നിർജലീകരണം തുടങ്ങിയ ഗുരുതര ആരോഗ്യ പ്രശ്നങ്ങൾക്കെതിരെ ജാഗ്രത പുലർത്തണമെന്ന് മുന്നറിയിപ്പുണ്ട്.ചൂട് വർധിച്ച സാഹചര്യത്തിൽ സംസ്ഥാന ദുരന്ത നിവാരണ അതോറിറ്റി ജാഗ്രതാ നിർദ്ദേശം പുറപ്പെടുവിച്ചു.പകൽ 11 മുതൽ മൂന്നുവരെയുള്ള സമയത്ത് നേരിട്ട് ശരീരത്തിൽ കൂടുതൽ സമയം സൂര്യപ്രകാശം ഏൽക്കുന്നത് ഒഴിവാക്കാനാണ് നിർദ്ദേശം. ദാഹമില്ലെങ്കിലും ഇടയ്ക്കിടെ ധാരാളം ശുദ്ധജലം കുടിക്കുക. നിർജലീകരണം ഉണ്ടാക്കുന്ന പാനീയങ്ങൻ ഒഴിവാക്കാനും അതോറിറ്റി നിർദ്ദേശം നൽകി.
ഇരുമ്പുകഷ്ണങ്ങളെ സ്വപ്നംകൊണ്ട് വിളക്കിച്ചേർത്തു; ഇത് അജ്ലാന്റെ അത്ഭുത വാഹനം
നരിക്കുനി: ആക്രിക്കടയിൽ ഉപേക്ഷിക്കപ്പെട്ട ബൈക്കിന്റെ എൻജിനും പഴയ ഇരുമ്പുകഷ്ണങ്ങളും ചേർത്തു സ്വന്തമായി നാലുചക്ര വാഹനം നിർമിച്ച് വിസ്മയമാവുകയാണ് നരിക്കുനി ഗവ. ഹയർ സെക്കൻഡറി സ്കൂളിലെ പത്താം ക്ലാസ് വിദ്യാർഥി അജ്ലാൻ. ചെറുപ്പം മുതലേയുള്ള വണ്ടിക്കമ്പമാണ് മൂന്നുമാസത്തെ കഠിനാധ്വാനത്തിലൂടെ അജ്ലാൻ സ്വന്തം സ്വപ്നവാഹനമാക്കി റോഡിലിറക്കിയത്.ആക്രിക്കടയിൽ നിന്ന് വാങ്ങിയ 2011 മോഡൽ ഹീറോ ഗ്ലാമർ ബൈക്കിന്റെ എൻജിനാണ് വാഹനത്തിന്റെ കരുത്ത്. ഡിസൈൻ മുതൽ വെൽഡിങ് വരെയുള്ള പ്രധാന ജോലികളെല്ലാം അജ്ലാൻ തനിയെ ചെയ്തു. ചില പഴയ പാർട്സുകൾ വർക്ക്ഷോപ്പുകളിൽ നിന്നും സൗജന്യമായി ലഭിച്ചതോടെ 35,000 രൂപക്കാണ് ഈ വണ്ടിയുടെ നിർമാണം പൂർത്തിയാക്കിയത്സാമ്പത്തിക പ്രതിസന്ധികൾക്കിടയിലും മകന്റെ കഴിവിലും ആഗ്രഹത്തിലും പൂർണമായി വിശ്വസിച്ച ഒരു പിതാവിന്റെ ത്യാഗത്തിന്റെ കഥ കൂടിയാണ് ഈ വാഹനത്തിന് പിന്നിലുള്ളത്. കൂലിപ്പണിക്കാരനായ അജ്നാന്റെ പിതാവ് എരവന്നൂർ ഓരോട്ട് മുഹമ്മദ് ബഷീർ ഈ വാഹനം നിർമിക്കാനാവശ്യമായ പണം ബാങ്കിൽ സ്വർണം പണയപ്പെടുത്തിയും ബന്ധുക്കളിൽ നിന്നും സുഹൃത്തുക്കളിൽ നിന്നുമൊക്കെ കടം വാങ്ങിയുമാണ് മകന് നൽകിയത്.രണ്ടുപേർക്ക് സുഖമായി യാത്ര ചെയ്യാവുന്ന ഈ പെട്രോൾ വാഹനത്തിന് ലിറ്ററിന് 30 കിലോമീറ്റർ മൈലേജ് ലഭിക്കും. ആകർഷകമായ ഹോണും പാട്ടുകേൾക്കാൻ സ്പീക്കർ സംവിധാനവും ഇതിലുണ്ട്. പഠനത്തോടൊപ്പം ഒഴിവുസമയങ്ങൾ പ്രയോജനപ്പെടുത്തിയാണ് അജ്ലാൻ ഈ നേട്ടം കൈവരിച്ചത്. സൈക്കിളിൽ നാല് ചക്രങ്ങൾ ഘടിപ്പിച്ചുകൊണ്ടായിരുന്നു അജ്ലാൻ തന്റെ ആദ്യ പരീക്ഷണം നടത്തിയത്. ഏഴാം ക്ലാസിൽ പഠിക്കുമ്പോൾ എൻജിനില്ലാത്ത കാർ നിർമിച്ചിരുന്നു. ആ കൊച്ചു വിജയം മനസ്സിൽ നൽകിയ വലിയൊരു ആഗ്രഹമാണ് സ്വന്തമായി ഒരു കാർ നിർമിക്കുക എന്ന മോഹത്തിലേക്ക് അജ്ലാനെ എത്തിച്ചത്.സ്കൂളിൽ നടന്ന ശാസ്ത്രമേളയിൽ അജ്നാൻ വാഹനം പ്രദർശിപ്പിച്ചപ്പോൾ സഹപാഠികളും നാട്ടുകാരും അധ്യാപകരും അഭിനന്ദിച്ചു. ഭാവിയിൽ ഓട്ടോമൊബൈൽ രംഗത്ത് കൂടുതൽ പരീക്ഷണങ്ങൾ നടത്താൻ ആഗ്രഹിക്കുന്ന ഈ കൊച്ചു മിടുക്കന് മാതാവ് റഹ്മത്തും അനിയത്തിമാരായ അത്ഫ, അയ്ഫ എന്നിവരും അധ്യാപകരും നാട്ടുകാരും പൂർണ പിന്തുണ നൽകുന്നു.
മെഡി.കോളേജിലും പരിസരങ്ങളിലും കള്ളൻമാരുടെ വിളയാട്ടം.
കോഴിക്കോട് : ചികിത്സ തേടി ആയിരക്കണക്കിന് ആളുകളെത്തുന്ന മെഡിക്കൽ കോളേജ് പരിസരം മോഷ്ടാക്കളുടെ താവളമാകുന്നു. സുരക്ഷാ നിരീക്ഷണവും പൊലീസ് പെട്രോളിംഗും കാര്യക്ഷമമല്ലാത്തതിനാൽ ആശുപത്രിയിലും പരിസരത്തുമായി മോഷണങ്ങൾ തുടർക്കഥയാകുകയാണ്. രോഗികളുടെയും കൂട്ടിരിപ്പുകാരുടെയും പണം, മൊബൈൽ ഫോൺ, വാഹനങ്ങൾ എന്നിവ നഷ്ടപ്പെടുന്നതിന് പുറമെ ആശുപത്രിയിലെ വിലപിടിപ്പുള്ള ഉപകരണങ്ങളും മോഷണം പോകുന്ന സ്ഥിതിയാണ്. നേരത്തെ നടന്ന പല മോഷണക്കേസുകളിലും പ്രതികളെ കണ്ടെത്താനാകാത്തതും സുരക്ഷാ സംവിധാനങ്ങളുടെ വീഴ്ച വ്യക്തമാക്കുന്നു.
കഴിഞ്ഞ ദിവസം മെഡി.കോളേജ് ബയോഗ്യാസ് പ്ലാന്റിന്റെ പൂട്ട് തകർത്ത് അജ്ഞാതരുടെ അതിക്രമവും ഉണ്ടായി. രാത്രിയിലായിരുന്നു സംഭവം. പ്ലാന്റിന്റെ പൂട്ട് തകർന്നതോടെ ടാങ്ക് നിറയുകയും മലിനജലം പുറത്തേക്ക് ഒഴുകുകയും ചെയ്തു. മെഡി.കോളജ് ക്യാമ്പസിലെ ഇൻസ്റ്റിറ്റ്യൂട്ട് ഓഫ് ചെസ്റ്റ് ഡിസീസിനും ടെർഷ്യറി കാൻസർ കെയർ സെന്ററിനും സമീപത്താണ് ബയോഗ്യാസ് പ്ലാന്റ്. മലിനജലം ടെർഷ്യറി കാൻസർ സെന്ററിലേക്കടക്കം ഒഴുകിയെത്തിയത് ആശങ്കയ്ക്കിടയാക്കിയിരുന്നു.കഴിഞ്ഞ ജൂലായിൽ മെഡി. കോളജ് മോർച്ചറിയിലെ കോൾഡ് സ്റ്റോറേജ് സംവിധാനത്തിൽ നിന്നും ബ്ലഡ് ബാങ്കിൽ നിന്നും വ്യാപകമായി എയർ കണ്ടീഷണർ ചെമ്പു കമ്പികൾ മോഷണം പോയിരുന്നു. മോർച്ചറിയിലെ കോൾഡ് സ്റ്റോറേജ് സംവിധാനത്തെ മോഷണം സാരമായി ബാധിച്ചതോടെ മൃതദേഹങ്ങൾ സൂക്ഷിക്കുന്നതിനും പ്രതിസന്ധിയുണ്ടായി.
ബ്ലഡ് ബാങ്കിലെ കോൾഡ് സ്റ്റോറേജിൽ നിന്ന് ഏകദേശം മൂന്ന് ലക്ഷം രൂപ വിലമതിക്കുന്ന ഉപകരണങ്ങളും അനുബന്ധ സാമഗ്രികളുമാണ് മോഷണം പോയത്.ആശുപത്രി പരിസരത്ത് നിറുത്തിയിടുന്ന രോഗികളുടേയും കൂട്ടിരിപ്പുകാരുടേയും വാഹനങ്ങൾ മോഷണം പോകുന്നതും നിത്യസഭവമാണ്. കൂടാതെ ആശുപത്രിയിലെത്തുന്നവരുടെ പേഴ്സും വിലപിടിപ്പുള്ള വസ്തുക്കളും മോഷണം പോകുന്നു.മോഷണ കേസുകളിൽ പൊലീസിന് ഇതുവരെ കുറ്റക്കാരെ കണ്ടെത്താൻ സാധിച്ചിട്ടില്ല. ആശുപത്രി കെട്ടിടങ്ങളുടെ പരിസരങ്ങളിലും പൊലീസിന്റെ രാത്രി നിരീക്ഷണം പര്യാപ്തമല്ലെന്ന പരാതിയും ശക്തമാണ്.
മോഷണ കേസുകൾ രജിസ്റ്റർ ചെയ്യുന്നുണ്ടെങ്കിലും പലതിലും പ്രതികൾ പിടിയിലായിട്ടില്ല. തിരക്കേറിയ ആശുപത്രി അന്തരീക്ഷം മുതലെടുത്താണ് പല മോഷണങ്ങളും നടക്കുന്നത്. മെഡി.കോളേജ് പരിസരങ്ങളിലെ വെളിച്ചക്കുറവും സി.സി.ടി.വികൾ പ്രവർത്തിക്കാത്തതും മോഷ്ടാക്കൾക്ക് സൗകര്യമാകുകയാണ്. മോഷ്ടാക്കൾ വിലസുമ്പോഴും പൊലീസ് പരിശോധന പെറ്റിയടിയിൽ മാത്രം ഒതുങ്ങുകയാണെന്ന ആരോപണവുമുണ്ട്. മോഷ്ടാക്കൾക്ക് തമ്പടിക്കാനുള്ള സൗകര്യം, ഒളിവിൽ പാർപ്പിക്കാൻ സഹായികൾ, വീടുകൾ കണ്ടെത്തി വിവരം നൽകാൻ സംഘം, തുടങ്ങിയവയും മോഷണം പെരുകാൻ കാരണമാകുന്നു.
വേഗതയില്ലെന്ന്; ചുരത്തിൽ കെ.എസ്.ആർ.ടി.സി ബസിൽ യുവാവിന്റെ പരാക്രമം.
വൈത്തിരി: വേഗതയില്ലെന്ന് പറഞ്ഞ് വയനാട് ചുരം രണ്ടാം വളവിൽവെച്ച് കെ.എസ്.ആർ.ടി.സി ബസിനും ഡ്രൈവർക്കുംനേരെ യുവാവിന്റെ പരാക്രമം. തിങ്കളാഴ്ച പുലർച്ച ഒന്നരക്ക് തൃശൂരിൽനിന്ന് മൈസൂരുവിലേക്ക് പോകുകയായിരുന്ന സൂപ്പർ ഫാസ്റ്റ് ബസിലാണ് സംഭവം.യാത്രക്കാരനായ വയനാട് പുൽപള്ളി പഠിച്ചിറ പുളിക്കൽ കുന്നേൽ ഷൈജലിനെ (36) താമരശ്ശേരി പൊലീസ് അറസ്റ്റുചെയ്തു. ഡ്രൈവർ തൃശൂർ സ്വദേശി ടോയിക്കു പരിക്കേറ്റു. ഇദ്ദേഹത്തെ താമരശ്ശേരി താലൂക്ക് ആശുപത്രിയിൽ പ്രവേശിപ്പിച്ചു. കൈയ്യാങ്കളിക്കിടെ യുവാവിനും തലക്ക് പരിക്കേറ്റു. ബസിന്റെ ഹെഡ് ലൈറ്റും ഡ്രൈവറുടെ ഭാഗത്തുള്ള വാതിലിന്റെ ചില്ലും തകർന്നു. ബസിൽ നിറയെ യാത്രക്കാരുണ്ടായിരുന്നു.മറ്റു വാഹനങ്ങളിലെ യാത്രക്കാരടക്കം യുവാവിനെ തടഞ്ഞുവെച്ചു പൊലീസിന് കൈമാറി. ബസിലെ യാത്രക്കാരെ മറ്റു ബസുകളിൽ കയറ്റിവിട്ടു. പ്രതിയെ കോഴിക്കോട് സബ് ജയിലിൽ റിമാൻഡ് ചെയ്തു. യുവാവ് ലഹരിയിലായിരുന്നുവെന്നു സംശയിക്കുന്നതായി പൊലീസ് പറഞ്ഞു.
ഗാര്ഹിക പാചകവാതക സിലിണ്ടര് ബുക്കിങ് നിയന്ത്രണത്തില് ഇളവ്; ഇടവേള 45 ദിവസത്തില് നിന്ന് 25 ആയി കുറച്ചു
ന്യൂഡല്ഹി: ഗാര്ഹിക പാചകവാതക സിലിണ്ടര് ബുക്കിങ്ങിനുള്ള നിയന്ത്രണത്തില് ഇളവുമായി കേന്ദ്ര സര്ക്കാര്. ബുക്കിങ് ഇടവേള 45 ദിവസത്തില് നിന്ന് 25 ആയി കുറച്ചതായി പെട്രോളിയം – പ്രകൃതിവാതക സഹമന്ത്രി സുരേഷ് ഗോപി അറിയിച്ചു. രാജ്യത്ത് എല്പിജി വിതരണ പ്രതിസന്ധി ഒഴിഞ്ഞതോടെയാണ് ഇടവേള കുറയ്ക്കാന് കേന്ദ്രം തീരുമാനിച്ചത്. ഇനി ഗ്രാമ മേഖലയില് ഉള്ളവര്ക്കും ഒരു ബുക്കിങ് കഴിഞ്ഞ് 25 ദിവസം പൂര്ത്തിയാക്കിയാല് അടുത്ത സിലിണ്ടര് ബുക്ക് ചെയ്യാം. പശ്ചിമേഷ്യന് യുദ്ധത്തിന്റെ പശ്ചാത്തലത്തിലായിരുന്നു .കേന്ദ്രം നിയന്ത്രണം കൊണ്ടുവന്നത്. അതേസമയം നഗരമേഖലയില് 25ദിവസമെന്ന നിലവിലുള്ള ഇടവേള തുടരുമെന്നും അധികൃതര് വ്യക്തമാക്കിയിട്ടുണ്ട്.കഴിഞ്ഞ മാര്ച്ചിലാണ് പെട്രോളിയം മന്ത്രാലയം നഗരപ്രദേശങ്ങളിലെ ഉപഭോക്താക്കള്ക്ക് 25 ദിവസത്തേയും ഗ്രാമീണ മേഖലയിലുള്ളവര്ക്ക് 45 ദിവസത്തെയും ബുക്കിങ് ഇടവേള നിശ്ചയിച്ചത്. അനിശ്ചിതത്വത്തിന്റെ സാഹചര്യത്തില് എല്പിജി വിതരണം തടസമില്ലാതെ ലഭ്യമാക്കുക എന്ന ലക്ഷ്യത്തോടെയായിരുന്നു നടപടി. വിതരണ സാഹചര്യം മെച്ചപ്പെട്ടതിനൊപ്പം റീഫില്ലിംഗിലെ കാലതാമസം കുറയുകയും ചെയ്തതോടെയാണ് ക്രമീകരണത്തില് പരിഷ്കരണം ഉണ്ടായത്പുതിയ ഇളവ് വന്നതോടെ ഇനി നഗര – ഗ്രാമ വ്യത്യാസമില്ലാതെ എല്ലാ ഗാര്ഹിക എല്പിജി ഉപഭോക്താക്കള്ക്കും 25 ദിവസത്തെ ഇടവേളയില് റീഫില് ബുക്ക് ചെയ്യാമമെന്ന് ഫേസ്ബുക്ക് കുറിപ്പില് കേന്ദ്രമന്ത്രി സുരേഷ് ഗോപി വ്യക്തമാക്കി.



