‘ചിത്രങ്ങളെടുക്കും കോളുകള്‍ റെക്കോര്‍ഡ് ചെയ്യും’; ആറ് മാല്‍വെയര്‍ ആപ്പുകള്‍ നീക്കം ചെയ്ത് ഗൂഗിള്‍

ആൻഡ്രോയിഡ് ഉപയോക്താക്കള്‍ക്കായി ദശലക്ഷക്കണക്കിന് ആപ്പുകളാണ് ഗൂഗിള്‍ പ്ലേസ്റ്റോറിലുള്ളത്. യൂസർമാരുടെ വിവിധ ആവശ്യങ്ങള്‍ നിറവേറ്റാനായി ഒരേ സേവനങ്ങള്‍ വാഗ്ദാനം ചെയ്യുന്ന ഒട്ടേറെ ആപ്പുകള്‍ അവിടെ ലഭ്യമാണ്.ഇക്കാരണത്താല്‍ സൈബർ കുറ്റവാളികളുടെ വിളനിലം കൂടിയാണ് ഗൂഗിള്‍ പ്ലേസ്റ്റോർ.

ആപ്പുകളില്‍ രഹസ്യമായി ഉള്‍ച്ചേർക്കുന്ന മാല്‍വെയറുകള്‍ ഉപയോഗിച്ച്‌ സാധാരണക്കാരായ ഉപയോക്താക്കളെ ലക്ഷ്യം വെച്ച്‌ അവരുടെ ഡാറ്റ മോഷ്ടിക്കാനും അവരുടെ പണം തട്ടിയെടുക്കാനുമുള്ള ശ്രമങ്ങളും ഒരു വശത്ത് നടക്കുന്നുണ്ട്. അത്തരം ആപ്പുകള്‍ സ്കാൻ ചെയ്ത് കണ്ടെത്താനായി പ്ലേസ്റ്റോറില്‍ ഗൂഗിള്‍ പ്ലേ പ്രൊട്ടക്‌ട് എന്ന സുരക്ഷാ വലയമുണ്ട്. എന്നാല്‍, ചില ആപ്ലിക്കേഷനുകള്‍ കർശനമായ ആ സുരക്ഷാ വലയം ഭേദിച്ച്‌ കടന്നുകൂടുകയും പിന്നീട് ഉപയോക്താക്കള്‍ക്ക് വിനാശകരമായ പ്രത്യാഘാതങ്ങള്‍ സൃഷ്ടിക്കുകയും ചെയ്യുന്നുണ്ട്.

ഇത്തരത്തില്‍ മാല്‍വെയറുകള്‍ പ്രചരിപ്പിക്കുന്ന 12 ആപ്പുകള്‍ കണ്ടെത്തിയിരിക്കുകയാണ്. അതില്‍ ആറ് ആപ്പുകള്‍ ഗൂഗിള്‍ പ്ലേ സ്റ്റോറിലും ലഭ്യമാണ്. ബ്ലീപിങ് കംപ്യൂട്ടറിന്റെ (BleepingComputer) റിപ്പോർട്ട് അനുസരിച്ച്‌, സൈബർ സുരക്ഷാ കമ്പനിയായ ESET- ലെ ഗവേഷകർ വജ്രസ്പൈ (VajraSpy) എന്ന റിമോട്ട് ആക്‌സസ് ട്രോജൻ (RAT) അടങ്ങിയ 12 മാല്‍വെയർ ആപ്പുകള്‍ ഹൈലൈറ്റ് ചെയ്തിട്ടുണ്ട്.

ഈ ആപ്പുകളില്‍ ആറെണ്ണം ഗൂഗിള്‍ പ്ലേ സ്റ്റോറില്‍ ഡൗണ്‍ലോഡ് ചെയ്യാൻ ഔദ്യോഗികമായി ലഭ്യമാണെങ്കിലും, മറ്റ് ആറ് ആപ്പുകള്‍ മൂന്നാം കക്ഷി ആപ്പ് സ്റ്റോറുകള്‍ വഴി ആക്‌സസ് ചെയ്യാവുന്നതാണ്. ഇതില്‍ 11 ആപ്പുകള്‍ സന്ദേശമയയ്‌ക്കല്‍ ആപ്പുകളായി പരസ്യം ചെയ്യപ്പെട്ടു, ഒരെണ്ണം വാർത്താ പോർട്ടലായാണ് വേഷംമാറിയിരിക്കുന്നത്. പാക്കിസ്ഥാനിലെ ഉപയോക്താക്കളെ ലക്ഷ്യമിട്ടാണ് ഈ മാല്‍വെയർ പ്രത്യേകമായി ഉപയോഗിച്ചതെന്ന് റിപ്പോർട്ടില്‍ പറയുന്നു.

ഒരിക്കല്‍ ഡൗണ്‍ലോഡ് ചെയ്‌താല്‍, ഈ ആപ്പുകള്‍ സ്‌മാർട്ട്‌ഫോണില്‍ VajraSpy എന്ന മാല്‍വെയർ പരത്തുന്നു, അത് കോണ്‍ടാക്‌റ്റുകള്‍, സന്ദേശങ്ങള്‍, ഫയലുകള്‍, ഉപകരണ ലൊക്കേഷൻ തുടങ്ങി ഇൻസ്‌റ്റാള്‍ ചെയ്‌ത ആപ്പുകളുടെ ലിസ്‌റ്റ് ഉള്‍പ്പെടെയുള്ള ഡാറ്റ എക്‌സ്‌ട്രാക്‌റ്റുചെയ്യാൻ പ്രാപ്‌തമാണ്.

മാല്‍വെയർ പ്രചരിപ്പിക്കുന്ന ആപ്പുകളുടെ ലിസ്റ്റ്:

Rafaqat
Privee Talk
MeetMe
Let’s Chat
Quick Chat
Chit Chat
Hello Chat
YohooTalk
TikTalk
Nidus
GlowChat
Wave Chat
ഈ ആപ്പുകളില്‍ ഭൂരിഭാഗവും ഗൂഗിള്‍ പ്ലേ സ്റ്റോറില്‍ നിന്ന് നീക്കം ചെയ്തിട്ടുണ്ടെങ്കിലും, ഉപയോക്താക്കള്‍ നിലവില്‍ സ്മാർട്ട്‌ഫോണുകളില്‍ ഈ ആപ്പുകള്‍ ഇൻസ്റ്റാള്‍ ചെയ്തിട്ടുണ്ടെങ്കില്‍ ഡാറ്റ മോഷണം ഒഴിവാക്കാൻ അവ ഉടനടി ഇല്ലാതാക്കണമെന്ന് സൈബർ സുരക്ഷാ വിദഗ്ധർ നിർദേശിക്കുന്നു.