പടനിലത്ത് കടയുടെ മുന്നിലെ പാർക്കിങ് സ്ഥലം ഇടിഞ്ഞു

കുന്നമംഗലം: പടനിലം ജംക്‌ഷനു സമീപം കടയുടെ മുൻവശത്തെ പാർക്കിങ് സ്ഥലം ഇടിഞ്ഞു താഴ്ന്നു സമീപത്ത് പാർക്ക് ചെയ്തിരുന്ന ബൈക്കും മേശയും കുഴിയിലേക്കു വീണ് അപകടം. ഇന്നലെ രാത്രി 8 മണിയോടെ ആണു സംഭവം. ഈ സമയം പരിസരത്ത് ആളില്ലാത്തതിനാൽ ദുരന്തം ഒഴിവായി. മലിനജല സംസ്കരണത്തിനു സ്ഥാപിച്ച കുഴിയുടെ ഭാഗം തകർന്നാണു കുഴി രൂപപ്പെട്ടതെന്നാണു നാട്ടുകാർ പറയുന്നത്.കട നിലനിൽക്കുന്ന കെട്ടിടവും റോഡും തമ്മിൽ ബന്ധിപ്പിക്കുന്നതിനു മണ്ണിട്ട് ഉയർത്തി ടൈൽ വിരിച്ചിരുന്നു. ഈ ഭാഗത്തു വിള്ളൽ വീണതാണു കെട്ടിടത്തിന് മുൻവശം ഒന്നര മീറ്ററോളം താഴ്ചയിൽ പെട്ടെന്നു കുഴി ഉണ്ടാകാൻ ഇടയാക്കിയതെന്നാണു പ്രാഥമിക നിഗമനം. ഭൂമി വിള്ളൽ വീണു താഴ്ന്നു എന്ന വിധത്തിൽ സമൂഹമാധ്യമ പ്രചാരണം നാട്ടുകാരെ ആശങ്കയിലാക്കി. രാത്രിയോടെ ഈ ഭാഗം നികത്തി അപകട സാധ്യത ഒഴിവാക്കി