കോഴിക്കോട് : സായുധസേനയില് നിന്ന് വിരമിക്കുന്നവര്ക്ക് ഇനി പുതിയ ജോലി സാധ്യതകള്. സെക്യൂരിറ്റി, ഹോം ഗാര്ഡ് ജോലികള് മാത്രമല്ല അക്കൗണ്ടിങ് മേഖലയിലും അവര് ഇനി തിളങ്ങും. അതിനായി അവരെ ശാക്തീകരിക്കുകയാണ് പ്രതിരോധ മന്ത്രാലയം. കോഴിക്കോട് നിന്ന് സര്ട്ടിഫിക്കറ്റ് ഓഫ് അക്കൗണ്ടിങ് ടെക്നീഷ്യന് കോഴ്സ് (കാറ്റ്) പൂര്ത്തിയാക്കിയത് 39 സൈനികര്. ഹോട്ടല് ഹൈസണ് ഹെറിറ്റേജില് നടന്ന കോണ്വൊക്കേഷന് ചടങ്ങുകള് പുതുമയുള്ളതായി. പ്രതിരോധമന്ത്രാലയത്തിനു കീഴിലുള്ള ഡയറക്ടര് ജനറല് റീ സെറ്റില്മെന്റ് (ഡിജിആര്), ഇന്സ്റ്റിറ്റ്യൂട്ട് ഓഫ് കോസ്റ്റ് എക്കൗണ്ടന്റ്സ് ഓഫ് ഇന്ത്യ (ഐസിഎംഎഐ) എന്നിവയുടെ മേല്നോട്ടത്തിലാണ് സൈനികരുടെ തൊഴില് ശാക്തീകരണത്തിനായുള്ള പദ്ധതികൾ. ഐസിഎംഎഐ കോഴിക്കോട് മലപ്പുറം ചാപ്റ്ററിന്റെ കീഴില് കോഴിക്കോട് പ്രവര്ത്തിക്കുന്ന ഇന്സ്റ്റിറ്റ്യൂട്ടില് നിന്നാണ് ഇവര് പഠനം പൂര്ത്തിയാക്കിയത്. വ്യോമസേനയില് നിന്നുള്ള 3 പേര്, നാവികസേനയില് നിന്നുള്ള 9 പേര് കരസേനയില് നിന്നുള്ള 27 പേര് എന്നിവരാണ് കോഴ്സ് പൂര്ത്തിയാക്കിയത്. ഇവര് എല്ലാവരും 2027 മാര്ച്ചിനകം സേനയില് നിന്ന് വിരമിക്കുന്നവരാണ്. വിരമിക്കുന്ന സൈനികര്ക്ക് മികച്ച ജോലിയും വരുമാനവും തുടര്ന്നും ലഭ്യമാക്കുക എന്ന ലക്ഷ്യം വച്ചാണ് ഇത്തരം പരീശീലനം നല്കുന്നത്. പഠനത്തിനായി നാലുമാസത്തെ അവധിയും എല്ലാവര്ക്കും അനുവദിക്കപ്പെട്ടു. ഓരോ സംസ്ഥാനങ്ങളിലും ഇത്തരത്തില് വിവിധങ്ങളായ കോഴ്സുകള് പരിശീലിപ്പിക്കുന്നുണ്ട്.കോഴിക്കോട് നടന്ന ഡിജിആര് കാറ്റ് കോഴ്സ് സര്ട്ടിഫിക്കറ്റ് വിതരണ ചടങ്ങില് കോഴിക്കോട് നമ്പര് 09 നേവല് യൂണിറ്റ് എന്സിസി കമാന്റിങ് ഓഫീസര് വിഷ്ണു ഇ.ജി. മുഖ്യാതിഥിയായിരുന്നു. ഡിജിആര് ജോയന്റ് ഡയറക്ടര് കമാന്ഡര് രാഹില്, ഐസിഎംഎഐ കോഴിക്കോട് മലപ്പുറം ചാപ്റ്റര് ചെയര്മാന് ആദര്ശ് കെ.പി., സെക്രട്ടറി വിജിത്ത് പി. എന്നിവര് സംസാരിച്ചു
കോഴിക്കോട്ടുകാർക്ക് കളക്ടറുടെ ക്ഷണം; മാനാഞ്ചിറയിൽ നാളെ വായനാ പ്രഭാതം.
കോഴിക്കോട്: വായനയുടെ ലോകത്തേക്ക് കോഴിക്കോട്ടുകാരെ ക്ഷണിച്ച് ജില്ലാ കളക്ടർ. പുസ്തകങ്ങളും കഥകളും കവിതകളും പങ്കുവെക്കുന്നതിനായി നാളെ (സെപ്റ്റംബർ 13) രാവിലെ എട്ടു മണിക്ക് മാനാഞ്ചിറ മൈതാനത്ത് വായനാ കൂട്ടായ്മ സംഘടിപ്പിക്കും.ഏവർക്കും ഇഷ്ടപ്പെട്ട ഒരു പുസ്തകമോ കഥയോ കവിതയോ കൈയിൽ കരുതി പരിപാടിയിൽ പങ്കുചേരാം. പ്രായഭേദമന്യേ എല്ലാവർക്കും വായന ഇഷ്ടപ്പെടുന്നവർക്കും വായന തുടങ്ങാൻ ആഗ്രഹിക്കുന്നവർക്കും ഈ കൂട്ടായ്മയിൽ പങ്കെടുക്കാം. വായിക്കാനും പങ്കുവെക്കാനും കേൾക്കാനും സൗഹൃദസംഭാഷണങ്ങളിലേർപ്പെടാനും അവസരമൊരുക്കുന്ന പരിപാടിയിലൂടെ ബഷീറും എംടി.യും പൊറ്റെക്കാടും നടന്ന കോഴിക്കോടിന്റെ അക്ഷരവഴികളിലൂടെ പുതിയൊരു വായനാനുഭവത്തിനാണ് ജില്ലാ കളക്ടർ ഒരുങ്ങുന്നത്.
മലേഷ്യൻ പ്രധാനമന്ത്രിയുടെ സന്ദർശനം: നാളെ വൈകിട്ട് മുതൽ കോഴിക്കോട്ട് ഗതാഗത നിയന്ത്രണം
കോഴിക്കോട്: മലേഷ്യൻ പ്രധാനമന്ത്രിയുടെ സന്ദർശനത്തോടനുബന്ധിച്ച് നാളെ (സെപ്റ്റംബർ 13, ഞായർ) വൈകിട്ട് 5 മണി മുതൽ കോഴിക്കോട് ജില്ലയിലെ വൈദ്യരങ്ങാടി, രാമനാട്ടുകര മുതൽ മലാപ്പറമ്പ് വരെയും മലാപ്പറമ്പ് മുതൽ കുന്നമംഗലം – മടവൂർ വരെയുള്ള റോഡുകളിലും പൂർണ്ണ ഗതാഗത നിയന്ത്രണം ഏർപ്പെടുത്തിയതായി ട്രാഫിക് പൊലീസ് അറിയിച്ചു. ഇതിന്റെ ഭാഗമായി വയനാട് ഭാഗത്തുനിന്നുള്ള വാഹനങ്ങൾ താമരശ്ശേരി-ബാലുശ്ശേരി-എരഞ്ഞിപ്പാലം വഴിയും, കൊടുവള്ളി ഭാഗത്തുനിന്നുള്ളവ പടനിലം-വരട്ട്യാക്ക്-പെരിങ്ങളം വഴിയും, മുക്കം ഭാഗത്തുനിന്നുള്ളവ ചെത്തുകടവ്-പെരിങ്ങളം വഴിയും, കണ്ണൂർ ഭാഗത്തുനിന്നുള്ളവ എലത്തൂർ-പാവങ്ങാട്-നടക്കാവ് വഴിയും, യൂണിവേഴ്സിറ്റി ഭാഗത്തുനിന്നുള്ളവ ഇടിമൂഴിക്കൽ-ഫറോക്ക്-ചെറുവണ്ണൂർ വഴിയും സിറ്റിയിലേക്ക് പ്രവേശിക്കേണ്ടതാണ്. കൂടാതെ കുന്നമംഗലം ഭാഗത്തേക്ക് പോകുന്ന വാഹനങ്ങൾ മുണ്ടിക്കൽ താഴം-കോട്ടാംപറമ്പ്-മനത്താനത്ത് റോഡ് വഴി തിരിഞ്ഞു പോകേണ്ടതും, മലാപ്പറമ്പ്-മടവൂർ റോഡിലെ പാർക്കിംഗ് പൂർണ്ണമായി ഒഴിവാക്കേണ്ടതുമാണ്. വി.വി.ഐ.പി കടന്നുപോകുന്ന സമയത്ത് റോഡുകളിൽ ഗതാഗതം പൂർണ്ണമായും തടയുന്നതിനാൽ വിമാനത്താവളത്തിലേക്കും റെയിൽവേ സ്റ്റേഷനിലേക്കും പോകുന്ന യാത്രക്കാർ യാത്ര നേരത്തെ ക്രമീകരിക്കേണ്ടതാണ്.
ജില്ലാ ജൂനിയർ അത്ലറ്റിക്സ് മീറ്റ് ആരംഭിച്ചു.
കോഴിക്കോട് :ജില്ലാ അത്ലറ്റിക്സ് അസോസിയേഷൻ സംഘടിപ്പിക്കുന്ന ജില്ലാ ജൂനിയർ അത്ലറ്റിക്സ് മീറ്റ് മെഡിക്കൽ കോളേജ് ഒളിമ്പ്യൻ റഹ്മാൻ സ്റ്റേഡിയത്തിൽ ആരംഭിച്ചു. ജില്ലാ പഞ്ചായത്ത് പ്രസിഡന്റ് മില്ലി മോഹൻ* ചാമ്പ്യൻഷിപ്പ് ഉദ്ഘാടനം ചെയ്തു.കോഴിക്കോട് ജില്ലാ അത്ലറ്റിക്സ് അസോസിയേഷൻ സെക്രട്ടറി കെ. എം ജോസഫ് മാസ്റ്റർ സ്വാഗതം പറഞ്ഞു. എബിമോൻ മാത്യൂ അധ്യക്ഷത വഹിച്ചു.ഇബ്രാഹിം ചീനിക്ക, പി. ഷഫീഖ്, പി. ടി അബ്ദുൽ അസീസ്, മോളി ഹസൻ എന്നിവർ ആശംസകൾ നേർന്നു. വി. കെ സാബിറ നന്ദിയും പറഞ്ഞു.
പരസ്യ ബോർഡുകൾക്കായി കെ.എസ്.ആർ.ടി.സി ബസ് സ്റ്റാൻഡിലെ ഫാനുകൾ എടുത്തുമാറ്റി.
കോഴിക്കോട്: രാത്രികാലങ്ങളിൽ കെ.എസ്.ആർ.ടി.സി ബസ് സ്റ്റാൻഡിലേക്ക് വരണം. പവർ കട്ടുള്ള സമയമാണ് ഏറ്റവും അനുയോജ്യം. പൊതുവെ ഈ ബസ് സ്റ്റാൻഡിൽ കുറച്ചുനേരം നിന്നാൽ തന്നെ ചൂട് കൊണ്ട് പൊരിയും. യാത്രക്കാർക്ക് ആശ്വാസമേകാനായി ബസ് കാത്തിരിക്കുന്ന സ്ഥലത്തെ പില്ലറിനു മുകളിൽ ഫാനുകൾ സ്ഥാപിച്ചിരുന്നു. എന്നാൽ, ഈ ഫാനുകളൊക്കെ എടുത്തുമാറ്റി പരസ്യ ബോർഡുകൾ സ്ഥാപിച്ചിരിക്കയാണ്. ഫാനില്ലാത്തത് കാരണം യാത്രക്കാർ ഇരിക്കുന്നിടത്ത് കാറ്റ് എത്തുന്നേയില്ല. ബസുകളുടെ പുകശല്യവും ചൂടും കൂടിയിട്ടുണ്ട്. ഫാനുകൾ ഉള്ളപ്പോൾ പുകശല്യത്തിനും ആശ്വാസമായിരുന്നു.18 ഓളം ഫാനുകൾ ഉണ്ടായിരുന്നതു മുഴുവൻ മാറ്റി. ഓരോ മാസവും പരസ്യബോർഡുകൾ മാറ്റിക്കൊണ്ടിരിക്കും. വലിയ തുക കമീഷൻ വാങ്ങിയാണ് സ്വകാര്യ ഏജൻസികൾ ഇവിടെ പരസ്യ ബോർഡുകൾ സ്ഥാപിച്ചിരിക്കുന്നത്. കറന്റുള്ള സമയങ്ങളിൽ പരസ്യബോർഡുകളുള്ളതു കൊണ്ട് വെളിച്ചം കിട്ടുമെങ്കിലും പവർകട്ടുള്ള സമയത്ത് ഇവിടം മുഴുവൻ ഇരുട്ടായിരിക്കും. രാത്രി വൈകുവോളം സ്ത്രീകളടക്കം നിരവധി യാത്രക്കാർക്ക് വലിയ സുരക്ഷ ഭീഷണി സൃഷ്ടിക്കുന്നുണ്ട് ഇത്. മാത്രമല്ല, വെളിച്ചമില്ലാത്തതിനാൽ കള്ളൻമാർക്ക് സ്വൈരമായി വിഹരിക്കാം. നിത്യേനയെന്നോണം മാലപൊട്ടിക്കലും പതിവാണിവിടെ.കഴിഞ്ഞ ദിവസം രാത്രി രണ്ടു തവണയാണ് വൈദ്യുതി തടസ്സമുണ്ടായത്. സ്വകാര്യ ബസുകൾ രാത്രി ഒമ്പതോടെ സർവിസുകൾ അവസാനിപ്പിക്കുന്ന സാഹചര്യമായതിനാൽ ആളുകളുടെ അവസാന ആശ്രയം കെ.എസ്.ആർ.ടി.സി ബസുകളാണ്. പ്രിയദർശിനി സർവിസ് തുടങ്ങിയതോടെ സ്ത്രീ യാത്രക്കാരുടെ എണ്ണവും കൂടിയിട്ടുണ്ട്. അതേസമയം, കെ.എസ്.ആർ.ടി.സിയുടെ ടിക്കറ്റിതര വരുമാനം വർധിപ്പിക്കുന്നതിന്റെ ഭാഗമായാണ് കോഴിക്കോട് ഉൾപ്പെടെയുള്ള പ്രധാന ബസ് സ്റ്റാൻഡുകളിലും ടെർമിനലുകളിലും പരസ്യങ്ങൾ സ്ഥാപിക്കാൻ അനുമതി നൽകിയിട്ടുള്ളതെന്നാണ് അധികൃതർ പറയുന്നത്. എന്നാൽ, പരസ്യങ്ങളിലൂടെ കെ.എസ്.ആർ.ടി.സിക്ക് ലഭിക്കുന്നത് തുഛമായ വരുമാനമാണ്. യഥാർഥ മാർക്കറ്റ് വാല്യൂ അനുസരിച്ച് വരുമാനം ലഭിക്കുന്നില്ലെന്നും ആരോപണമുണ്ട്.
മാലിന്യ സംസ്കരണം; ശേഖരണരീതി മാറുന്നു.
സംസ്ഥാനത്ത് വീടുകളിൽ നിന്നുള്ള അജൈവ മാലിന്യം ശേഖരിക്കുന്ന രീതിയിൽ സമഗ്രമാറ്റം വരുന്നു. സംസ്കരിച്ച് ഉപയോഗിക്കാവുന്നവയ്ക്കു പ്രതിഫലം നൽകാനാണ് ആലോചിക്കുന്നത്.വീട്ടുകാരെ മാലിന്യങ്ങൾ തരംതിരിക്കാൻ പ്രേരിപ്പിക്കാനും സംസ്കരണം സാധ്യമല്ലാത്ത ഒറ്റത്തവണ മാത്രം ഉപയോഗമുള്ള പ്ലാസ്റ്റിക് ഉൾപ്പെടെയുള്ള മാലിന്യങ്ങളുടെ ഉപയോഗം കുറയ്ക്കാനും വേണ്ടിയാണ് പ്രതിഫലം നൽകുന്നതു പരിഗണിക്കുന്നത്. അതേസമയം, വീടുകളിൽനിന്നും സ്ഥാപനങ്ങളിൽനിന്നും ഹരിതകർമസേന യൂസർ ഫീ ശേഖരിക്കുന്നതു തുടരും.വീടിന്റെ വലുപ്പമനുസരിച്ച് യൂസർഫീ പിരിക്കാനും ആലോചിക്കുന്നുണ്ട്. ചെറിയ വീടുള്ളവർ കുറഞ്ഞതുക നൽകിയാൽ മതിയാകും. യൂസർഫീ പിരിക്കുന്നത് ഓഡിറ്റിനു വിധേയമാക്കും.യുഡിഎഫ് സർക്കാരിനു കീഴിൽ പുനഃസംഘടിപ്പിച്ച, തദ്ദേശ വകുപ്പിന് കീഴിലെ സ്റ്റേറ്റ് റിസോഴ്സ് ഗ്രൂപ്പിന്റെ ആദ്യ യോഗത്തിലാണു പദ്ധതിയുടെ പ്രാഥമിക ചർച്ചകൾ നടന്നത്. മന്ത്രി കെ.എം.ഷാജി, സംസ്ഥാന ആസൂത്രണ ബോർഡ് വൈസ് ചെയർമാൻ കെ.എം.ചന്ദ്രശേഖർ, അംഗം ഡോ.പി.പി.ബാലൻ തുടങ്ങിയവർ പങ്കെടുത്തു.മാലിന്യ സംസ്കരണ പദ്ധതികളെക്കുറിച്ചു സമഗ്രമായി പഠിക്കാനും ശാസ്ത്രീയവും സുസ്ഥിരവുമായ പദ്ധതികൾ തയാറാക്കാനുമായി കേരള പഞ്ചായത്ത് അസോസിയേഷൻ പ്രസിഡന്റ് അനിൽ അക്കര ചെയർമാനായും ക്ലീൻ കേരള കമ്പനി ലിമിറ്റഡ് മുൻ മാനേജിങ് ഡയറക്ടർ കബീർ ബി. ഹാറൂൺ കൺവീനറായും ഉപസമിതി രൂപീകരിച്ചിട്ടുണ്ട്.
കേരളത്തിൽ ഇന്നും നാളെയും കനത്ത ചൂട്; 4 ഡിഗ്രി വരെ ഉയരും, ജാഗ്രത നിർദേശവുമായി ദുരന്ത നിവാരണ അതോറിറ്റി.
തിരുവനന്തപുരം: സംസ്ഥാനത്ത് ഇന്നും നാളെയും കനത്ത ചൂട് മുന്നറിയിപ്പ്. കേരളത്തിൽ ഒറ്റപ്പെട്ട ഇടങ്ങളിൽ താപനില സാധാരണയേക്കാൾ 3 മുതൽ 4 ഡിഗ്രി സെൽഷ്യസ് വരെ ഉയരാൻ സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.കാലവർഷം ദുർബലമായതും എൽ നിനോയുടെ സ്വാധീനവുമാണ് താപനില ഉയരാൻ കാരണമെന്നാണ് വിലയിരുത്തൽ. കഴിഞ്ഞ ദിവസങ്ങളിലും സംസ്ഥാനത്തെ വിവിധ ജില്ലകളിൽ ഉയർന്ന താപനില രേഖപ്പെടുത്തിയിരുന്നു.പകൽ 11 മുതൽ വൈകിട്ട് 3 വരെ പൊതുജനങ്ങൾ അതീവ ജാഗ്രത പാലിക്കണമെന്ന് ദുരന്ത നിവാരണ അതോറിറ്റി നിർദേശിച്ചു. ഉയർന്ന ചൂട് സൂര്യാഘാതം, സൂര്യാതപം, നിർജലീകരണം തുടങ്ങിയ ഗുരുതര ആരോഗ്യപ്രശ്നങ്ങൾക്ക് കാരണമാകും.*ജാഗ്രത നിർദേശങ്ങൾ:*- പകൽ 11 മണി മുതൽ 3 മണി വരെ നേരിട്ടുള്ള സൂര്യപ്രകാശം ഏൽക്കുന്നത് ഒഴിവാക്കുക.- ദാഹമില്ലെങ്കിലും ധാരാളം ശുദ്ധജലം കുടിക്കുക. മദ്യം, കാപ്പി, ചായ, കാർബണേറ്റഡ് സോഫ്റ്റ് ഡ്രിങ്കുകൾ എന്നിവ പകൽ സമയത്ത് ഒഴിവാക്കുക.- അയഞ്ഞ, ഇളം നിറത്തിലുള്ള കോട്ടൺ വസ്ത്രങ്ങൾ ധരിക്കുക. പുറത്തിറങ്ങുമ്പോൾ കുട, തൊപ്പി, പാദരക്ഷ എന്നിവ ഉപയോഗിക്കുക.- പഴങ്ങളും പച്ചക്കറികളും ധാരാളം കഴിക്കുക. ORS, സംഭാരം എന്നിവ ഉപയോഗിക്കുക.- കുട്ടികൾ, ഗർഭിണികൾ, പ്രായമായവർ, കിടപ്പ് രോഗികൾ എന്നിവർ പ്രത്യേകം ശ്രദ്ധിക്കണം. സ്കൂളുകളിൽ അസംബ്ലിയും വെയിലത്തുള്ള പരിപാടികളും ഒഴിവാക്കണം.- നിർമാണ തൊഴിലാളികൾ, കർഷകർ, വഴിയോര കച്ചവടക്കാർ, ഓൺലൈൻ ഭക്ഷണ വിതരണക്കാർ എന്നിവർ ജോലി സമയം ക്രമീകരിക്കുകയും വിശ്രമം ഉറപ്പാക്കുകയും ചെയ്യുക.- മാർക്കറ്റുകൾ, ഡംപിങ് യാർഡുകൾ എന്നിവിടങ്ങളിൽ തീപിടുത്ത സാധ്യത കൂടുതലായതിനാൽ ഫയർ ഓഡിറ്റ് നടത്തുക.- കാട്ടുതീ സാധ്യതയുള്ളതിനാൽ വനമേഖലയോട് ചേർന്ന് താമസിക്കുന്നവർ വനംവകുപ്പിന്റെ നിർദേശങ്ങൾ പാലിക്കുക.- പാർക്ക് ചെയ്ത വാഹനങ്ങളിൽ കുട്ടികളെയോ വളർത്തുമൃഗങ്ങളെയോ ഇരുത്തി പോകരുത്. കന്നുകാലികളെ ഉച്ചവെയിലത്ത് മേയാൻ വിടരുത്.അസ്വസ്ഥതകൾ അനുഭവപ്പെട്ടാൽ ഉടൻ വിശ്രമിക്കുകയും വൈദ്യസഹായം തേടുകയും ചെയ്യണമെന്നും കാലാവസ്ഥ വകുപ്പിന്റെയും ദുരന്ത നിവാരണ അതോറിറ്റിയുടെയും ഔദ്യോഗിക മുന്നറിയിപ്പുകൾ ശ്രദ്ധിക്കണമെന്നും അധികൃതർ അറിയിച്ചു.
വൈദ്യുതി പ്രതിസന്ധി: ഉയർന്ന വിലയ്ക്ക് വൈദ്യുതി വാങ്ങാൻ റഗുലേറ്ററി കമ്മീഷൻ അനുമതി
തിരുവനന്തപുരം: വൈദ്യുതി പ്രതിസന്ധി രൂക്ഷമായിരിക്കെ, ഉയർന്ന വിലയ്ക്ക് വൈദ്യുതി വാങ്ങാൻ റഗുലേറ്ററി കമ്മീഷൻ അനുമതി. ഒക്ടോബർ മുതൽ മെയ് വരെ ഹ്രസ്വകാല കരാറിലൂടെ വൈദ്യുതി വാങ്ങാനാണ് അനുമതി. നിയന്ത്രണങ്ങളോടെയാണ് അനുമതി. കെഎസ്ഇബിയുടെ കരാറുകൾ മുഴുവൻ റെഗുലേറ്ററി കമ്മീഷൻ അംഗീകരിച്ചില്ല. ഏപ്രിൽ, മെയ് മാസങ്ങളിൽ പീക്ക് ടൈമിൽ യൂണിറ്റിന് 12.50 രൂപക്ക് വരെ വൈദ്യുതി വാങ്ങാൻ അനുമതി നൽകി.അതേസമയം ഈ മാസത്തെ നിയന്ത്രണം ഒഴിവാകില്ല. വൈദ്യുതി ഉത്പാദനം കുറഞ്ഞതും ഉപഭോഗം കൂടിയതുമാണ് ഇപ്പോഴത്തെ പ്രതിസന്ധിക്ക് കാരണമെന്നാണ് കെഎസ്ഇബി ചെയർമാൻ എം ജി രാജമാണിക്യം പറയുന്നത്. കേരളത്തിൽ പുതിയ വൈദ്യുത പദ്ധതികൾ വരേണ്ട സമയം അതിക്രമിച്ചെന്നും , മാർക്കറ്റിൽ പോയി പച്ചക്കറി വാങ്ങുന്നത് പോലെയല്ല വൈദ്യുതി വാങ്ങുന്നതെന്നും എം ജി രാജമാണിക്യം പറഞ്ഞു.പീക്ക് സമയങ്ങളിൽ വൈദ്യുതി ആവശ്യകത കൂടാൻ കാരണം എസി ഉപയോഗവും ഇലക്ട്രിക് വാഹനങ്ങളുടെ ചാർജിങ്ങുമാണെന്ന് എം ജി രാജമാണിക്യം പറഞ്ഞു. വൈകിട്ട് ആറുമണി മുതൽ 12 മണി വരെയുള്ള സമയങ്ങളിൽ എസി ഉപയോഗിക്കാതെ സഹകരിക്കണമെന്നും കെഎസ്ഇബി ചെയർമാൻ ആഹ്വാനം ചെയ്യുന്നു.
സ്വപ്ന സുരേഷ് വിവാഹിതയായി
തിരുവനന്തപുരം: ഏറെ കോളിളക്കം സൃഷ്ടിച്ച സ്വർണക്കടത്ത് കേസ് പ്രതി സ്വപ്ന സുരേഷ് വിവാഹിതയായി. സ്വപ്ന തന്നെയാണ് താൻ വിവാഹിതയായെന്ന വിവരം സാമൂഹികമാധ്യമങ്ങളിലൂടെ അറിയിച്ചത്. തന്റെ വിവാഹജീവിതത്തിനായി പ്രാർഥിക്കണമെന്ന് പറഞ്ഞുകൊണ്ടാണ് സ്വപ്നാ സുരേഷ് വിവാഹ ചിത്രങ്ങൾ പങ്കുവെച്ചത്. കേസിലെ മറ്റൊരു പ്രതിയായ പി.എസ്.സരിത്താണ് വരൻ. തിരുവനന്തപുരം തൈക്കാട് സ്വദേശിയായ സ്വപ്നയും തിരുവല്ലം സ്വദേശി സരിത്തും ഇപ്പോൾ കൊച്ചിയിലാണ് താമസം.കൊച്ചി നെട്ടൂർ വടക്കേ പാട്ടുപുരയ്ക്കൽ ക്ഷേത്രത്തിൽ കഴിഞ്ഞ ദിവസമായിരുന്നു വിവാഹം. അടുത്ത ബന്ധുക്കളും സുഹൃത്തുക്കളും മാത്രമായിരുന്നു ഉണ്ടായിരുന്നത്. ‘ഒരുമിച്ച് ജീവിക്കാൻ മാത്രമല്ല ഞങ്ങൾ വിവാഹ ജീവിതം തെരഞ്ഞെടുത്തത്; ഞങ്ങളുടെ കുട്ടികൾക്ക് സത്യവും ബഹുമാനവും മൂല്യങ്ങളും പഠിക്കാനാകുന്ന ഒരു അന്തരീക്ഷം സൃഷ്ടിക്കാനും, ഒരുമിച്ച് ഒരു ജീവിതം പടുത്തുയർത്താനും കൂടിയാണ്. മരണം വരെ ഞാൻ സുമംഗലി ആയിരിക്കാൻ പ്രാർഥിക്കണം’– സ്വപ്ന സമൂഹമാധ്യമങ്ങളിൽ കുറിച്ചു.അതേസമയം വിവാഹത്തെ കുറിച്ചുള്ള കൂടുതൽ വിവരങ്ങൾ സ്വപ്ന പങ്കുവെച്ചിട്ടില്ല. നയതന്ത്ര ചാനലിലൂടെ സ്വർണക്കടത്ത് നടത്തിയെന്ന കേസിലെ പ്രതിയാണ് സ്വപ്നാ സുരേഷ്. സ്വപ്നാ സുരേഷിന്റെ മൂന്നാം വിവാഹമാണ് ഇത്. 2000-ത്തിലായിരുന്നു സ്വപ്നയുടെ ആദ്യ വിവാഹം. കൃഷ്ണകുമാറായിരുന്നു വരൻ. ഈ ബന്ധം 2008-ൽ അവസാനിച്ചു. പിന്നീട് 2011-ൽ ജയശങ്കർ എന്നയാളെ സ്വപ്ന വിവാഹം ചെയ്തു. ഈ ബന്ധവും പിന്നീട് വേർപിരിയുകയായിരുന്നു.
താത്കാലിക അധ്യാപക നിയമനത്തിന് ഇനി പോലീസ് ക്ലിയറൻസ് നിർബന്ധം.
മലപ്പുറം: സർക്കാർ സ്കൂളുകളിൽ അധ്യാപകനിയ മനങ്ങൾ ഉൾപ്പെടെ എല്ലാ താത്കാലിക നിയമനങ്ങൾക്കും പോലീസ് ക്ലിയറൻസ് സർട്ടിഫിക്കറ്റ് നിർബന്ധമാക്കി. നേരത്തേതന്നെ ഈ നിർദേശം ഉണ്ടായിരുന്നെങ്കിലും താത്കാലികനിയമനങ്ങളിൽ അത് പൊതുവേ പരിഗണിക്കപ്പെട്ടിരുന്നില്ല. ഈ ഉത്തരവ് കർശനമായി പാലിക്കണമെന്നാണ് ഇപ്പോൾ നിർദേശം നൽകിയിട്ടുള്ളത്.വടകരയിൽ അധ്യാപകർ എംഡിഎംഎ കേസിൽ ഉൾപ്പെട്ട പശ്ചാത്തലത്തിലാണ് പോലീസ് സർട്ടിഫിക്കറ്റ് കർ ശനമാക്കുന്നത്. താത്കാലിക അധ്യാപകരെ നിയമിക്കാനായി സ്കൂളുകൾ നൽകുന്ന പരസ്യങ്ങളിലും അറിയിപ്പുകളിലും ‘പോലീസ് ക്ലിയറൻസ് സർട്ടിഫിക്കറ്റ് നിർബന്ധം’ എന്ന് പ്രത്യേകം രേഖപ്പെടു ത്താനും നിർദേശമുണ്ട്.സാമ്പത്തിക ഇടപാടുകൾ ഉൾപ്പെടെയുള്ള കാര്യങ്ങളിലും കൂടുതൽ ചിട്ടകൾ നിർദേശിച്ചിട്ടുണ്ട്. വിദ്യാഭ്യാസവകുപ്പിലെ ഓഫീസുകളിലും സ്കൂളുകളിലും ബാങ്ക് ഇടപാടുകൾ നടത്താൻ സ്ഥിരം ജീവനക്കാരെമാത്രമേ ചുമതല പ്പെടുത്താവൂ. അതിന് ഉത്തരവാദപ്പെട്ട ഒരാളുണ്ടാകണമെന്നും എടുത്തുപറയുന്നു.ബാങ്ക് അക്കൗണ്ടുകൾ എല്ലാമാസത്തെയും അവസാന പ്രവൃത്തിദിവസം പരിശോധിച്ച്, കൃത്യത ഉറപ്പുവരുത്തി ഓഫീസ് മേധാവി സാക്ഷ്യപ്പെടുത്തണം. സ്ഥാപനമേധാവിയുടെ ഔദ്യോഗിക മൊബൈൽഫോൺ നമ്പർ ബാങ്ക് അക്കൗണ്ടുമായി ബന്ധിപ്പിക്കണമെന്നും നിർദേശിക്കുന്നു.



