അഗസ്ത്യൻമുഴിയിൽ തണ്ണീർത്തടം നികത്താൻ ശ്രമം; നാട്ടുകാർ തടഞ്ഞു

മുക്കം : എടവണ്ണ-കൊയിലാണ്ടി സംസ്ഥാനപാതയിൽ അഗസ്ത്യൻമുഴിയിൽ തണ്ണീർത്തടം മണ്ണിട്ട് നികത്താനുള്ള ശ്രമം നാട്ടുകാർ തടഞ്ഞു. വ്യാഴാഴ്ച രാവിലെയാണ് അങ്ങാടിയോട് ചേർന്ന് ഓമശ്ശേരി റോഡരികിൽ ടിപ്പർ ലോറിയിൽ മണ്ണുകൊണ്ടുവന്ന് നിലം നികത്താൻ ശ്രമംനടന്നത്. ഇത് നാട്ടുകാരുടെ ശ്രദ്ധയിൽപ്പെട്ടതോടെ അന്വേഷിച്ചെങ്കിലും അനുമതിയുണ്ടെന്നായിരുന്നു മറുപടി. തുടർന്ന് വില്ലേജ് ഓഫീസുമായി ബന്ധപ്പെട്ടപ്പോൾ ഇത്തരമൊരു അനുമതി നൽകിയിട്ടില്ലെന്നറിഞ്ഞു. ഇതോടെ വില്ലേജ് ഓഫീസ് ജീവനക്കാർ സ്ഥലത്തെത്തുകയും ചെയ്തു. ഇതിനിടെ ഏതാനും ലോഡ് മണ്ണ് തണ്ണീർത്തടത്തിൽ നിക്ഷേപിച്ചിരുന്നു. സംഭവത്തിൽ വാർഡ് കൗൺസിലർ ജോഷിലയുടെ നേതൃത്വത്തിൽ പോലീസിലും പരാതിനൽകിയിട്ടുണ്ട്. തണ്ണീർത്തടം നികത്തിയാൽ ഗുരുതരമായ പാരിസ്ഥിതിക പ്രശ്നങ്ങൾക്ക് കാരണമാവുമെന്ന് നാട്ടുകാർ പറയുന്നു. തണ്ണീർത്തടത്തിൽ തള്ളിയ മണ്ണ് എത്രയുംപെട്ടെന്ന് എടുത്തുമാറ്റണമെന്നും നാട്ടുകാർ ആവശ്യപ്പെട്ടു.