ഡ്രൈവിങ് ടെസ്റ്റ് പരിഷ്കരണം നടപ്പാക്കും മുന്പ് ലൈസന്സെടുക്കാന് നെട്ടോട്ടമോടുകയാണ് അപേക്ഷകർ . മേയ് ആദ്യവാരം മുതല് പുതിയരീതി നടപ്പാക്കുമെന്നാണു മോട്ടോര്വാഹന വകുപ്പ് അറിയിച്ചിരിക്കുന്നത്.
പുതിയ രീതിയിലെ ഡ്രൈവിങ് ടെസ്റ്റിന് ഒട്ടേറെ കടമ്പകളുണ്ട്. കൂടുതല് പരിശീലനം വേണ്ടിവരും. പഠനച്ചെലവും കൂടും. മേയ് ഒന്നുവരെ പഴയ മാതൃകയിലാകും ടെസ്റ്റ്. അതിനാല്, ഉടന് അപേക്ഷ സമര്പ്പിച്ചാല് പെട്ടെന്നു പഠിച്ച് ലൈസന്സ് എടുക്കാമെന്നാണു പലരും കരുതുന്നത്.
എന്നാല്, അത്രവേഗം ലൈസന്സ് എടുക്കാനാകില്ല. ടെസ്റ്റിനു ഹാജരാകുന്നതിനു മുന്പ് ടെസ്റ്റ് തീയതിയെടുക്കണം. നിശ്ചിത എണ്ണം ടെസ്റ്റുകളേ ഒരു ദിവസം അനുവദിക്കൂ. ഇപ്പോള് പഠിക്കുന്ന ഒട്ടേറെപ്പേര്ക്ക് ടെസ്റ്റ് തീയതി ലഭിക്കാനുണ്ട്. അതിനിടെ കൂടുതല് അപേക്ഷകളെത്തിയാല് തീയതി ലഭിക്കാന് ബുദ്ധിമുട്ടാകും.
