തിരുവനന്തപുരം: വാഹന പുക പരിശോധനയുമായി ബന്ധപ്പെട്ട സര്ട്ടിഫിക്കറ്റുകള് വ്യാജമായി നിര്മിക്കുന്നതിനെതിരെ മോട്ടോര് വാഹന വകുപ്പിന്റെ പൂട്ട്. വ്യാജ സര്ട്ടിഫിക്കറ്റുകള് നല്കുന്നത് തടയാന് ‘പൊലൂഷന് ടെസ്റ്റിംഗ് വിത്ത് ജിയോ ടാഗിംഗ്’ എന്ന പേരിലുള്ള പുതിയ മൊബൈല് ആപ്ലിക്കേഷനാണ് മോട്ടോര് വാഹന വകുപ്പ് പുറത്തിറക്കിയിരിക്കുന്നത്. നമ്പര് പ്ലേറ്റിന്റെ ഫോട്ടോയും വാഹനത്തിന്റെ ദൂരെ നിന്നുള്ള ഫോട്ടോയും ഇനി മുതല് ആപ്പില് അപ്ലോഡ് ചെയ്താല് മാത്രമേ പരിശോധന നടത്താന് കഴിയൂ. വാഹന പുക പരിശോധനകേന്ദ്രം രജിസ്റ്റര് ചെയ്തതിന്റെ 50 മീറ്റര് ചുറ്റളവില് നിന്നാണ് വാഹനത്തിന്റെ ഫോട്ടോ എടുക്കേണ്ടത്. ഇത് സംബന്ധിച്ച നിര്ദ്ദേശങ്ങള് മോട്ടോര് വാഹന വകുപ്പ് പുറത്തിറക്കി.വാഹനങ്ങളുടെ മുഴുവന് വിവരങ്ങളും ആപ്പ് മുഖേന മോട്ടോര് വാഹന വകുപ്പിന് ലഭിക്കുന്നതാണ്.
ഒരു കേന്ദ്രത്തിലെ മൂന്ന് ഫോണുകളില് ഈ ആപ്പ് ഇന്സ്റ്റാള് ചെയ്യാനാകും. വാഹന പുക പരിശോധന കേന്ദ്രം നടത്തിപ്പുകാര് അതത് ജില്ലയിലെ ആര്ടിഒയ്ക്ക് മുമ്പാകെ ഫോണ് ഹാജരാക്കിയാല് ആപ്പ് ഇന്സ്റ്റാള് ചെയ്ത് നല്കുന്നതാണ്. പുക പരിശോധനയ്ക്കായി വാഹനം എത്തിക്കാതെ, നടത്തിപ്പുകാരന്റെ ഫോണിലേക്ക് ഫോട്ടോ അയച്ചുനല്കി സര്ട്ടിഫിക്കറ്റ് നേടുന്നതായി പരാതി ഉയര്ന്ന സാഹചര്യത്തിലാണ് മോട്ടോര് വാഹന വകുപ്പിന്റെ പുതിയ തീരുമാനം.
