മീൻപിടിത്ത ബോട്ടുകളിലെ ബാറ്ററിമോഷണം: രണ്ടുപേർ അറസ്റ്റിൽ

ബേപ്പൂർ : മീൻപിടിത്ത ബോട്ടുകളിലെ ബാറ്ററി മോഷണംപോയ കേസിലെ മുഖ്യപ്രതി ചാലിയം അരയൻവളപ്പിൽ ഫവാസി(25)നെയും ബാറ്ററികൾ വാങ്ങിയ ചാലിയം പഞ്ചാരന്റെപുരക്കൽ കുഞ്ഞിമൊയ്തീനെയും (70) ബേപ്പൂർ പോലീസ്‌ അറസ്റ്റുചെയ്തു.കൂട്ടുപ്രതികളായ ഉമ്മർ ഫാറൂക്ക്‌, ഷഹദ്‌ എന്നിവർ ഉടൻ പിടിയിലാകുമെന്ന്‌ പോലീസ്‌ പറഞ്ഞു. ചാലിയം മീൻപിടിത്തകേന്ദ്രത്തിൽ നങ്കൂരമിടുന്ന ബോട്ടുകളിൽനിന്നാണ്‌ ബാറ്ററികൾ മോഷ്ടിച്ചത്. പ്രതികൾ മോഷ്ടിച്ച ബാറ്ററികളുമായി പോകുന്ന ദൃശ്യം തൊട്ടടുത്ത ബോട്ടിലെ സി.സി.ടി.വി. ക്യാമറയിൽ പതിഞ്ഞിരുന്നു. ഇതിന്റെ അടിസ്ഥാനത്തിൽ ബേപ്പൂർ പോലീസ്‌ ഇൻസ്പെക്ടർ വി. ഡിജിത്ത്‌ നടത്തിയ അന്വേഷണത്തിലാണ് പ്രതികളെ പിടികൂടിയത്.ചാലിയംകടപ്പുറത്തുനിന്നാണ് ഫവാസിനെ അറസ്റ്റുചെയ്തത്‌. എ.എസ്‌.ഐ. അരുൺ, സീനിയർ സി.പി.ഒ. വിനോദ്‌, ടി. അനൂപ്‌ എന്നിവരാണ്‌ അന്വേഷണസംഘത്തിലുണ്ടായിരുന്നത്‌. പ്രതികളെ കോടതി റിമാൻഡ്‌ ചെയ്തു.