സാവിത്രി ശ്രീധരന്റെ വിയോഗത്തിൽ വിതുമ്പി സാമുവൽ അബിയോള റോബിൻസൺ; ‘അവരിപ്പോൾ സ്വർഗത്തിലെ മാലാഖ’.

പ്രമുഖ നാടക-ചലച്ചിത്ര നടി സാവിത്രി ശ്രീധരന്റെ വിയോഗത്തിൽ ആഴത്തിലുള്ള ദുഃഖവും അനുശോചനവും രേഖപ്പെടുത്തി ‘സുഡാനി ഫ്രം നൈജീരിയ’യിലെ സഹതാരം സാമുവൽ അബിയോള റോബിൻസൺ. വിയോഗവാർത്ത അറിഞ്ഞ നിമിഷം മനസ്സ് പൂർണ്ണമായും തകർന്നുപോയെന്നും മാധ്യമങ്ങളോട് സംസാരിക്കാൻ പോലുമാകാത്ത വിധം തീവ്രമായ മാനസിക വിഷമത്തിലാണെന്നും സാമുവൽ സോഷ്യൽ മീഡിയയിൽ കുറിച്ചു. അവരൊരു മികച്ച വ്യക്തിത്വത്തിന് ഉടമയും അതുല്യയായ അഭിനേത്രിയുമായിരുന്നുവെന്നും, ഇപ്പോൾ സ്വർഗത്തിലെ ഒരു മാലാഖയായി മാറിയെന്ന കാര്യത്തിൽ ഒട്ടും സംശയമില്ലെന്നും അദ്ദേഹം ഓർത്തെടുത്തു.സക്കരിയ മുഹമ്മദ് സംവിധാനം ചെയ്ത് 2018-ൽ പുറത്തിറങ്ങിയ ‘സുഡാനി ഫ്രം നൈജീരിയ’ എന്ന ചിത്രത്തിൽ സാവിത്രി ശ്രീധരൻ അവതരിപ്പിച്ച ജമീല എന്ന അമ്മ കഥാപാത്രവും സാമുവൽ അവതരിപ്പിച്ച ‘സുഡു’ എന്ന വിദേശ ഫുട്ബോൾ താരവും തമ്മിലുള്ള ആത്മബന്ധം ഏറെ ശ്രദ്ധിക്കപ്പെട്ടിരുന്നു. ഭാഷയുടെയും സംസ്കാരത്തിന്റെയും അതിരുകൾ മായ്ച്ചുകളഞ്ഞ ആ ബന്ധത്തിലെ വൈകാരിക നിമിഷങ്ങൾ മലയാളി പ്രേക്ഷകരുടെ മനസ്സ് കവർന്നവയാണ്. സിനിമയുടെ ക്ലൈമാക്സിൽ സുഡു യാത്രയാകുമ്പോൾ റിയർവ്യൂ മിററിലൂടെ കൈവീശിക്കാണിക്കുന്ന സാവിത്രി ശ്രീധരന്റെ ചിത്രം പങ്കുവെച്ചുകൊണ്ടാണ് സാമുവൽ തന്റെ വേദന പങ്കുവെച്ചത്.”ഈ വാർത്ത ഞാൻ ഇപ്പോൾ മാത്രമാണ് അറിയുന്നത്. കേട്ടപ്പോൾ തന്നെ എന്റെ മനസ്സ് വല്ലാതെ തകർന്നുപോയി. എന്നോട് ക്ഷമിക്കണം, ഇതിനെക്കുറിച്ച് മാധ്യമങ്ങളോട് സംസാരിക്കാൻ പാകത്തിലുള്ള മാനസികാവസ്ഥയിലല്ല ഞാൻ ഉള്ളത്. അവർ മികച്ചൊരു വ്യക്തിയും അതുല്യയായ അഭിനേത്രിയുമായിരുന്നു. അവർ ഇപ്പോൾ സ്വർഗത്തിലെ ഒരു മാലാഖയാണെന്ന കാര്യത്തിൽ എനിക്ക് ഒട്ടും സംശയമില്ല,” എന്ന് മലയാളത്തിൽ കുറിച്ച ഇൻസ്റ്റഗ്രാം സ്റ്റോറിയിലൂടെയാണ് താരം അനുശോചനം അറിയിച്ചത്.കോഴിക്കോടൻ നാടകവേദികളിലൂടെ അഭിനയരംഗത്തേക്ക് കടന്നുവന്ന് പതിറ്റാണ്ടുകളോളം നാടക രംഗത്ത് സജീവമായിരുന്ന സാവിത്രി ശ്രീധരൻ, ‘സുഡാനി ഫ്രം നൈജീരിയ’യിലെ പ്രകടനത്തിന് മികച്ച സഹനടിക്കുള്ള സംസ്ഥാന ചലച്ചിത്ര പുരസ്‌കാരവും ദേശീയ ചലച്ചിത്ര പുരസ്‌കാരത്തിന്റെ പ്രത്യേക പരാമർശവും നേടിയിട്ടുണ്ട്. വൈറസ്, പട, മൈൽസ്റ്റോൺ മാർക്കറ്റ് തുടങ്ങി നിരവധി ചിത്രങ്ങളിലെ സ്വാഭാവിക അഭിനയത്തിലൂടെ പ്രേക്ഷകരുടെ പ്രിയങ്കരിയായി മാറിയ ശേഷമാണ് അവർ വിടവാങ്ങിയത്.