മദ്യപാനമാണ് കരളിന്റെ ആരോഗ്യത്തെ നശിപ്പിക്കുന്നത് എന്നാണ് പൊതുവെയുള്ള ധാരണ. കരള് രോഗമുള്ളവരെല്ലാം മദ്യപിക്കുന്നവരാണെന്നുള്ള ധാരണ. എന്നാൽ നമ്മൾ നിത്യജീവിതത്തിൽ ഉപയോഗിക്കുന്ന ചില സാധാരണ വസ്തുക്കൾ മദ്യത്തേക്കാൾ വേഗത്തിലും മാരകമായും കരളിനെ തകരാറിലാക്കുമെന്നാണ് ആരോഗ്യവിദഗ്ധർ ചൂണ്ടിക്കാണിക്കുന്നത്. നാം പലപ്പോഴും അവഗണിക്കുന്ന, എന്നാൽ കരളിലെ വിഷാംശം വർധിപ്പിക്കുന്ന അഞ്ച് പ്രധാന ഘടകങ്ങൾ ഇവയാണ്.
വേദനസംഹാരികളുടെ അമിതമായ ഉപയോഗം
ഡോക്ടറുടെ നിർദ്ദേശമില്ലാതെ അമിതമായി വേദനസംഹാരികൾ (പാരസെറ്റമോൾ/അസറ്റാമിനോഫെൻ പോലുള്ളവ) കഴിക്കുന്നത് ഗുരുതരമായ കരൾ തകരാറിലേക്ക് നയിക്കാം. കടുത്ത ക്ഷീണം, ഓക്കാനം, മഞ്ഞപ്പിത്തം എന്നിവ ഇതിന്റെ ലക്ഷണങ്ങളായി പ്രത്യക്ഷപ്പെടാം.
ഉയർന്ന അളവിലുള്ള പഞ്ചസാരയും ഫ്രക്ടോസും
സോഫ്റ്റ് ഡ്രിങ്കുകൾ, മിഠായികൾ, കേക്കുകൾ, പാക്കേജ്ഡ് ജ്യൂസുകൾ എന്നിവയിൽ അടങ്ങിയിരിക്കുന്ന അമിത പഞ്ചസാരയും ഫ്രക്ടോസും കരളിൽ കൊഴുപ്പ് അടിഞ്ഞുകൂടാൻ കാരണമാകുന്നു. ഇത് ഫാറ്റി ലിവർ ഡിസീസിലേക്കും തുടർന്ന് ലിവർ സിറോസിസിലേക്കും വഴിമാറാം.
സംസ്കരിച്ച ഭക്ഷണങ്ങളും ജങ്ക് ഫുഡും
ഫാസ്റ്റ് ഫുഡ്, ജങ്ക് ഫുഡ് എന്നിവയിൽ ഉയർന്ന അളവിൽ ട്രാൻസ് ഫാറ്റുകളും പൂരിത കൊഴുപ്പുകളും അടങ്ങിയിട്ടുണ്ട്. ഇവ കരളിന് അധിക സമ്മർദം നൽകുകയും കരളിൽ വീക്കവും കൊഴുപ്പും ഉണ്ടാക്കുകയും ചെയ്യുന്നു. സോഫ്റ്റ് ഡ്രിങ്കുകൾ, മിഠായികൾ, കേക്കുകൾ, പാക്കറ്റ് ജ്യൂസുകൾ എന്നിവയെല്ലാം കരളിന്റെ ആരോഗ്യത്തിന് നല്ലതല്ല.
അശാസ്ത്രീയമായ സപ്ലിമെന്റുകളും ഹെർബൽ മരുന്നുകളും
ശരീരം പുഷ്ടിപ്പെടുത്താനുള്ള ചിലതരം ബോഡിബിൽഡിംഗ് സപ്ലിമെന്റുകൾ, സ്റ്റിറോയിഡുകൾ, ഗുണനിലവാരം ഉറപ്പുവരുത്താത്ത ആയുർവേദ/ഹെർബൽ മരുന്നുകള് എന്നിവയിൽ കരളിന് കടുത്ത വിഷാംശമുണ്ടാക്കുന്ന ഘടകങ്ങൾ അടങ്ങിയിട്ടുണ്ടാകാം.
വൈറൽ അണുബാധകൾ അവഗണിക്കുന്നത്
ഹെപ്പറ്റൈറ്റിസ് ബി, സി തുടങ്ങിയ വൈറൽ അണുബാധകൾ തുടക്കത്തിലേ കണ്ടെത്തി ചികിത്സിക്കാതിരുന്നാൽ അത് കരളിന് സ്ഥിരമായ കേടുപാടുകൾ വരുത്തും. വാക്സിനേഷൻ എടുക്കുക, വൃത്തിയുള്ള ഭക്ഷണം കഴിക്കുക, രക്തം സ്വീകരിക്കുമ്പോഴും സൂചികൾ ഉപയോഗിക്കുമ്പോഴും കൃത്യമായ ജാഗ്രത പുലർത്തുക എന്നിവ ഇതിനെ പ്രതിരോധിക്കാൻ അനിവാര്യമാണ്.
മദ്യം കരളിന് ഹാനികരമാണെന്ന കാര്യത്തിൽ യാതൊരു സംശയവുമില്ല,എന്നാല് വിഷവസ്തുക്കൾ മദ്യക്കുപ്പിയിൽ മാത്രമല്ല, നമ്മുടെ ഭക്ഷണ പ്ലേറ്റിലും മരുന്ന് പെട്ടിയിലുമുണ്ട്. അതിനാൽ, കൃത്യമായ ഭക്ഷണക്രമവും ഡോക്ടറുടെ നിർദ്ദേശപ്രകാരമുള്ള മരുന്ന് ഉപയോഗവും വഴി മാത്രമേ കരളിന്റെ ആരോഗ്യം സംരക്ഷിക്കാൻ സാധിക്കൂ.
