spot_img
Saturday, November 21, 2026
Home Blog Page 203

തിരുവനന്തപുരത്ത് 50കാരന്‍ കാറിനുള്ളില്‍ മരിച്ച നിലയില്‍, അപകടകാരണം എസി ഇട്ട് ഉറങ്ങിയതോ?; അന്വേഷണം നടത്തി

0

തിരുവനന്തപുരം: കാര്യവട്ടം പേരൂരില്‍ 50കാരനെ കാറില്‍ മരിച്ച നിലയില്‍ കണ്ടെത്തി. ചെമ്പഴന്തി അണിയൂര്‍ സ്വദേശി രാജീവിനെയാണ് സ്വന്തം കാറില്‍ മരിച്ച നിലയില്‍ കണ്ടെത്തിയത്. ഇന്നലെയാണ് ഇയാള്‍ ഗ്രൗണ്ടില്‍ വാഹനം പാര്‍ക്ക് ചെയ്തത്. എസി ഇട്ട് ഉറങ്ങിയപ്പോള്‍ വിഷവാതകമോ മറ്റോ ശ്വസിച്ചതാകാം മരണകാരണമെന്നാണ് പൊലീസിന്റെ പ്രാഥമിക നിഗമനം.

ഇന്ന് വൈകീട്ടാണ് സംഭവം. വാഹനം കണ്ടെത്തിയ ഗ്രൗണ്ട് കുട്ടികള്‍ സ്ഥിരമായി കളിക്കാന്‍ വരുന്ന സ്ഥലമാണ്.കളിക്കാന്‍ എത്തിയ കുട്ടികളാണ് വാഹനത്തിനുള്ളില്‍ ഒരാള്‍ കിടക്കുന്നത് കണ്ടത്. സംശയം തോന്നിയ കുട്ടികള്‍ ഉടന്‍ തന്നെ നാട്ടുകാരെ വിവരം അറിയിക്കുകയായിരുന്നു. സംഭവ സ്ഥലത്തെത്തിയ പൊലീസ് ചില്ല് തകര്‍ത്ത് നോക്കിയപ്പോഴാണ് രാജീവിനെ മരിച്ചനിലയില്‍ കണ്ടെത്തിയത്. ഇന്നലെ രാജീവ് ഇവിടെ ഉണ്ടായിരുന്നതായും തങ്ങളുമായി സംസാരിച്ചതായും കുട്ടികള്‍ പറയുന്നു.

ഇന്നലെ കളി കഴിഞ്ഞ് വീട്ടിലേക്ക് പോയ കുട്ടികള്‍ ഇന്ന് വൈകീട്ട് കളിക്കാന്‍ തിരിച്ചെത്തിയപ്പോള്‍ ഇന്നലെ കണ്ട വാഹനം അതേപോലെ കിടക്കുന്നത് കണ്ട് സംശയം തോന്നി നോക്കിയപ്പോഴാണ് സംഭവം പുറംലോകം അറിഞ്ഞത്.എസി ഇട്ട് ഉറങ്ങിയപ്പോള്‍ സാങ്കേതിക തകരാര്‍ മൂലം വിഷവാതകമോ മറ്റോ ശ്വസിച്ചതാകാം മരണ കാരണമെന്നാണ് പൊലീസിന്റെ പ്രാഥമിക നിഗമനം. പോസ്റ്റ്‌മോര്‍ട്ടത്തിന് ശേഷം മാത്രമേ മരണ കാരണം വ്യക്തമാകുകയുള്ളൂവെന്നും പൊലീസ് പറയുന്നു.

വിപണി ഉറപ്പാക്കാൻ കാര്‍ഷിക വികസന വിപണന വകുപ്പ്: കൃഷിമന്ത്രി.

0

കോഴിക്കോട്*: കർഷകരുടെ വിളകള്‍ക്ക് വിപണി ഉറപ്പാക്കാനായി സംസ്ഥാനത്ത് കാർഷിക വികസന വിപണന വകുപ്പ് (അഗ്രോ ഡെവലപ്‌മെന്റ് മാർക്കറ്റ് ഡിപ്പാർട്ട്‌മെന്റ്) ആരംഭിക്കുമെന്ന് കൃഷി മന്ത്രി ടി.സിദ്ദീഖ്.

കോഴിക്കോട് പ്രസ് ക്ലബില്‍ സംഘടിപ്പിച്ച മീറ്റ് ദ മിനിസ്റ്റർ പരിപാടിയില്‍ സംസാരിക്കുകയായിരുന്നു അദ്ദേഹം. നിലവില്‍ കൃഷി വകുപ്പില്‍ കാർഷിക വികസനവിപണന വകുപ്പും മാർക്കറ്റിംഗ് ഡിവിഷനുമില്ലാത്തത് കർഷകർക്ക് വലിയൊരു പ്രശ്‌നമാണ്.

ഈ വകുപ്പ് പ്രവർത്തിക്കുന്നതോടെ ചെറുകിട വിപണിയിലേക്കും അന്തർദേശീയ വിപണികളിലേക്കും കർഷകരുടെ വിളകള്‍ എത്തിക്കുന്നതിനുള്ള പാലമായി ഈ വകുപ്പ് മാറും. അതിനുള്ള പദ്ധതി തയ്യാറാക്കാനായി ഉദ്യോഗസ്ഥർക്ക് നിർദ്ദേശം നല്‍കിയിട്ടുണ്ട്. ഇതിന്റെ ഭാഗമായി കയറ്റുമതിക്കാരുമായി മന്ത്രിതലത്തില്‍ നേരിട്ട് കൂടിക്കാഴ്ച്ച നടത്തും.

വനിതാകർഷകർക്ക് മുന്തിയ പരിഗണന__2026 ല്‍ ഐക്യരാഷ്ട്രസഭ വനിത കർഷക വർഷമായി ആചരിക്കുകയാണ്. ഇതിന്റെ ഭാഗമായി സംസ്ഥാനത്ത് അഞ്ചു വർഷം നീണ്ടു നില്‍ക്കുന്ന പദ്ധതികള്‍ക്ക് കൃഷി വകുപ്പ് നേതൃത്വം നല്‍കും. മികവുറ്റ വനിതാ കർഷകരെയും കാർഷിക മേഖലയിലേക്ക് കടന്നുവരാൻ താത്പര്യമുള്ളവരെയും കണ്ടെത്തി വിവിധ പദ്ധതികള്‍ ആവിഷ്‌ക്കരിച്ച്‌ നടപ്പിലാക്കും. പരിശീലനം, സാമ്പത്തിക സഹായമുള്‍പ്പടെ അവർക്ക് നല്‍കുമെന്നും മന്ത്രി പറഞ്ഞു.__നെല്ലുസംഭരണം വേഗത്തില്‍__നെല്ല് സംഭരണവുമായി ബന്ധപ്പെട്ട് ഭക്ഷ്യ സിവില്‍ സപ്ലൈസ് മന്ത്രിയുമായും സഹകരണമന്ത്രിയുമായും യോഗം ചേർന്ന് നടപടികള്‍ സ്വീകരിച്ചു.

ഇനി വളരെ കുറഞ്ഞ നെല്ല് മാത്രമെ സംഭരിക്കാൻ ബാക്കിയുള്ളൂവെന്നും അദ്ദേഹം പറഞ്ഞു. മുഴുവൻ കർഷകർക്കും പി.ആർ.സി ഇഷ്യൂ ചെയ്യുവാനും അതില്‍ കാലതാമസം വരുന്നത് ഒഴിവാക്കാനുള്ള നിർദ്ദേശം നല്‍കി. ഓണത്തിന് ഒരുങ്ങാം വിളവിന്റെ വിസ്മയം എന്ന പേരില്‍ പച്ചക്കറി, പൂ കൃഷി എന്നിവക്ക് തുടക്കമിട്ടതായും മന്ത്രി അറിയിച്ചു.__തരിശുനിലങ്ങളെല്ലാം കൃഷിക്ക്__കേരളത്തില്‍ ഇനി കൃഷി ചെയ്യാത്ത ഇടങ്ങളും തരിശായി കിടക്കുന്ന ഇടങ്ങളുമുണ്ടാകില്ല. ഉപയോഗപ്പെടുത്താവുന്ന എല്ലാ മേഖലകളും കാർഷിക മേഖലയിലേക്ക് ബന്ധപ്പെടുത്താനുള്ള നടപടികള്‍ ആരംഭിക്കുകയാണ്.

എഐ സാങ്കേതിക വിദ്യകള്‍ ഉള്‍പ്പടെ കാർഷിക മേഖലക്ക് ഉപയോഗപ്പെടുത്തും.വിവിധ കൃഷിരീതികളെ ഒരുമിച്ച്‌ കൊണ്ടുവരുന്നതോടെ കാർഷിക മേഖലയില്‍ വലിയ മാറ്റം സാധ്യമാകുമെന്നും അദ്ദേഹം പറഞ്ഞു.മന്ത്രിക്കുള്ള കോഴിക്കോട് പ്രസ് ക്ലബിന്റെ ഉപഹാരം പ്രസ് ക്ലബ് പ്രസിഡന്റ് ഇ.പി മുഹമ്മദും സെക്രട്ടറി പി.കെ സജിതും ചേർന്ന് കൈമാറി.

ലാഫിങ് വില്ലയിൽ ഇനി ആ ചിരിയില്ല; സലിംകുമാറിന്‍റെ മൃതദേഹം സംസ്‌കരിച്ചു

0

എറണാകുളം: മലയാളക്കരയെ ദീർഘകാലം ചിരിപ്പിക്കുകയും ചിന്തിപ്പിക്കുകയും, ഏറ്റവുമൊടുവിൽ കണ്ണുകളെ ഈറനണിയിപ്പിക്കുകയും ചെയ്തുകൊണ്ട് ‘ചിരിയുടെ ആശാൻ’ സലിംകുമാർ വിടവാങ്ങി. ഔദ്യോഗിക ബഹുമതികളോടെ സലിംകുമാറിന്‍റെ വീട്ടുവളപ്പിൽ മൃതദേഹം സംസ്കരിച്ചു. മക്കളായ ചന്തുവും ആരോമലും ചിതക്ക് തീകൊളുത്തി. പ്രിയനടന് അന്തിമോപചാരമർപ്പിക്കാൻ,അവസാനമായി ഒരു നോക്ക് കാണാൻ വൻ ജനാവലിയാണ് പറവൂരിലെ ലാഫിങ് വില്ലയിലേക്ക് ഒഴുകിയെത്തിയത്.

ആരോഗ്യനില വഷളായതിനെ തുടര്‍ന്ന് കൊച്ചിയിലെ സ്വകാര്യ ആശുപത്രിയില്‍ വെന്റിലേറ്ററില്‍ കഴിയവേ ഇന്നലെ രാത്രി 10.43 ഓടെയാണ് സലിംകുമാറിൻ്റെ അന്ത്യം. കരള്‍ സംബന്ധമായ അസുഖത്തിന് ഏറെക്കാലമായി ചികിത്സ തേടുന്നുണ്ടായിരുന്നു. വെന്റിലേറ്ററില്‍ കഴിയവേ ഹൃദയാഘാതം സംഭവിക്കുകയായിരുന്നു.300ലേറെ സിനിമകളില്‍ അഭിനയിച്ചിട്ടുണ്ട്. ഏറെയും ഹാസ്യകഥാപാത്രങ്ങളാണ്. കൊച്ചിൻ കലാഭവനിലൂടെയാണ് മിമിക്രി ജീവിതത്തിന് തുടക്കം. പിന്നീട്, കൊച്ചിൻ സാഗർ എന്ന മിമിക്രി ഗ്രൂപ്പിൽ ചേർന്നു. 1996ല്‍ ‘ഇഷ്ടമാണ് നൂറുവട്ടം’ എന്ന സിനിമയിലൂടെയായിരുന്നു സലിം കുമാറിന്റെ സിനിമാ അരങ്ങേറ്റം.

2006ല്‍ അച്ഛനുറങ്ങാത്ത വീട് എന്ന സിനിമയിലെ അഭിനയത്തിന് മികച്ച രണ്ടാമത്തെ നടനുള്ള സംസ്ഥാന ചലച്ചിത്ര പുരസ്‌കാരം സലിംകുമാര്‍ അര്‍ഹനായി. 2011ല്‍ ആദാമിന്റെ മകന്‍ അബുവെന്ന ചിത്രത്തിലൂടെ മികച്ച നടനുള്ള സംസ്ഥാന, ദേശീയ ചലച്ചിത്ര പുരസ്‌കാരവും സലിംകുമാര്‍ സ്വന്തമാക്കി.1969ല്‍ എറണാകുളം ജില്ലയിലെ വടക്കന്‍ പറവൂരില്‍ ഗംഗാധരന്‍-കൗസല്യ ദമ്പതികളുടെ ഇളയ മകനായാണ് ജനനം. വടക്കന്‍ പറവൂരിലുള്ള ഗവണ്‍മെന്റ് ലോവര്‍ പ്രൈമറി സ്‌കൂളിലും ഗവണ്‍മെന്റ് ബോയ്‌സ് ഹൈസ്‌കൂളിലുമായിട്ടാണ് സലീം കുമാര്‍ തന്റെ സ്‌കൂള്‍ വിദ്യാഭ്യാസം പൂര്‍ത്തിയാക്കിയത്.

പിന്നീട് മാല്യങ്കര എസ്.എന്‍.എം.കോളേജിലെ പ്രീഡിഗ്രി വിദ്യാഭ്യാസത്തിനുശേഷം എറണാകുളം മഹാരാജാസ് കോളജില്‍ നിന്നും അദ്ദേഹം ബിരുദമെടുത്തു.കല്യാണരാമന്‍, സിഐഡി മൂസ, മായാവി, മീശ മാധവന്‍, തിളക്കം, പുലിവാല്‍ കല്യാണം, ചതിക്കാത്ത ചന്തു തുടങ്ങിയ നിരവധി ചിത്രങ്ങളില്‍ ശ്രദ്ധേയമായ ഹാസ്യ കഥാപാത്രങ്ങളെ അവതരിപ്പിച്ചു. സ്വഭാവനടനായും തിളങ്ങി. ‘കറുത്ത ജൂതന്‍’, ‘ദൈവമേ കൈതൊഴാം കെ. കുമാറാകണം’, ‘കംപാര്‍ട്‌മെന്റ്’ എന്നീ സിനിമകള്‍ സംവിധാനം ചെയ്തിട്ടുണ്ട്. സുനിതയാണ് ഭാര്യ. നടന്‍ ചന്തു, ആരോമല്‍ എന്നിവര്‍ മക്കളാണ്.1969ല്‍ എറണാകുളം ജില്ലയിലെ വടക്കന്‍ പറവൂരില്‍ ഗംഗാധരന്‍-കൗസല്യ ദമ്പതികളുടെ ഇളയ മകനായാണ് ജനനം. വടക്കന്‍ പറവൂരിലുള്ള ഗവണ്‍മെന്റ് ലോവര്‍ പ്രൈമറി സ്‌കൂളിലും ഗവണ്‍മെന്റ് ബോയ്‌സ് ഹൈസ്‌കൂളിലുമായിട്ടാണ് സലീം കുമാര്‍ തന്റെ സ്‌കൂള്‍ വിദ്യാഭ്യാസം പൂര്‍ത്തിയാക്കിയത്.

പിന്നീട് മാല്യങ്കര എസ്.എന്‍.എം.കോളേജിലെ പ്രീഡിഗ്രി വിദ്യാഭ്യാസത്തിനുശേഷം എറണാകുളം മഹാരാജാസ് കോളജില്‍ നിന്നും അദ്ദേഹം ബിരുദമെടുത്തു.കല്യാണരാമന്‍, സിഐഡി മൂസ, മായാവി, മീശ മാധവന്‍, തിളക്കം, പുലിവാല്‍ കല്യാണം, ചതിക്കാത്ത ചന്തു തുടങ്ങിയ നിരവധി ചിത്രങ്ങളില്‍ ശ്രദ്ധേയമായ ഹാസ്യ കഥാപാത്രങ്ങളെ അവതരിപ്പിച്ചു. സ്വഭാവനടനായും തിളങ്ങി. ‘കറുത്ത ജൂതന്‍’, ‘ദൈവമേ കൈതൊഴാം കെ. കുമാറാകണം’, ‘കംപാര്‍ട്‌മെന്റ്’ എന്നീ സിനിമകള്‍ സംവിധാനം ചെയ്തിട്ടുണ്ട്.

സുനിതയാണ് ഭാര്യ. നടന്‍ ചന്തു, ആരോമല്‍ എന്നിവര്‍ മക്കളാണ്.മുഖ്യമന്ത്രി വി.ഡി സതീശൻ അടക്കമുള്ള രാഷ്ട്രീയ രംഗത്തെ നിരവധി പ്രമുഖരും സിനിമാലോകത്തെ സഹപ്രവർത്തകരും മരണത്തിൽ അനുശോചിച്ചു. സലിംകുമാർ എന്ന വ്യക്തി തനിക്ക് വെറുമൊരു ചലച്ചിത്ര താരം മാത്രമായിരുന്നില്ലെന്നും കുടെപ്പിറപ്പ്, കുടുംബാംഗം, സഹോദരൻ അങ്ങനെ മറ്റ് പലതുമാണെന്നും മുഖ്യമന്ത്രി വി.ഡി സതീശൻ പ്രതികരിച്ചു. ‘

ചിരിക്കുകയും ചിരിപ്പിക്കുകയും ചിന്തിക്കുകയും ചിന്തിപ്പിക്കുകയും ഇടയ്ക്ക് കരയുകയും കരയിപ്പിക്കുകയും ചെയ്ത സലീം നി ഇപ്പോൾ കരയിപ്പിക്കുക മാത്രമാണ്………..തീരാത്ത സങ്കടം ആയി സഹോദരാ നിന്റെ വിയോഗം’ മമ്മൂട്ടി ഫേസ്ബുക്കിൽ കുറിച്ചു. പ്രിയതാരത്തിന് വിടചൊല്ലുന്നതിനായി ആയിരക്കണക്കിന് പേരാണ് പറവൂരിലെ ലാഫിങ് വില്ലയിലേക്കെത്തിയത്.സലിംകുമാറിന്‍റെ വിയോഗത്തിൽ പ്രധാനമന്ത്രി നരേന്ദ്രമോദിയും ലോക്സഭാ പ്രതിപക്ഷ നേതാവ് രാഹുൽ ഗാന്ധിയും അനുശോചനമറിയിച്ചു.

വിശിഷ്ടമായ അഭിനയ ജീവിതത്തിൽ അവിസ്മരണീയമായ പ്രകടനങ്ങളിലൂടെ തന്‍റേതായ വ്യക്തിമുദ്ര പതിപ്പിച്ച നടനാണ് സലിംകുമാറെന്നും അദ്ദേഹത്തിന്‍റെ കുടുംബത്തിന്‍റെയും എണ്ണമറ്റ ആരോധകരുടേയും കൂടെയാണ് താനെന്നും മോദി എക്സിൽ കുറിച്ചു.മലയാള സിനിമയിലെ അതികായന്മാരിലൊരാളാണ് സലീംകുമാറെന്ന് രാഹുൽ ഗാന്ധി പ്രതികരിച്ചു. സ്വതസിദ്ധമായ അഭിനയമികവിനാൽ ലക്ഷക്കണക്കിന് പേരെ ചിരിപ്പിക്കുകയും ദേശീയ അവാർഡ് കരസ്ഥമാക്കുകയും ചെയ്ത അദ്ദേഹത്തിന്‍റെ വിയോഗം ഇന്ത്യൻ ചലച്ചിത്ര ലോകത്തെ സംബന്ധിച്ചിടത്തോളം തീരാനഷ്ടമാണെന്നും രാഹുൽ എക്സിൽ കുറിച്ചു.

വാൽപാറ അപകടം; മരണപ്പെട്ട 4 പേരുടെ അനന്തരാവകാശികൾക്ക് 10 ലക്ഷം രൂപ വീതം കൈമാറി.

0

പെരിന്തൽമണ്ണ: വാൽപാറ അപകടത്തിൽ മരണപ്പെട്ട 4 പേരുടെ അനന്തരാവകാശികൾക്ക് സർക്കാർ പ്രഖ്യാപിച്ച 10 ലക്ഷം രൂപയുടെ സഹായധനം കൈമാറി.മരണപ്പെട്ടവരിൽ ഇൻഷൂറൻസ് പരിരക്ഷ ഇല്ലാത്തതും ഉദ്യോഗസ്ഥരല്ലാത്തവരുമായ ആളുകൾക്കാണ് സഹായധനം അനുവദിച്ചത്. ഏപ്രിൽ 17 ന് വിനോദ യാത്ര പോയ പാങ്ങ്ഗവ. എൽപി സ്കൂളിലെ അധ്യാപകരും ജീവനക്കാരും അവരുടെ കുടുംബാംഗങ്ങളും സഞ്ചരിച്ചിരുന്ന വാഹനമാണ് വാൽപാന ചുരം ഇറങ്ങുന്നതിനിടെ അപകടത്തിൽപെട്ടത്.

മരണപ്പെട്ട ഫാത്തിമ സുഹറയുടെയും മകൻ ഹിഷാമിന്റെയും കുടുംബത്തിനുള്ള ധനസഹായം ഫാത്തിമ സുഹറയുടെ ഭർത്താവ് ആലുങ്ങൽ കുഞ്ഞിമുഹമ്മദിനും റുഖിയയുടെസഹായധനം മാതാവ് ആയിഷയ്ക്കും സാജിതയുടെ സഹായധനം മകൻ മുഹമ്മദ് ഷഹദിനും ഡ്രൈവർ നൗഷാദലിയുടെ സഹായധനം ഭാര്യ സി.പി.സീനത്തിനുംകൈമാറി. പെരിന്തൽമണ്ണ താലൂക്ക് ഓഫിസ് വഴി തുക ബന്ധപ്പെട്ടവരുടെ ബാങ്ക് അക്കൗണ്ടുകളിലേക്ക് നൽകിയതായി തഹസിൽദാർ എം.കെ.കിഷോർ അറിയിച്ചു.പാങ്ങ് ഗവ. എൽപി സ്കൂളിലെ പ്രധാനാധ്യാപിക അജിത(54), അധ്യാപകരായ റംല(52), ഫാത്തിമ സുഹറ(43), ആശ(41), അബ്ദുൽ മജീദ്(43) ഭാര്യ റുഖിയ (39),ഉച്ചഭക്ഷണ ജീവനക്കാരിയായ സാജിത(45), പാങ്ങ് ജിയുപി സ്കൂൾ അധ്യാപിക ഷക്കീല(37), ഫാത്തിമ സുഹറയുടെ മകൻ ഹിഷാം(12), ഡ്രൈവർഎ.പി.നൗഷാദലി(39) എന്നിവരാണ് അപകടത്തിൽ മരിച്ചത്..

സംസ്ഥാനത്ത് 126 പേർക്ക് ഷിഗെല്ല; 3 കുട്ടികൾക്ക് രോഗബാധ, പരിശോധന കർശനമാക്കി ആരോഗ്യവകുപ്പ്

0

തിരുവനന്തപുരം: സംസ്ഥാനത്ത് ആശങ്ക പരത്തി ഷിഗെല്ല ബാധ പടരുന്നു. 126 പേർക്കാണ് ഇതുവരെ രോഗബാധ സ്ഥിരീകരിച്ചതെന്ന് ആരോഗ്യ മന്ത്രി കെ. മുരളീധരൻ അറിയിച്ചു. കോഴിക്കോട് ജില്ലയിൽ മൂന്ന് കുട്ടികൾക്ക് രോഗം ബാധിച്ച പശ്ചാത്തലത്തിൽ സംസ്ഥാനത്തുടനീളം ഭക്ഷ്യസുരക്ഷാ പരിശോധനകളും പ്രതിരോധ നടപടികളും കർശനമാക്കാൻ സർക്കാർ നിർദേശം നൽകി.അതേസമയം, കോഴിക്കോട് ജില്ലയിലെ വിവിധ ഭാഗങ്ങളിൽ ഇന്ന് പുതിയതായി രോഗലക്ഷണങ്ങൾ റിപ്പോർട്ട് ചെയ്തിട്ടുണ്ട്.

ഇവിടെ രോഗം ബാധിച്ച മൂന്ന് കുട്ടികളിൽ രണ്ടുപേരുടെ നില തൃപ്തികരമായതിനെ തുടർന്ന് ആശുപത്രിയിൽ നിന്നും ഡിസ്ചാർജ് ചെയ്തു. എന്നാൽ സുൽത്താൻ ബത്തേരിയിൽ നടത്തിയ പ്രാഥമിക പരിശോധനകളിൽ ഷിഗെല്ല സ്ഥിരീകരിച്ചിട്ടില്ലെങ്കിലും ആശങ്കയകറ്റാൻ കൂടുതൽ വിപുലമായ പരിശോധനകൾ നടത്താൻ ആരോഗ്യവകുപ്പിന് മന്ത്രി നിർദേശം നൽകിയിട്ടുണ്ട്.

രോഗവ്യാപനത്തിന്റെ പശ്ചാത്തലത്തിൽ സംസ്ഥാനത്തെ ഹോട്ടലുകൾ ഉൾപ്പെടെയുള്ള ഭക്ഷ്യസ്ഥാപനങ്ങൾക്ക് കർശന നിയന്ത്രണങ്ങളാണ് ഏർപ്പെടുത്തിയിരിക്കുന്നത്. ഹോട്ടലുകളിലും തട്ടുകടകളിലും യാതൊരു കാരണവശാലും സാധാരണ വെള്ളം വിതരണം ചെയ്യരുത്. പൂർണ്ണമായും ശുദ്ധീകരിച്ച വെള്ളം മാത്രമേ ഉപഭോക്താക്കൾക്ക് നൽകാവൂ എന്ന് ഭക്ഷ്യസുരക്ഷാ വകുപ്പ് കർശന നിർദേശം നൽകി. വരും ദിവസങ്ങളിൽ സംസ്ഥാനവ്യാപകമായി ഹോട്ടലുകളിലും മറ്റും ഫുഡ് സേഫ്റ്റി ഉദ്യോഗസ്ഥരുടെ മിന്നൽ പരിശോധനകൾ ശക്തമാക്കും. മാനദണ്ഡങ്ങൾ പാലിക്കാത്തവർക്കെതിരെ കർശന നിയമനടപടികൾ സ്വീകരിക്കുമെന്നും മന്ത്രി മുന്നറിയിപ്പ് നൽകി.

കുട്ടികളിൽ വയറിളക്ക രോഗങ്ങൾ റിപ്പോർട്ട് ചെയ്ത സ്കൂളുകളിലെ കുടിവെള്ള സ്രോതസ്സുകൾ ഉദ്യോഗസ്ഥർ സന്ദർശിച്ച് പരിശോധന നടത്തിവരികയാണ്. നിലവിൽ സ്കൂളിലെ കുഴൽക്കിണറിലെ വെള്ളത്തിന് കുഴപ്പങ്ങളൊന്നും കണ്ടെത്തിയിട്ടില്ല. എന്നാൽ ഇവിടുത്തെ സാധാരണ കിണറ്റിലെ വെള്ളത്തിന്റെ ശാസ്ത്രീയ പരിശോധനാ ഫലം കൂടി ലഭിച്ച ശേഷമേ കൂടുതൽ കാര്യങ്ങൾ വ്യക്തമാകൂ.വ്യക്തിശുചിത്വവും ആഹാരശുചിത്വവും പാലിക്കുന്നതിലൂടെ മാത്രമേ ഷിഗെല്ലയെ പ്രതിരോധിക്കാൻ സാധിക്കൂ എന്ന് ആരോഗ്യവകുപ്പ് ഓർമ്മിപ്പിക്കുന്നു.

തിളപ്പിച്ചാറ്റിയ വെള്ളം മാത്രമേ കുടിക്കാൻ ഉപയോഗിക്കാവൂ എന്ന് ആരോഗ്യമന്ത്രി ജനങ്ങളോട് അഭ്യർത്ഥിച്ചു. ആഹാരത്തിന് മുൻപും മലവിസർജനത്തിന് ശേഷവും കൈകൾ സോപ്പുപയോഗിച്ച് വൃത്തിയായി കഴുകുക, പഴകിയതും തുറന്നുവെച്ചതുമായ ഭക്ഷണപദാർത്ഥങ്ങൾ കഴിക്കാതിരിക്കുക തുടങ്ങിയ മുൻകരുതലുകൾ എല്ലാവരും കർശനമായി പാലിക്കണമെന്നും ആരോഗ്യവകുപ്പിന്റെ ജാഗ്രതാ നിർദേശത്തിൽ പറയുന്നു.

പാലക്കാട് KSRTC ഡിപ്പോയിൽ നിന്നും ബസ് മോഷ്ടിച്ച് കടന്ന് കളഞ്ഞ് അജ്ഞാതൻ

0

പാലക്കാട്: കെഎസ്ആർടിസി ഡിപ്പോയിൽ നിന്നും ബസ് മോഷ്ടിച്ചു. ഇന്ന് പുലർച്ചയാണ് സംഭവം. പിന്നീട്, പാലക്കാട് നഗരത്തിലെ മംഗളം ടവറിന് സമീപത്ത് നിന്ന് ബസ് കണ്ടെത്തി. പുലർച്ചെ 5 മണിയോടെ കെഎസ്ആർടിസി ഓർഡിനറി ബസാണ് അജ്ഞാതൻ മോഷ്ടിച്ചത്.

കെഎസ്ആർടിസി ബസ് ജീവനക്കാർ പിന്തുടർന്നതോടെ, മോഷ്ടാവ് ബസ് ഉപേക്ഷിച്ച് കടന്നു കളയുകയായിരുന്നു. പാലക്കാട് ടൗൺ സൗത്ത് പോലീസ് കേസെടുത്ത് അന്വേഷണം ആരംഭിച്ചു. ബസ് മോഷ്ടിക്കാനായാണ് ഇയാള്‍ ഡിപ്പോയിലെത്തിയതായിരുന്നു.

മോഷ്ടാവിനെ കണ്ടെത്താന്‍ സിസിടിവി ദൃശ്യങ്ങള്‍ കേന്ദ്രീകരിച്ച് അന്വേഷണം തുടരുകയാണ്. മോഷ്ടാവ് എന്തിനാണ് ബസ് എടുത്തുകൊണ്ടുപോയതെന്ന് അടക്കമുള്ള കാര്യങ്ങൾ കണ്ടെത്തേണ്ടതുണ്ട്. ഡിപ്പോയ്ക്ക് പുറത്തുള്ള റോഡിൽ നിന്നാണ് ബസ് മോഷ്ടിച്ച് കടന്നുകളഞ്ഞത്.

ഓപ്പറേഷൻ തൂഫാൻ ശക്തം; നെന്മാറയിൽ കഞ്ചാവും നിരോധിത പുകയില ഉൽപ്പന്നങ്ങളുമായി നാല് പേർ പിടിയിൽ.

0

നെന്മാറ: ഓപ്പറേഷൻ തൂഫാനിൽ കഞ്ചാവും നിരോധിത പുകയില ഉൽപ്പന്നങ്ങളുമായി നാല് പേർ പിടിയിൽജില്ലയിൽ ലഹരിവസ്തുക്കളുടെ വിൽപ്പനയും ഉപയോഗവും തടയുന്നതിനായി പൊലീസ് നടപ്പിലാക്കി വരുന്ന ‘ഓപ്പറേഷൻ തൂഫാൻ’ നടപടികളുടെ ഭാഗമായി നടത്തിയ വ്യാപക പരിശോധനയിൽ കഞ്ചാവും നിരോധിത പുകയില ഉൽപ്പന്നങ്ങളുമായി നാല് പേർ പൊലീസിന്റെ പിടിയിലായി.

നെന്മാറ സ്റ്റേഷൻ ഇൻസ്പെക്ടർ അനീഷിന്റെ നേതൃത്വത്തിൽ വെള്ളിയാഴ്ച കയറാടി പയ്യാങ്കോട് പ്രദേശത്ത് നടത്തിയ പരിശോധനയിലാണ് 54 ഗ്രാം കഞ്ചാവുമായി മൂന്ന് യുവാക്കളെ പൊലീസ് അറസ്റ്റ് ചെയ്തത്. തിരുപ്പൂർ വഞ്ചിപ്പാളയം സ്വദേശി സുഭാഷ് (18), കയറാടി പയ്യാങ്കോട് സ്വദേശി ഷിബു (25), ആദർശ് (19) എന്നിവരാണ് പിടിയിലായത്.സ്കൂൾ വിദ്യാർഥികളെയും യുവാക്കളെയും ലക്ഷ്യമാക്കി ലഹരിവസ്തുക്കൾ വിതരണം ചെയ്തുവരികയായിരുന്നു പ്രതികളെന്നാണ് പൊലീസിന്റെ പ്രാഥമിക അന്വേഷണത്തിൽ കണ്ടെത്തിയത്.

ഇതിനിടെ, വെള്ളിയാഴ്ച നെന്മാറ ബസ് സ്റ്റാൻഡിൽ നടത്തിയ മറ്റൊരു പരിശോധനയിൽ 27 പാക്കറ്റ് സർക്കാർ നിരോധിത പുകയില ഉൽപ്പന്നങ്ങളുമായി നെന്മാറ പാപ്പാനി സ്വദേശി സതീഷ് (47) അറസ്റ്റിലായി.പിടിച്ചെടുത്ത പുകയില ഉൽപ്പന്നങ്ങൾ എവിടെ നിന്നാണ് എത്തിച്ചതെന്നും ഇവയുടെ വിതരണ ശൃംഖലയിൽ മറ്റ് ആളുകൾ ഉൾപ്പെട്ടിട്ടുണ്ടോയെന്നും പൊലീസ് അന്വേഷണം തുടരുകയാണ്.

ഗ്രില്ല് കുത്തി തുറന്ന് അകത്തേക്ക്; ഗൃഹനാഥനെ കെട്ടിയിട്ട് 45 പവൻ സ്വർണം കവർന്നു

0

തൃശൂർ: ഗൃഹനാഥനെ കെട്ടിയിട്ട് വൻ സ്വർണക്കവർച്ച. ഒല്ലൂക്കര ചെറുവാറ സോമശേഖരന്റെ വീട്ടിൽ നിന്ന് 45 പവൻ സ്വർണം കവർന്നു. ഇന്ന് പുലർച്ചെ മൂന്നുമണിയോടെയാണ് സംഭവം.ഹിന്ദി സംസാരിക്കുന്ന മൂന്നുപേർ വീടിന് പുറകുവശത്തെ ഗ്രില്ല് കുത്തി തുറന്നാണ് അകത്തു കടന്നത്. മോഷ്ടാക്കൾ സോമശേഖരനെ കിടപ്പുമുറിയിൽ കെട്ടിയിട്ട് അലമാരയിൽ ഉണ്ടായിരുന്ന സ്വർണാഭരണങ്ങൾ കവർന്ന് രക്ഷപ്പെടുകയായിരുന്നു.

കള്ളന്മാർ രക്ഷപ്പെട്ടതിന് പിന്നാലെ കെട്ടഴിച്ച് പുറത്തേക്ക് ഓടിവന്ന സോമശേഖരൻ നാട്ടുകാരെ വിവരം അറിയിക്കുകയായിരുന്നു. മണ്ണുത്തി എസ്എച്ച് ഉൾപ്പെടെയുള്ള സംഘം സ്ഥലത്തെത്തി തെളിവുകൾ ശേഖരിച്ച് അന്വേഷണം ആരംഭിച്ചു. മോഷണ സമയത്ത് സോമശേഖരൻ മാത്രമായിരുന്നു വീട്ടിൽ ഉണ്ടായിരുന്നത്.

മലപ്പുറത്ത് വീണ്ടും പ്ലസ് വൺ സീറ്റ് പ്രതിസന്ധി; 4800 ലധികം വിദ്യാർത്ഥികൾ പുറത്താകാൻ സാധ്യതഒന്നാം ഘട്ട അപേക്ഷ പൂർത്തിയായപ്പോൾ അപേക്ഷകർ 82,678; ആകെയുള്ളത് 77,865 സീറ്റുകൾ മാത്രം

0

മലപ്പുറം: മലപ്പുറം ജില്ലയെ വീണ്ടും ആശങ്കയിലാഴ്ത്തി പ്ലസ് വൺ പ്രവേശനം പ്രതിസന്ധിയിലേക്ക് നീങ്ങുന്നു . ജില്ലയിൽ ലഭ്യമായ ആകെ സീറ്റുകളുടെ എണ്ണത്തെക്കാൾ അപേക്ഷകരുടെ എണ്ണം കുതിച്ചുയർന്നതാണ് പതിവ് പോലെ ഇത്തവണയും പ്രതിസന്ധിക്ക് കാരണമായത്. ആദ്യഘട്ട പ്രവേശന നടപടികൾ പൂർത്തിയായപ്പോൾ ഹയർ സെക്കൻഡറി കോഴ്സുകൾക്കായി ജില്ലയിൽ 82,678 വിദ്യാർത്ഥികളാണ് അപേക്ഷ സമർപ്പിച്ചിരിക്കുന്നത്. എന്നാൽ ജില്ലയിലെ ഗവൺമെന്റ്, എയ്ഡഡ്, അൺഎയ്ഡഡ് സ്കൂളുകളിലെല്ലാം കൂടിയുള്ള ആകെ സീറ്റുകളുടെ എണ്ണം77,865 ആണ്.

ഇതോടെ 4,800ൽ അധികം വിദ്യാർത്ഥികൾക്ക് സീറ്റ് ലഭിക്കാത്ത സാഹചര്യമാണ് നിലവിലുള്ളത്.ഇത്തവണ മറ്റ് ജില്ലകളിൽ നിന്നുള്ള അപേക്ഷകരുടെ എണ്ണത്തിലും വർദ്ധനവുണ്ടായിട്ടുണ്ട്. ആകെ അപേക്ഷകരിൽ 8,201 പേർ മലപ്പുറത്തിന് പുറത്തുനിന്നുള്ളവരാണ്. അപേക്ഷകരിൽ 79,680 പേർ സംസ്ഥാന സിലബസിൽ നിന്നുള്ളവരും, 2,109പേർ സിബിഎസ്ഇയിൽ നിന്നുള്ളവരും, 23പേർ ഐസിഎസ്ഇയിൽ നിന്നുള്ളവരും, 866 പേർ മറ്റ് സിലബസുകളിൽ നിന്നുള്ളവരുമാണ്. 42വിദ്യാർത്ഥികൾ ഇതിനകം തന്നെ മോഡൽ റസിഡൻഷ്യൽ സ്കൂളുകളിൽ പ്രവേശനം ഉറപ്പാക്കിയിട്ടുണ്ട്.

വർഷങ്ങളായി ആവർത്തിക്കുന്ന ഈ സീറ്റ് ക്ഷാമത്തിന് ശാശ്വതമായ പരിഹാരം കാണുന്നതിൽ സർക്കാർ പൂർണ്ണമായി പരാജയപ്പെട്ടുവെന്ന് ആരോപിച്ച് എസ്എഫ്ഐ, ഫ്രറ്റേണിറ്റി മൂവ്‌മെന്റ് തുടങ്ങിയ വിവിധ വിദ്യാർത്ഥി സംഘടനകൾ രംഗത്തെത്തിയിട്ടുണ്ട്. കഴിഞ്ഞ പത്ത് വർഷമായി എൽഡിഎഫ് സർക്കാർ അധിക ബാച്ചുകൾ അനുവദിക്കുന്നത് ഉൾപ്പെടെയുള്ള നിരവധി നടപടികൾ ഈ പ്രതിസന്ധി പരിഹരിക്കാൻ സ്വീകരിച്ചിട്ടുണ്ടെന്ന് എസ്എഫ്ഐ മലപ്പുറം ജില്ലാ പ്രസിഡന്റ് സുജിൻ വളാഞ്ചേരി വ്യക്തമാക്കി. പ്ലസ് വൺ അപേക്ഷകരുടെ എണ്ണം ഓരോ വർഷവും വർദ്ധിച്ചുവരികയാണെന്നും ഇത്തവണത്തെ കണക്കുകൾ വലിയൊരു വർദ്ധനവാണ് കാണിക്കുന്നതെന്നും അദ്ദേഹം പറഞ്ഞു. ഒരു വിദ്യാർത്ഥിക്ക് പോലും സീറ്റ് ലഭിക്കാത്ത സാഹചര്യം ഉണ്ടാകരുതെന്നും സർക്കാർ അടിയന്തരമായി അധിക ബാച്ചുകൾ അനുവദിക്കണമെന്നും അദ്ദേഹം ആവശ്യപ്പെട്ടു.

അധിക ബാച്ചുകൾ അനുവദിക്കുന്ന സ്കൂളുകളിലെ അടിസ്ഥാന സൗകര്യങ്ങൾ വർദ്ധിപ്പിക്കേണ്ടതുണ്ടെന്നും, പല സ്കൂളുകളിലും അധിക ബാച്ചുകൾ നൽകുമ്പോൾ ഒരു ക്ലാസ് മുറിയിൽ അറുപത് മുതൽ അറുപത്തിയഞ്ച് കുട്ടികളെ വരെ ഇരുത്തിയാണ് പഠിപ്പിക്കാൻ നിർബന്ധിതരാകുന്നതെന്നും, അതിനാൽ ക്ലാസ് മുറികളും മറ്റ് അടിസ്ഥാന സൗകര്യങ്ങളും സർക്കാർ നവീകരിക്കണമെന്നും സുജിൻ കൂട്ടിച്ചേർത്തു.അതേസമയം, താൽക്കാലിക ബാച്ചുകൾ തുടരുന്നതും അധിക സീറ്റുകൾ അനുവദിക്കുന്നതും പ്രശ്നത്തിന്റെ യഥാർത്ഥ കാരണത്തെ അഭിസംബോധന ചെയ്യാത്ത താല്കാലിക നടപടികൾ മാത്രമാണെന്ന് ഫ്രറ്റേണിറ്റി മൂവ്‌മെന്റ് കുറ്റപ്പെടുത്തി. മലപ്പുറത്തെ ഈ പ്രതിസന്ധി ഫലപ്രദമായി പരിഹരിക്കാൻ മാത്രം 628 അധിക ബാച്ചുകൾ ആവശ്യമാണെന്ന് സംഘടന അവകാശപ്പെട്ടു.

വിദ്യാർത്ഥി പ്രക്ഷോഭങ്ങളെ തുടർന്ന് മുൻ വർഷങ്ങളിൽ നടപ്പിലാക്കിയ താൽക്കാലിക ക്രമീകരണങ്ങളെ മലബാറിലെ, പ്രത്യേകിച്ച് മലപ്പുറത്തെ സീറ്റ് പ്രതിസന്ധിക്കുള്ള ശാശ്വത പരിഹാരമായി ചിത്രീകരിക്കുന്നത് തെറ്റിദ്ധാരണാജനകമാണെന്ന് ഫ്രറ്റേണിറ്റി സംസ്ഥാന പ്രസിഡന്റ് നയീം ഗഫൂർ പറഞ്ഞു.മലപ്പുറത്തെ ക്ഷാമം പരിഹരിക്കാൻ കുറഞ്ഞത് 628 അധിക ബാച്ചുകൾ ആവശ്യമാണ്. അതിൽ കുറഞ്ഞതൊന്നും പ്രശ്നത്തെ അടുത്ത വർഷത്തേക്ക് നീട്ടിവെക്കാൻ മാത്രമേ സഹായിക്കൂ എന്നും അദ്ദേഹം വ്യക്തമാക്കി. സീറ്റ് ക്ഷാമം പരിഹരിക്കാൻ സർക്കാർ അടിയന്തര നടപടികൾ സ്വീകരിക്കാത്ത പക്ഷം ജില്ലയിലുടനീളം പ്രക്ഷോഭങ്ങൾ ആരംഭിക്കുമെന്ന് എസ്എഫ്ഐയും ഫ്രറ്റേണിറ്റി മൂവ്‌മെന്റും മുന്നറിയിപ്പ് നൽകി.

കോഴിക്കോട് ആറുവരി ബൈപ്പാസിൽ ഇരുചക്ര വാഹനങ്ങൾക്കും ഓട്ടോറിക്ഷകൾക്കും വിലക്ക്

0

കോഴിക്കോട്: രാമനാട്ടുകര മുതൽ വെങ്ങളം വരെയുള്ള ഇരുപത്തിയെട്ട് കിലോമീറ്റർ ദൈർഘ്യമുള്ള, പുതുതായി വികസിപ്പിച്ച കോഴിക്കോട് ആറുവെരി ബൈപ്പാസിൽ ഇരുചക്ര വാഹനങ്ങൾക്കും ഓട്ടോറിക്ഷകൾക്കും ഏർപ്പെടുത്തിയിരുന്ന നിരോധനം നാഷണൽ ഹൈവേ അതോറിറ്റി ഓഫ് ഇന്ത്യ (NHAI) സിറ്റി പോലീസുമായി ചേർന്ന് കർശനമായി നടപ്പാക്കാൻ തുടങ്ങി.

ആറുവരി പാത തുറന്നതുമുതൽ ഈ വാഹനങ്ങൾക്ക് നിയന്ത്രണം ഏർപ്പെടുത്തിക്കൊണ്ടുള്ള സൈൻ ബോർഡുകൾ സ്ഥാപിച്ചിരുന്നെങ്കിലും മിക്ക വാഹനയാത്രക്കാരും ഇത് പൂർണ്ണമായി അവഗണിക്കുകയായിരുന്നു. ഓവർടേക്കിംഗിനായി മാത്രം മാറ്റിവെച്ചിരിക്കുന്ന മൂന്നാം ട്രാക്കിലൂടെ ഇരുചക്ര വാഹനങ്ങൾ അമിതവേഗതയിൽ പായുന്നത് പതിവ് കാഴ്ചയായിരുന്നു. കാലവർഷം ആരംഭിച്ചതോടെ ഇത്തരത്തിലുള്ള അശ്രദ്ധമായ ഡ്രൈവിംഗ് അപകടങ്ങൾക്കുള്ള സാധ്യത വർദ്ധിപ്പിച്ചിരിക്കുകയാണ്.

കോഴിക്കോട് സിറ്റി പോലീസ് ഡെപ്യൂട്ടി കമ്മീഷണർ പദം സിംഗിന്റെ നേതൃത്വത്തിൽ നടന്ന ഉന്നതതല അവലോകന യോഗത്തിന് ശേഷമാണ് നിയമലംഘകർക്കെതിരെ പിഴയുൾപ്പെടെയുള്ള നിയമനടപടികളിലേക്ക് നീങ്ങാൻ അധികൃതർ തീരുമാനിച്ചത്. എൻഫോഴ്‌സ്‌മെന്റ് ഡ്രൈവിന് ഔദ്യോഗിക അനുമതി ലഭിച്ചതായും ബൈപ്പാസിന്റെ എല്ലാ എൻട്രി പോയിന്റുകളിലും ഘട്ടം ഘട്ടമായി ഇത് നടപ്പിലാക്കുമെന്നും എൻഎച്ച്എഐ പ്രോജക്ട് ഡയറക്ടർ പ്രശാന്ത് ദുബെ വ്യക്തമാക്കി. ദേശീയപാതാ ശൃംഖലയിലെ അതിവേഗ കൂട്ടിയിടികൾ ഒഴിവാക്കാനും പൊതുജനങ്ങളുടെ സുരക്ഷ ഉറപ്പാക്കാനുമാണ് ഈ സീറോ ടോളറൻസ് സമീപനമെന്ന് അദ്ദേഹം പറഞ്ഞു.

പ്രാദേശികവാസികളായ ഇരുചക്ര വാഹനയാത്രക്കാർക്ക് അവരുടെ ദൈനംദിന യാത്രകൾക്കായി ബൈപ്പാസിന് സമാന്തരമായുള്ള ഫ്ലൈഓവറുകൾ, അടിപ്പാതകൾ, പാലങ്ങൾ, സർവീസ് റോഡുകൾ എന്നിവ ഉപയോഗിക്കാവുന്നതാണ്.ഇതോടൊപ്പം തന്നെ പ്രധാന ആറുവരി പാതയിലും അതിനോട് ചേർന്നുള്ള സർവീസ് റോഡുകളിലും നിയമവിരുദ്ധമായി വാഹനം പാർക്ക് ചെയ്യുന്നവർക്കെതിരെയും നടപടികൾ ആരംഭിച്ചിട്ടുണ്ട്. പുരക്കാട്ടിരി പാലത്തിന് സമീപമുള്ള തൊണ്ടയാട്, കുടിൽത്തോട്, പാലോറമല തുടങ്ങിയ പ്രധാന സ്ഥലങ്ങൾ വലിയ ടാങ്കർ ലോറികളുടെയും ചരക്ക് ട്രക്കുകളുടെയും അനധികൃത പാർക്കിംഗ് കേന്ദ്രങ്ങളായി ദീർഘകാലമായി മാറിയിരുന്നു.

ഇത് വലിയ ഗതാഗതക്കുരുക്കുകൾക്കും ഡ്രൈവർമാരുടെ കാഴ്ച മറയ്ക്കുന്ന തരത്തിലുള്ള അപ്രതീക്ഷിത അപകടങ്ങൾക്കും കാരണമായിരുന്നു. ഇനി മുതൽ സാങ്കേതിക തകരാറുകൾ മൂലം വാഹനം കേടാവുന്ന സാഹചര്യങ്ങളിൽ മാത്രമായിരിക്കും റോഡരികിൽ നിർത്താൻ അനുവദിക്കുക.ഹൈവേ നിയമങ്ങൾ നടപ്പിലാക്കുന്നതിൽ പെട്ടെന്നുണ്ടായ കർശന നിലപാട് വലിയ രാഷ്ട്രീയ വിവാദങ്ങൾക്കും വഴിതുറന്നിരിക്കുകയാണ്.

മുൻപ് ആറുവരി പാതകളിൽ ഇരുചക്ര വാഹനങ്ങൾക്കും ഓട്ടോറിക്ഷകൾക്കും നിയന്ത്രണം ഏർപ്പെടുത്തിയതിനെതിരെ ശക്തമായി രംഗത്തുവന്ന യുഡിഎഫ് സർക്കാരിന്റെ പെട്ടെന്നുള്ള നയമാറ്റത്തിനെതിരെ സമൂഹമാധ്യമങ്ങളിലൂടെ വിമർശനം ഉയരുന്നുണ്ട്.