spot_img
Friday, November 20, 2026
Home Blog Page 129

ബസുകളിൽ വിദ്യാര്‍ത്ഥി കണ്‍സെഷന്‍ പ്രായം 27 വയസായി ഉയര്‍ത്തി എംവിഡി; ദൂരപരിധി 40 കിലോമീറ്ററാക്കി

0

തിരുവനന്തപുരം: വിദ്യാര്‍ത്ഥികളുടെ കണ്‍സെഷന്‍ പ്രായം 27 വയസായി ഉയര്‍ത്തി മോട്ടോര്‍ വഹന വകുപ്പ്. കണ്‍സെഷന്‍ ഉപയോഗിച്ച് യാത്ര ചെയ്യാവുന്ന പരിധി 40 കിലോമീറ്ററായി വര്‍ദ്ധിപ്പിച്ചു. രാവിലെ 6 മണി മുതല്‍ വൈകിട്ട് 7 മണി വരെയായിരിക്കും കണ്‍സെഷന്‍ യാത്രാസമയം. സര്‍ക്കാര്‍ അംഗീകൃത സ്ഥാപനങ്ങളിലെ മുഴുവന്‍ സമയ വിദ്യാര്‍ത്ഥികള്‍ക്ക് മാത്രമായിരിക്കും ആനുകൂല്യം ലഭ്യമാകുക. ക്രാഷ് കോഴ്‌സ് വിദ്യാര്‍ത്ഥികള്‍ക്കും പാര്‍ട്ട് ടൈംകാര്‍ക്കും കണ്‍സഷന്‍ ആനുകൂല്യം ലഭിക്കില്ല. വിദ്യാര്‍ത്ഥി ടിക്കറ്റ് കണ്‍സഷന്‍ (STC) ഇനി മുതല്‍ ഓണ്‍ലൈന്‍ വഴിയായിരിക്കും ലഭ്യമാക്കുക.

കണ്‍സഷന്‍ ആവശ്യമുള്ള വിദ്യാര്‍ത്ഥികള്‍ ‘MVD Leads’ എന്ന ആപ്പിലൂടെയാണ് അപേക്ഷിക്കേണ്ടത്. ആദ്യഘട്ടമായി വിദ്യാഭ്യാസ സ്ഥാപനങ്ങള്‍ മോട്ടോര്‍ വാഹന വകുപ്പ് പരിശോധന നടത്തി, സ്ഥാപനങ്ങള്‍ക്ക് ആപ്പില്‍ അനുമതി നല്‍കും. ഇതിനുശേഷമായിരിക്കണം വിദ്യാര്‍ത്ഥികള്‍ കണ്‍സഷനായുള്ള അപേക്ഷ സമര്‍പ്പിക്കേണ്ടത്.വിദ്യാര്‍ത്ഥി അപേക്ഷിക്കുന്നതോടെ അതത് വിദ്യാഭ്യാസ സ്ഥാപനങ്ങള്‍ക്ക് ആപ്പ് വഴി അറിയിപ്പ് ലഭിക്കും. വിദ്യാര്‍ത്ഥി അവിടെത്തന്നെയാണ് പഠിക്കുന്നതെന്ന് എംവിഡി ഉറപ്പാക്കിയ ശേഷമായിരിക്കും കണ്‍സഷന്‍ അനുവദിക്കുക. സ്വകാര്യ ബസുകളിലെ കണ്‍സഷന്‍ തര്‍ക്കങ്ങളും വിദ്യാര്‍ത്ഥികളുടെ തുടര്‍ച്ചയായ പരാതികളും പരിഗണിച്ചാണ് നടപടി.

കള്ളാടി മണ്ണിടിച്ചില്‍ ദുരന്തം; അവസാനത്തെയാളുടെ മൃതദേഹവും കണ്ടെത്തി

0

വയനാട്: കള്ളാടി തുരങ്കപാത നിർമ്മാണ മേഖലയിലുണ്ടായ മണ്ണിടിച്ചിൽ ദുരന്തത്തിൽ കാണാതായ അവസാനത്തെയാളുടെ മൃതദേഹവും കണ്ടെടുത്തു. കൺസ്ട്രക്ഷൻ മാനേജരായ വിക്രം റാണയുടെ മൃതദേഹമാണ് ഏറ്റവും ഒടുവിലായി രക്ഷാപ്രവർത്തകർ കണ്ടെത്തിയത്. ഇതോടെ കള്ളാടി ദുരന്തത്തിൽ മരിച്ചവരുടെ ആകെ എണ്ണം എട്ടായി ഉയർന്നു.രണ്ടാം സോണും പുഴയും കേന്ദ്രീകരിച്ച് നടത്തിയ ഊർജിതമായ തിരച്ചിലിലാണ് വിക്രം റാണയുടെ മൃതദേഹം ലഭിച്ചത്. ഇതരസംസ്ഥാന തൊഴിലാളികളും കൺസ്ട്രക്ഷൻ കമ്പനി ജീവനക്കാരുമാണ് അപകടത്തിൽപ്പെട്ടത്.

രാഹുൽ ശർമ്മ (സൈറ്റ് എൻജിനീയർ), മുഹമ്മദ് ഇമ്രാൻ (എക്സ്കവേറ്റർ ഓപ്പറേറ്റർ), അസ്ഹറുദ്ദീൻ അൻസാരി (സർവേയർ), അൻമോൾ ദൊദ്രായി, വികാസ് കുമാർ സിംഗ്, ചന്ദ്രഭാൻ പാൽ, രാകേഷ് ഗുചൈത്, വിക്രം റാണ എന്നിവരാണ് മരണപ്പെട്ടത്. ദുരന്തത്തിന്റെ യഥാർത്ഥ കാരണം കണ്ടെത്താനും കരാർ വ്യവസ്ഥകളും പരിസ്ഥിതി അനുമതികളും പരിശോധിക്കാനും സർക്കാർ ഭൗമശാസ്ത്രജ്ഞൻ ഡോ. സി. പി. രാജേന്ദ്രന്റെ നേതൃത്വത്തിൽ അഞ്ചംഗ സമിതിയെ നിയോഗിച്ചിട്ടുണ്ട്. ഒരു മാസത്തിനകം സമിതി റിപ്പോർട്ട് സമർപ്പിക്കും.

ഡബിളടിച്ച് ബെല്ലിങ്ങാം; നോർവേ ഉയർത്തിയ വെല്ലുവിളി മറികടന്ന് ഇംഗ്ലണ്ട് സെമിയിൽ.

0

മയാമി : നോർവേ ഉയർത്തിയ കടുത്ത പോരാട്ടം അതിജീവിച്ച് ഇംഗ്ലണ്ട് ലോകകപ്പ് സെമിയിൽ. ജൂഡ് ബെല്ലിങ്ങാം ഇരട്ട ഗോളുമായി തിളങ്ങിയ മത്സരത്തിൽ ഒന്നിനെതിരേ രണ്ട് ഗോളുകൾക്കായിരുന്നു ഇംഗ്ലീഷ് ടീമിന്റെ ജയം. എക്‌സ്ട്രാ ടൈമിലായിരുന്നു ബെല്ലിങ്ങാമിന്റെ വിജയ ഗോൾ. 36-ാം മിനിറ്റിൽ ആൻഡ്രിയാസ് ഷെൽഡറപ്പിലൂടെ മുന്നിലെത്തിയ നോർവേയ്‌ക്കെതിരേ രണ്ടു ഗോൾ തിരിച്ചടിച്ചാണ് ഇംഗ്ലണ്ട് സെമി ടിക്കറ്റ് ഉറപ്പാക്കിയത്.

അർജന്റീന – സ്വിറ്റ്‌സർലൻഡ് ക്വാർട്ടർ വിജയികളെ സെമിയിൽ ഇംഗ്ലണ്ട് നേരിടും. ഈ ലോകകപ്പിൽ അവിശ്വസനീയ മുന്നേറ്റം നടത്തിയ നോർവേ അങ്ങനെ ക്വാർട്ടറിൽ മികച്ച പോരാട്ടം കാഴ്ചവെച്ച ശേഷം മടങ്ങി. വാറിന്റെ ഇടപെടലിൽ നേടിയ ഒരു ഗോൾ നിഷേധിക്കപ്പെട്ടത് നോർവേയ്ക്ക് നിർഭാഗ്യമായി.പതിഞ്ഞ തുടക്കമായിരുന്നു മത്സരത്തിന്റേത്. തുടക്കത്തിൽ ഇരു ഭാഗത്തു നിന്നും കാര്യമായ മുന്നേറ്റങ്ങളൊന്നും ഉണ്ടായില്ല. 16-ാം മിനിറ്റിലാണ് ഇംഗ്ലണ്ടിന്റെ ആദ്യ അറ്റാക്ക് വരുന്നത്. പിന്നീട് 23-ാം മദുഎകെയുടെ ക്രോസിൽ നിന്ന് നിക്കോ ഒറെയ്‌ലിക്ക് മികച്ച അവസരം ലഭിച്ചെങ്കിലും താരത്തിന്റെ ഫസ്റ്റ് ടച്ച് പിഴച്ചു.

അതൊരു ഗോൾ കിക്ക് മാത്രമായി.ആദ്യ ഹൈഡ്രേഷൻ ബ്രേക്കിന് ശേഷം നോർവേ ആക്രമിച്ച് കളിക്കാനാരംഭിച്ചു. 33-ാം മിനിറ്റിൽ ബോക്‌സിൽ ഇംഗ്ലണ്ട് പ്രതിരോധത്തിന് സംഭവിച്ച പിഴവിൽ ഭാഗ്യം കൊണ്ടാണ് ഗോൾ വീഴാതിരുന്നത്. പന്ത് ബോക്‌സിലുണ്ടായിരുന്ന ഹാളണ്ടിന് ലഭിക്കും മുമ്പ് ജോർദാൻ പിക്‌ഫോർഡ് പിടിച്ചെടുത്തു.36-ാം മിനിറ്റിൽ ആൻഡ്രിയാസ് ഷെൽഡറപ്പിലൂടെ നോർവേ മുന്നിലെത്തി. ഹാരി കെയ്‌നിൽ നിന്ന് പന്ത് തട്ടിയെടുത്ത ബെർഗയുടെ നീക്കമാണ് ഗോളിന് വഴിയൊരുക്കിയത്. ശേഷം പന്ത് ലഭിച്ച മാർട്ടിൻ ഒഡെഗാർഡ് അത് ഷെൽഡറപ്പിന് നീട്ടി. ബോക്‌സിന്റെ ഇടതു ഭാഗത്തുനിന്നുള്ള ഷെൽഡറപ്പിന്റെ ഇടംകാലനടി ഇംഗ്ലീഷ് ഗോളി ജോർദാൻ പിക്‌ഫോർഡിന്റെ കൈയിൽ തട്ടി വലയിൽ. തന്നെ ഫൗൾ ചെയ്‌തെന്ന് കെയ്ൻ വാദിച്ചെങ്കിലും റഫറി ഗോൾ അനുവദിച്ചു.

പിന്നാലെ 44-ാം മിനിറ്റിലും നോർവേയ്ക്ക് ഒരു സുവർണാവസരം ലഭിച്ചതാണ്. ഇംഗ്ലണ്ട് ബോക്‌സിൽ ജോൺ സ്‌റ്റോൺസ് മാത്രം ശേഷിക്കേ അലക്‌സാണ്ടർ സോർലോത്ത് പന്തുമായി മുന്നേറുകയായിരുന്നു. സോർലോത്തിന് പന്ത് ഹാളണ്ടിന് പാസ് ചെയ്യാൻ ധാരാളം സമയമുണ്ടായിരുന്നെങ്കിലും ചെയ്തില്ല. ഒറ്റയ്ക്ക് ബോക്‌സിലേക്ക് കയറിയ സോർലോത്തിന്റെ ഷോട്ട് സ്‌റ്റോൺസ് കൃത്യമായി തടയുകയും ചെയ്തു.മത്സരം ആദ്യ പകുതിയുടെ ഇൻജുറി ടൈമിലേക്ക് കടന്നതോടെ ഇംഗ്ലണ്ട് ഗോൾ തിരിച്ചടിക്കാനുള്ള വ്യഗ്രതയിലായിരുന്നു. ആന്തണി ഗോർഡന്റെ ഒരു നീക്കം ഫലം കാണുകയും ചെയ്തു. പന്തുമായി മുന്നേറി ഗോർഡൻ നൽകിയ ക്രോസ് ബെല്ലിങ്ങാം വലയിലെത്തിച്ചു.

ഇംഗ്ലണ്ട് ഒപ്പത്തിനൊപ്പം. പിന്നാലെ ബെല്ലിങ്ങാമിന്റെ പാസിൽ നിന്ന് ഹാരി കെയ്ൻ ഒരു ലോബിലൂടെ വലകുലുക്കിയെങ്കിലും ഓഫ്‌സൈഡായി.രണ്ടാം പകുതി ഇംഗ്ലണ്ട് തുടങ്ങിയതു തന്നെ പോസ്റ്റീവായിട്ടായിരുന്നു. രണ്ടാം പകുതിയുടെ തുടക്കത്തിൽ മികച്ച നീക്കങ്ങൾ ഇംഗ്ലണ്ടിന്റെ ഭാഗത്തുനിന്നുണ്ടായി.55-ാം മിനിറ്റിൽ ഒരു കോർണറിൽ നിന്ന് നോർവേ സ്‌കോർ ചെയ്‌തെങ്കിലും ഗോൾ നിഷേധിക്കപ്പെട്ടു. കോർണറിനിടെ ഹാളണ്ട് ഇംഗ്ലീഷ് താരം ജോൺ സ്‌റ്റോൺസിനെ തള്ളിയിട്ടതിനെ തുടർന്നായിരുന്നു ഇത്.

റഫറി ക്ലെമന്റ് ടർപിൻ മോണിറ്ററിൽ റീപ്ലേ കണ്ടാണ് ഗോൾ നിഷേധിച്ചത്.മത്സരം 70-ാം മിനിറ്റ് പിന്നിട്ടതിനു പിന്നാലെ നോർവേയുടെ ഭാഗത്തു നിന്നും ഒന്നിനു പിറകെ ഒന്നായി ആക്രമണങ്ങൾ വന്നു. 76-ാം മിനിറ്റിൽ അവർ ഗോളിനടുത്തെത്തിയെങ്കിലും ക്രോസ് ബാർ തടസമായി. ഒർസൻസ് എടുത്ത കോർണറിൽ നിന്നുള്ള അയെറിന്റെ ഹെഡർ ക്രോസ്ബാറിലിടിച്ച് മടങ്ങുകയായിരുന്നു.93-ാം മിനിറ്റിൽ ബെല്ലിങ്ങാമിലൂടെ ഇംഗ്ലണ്ട് രണ്ടാം ഗോൾ നേടി. പകരക്കാരനായി എത്തിയ മോർഗൻ റോജേഴ്‌സിന്റെ ഷോട്ട് പിടിച്ചെടുക്കുന്നതിൽ നോർവേ ഗോളി ഓർഹാൻ നീലാൻഡിന് സംഭവിച്ച പിഴവാണ് ഗോളിന് കാരണമായത്.

നീലാൻഡിന്റെ കൈയിൽ തട്ടി മുന്നിലേക്കുവന്ന പന്ത് ഒട്ടും സമയം കളയാതെ ബെല്ലിങ്ങാം വലയിലാക്കി. മത്സരത്തിൽ താരത്തിന്റെ രണ്ടാം ഗോൾ. ഈ ലോകകപ്പിൽ താരത്തിന്റെ അഞ്ചാം ഗോളും.99-ാം മിനിറ്റിൽ സ്‌പെൻസിനെ ഓസ്‌കാർ ബോബ് ബോക്‌സിൽ വീഴ്ത്തിയതിന് റഫറി ഇംഗ്ലണ്ടിന് അനുകൂലമായി ആദ്യം പെനാൽറ്റി വിധിച്ചെങ്കിലും വാർ പരിശോധനയിൽ ഫൗളല്ലെന്ന് കണ്ടെത്തിയതിനെ തുടർന്ന് പെനാൽറ്റി നിഷേധിച്ചു.എക്‌സ്ട്രാ ടൈമിൽ വീണ്ടും ഇംഗ്ലണ്ട് ഗോളിനടുത്തെത്തിയെങ്കിലും നോർവേ ഗോളി ഓർഹാൻ നീലാൻഡിന്റെ ഇടപെടൽ നിർണായകമായി.

സഹോദരന്റെ മരണ വിവരം അറിഞ്ഞതിനു പിന്നാലെ സഹോദരിയും മരിച്ചു.

0

കോഴിക്കോട് : സഹോദരന്റെ മരണ വാര്‍ത്ത അറിഞ്ഞ് മരണ വീട്ടിലെത്തിയ സഹോദരിയും മരിച്ചു. ഫ്രാന്‍സിസ് റോഡ് മനന്തലപ്പാലം സ്വദേശി പി.ടി. നാസറും (50) മരണ വിവരമറിഞ്ഞ് വീട്ടിലെത്തിയ സഹോദരി നസീമയും (47) ആണ് മരിച്ചത്. രാവിലെയാണ് നാസര്‍ മരണപ്പെട്ടത്. ഈ വാര്‍ത്തയറിഞ്ഞ് നാസറിന്റെ വീട്ടിലെത്തിയ നസീമ അവിടെ കുഴഞ്ഞു വീഴുകയായിരുന്നു. സ്വകാര്യ ആശുപത്രിയില്‍ പ്രവേശിപ്പിച്ചെങ്കിലും മരിച്ചു. തെസ്‌നിയാണ് നാസറിന്റെ ഭാര്യ. മക്കള്‍: സിയ ഫാത്തിമ, ഹയ ഫാത്തിമ. സഹോദരങ്ങള്‍: മമ്മദ് കോയ, മൊയ്തീന്‍ കോയ, പരേതരായ ആലിക്കോയ, സിദ്ദീഖ്.വെസ്റ്റ് മാങ്കാവിലെ എം.വി നജീബിന്റെ (ചന്ദ്രിക ദിനപത്രം, പന്നിയങ്കര മേഖല മുസ്‌ലിം ലീഗ് ജനറല്‍ സെക്രട്ടറി) ഭാര്യയാണ് മരിച്ച നസീമ. മക്കള്‍ : ദഹബീന, മുഹമ്മദ് യാസിം (യൂത്ത് ലീഗ് പന്നിയങ്കര മേഖല ട്രഷറര്‍), നഷ്വിന്‍ നവ്വാഫ് (എംഎസ്എഫ് സൗത്ത് മണ്ഡലം സെക്രട്ടറി). മരുമകന്‍: ഹാരിസ് ചേളാരി. രണ്ടു പേരുടെയും കബറടക്കം കണ്ണംപറമ്പ് കബര്‍സ്ഥാനില്‍ നടത്തി.

കോഴിക്കോട് റെയിൽവേ സ്റ്റേഷനിൽ തകർന്ന ക്ലോക്ക് ടവർ കെട്ടിടത്തിന്റെ മുകൾഭാഗം നീക്കം ചെയ്തു

0

കോഴിക്കോട്: റെയിൽവേ സ്റ്റേഷനിൽ വ്യാഴാഴ്ച തകർന്ന ക്ലോക്ക് ടവർ കെട്ടിടത്തിന്റെ മുകൾഭാഗം നീക്കം ചെയ്തു. ഉച്ചയ്ക്ക് മൂന്നാം പ്ലാറ്റ്ഫോമിനു സമീപത്തെ ട്രാക്കിലൂടെയും ട്രെയിനുകൾ കടത്തിവിട്ടു. ഉച്ചയ്ക്ക് 12.20 ന് ബെംഗളൂരു എക്സ്പ്രസാണ് ആദ്യമായി ട്രാക്കിലൂടെ എത്തിയത്. കണ്ണൂർ പാസഞ്ചറും കോഴിക്കോട് സ്റ്റേഷനിൽ നിന്നാണ് ശനിയാഴ്ച സർവീസ് നടത്തിയത്. രണ്ടു ദിവസങ്ങൾക്കുള്ളിൽ കെട്ടിട അവശിഷ്ടങ്ങൾ പൂർണമായും നീക്കി തിങ്കളാഴ്ചയോടെ രണ്ടാം ട്രാക്കും പ്രവർത്തന സജ്ജമാകുമെന്ന് റെയിൽവേ വൃത്തങ്ങൾ പറഞ്ഞു.രണ്ട് മൂന്ന് പ്ലാറ്റ്്ഫോമുകൾക്ക് ഇടയിൽ 138 വർഷത്തോളം പഴക്കമുളള ക്ലോക്ക് ടവറിന്റെ ഒരു ഭാഗമാണ് വ്യാഴാഴ്ച തകർന്നുവീണത്.

ഇതോടെ ഒന്ന്, നാല് പ്ലാറ്റ്ഫോമുകളിലൂടെ മാത്രമാണ് കഴിഞ്ഞ ദിവസം ട്രെയിൻ സർവീസുകൾ നടത്താനായത്. ശനിയാഴ്ച രാവിലെയോടെയാണ് ക്ലോക്ക് ടവറിന്റെ മുകൾ ഭാഗം നീക്കാനായത്. പാലക്കാട് ഡിവിഷനിലെ മുതിർന്ന റെയിൽവേ ഉദ്യോഗസ്ഥരുടെ മേൽനോട്ടത്തിൽ ഘട്ടംഘട്ടമായി തൊഴിലാളികൾ യന്ത്രസഹായത്തോടെ കെട്ടിട ഭാഗങ്ങൾ ഇടിച്ചിട്ട ശേഷം വടം ഉപയോഗിച്ച് ശേഷിക്കുന്ന ഭാഗങ്ങൾ പൊളിച്ചുനീക്കുകയായിരുന്നു.

ബ്രിട്ടിഷ് ഭരണ കാലയളവിൽ കുമ്മായക്കൂട്ട് ഉപയോഗിച്ച് വെട്ടുകല്ലുകൾ ചേർത്തു നിർമിച്ച നിർമാണമായതിനാലാണ് വടം ഉപയോഗിച്ച് 85 അടി ഉയരത്തിലുള്ള ഈ പൈതൃക മന്ദിരം മറിച്ചിടാനുളള ശ്രമം ആദ്യഘട്ടത്തിൽ തടസ്സപ്പെട്ടത്. തുടർന്ന് കെട്ടിടത്തിനു സമീപം പ്രത്യേക കോണി സ്ഥാപിച്ച് തൊഴിലാളികളെ നേരിട്ട് രംഗത്തിറക്കി കല്ലുകൾ ഒന്നൊന്നായി ഇളക്കി കെട്ടിട ഭാഗങ്ങൾ പൊളിക്കുകയായിരുന്നു. ഒന്നാം പ്ലാറ്റ്ഫോമിൽ ട്രെയിനുകൾ എത്തുന്ന ഇടവേളകളിൽ ഭാഗികമായി ജോലി നിർത്തി വച്ചാണ് കെട്ടിടം പൊളിച്ചുനീക്കുന്ന നടപടികൾ പുരോഗമിച്ചത്. പ്ലാറ്റ്ഫോമിൽ മണ്ണുമാന്തി യന്ത്രം എത്തിച്ച ശേഷം ട്രാക്കിലൂടെ എത്തിച്ച മെറ്റീരിയൽ ട്രെയിനിലെ(യൂട്ടിലിറ്റി ട്രാക്ക് വെഹിക്കിൾ) ഫ്ലാറ്റ് വാഗണുകളിലാണ് കെട്ടിടത്തിന്റെ അവശിഷ്ടങ്ങൾ നീക്കം ചെയ്യുന്നത്.

കരാർ കമ്പനിയായ റാങ്ക് പ്രോജക്റ്റ്സ് ആൻഡ് ഡവലപ്മെന്റ് പ്രൈവറ്റ് ലിമിറ്റഡ്(ആർപിഡിപിഎൽ) നിരുത്തരവാദപരമായ നടപടിയാണ് സ്വീകരിച്ചതെന്നും റെയിൽവേ ഡിആർഎം, ഡിജിഎം എന്നിവർ കൃത്യസമയത്ത് നിർമാണ പ്രവർത്തികളുടെ നിരീക്ഷണം നടത്തിയില്ലെന്നും സ്റ്റേഷനിൽ ശനിയാഴ്ച സന്ദർശനം നടത്തിയ എം.കെ.രാഘവൻ എംപി കുറ്റപ്പെടുത്തി. പൈലിങ് നടത്തുമ്പോൾ നിലവിലെ കെട്ടിടങ്ങളുടെ സ്ഥിരത ഉറപ്പാക്കുന്നതിന് ആരും ഒന്നും ചെയ്തില്ല. ഇതിൽ റെയിൽവേയിലെ മേലുദ്യോഗസ്ഥന്മാരും നിരുത്തരവാദപരമായാണ് പ്രവർത്തിച്ചതെന്നാണ് കരുതുന്നതെന്നും അദ്ദേഹം പറഞ്ഞു.ക്ലോക്ക് ടവർ തകർച്ച അന്വേഷിക്കാൻ റെയിൽവേ അന്വേഷണ സമിതിയെ നിയോഗിച്ചു. സീനിയർ ഡിവിഷനൽ സേഫ്റ്റി ഓഫിസർ ബെന്നി വർഗീസിന്റെ നേതൃത്വത്തിലുളള സംഘം ഇതിന്റെ ഭാഗമായി റെയിൽവേ ്സ്റ്റേഷനിൽ പരിശോധന തുടങ്ങി.

അതേസമയം, നിർമാണത്തിലെ അപാകതയിൽ കേരളത്തിൽ തന്നെ നടപടി നേരിട്ട കരാർ കമ്പനിയാണ് കോഴിക്കോട് നിർമാണപ്രവർത്തനങ്ങൾ നടത്തുന്നതെന്ന വിവരം പുറത്തുവന്നു.എറണാകുളം ജംക്‌ഷൻ നവീകരണത്തിൽ വീഴ്ച വരുത്തിയതിനാണ് റാങ്ക് കൺസ്ട്രക്‌ഷൻ കമ്പനിയെ 2025 ഒക്ടോബർ 29 ൽ മാറ്റിയതെന്ന വിവരമാണ് പുറത്തുവന്നത്. 2027 ജൂൺ 30 ന് കോഴിക്കോട് റെയിൽവേ സ്റ്റേഷൻ നവീകരണം പൂർത്തിയാക്കണമെന്നാണ് കരാർ. എന്നാൽ ഇതുവരെ ഈ ജോലിയുടെ 15 ശതമാനം പോലും പൂർത്തിയായില്ലെന്നും ആക്ഷേപമുണ്ട്.

ക്വാർട്ടർ ത്രില്ലർ; സ്വിസ്സ് പടയെ പറപ്പിച്ച് അർജന്റീന; മെസ്സിപ്പട സെമിയിലേക്ക്

0

ക്വർട്ടർ ഫൈനലിൽ സ്വിറ്റ്സർലൻഡിനെ ഒന്നിനെതിരെ മൂന്ന് ​ഗോളുകൾക്ക് തോൽപ്പിച്ച് അർജന്റീന. എക്സ്ട്രാ ടൈമിലായിരുന്നു അർജന്റീനയുടെ ജയം. മത്സരത്തിന്റെ സമ്പൂർണ ആധിപത്യം മെസ്സിപ്പടയ്ക്ക് ആയിരുന്നു. മത്സരത്തിന്റെ പത്താം മിനിറ്റിൽ തന്നെ ഒരു ​ഗോളിന് മുന്നിലെത്തിയ അർജന്റീനയെ രണ്ടാം പകുതിയിൽ സ്വിറ്റ്സർലൻഡ് ഒരു ​ഗോൾ മടക്കി സമനിലയിലാക്കുകയായിരുന്നു. തുടർന്ന് ഇഞ്ചുറി ടൈമിലും ഇരു ടീമുകൾക്കും ​ഗോൾ കണ്ടെത്താൻ കഴിയാതെ എക്സ്ട്രാ ടൈമിലേക്ക് മത്സരം കടക്കുകയായിരുന്നു.

10-ാം മിനിറ്റിൽ മാക് അലിസ്റ്റർ ആണ് അർജന്റീനയക്കായി ​ഗോൾ നേടിയത്. ​നിരവധി ​ഗോൾ അവസരങ്ങൾ അർജന്റീനൻ താരങ്ങൾ സൃഷ്ടിച്ചെങ്കിലും ​ഗോൾ നേടാൻ‌ കഴിഞ്ഞില്ല. രണ്ടാം പകുതിയിൽ 67-ാം മിനിറ്റിലാണ് സ്വിറ്റ്സർലൻ‍ഡിന്റെ സമനില ​ഗോൾ എത്തുന്നത്. ഡാൻ എൻഡോയെയാണ് ഗോൾ നേടിയത്. 72-ാം മിനിറ്റിൽ സ്വിസ്സ് താരം ബ്രീൽ എംബോളോ റെഡ് കാർഡ് കണ്ട് പുറത്തായതോടെ പത്ത് പേരായി ചുരുങ്ങിയായിരുന്നു സ്വിറ്റ്സർലൻഡ് കളിച്ചത്.മത്സരത്തിന്റെ എക്സ്ട്രാ ടൈമിൽ‌ സ്വിറ്റ്സർ‌ലൻഡിന്റെ ​ഗോൾ മുഖത്തായിരുന്നു അർജന്റീനൻ താരങ്ങൾ എങ്കിലും 112-ാം മിനിറ്റ് വരെ കാത്തിരിക്കേണ്ടി വന്നു ഒരു ലീഡ് ​ഗോൾ നേടാൻ. ഹൂലിയൻ അൽവാരസ് ആണ് ​ഗോൾ നേടി അർജന്റീനയെ മുന്നിലെത്തിച്ചത്. ബോക്സിന് പുറത്ത് വെച്ച് അടിച്ച ലോങ് റേ‍ഞ്ച് സ്വിസ് വല കുലുക്കുകയായിരുന്നു. എക്സ്ട്രാ ടൈമിന്റെ ഇ‍ഞ്ചുറി ടൈമിലാണ് അർജന്റീന വീണ്ടും ലീഡ് ഉയർത്തുന്നത്. ലൗട്ടാര മാർട്ടിനസ് ആണ് ​ഗോൾ നേടിയത്. അർജന്റീനയുടെ കൗണ്ടർ അറ്റാക്കിൽ കുടുങ്ങുകയായിരുന്നു സ്വിറ്റ്സർലൻഡ്. ജയത്തോടെ മെസ്സിപ്പട സെമിയിലേക്ക് കുതിച്ചു. ഇം​ഗ്ലണ്ടാണ് സെമിയിലെ അർജന്റീനയുടെ എതിരാളികൾ.

കൊല്ലത്ത് കെഎസ്ഇബി ജീവനക്കാരൻ ഷോക്കേറ്റ് മരിച്ചു.

0

കൊല്ലം: കൊല്ലം പുത്തൂരില്‍ കെഎസ്ഇബി ജീവനക്കാരന്‍ ഷോക്കേറ്റ് മരിച്ചു. ചവറ സ്വദേശി അല്‍ത്താഫ്(48) ആണ് മരിച്ചത്. ഇന്ന് വൈകിട്ട് നാല് മണി കഴിഞ്ഞായിരുന്നു സംഭവം. ആറ്റുവാശ്ശേരിയിലെ വീട്ടില്‍ വൈദ്യുതി നഷ്ടപ്പെട്ടെന്ന വിവരത്തെ തുടർന്ന് പരിശോധിക്കാനെത്തിയതാണ് ജീവനക്കാരന്‍.വൈദ്യുതി പോസ്റ്റില്‍ നിന്ന് വീട്ടിലേക്കുള്ള ലൈന്‍ പൊട്ടികിടക്കുകയായിരുന്നു. ഇത് ശരിയാക്കുന്നതിനിടെയാണ് അപകടം. ഉടന്‍ തന്നെ ഫയര്‍ഫോഴ്‌സ് എത്തി ജീവനക്കാരനെ താഴെയിറക്കി സിപിആര്‍ നല്‍കിയിരുന്നു. പിന്നാലെ അടുത്തുള്ള സ്വകാര്യ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല.

പൊന്മുടി ആറാംവളവിൽ പ്രിയദർശനി ബസിന് ബ്രേക്ക് നഷ്ടപ്പെട്ടു; ഡ്രൈവറുടെ സമയോചിതമായ ഇടപെടലിൽ വൻ അപകടം ഒഴിവായി.

0

തിരുവനന്തപുരം: പൊന്മുടിയില്‍ പ്രിയദര്‍ശിനി കെഎസ്ആര്‍ടിസി ബസ് അപകടത്തില്‍പ്പെട്ടു. ഡ്രൈവറുടെ സമയോചിതമായ ഇടപെടല്‍ മൂലം വന്‍ അപകടത്തില്‍ നിന്ന് തലനാരിഴയ്ക്കാണ് രക്ഷപ്പെട്ടത്. ഇന്ന് വൈകിട്ട് 5 മണിക്ക് ശേഷമായിരുന്നു അപകടം.പൊന്മുടിയില്‍ നിന്ന് തിരുവനന്തപുരത്തേക്ക് വരികയായിരുന്ന ബസിന്റെ ബ്രേക്ക് നഷ്ടപ്പെട്ടാണ് അപകടമുണ്ടായത്. നിയന്ത്രണം വിട്ട ബസ്സിനെ ആറാം വളവിലെ കോണ്‍ക്രീറ്റ് ഭിത്തിയിലിടിച്ച് ഡ്രൈവര്‍ നിര്‍ത്തുകയായിരുന്നു. വളവിലെ കുഴിയിലേക്ക് മറിയുമായിരുന്ന ബസ്സാണ് ഡ്രൈവര്‍ ഭിത്തിയിലിടിച്ച് നിര്‍ത്തിയത്.

ഡ്രൈവറുടെ മനസാന്നിധ്യം കാരണം വന്‍ ദുരന്തമാണ് ഒഴിവായത്. അപകട സമയത്ത് കെഎസ്ആര്‍ടിസി ബസ്സില്‍ നിറയെ യാത്രക്കാരുണ്ടായിരുന്നു. നെയ്യാറ്റിന്‍കരയില്‍ ഡിപ്പോയില്‍ നിന്ന് പൊന്മുടിയിലേക്ക് ആദ്യത്തെ സര്‍വീസ് നടത്തിയ പ്രിയദര്‍ശനി ബസ് ആണ് അപകടത്തില്‍പ്പെട്ടത്.

കേരള മാപ്പിള കലാ അക്കാദമി കേന്ദ്ര കമ്മറ്റി വൈക്കം മുഹമ്മദ് ബഷീർ അവാർഡ് അബ്ദു ചെറൂപ്പക്ക്‌.

0

കോഴിക്കോട്: കേരള മാപ്പിള കലാ അക്കാദമി കേന്ദ്ര കമ്മററി ഏർപ്പെടുത്തിയ വൈക്കം മുഹമ്മദ് ബഷീർ ശ്രേഷ്ട കേളി കർമ്മ പുരസ്കാരം പ്രശസ്ത എഴുത്തുകാരൻ ജമാൽ കൊച്ചങ്ങാടിയിൽ നിന്നും മാധ്യമ പ്രവർത്തകൻ അബദു ചെറൂപ്പ ഏറ്റുവാങ്ങി. പ്രശസ്ത എഴുത്തുകാരനും കഥാകൃത്തുമായ രാമനുണ്ണി, കേരള മാപ്പിള കലാ അക്കാദമി ദേശീയ ജനറൽ സെക്രട്ടറി കുന്ദമംഗലം സി കെ ആലിക്കുട്ടി, സലാം മാവൂർ, , കഥാകൃത്ത് അബു ഇരിങ്ങാട്ടിരി, ശിഷാബുദ്ദീൻ കിഴിശ്ശേരി, രാഹുൽ കൈമല, സുബൈർ കാഞ്ഞിരമുക്ക്. അൻസിൽ കാട്ടൂർ , മജീദ്ഹാജി അമ്പാട്ടക്കൽ, അഫ് മിഷ്, അമീർ , അജ്മൽ , ഹൻസൽ, അഫ്ഷിക് എന്നിവർ ചടങ്ങിൽ സംബന്ധിച്ചു , കൊല്ലരുതൊടുകയിൽ മുഹമ്മദ് റാസി സ്വാഗതവും മുബശ്ശിർ പാണരു കണ്ടത്തിൽ നന്ദിയും പറഞ്ഞു. കുന്ദമംഗലം സി കെ ആലിക്കുട്ടിയുടെ നേതൃത്വത്തിൽ ബഷീർ നോവലുകളിലെ കഥാപാത്രങ്ങളുടെ ആവിഷ്ക്കാരവും ചിത്രീകരണവും നടന്നു.ന്യൂസ് റിപ്പോർട്ടർ അബ്ദു ചെറൂപ്പ.

പ്രശസ്ത പിന്നണി ഗായിക എസ്.ജാനകി അന്തരിച്ചു.

0

ബെംഗളൂരു: അനുഗ്രഹീതമായ സ്വരമാധുര്യവും ആലാപനസിദ്ധിയുമായി ശ്രോതാക്കളുടെ ഹൃദയത്തിൽ കൂടുകൂട്ടിയ തെന്നിന്ത്യൻ വാനമ്പാടി എസ്.ജാനകി (88) അന്തരിച്ചു. മൈസൂരുവിലെ ആശുപത്രിയിൽ ചികിത്സയിലിരിക്കെ ആയിരുന്നു അന്ത്യം. തദ്ദേശിയവും വിദേശിയവുമായ ഇരുപതോളം ഭാഷകളിൽ പതിനായിരക്കണക്കിന് പാട്ടുകൾ പാടി.ആന്ധ്രാപ്രദേ‌ശിലെ ഗുണ്ടൂർ ജില്ലയിൽ 1938 ഏപ്രിൽ 23നായിരുന്നു എസ്. ജാനകിയുടെ ജനനം. പിതാവ് ശിസ്തില രാമമൂർത്തി ആയുർവേദ ഡോക്ടറായിരുന്നു. മാതാപിതാക്ക‌‌‌ൾ ചെ‌റുപ്പത്തിലേ മരിച്ചു.

അമ്മാവനായ ഡോ. ചന്ദ്രശേഖറിന്റെ സംരക്ഷണയിലാണ് ജാനകി പിന്നീട് വളർന്നത്. ചെ‌റുപ്പം മുതലേ സംഗീതവാസനയുണ്ടായിരുന്നെങ്കിലും ചില ഹൃസ്വകാല പഠനങ്ങളൊഴികെ ശാസ്ത്രിയസംഗീതം ആഴത്തിൽ പഠിക്കാനുള്ള അവസരങ്ങളൊന്നും ലഭിച്ചില്ല. 1956ൽ ആകാശവാണി നടത്തിയ അഖിലേന്ത്യാ സംഗീതമത്സരത്തിൽ പങ്കെടുത്ത് രണ്ടാം സ്ഥാനത്തിന് അർഹയായതാണ് ജാനകിക്ക് സംഗീതലോകത്തേക്കു വഴിതുറന്നത്.

രാഷ്ട്രപതി ഡോ. രാജേന്ദ്രപ്രസാദാണ് ജാനകിക്ക് അന്ന് പുരസ്കാരം നൽകിയത്. 1957ൽ മദ്രാസിലെ എവിഎം സ്റ്റുഡിയോയിൽ ജോലി ലഭിച്ചു. പ്രശസ്ത സംഗീത സംവിധായകൻ ചലപതി റാവുവിനുവേണ്ടി വിധിയിൻ വിളയാട്ട് എന്ന തമിഴ് ചിത്രത്തിൽ പാടിയാണ് ജാനകി ചലച്ചിത്ര സംഗീതലോകത്തേക്ക് കടന്നുവരുന്നത്. ചിത്രം പുറത്തിറങ്ങിയില്ലെങ്കിലും മലയാളം ഉൾപ്പെടെ ആറു ഭാഷകളിൽ പാടുവാൻ ആ വർഷം തന്നെ അവസരം ലഭിച്ചു. 1957ൽ പുറത്തിറങ്ങിയ മിന്നുന്നതെല്ലാം പൊന്നല്ല എന്ന ചിത്രത്തിലെ ഇരുൾ മൂടുകയോ എൻ വഴിയിൽ എന്ന ഗാനമാണ് മലയാളത്തിൽ ആദ്യമായി പാടിയത്.

1962ൽ പുറത്തിറങ്ങിയ കൊഞ്ചും ചിലങ്കൈ എന്ന തമിഴ്ചിത്രത്തിൽ ജാനകി പാടിയ ശിങ്കാര വേലനെ ദേവ എന്ന പാട്ട് തെന്നിന്ത്യൻ സംഗീതലോകത്തെ ഇളക്കിമറിച്ചു. സിനിമാസംഗീതമേഖലയിൽ ജാനകി തന്റെ സ്ഥാനം ഉറപ്പിക്കുകയും ചെയ്തു.‌മലയാളത്തിലെ ഒട്ടുമിക്ക സംഗീത സംവിധായകർക്കുവേണ്ടിയും ജാനകി പാടിയിട്ടുണ്ടെങ്കിലും എംഎസ് ബാബുരാജിന്റെ ഈണങ്ങളിലൂടെയാണ് ജാനകിയുടെ സ്വരമാധുരി മലയാളികൾക്ക് ഏറ്റവുമധികം അനുഭവവേദ്യമായത്. തളിരിട്ട കിനാക്കൾതൻ..(മൂടുപടം), അഞ്ജന കണ്ണെഴുതീ…(തച്ചോളി ഒതേനൻ), സൂര്യകാന്തീ..(കാട്ടുപൂവ്), ഒരു കൊച്ചു സ്വപ്നത്തിൻ (തറവാട്ടമ്മ), താമര കുമ്പിളിലല്ലോ മമഹൃദയം (അന്വേഷിച്ചു കണ്ടെത്തിയില്ല) തുടങ്ങിയ ഗാനങ്ങൾ ഉദാഹരണം.

മഞ്ഞണിപ്പൂനിലാവിൽ (നഗരമേ നന്ദി, സംഗീതം– കെ. രാഘവൻ), നിദ്രതൻ നീരാഴി (പകൽക്കിനാവ്, സംഗീതം ചിദംബരനാഥ്), ഇന്നലെ നീയൊരു സുന്ദര രാഗമായെൻ (സ്ത്രീ, സംഗീതം ദക്ഷിണമൂർത്തി), സന്ധ്യേ കണ്ണീരിതെന്തേ (മദനോത്സവം, സലീൽ ചൗധരി), ഉണരൂ വേഗം നീ (മൂടൽമഞ്ഞ്, ഉഷാഖന്ന), ആ നിമിഷത്തിന്റെ നിർവൃതിയിൽ (ചന്ദ്രകാന്തം, എംഎസ് വിശ്വനാഥൻ), ഇളം മഞ്ഞിൻ കുളിരുമായി (എന്നിഷ്ടം നിന്നിഷ്ടം, കണ്ണൂർ രാജൻ), മാനത്തിൻ മുറ്റത്ത് (കറുത്ത പൗർണമി, എംകെ അർജുനൻ), ചിരിക്കുമ്പോൾ കൂടെ ചിരിക്കാൻ (കടൽ, എംബി ശ്രീനിവാസൻ), മഞ്ഞണിക്കൊമ്പിൽ (മഞ്ഞിൽ വിരിഞ്ഞ പൂക്കൾ, ജെറി അമൽദേവ്), ഗോപികേ നിൻ വിരൽ (കാറ്റത്തെ കിളിക്കൂട്, ജോൺസൺ), തേനും വയമ്പും (തേനും വയമ്പും, രവീന്ദ്രൻ) മൈനാകം (തൃഷ്ണ, ശ്യാം) നാഥാ നീവരും കാലൊച്ച (ചാമരം, എംജി രാധാകൃഷ്ണൻ) തുടങ്ങിയ നൂറുകണക്കിന് അനശ്വരഗാനങ്ങളിലൂടെ എസ് ജാനകിയുടെ മാന്ത്രികശബ്ദം മലയാളിഹൃദയങ്ങളെ വിവിധ വികാരങ്ങളിൽ ഊയലാടിച്ചു.ദക്ഷിണേന്ത്യൻ ഭാഷകൾക്ക് പുറമേ ഹിന്ദി, ബംഗാളി, പഞ്ചാബി, ഒറിയ, ഇംഗ്ളീഷ്, സംസ്കൃതം, കൊങ്ങിണി, തുളു, സൗരാഷ്ട്ര, ബഡഗ, സിംഹള, ജർമൻ ഭാഷകളിലും ജാനകി പാടിയിട്ടുണ്ട്. മികച്ച ഗായികയ്ക്കുള്ള ദേശിയ അവാർഡ് നാലുതവണ എസ്.ജാനകിയ്ക്ക് ലഭിച്ചു.

ഓപ്പോൾ എന്ന സിനിമയിലെ ഏറ്റുമാനൂരമ്പലത്തിൽ എന്നു തുടങ്ങുന്ന പാട്ടാണ് 1981ലെ ദേശീയ അവാർഡിന് ജാനകിയെ അർഹയാക്കിയത്. രണ്ടു തവണ തമിഴ് ഗാനങ്ങളും ഒരു തവണ തെലുങ്കുമാണ് അവർക്ക് ദേശിയ പുരസ്കാരം സമ്മാനിച്ചത്. മികച്ച ഗായികയ്ക്കുള്ള കേരള സംസ്ഥാന അവാർഡ് 11 തവണയും ആന്ധ്രാ സർക്കാരിൻറ അവാർഡ് 10 തവണയും തമിഴ്നാട് സംസ്ഥാന അവാർഡ് ഏഴു പ്രാവശ്യവും മികച്ച ഗായികയ്ക്കുള്ള ഒറീസ സർക്കാരിന്റെ അവാർഡ് ഒരു തവണയും എസ്. ജാനകിയ്ക്ക് ലഭിച്ചുപരേതനായ വി.രാമപ്രസാദാണ് എസ്. ജാനകിയുടെ ഭർത്താവ്. 1958ലായിരുന്നു വിവാഹം. 1990ൽ അദ്ദേഹം മരണപ്പെട്ടു. ഏക മകൻ മുരളീകൃഷ്ണ (പരേതൻ). മരുമകൾ ഉമ. പേരക്കു‌ട്ടികൾ അമൃതവർഷിണി, അപ്സര.