spot_img
Friday, November 20, 2026
Home Blog Page 164

മെസിയുടെ ഇരട്ടപ്രഹരം: ഓസ്ട്രിയൻ പ്രതിരോധം തകർത്ത് അർജന്റീന.

0

ഡാലസ്: ഓസ്ട്രിയയെ തകർത്ത് നിലവിലെ ചാമ്പ്യൻമാരായ അർജന്‍റീന ലോകകപ്പിന്‍റെ നോക്കൗട്ടിലേക്ക്(റൗണ്ട് ഓഫ് 32) യോഗ്യത നേടി. ടെക്സസിലെ ഡാളസ് സ്റ്റേഡിയത്തിൽ നടന്ന ഗ്രൂപ്പ് ജെ-യിലെ ആവേശപ്പോരാട്ടത്തിൽ എതിരില്ലാത്ത രണ്ട് ഗോളുകൾക്കാണ് (2-0) അർജന്റീന ഓസ്ട്രിയയെ തകർത്തത്.ലോകകപ്പ് ചരിത്രത്തിൽ ഏറ്റവും കൂടുതൽ ഗോൾ നേടുന്ന താരമെന്ന ജർമ്മനിയുടെ ഇതിഹാസതാരം മിറോസ്ലാവ് ക്ലോസെയുടെ റെക്കോർഡും തകർത്താണ് മെസി അര്‍ജന്‍റീനക്ക് ജയവും നോക്കൗട്ട് ടിക്കറ്റും സമ്മാനിച്ചത്.മത്സരത്തിന്‍റെ തുടക്കം അർജന്‍റീനയ്ക്ക് നാടകീയത നിറഞ്ഞതായിരുന്നു.

8-ാം മിനിറ്റിൽ ലൗതാരോ മാര്‍ട്ടിനെസിനെ ബോക്സില്‍ വീഴ്ത്തിയതിന് വാര്‍ പരിശോധനക്കൊടുിവില്‍ ലഭിച്ച പെനാൽറ്റി എടുത്ത നായകൻ ലിയോണൽ മെസിക്ക് പിഴച്ചു.മെസിയുടെ ഷോട്ട് പോസ്റ്റിന് പുറത്തേക്ക് പോയതോടെ ഡാളസ് സ്റ്റേഡിയം നിശ്ചലമായി. എന്നാൽ പെനാൽറ്റി നഷ്ടത്തിന്റെ നിരാശ അധികനേരം നീണ്ടുനിന്നില്ല. 38-ാം മിനിറ്റിൽ തകർപ്പൻ മുന്നേറ്റത്തിലൂടെ മെസി ഓസ്ട്രിയൻ പ്രതിരോധക്കോട്ട പൊളിച്ച് ആദ്യ ഗോൾ നേടി (1-0).

സംസ്ഥാനത്ത് പകർച്ചവ്യാധി വ്യാപനം രൂക്ഷം: ഇന്ന് ചികിത്സ തേടിയത് 13,189 പേർ.

0

സംസ്ഥാനത്ത് പകർച്ചവ്യാധി വ്യാപനം രൂക്ഷമായി തുടരുന്നു. ഇന്ന് പകർച്ച പനിമൂലം 13189 പേരാണ് ഇന്ന് ചികിത്സ തേടിയത്. കഴിഞ്ഞദിവസം ഉണ്ടായ 8 മരണം അമീബിക് മസ്തിഷ്ക ജ്വരം, എലിപ്പനി, ഡെങ്കിപനി ബാധിച്ചെന്നും സ്ഥിരീകരണം. ഡെങ്കി- 56, ചിക്കൻ പോക്സ് – 88, ഷിഗെല്ല – 10, എലിപ്പനി -7, മലേറിയ – 2, മഞ്ഞപ്പിത്തം -25 എന്നിങ്ങനെയാണ് റിപ്പോർട്ട് ചെയ്തിരിക്കുന്നത്. ഈ മാസം ഇതുവരെ സംസ്ഥാനത്ത് 140 പേർക്കാണ് ഷിഗെല്ല സ്ഥിരീകരിച്ചത്. ആറ് മരണവും റിപ്പോർട്ട് ചെയ്തിട്ടുണ്ട്.ഡെങ്കിപ്പനി ബാധിച്ച് പാലക്കാട് അങ്കണവാടി ജീവനക്കാരി മരിച്ചു. പാലക്കാട് ചിറ്റൂർ പെരുമാട്ടി പള്ളിച്ചാർത്ത്ക്കുളമ്പ് സ്വദേശിനി ഗീതയാണ് ഡെങ്കിപ്പനി ബാധിച്ച് മരിച്ചത്.

കോഴിക്കോട് നാദാപുരത്ത് ഏഴുവയസുകാരിക്ക് ഷിഗെല്ല സ്ഥിരീകരിച്ചു. ജില്ലയിൽ ഈ മാസം മാത്രം ഡെങ്കിപ്പനി ബാധിച്ച് മരിച്ചവർ മൂന്നായി. കോഴിക്കോട് നാദാപുരത്ത് ഏഴ് വയസുകാരിക്ക് ഷിഗെല്ല സ്ഥിരീകരിച്ചു. കഴിഞ്ഞ ദിവസം ആശുപത്രിയിൽ നടത്തിയ പരിശോധനയിലാണ് രോഗം കണ്ടെത്തിയത്.ഇന്നലെ കോഴിക്കോട് മാവൂർ സ്വദേശിനിയായ വീട്ടമ്മയും ഷിഗെല്ല ബാധിച്ച് മരിച്ചിരുന്നു.ഈ വർഷം ഇതുവരെ 216 പേർക്ക് ഷിഗെല്ല രോഗബാധ സ്ഥിരീകരിച്ചു. നിപ ബാധിച്ച് കോഴിക്കോട് മെഡിക്കൽ കോളജ് ആശുപത്രിയിൽ കഴിയുന്ന 43-കാരന്റെ ആരോഗ്യനില അതീവഗുരുതരമായി തുടരുന്നു.

*

ഫുട്ബോളിലെ 2 ഗിന്നസ് റെക്കോഡിനുടമ,കൗമാരത്തിൽ വീടുവിട്ടിറങ്ങി,ബെൽജിയത്തെ പിടിച്ചുകെട്ടിയ ഇറാൻ കരുത്തൻ.

0

ഗോൾകീപ്പർമാർക്ക് ഇത് നല്ല കാലമാണെന്ന് തോന്നുന്നു. ഫിഫ ലോകകപ്പിന്റെ ഗ്രൂപ്പ് മത്സരങ്ങൾ അവസാന ഘട്ടത്തിലേക്ക് കടക്കുമ്പോൾ കേപ് വെർദെ, ക്യുറാസോ തുടങ്ങിയ കുഞ്ഞൻ രാജ്യങ്ങളുടെ ഗോൾകീപ്പർമാരുടെ വീരോചിത പ്രകടനങ്ങൾ നമ്മൾ കണ്ടു കഴിഞ്ഞു.

വോസിൻഹയും എലോയ് റൂമുമെല്ലാം ഫുട്‌ബോൾ ആരാധകരുടെ മനസിൽ ഇടംനേടിക്കഴിഞ്ഞു. അക്കൂട്ടത്തിലേക്കിതാ പുതിയൊരു എൻട്രി, ഇറാൻ ഗോൾകീപ്പർ അലിറെസ ബെയ്റൻവാണ്ട്. ഫിഫ റാങ്കിങ്ങിൽ ഒമ്പതാം സ്ഥാനത്തുള്ള ബെൽജിയത്തെ മണിക്കൂറുകൾക്ക് മുമ്പ് ഇറാൻ പിടിച്ചുകെട്ടിയത് (0-0) അലിറെസയുടെ തകർപ്പൻ പ്രകടനത്തിന്റെ ബലത്തിലായിരുന്നു. ഇത്തവണ അസാധാരണമായ പല ഗോൾകീപ്പിങ് പ്രകടനങ്ങൾ നമ്മൾ കണ്ടിട്ടുണ്ടെങ്കിലും അലിറെസയുടെ കഥ അദ്ദേഹത്തെ മറ്റുള്ളവരിൽ നിന്നും തീർത്തും വ്യത്യസ്തനാക്കുന്നു.

ഇറാനിലെ ലൊറെസ്താൻ പ്രവിശ്യയിലെ ഖൊറമാബാദിൽ ഒരു കുർദിഷ് ലാക് നാടോടി കുടുംബത്തിലാണ് അദ്ദേഹത്തിന്റെ ജനനം. കടുത്ത ദാരിദ്ര്യത്തിലായിരുന്നു അദ്ദേഹത്തിന്റെ കുട്ടിക്കാലം. മകൻ ഫുട്‌ബോൾ കളിക്കുന്നതിനെ പിതാവ് ശക്തമായി എതിർത്തിരുന്നു. ഫുട്‌ബോൾ ഒരു ആഡംബരമാണെന്നും ഗോൾകീപ്പിങ് ഗ്ലൗസിനായി പണം ചിലവാക്കുന്നത് വെറുതെയാണെന്നുമാണ് വീട്ടുകാർ കരുതിയിരുന്നത്. ആഡംബരങ്ങളിൽ നിന്ന് അകന്ന് വളരെ ലളിതമായ സാഹചര്യങ്ങളിൽ വളർന്ന അലിറെസ പിന്നീട് പ്രൊഫഷണൽ ഫുട്‌ബോൾ എന്ന തന്റെ സ്വപ്‌നത്തിനായി കൗമാരപ്രായത്തിൽ തന്നെ വീടുവിട്ടിറങ്ങി.

ടെഹ്‌റാനിലേക്കായിരുന്നു യാത്ര. ഫുട്‌ബോൾ ക്ലബ്ബുകൾക്ക് പുറത്തുള്ള തെരുവുകളിലാണ് മാസങ്ങളോളം അദ്ദേഹം അന്തിയുറങ്ങിയത്. ഭക്ഷണത്തിനുള്ള വക കണ്ടെത്താനായി തെരുവ് തൂപ്പുകാരനായും, കാർ വാഷ് സെന്ററുകളിലും, വസ്ത്ര നിർമാണ ഫാക്ടറിയിലും, പിസ്സ ഷോപ്പിലും ജോലി ചെയ്തു. ഒടുവിൽ ആ യാത്ര ചെന്നെത്തി നിൽക്കുന്നത് ഇറാൻ ദേശീയ ടീമിന്റെ ഒന്നാം നമ്പർ ഗോൾകീപ്പർ പദവിയിലേക്കാണ്. ഇന്ന് ഏഷ്യയിലെ തന്നെ മികച്ച ഫുട്‌ബോൾ താരങ്ങളിൽ ഒരാളാണ് അലിറെസ.

കുട്ടിക്കാലത്ത് ആടുകളെ മേയ്ക്കുന്നതിനിടെ കനമേറിയ കല്ലുകൾ ദൂരേക്ക് എറിയുന്ന ‘ദാൽപരൻ’ എന്ന പ്രാദേശിക കളി അദ്ദേഹം കളിക്കുമായിരുന്നു. ഇത് അദ്ദേഹത്തിന്റെ ശരീരത്തിന്റെ മുകൾഭാഗത്തെ കരുത്തുറ്റതാക്കി മാറ്റി. ഫുട്‌ബോൾ ലോകത്തെ അപൂർവമായ രണ്ട് ഗിന്നസ് റെക്കോഡുകൾ അലിറെസയുടെ പേരിലാകാൻ കാരണം ഈ കളിയാണ്. ഫുട്‌ബോളിലെ ഏറ്റവും ദൂരം കൂടിയ ത്രോയ്ക്കുള്ള ഗിന്നസ് റെക്കോഡ് ഇദ്ദേഹത്തിന്റെ പേരിലാണ്. 2016 ഒക്ടോബറിൽ ദക്ഷിണ കൊറിയക്കെതിരായ മത്സരത്തിൽ 200.14 അടി ദൂരത്തേക്കാണ് അദ്ദേഹം പന്ത് വലിച്ചെറിഞ്ഞത്.

ഏറ്റവും നീളമേറിയ ഡ്രോപ്പ് കിക്കിനുള്ള ഗിന്നസ് റെക്കോഡും ഇദ്ദേഹത്തിന്റെ പേരിൽ തന്നെ. മൈതാനത്ത് 255.95 അടി ദൂരത്തേക്ക് പന്ത് കിക്ക് ചെയ്ത് എത്തിച്ചാണ് അദ്ദേഹം രണ്ടാമത്തെ ഗിന്നസ് റെക്കോഡ് സ്വന്തമാക്കിയത്.ബെൽജിയം ആധിപത്യം പുലർത്തിയ മത്സരത്തിൽ ഏഴ് സേവുകളുമായി ഇറാന്റെ കാവൽ മാലാഖയായത് അലിറെസയായിരുന്നു.

പ്രത്യേകിച്ച് ബെൽജിയത്തിന്റെ മാക്‌സിം ഡി കുയ്പറിന്റെ ഗോൾ എന്നുറപ്പിച്ച ഷോട്ട് താരം തടുത്തിട്ടതു കണ്ട് സ്വന്തം ആരാധകർ പോലും ഞെട്ടി. ഇതിന് മുൻപും മികച്ച പ്രകടനങ്ങളുമായി താരം ശ്രദ്ധപിടിച്ചുപറ്റിയിട്ടുണ്ട്. 2018 ഫിഫ ലോകകപ്പിൽ സാക്ഷാൽ ക്രിസ്റ്റ്യാനോ റൊണാൾഡോയുടെ പെനാൽറ്റി അലിറെസ സേവ് ചെയ്തിട്ടുണ്ട്. പോർച്ചുഗൽ-ഇറാൻ ഗ്രൂപ്പ് മത്സരത്തിലായിരുന്നു സംഭവം. മത്സരത്തിന്റെ 53-ാം മിനിറ്റിൽ ലഭിച്ച പെനാൽറ്റി റൊണാൾഡോ എടുത്തെങ്കിലും അലിറെസ തടുത്തിട്ടു. മത്സരം 1-1 ന് സമനിലയിൽ കലാശിക്കുകയായിരുന്നു.

സമരക്കാർക്കെതിരെ ‘മലിനജലപീരങ്കി’?; വെള്ളക്കുപ്പിയുമായി പിണറായി സഭയിൽ

0

തിരുവനന്തപുരം :എഐവൈഎഫും എഐഎസ്എഫും നടത്തിയ നിയമസഭാ മാർച്ചിൽ സമരക്കാർക്കെതിരെ പൊലീസ് ജലപീരങ്കിയിൽ ഉപയോഗിച്ചത് മലിനജലമെന്നു പ്രതിപക്ഷം. പ്രതിപക്ഷ നേതാവ് പിണറായി വിജയൻ സഭയിൽ ഒരു കുപ്പിവെള്ളവുമായി എത്തി. ജലപീരങ്കിയിൽ ഉപയോഗിച്ച മലിനജലമാണ് കുപ്പിയിലെന്നു പറഞ്ഞ പിണറായി, മസ്തിഷ്ക ജ്വരം ഉൾപ്പെടെയുള്ള രോഗങ്ങളുടെ ഭീഷണി നിലനിൽക്കെ സമരക്കാർക്കുനേരേ മലിനജലം പ്രയോഗിച്ചത് അപകടകരമാണെന്നും ആരോപിച്ചു.

അതേസമയം, വാ‌ട്ടർ അതോറിറ്റിയുടെ ടാങ്കറിലെ വെള്ളമാണ് ജലപീരങ്കിയിൽ ഉപയോഗിച്ചതെന്നും മനഃപൂർവം മലിനജലം ഉപയോഗിച്ചിട്ടില്ലെന്നും പറഞ്ഞ ആഭ്യന്തരമന്ത്രി രമേശ് ചെന്നിത്തല, പഴയ ട‌ാങ്കിൽനിന്ന് എടുത്ത വെള്ളമാകാം അതെന്നും ലാബിൽ അയച്ച് പരിശോധിക്കാൻ നിർദേശം നൽകിയെന്നും മറുപടി നൽകി.

ഇനി ഇത്തരം സംഭവം ആവർത്തിക്കാതിരിക്കാൻ ശ്രദ്ധിക്കുമെന്നും ചെന്നിത്തല പറഞ്ഞു‌പിഎം ശ്രീ പദ്ധതിയിലെ സർക്കാർ നിലപാടിൽ പ്രതിഷേധിച്ചാണ് ഇന്ന് എഐവൈഎഫും എഐഎസ്എഫും നിയമസഭയിലേക്കു മാർച്ച് നടത്തിയത്. കെ.രാജൻ എംഎൽഎയാണ് മാർച്ച് ഉദ്ഘാടനം ചെയ്തത്. മലിനജലമാണ് പൊലീസ് ഉപയോഗിച്ചതെന്നും വെള്ളം വീണ് വസ്ത്രത്തിന്റെ നിറം പോലും മാറിയെന്നും രാജൻ നിയമസഭയിൽ പറഞ്ഞു. ലാബിൽനിന്നുള്ള പരിശോധനാഫലം കിട്ടിയ ശേഷം വിഷയം തുടർന്നു ചർച്ച ചെയ്യാമെന്ന് സ്പീക്കർ തിരുവഞ്ചൂർ രാധാകൃഷ്ണൻ അറിയിച്ചു.

മന്ത്രി പങ്കെടുത്ത ചടങ്ങിൽ പോകാൻ ഔദ്യോഗിക വാഹനം നൽകിയില്ല; സൈക്കിളിലെത്തി പഞ്ചായത്ത് പ്രസിഡന്റ്

0

കൊട്ടിയം : മന്ത്രി പങ്കെടുത്ത ചടങ്ങിൽ പോകാൻ പഞ്ചായത്ത് പ്രസിഡന്റിന് ഔദ്യോഗിക വാഹനം നൽകിയില്ലെന്ന് പരാതി. പഞ്ചായത്ത് സെക്രട്ടറിയുടെ നടപടിയിൽ പ്രതിഷേധിച്ച് 15 കിലോമീറ്റർ സൈക്കിളിൽ യാത്ര ചെയ്തു പ്രസിഡന്റ് ചടങ്ങിൽ പങ്കെടുത്തു. ആദിച്ചനല്ലൂർ പഞ്ചായത്ത് പ്രസിഡന്റ് ജിനോക്കി എഡ്വേർഡാണ് വേറിട്ട പ്രതിഷേധം നടത്തിയത്.ഇന്നലെ രാവിലെയാണ് സംഭവം. പോർട്ട്‌ കൊല്ലത്ത് നടത്തിയ രാജ്യാന്തര ഗാർഹിക തൊഴിലാളികളുടെ വാർഷിക ചടങ്ങിൽ പ്രധാന അതിഥികളിൽ ഒരാളായാണ് പഞ്ചായത്ത് പ്രസിഡന്റിനെ ക്ഷണിച്ചത്.

മന്ത്രി ബിന്ദു കൃഷ്ണ ആയിരുന്നു ചടങ്ങ് ഉദ്ഘാടനം ചെയ്തത്. വാഹനം എടുക്കാൻ ഡ്രൈവറോട് ആവശ്യപ്പെട്ടപ്പോൾ വാഹനം കൊണ്ടു പോകാൻ സെക്രട്ടറി അനുവാദം നൽകിയിട്ടില്ലെന്നായിരുന്നു മറുപടി.

തുടർന്നാണ് സൈക്കിളിൽ യാത്ര ചെയ്തത്.ചൂരൽ പൊയ്കയിൽ ടാർ മിക്സിങ് യൂണിറ്റിന് എതിരെ നടപടി എടുക്കണമെന്ന് പഞ്ചായത്ത്‌ ഭരണസമിതി ആവശ്യപ്പെട്ടിട്ടും സെക്രട്ടറി ആദ്യം തയാറായിരുന്നില്ല. തുടർന്ന് ജനപ്രതിനിധികൾ സമരം ചെയ്തതിലുള്ള വിരോധമാണ് സെക്രട്ടറിയെ ചൊടിപ്പിച്ചതെന്നാണ് പ്രസിഡന്റിന്റെ ആരോപണം. വാഹനം നൽകാത്ത സെക്രട്ടറിയുടെ നടപടിയെക്കുറിച്ച് മന്ത്രിയുടെ ശ്രദ്ധയിൽപെടുത്തിയിട്ടുണ്ടെന്ന് പഞ്ചായത്ത് പ്രസിഡന്റ് പറഞ്ഞു.

നോക്കൗണ്ട് ലക്ഷ്യമിട്ട് അർജന്റീന ഇറങ്ങുന്നു.

0

ലോകകപ്പിൽ അർജന്റീന ഇന്ന് തങ്ങളുടെ രണ്ടാം മത്സരത്തിനിറങ്ങുന്നു. ഓസ്ട്രിയയാണ് എതിരാളികൾ. ഇന്നത്തെ മത്സരം വിജയിച്ചാൽ അർജന്റീനയ്ക്ക് നോക്ക്ഔട്ട് ഘട്ടത്തിലെത്താം. കഴിഞ്ഞ മത്സരത്തിലെ ഹാട്രിക്കോടെ ലോകകപ്പിൽ ഏറ്റവും കൂടുതൽ ഗോൾ നേടുന്ന താരമെന്ന മിറോസ്ലാവ് ക്ലോസെയുടെ 16 ഗോൾ നേട്ടത്തിനൊപ്പമാണ് മെസി എത്തിയിരിക്കുന്നത്. ഒരു ഗോൾ കൂടി നേടിയാൽ ലിസ്റ്റിൽ ഒന്നാമനാകാം. രാത്രി 10.30നാണ് മത്സരം.

സ്വദേശിവൽക്കരണം; യുഎഇയിൽ സ്വകാര്യ കമ്പനികൾക്ക് ജൂൺ 30 വരെ സമയം; ലക്ഷ്യം കൈവരിച്ചില്ലെങ്കിൽ ജൂലൈ മുതൽ കനത്ത പിഴ.

0

ദുബായ് : യുഎഇയിലെ സ്വകാര്യ മേഖലയിലെ സ്വദേശിവൽക്കരണ (Emiratisation) പരിധി പുതുക്കുന്നതിനുള്ള സമയപരിധി ജൂൺ 30-ഓടെ അവസാനിക്കുന്നു.യോഗ്യരായ സ്വദേശി ഉദ്യോഗാർത്ഥികളെ കണ്ടെത്തുന്നതിനായി കമ്പനികൾ ഔദ്യോഗിക തൊഴിൽ പോർട്ടലായ ‘നഫീസ്’ (Nafis) പ്ലാറ്റ്‌ഫോം പ്രയോജനപ്പെടുത്തണമെന്ന് മന്ത്രാലയം നിർദേശിച്ചു.മികച്ച കമ്പനികൾക്ക് വൻ ഇളവുകൾസ്വദേശിവൽക്കരണ പരിധി കൃത്യമായി പാലിക്കുകയോ നിശ്ചിത ലക്ഷ്യത്തേക്കാൾ കൂടുതൽ സ്വദേശികളെ നിയമിക്കുകയോ ചെയ്യുന്ന കമ്പനികൾക്ക് സർക്കാർ പ്രത്യേക ആനുകൂല്യങ്ങൾ പ്രഖ്യാപിച്ചിട്ടുണ്ട്.

ഇത്തരം സ്ഥാപനങ്ങൾക്ക് ‘എമിറൈസേഷൻ പാർട്‌ണേഴ്‌സ് ക്ലബ്ബിൽ’ (Emiratisation Partners Club) അംഗത്വം നൽകും. കൂടാതെ, മന്ത്രാലയത്തിന്റെ സേവന ഫീസുകളിൽ 80% വരെ ഇളവും സർക്കാർ ടെൻഡറുകളിൽ മുൻഗണനയും ഇവർക്ക് ലഭിക്കും.വ്യാജ സ്വദേശിവൽക്കരണത്തിന്’ എതിരെ കർശന നടപടിനിയമങ്ങൾ മറികടക്കാനായി ചില കമ്പനികൾ നടത്തുന്ന ‘വ്യാജ സ്വദേശിവൽക്കരണ’ (Fake Emiratisation) ശ്രമങ്ങൾക്കെതിരെ മന്ത്രാലയം ശക്തമായ ജാഗ്രതാ നിർദേശം നൽകിയിട്ടുണ്ട്.

നിശ്ചിത ലക്ഷ്യം കൈവരിക്കാത്ത കമ്പനികൾക്കെതിരെ ജൂലൈ 1 മുതൽ കർശനമായ നിയമനടപടികളും കനത്ത പിഴയും ഈടാക്കുമെന്ന് മാനവ വിഭവശേഷി-സ്വദേശിവൽക്കരണ മന്ത്രാലയം (MoHRE) മുന്നറിയിപ്പ് നൽകി.50-ൽ കൂടുതൽ ജീവനക്കാരുള്ള സ്വകാര്യ സ്ഥാപനങ്ങൾ ഈ വർഷത്തെ ആദ്യ ആറു മാസത്തിനുള്ളിൽ തങ്ങളുടെ വൈദഗ്ധ്യമുള്ള (Skilled) തസ്തികകളിൽ 1% സ്വദേശി പ്രാതിനിധ്യം ഉറപ്പാക്കേണ്ടതുണ്ട്. പ്രതിവർഷം 2% വർധനവാണ് യുഎഇ സ്വദേശിവൽക്കരണ പദ്ധതിയിലൂടെ ലക്ഷ്യമിടുന്നത്.വീഴ്ച വരുത്തിയാൽ ലക്ഷങ്ങളുടെ പിഴനിശ്ചിത കോട്ട പൂർത്തിയാക്കാത്ത കമ്പനികൾക്ക് വൻ സാമ്പത്തിക ബാധ്യതയാണ് കാത്തിരിക്കുന്നത്.നിയമനം നടത്താത്ത ഓരോ സ്വദേശി തസ്തികയ്ക്കും പ്രതിമാസം 10,000 ദിർഹം വീതം പിഴ ചുമത്തും.ഒരു തസ്തികയ്ക്ക് പ്രതിവർഷം 1,20,000 ദിർഹം വരെയാകും പിഴ തുക.

അത്യാധുനിക ഡിജിറ്റൽ നിരീക്ഷണ സംവിധാനങ്ങളിലൂടെയും സ്മാർട്ട് പരിശോധനകളിലൂടെയും ഇത്തരം തട്ടിപ്പുകൾ കണ്ടെത്തുമെന്നും നിയമലംഘകർക്കെതിരെ കടുത്ത നിയമനടപടികൾ സ്വീകരിക്കുമെന്നും അധികൃതർ വ്യക്തമാക്കി.പൊതുജനങ്ങൾക്ക് ഇത്തരം നിയമലംഘനങ്ങൾ ശ്രദ്ധയിൽ പെട്ടാൽ മന്ത്രാലയത്തിന്റെ കോൾ സെന്റർ, വെബ്‌സൈറ്റ് അല്ലെങ്കിൽ ഔദ്യോഗിക സ്മാർട്ട് ആപ്ലിക്കേഷൻ വഴി വിവരങ്ങൾ കൈമാറാവുന്നതാണ്.

ഇടിമിന്നലിൽ വീടിന് കേടുപാടുകൾ സംഭവിച്ചു.

0

കോടഞ്ചേരി:ഇന്ന് ഉച്ചയ്ക്ക് കനത്ത മഴയിൽ ഉണ്ടായ ശക്തമായ ഇടിമിന്നലിൽ വീടിന് കേടുപാടുകൾ സംഭവിച്ചു. കോടഞ്ചേരി തെയ്യപ്പാറ റോഡിൽ സിക്കു വളവിന് സമീപം താമസിക്കുന്ന വടക്കേക്കര ഹരിയുടെ വീടിനാണ് ഇടിമിന്നൽ ഏറ്റത്.

ശക്തമായ മിന്നലിൽ വീടിന്റെ തറയും,കട്ടിളയും,മെയിൻ സ്വിച്ചും,വയറിങ്ങിനും, ഇലക്ട്രോണിക്സ് ഉപകരണങ്ങൾക്കും കേടുപാടുകൾ സംഭവിച്ചു.വീടിന് സമീപത്ത് നിർമ്മിച്ചിരുന്ന മതിലിന്റെ ഒരു ഭാഗം മിന്നലേറ്റ് തകർന്നു വീണ നിലയിലാണ്.ഈ സമയം വീട്ടിൽ ആരും ഇല്ലാതിരുന്നതിനാൽ വലിയൊരപകടം ഒഴിവായി.

ലോക കപ്പ് ആവേശത്തിൽ ഈങ്ങാപ്പുഴ എംജിഎം വിദ്യാർത്ഥികൾ.

0

ഈങ്ങാപ്പുഴ: പുതിയ അദ്ധ്യായന വർഷ ആരംഭത്തോടൊപ്പം തന്നെ ലോക കപ്പിന്റെ തുടക്കവും ഇരട്ടി ആവേശത്തിലാണ് എംജിഎം ലെ വിദ്യാർത്ഥികൾ. തങ്ങളുടെ ഇഷ്ട്ട ടീമുകളുടെ ഫ്ളക്സ് ബോർഡുകൾ സ്ഥാപിച്ചും, ടീം ജേഴ്‌സിയണിഞ്ഞും കൊടികൾ ഉയർത്തി അവർ ഈങ്ങാപ്പുഴയുടെ വീഥികളിൽ ആരവമുയർത്തി.

വിളംബര ജാഥ നടത്തിയും, സൗഹൃദ മത്സരങ്ങളും, ഷൂട്ട്ഔട്ട്‌ മേളയും തുടങ്ങി വിപുലമായ പരിപാടികളോടെയാണ് എംജിഎം ഇത്തവണത്തെ ലോക കപ്പിനെ വരവേറ്റത്. മറ്റൊരു ലഹരിയുടെയും പിറകെ പോകാതെ വരും നാളുകളിൽ കുട്ടികൾ ഫുട്ബോൾ ലഹരിയിലാവട്ടെ എന്ന് സ്കൂൾ പ്രധാന അദ്ധ്യാപകൻ സജി ജോൺ അഭിപ്രായപ്പെട്ടു.

പാസ്പോർട്ട് സേവാ കേന്ദ്ര മാതൃകയിൽ എംവിഡി സേവാ കേന്ദ്രങ്ങൾ; സർവീസ് ചാർജ് കുത്തനെ ഉയരും.

0

കോഴിക്കോട് : പാസ്പോർട്ട് സേവാ കേന്ദ്ര മാതൃകയിൽ ‘എംവിഡി സേവാ കേന്ദ്രങ്ങൾ’ തുടങ്ങാനുള്ള മോട്ടർ വാഹന വകുപ്പിന്റെ നീക്കം അപേക്ഷകർക്കു തിരിച്ചടിയാകുമെന്ന് ആശങ്ക. സർവീസ് ചാർജ് കുത്തനെ ഉയരുമെന്നു മാത്രമല്ല, പൊതുജനങ്ങൾക്ക് ബുദ്ധിമുട്ടാകുമെന്നും വകുപ്പിലെ ജോലി സാധ്യത കുറയ്ക്കുമെന്നുമാണ് ആശങ്ക.

പാസ്പോർട്ട് സേവാ കേന്ദ്രങ്ങളുടെ മാതൃകയിൽ, പൊതുജനങ്ങൾക്കുള്ള സേവനങ്ങൾ പൂർണമായി എംവിഡി സേവാകേന്ദ്രങ്ങളിലേക്കു മാറ്റാനുള്ള ട്രാൻസ്പോർട്ട് കമ്മിഷണറുടെ പദ്ധതി നിർദേശം ഗതാഗതവകുപ്പിന്റെ പരിഗണനയിലാണ്.ഡ്രൈവിങ് ലൈസൻസ്, വാഹന റജിസ്ട്രേഷൻ, നികുതി, പെർമിറ്റ്, ഇ ചലാൻ, ഉപയോക്താക്കളുടെ പരാതി എന്നിവ സ്വകാര്യ മേഖലയുടെ സഹകരണത്തോടെ സ്ഥാപിക്കുന്ന സേവാ കേന്ദ്രങ്ങൾ വഴി നൽകുകയാണു ലക്ഷ്യം.

നിലവിൽ ആർടി ഓഫിസുകളിൽ പോകാതെ തന്നെ അപേക്ഷകനു നേരിട്ടു ചെയ്യാവുന്ന, ആധാർ അധിഷ്ഠിത സേവനങ്ങളടക്കം സേവാ കേന്ദ്രങ്ങളിലേക്കു മാറ്റും. ഡ്രൈവിങ് ലൈസൻസ്, വാഹന ഉടമസ്ഥത മാറ്റൽ, ഹൈപ്പോത്തിക്കേഷൻ, ഹൈപ്പോത്തിക്കേഷൻ ഒഴിവാക്കൽ, പെർമിറ്റ് എന്നിവ സംബന്ധിച്ച സേവനങ്ങൾ ആധാർ ബന്ധപ്പെടുത്തിയ മൊബൈൽ നമ്പർ വഴി നിലവിൽ അപേക്ഷകനു പരിവാഹൻ സൈറ്റിലൂടെ നേരിട്ടും അക്ഷയ കേന്ദ്രം വഴിയും ചെയ്യാം. ആധാറുമായി ബന്ധിപ്പിക്കാത്ത മൊബൈൽ നമ്പർ ആണ് ഉപയോഗിക്കുന്നതെങ്കിൽ മാത്രം അപേക്ഷകൻ ആർടി ഓഫിസിലെത്തിയാൽ മതി.

പുതിയ പദ്ധതി നടപ്പായാൽ, എല്ലാ അപേക്ഷകരും നേരിട്ടു സേവാ കേന്ദ്രങ്ങളിലെത്തേണ്ടി വരും. ഫീസിനു പുറമേ സർവീസ് ചാർജും അടയ്ക്കേണ്ടി വരും.തത്കാൽ പാസ്പോർട്ട് പോലെ, എംവിഡി സേവാ കേന്ദ്രയിൽ തത്കാൽ സേവനത്തിനും നിർദേശമുണ്ട്. ഇതിന് അധികം സർവീസ് ചാർജ് നൽകണം. നിലവിൽ ആർടി, സബ് ആർടി ഓഫിസുകളിൽ, ചെറിയ സർവീസ് ചാർജ് വാങ്ങി സേവനം നൽകുന്ന കുടുംബശ്രീ ഇ സേവാ കേന്ദ്രങ്ങളുണ്ട്. ഇവർക്കും പുതിയ പദ്ധതി തിരിച്ചടിയാകും.ഡിജിറ്റൽ ടോക്കൺ, സെൽഫ് സർവീസ് കിയോസ്ക്, ഓൺലൈൻ പേയ്മെന്റ് സിസ്റ്റം, സിസിടിവി, പരാതി പരിഹാര കൗണ്ടറുകൾ, കാത്തിരിപ്പിനുള്ള സ്ഥലം തുടങ്ങിയ സൗകര്യങ്ങൾ സേവാ കേന്ദ്രത്തിൽ സ്വകാര്യ കമ്പനി ഒരുക്കണം.

പൊതു–സ്വകാര്യ പങ്കാളിത്തത്തോടെ നടപ്പാക്കാമെന്നും അക്ഷയ കേന്ദ്രങ്ങളുമായും കംപ്യൂട്ടർ സർവീസ് കേന്ദ്രങ്ങളുമായും ഏകോപിപ്പിച്ചു കൊണ്ടുപോകാമെന്നും ആദ്യ ഘട്ടത്തിൽ തിരുവനന്തപുരം, കൊച്ചി, കോഴിക്കോട് എന്നിവിടങ്ങളിൽ കേന്ദ്രങ്ങൾ തുടങ്ങാമെന്നും നിർദേശത്തിലുണ്ട്.