സിനിമകൾക്കായും മറ്റും ശരീരഭാരം കുറച്ചും കൂട്ടിയും ട്രാൻസ്ഫർമേഷൻ നടത്തുന്ന നടീ നടന്മാരെ നമ്മൾ പല ഇന്ഡസ്ട്രികളിലും കാണാറുണ്ട്. മലയാളത്തിൽ അടുത്തിടെ ഇത്തരത്തിൽ വമ്പൻ ട്രാൻസ്ഫർമേഷൻ നടത്തി ഞെട്ടിച്ചത് ആട് ജീവിതത്തിന് വേണ്ടി പൃത്വിരാജാണ്. ഇപ്പോൾ ഇതാ മറ്റൊരു ട്രാൻസ്ഫർമേഷൻ കൂടി സോഷ്യൽ മീഡിയയിൽ ചർച്ചയായിരിക്കുകയാണ്. മറ്റാരുമല്ല, മലയാളികളുടെ പ്രിയ നദി രജിഷ വിജയനാണ് തന്റെ രൂപമാറ്റം സോഷ്യൽ മീഡിയയിലൂടെ പുറത്ത് വിട്ടത്.
6 മാസം കൊണ്ട് രജിഷ വിജയൻ കുറച്ചത് 15 കിലോ ഭാരമാണ്. കേള്‍ക്കുമ്പോൾ അതിശയം തോന്നുമെങ്കിലും സംഗതി സത്യമാണ്. കഴിഞ്ഞ ദിവസം രജിഷയുടെ ട്രെയിനറും ആലപ്പുഴ ജിംഖാന സിനിമയ്ക്കു വേണ്ടി നസ്ലൻ അടക്കമുള്ള താരങ്ങളെ ട്രെയിൻ ചെയ്യിച്ച കോച്ചുമായ അലി ഷിഫാസ് ആണ് ഈ ട്രാൻസ്ഫർമേഷൻ പോസ്റ്റ് പങ്കുവച്ചത്.
‘2024ൽ ഖാലിദ് റഹ്മാൻ നിർദേശിച്ച പ്രകാരമാണ് രജിഷ എന്റെയടുത്ത് വരുന്നത്. ആദ്യം കാണുമ്പോൾ ശാരീരികമായ ബുദ്ധിമുട്ടുകളിലൂടെ കടന്നുപോകുകയായിരുന്നു. മുൻപ് നടന്നൊരു ഷൂട്ടിങ്ങിനിടെ ലിഗമെന്റുകൾക്കേറ്റ പരുക്കുകളുണ്ടായിരുന്നു’ – അലി ഷിഫാസ് തന്റെ ഇൻസ്റ്റഗ്രാം പോസ്റ്റിൽ കുറിച്ചു. പക്ഷേ വരാനിരിക്കുന്ന സിനിമയ്ക്കുവേണ്ടി എത്ര കഷ്ടപ്പെടാനും രജിഷ തയാറായിരുന്നു. 6 മാസം കൊണ്ട് 15 കിലോ ഭാരമാണ് കുറച്ചത്. മുൻപ് ഒട്ടും ആരോഗ്യകരമല്ലാത്ത ഡയറ്റുകളാണ് നോക്കിയിരുന്നതെങ്കിൽ ഇത്തവണ ബാലൻസ്ഡ് ഡയറ്റിലൂടെയാണ് പോയത്. മസിൽ ലോസ് ഇല്ലാതെയാണ് വണ്ണം കുറച്ചത്. ഇതിനിടെ പരുക്കുകളിലൂടെ കടന്നുപോവേണ്ടി വന്നെങ്കിലും ഒരിക്കലും രജിഷ പിന്തിരിഞ്ഞില്ലെന്നും അദ്ദേഹം പറയുന്നു. രജിഷയുടെ ആത്മാർഥതയെ അഭിനന്ദിച്ചുകൊണ്ടാണ് കുറിപ്പ് അവസാനിക്കുന്നത്.
പോസ്റ്റിൽ പങ്കുവച്ച ചിത്രങ്ങളിൽ രജിഷ വർക്ഔട്ട് ചെയ്യുന്നതും ഡെഡ്‌ലിഫ്റ്റ് ചെയ്യുന്നതും കാണാനാകും. ഒപ്പം പല തവണയായി കാലിനേറ്റ പരുക്കുകളുടെ ചിത്രവും പങ്കുവച്ചിട്ടുണ്ട്. പോസ്റ്റിനു താഴെ അപർണ ബാലമുരളി, അരുൺ കുര്യൻ, അന്ന ബെൻ, ഗീതു മോഹൻദാസ് അടക്കം നിരവധി താരങ്ങൾ അഭിനന്ദനങ്ങൾ അറിയിച്ചിട്ടുണ്ട്.
