spot_img
Friday, November 20, 2026
Home Blog Page 143

ഉനാഹിക്ക് ഡബിൾ; കാനഡയെ തകർത്ത് മൊറോക്കോ ക്വാർട്ടർ ഫൈനലിൽ

0

ഫിഫ ലോകകപ്പ് ആദ്യ പ്രീ ക്വാർട്ടർ പോരാട്ടത്തിൽ കാനഡയെ തകർത്ത് മൊറോക്കോ. എതിരില്ലാത്ത മൂന്ന് ഗോളിനാണ് തകർത്തത്. .ഉനാഹിയുടെ ഇരട്ട ഗോളാണ് മൊറോക്കോയെ രക്ഷിച്ചത്. 50 , 82 മിനിറ്റുകളിലായിരുന്നു ഉനാഹിയുടെ ഗോൾ. സുഫിയാനെ റഹീമി മൂന്നാം ഗോൾ നേടി. രണ്ടാം പകുതിയുടെ ഇഞ്ചുറി ടൈമിലായിരുന്നു ഗോൾ.കാനഡയാണ് കളിയുടെ തുടക്കം മികച്ചു കളിച്ചെങ്കിലും വല കുലുക്കാനായില്ല. പിന്നീട് കളി പിടിച്ച മൊറോക്കോ വിജയിച്ചു കയറുകയായിരുന്നു. പരുക്കൻ അടവുകൾ കണ്ട മത്സരത്തിൽ ഇരു ടീമിലെയും നാല് താരങ്ങൾ വീതം യെല്ലോ കാർഡ് കണ്ടു.

കുത്തിനിറച്ചോടി ‘പ്രിയ‌ദർശിനി ‘ ശ്വാസംമുട്ടി യാത്ര.

0

കോഴിക്കോട് : കെ.എസ്.ആർ.ടി.സി ‘പ്രിയദർശിനി’യിൽ സാഹസികമാവുന്നു സൗജന്യ യാത്ര. സ്ത്രീ യാത്രക്കാരുടെ എണ്ണം കുത്തനെ കൂടിയതോടെ കുത്തിനിറച്ചാണ് പല ബസുകളുടെയും ഓട്ടം. പ്രായമായവരും കുട്ടികളും വിദ്യാർത്ഥികളും തിരക്കിൽ ശ്വാസം മുട്ടുകയാണ്. യാത്രക്കാരുടെ ഫുട്ട് ബോർഡിൽ തൂങ്ങിയുള്ള യാത്രയും പതിവ് കാഴ്ച. തിരക്കുമൂലം ബസിന്റെ വാതിലടക്കാൻ പോലും കഴിയാത്ത സ്ഥിതിയാണ്.

വളവും തിരിവുമുള്ള റോഡുകളിലൂടെ പോവുമ്പോൾ ശ്വാസം അടക്കിപ്പിടിച്ചാണ് ഇപ്പോൾ യാത്രയെന്ന് പല സ്ഥിരം യാത്രക്കാരും പറയുന്നു. രാവിലേയും വെെകീട്ടുമാണ് ബസുകളുടെ ഈ അപകട യാത്ര.മോട്ടോർ വാഹന ചട്ടപ്രകാരം 51 സിറ്റിംഗും 25 ശതമാനം സ്റ്റാൻഡിംഗുമുൾപ്പെടെ പരമാവധി 64 പേർക്ക് യാത്രചെയ്യാവുന്നിടത്ത് 100 മുതൽ 120 വരെ ആളുകളുമായി ഓടുന്നത്. യാത്രക്കാരുടെ എണ്ണം കൂടിയതിന് അനുസരിച്ച് സൗകര്യങ്ങൾ ഒരുക്കാൻ കെ.എസ്.ആർ.ടി.സി ഇതുവരെ തയ്യാറായിട്ടില്ല. താമരശ്ശേരി, മുക്കം, തിരുവമ്പാടി, വയനാട്, ആനക്കാപൊയിൽ, കുറ്റ്യാടി, തൊട്ടിൽപ്പാലം റൂട്ടുകളിൽ കൂടുതലും കെ.എസ്.ആർ.ടി.സി ബസുകളെയാണ് ആളുകൾ ആശ്രയിക്കുന്നത്. സ്റ്റാൻഡിലേക്ക് പോകാതെ പലരും അതത് സ്റ്റോപ്പുകളിലാണ് ബസ് കാത്തുനിൽക്കുക.എന്നാൽ

എന്നാൽ തിങ്ങി നിറഞ്ഞുവരുന്ന ബസുകൾ പലപ്പോഴും ഇറങ്ങാൻ ആളില്ലെങ്കിൽ സ്റ്റോപ്പുകളിൽ നിറുത്താറില്ല. ഇതുകാരണം വഴിയിൽ നിന്നു കയറുന്ന സ്ഥിരം യാത്രക്കാരെയടക്കം കയറ്റാൻ കഴിയാറില്ല. ഇതോടെ മണിക്കൂറുകളോളം സ്ത്രീകളടക്കമുള്ളവർ പെരുവഴിയിലാകുന്നു. മലയോര മേഖലയായ വയലട, ആനക്കാംപൊയിൽ, ഭാഗങ്ങളിലേക്ക് ‘കുട്ടി ‘ ബസാണ് സർവീസ് നടത്തുന്നത്. അമിതഭാരം കാരണം ഈ സമയങ്ങളിൽ ബ്രേക്ക് കൃത്യമായി കിട്ടുന്നില്ലെന്ന് ഡ്രൈവർമാർ പറയുന്നു.

യാത്രക്കാരുടെ സുരക്ഷ ഉറപ്പാക്കാൻ കൂടുതൽ സർവീസുകൾ ആരംഭിക്കുകയോ തിരക്ക് നിയന്ത്രിക്കാൻ കൃത്യമായ സംവിധാനം ഏർപ്പെടുത്തുകയോ ചെയ്യണമെന്നാണ് യാത്രക്കാരുടെ ആവശ്യം. സൗജന്യയാത്ര ഏർപ്പെടുത്താത്ത സിറ്റി ഫാസ്റ്റ് സർവീസുകൾ ഏർപ്പെടുത്തണമെന്നും യാത്രക്കാർ പറയുന്നത്.സൂപ്പർ ഫാസ്റ്റ് ബസുകൾ ഇപ്പോഴും ഓടുന്നുണ്ടെങ്കിലും അത്തരം ബസുകൾക്ക് എല്ലായിടത്തും സ്റ്റോപ്പില്ല. അതിനാൽ ഒരു പ്രിയദർശിനി പോയാൽ തൊട്ടുപിറകിൽ (പ്രൈവറ്റ് ബസ് കുറവുള്ള റൂട്ടുകളിൽ നിർബന്ധമായും )സൗജന്യ യാത്രയില്ലാത്ത ഒരു കെ.എസ് .ആർ .ടി .സി ഓടിക്കണം എന്നാണ് യാത്രക്കാർ പറയുന്നത്.

എല്ലാം കാണുന്നുണ്ട്, എഐ കാമറകള്‍ നിയമലംഘനങ്ങള്‍ ചിത്രീകരിക്കുന്നുണ്ട്’; ഒരുമിച്ച് ചലാന്‍ വരുമെന്ന് എംവിഡി

0

തിരുവനന്തപുരം: സംസ്ഥാനത്ത് ഗതാഗത നിയമലംഘനങ്ങള്‍ കണ്ടെത്താനായി സ്ഥാപിച്ച എഐ കാമറകളുടെ പ്രവര്‍ത്തനം നിലച്ചുവെന്ന വാര്‍ത്തകള്‍ തള്ളി മോട്ടോര്‍ വാഹനവകുപ്പ്. കെല്‍ട്രോണിന് സര്‍ക്കാര്‍ പണം നല്‍കാത്തിനെ തുടര്‍ന്ന് സേവനം നിര്‍ത്തിയെന്നും സര്‍ക്കാര്‍ ഇതുവരെ പ്രശ്നപരിഹാരത്തില്‍ ഇടപെട്ടിട്ടില്ലെന്നാണ് പ്രചരണങ്ങള്‍.എന്നാല്‍ എഐ കാമറകള്‍ റോഡിലെ നിയമലംഘനങ്ങള്‍ ചിത്രീകരിക്കുന്നുണ്ടെന്നുമാണ് എംവിഡി പറയുന്നത്. ലംഘനങ്ങളില്‍ ചലാന്‍ അയക്കാന്‍ ഇപ്പോള്‍ കഴിയുന്നില്ല. അതായത് നിയമലംഘനങ്ങളില്‍ മോട്ടോര്‍ വാഹനവകുപ്പിന് പിഴ ഈടാക്കാന്‍ കഴിയുന്നില്ല. എന്നാല്‍ ഈ നിയമലംഘനത്തിനു കൂട്ടത്തോടെ ചലാന്‍ അയക്കാന്‍ എഐ കാമറയില്‍ സംവിധാനമുണ്ടെന്നാണ് എംവിഡി വിശദീകരണം.

സംസ്ഥാനത്ത് എഐ കാമറകള്‍ പ്രവര്‍ത്തനം നിലച്ചു എന്ന വ്യാപകമായി പ്രചരിക്കുന്നുണ്ട്. എന്നാല്‍ അവ പ്രവര്‍ത്തിക്കുകയും ഗതാഗത നിയമലംഘനങ്ങള്‍ ചിത്രീകരിച്ച് ശേഖരിക്കുകയും ചെയ്യുന്നുണ്ട്. തടസ്സങ്ങള്‍ മാറുന്നതോടെ ഈ ഗതാഗത നിയമലംഘനങ്ങള്‍ക്കും ചല്ലാന്‍ നല്‍കുന്നതായിരിക്കും. ദയവായി ശ്രദ്ധിക്കുക- നീരീക്ഷണത്തിന് കാമറകള്‍ ഉണ്ടായാലും ഇല്ലെങ്കിലും ജീവന്റെ സുരക്ഷിതത്വത്തിനായി ഗതാഗത നിയമങ്ങള്‍ പാലിക്കുകം എംവിഡി കുറിച്ചു.കാമറകളുടെ പ്രവര്‍ത്തനത്തിനുള്ള നെറ്റ് കണക്ഷന്‍ റദ്ദാക്കിയതാണ് മോട്ടോര്‍ വാഹനവകുപ്പിന് പിഴ ഈടാക്കാന്‍ കഴിയാത്ത സാഹചര്യം ഉണ്ടാക്കിയത്. അതേസമയം, എഐ കാമറിയില്‍ പകര്‍ത്തുന്ന ദൃശ്യങ്ങള്‍ ഇപ്പോഴും സെര്‍വറില്‍ സൂക്ഷിക്കുന്നുണ്ട്. ഇന്റര്‍നെറ്റ് കണക്ഷന്‍ പുനസ്ഥാപിക്കുന്നതോടെ ഈ ചിത്രങ്ങള്‍ മോട്ടോര്‍ വാഹനവകുപ്പിന്റെ കണ്‍ട്രോള്‍ റൂമിലേക്ക് എത്തും.

കോഴിക്കോട് എയർപോർട്ട് പാർക്കിംഗിൽ അമിത പിരിവ്; പരാതിയിൽ മണിക്കൂറുകൾക്കകം തുക തിരികെ നൽകി

0

കൊടുവള്ളി : കോഴിക്കോട് അന്താരാഷ്ട്ര വിമാനത്താവളത്തിലെ പാർക്കിംഗ് കൗണ്ടറിൽ അമിത തുക ഈടാക്കിയെന്ന യാത്രക്കാരന്റെ പരാതിയിൽ, മണിക്കൂറുകൾക്കകം എയർപോർട്ട് അധികൃതർ ഇടപെട്ട് അധികമായി വാങ്ങിയ തുക തിരികെ നൽകി. ഇന്ന് പുലർച്ചെ നടന്ന സംഭവത്തിൽ രാവിലെ പരാതി ലഭിച്ചതിന് പിന്നാലെ അന്വേഷണം നടത്തി ഉച്ചയോടെ നടപടിയെടുത്തത് ശ്രദ്ധേയമായി.പുലർച്ചെ ഏകദേശം 5 മണിയോടെയാണ് സംഭവം. രണ്ട് മണിക്കൂറിൽ താഴെ സമയം പാർക്ക് ചെയ്ത കാറിന് ഔദ്യോഗിക നിരക്കായ 65 രൂപയ്ക്ക് പകരം 150 രൂപ ഈടാക്കിയെന്നാണ് പരാതി.

200 രൂപ നൽകിയപ്പോൾ 50 രൂപ മാത്രം ബാക്കി നൽകുകയും പാർക്കിംഗ് സ്ലിപ്പോ കമ്പ്യൂട്ടർ ബില്ലോ നൽകാതിരിക്കുകയും ചെയ്തതായി പരാതിയിൽ പറയുന്നു.തുടർന്ന് യാത്രക്കാരനായ കൊടുവള്ളി മടവൂർ ആരാമ്പ്രം സ്വദേശി ടി എം തസ്നീം മാളിയേക്കൽ രാവിലെ തന്നെ എയർപോർട്ട് ഡയറക്ടർക്കും ബന്ധപ്പെട്ട ഉയർന്ന അധികൃതർക്കും ഓൺലൈനായി പരാതി നൽകി. വാഹന നമ്പർ, പാർക്കിംഗ് സമയം എന്നിവയ്ക്കൊപ്പം, 3.49 മുതൽ 5.09 വരെ വാഹനം പാർക്കിംഗിലുണ്ടായിരുന്നുവെന്ന് വ്യക്തമാക്കുന്ന ഗൂഗിൾ മാപ്സ് ടൈംലൈൻ സ്ക്രീൻഷോട്ടും തെളിവായി പരാതിക്കൊപ്പം സമർപ്പിച്ചു.

ഈ വിവരങ്ങളുടെ അടിസ്ഥാനത്തിൽ സിസിടിവി ദൃശ്യങ്ങളും കമ്പ്യൂട്ടർ രേഖകളും പരിശോധിച്ച അധികൃതർ ഉച്ചയ്ക്ക് ഏകദേശം 3 മണിയോടെ പരാതിക്കാരനെ നേരിട്ട് ഫോണിൽ ബന്ധപ്പെടുകയും അധികമായി ഈടാക്കിയ തുക ഓൺലൈൻ വഴി തിരികെ നൽകുകയുമായിരുന്നു. വിഷയത്തിൽ കരാർ ഏജൻസിക്കെതിരെ തുടർനടപടികൾ സ്വീകരിക്കുമെന്നും അധികൃതർ അറിയിച്ചു.

സംഭവത്തിൽ എയർപോർട്ട് അധികൃതർ സ്വീകരിച്ച അതിവേഗ നടപടിയെ യാത്രക്കാരൻ അഭിനന്ദിച്ചു. പാർക്കിംഗ് കൗണ്ടറുകളിൽ ഔദ്യോഗിക നിരക്കുകൾ കൃത്യമായി പാലിക്കുന്നതും എല്ലാ യാത്രക്കാർക്കും നിർബന്ധമായും രസീത് നൽകുന്നതും ഉറപ്പാക്കണമെന്ന് യാത്രക്കാർ ആവശ്യപ്പെടുന്നു.പരാതി നൽകിയത് കാരണം 65 രൂപ ഈടാക്കാതെ 150 രൂപയും ഇപ്പോൾ തിരിച്ച് നൽകി. കൂടുതൽ പരാതിയുമായി മുന്നോട്ട് പോവരുതെന്ന് പരാതിക്കാരനോട് പാർക്കിംഗ് കരാർ ഏജൻസിക്കാർ അഭ്യർത്ഥിച്ചു.

മുൻഗണന റേഷൻ കാർഡ്: മാനദണ്ഡം പുതുക്കി റിപ്പോർട്ട് നൽകാൻ നിർദ്ദേശിച്ചു മന്ത്രി അനൂപ് ജേക്കബ്.

0

തിരുവനന്തപുരം : മുൻഗണനാ റേഷൻ കാർഡ് അനുവദിക്കുന്നതിനുള്ള മാനദണ്ഡങ്ങൾ പുതുക്കി റിപ്പോർട്ട് നൽകാൻ നിർദ്ദേശം നൽകി ഭക്ഷ്യമന്ത്രി അനൂപ് ജേക്കബ്. നിലവിലുള്ള 2017 ലെ ഉത്തരവിൽ ഭേദഗതി വരുത്താനാണ് ഉദ്ദേശിക്കുന്നത്. നാലുചക്ര വാഹനം, വീടിന്റെ വിസ്തീർണ്ണം, ഭൂവിസ്തൃതി എന്നീ മാനദണ്ഡങ്ങളിൽ കാതലായ മാറ്റം ആവശ്യമുണ്ടോ എന്നാണു പരിശോധിക്കുന്നത്.

ആദിവാസി – ഗോത്രവർഗ ഉന്നതികളിൽ സഞ്ചരിക്കുന്ന റേഷൻകട വഴി റേഷൻ ധാന്യം എത്തിച്ചുനൽകുന്ന പദ്ധതിയുടെ സാധ്യതാ റിപ്പോർട്ട് സമർപ്പിക്കാനും ആവശ്യപ്പെട്ടു.സ്‌കൂൾ/ കോളജ് തലത്തിൽ പ്രവർത്തിക്കുന്ന കൺസ്യൂമർ ക്ലബ്ബുകളുടെ നിലവിലുള്ള പ്രവർത്തന രീതി മന്ത്രി വിലയിരുത്തി. 1,500 ക്ലബ്ബുകളാണു ലക്ഷ്യമിടുന്നത്. വകുപ്പുതല അവലോകനയോഗത്തിൽ, ഭക്ഷ്യ- പൊതുവിതരണ, ലീഗൽ മെട്രോളജി, ഉപയോക്തൃകാര്യ വകുപ്പ് മേധാവികളും സപ്ലൈകോ ഉദ്യോഗസ്ഥരും സംബന്ധിച്ചു.

ട്രെയിന്‍ തട്ടി യുവതി മരിച്ചു

0

കോഴിക്കോട്: ട്രെയിന്‍ തട്ടി യുവതി മരിച്ചു. ഫാറൂഖ് കോളജ് കൊടക്കല്ലുപറമ്പ് സ്വദേശി ശിവാനി ആണ് മരിച്ചത്. ഇന്നലെ വൈകീട്ടാണ് യുവതിയെ ട്രെയിന്‍ തട്ടി മരിച്ച നിലയില്‍ കണ്ടെത്തിയത്. ചെറുവണ്ണൂര്‍ ബിസി റോഡ് കമാനപ്പാലത്തിന് സമീപമായിരുന്നു ട്രെയിന്‍ തട്ടിയ നിലയില്‍ യുവതിയെ കണ്ടത്. മൃതദേഹം ശിവാനിയുടേതാണെന്ന് പിന്നീടാണ് തിരിച്ചറിഞ്ഞത്.

ഓക്സിജനെ ഊർജമാക്കുന്ന അറ്റോമിക്‌ രഹസ്യം കണ്ടെത്തി ശാസ്ത്രലോകത്തിൻ്റെ നെറുകയിൽ വീണ്ടും മലയാളി.

0

തൃശൂർ: ഓക്സിജനെ ഊർജമായി മാറ്റുന്ന കോശങ്ങളുടെ പ്രോട്ടോൺ പമ്പിങ് പ്രക്രിയയുടെ അറ്റോമിക് രഹസ്യം കണ്ടെത്തി മലയാളി യുവ ശാസ്ത്രജ്ഞൻ. ഒല്ലൂർ കല്ലൂർ സ്വദേശി ഡോ. അനക്സ് ജോസിൻ്റെ ചരിത്ര നേട്ടം ‘പ്രൊസീഡിങ്സ് ഓഫ് ദി നാഷണൽ അക്കാദമി ഓഫ് സയൻസ്’ എന്ന ശാസ്ത്ര ജേർണലിൽ പ്രസിദ്ധീകരിച്ചു.

ശ്വാസകോശസംബന്ധമായ ചികിത്സകൾക്കും മരുന്നു നിർമാണത്തിനും കണ്ടെത്തൽ ഗുണകരമാവും. സ്റ്റാൻഫോർഡ് സർവകലാശാലയിലെ പിഎച്ച്ഡിക്കുശേഷം ലോറൻസ് ബെർക്ക്ലി നാഷണൽ ലബോറട്ടറിയി പോസ്റ്റ് ഡോക്ടടറൽ ഫെലോയാണ് അനക്സ്.ഓക്സിജൻ ഉപയോഗിച്ച് ഊർജം നിർമിക്കുന്ന പ്രക്രിയയാണ്ശ്വസനത്തിലൂടെ ജീവകോശങ്ങളിൽ നടക്കുന്നത്. ഹീം – കാപ്പർ ഓക്സിഡേസുകൾ എന്ന എൻസൈമുകൾ മുഖേനയാണ് ഈ പ്രവർത്തനം. ഇവ ഓക്‌സിജനെ വെള്ളമാക്കുന്നതിനൊപ്പം മെന്പ്രൈനിലൂടെ പ്രോട്ടോണുകൾ പമ്പ് ചെയ്ത് എടിപി നിർമാണത്തിനാവശ്യമായ പ്രോട്ടോൺ ഗ്രേഡിയന്റ് സൃഷ്ടിക്കുന്നു.

ഇതിൻ്റെ കൃത്യമായ അറ്റോമിക് പ്രവർത്തനരീതി ശാസ്ത്രലോകം കണ്ടെത്തിയിരുന്നില്ല. ഇതിനാണ് അനക്സ് ഉത്തരം നൽകുന്നത്. 2021ൽ നടത്തിയ പഠനത്തിൽ ഓക്സിജനിൽ നിന്ന് വെള്ളം ഉണ്ടാക്കുന്ന രാസപ്രവർത്തനത്തിന് ആവശ്യമായ നാല് ഇലക്ട്രോണുകളിൽ നാലാമത്തെ ഇലക്ട്രോണിന്റെ സ്രോതസ്സ് അനക്സ് കണ്ടെത്തിയിരുന്നു. ഇതിലൂടെ ഓക്സിജൻ കുറയുന്ന ആദ്യഘട്ടത്തിന്റെ ഇലക്ട്രോൺ ഘടന വ്യക്തമായി.ഹീം -കാപ്പർ ഓക്സിഡേസുകളുടെ പ്രവർത്തനം മനസ്സിലാക്കാൻ ശാസ്ത്രീയ അടിത്തറയും ഒരുക്കി.

പുതിയ ഗവേഷണത്തിൽ എഫ് എന്ന നിർണായക ഇടനിലാവസ്ഥയിൽ കോപ്പർ കേന്ദ്രവും അതുമായി ബന്ധിപ്പിച്ച ടൈറോസിൻ ഘടകവും തമ്മിൽ ഇലക്ട്രോണുകൾ പങ്കിടുന്ന ഡിലോസലൈസ്‌ഡ് റാഡിക്കൽ അവസ്ഥ കണ്ടെത്തി. ഈ അവസ്ഥയാണ് പ്രോട്ടോണുകളുടെ നീക്കം നേരിട്ട് നിയന്ത്രിക്കുന്ന പ്രധാന ഘടകമെന്നും പഠനം വ്യക്തമാക്കുന്നു.സിപിഐ എം ഒല്ലൂർ ഏരിയകമ്മിറ്റി അംഗം കല്ലൂർ ജോസ് തെക്കേത്തലയുടെയും ജെസിയുടെയും മകനാണ്. ഭാര്യ എൽസ റോസ് അമേരിക്ക സാൻ ഹോസെ സ്റ്റേറ്റ് യൂണിവേഴ്സിറ്റിയിൽ ആർട്ടിഫിഷ്യൽ ഡാറ്റാ ഇന്റലിജൻസിൽ മാസ്റ്റേഴ് വിദ്യാർഥിയാണ്.

*ഇ-ഓട്ടോകൾ ‘ഹാക്’ ചെയ്യാനും ആപ്പ്, ഓട്ടത്തിനിടെ മൊബൈൽ ഉപയോഗിച്ച് റിക്ഷകൾ നിശ്ചലമാക്കി.

0

ന്യൂഡൽഹി: ഓടിക്കൊണ്ടിരിക്കുന്ന ഇലക്ട്രിക് റിക്ഷകൾ മൊബൈൽ ആപ് ഉപയോഗിച്ച് റിമോട്ടായി ഓഫാക്കാൻ കഴിയുന്ന സങ്കേതം പൊല്ലാപ്പായി.റിമോട്ടായി ഓട്ടോകളെ പാതിവഴി നിർത്തുന്ന വീഡിയോകൾ വ്യാപകമായി പ്രചരിച്ചു. ഇതോടെ കുത്സിത സാങ്കേതിക വിദ്യ അധികൃതരുടെ ശ്രദ്ധയിൽ എത്തി. തുടർന്ന് കേന്ദ്ര സർക്കാർ നടപടിയുമായി രംഗത്തെത്തി.ഓട്ടോകൾ നിർത്താനായി ഉപയോഗിച്ചുവെന്ന് പറയപ്പെടുന്ന രണ്ട് മൊബൈൽ ആപ്ലിക്കേഷനുകൾ ഗൂഗിൾ പ്ലേ സ്റ്റോർ, ആപ്പിൾ ആപ്പ് സ്റ്റോർ എന്നിവയിൽ നിന്ന് നീക്കം ചെയ്തതായി സർക്കാർ സ്ഥിരീകരിച്ചു.

സാമൂഹിക മാധ്യമങ്ങളിൽ ഇത്തരം പ്രാങ്ക് വീഡിയോകൾ വ്യാപകമായി പ്രചരിക്കുകയും ഇലക്ട്രിക് വാഹനങ്ങളുടെ സൈബർ സുരക്ഷയെക്കുറിച്ച് വലിയ ആശങ്കകൾ ഉയരുകയും ചെയ്‌തിരുന്നു. ഈസാഹചര്യത്തിലാണ് കേന്ദ്ര ഇലക്ട്രോണിക്സ് ആൻഡ് ഇൻഫർമേഷൻ ടെക്നോളജി മന്ത്രാലയത്തിന്റെ ഇടപെടൽ. *വഴിയിൽ നിശ്ചലമാക്കുന്ന ‘ബാറ്റ്-ബിഎംഎസ്’ ആപ്പ്* എക്സ് ഉൾപ്പെടെയുള്ള സോഷ്യൽ മീഡിയ പ്ലാറ്റ്ഫോമുകളിലാണ് ഓടിക്കൊണ്ടിരിക്കുന്ന ഇ-റിക്ഷകളെ മൊബൈൽ ഫോൺ വഴി നിയന്ത്രിക്കുന്ന വീഡിയോകൾ വൈറലായത്.

‘BAT-BMS’ എന്ന് പേരുള്ള ചൈനീസ് ആപ്പ് ഇലക്ട്രിക് ത്രീ-വീലറുകളിലെ ബാറ്ററി മാനേജ്മെന്റ് സിസ്റ്റവുമായി ബന്ധിപ്പിക്കാൻ കഴിയും. ഇതുവഴിയാണ് ഓട്ടോ റിക്ഷാ ഹാക്കിങ് സാധ്യമാക്കുന്നത്.റോഡിലൂടെ പോകുന്ന വാഹനങ്ങളെ ഇത്തരത്തിൽ അനധികൃതമായി നിയന്ത്രിക്കുന്നത് വലിയ അപകടങ്ങൾക്ക്കാരണമാകുമെന്നതിനാൽ യാത്രക്കാരുടെയും ഡ്രൈവർമാരുടെയും സുരക്ഷ ഭീഷണി നേരിട്ടു. വലിയ രീതിയിലുള്ള സൈബർ സുരക്ഷാ ആശങ്കകളാണ് ഉയർന്നു വന്നത്. അതിവേഗം പോകുന്ന ഓട്ടോയെ വൈദ്യുതി ബന്ധം തകർത്ത് നിശ്ചലമാക്കാം. ഇതര വാഹനങ്ങൾക്കും ഇത് അപകടം വരുത്തും. ആശങ്ക പരന്നതോടെ പരാതി പ്രവാഹമായി. ഇതോടെയാണ് കേന്ദ്ര സർക്കാരിന്റെ ഇടപെടൽ ഉറപ്പായത്.

*പാതിവഴി നിർത്തൽ സാധ്യമോ* ഒരു ഇലക്ട്രിക് വാഹനത്തിന്റെ ‘മസ്തിഷ്കം’ എന്ന് വിളിക്കാവുന്നതാണ് അതിന്റെ ബാറ്ററി മാനേജ്മെന്റ് സിസ്റ്റം (BMS) . ഒരു സാധാരണ പെട്രോൾ വണ്ടിയിലെ എഞ്ചിൻ പോലെയാണ് ഇ-വണ്ടികളിലെ ബാറ്ററി പാക്ക്. ഇവ രണ്ടും ചേർന്നാണ് ഈ റിക്ഷകളിലെ ഊർജമാനേജ്മെന്റ്.ബാറ്ററി പാക്കിന്റെ ആരോഗ്യം നിലനിർത്തുക,താപനില നിയന്ത്രിക്കുക,കറൻ്റ് ഓവർലോഡ് ആവാതെ നോക്കുക, ചാർജിംഗും ഡിസ്ചാർജിംഗും നിയന്ത്രിക്കുക തുടങ്ങിയവയെല്ലാം ചെയ്യുന്നത് ബിഎംഎസ് എന്ന ചെറിയ ഇലക്ട്രോണിക് സർക്യൂട്ട് ആണ്.

സുരക്ഷ മുൻനിർത്തി ബാറ്ററിയിലേക്കുള്ള കറന്റ് പൂർണ്ണമായും കട്ട് ചെയ്യാനുള്ള സംവിധാനവും ഇതിനകത്തുണ്ട്.ഇപ്പോൾ പുറത്തുവരുന്ന പല ഇ-റിക്ഷകളിലും ചൈനീസ് ‘സ്മ‌ാർട്ട് ബിഎംഎസുകൾ’ (Smart BMS) ആണ് ഉപയോഗിക്കുന്നത്. ഇവയിൽ ബ്ലൂടൂത്ത് സൗകര്യം ഉണ്ടാകും. വണ്ടിയുടെ ഉടമക്കോ മെക്കാനിക്കിനോ മൊബൈൽ ആപ്പ് വഴി ബാറ്ററിയുടെ ചാർജ് എത്രയുണ്ട്, അതിൻ്റെ വോൾട്ടേജ് എത്രയാണ് എന്ന് ഫോണിൽ നോക്കിമനസ്സിലാക്കാനാണ് ഈ ബ്ലൂടൂത്ത് കണക്റ്റിവിറ്റി നൽകുന്നത്. ഇതാണ് ദുരുപയോഗം ചെയ്യപ്പെട്ടത്. *പാസ് വേർഡ് മാറ്റിയിരുന്നോ ഇല്ല എങ്കിൽ* ഈ സ്മാർട്ട് ബിഎംഎസുകൾ ഫാക്ടറിയിൽ നിന്ന് ഇറങ്ങുമ്പോൾ 1234 അല്ലെങ്കിൽ 0000 പോലുള്ള വളരെ ലളിതമായ പാസ്വേഡുകൾ ആയിരിക്കും നൽകിയിട്ടുണ്ടാകുക.

വണ്ടി വാങ്ങുന്നവർ ഇത് മാറ്റാറില്ല. ഗൗരവമായി എടുക്കാറുമില്ല.റ്റൊന്റി ഫോർ ന്യൂസ്നരിക്കുനിറോഡിലൂടെ പോകുന്ന ഒരു ഇ-റിക്ഷ ബ്ലൂടൂത്ത് റേഞ്ചിൽ ഏകദേശം 10 മീറ്റർ പരിധിയിൽ എത്തുമ്പോൾ ‘ബാറ്റ്-ബിഎംഎസ്’ (BAT-BMS) ആപ്പ് വഴി കണക്ട് ചെയ്യാൻ സാധിക്കും. ഇതിന് ശേഷം ഓപ്ഷനുകളിലേക്ക് കടന്നു കയറുകയാണ് ഓട്ടോ ഹാക്കേഴ്സ് ചെയ്യുന്നത്. വാഹനത്തിൽ ഇരുന്ന് തന്നെ ചിലർ ഓട്ടം നിർത്തിക്കുന്ന വീഡിയോകൾ പ്രചരിച്ചിരുന്നു. മാത്രമല്ല ഇത്തരത്തിൽ ഓട്ടോ നിർത്തിച്ച് റീ സ്റ്റാർട് ചെയ്യാൻ റിപ്പയറിങ് ചാർജ് ആവശ്യപ്പെടുന്ന തരത്തിലുള്ള തമാശ വീഡിയോകളും പുറത്തെത്തി.

പ്രചാരം വർധിച്ചതോടെ തമാശ പതിയെ കാര്യമായി.ഇവിടെ വണ്ടിയുടെ മോട്ടോർ ഹാക്ക് ചെയ്യുന്നതല്ല. മറിച്ച് വണ്ടിയിലെ ബാറ്ററിയുടെ ബ്ലൂടൂത്ത് സുരക്ഷാ വീഴ്ച മുതലെടുത്ത് ബാറ്ററിയെ റിമോട്ടായി ‘ഉറക്കിക്കിടത്തുന്ന’ (Sleep mode) രീതിയാണ്. ഇലക്ട്രോണിക് സിസ്റ്റത്തിലുള്ള ഇടപെടലാണ്. ബിഎംഎസ് പാസ് വേർഡുകൾ മാറ്റുന ഭാവിയിലും ഇത്തരം ഭീഷണികൾ വരുന്നത് ഒഴിവാക്കാൻ സാഹായിക്കുമെന്ന് സാങ്കേതിക വിദഗ്ദ്ധർ നിർദ്ദേശിക്കുന്നു.

കരുവാരകുണ്ടില്‍ വീണ്ടും കടുവയിറങ്ങി; തോട്ടം തൊഴിലാളികൾ ഭീതിയിൽ.

0

കരുവാരകുണ്ട്: കരുവാരകുണ്ട് കേരള എസ്റ്റേറ്റിനു സമീപം വീണ്ടും കടുവയുടെ സാന്നിധ്യം. കേരള എസ്റ്റേറ്റ് സി ഡിവിഷൻ കുനിയൻമാട്ടിലാണ് വെള്ളിയാഴ്ച രാവിലെ ടാപ്പിംഗ് തൊഴിലാളികള്‍ കടുവയെ കണ്ടത്.കടുവയുടെ ആക്രമണത്തില്‍പ്പെടാതെ തൊഴിലാളികള്‍ തലനാരിഴയ്ക്ക് രക്ഷപ്പെടുകയായിരുന്നു.നാട്ടുകാർ വിവരമറിയിച്ചതിനെത്തുടർന്ന് നിലമ്പൂർ സൗത്ത് ഡിഎഫ്‌ഒ ജി. ധനിക്ലാലിന്റെ നേതൃത്വത്തിലുള്ള വനപാലകസംഘം പ്രദേശത്ത് പരിശോധന നടത്തി.മലയോരത്ത് അനുഭവപ്പെടുന്ന കനത്ത മഴയെത്തുടർന്ന് ജീവിയുടെ കാല്‍പ്പാടുകള്‍ കണ്ടെത്താനായില്ല.

കടുവയെ കണ്ട ഭാഗങ്ങളില്‍ നിരീക്ഷണ കാമറ സ്ഥാപിക്കുമെന്നും പ്രദേശത്ത് കടുവയെ കാണപ്പെട്ട സാഹചര്യത്തില്‍ ജനങ്ങള്‍ ജാഗ്രത പാലിക്കണമെന്നും ഡിഎഫ്‌ഒ ഓർമിപ്പിച്ചു.കഴിഞ്ഞ ജൂലൈ മാസത്തില്‍ വനംവകുപ്പ് കരുവാരകുണ്ടില്‍ സ്ഥാപിച്ച കൂട്ടില്‍ കടുവ കുടുങ്ങിയിരുന്നു.കരുവാരകുണ്ടിന്റെ മലയോര കൃഷിയിടങ്ങളില്‍ കടുവകള ഇനിയുമുണ്ടെന്ന് കർഷകരും കർഷകത്തൊഴിലാളികളും അന്ന്ചൂണ്ടിക്കാട്ടിയിരുന്നു.സൈലന്റ് വാലി വനമേഖലയില്‍നിന്നാണ് കാട്ടുമൃഗങ്ങള്‍ പ്രദേശത്തെ ജനവാസ കേന്ദ്രങ്ങളിലെത്തി ഭീതി വിതക്കുന്നതെന്ന് വർഷങ്ങള്‍ക്കു മുമ്പേ മലയോരജനത വ്യക്തമാക്കിയിട്ടുള്ളതാണ്.

സൈലന്റ് വാലി വനമേഖലയില്‍നിന്ന് കൂമ്പൻ മലയിടുക്ക് വഴിയും കല്‍കുണ്ട് മണലിയാംപാടം വഴിയും എളുപ്പത്തില്‍ കരുവാരകുണ്ടിന്റെ മലയോരത്ത് കടുവകള്‍ക്ക് എത്തിപ്പെടാമെന്നും മലയോരകർഷകർ പറയുന്നു.ഒരു വർഷം മുന്പ് സമീപ പ്രദേശമായ കാളികാവില്‍ ടാപ്പിംഗ് തൊഴിലാളിയായ യുവാവിനെ കടുവ പിടികൂടി കൊലപ്പെടുത്തിയതോടെയാണ് അധികൃതർ ഉണർന്നു പ്രവർത്തിക്കാൻ തുടങ്ങിയത്. കടുവയെ പിടികൂടാൻ കരുവാരകുണ്ടില്‍ സ്ഥാപിച്ച കൂട്ടില്‍ പുള്ളിപ്പുലിയും കുടുങ്ങിയിരുന്നു.പ്രദേശത്ത് പുള്ളിപ്പുലിയുടെ സാന്നിധ്യമുണ്ടെന്നും വളർത്തുമൃഗങ്ങളെ ഇവ ഇരയാക്കുന്നുണ്ടെന്നും നാട്ടുകാർ വനപാലകരെ നേരത്തേ അറിയിച്ചിരുന്നതാണ്. എന്നാല്‍ വനംവകുപ്പ് അധികൃതർ ഇത് അംഗീകരിച്ചിരുന്നില്ല.

കഴിഞ്ഞ വർഷം കേരള എസ്റ്റേറ്റ് എ ഡിവിഷന് സമീപം തോട്ടം തൊഴിലാളിയായ ജാർഖണ്ഡ് സ്വദേശിനിയെ കടുവ ആക്രമിക്കാൻ ശ്രമിച്ചിരുന്നു. കേരള എസ്റ്റേറ്റില്‍ കടുവയെ കണ്ടതായുള്ള വാർത്ത പരന്നതോടെ തൊഴിലിടങ്ങളില്‍ പണിയെടുത്ത തൊഴിലാളികള്‍ ജോലി നിർത്തി പോകേണ്ട സാഹചര്യവും ഉണ്ടായി.റബറിന് മെച്ചപ്പെട്ട വില ലഭിച്ചുകൊണ്ടിരിക്കുന്ന സാഹചര്യത്തില്‍ ടാപ്പിംഗ് നിലക്കുന്നത് കർഷകരെയും പ്രതിസന്ധിയിലാക്കിയിട്ടുണ്ട്. ഇടയ്ക്കിട മേഖലയില്‍ കടുവയുടെ സാന്നിധ്യം അനുഭവപ്പെടുന്നത് മലയോരജനതയെ തെല്ലൊന്നുമല്ല ആശങ്കയിലാക്കുന്നത്.

വയോധികനെ ആക്രമിച്ച് പണവും രേഖകൾ അടങ്ങിയ പേഴ്സും പിടിച്ചുപറി നടത്തിയ കേസിലെ പ്രതി പിടിയിൽ

0

വയോധികനെ ആക്രമിച്ച് പണവും രേഖകൾ അടങ്ങിയ പേഴ്സും പിടിച്ചുപറി നടത്തിയ കേസിലെ പ്രതി ഗോതീശ്വരം കല്ലിങ്ങല്‍ സ്വദേശി കോട്ടപ്പുറം കുഞ്ഞികണ്ടിപറമ്പ് വീട്ടിൽ രതീഷ് (45)നെ ബേപ്പൂര്‍ പോലീസ് പിടികൂടി. ചക്കുംകടവ് സ്വദേശിയായ പരാതിക്കാരൻ വാര്‍ദ്ധക്യ പെന്‍ഷന്‍ വാങ്ങി ബി.സി റോഡിലുള്ള താമസിക്കുന്ന ഫ്ലാറ്റിലേക്ക് പോകുമ്പോള്‍ റോഡിൽ കാൽ തെറ്റി വീഴുകയും പ്രതി വീട്ടിലെത്തിക്കാമെന്ന വ്യജേന കൂട്ടി കൊണ്ട് പോയി ആക്രമിച്ച് പരാതിക്കാരന്‍റെ ഷർട്ടിന്‍റെ കീശയിൽ നിന്നും പണവും രേഖകളും അടങ്ങിയ പേഴ്സ് പിടിച്ച് പറിച്ചു കൊണ്ട് പോകുകയായിരുന്നു. തുടർന്ന് വയോധികന്‍റെ പരാതിയിൽ ബേപ്പൂര്‍ പോലീസ് കേസ് രജിസ്റ്റർ ചെയ്ത് അന്വേഷണം നടത്തി പ്രതിയെ ബേപ്പൂരിൽ വെച്ച് കസ്റ്റഡിയിലെടുക്കുകയായിരുന്നു. പിടിയിലായ പ്രതിക്ക് ബേപ്പൂര്‍, മാറാട്, നല്ലളം സ്റ്റേഷനുകളിലായി വില്‍പ്പനക്കായി മദ്യം കൈവശം വെക്കൽ, പൊതുജനശല്യം, അതിക്രമിച്ചു കയറി ആക്രമണം നടത്തൽ, പൊതു സ്ഥലത്തു വെച്ച് മദ്യപിക്കൽ മറ്റുമായി നിരവധി കേസുകൾ നിലവിലുണ്ട്. ബേപ്പൂര്‍ പോലീസ് സ്റ്റേഷൻ സബ് ഇൻസ്പെക്ടർമാരായ വിഷ്ണു രാമചന്ദ്രന്‍, അര്‍ജുന്‍, അസിസ്റ്റന്‍റ് സബ് ഇൻസ്പെക്ടർ സജീഷ്, സിവിൽ പോലീസ് ഓഫീസർ സരുണ്‍ എന്നിവരായിരുന്നു അന്വേഷണ സംഘത്തിൽ ഉണ്ടായിരുന്നത്. അറസ്റ്റ് രേഖപ്പെടുത്തിയ ശേഷം പ്രതിയെ കോടതിയിൽ ഹാജരാക്കി.