spot_img
Friday, November 20, 2026
Home Blog Page 142

കോഴിക്കോട് രണ്ട് ചത്ത ഡോൾഫിനുകൾ കരയ്ക്കടിഞ്ഞു

0

കോഴിക്കോട്: ബീച്ചിൽ മുഖദാർ ഭാഗത്തും ബീച്ച് ജനറൽ ആശുപത്രിക്ക് സമീപത്തും ചത്ത ഡോൾഫിനുകൾ അടിഞ്ഞു. ഏകദേശം 200 കിലോഗ്രാം ഭാരമുള്ള ഡോൾഫിനാണ് മുഖദാർ ബീച്ചിൽ അടിഞ്ഞത്. ബീച്ച് ജനറൽ ആശുപത്രിക്കു മുൻവശത്തെ ബീച്ചിൽ ഏതാണ്ട് 50 കിലോഗ്രാം തൂക്കമുള്ള ഡോൾഫിനെയാണ് ചത്തനിലയിൽ കണ്ടെത്തിയത്. ശനിയാഴ്ച പുലർച്ചെയാണ് ചത്ത ഡോൾഫിനുകൾ നാട്ടുകാരുടെ ശ്രദ്ധയിൽപെട്ടത്.

കോർപറേഷന്റെ ആരോഗ്യവിഭാഗവും വനംവകുപ്പ് ഉദ്യോഗസ്ഥരും സ്ഥലത്തെത്തി പരിശോധന നടത്തി. തുടർന്ന് ചീഫ് വെറ്ററിനറി ഓഫിസർ ഡോ. കെ.എം.മനോജ് ലാലിന്റെ നേതൃത്വത്തിൽ പോസ്റ്റ്മോർട്ടം നടത്തി. വലിയ ഡോൾഫിന്റെ വയറിനകത്തു നിന്ന് ഏതാണ്ട് 2 കിലോഗ്രാം തൂക്കം വരുന്ന മത്സ്യബന്ധന വലയുടെ അവശിഷ്ടങ്ങൾ കണ്ടെത്തി. ഈ വല ഡോൾഫിന്റെ അന്നനാളത്തിൽ കുടുങ്ങി ഭക്ഷണം കഴിക്കാനാകാതെയാണ് മരണം സംഭവിച്ചതെന്ന് ഡോ. മനോജ് ലാൽ പറഞ്ഞു. ചെറിയ ഡോൾഫിന്റെ മരണ കാരണം വ്യക്തമല്ല. ആരോഗ്യവകുപ്പിന്റെയും വനംവകുപ്പിന്റെയും നേതൃത്വത്തിൽ ഇവയെ ബീച്ചിൽ ശാസ്ത്രീയ രീതിയിൽ സംസ്കരിച്ചു.

കെഎസ്ആര്‍ടിസി ബസ് ഉണ്ടാക്കുന്ന അപകടം; ഇരകള്‍ക്ക് സ്പോട്ടില്‍ നഷ്ടപരിഹാരം

0

തിരുവനന്തപുരം: കെഎസ്ആര്‍ടിസി ബസ് ഉണ്ടാക്കുന്ന അപകടങ്ങളില്‍ ഇരകള്‍ക്ക് ഉടൻ നഷ്ടപരിഹാരം നല്‍കും . പദ്ധതി സര്‍ക്കാരിന്‍റെ 100 ദിന കര്‍മപദ്ധതിയില്‍ ഉള്‍പ്പെടുത്തി. ഇത് ഉള്‍പ്പെടെ 13 കാര്യങ്ങളാണ് 100 ദിന കര്‍മപദ്ധതിയിലൂടെ കെഎസ്ആര്‍ടിസി നടപ്പാക്കാന്‍ പോവുന്നത്.കെഎസ്ആര്‍ടിസി ബസുകള്‍ ഉണ്ടാക്കുന്ന അപകടങ്ങളില്‍ കോടതി മുഖാന്തരമാണ് നഷ്ടപരിഹാരം. ഇത് കിട്ടാനും സമയമെടുക്കും. അതിനൊരു മാറ്റമാണ് ഗതാഗത വകുപ്പ് ആലോചിച്ചത്.

വേഗത്തില്‍ കുറച്ച് പണമെങ്കിലും കിട്ടുന്നത് ഇരകള്‍ക്ക് ഒരാശ്വാസമാണ്. പരിക്കേല്‍ക്കുന്നവര്‍ക്ക് ആശുപത്രി ചെലവിന് ഉപകരിക്കുന്ന ഒരു പദ്ധതിയാണ് ആവിഷ്ക്കരിക്കുന്നത്. അപകടമുണ്ടാകുന്ന ദിവസം തന്നെ തുക നല്‍കുന്ന രീതി. ആദ്യ നഷ്ടപരിഹാരമെന്ന നിലയില്‍ 10000 രൂപ വരെ നല്‍കുന്നതാണ് സ്പോട്ട് നഷ്ടപരിഹാര പദ്ധതി.കെഎസ്ആര്‍ടിസി ബസിടിച്ച് വാഹനം തകരുന്നവര്‍ക്കും സ്പോട്ടില്‍ നഷ്ടപരിഹാരം കൊടുക്കുന്നതും ആലോചനയിലുണ്ട്.

എംഎല്‍എ പണ്ട്, തദ്ദേശ സ്ഥാപന ഫണ്ട് എന്നിവ ഉപയോഗിച്ച് ബസുകള്‍ വാങ്ങുന്ന പരിപാടിയും 100 ദിന കര്‍മപദ്ധതിയില്‍ ഉള്‍പ്പെടുത്തിയിട്ടുണ്ട്. ഓരോ മാസവും മികച്ച ഡ്രൈവര്‍ കണ്ടക്ടര്‍ അവാര്‍ഡും നല്‍കും. റെയില്‍ മാതൃകയില്‍ വെയ്റ്റിങ് ലിസ്റ്റ്, തത്കാല്‍ ബുക്കിംഗ് എന്നിവ നടപ്പിലാക്കുന്നതും കര്‍മ പരിപാടിയിലുണ്ട്.

പ്രണയ നൈരാശ്യം? 13 കാരിയുടെ പീഡന പരാതി വ്യാജം.

0

പത്തനംതിട്ട: പതിമൂന്നുകാരിയെ സഹപാഠികൾ പീഡിപ്പിച്ചെന്ന പരാതി വ്യാജമെന്ന് പൊലീസ്. വൈദ്യപരിശോധനാ ഫലം പുറത്തു വന്നതോടെയാണ് പീഡനം നടന്നിട്ടില്ലെന്നത് വ്യക്തമായത്. മൊഴിക്ക് പിന്നില്‍ വ്യക്തിവൈരാഗ്യമാണെന്നാണ് പൊലീസ് പറയുന്നത്.പ്രണയനൈരാശ്യമാണ് ഇത്തരമൊരു വ്യാജപരാതിക്ക് പൊലീസിന്‍റെ സംശയം. ചൈല്‍ഡ് ലൈനില്‍ വിളിച്ച് ഒന്‍പതാം ക്ലാസ് വിദ്യാര്‍ഥിനി നല്‍കിയ പരാതിയിൽ കൂടല്‍ പൊലീസ് കേസ് എടുക്കുകയും ആറ് പേരെ കസ്റ്റഡിയിലെടുക്കുകയും ചെയ്തിരുന്നു.എന്നാല്‍ വൈദ്യപരിശോധനയില്‍ പെണ്‍കുട്ടി ലൈംഗിക ചൂഷണത്തിന് ഇരയായിട്ടില്ലെന്ന് വ്യക്തമായി. തുടര്‍ന്ന് നടത്തിയ ചോദ്യം ചെയ്യലില്‍ പെണ്‍കുട്ടി മൊഴി മാറ്റുകയും സഹപാഠികള്‍ പീഡിപ്പിച്ചിട്ടില്ലെന്ന് വ്യക്തമാക്കുക‍യായിരുന്നു.

പിന്നാലെ കസ്റ്റഡിയിലെടുത്ത സഹപാഠികള്‍ ഉള്‍പ്പെടെയുള്ള ആറ് പേരെ പൊലീസ് വിട്ടയച്ചു.കുടുംബത്തില്‍ നിന്നുള്ള സംരക്ഷണമില്ലായ്മയാണ് ഇതിന് കാരണമെന്നാണ് പൊലീസ് സംശയിക്കുന്നത്. സൈക്കോളജിസ്റ്റിന്‍റെ സഹായത്തോടെ മൊഴി വിശദമായി പരിശോധിക്കാനും പെണ്‍കുട്ടിക്ക് ചൈല്‍ഡ് ലൈന്‍ വഴി ആവശ്യമായ കൗണ്‍സിലിങ് നല്‍കാനുമാണ് പൊലീസ് നീക്കം.പെണ്‍കുട്ടി നിലവില്‍ സിഡബ്ല്യൂസി സംരക്ഷണത്തിലാണ്. ബാലാവകാശ കമ്മീഷനും സംഭവത്തില്‍ കേസെടുത്തിട്ടുണ്ട്. ബാലാവകാശ കമ്മീഷന്‍ ചെയര്‍പേഴ്സണ്‍ കെ വി മനോജ് കുമാറാണ് സ്വമേധയാ കേസെടുത്തത്. മാധ്യമ വാര്‍ത്തകളുടെ അടിസ്ഥാനത്തിലാണ് കമ്മീഷന്‍ കേസെടുത്തത്.

അബ്ദുല്‍ റഹീമിന്റെ മോചനത്തിനായി പിരിച്ചതില്‍ ബാക്കി തുക എന്ത് ചെയ്തു?; കണക്ക് ഇന്ന് അവതരിപ്പിക്കും.

0

കോഴിക്കോട്: അബ്ദുല്‍ റഹീമിന്റെ മോചനത്തിനായുള്ള ക്രൗഡ് ഫണ്ടിങ്ങിന്റെ കണക്ക് അവതരിപ്പിക്കാത്തതില്‍ കടുത്ത വിമര്‍ശനമുയര്‍ന്ന പശ്ചാത്തലത്തില്‍ നിയമസഹായ സമിതി യോഗം ഇന്ന് ചേരും. വരവ് ചെലവ് കണക്കുകള്‍ അവതരിപ്പിക്കും. ഇത് സംബന്ധിച്ച നോട്ടീസ് നിയമസഹായ സമിതി പുറത്തിറക്കി. ഇന്ന് വൈകിട്ട് മൂന്ന് മണിക്ക് കാലിക്കറ്റ് ഗേറ്റ് ഓഡിറ്റോറിയത്തിലാണ് യോഗം.ക്രൗഡ് ഫണ്ടിങ്ങിന്റെ കണക്ക് അവതരിപ്പിക്കാത്തതില്‍ നേരത്തെ വിമര്‍ശനമുയര്‍ന്നിരുന്നു.

പ്രാദേശിക വാട്‌സ്ആപ്പ് ഗ്രൂപ്പുകളിലായിരുന്നു വിമര്‍ശനം. മോചന ദ്രവ്യം നല്‍കിയതിന് ശേഷമുള്ളത് പത്ത് കോടി രൂപയാണ്. ഇത് എന്ത് ചെയ്യണമെന്നതിലടക്കമുള്ള കാര്യങ്ങളില്‍ വ്യക്തത വരേണ്ടതുണ്ടെന്നായിരുന്നു വിമര്‍ശനം. എന്നാല്‍ അധികമായി പിരിച്ച തുക ബാങ്കില്‍ നിക്ഷേപിച്ചിട്ടുണ്ടെന്ന് നിയമസഹായ സമിതി അറിയിച്ചിരുന്നു. പണത്തിന്റെ കണക്ക് പറയേണ്ടത് നിയമസഹായ സമിതിയാണെന്നാണ് റഹീമിന്റെ കുടുംബം പറഞ്ഞത്.

ക്രൗഡ് ഫണ്ടിങ്ങുമായി തങ്ങള്‍ക്ക് ബന്ധമില്ലെന്നും പണത്തില്‍ ഒരു അവകാശവും ഉന്നയിച്ചിട്ടില്ലെന്നും കുടുംബം പറഞ്ഞിരുന്നു.അതിനിടെ റഹീമിന്റെ മോചനതിനായി ക്രൗഡ് ഫണ്ടിങ്ങിലൂടെ ശേഖരിച്ചതില്‍ ബാക്കി പണം എന്ത് ചെയ്യണമെന്ന് പണം നല്‍കിയവര്‍ അഭിപ്രായം പറയണമെന്നായിരുന്നു വ്യവയാസി ബോബി ചെമ്മണ്ണൂര്‍ പറഞ്ഞത്. ഇന്‍സ്റ്റഗ്രാം പേജിലൂടെ പൊതുജനങ്ങളുടെ അഭിപ്രായം തേടും. ഭൂരിപക്ഷ അഭിപ്രായം നോക്കി തുടര്‍നടപടി സ്വീകരിക്കണം. പണം ദുരുപയോഗം ചെയ്യരുത്. വിവാദത്തിലേക്ക് പോകാതെ നല്ല രീതിയില്‍ ബാക്കി തുക ഉപയോഗിക്കണം.

പലരും 13 കോടി എവിടെ എന്ന് ചോദിക്കുന്നുണ്ട്. താന്‍ ഒരു കോടി രൂപയാണ് നല്‍കിയത്. താന്‍ പൈസ കൈകൊണ്ട് തൊട്ടിട്ടില്ല. എല്ലാവരോടും നിയമസഹായ കമ്മിറ്റിയുടെ ക്യൂ ആര്‍ കോഡിലേക്ക് പണം അയക്കാനാണ് പറഞ്ഞത്. ബോക്സില്‍ എഴുപതിനായിരം രൂപ മാത്രമാണ് താന്‍ കളക്ട് ചെയ്തത്. തന്റെ പേരില്‍ പലയിടത്തും പണപ്പിരിവ് നടന്നതോടെ ബോക്സില്‍ പണം വാങ്ങുന്നത് നിര്‍ത്തി. ബാക്കി പണം എന്ത് ചെയ്യുമെന്ന് നിയമസഹായ സമിതി അറിയിച്ചിട്ടില്ല. ബാക്കി പണം എന്ത് ചെയ്യണമെന്ന് താന്‍ വ്യക്തിപരമായി പറയുന്നില്ലെന്നും ബോബി ചെമ്മണ്ണൂര്‍ പറഞ്ഞിരുന്നു.

പെട്രോളിങ്ങിനിടെ കോഴിക്കോട് പൊലീസുകാർക്ക് നേരെ ആക്രമണം

0

കോഴിക്കോട്: പൊലീസുകാർക്ക് നേരം ആക്രമണം. കോഴിക്കോട് കസബ സ്റ്റേഷനിലെ പൊലീസുകാർക്ക് നേരെയാണ് ആക്രമണമുണ്ടായത്. സീനിയർ സി പി ഒ രഞ്ജിത്ത്, സി പി ഒ അനൂപ് ലാൽ എന്നിവർക്ക് മർദ്ദനത്തിൽ പരുക്കേറ്റു.പെട്രോളിങ്ങിനിടെയാണ് മൂന്നം​ഗം സംഘം പൊലീസുകാരെ മർദ്ദിച്ചത്. സംഭവത്തിൽ കക്കോടി സ്വദേശി ഹാഷിം പിടിയിലായിട്ടുണ്ട്. മൂന്നംഗ സംഘം ആക്രമിച്ചത് പൊതുസ്ഥലത്തെ മദ്യപാനം തടഞ്ഞതിനുള്ള വിരോധത്തിൽ എന്നാണ് വിവരം.

വാട്‌സ്ആപ്പ് അക്കൗണ്ടുകൾ ഹാക്ക് ചെയ്ത് പുതിയ സൈബർ തട്ടിപ്പ്: ബിസിനസ് സ്ഥാപനങ്ങൾ ജാഗ്രത പാലിക്കണമെന്ന് പോലീസ്

0

വാട്‌സ്ആപ്പ് അക്കൗണ്ടുകൾ ഹാക്ക് ചെയ്ത് പുതിയ സൈബർ തട്ടിപ്പ്: ബിസിനസ് സ്ഥാപനങ്ങൾ ജാഗ്രത പാലിക്കണമെന്ന് കേരള പോലീസ് സംസ്ഥാനത്തെ ബിസിനസ് സ്ഥാപനങ്ങളെയും അവയുടെ സാമ്പത്തിക വിഭാഗങ്ങളെയും ലക്ഷ്യമിട്ട് വാട്‌സ്ആപ്പ് വഴി പുതിയ രീതിയിലുള്ള സൈബർ സാമ്പത്തിക തട്ടിപ്പ് വ്യാപിക്കുന്നു. സ്ഥാപനങ്ങളുമായി സ്ഥിരമായി സാമ്പത്തിക ഇടപാടുകൾ നടത്തുന്ന കസ്റ്റമർമാരുടെയോ സപ്ലയർമാരുടെയോ ഹാക്ക് ചെയ്യപ്പെട്ട വാട്‌സ്ആപ്പ് അക്കൗണ്ടുകൾ ഉപയോഗിച്ചാണ് തട്ടിപ്പുകാർ വലവിരിക്കുന്നത്. അക്കൗണ്ട്സ് വിഭാഗത്തിലേക്ക് ‘അക്കൗണ്ട് സ്റ്റേറ്റ്മെന്റ്’ എന്ന പേരിൽ .vbs പോലുള്ള അപകടകരമായ എക്സ്റ്റൻഷനുകളോടുകൂടിയ സ്ക്രിപ്റ്റ് ഫയലുകൾ വാട്‌സ്ആപ്പ് വഴി അയച്ചു നൽകുകയാണ് ഇവരുടെ രീതി.

ഈ ഫയലുകൾ തുറക്കുന്നതോടെ സ്ഥാപനത്തിലെ കമ്പ്യൂട്ടറുകളിൽ മാൽവെയറുകൾ ഇൻസ്റ്റാൾ ചെയ്യപ്പെടുകയും സിസ്റ്റത്തിന്റെ പൂർണ്ണ നിയന്ത്രണം തട്ടിപ്പുകാർ കൈക്കലാക്കുകയും ചെയ്യുന്നു. തുടർന്ന് ബ്രൗസറുകളിൽ സേവ് ചെയ്തിട്ടുള്ള പാസ്‌വേർഡുകളും സാമ്പത്തിക വിവരങ്ങളും ചോർത്തിയെടുത്ത ശേഷം, സ്ഥാപനത്തിലെ ഉന്നത ഉദ്യോഗസ്ഥരുടെ വാട്‌സ്ആപ്പ് അക്കൗണ്ടുകൾ ഹൈജാക്ക് ചെയ്ത് അവരുടെ പേരിൽ വ്യാജ ചാറ്റുകൾ നിർമ്മിച്ച് കീഴ്ജീവനക്കാരോട് അടിയന്തരമായി പണം ട്രാൻസ്ഫർ ചെയ്യാൻ ആവശ്യപ്പെടുകയാണ് ചെയ്യുന്നത്.വിശ്വസ്തരായ വ്യക്തികളുടെ സന്ദേശമാണെന്ന് കരുതി സ്ഥാപനങ്ങൾ വൻ തുകകൾ ഇത്തരത്തിൽ കൈമാറി ചതിക്കപ്പെടാൻ സാധ്യതയേറെയാണ്. കോംപ്രമൈസ് ചെയ്യപ്പെട്ട കമ്പ്യൂട്ടറുകളിൽ നിന്നും ലിസ്റ്റിലുള്ള മറ്റ് ബിസിനസ് ഗ്രൂപ്പുകളിലേക്ക് ഈ വ്യാജ ഫയലുകൾ തനിയെ അയക്കപ്പെടുകയും ചെയ്യുന്നുണ്ട്. ഇത്തരം തട്ടിപ്പുകളിൽ പെടാതിരിക്കാൻ ബിസിനസ് സ്ഥാപനങ്ങളും പൊതുജനങ്ങളും കർശനമായ മുൻകരുതലുകൾ എടുക്കേണ്ടതാണ്.

വാട്‌സ്ആപ്പ് വഴി വരുന്ന അക്കൗണ്ട് സ്റ്റേറ്റ്മെന്റുകളോ ഫയലുകളോ തുറക്കുന്നതിന് മുൻപ് അവരെ നേരിട്ട് ഫോണിൽ വിളിച്ച് ഉറപ്പുവരുത്തേണ്ടതാണ്. അപരിചിതമായ ലിങ്കുകളോ സാധാരണ രീതിക്ക് വിപരീതമായ എക്സ്റ്റൻഷനുകളോഉള്ള ഡോക്യുമെന്റുകൾ യാതൊരു കാരണവശാലും ഡൗൺലോഡ് ചെയ്യുകയോ റൺ ചെയ്യുകയോ ചെയ്യരുത്. വാട്‌സ്‌ആപ്പ് സന്ദേശങ്ങൾ മാത്രം അടിസ്ഥാനമാക്കി ഔദ്യോഗികമായ ഇരട്ട സ്ഥിരീകരണമില്ലാതെ ഫണ്ട് ട്രാൻസാക്ഷനുകൾ നടത്താതിരിക്കുക. അഥവാ കമ്പ്യൂട്ടറിൽ മാൽവെയർ ഇൻസ്റ്റാൾ ആയെന്ന് സംശയം തോന്നിയാൽ അടിയന്തരമായി വൈഫൈയോ ലാൻ കേബിളോ വേർപെടുത്തി ഇന്റർനെറ്റ് കണക്ഷൻ പൂർണ്ണമായും വിച്ഛേദിക്കുകയാണ് ആദ്യം ചെയ്യേണ്ടത്. ഈ ഫയലുകൾ പരിശോധിക്കാനെന്ന പേരിൽ മറ്റ് കമ്പ്യൂട്ടറുകളിലേക്കോ ഫോണുകളിലേക്കോ കൈമാറുകയും ചെയ്യരുത്. ഇൻഫെക്ട് ആയ ഡിവൈസുകൾ സുരക്ഷിതമാക്കാൻ അടിയന്തരമായി അടുത്തുള്ള സൈബർ പോലീസ് സ്റ്റേഷനിൽ ബന്ധപ്പെടുക. ഇത്തരത്തിലുള്ള ഓൺലൈൻ സാമ്പത്തിക തട്ടിപ്പിനിരയായാൽ ഉടൻ തന്നെ 1930 എന്ന സൈബർ ഹെല്പ് ലൈൻ നമ്പറിലേക്കോ www.cybercrime.gov.in എന്ന സൈബർ ക്രൈം റിപ്പോർട്ടിങ് പോർട്ടലിലേക്കോ ബന്ധപ്പെടുക. #statepolicemediacentre #keralapolice

എംബാപെ ഗോള്‍; പരാഗ്വേയും കടന്ന് ഫ്രാന്‍സ് ക്വാര്‍ട്ടറില്‍.

0

ഫിലാഡല്‍ഫിയ : ലോകകപ്പ് ഫുട്ബോളില്‍ ജൈത്രയാത്ര തുടര്‍ന്ന് ഫ്രാന്‍സ്. റൗണ്ട് ഓഫ് 16ല്‍ പരാഗ്വേ വെല്ലുവിളി മറികടന്ന് ക്വാര്‍ട്ടറില്‍ പ്രവേശിച്ചു. ഏകപക്ഷീയമായ ഒരു ഗോളിനാണ് വിജയം. കിലിയന്‍ എംബാപെയാണ് ഗോള്‍ നേടിയത്.അമേരിക്കയിലെ ഫിലാഡല്‍ഫിയ സ്റേറഡിയത്തില്‍ നടന്ന ആവേശകരമായ പ്രീ ക്വാര്‍ട്ടര്‍ പോരാട്ടത്തില്‍ രണ്ടാം പകുതിയുടെ 25-ാം മിനുട്ടിലാണ് ഫ്രാന്‍സിന്റെ ഗോളെത്തിയത്.

പെനാള്‍ട്ടിയില്‍ നിന്നാണ് എംബാപെ സ്‌കോര്‍ ചെയ്തത്.ക്വാര്‍ട്ടറില്‍ മെക്‌സിക്കോ ആണ് ഫ്രാന്‍സിന്റെ എതിരാളി.ജൂലൈ പത്തിന് ഇന്ത്യന്‍ സമയം പുലര്‍ച്ചെ 1.30നാണ് മത്സരം.ഇന്നലെ നടന്ന പ്രീക്വാര്‍ട്ടറില്‍ കാനഡയെ മറുപടിയില്ലാത്ത മൂന്ന് ഗോളിന് തകര്‍ത്താണ് മെക്‌സിക്കോയുടെ ക്വാര്‍ട്ടര്‍ പ്രവേശം.ഈ ലോകകപ്പില്‍ ഏഴാം ഗോള്‍ സ്വന്തമാക്കിയതോടെ ഗോള്‍ഡന്‍ ബൂട്ടിലേക്കുള്ള പ്രയാണം എംബാപെ ശക്തമാക്കി. അര്‍ജന്റീനയുടെ ലയണല്‍ മെസ്സിയും ഏഴ് ഗോളുമായി എംബാപെക്കൊപ്പമുണ്ട്.

താമരശ്ശേരി ചുരത്തിൽ രൂക്ഷമായ ഗതാഗത തടസ്സം

0

താമരശ്ശേരി : താമരശ്ശേരി ചുരത്തിൽ രൂക്ഷമായ ഗതാഗത തടസ്സം നേരിടുന്നു. ആറാം വളവിൽ കണ്ടെയ്നർ ലോറി തകരാറിലായതിനെ തുടർന്നാണ് ഗതാഗത തടസ്സം രൂപപ്പെട്ടിരിക്കുന്നത്.ഇന്ന് പുലർച്ച നാലു മണി മുതലാണ് ഗതാഗത തടസ്സം രൂപപ്പെട്ടിരിക്കുന്നത്. ഇതുമൂലം വാഹനഗതാഗതം ചുരത്തിൽ നിലവിൽ തടസ്സപ്പെട്ടിരിക്കുകയാണ്. അത്യാവശ്യ യാത്രക്കാർ മറ്റു വഴികൾ തിരഞ്ഞെടുക്കുക.

പഞ്ചായത്തിൽ ആരും പട്ടിണി കിടക്കരുത്; ‘വിശപ്പില്ലാത്ത കുന്നമംഗലം’ ലക്ഷ്യമിട്ട് ‘ഓപ്പറേഷൻ സുലൈമാനി.

0

കുന്നമംഗലം: പഞ്ചായത്ത് പരിധിയിൽ സാമ്പത്തിക ബുദ്ധിമുട്ട് മൂലം ആരും പട്ടിണി കിടക്കരുത് എന്ന ലക്ഷ്യത്തോടെ സ്വതന്ത്ര ഹോട്ടൽ ആന്റ് റെസ്റ്റോറന്റ് അസോസിയേഷനുമായി സഹകരിച്ച് കുന്നമംഗലം ഗ്രാമപഞ്ചായത്ത് ‘ഓപ്പറേഷൻ സുലൈമാനി’ പദ്ധതിക്ക് തുടക്കം കുറിച്ചു. ‘വിശപ്പില്ലാത്ത കുന്നമംഗലം’ എന്ന പേരിൽ ജൂലൈ ഒന്നിനാണ് ഈ മാതൃകാപരമായ വിശപ്പ് രഹിത പദ്ധതി ആരംഭിച്ചത്. മുൻപ് കോഴിക്കോട് ജില്ലയിൽ വൻ ജനപ്രീതി നേടിയ ‘ഓപ്പറേഷൻ സുലൈമാനി’ എന്ന ബ്രാൻഡിനെ മുൻനിർത്തിയാണ് പഞ്ചായത്ത് ഈ പദ്ധതി പുനരുജ്ജീവിപ്പിച്ചത്.

നിലവിൽ കുന്നമംഗലം പഞ്ചായത്തിലെ 17 ഹോട്ടലുകളാണ് ഈ പദ്ധതിയുടെ ഭാഗമായി ടോക്കൺ കൈവശമുള്ളവർക്ക് സൗജന്യമായി ഭക്ഷണം നൽകാൻ സന്നദ്ധത പ്രകടിപ്പിച്ചിട്ടുള്ളത്.പദ്ധതിയുടെ ഗുണഭോക്താക്കൾക്ക് പഞ്ചായത്തിലെ 46 അങ്കണവാടികളിൽ നിന്നോ അല്ലെങ്കിൽ പഞ്ചായത്ത് ഓഫീസിൽ പ്രത്യേകം സജ്ജീകരിച്ചിട്ടുള്ള കൗണ്ടറിൽ നിന്നോ ടോക്കണുകൾ കൈപ്പറ്റാം.

ഈ ടോക്കണുകൾ ഉപയോഗിച്ച് പദ്ധതിയിൽ പങ്കാളികളായ ഹോട്ടലുകളിൽ നിന്ന് ഒരു വ്യക്തിക്ക് മൂന്ന് നേരത്തെ ഭക്ഷണം സൗജന്യമായി ലഭിക്കും. സൗജന്യ ഭക്ഷണം വാങ്ങുന്നവരുടെ ആത്മാഭിമാനത്തെ ബാധിക്കാതിരിക്കാൻ ഗുണഭോക്താക്കളുടെ വ്യക്തിഗത വിവരങ്ങൾ പൂർണ്ണമായും രഹസ്യമായി സൂക്ഷിക്കാൻ പഞ്ചായത്ത് തീരുമാനിച്ചിട്ടുണ്ട്. ടോക്കണുകളുമായി എത്തുന്നവരോട് മാന്യമായും ആദരവോടെയും പെരുമാറാൻ പങ്കാളികളായ എല്ലാ ഹോട്ടലുകൾക്കും ഹോട്ടൽ അസോസിയേഷൻ കർശന നിർദ്ദേശം നൽകിയിട്ടുണ്ട്.

കൊടുവള്ളിയിൽ മദ്യലഹരിയിൽ ജേഷ്ഠന്റെ കുത്തേറ്റ് അനിയന് ദാരുണാന്ത്യം.

0

കോഴിക്കോട്: കോഴിക്കോട് കൊടുവള്ളിയില്‍ ജ്യേഷ്ഠന്‍ അനുജനെ കൊലപ്പെടുത്തി. കൊടുവള്ളി വലിയപറമ്പ് സ്വദേശി പ്രസാദ് (50) ആണ് കൊല്ലപ്പെട്ടത്. ജ്യേഷ്ഠന്‍ പ്രമോദിനെ പൊലീസ് കസ്റ്റഡിയില്‍ എടുത്തു. ശനിയാഴ്ച രാത്രിയായിരുന്നു സംഭവം നടന്നത്.മദ്യലഹരിയിലാണ് പ്രമോദ് കൊല നടത്തിയതെന്നാണ് പൊലീസ് പറയുന്നത്. കൊടുവള്ളിയിലെ വീട്ടില്‍ പ്രസാദും പ്രമോദും മാത്രമായിരുന്നു താമസിച്ചിരുന്നത്.

ഇരുവരും തമ്മില്‍ നേരത്തേ തന്നെ സ്വത്ത് തര്‍ക്കമുണ്ടായിരുന്നു. ഇന്നലെ ഇതുമായി ബന്ധപ്പെട്ട് ഇരുവരും തര്‍ക്കത്തിലേര്‍പ്പെട്ടു. ഇതിനിടെയാണ് പ്രമോദ് പ്രസാദിനെ കുത്തിക്കൊലപ്പെടുത്തിയത്. തൊട്ടുപിന്നാലെ പൊലീസ് സ്ഥലത്തെത്തുകയും പ്രമോദിനെ കസ്റ്റഡിയില്‍ എടുക്കുകയുമായിരുന്നു.കസ്റ്റഡിയില്‍ എടുക്കുന്ന സമയം ഇയാള്‍ മദ്യലഹരിയിലായിരുന്നു. ഇന്‍ക്വസ്റ്റ് നടപടികള്‍ക്ക് ശേഷം പ്രസാദിന്റെ മൃതദേഹം പോസ്റ്റ്‌മോര്‍ട്ടം നടപടികള്‍ക്കായി ആശുപത്രിയിലേക്ക് മാറ്റും.