കല്ലുരുട്ടി: കല്ലുരുട്ടി തറോൽ പ്രേദേശത്തെ കൃഷിയിടത്തിൽ സാമൂഹ്യ വിരുദ്ധർ രാത്രിയുടെ മറവിൽ കക്കൂസ് മാലിന്യം തള്ളി.ഇന്ന് (ശനിയാഴ്‌ച) പുലർച്ചെയാണ് സംഭവം. കല്ലുരുട്ടിയുടെയും തറോലിന്റെയും ഇടയിൽ മിനി സ്റ്റേഡിയത്തിനു സമീപം സ്വകാര്യ വ്യക്തികളുടെ കൃഷിയിടത്തിലാണ് കക്കൂസ് മാലിന്യം തള്ളിയത്. റോഡിൽ വാഹനം നിർത്തി കൃഷിയിടത്തിലേക്ക് മാലിന്യം ഒഴുക്കി വിട്ടതായാണ് സംശയിക്കുന്നത്. അസഹ്യമായ ദുർഗന്ധം കാരണം പരിസരത്തു നിൽക്കാൻ പറ്റാത്ത അവസ്ഥയാണ്.

സമീപത്തെ തോട്ടിലേക്ക് മാലിന്യം ഒഴുകുന്നത് പ്രദേശത്തെ കുടിവെള്ള സ്രോതസുകളെയും ബാധിക്കുമെന്ന ആശങ്കയിലാണ് നാട്ടുകാർ. കൂടാതെ കുട്ടികളുൾപ്പെടെയുള്ളവർ സ്ഥിരമായി ഉപയോഗിക്കുന്ന സ്റ്റേഡിയത്തിന് സമീപമായതുകൊണ്ടു കൂടെ ഗുരുതരമായ ആരോഗ്യ പ്രശ്നങ്ങൾക്കും ഇത് കാരണമാകും.

നേരത്തെയും ഈ പ്രേദേശങ്ങളിൽ മാലിന്യം തള്ളിയിരുന്നതായി പരാതി ഉയർന്നിരുന്നെങ്കിലും അധികൃതരുടെ ഭാഗത്തു നിന്നും നടപടികൾ ഒന്നും തന്നെ ഉണ്ടായിരുന്നില്ല. രാത്രിയുടെ മറവിൽ സാമൂഹൃവിരുദ്ധർ നടത്തിയ പ്രവർത്തിക്കെതിരെ ഏറെ രോഷത്തോടെയാണ് നാട്ടുകാർപ്രതികരിച്ചത് . മുക്കം പോലീസിൽ പരാതി നൽകി നിയമനടപടിയുമായി മുന്നോട്ടു പോകുമെന്ന് പ്രദേശവാസികൾ അറിയിച്ചു.

കൊണ്ടോട്ടി:കരിപ്പൂർ വിമാനത്താവളത്തിൽ വ്യാജ ബോംബ് ഭീഷണി. ഷാർജയിലേക്കുള്ള എയർ അറേബ്യ വിമാനത്തിനാണ് ഭീഷണി. ഡോഗ് സ്ക്വാഡ് എത്തി പരിശോധന നടത്തിയങ്കിലും ഒന്നും കണ്ടെത്താനായില്ല. ഇന്ന് രാവിലെയാണ് സംഭവം.യാത്രക്കാർ കയറുന്ന സമയത്താണ് വിമാനത്തിനകത്ത് നിന്ന് ബോംബ് ഭീഷണി അടങ്ങിയ ഒരു കുറിപ്പ് കണ്ടെത്തുന്നത്. തുടർന്ന് യാത്രക്കാരെ തിരിച്ചിറക്കുകയും ബോംബ് സ്‌ക്വാഡ് ഉൾപ്പെടെയുള്ളവർ പരിശോധന നടത്തുകയും ചെയ്തു. എന്നാൽ യാതൊന്നും കണ്ടെത്താനായില്ല. തുടർന്ന് യാത്രക്കാരെ തിരിച്ച് വിമാനത്തിൽ കയറ്റുകയും ചെയ്തു.

യമനിൽ വധശിക്ഷയ്ക്ക് വിധിക്കപ്പെട്ട് ജയിലിൽ കഴിയുന്ന നിമിഷപ്രിയയുടെ മോചനത്തിനായുള്ള പ്രാരംഭ ചർച്ചകൾക്കായി 20,000 ഡോളർ (16,71,000 രൂപ) കേന്ദ്ര വിദേശകാര്യ മന്ത്രാലയത്തിന്റെ അക്കൗണ്ടിൽ നിക്ഷേപിച്ചു. സേവ്‌ നിമിഷപ്രിയ ഇന്റർനാഷണൽ ആക്‌ഷൻ കൗൺസിൽ സമാഹരിച്ച തുകയാണ്‌ നിക്ഷേപിച്ചത്‌. 
പ്രാരംഭ ചർച്ചകൾക്ക് 40,000 ഡോളർ ഇന്ത്യൻ എംബസിവഴി കൈമാറാൻ വിദേശകാര്യ മന്ത്രാലയം കഴിഞ്ഞദിവസം അനുമതി നൽകിയിരുന്നു. നിമിഷപ്രിയയുടെ അമ്മ പ്രേമകുമാരി അനുമതി തേടി വിദേശകാര്യമന്ത്രാലയത്തെ സമീപിച്ചിരുന്നു. മോചനത്തിനുവേണ്ടിയുള്ള പ്രാരംഭ ചർച്ച തുടങ്ങണമെങ്കിൽ 40,000 അമേരിക്കൻ ഡോളർ ആദ്യം കൈമാറണമെന്നും അത് എംബസിവഴി ലഭിക്കാൻ അനുമതി നൽകണമെന്നുമായിരുന്നു പ്രേമകുമാരി  ആവശ്യപ്പെട്ടത്.

കൊല്ലപ്പെട്ട യമൻ യുവാവ് തലാലിന്റെ കുടുംബവുമായി പ്രാരംഭ ചർച്ച നടത്തുന്നതിനുള്ള ചെലവിനാണ് ഈ തുക ഉപയോഗിക്കുക. ചർച്ച നടത്തിയാൽമാത്രമേ അവർ ദിയാധനം സ്വീകരിച്ച് മാപ്പ് നൽകുമോയെന്നും എത്ര തുക ആവശ്യപ്പെടുമെന്നും അറിയാൻ കഴിയൂ. വിദേശകാര്യമന്ത്രാലയത്തിന്റെ ഡൽഹി എസ്ബിഐ അക്കൗണ്ടിൽനിന്ന്‌ യമനിൽ ഇന്ത്യൻ എംബസിയുടെ അക്കൗണ്ടിലേക്ക് തുടർന്ന്‌ തുക കൈമാറും. പിന്നീട് എംബസി അഭിഭാഷകൻ അബ്ദുള്ള അമറിന്റെ ബാങ്ക് അക്കൗണ്ടിലേക്കും കൈമാറും.

തലാൽ അബ്ദുൾ മഹ്ദിയെന്ന യമൻ പൗരനെ അവിടെ നഴ്സായിരുന്ന പാലക്കാട് കൊല്ലങ്കോട് തേക്കിൻചിറ സ്വദേശിനി നിമിഷപ്രിയ കൊലപ്പെടുത്തിയെന്നാണ് കേസ്. 2020-ൽ സനയിലെ വിചാരണക്കോടതി നിമിഷയ്ക്ക് വധശിക്ഷ വിധിച്ചു. 2023 നവംബറിൽ യമനിലെ സുപ്രീം ജുഡീഷ്യൽ കൗൺസിലിൽ നൽകിയ അപ്പീലും നിരസിച്ചു.

തിരുവനന്തപുരം:  മാനന്തവാടി എംഎല്‍എ ഒ ആർ കേളു എസ്‌സി- എസ് ടി ക്ഷേമവകുപ്പ് മന്ത്രിയാകും. കെ രാധാകൃഷ്ണന്‍ പാര്‍ലമെന്റിലേക്ക് തിരഞ്ഞെടുക്കപ്പെട്ട സാഹചര്യത്തിലാണ് ഒ ആര്‍ കേളുവിന് ചുമതല.

കെ രാധാകൃഷ്ണൻ കൈകാര്യം ചെയ്തിരുന്ന ദേവസ്വം വകുപ്പ് വി എൻ വാസവനും പാർലമെന്ററി കാര്യം എം ബി രാജേഷും കൈകാര്യം ചെയ്യും. സിപിഐ എം സംസ്ഥാന സമിതിയിലാണ് തീരുമാനം.

രണ്ടു പതിറ്റാണ്ടിലേറെയായി ജനപ്രതിനിധിയെന്ന നിലയിൽ ഒ ആർ സജീവ സാന്നിധ്യമാണ്. തിരുനെല്ലി ഗ്രാമപഞ്ചായത്തിലെ ഇടയൂര്‍ക്കുന്ന് വാര്‍ഡില്‍ 2000ല്‍ ഗ്രാമപഞ്ചായത്ത് അംഗമായാണ് ജനപ്രതിനിധി എന്ന നിലയിലുള്ള തുടക്കം.സിപിഐ എം സംസ്ഥാന സമിതിയിലെ വയനാട് ജില്ലയിൽനിന്നുള്ള  ആദ്യ പട്ടികവർഗ നേതാവാണ്. ആദിവാസി ക്ഷേമ സമിതിയുടെ സംസ്ഥാന പ്രസിഡന്റാണ്. സംവരണ മണ്ഡലമായ മാനന്തവാടിയിൽനിന്നുള്ള നിയമസഭാംഗമാണ്.

കുറിച്യ സമുദായക്കാരനായ ഇദ്ദേഹം പട്ടികജാതി-പട്ടികവർഗ പിന്നാക്ക ക്ഷേമം സംബന്ധിച്ച നിയമസഭ സമിതിയുടെ ചെയര്‍മാനും കേരള വെറ്ററിനറി ആൻഡ് ആനിമല്‍ സയന്‍സ് യൂനിവേഴ്‌സിറ്റിയുടെ ബോര്‍ഡ് ഓഫ് മാനേജ്‌മെന്റ് അംഗവുമാണ്.

2005ലും 2010ലുമായി തുടര്‍ച്ചയായി 10 വര്‍ഷം തിരുനെല്ലി ഗ്രാമപഞ്ചായത്ത് പ്രസിഡന്റ്. പിന്നീട് 2015ല്‍ തിരുനെല്ലി ഡിവിഷനില്‍നിന്നും മാനന്തവാടി ബ്ലോക്ക് പഞ്ചായത്ത് അംഗം.

 2016ലെ നിയമസഭാ തെരഞ്ഞെടുപ്പില്‍ മന്ത്രിയായിരുന്ന പി കെ ജയലക്ഷ്മിയെ തോല്‍പിച്ച് മാനന്തവാടി നിയോജക മണ്ഡലം എംഎല്‍എയായി. 2021ലെ നിയമസഭാ തെരഞ്ഞെടുപ്പില്‍ മാനന്തവാടിയില്‍നിന്ന് വീണ്ടും തെരഞ്ഞെടുക്കപ്പെട്ടു. ഭാര്യ: ശാന്ത. മക്കള്‍: മിഥുന, ഭാവന.