കൊച്ചി: സംസ്ഥാനത്ത് സ്കൂളുകള് തുറന്ന് രണ്ടാഴ്ച പിന്നിട്ടിട്ടും ചില സര്ക്കാര്, എയ്ഡഡ് സ്കൂളുകളില് വിദ്യാര്ഥികള്ക്ക് സൗജന്യ യൂണിഫോം വിതരണം പൂര്ത്തിയായിട്ടില്ല. യൂണിഫോമിനുള്ള തുണി ലഭിക്കുന്നതിലെയും തുന്നല് നടപടികള് പൂര്ത്തിയാക്കുന്നതിലെയും കാലതാമസമാണ് പ്രധാന കാരണമെന്ന് സ്കൂള് അധികൃതര് പറയുന്നു. നിലവില് സൗജന്യ യൂണിഫോം പദ്ധതി രണ്ടു ഘട്ടങ്ങളിലായാണ് നടപ്പാക്കുന്നത്.
സര്ക്കാര് സ്കൂളുകളില് ഒന്നുമുതല് നാലാം ക്ലാസ് വരെയും എയ്ഡഡ് സ്കൂളുകളില് ഒന്നുമുതല് ഏഴാം ക്ലാസ് വരെയും പഠിക്കുന്ന വിദ്യാര്ഥികള്ക്ക് സൗജന്യമായി കൈത്തറി യൂണിഫോം തുണി നല്കുന്നുണ്ട്. ഇതിന് പുറമെ സര്ക്കാര്, എയ്ഡഡ് സ്കൂളുകളിലെ വിവിധ വിഭാഗങ്ങളിലെ വിദ്യാര്ഥികള്ക്ക് യൂണിഫോം അലവന്സും അനുവദിക്കുന്നുണ്ട്. ഈ അധ്യയന വര്ഷം അലവന്സ് ലഭിക്കേണ്ട കുട്ടികളുടെ എണ്ണം സംബന്ധിച്ച വിവരശേഖരണം പൊതുവിദ്യാഭ്യാസ വകുപ്പ് ആരംഭിച്ചിട്ടുണ്ട്.
അധ്യയന വര്ഷത്തിന്റെ തുടക്കത്തില് തന്നെ യൂണിഫോം ലഭിക്കാത്തത് കുട്ടികളുടെ ആത്മവിശ്വാസത്തെയും സ്കൂള് അന്തരീക്ഷത്തിലെ സമത്വബോധത്തെയും ബാധിക്കുന്നതായി രക്ഷിതാക്കള് ചൂണ്ടിക്കാട്ടുന്നു. എല്ലാ വിദ്യാര്ഥികള്ക്കും ഒരേ സമയത്ത് യൂണിഫോം ലഭ്യമാക്കാന് സര്ക്കാര് അടിയന്തര ഇടപെടല് നടത്തണമെന്ന ആവശ്യവും ഉയരുന്നുണ്ട്. അതേസമയം, യൂണിഫോമിനുള്ള തുണി പല ഘട്ടങ്ങളിലായാണ് ലഭിക്കുന്നതെന്ന് അധ്യാപകര് പരാതിപ്പെടുന്നു.
തുണി ഏറ്റുവാങ്ങുന്നതിനായി പ്രധാന അധ്യാപകര് പഠനസമയം നഷ്ടപ്പെടുത്തി വിതരണ കേന്ദ്രങ്ങളിലെത്തേണ്ട സാഹചര്യമുണ്ടെന്നും അവര് പറയുന്നു. മുന് വര്ഷങ്ങളിലും സമാന പ്രശ്നങ്ങള് ബന്ധപ്പെട്ട അധികാരികളുടെ ശ്രദ്ധയില്പ്പെടുത്തിയിരുന്നെങ്കിലും സ്ഥിരമായ പരിഹാരം ഉണ്ടായിട്ടില്ലെന്നാണ് അധ്യാപകരുടെ ആരോപണം. യൂണിഫോം വിതരണത്തിലെ കാലതാമസം ഒഴിവാക്കാന് വിതരണ സംവിധാനത്തില് മാറ്റം വരുത്തണമെന്ന ആവശ്യവും ശക്തമാകുകയാണ്.
