മഴക്കാലത്ത് വാഹനമോടിക്കുമ്പോൾ ഡ്രൈവർമാർ നേരിടുന്ന ഏറ്റവും അപകടകരമായ ഒരു പ്രതിഭാസമാണ് അക്വാപ്ലെയിനിങ് (Aquaplaning അല്ലെങ്കിൽ Hydroplaning).
റോഡിൽ കെട്ടിക്കിടക്കുന്ന വെള്ളത്തിലൂടെ വാഹനം വേഗത്തിൽ ഓടിക്കുമ്പോൾ, ടയറുകൾക്കും റോഡിനും ഇടയിൽ വെള്ളത്തിന്റെ ഒരു പാളി (layer) രൂപപ്പെടുകയും ടയറിന് റോഡുമായുള്ള സമ്പർക്കം പൂർണ്ണമായി നഷ്ടപ്പെടുകയും ചെയ്യുന്ന അവസ്ഥയാണിത്. ലളിതമായി പറഞ്ഞാൽ, വാഹനം റോഡിലൂടെയല്ല, മറിച്ച് വെള്ളത്തിന് മീതെയാണ് വഴുതി നീങ്ങുന്നത്. ഈ സമയത്ത് ബ്രേക്കോ സ്റ്റിയറിംഗോ നിയന്ത്രിക്കാൻ കഴിയില്ല.
അക്വാപ്ലെയിനിങ് ഉണ്ടാകാനുള്ള കാരണങ്ങളും അതിൽ നിന്ന് എങ്ങനെ രക്ഷപ്പെടാമെന്നും താഴെ പറയുന്ന കാര്യങ്ങൾ ശ്രദ്ധിച്ചാൽ മനസ്സിലാക്കാം:
അക്വാപ്ലെയിനിങ് ഉണ്ടാകാനുള്ള പ്രധാന കാരണങ്ങൾ
അമിത വേഗത: വെള്ളം കെട്ടിക്കിടക്കുന്ന റോഡിലൂടെ വേഗത്തിൽ പോകുമ്പോൾ ടയറുകളിലെ ചാലുകൾക്ക് (grooves) വെള്ളം പുറന്തള്ളാൻ സമയം കിട്ടാതെ വരുന്നു.
തേയ്മാനം സംഭവിച്ച ടയറുകൾ: ടയറിലെ ത്രെഡുകളുടെ (Thread depth) ആഴം കുറവാണെങ്കിൽ വെള്ളം വശങ്ങളിലേക്ക് മാറിപ്പോകില്ല.
റോഡിലെ വെള്ളത്തിന്റെ അളവ്: റോഡിൽ കൂടുതൽ വെള്ളം കെട്ടിക്കിടക്കുന്നത് അക്വാപ്ലെയിനിങ് സാധ്യത വർദ്ധിപ്പിക്കുന്നു.
ടയറിലെ വായുമർദ്ദം (Air Pressure): ടയറിൽ കാറ്റ് കുറവാണെങ്കിലും ഈ പ്രതിഭാസം ഉണ്ടാകാം.
അക്വാപ്ലെയിനിങ് സംഭവിച്ചാൽ എന്തുചെയ്യണം?
(Do’s)
റോഡിൽ വെച്ച് പെട്ടെന്ന് വാഹനത്തിന്റെ നിയന്ത്രണം നഷ്ടപ്പെടുന്നതായി തോന്നിയാൽ (സ്റ്റിയറിംഗ് പെട്ടെന്ന് വളരെ ലൈറ്റ് ആയതുപോലെ തോന്നാം):
ആക്സിലറേറ്ററിൽ നിന്ന് പതുക്കെ കാലെടുക്കുക: വാഹനത്തിന്റെ വേഗത തനിയെ കുറയാൻ അനുവദിക്കുക.
സ്റ്റിയറിംഗ് നേരെ പിടിക്കുക: വാഹനം ഏത് ദിശയിലേക്കാണോ പോകുന്നത് ആ ദിശയിലേക്ക് തന്നെ സ്റ്റിയറിംഗ് ശാന്തമായി പിടിക്കുക. വശങ്ങളിലേക്ക് പെട്ടെന്ന് തിരിക്കരുത്.
ക്ലച്ചും ബ്രേക്കും ഒരേസമയം ഉപയോഗിക്കുക: മാനുവൽ വണ്ടിയാണെങ്കിൽ ക്ലച്ച് ചവിട്ടുന്നത് എഞ്ചിൻ കരുത്ത് ടയറിലേക്ക് എത്തുന്നത് തടയും. എഞ്ചിൻ ബ്രേക്കിംഗ് ലഭിക്കാൻ ഇത് സഹായിക്കും.
എന്ത് ചെയ്യാൻ പാടില്ല?
(Don’ts)
ബ്രേക്ക് പെട്ടെന്ന് ചവിട്ടരുത്: പരിഭ്രാന്തരായി ബ്രേക്ക് ശക്തമായി ചവിട്ടിയാൽ വാഹനം പാളം തെറ്റി മറിയാൻ സാധ്യതയുണ്ട് (വാഹനത്തിന് ABS ഉണ്ടെങ്കിൽ പോലും പെട്ടെന്നുള്ള കഠിനമായ ബ്രേക്കിംഗ് ഒഴിവാക്കണം).
സ്റ്റിയറിംഗ് വെട്ടിക്കരുത്: വാഹനം വഴുതുമ്പോൾ പേടിച്ച് സ്റ്റിയറിംഗ് ഇരുവശങ്ങളിലേക്കും പെട്ടെന്ന് വെട്ടിക്കരുത്.
മഴക്കാലത്ത് അക്വാപ്ലെയിനിങ് എങ്ങനെ ഒഴിവാക്കാം?
വേഗത കുറയ്ക്കുക: മഴയുള്ളപ്പോൾ സാധാരണ വേഗതയേക്കാൾ മൂന്നിലൊന്ന് വേഗത കുറച്ച് മാത്രം ഡ്രൈവ് ചെയ്യുക.
ടയറുകളുടെ അവസ്ഥ പരിശോധിക്കുക: മഴക്കാലത്തിന് മുൻപ് തന്നെ ടയറുകളുടെ ത്രെഡ് കൃത്യമാണെന്ന് ഉറപ്പുവരുത്തുക.
വെള്ളക്കെട്ടുകൾ ഒഴിവാക്കുക: റോഡിന്റെ വശങ്ങളിൽ വെള്ളം കെട്ടിക്കിടക്കുന്ന ഭാഗങ്ങളിലൂടെ വാഹനം കയറ്റി ഇറക്കാതിരിക്കാൻ ശ്രദ്ധിക്കുക.
മുൻപിലുള്ള വാഹനത്തിന്റെ ടയർ പാടുകൾ പിന്തുടരുക: മുൻപിൽ പോകുന്ന വാഹനം റോഡിലെ വെള്ളം മാറ്റിപ്പോകുന്ന ആ പാതയിലൂടെ (tracks) ഡ്രൈവ് ചെയ്യുന്നത് ഒരു പരിധി വരെ സുരക്ഷിതമായിരിക്കും.
ക്രൂസ് കൺട്രോൾ ഓഫ് ചെയ്യുക: മഴയത്ത് ഡ്രൈവ് ചെയ്യുമ്പോൾ ഒരു കാരണവശാലും ക്രൂസ് കൺട്രോൾ (Cruise Control) ഉപയോഗിക്കരുത്.
ഓർക്കുക: മഴക്കാലത്ത് റോഡിലെ വേഗത എപ്പോഴും നിയന്ത്രണവിധേയമായിരിക്കണം. ടയറിന് റോഡുമായുള്ള ബന്ധമാണ് നമ്മുടെ സുരക്ഷിതത്വം.
#aquaplaning
#hydroplaning
#mvdkerala
അക്വാപ്ലെയിനിങ് :മഴക്കാലത്ത് വാഹനമോടിക്കുമ്പോൾ ഡ്രൈവർമാർ ശ്രദ്ധിക്കേണ്ടത്
കാലിൽ ചുറ്റിയ പാമ്പിനെ കുടഞ്ഞു മാറ്റുന്നതിനിടെ വീട്ടമ്മയുടെ കാലിന് പാമ്പുകടിയേറ്റു.
താമരശ്ശേരി: കാലിൽ ചുറ്റിയ പാമ്പിനെ കുടഞ്ഞു മാറ്റുന്നതിനിടെ വീട്ടമ്മയുടെ കാലിന് പാമ്പുകടിയേറ്റു.നരിക്കുനി നെടിയനാട് സ്വദേശി സുഹറ (55) നാണ് കടിയേറ്റത്. ഉടനെ താമരശ്ശേരി താലൂക്ക് ആശുപത്രിയിൽ എത്തിച്ച് പ്രാഥമിക ചികിത്സ നൽകിയ ശേഷം കോഴിക്കോട് മെഡിക്കൽ കേളേജ് ആശുപത്രിയിൽ പ്രവേശിപ്പിച്ചു.
കെഎസ്ആർടിസിയിലെ സ്ത്രീ സൗജന്യ യാത്ര; ഗതാഗത മന്ത്രി ഇന്ന് മുഖ്യമന്ത്രിയെ കാണും.
തിരുവനന്തപുരം: കെഎസ്ആർടിസി ബസുകളിൽ സ്ത്രീകൾക്ക് നൽകുന്ന സൗജന്യ യാത്രാ പദ്ധതി ഏതുരീതിയിൽ നടപ്പിലാക്കണം എന്നത് സംബന്ധിച്ച് അന്തിമ തീരുമാനമെടുക്കാൻ ഗതാഗത മന്ത്രി സി.പി. ജോൺ ഇന്ന് മുഖ്യമന്ത്രിയെ കാണും. പദ്ധതിയുടെ ഭാഗമായി കോർപ്പറേഷന് സർക്കാർ നൽകേണ്ട തുക കേരള ഫിനാൻഷ്യൽ കോർപ്പറേഷൻ വഴി ലഭ്യമാക്കുന്നതിനുള്ള സാധ്യതകളും ഇന്നത്തെ യോഗത്തിൽ ചർച്ച ചെയ്യും.ഈ മാസം 15 മുതലാണ് സ്ത്രീകൾക്കുള്ള സൗജന്യ യാത്രാ പദ്ധതി ആരംഭിക്കുന്നത്. ഏതെല്ലാം ബസുകളിലാണ് യാത്രാസൗജന്യം നൽകേണ്ടതെന്ന കാര്യത്തിൽ മുഖ്യമന്ത്രി വി.ഡി. സതീശന്റെ അഭിപ്രായം നിർണായകമാകും.
മുൻ മന്ത്രിസഭാ യോഗങ്ങളിൽ പദ്ധതിയുടെ വ്യാപ്തിയെക്കുറിച്ച് അന്തിമ തീരുമാനം എടുത്തിരുന്നില്ല. പദ്ധതി ഓർഡിനറി ബസുകളിൽ മാത്രം പരിമിതപ്പെടുത്താമെന്ന പ്രാഥമിക അഭിപ്രായം ഗതാഗത വകുപ്പിൽ ഉയർന്നിരുന്നു. ഈ രീതിയിലാണെങ്കിൽ കെഎസ്ആർടിസിക്ക് ഉണ്ടാകുന്ന വരുമാന നഷ്ടം പരിഹരിക്കാൻ പ്രതിമാസം 57 കോടി രൂപ സർക്കാർ അനുവദിച്ചാൽ മതിയാകും.
ഓർഡിനറി ബസുകളിൽ മാത്രം സൗജന്യ യാത്ര അനുവദിക്കുന്നത് വടക്കൻ ജില്ലകളിൽ കാര്യമായ പ്രയോജനം ചെയ്യില്ലെന്ന പരാതി ഇതിനോടകം ഉയർന്നിട്ടുണ്ട്. ഓർഡിനറി സർവീസുകൾ കുറഞ്ഞ ഈ ജില്ലകളിലെ സ്ത്രീകൾക്ക് പദ്ധതിയുടെ ഗുണം പൂർണമായി ലഭിക്കണമെങ്കിൽ ഫാസ്റ്റ് പാസഞ്ചർ ബസുകളിലും യാത്രാസൗജന്യം അനുവദിക്കണമെന്ന ആവശ്യം ശക്തമാണ്. മുഖ്യമന്ത്രിയുമായുള്ള ഇന്നത്തെ ചർച്ചയിൽ ഗതാഗത മന്ത്രി ഈ വിഷയങ്ങൾ അവതരിപ്പിക്കും.
പദ്ധതി നടപ്പിലാക്കുമ്പോൾ കെഎസ്ആർടിസിക്ക് സർക്കാർ നൽകേണ്ട തുക കെഎഫ്സി വഴി വായ്പയായി ലഭ്യമാക്കാനാണ് നിലവിലെ നീക്കം. വായ്പയുടെ പലിശ നിരക്കും വ്യവസ്ഥകളും നിശ്ചയിക്കാൻ കെഎഫ്സി പ്രതിനിധികളും ഇന്നത്തെ യോഗത്തിൽ പങ്കെടുക്കും. ഇന്നത്തെ ചർച്ചകളിലെ തീരുമാനങ്ങൾ ഉൾപ്പെടുത്തി ബുധനാഴ്ച ചേരുന്ന മന്ത്രിസഭാ യോഗത്തിൽ ഈ വിഷയത്തിൽ അന്തിമ തീരുമാനമെടുത്ത് ഉത്തരവിറക്കാനാണ് സർക്കാർ ലക്ഷ്യമിടുന്നത്.
പ്ലസ് വൺ ട്രയൽ അലോട്ട്മെന്റ് പ്രസിദ്ധീകരിച്ചു..
ട്രയൽ അലോട്ട്മെന്റ് ഒരു സാധ്യതാ ലിസ്റ്റ്_ മാത്രമാണ്. ഇത് വെച്ച് പ്രവേശനം കിട്ടില്ല. അഡ്മിഷനായി ജൂൺ 15ന് വരുന്ന ആദ്യ അലോട്ട്മെന്റ് ലിസ്റ്റ് കാത്തിരിക്കണം.*ട്രയൽ റിസൾട്ട് എന്തിന് ചെക്ക് ചെയ്യണം?* ട്രയൽ ആണ് അപേക്ഷയിലെ തെറ്റ് തിരുത്താനുള്ള അവസാന ചാൻസ്. 1. ജാതി സംവരണം, ബോണസ് പോയിന്റ്, പഞ്ചായത്ത്/താലൂക്ക് വിവരങ്ങൾ ശരിയാണോന്ന് ഉറപ്പിക്കണം 2. WGPA കൃത്യമാണോന്ന് നോക്കണം 3. ഓപ്ഷൻ പുനഃക്രമീകരിക്കാം, പുതിയത് കൂട്ടിച്ചേർക്കാം വിവരം തെറ്റിയാൽ പിന്നെ പ്രവേശനം നിഷേധിക്കും.*ട്രയൽ അലോട്ട്മെന്റ് എങ്ങനെ ചെക്ക് ചെയ്യാം?*
1️⃣ HSCAP പോർട്ടൽ: http://hscap.kerala.gov.in
2️⃣ CANDIDATE LOGIN – SWS → Application No + Password + ജില്ല
3️⃣ Trial Results → ഡൗൺലോഡ് ചെയ്യാം*അപേക്ഷയിൽ തിരുത്തൽ വരുത്തുന്നതെങ്ങനെ?*
1️⃣ CANDIDATE LOGIN – SWS ൽ ലോഗിൻ ചെയ്യുക
2️⃣ Edit Application → തിരുത്തൽ വരുത്തുക
3️⃣ *ജൂൺ 10, വൈകിട്ട് 5 മണിക്ക് മുമ്പ്* Final Confirmation നിർബന്ധം തിരുത്തിയാൽ വീണ്ടും Confirm ചെയ്യാൻ മറക്കരുത്.*Username/Password മറന്നോ?* പോർട്ടലിലെ GET USERNAME/APPLICATION NO ലിങ്ക് ഉപയോഗിക്കാം.*Website:* https://hscap.kerala.gov.in.
വിനോദിനിക്ക് പ്രായപൂർത്തിയാകുമ്പോൾ സർക്കാർ ജോലി നൽകാൻ ബാലാവകാശ കമ്മീഷൻ ഉത്തരവ്.
പാലക്കാട്:സർക്കാർ സംവിധാനങ്ങളുടെ വീഴ്ചയിൽ കൈ നഷ്ടപ്പെട്ട പാലക്കാട് സ്വദേശിനി വിനോദിനിക്ക് പ്രായപൂർത്തിയാകുമ്പോൾ സർക്കാർ ജോലി നൽകണമെന്ന് സംസ്ഥാന ബാലാവകാശ സംരക്ഷണ കമ്മീഷൻ ഉത്തരവിട്ടു. കുട്ടിയുടെ തുടർപഠനവും ചികിത്സാ ചെലവും സർക്കാർ ഉറപ്പുവരുത്തണമെന്നും കമ്മീഷൻ ശുപാർശ ചെയ്തു.കമ്മീഷൻ ചെയർപേഴ്സൺ കെ.വി. മനോജ്കുമാർ, അംഗം ഷാജേഷ് ഭാസ്കർ എന്നിവരടങ്ങിയ ഡിവിഷൻ ബെഞ്ചാണ് ചീഫ് സെക്രട്ടറിക്ക് ശുപാർശ നൽകിയത്. സാധാരണ ജോലിയിൽ ഏർപ്പെടാനോ വരുമാനം നേടാനോ കുട്ടിക്ക് സാധിക്കില്ല എന്ന് കമ്മീഷൻ നിരീക്ഷിച്ചു.
കമ്മീഷന്റെ പ്രധാന നിർദേശങ്ങൾ:
തുടർപഠനം:
21 വയസ്സുവരെയുള്ള പഠനച്ചെലവ് സർക്കാർ ഏറ്റെടുത്ത് പാലക്കാട് ജില്ലാ ശിശുസംരക്ഷണ ഓഫീസർ ഉറപ്പുവരുത്തണം-
ചികിത്സ:
തുടർചികിത്സാ ചെലവ് ആരോഗ്യവകുപ്പ് വഹിക്കണം –
സഹായ പദ്ധതികൾ:
മിഷൻ വാത്സല്യം പദ്ധതി തുകയും പ്രത്യേക കുടുംബ പരിചരണത്തിലെ മാനസിക പിന്തുണയും മാർഗനിർദേശവും ലഭ്യമാക്കണം.
കഴിഞ്ഞ ഡിസംബറിൽ മാധ്യമങ്ങളിൽ വന്ന വാർത്തയുടെ അടിസ്ഥാനത്തിൽ കമ്മീഷൻ സ്വമേധയാ കേസെടുക്കുകയായിരുന്നു. കമ്മീഷൻ ശുപാർശയിന്മേൽ സ്വീകരിച്ച നടപടി റിപ്പോർട്ട് 2012ലെ കേരള സംസ്ഥാന ബാലാവകാശ സംരക്ഷണ കമ്മീഷൻ ചട്ടം 45 പ്രകാരം 45 ദിവസത്തിനകം സമർപ്പിക്കണമെന്നും ഉത്തരവിൽ പറയുന്നു.പ്രതിപക്ഷ നേതാവായിരിക്കെ മുഖ്യമന്ത്രി വി.ഡി. സതീശൻ കുട്ടിക്ക് കൃത്രിമകൈ വയ്ക്കാൻ ധനസഹായം നൽകിയതും കുടുംബത്തിന് 5 സെന്റ് ഭൂമി അനുവദിച്ചതും “സമൂഹത്തെ ചേർത്തുപിടിക്കലിന്റെ മാതൃക” ആണെന്ന് കമ്മീഷൻ പ്രശംസിച്ചു.
റുവാനിയുടെ സങ്കടം മുഖ്യമന്ത്രി കേട്ടു; പുതിയ വീട് നൽകാമെന്ന് ഉറപ്പുനൽകി വി.ഡി സതീശൻ, ഫോണിൽ വിളിച്ചു.
തിരുവനന്തപുരം : മഴ പെയ്താൽ ചോർന്നൊലിക്കുന്ന വീട്ടിൽ ഭയമില്ലാതെ ഉറങ്ങണമെന്ന വിഴിഞ്ഞം സ്വദേശിനിയായ ആറു വയസുകാരി റുവാനിയുടെ ആഗ്രഹം സഫലമാകും. മുഖ്യമന്ത്രിയോട് വീട് വേണമെന്ന് അഭ്യർഥിച്ച റുവാനിയുടെ കുടുംബത്തെ മുഖ്യമന്ത്രി ഫോണിൽ വിളിച്ച് പുതിയ വീട് നിർമിച്ച് നൽകുമെന്ന് ഉറപ്പുനൽകി. തിരുവനന്തപുരം വിഴിഞ്ഞം സ്വദേശിനിയായ ഈ കൊച്ചുമിടുക്കിയുടെ സങ്കടം സോഷ്യൽ മീഡിയയിൽ വൈറലായതിനുപിന്നാലെയാണ് സഹായവുമായി മുഖ്യമന്ത്രിയുടെ ഓഫീസ് ഇടപെട്ടത്.
നിലവിൽ വിഴിഞ്ഞത്തെ ഒരു ചെറിയ ചായ്പ്പിലാണ് റുവാനിയും സഹോദരനും അച്ഛനും അമ്മയും താമസിക്കുന്നത്. അടച്ചുറപ്പില്ലാത്ത, ശുചിമുറി പോലുമില്ലാത്ത ഈ പഴയ വീട്ടിൽ മഴ പെയ്യുമ്പോൾ ഉറങ്ങാൻ കഴിയുന്നില്ലെന്നായിരുന്നു റുവാനിയുടെ സങ്കടം.‘മുഖ്യമന്ത്രി ഞങ്ങൾക്ക് ഒരു പുതിയ വീട് വെച്ചുതരണം, അതിൽ ഞങ്ങൾക്ക് ഉറങ്ങണം. ഞാൻ വലുതാകുമ്പോൾ ജോലി കിട്ടി പൈസ തിരികെ തരാം’ എന്ന റുവാനിയുടെ നിഷ്കളങ്കമായ വാക്കുകൾ സമൂഹമാധ്യമങ്ങളിൽ ഏറെ ശ്രദ്ധിക്കപ്പെട്ടിരുന്നു. കുഞ്ഞിന്റെ വാക്കുകൾ കേട്ട മുഖ്യമന്ത്രി കുടുംബത്തെ നേരിട്ട് ഫോണിൽ വിളിച്ച് സംസാരിക്കുകയും വീട് നൽകുമെന്ന വലിയ ഉറപ്പ് നൽകുകയുമായിരുന്നു.
നിലവിൽ അതീവ കഷ്ടപ്പാടിലാണ് റുവാനിയും കുടുംബവും കഴിയുന്നത്. ഓട്ടോ ഡ്രൈവറായ പിതാവ് റീഗലിന്റെ തുച്ഛമായ വരുമാനം മാത്രമാണ് ഈ കുടുംബത്തിന്റെ ഏക ആശ്രയം. അധ്യാപകർ മുൻകൈ എടുത്ത് വാങ്ങി നൽകിയ രണ്ടര സെന്റ് സ്ഥലത്ത് ഷീറ്റ് ഇട്ട ഒരു ചെറിയ ചായ്പ്പിലാണ് റുവാനിയും സഹോദരനും മാതാപിതാക്കളും താമസിക്കുന്നത്. ഇതിനുമുൻപ് പലതവണ വീടിനായി അപേക്ഷകൾ നൽകിയിരുന്നെങ്കിലും അധികൃതരുടെ ഭാഗത്തുനിന്ന് അനുകൂലമായ നടപടികളൊന്നും ഉണ്ടായിരുന്നില്ല.
മുൻ ഡെപ്യൂട്ടി പോലീസ് കമാൻഡന്റും ഫുട്ബോൾ താരവുമായ ഹബീബ് റഹ്മാന് അരീക്കോട്ടിൽ ഊഷ്മള സ്വീകരണം.
* അരീക്കോട്: നീണ്ട മുപ്പത്തിയാറര വർഷത്തെ സ്തുത്യർഹമായ ഔദ്യോഗിക സേവനത്തിനു ശേഷം വിരമിച്ച മുൻ കേരള പോലീസ് ഫുട്ബോൾ താരവും ഡെപ്യൂട്ടി കമാൻഡന്റ് ഓഫ് പോലീസുമായ ഹബീബ് റഹ്മാന് ടൗൺ ടീം അരീക്കോടിന്റെ ആഭിമുഖ്യത്തിൽ ഹൃദ്യമായ സ്വീകരണം നൽകി.
സർവീസിലിരിക്കെ ഗുഡ് സർവീസ് എൻട്രിയും മികച്ച സേവനത്തിനുള്ള പോലീസ് മെഡലും കരസ്ഥമാക്കിയാണ് അദ്ദേഹം ഔദ്യോഗിക ജീവിതത്തോട് വിടപറഞ്ഞത്. തന്റെ പതിനാറാം വയസ്സിൽ കേരള സ്റ്റേറ്റ് ജൂനിയർ ടീമിൽ അംഗമായിക്കൊണ്ട് ഫുട്ബോൾ രംഗത്ത് കരിയർ ആരംഭിച്ച ഹബീബ് റഹ്മാൻ, പിന്നീട് കേരള പോലീസിൽ ചേരുകയും നിരവധി പ്രമുഖ ടൂർണമെന്റുകളിൽ ടീമിന്റെ വിജയങ്ങളിൽ നിർണായക പങ്കുവഹിക്കുകയും ചെയ്തു. അഞ്ച് തവണ സന്തോഷ് ട്രോഫിയിൽ കേരളത്തിനായി ജേഴ്സിയണിഞ്ഞ അദ്ദേഹം മൂന്ന് തവണ ടീം രണ്ടാം സ്ഥാനത്തെത്തിയപ്പോൾ പങ്കാളിയായിരുന്നു.
കൂടാതെ, കേരള പോലീസ് രണ്ട് തവണ ഫെഡറേഷൻ കപ്പ് ഉയർത്തുമ്പോൾ ടീമിന്റെ അമരക്കാരനായിരുന്ന ഹബീബ് റഹ്മാൻ ഡ്യൂറാൻഡ് കപ്പ്, സ്റ്റേറ്റ് ഫുട്ബോൾ ക്ലബ് കപ്പ്, ഏഷ്യൻ ഗെയിംസ് കപ്പ് തുടങ്ങിയ പ്രശസ്തമായ ടൂർണമെന്റുകളിലും രാജ്യത്തിനായി കളത്തിലിറങ്ങിയിട്ടുണ്ട്.അരീക്കോട് ടൗൺ ടീം സംഘടിപ്പിച്ച സ്വീകരണ ചടങ്ങിൽ അരീക്കോട് ഗ്രാമപഞ്ചായത്ത് വൈസ് പ്രസിഡന്റ് എ.ഡബ്ല്യു. അബ്ദുറഹിമാൻ ഹബീബ് റഹ്മാന് ഉപഹാരം നൽകി ആദരിച്ചു. മുൻ സ്റ്റേറ്റ് താരം സൈനുൽ ആബിദ് കെ.വി. (1977) അദ്ദേഹത്തെ പൊന്നാട അണിയിച്ചു.
ചടങ്ങിൽ മുൻ കെ.എഫ്.എ. വൈസ് പ്രസിഡന്റ് കാഞ്ഞിരാല അബ്ദുൽ കരീം, ഡി.എഫ്.എ. വൈസ് പ്രസിഡന്റ് നാലകത്ത് അബ്ദുസ്സലാം, മുൻ സ്റ്റേറ്റ് താരം കെ.വി. ജാഫർ എന്നിവർ സംബന്ധിച്ചു. ഇവർക്കൊപ്പം സർവകലാശാലാ താരങ്ങളായ ലത്തീഫ് സി., ജാഫർ സി., മുജീബ് മേക്കുത്ത്, മഹ്ബൂബ് (കുഞ്ഞാണി) എം.പി. എന്നിവരും ക്ലബ്ബ് താരങ്ങളായ എം.പി.ബി. ഷൗക്കത്ത്, അബ്ദുസമദ് കെ., ഡോക്ടർ സഫറുള്ള കെ. എന്നിവരും ക്ലബ്ബ് ഭാരവാഹികളായ ലാല, കുട്ടൻ പി., ഹുസൈൻ കുനിയിൽ, അബ്ദുന്നാസർ എം. തുടങ്ങിയവരും ചടങ്ങിൽ പങ്കെടുത്ത് ആശംസകൾ നേർന്നു സംസാരിച്ചു.
കുറ്റ്യാടി ചുരത്തിൽ കാർ താഴ്ചയിലേക്ക് മറിഞ്ഞു; മൂന്ന് പേർക്ക് പരിക്ക്.
കുറ്റ്യാടി:കുറ്റ്യാടി ചുരത്തിൽ കാർ താഴ്ചയിലേക്ക് മറിഞ്ഞ് മൂന്ന് പേർക്ക് പരിക്ക്. ചുരം കയറി വയനാട് ഭാഗത്തേക്ക് പോവുകയായിരുന്ന കാറാണ് അപകടത്തിൽപ്പെട്ടത്. കാറിലുണ്ടായിരുന്ന വില്യാപ്പള്ളി സ്വദേശികളായ മൂന്ന് പേർക്കാണ് പരിക്കേറ്റത്. ഇവരുടെ പരിക്ക് ഗുരുതരമല്ല. പരിക്കേറ്റവരെ തൊട്ടിൽപ്പാലത്തെ ഇഖ്ര ആശുപത്രിയിൽ പ്രവേശിപ്പിച്ചു.ചുരത്തിലെ ഏഴാം വളവിൽ വെച്ചായിരുന്നു അപകടം.
വയനാട് ഭാഗത്തേക്ക് പോവുകയായിരുന്ന കാർ, എതിർദിശയിൽ നിന്നും വന്ന മറ്റൊരു വാഹനത്തിന് സൈഡ് കൊടുക്കുന്നതിനിടെ റോഡിന്റെ പാർശ്വഭിത്തി (കെട്ട്) ഇടിഞ്ഞ് താഴേക്ക് മറിയുകയായിരുന്നു. വലിയ താഴ്ചയുള്ള ഭാഗത്തേക്ക് മറിഞ്ഞിട്ടും കാറിലുണ്ടായിരുന്നവർ നിസ്സാര പരിക്കുകളോടെ രക്ഷപ്പെട്ടത് അത്ഭുതകരമായാണ്.
റോഡിന്റെ സൈഡ് ഇടിഞ്ഞതാണ് കാർ താഴേക്ക് മറിയാൻ കാരണമായതെന്ന് കാറിലുണ്ടായിരുന്നവർ പറഞ്ഞു.വർധിച്ചുവരുന്ന അപകടസാധ്യതമലയോര ഹൈവേയുടെ നവീകരണ പ്രവൃത്തികൾ നടക്കുന്ന കുറ്റ്യാടി ചുരത്തിൽ മഴക്കാലം എത്തിയതോടെ അപകടസാധ്യത വൻതോതിൽ വർധിച്ചിരിക്കുകയാണ്നിർമാണപ്രവർത്തനങ്ങൾക്കായി മണ്ണെടുത്ത ഭാഗങ്ങളിലും കൃത്യമായ സംരക്ഷണ ഭിത്തികൾ ഇല്ലാത്തയിടങ്ങളിലും ഇത്തരത്തിൽ റോഡ് ഇടിയാനുള്ള സാധ്യതയുണ്ടെന്ന് യാത്രക്കാർ പരാതിപ്പെടുന്നു.
പൊട്ടിക്കരഞ്ഞ് ചന്തു, അന്ത്യചുംബനം നൽകി ആരോമൽ; കണ്ണീരോടെ സുനിതയും; സലിംകുമാറിന് വിട നൽകി നാട്.
കൊച്ചി: അന്തരിച്ച നടൻ സലിംകുമാറിന് വിട നൽകി നാട്. പറവൂർ ചിറ്റേത്തുകരയിലെ ലാഫിങ് വില്ല വീട്ടുവളപ്പിൽ അദ്ദേഹത്തെ സംസ്കരിച്ചു. ഔദ്യോഗിക ബഹുമതികളോടെയായിരുന്നു സംസ്കാരച്ചടങ്ങുകൾ.മുഖ്യമന്ത്രി വി.ഡി. സതീശൻ വീട്ടിൽ സംസ്കാരച്ചടങ്ങുൾക്ക് മുന്നിൽനിന്നു. അവസാനനിമിഷവും ഒട്ടേറെപ്പേരാണ് പ്രിയനടനെ അവസാനമായി കാണാൻ വീട്ടിലേക്ക് ഒഴുകിയെത്തിയത്. ആൾക്കൂട്ടത്തെ നിയന്ത്രിക്കാൻ ചന്തു ഉൾപ്പെടെ പാടുപെടുന്നത് കാണാമായിരുന്നു.”ചടങ്ങുകൾ ആരംഭിച്ചതോടെ ചന്തു പൊട്ടിക്കരഞ്ഞു.
ചിതയ്ക്ക് തീക്കൊളുത്തുംമുമ്പ് ചന്തുവും ആരോമലും പിതാവിന് അവസാന ചുംബനം നൽകി ഭാര്യ സുനിതയും കണ്ണീരോടെയാണ് സലിംകുമാറിന് വിട നൽകിയത്. ചന്തുവും ആരോമലും ചേർന്ന് ചിതയ്ക്ക് തീക്കൊളുത്തി.ഡെപ്യൂട്ടി സ്പീക്കർ ഷാനിമോൾ ഉസ്മാൻ, മന്ത്രി പി.സി. വിഷ്ണുനാഥ്, എംഎൽഎമാർ, നടന്മാർ, താരസംഘടനയായ ‘അമ്മ’ ഭാരവാഹികൾ ഉൾപ്പെടെ പറവൂരിലെ വീട്ടിലെത്തി.
ടൗൺഹാളിലെ പൊതുദർശനത്തിന് ശേഷമാണ് മൃതദേഹം വീട്ടിലെത്തിച്ചത്.” സലിംകുമാറിന്റെ ആഗ്രഹപ്രകാരം മതപരമായ ചടങ്ങുകൾ ഇല്ലാതെയാണ് സംസ്കാരച്ചടങ്ങുകൾ നടന്നത്. അസ്ഥി പുഴയിൽ ഒഴുക്കുന്നത് ഉൾപ്പെടെ ചടങ്ങുകൾ വേണ്ടെന്ന് അദ്ദേഹം നിർദേശിച്ചിരുന്നു.കൊച്ചിയിലെ സ്വകാര്യ ആശുപത്രിയിൽ ചികിത്സയിലിരിക്കെയായിരുന്നു സലിംകുമാറിന്റെ അന്ത്യം. ഹൃദയാഘാതമാണ് മരണകാരണം. ആരോഗ്യനില വഷളായതിനെത്തുടർന്ന് അദ്ദേഹത്തെ വെന്റിലേറ്ററിലേക്ക് മാറ്റിയിരുന്നു.
ശക്തമായ കാറ്റിന് സാധ്യത; കേരള-കര്ണാടക-ലക്ഷദ്വീപ് തീരങ്ങളില് മല്സ്യബന്ധനത്തിന് വിലക്ക്.
തിരുവനന്തപുരം: കേരള-കര്ണാടക-ലക്ഷദ്വീപ് തീരങ്ങളില് ഇന്ന് മുതല് ജൂണ് ഒന്പത് വരെ മല്സ്യത്തൊഴിലാളികള് കടലില് പോകാന് പാടില്ലെന്ന് കേന്ദ്ര കാലാവസ്ഥ വകുപ്പ്. ഈ കാലയളവില് മണിക്കൂറില് 40 മുതല് 50 കിലോമീറ്റര് വരെയും ചില സമയങ്ങളില് 60 കിലോമീറ്റര് വരെയും വേഗതയില് ശക്തമായ കാറ്റിനും കടല്ക്ഷോഭത്തിനും സാധ്യതയുണ്ടെന്നാണ് മുന്നറിയിപ്പ്. കേരള-ലക്ഷദ്വീപ് തീരങ്ങള്ക്കൊപ്പം അറബിക്കടലിന്റെയും ബംഗാള് ഉള്ക്കടലിന്റെയും വിവിധ ഭാഗങ്ങളിലും മോശം കാലാവസ്ഥ തുടരാനിടയുണ്ട്.
സൊമാലിയ, ഒമാന് തീരങ്ങള്, മധ്യതെക്കന് അറബിക്കടല്, ഗള്ഫ് ഓഫ് മാന്നാര്, കന്യാകുമാരി മേഖല, തമിഴ്നാട് തീരം, ശ്രീലങ്കന് തീരം, ഒഡിഷ-പശ്ചിമ ബംഗാള് തീരങ്ങള്, ആന്ഡമാന് കടല് എന്നിവിടങ്ങളിലും ശക്തമായ കാറ്റിനും ഉയര്ന്ന തിരമാലകള്ക്കും സാധ്യതയുണ്ട്. കാലാവസ്ഥാ മുന്നറിയിപ്പിന്റെ അടിസ്ഥാനത്തില് മല്സ്യത്തൊഴിലാളികളും ചെറുകിട ബോട്ടുടമകളും അതീവ ജാഗ്രത പാലിക്കണമെന്ന് അധികൃതര് നിര്ദേശിച്ചു. കടലില് പോയിട്ടുള്ളവര് സുരക്ഷിത തുറമുഖങ്ങളിലേക്ക് മടങ്ങാനും നിര്ദേശം നല്കിയിട്ടുണ്ട്.
അടുത്ത ദിവസങ്ങളിലും കാലാവസ്ഥാ മുന്നറിയിപ്പുകള് ശ്രദ്ധാപൂര്വം പിന്തുടരണമെന്നും പുതിയ അറിയിപ്പുകള്ക്കനുസരിച്ച് യാത്രകളും മല്സ്യബന്ധന പ്രവര്ത്തനങ്ങളും ക്രമീകരിക്കണമെന്ന് കാലാവസ്ഥ വകുപ്പ് അറിയിച്ചു.



