ഓപ്പറേഷന് തൂഫാന്റെ ഭാഗമായി സംസ്ഥാന വ്യാപകമായി നടത്തിയ പരിശോധനയില്227 പേര് അറസ്റ്റിലായി.209 കേസുകള് രജിസ്റ്റര് ചെയ്തു.രജിസ്റ്റര് ചെയ്ത കേസുകളില് മീഡിയം ക്വാണ്ടിറ്റി കൈവശം വെച്ചതിന് എട്ടു കേസുകളും കൊമേഷ്യല് ക്വാണ്ടിറ്റി കൈവശം വെച്ചതിന് രണ്ട് കേസുകളും കൂടാതെ കോപ്റ്റ(COTPA) പ്രകാരം 66 കേസുകളും രജിസ്റ്റര് ചെയ്തിട്ടുണ്ട്. ഇവരില് നിന്ന് 36.927 ഗ്രാം എം.ഡി.എം.എയും 8 ഗ്രാം ഹാഷിഷും 33.623 കി.ഗ്രാം കഞ്ചാവും 0.50 ഗ്രാം ഹെറോയിനും പിടിച്ചെടുത്തു.ഓപ്പറേഷന് തൂഫാന്റെ ഭാഗമായി ഇതുവരെ 5134 കേസുകളാണ് രജിസ്റ്റര് ചെയ്തത്. ആകെ 5504 അറസ്റ്റുകള് നടന്നു.ഇതുവരെ പിടിച്ചെടുത്ത എം.ഡി.എം.എ 3370.479 ഗ്രാം.കഞ്ചാവ് 420.469 കി.ഗ്രാം.ഓപ്പറേഷന് തുപ്പാന്റെ ഭാഗമായി ഇന്നലെ മാത്രം സംസ്ഥാനത്തുടനീളം കേരള പോലീസ് 86 ബോധവല്ക്കരണ ക്ലാസുകളും 5 കൗണ്സിലിങ്ങുകളും നടത്തി. ഇതുവരെ നടത്തിയ ആകെ ബോധവല്ക്കരണ ക്ലാസ്സുകളുടെ എണ്ണം 5558 ഉം കൗണ്സിലിങ്ങുകളുടെ എണ്ണം 262 ഉം ആണ്. സ്കൂൾ, കോളേജ് പ്രൊട്ടക്ഷൻ ഗ്രൂപ്പുകളുടെ നെതൃത്വത്തിൽ ആകെ 4897 ബോധവത്ക്കരണ പരിപാടികളുംനടത്തി.ലഹരി വിപണനത്തെക്കുറിച്ചുള്ള വിവരങ്ങള് പൊതുജനങ്ങള്ക്ക് നേരിട്ടും (9497979794, 9497927797) വാട്സ്ആപ്പ് (9995966666) മുഖേനയും പോലീസിനെ അറിയിക്കാം. ഈ നമ്പറുകളിലേക്ക് ബന്ധപ്പെടുന്നവരുടെ വിവരങ്ങള് രഹസ്യമായി സൂക്ഷിക്കും. #keralapolice #statepolicemediacentre #toofanwarrior #DrugFreeKerala #OperationThoofan #RameshChennithala #operationtoofan
ഓപ്പറേഷന് തൂഫാന് കേരളം കണ്ട ഏറ്റവും വലിയ നാര്ക്കോട്ടിക് ഹണ്ട്: രമേശ് ചെന്നിത്തല
തിരുവനന്തപുരം: കേരളം കണ്ട ഏറ്റവും വലിയ നാർക്കോട്ടിക് ഹണ്ടാണ് ഓപ്പറേഷന് തൂഫാന് എന്ന് ആഭ്യന്തര മന്ത്രി രമേശ് ചെന്നിത്തല. മയക്കുമരുന്ന് വില്പനയില് മുന്പന്തിയില് മുന്പ് പഞ്ചാബ് ആയിരുന്നു എങ്കില് ഇന്നത് കേരളം ആണെന്ന് രമേശ് ചെന്നിത്തല പറഞ്ഞു. ഓപ്പറേഷന് തൂഫാന്റെ ഭാഗമായി നടന്ന റെയ്ഡില് ഇതിനോടകം അയ്യായിരം പേരുടെ അറസ്റ്റ് രേഖപ്പെടുത്തിയിട്ടുണ്ട്, നാലായിരത്തിലധികം കേസുകള് രജിസ്റ്റര് ചെയ്യുകയും ചെയ്തിട്ടുണ്ട്. അതോടൊപ്പം മയക്കുമരുന്ന് ലോബികളുടെ അന്ത്യം കുറിക്കാനാണ് തീരുമാനമെന്നും മന്ത്രി പറഞ്ഞു.കാസര്കോഡ് പൊലീസ് നടത്തിയ റെയ്ഡില് മിഠായി ഉണ്ടാക്കുന്ന കമ്പനിയില് നിന്നും മിഠായിയില് മയക്കുമരുന്ന് കണ്ടെത്തിയിട്ടുണ്ട്. അവരെയെല്ലാം പൊലീസ് അറസ്റ്റ് ചെയ്തിട്ടുണ്ട്.
ലക്ഷക്കണക്കിന് ലഹരി മിഠായികള് സ്കൂള് കുട്ടികള്ക്ക് നല്കി കുഞ്ഞുങ്ങളെ ചെറുപ്രായത്തില് തന്നെ ലഹരിക്കടിമയാക്കാന് വേണ്ടി പ്രവര്ത്തിക്കുന്ന ഇത്തരം ആളുകളെ കാപ്പ കേസ് ചുമത്താന് പൊലീസ് ശ്രമിക്കുന്നുണ്ടെന്നും ആഭ്യന്തരമന്ത്രി വ്യക്തമാക്കി.കൂടാതെ സൈബര് കുറ്റകൃത്യങ്ങള് വര്ദ്ധിച്ചു വരുന്ന ഇന്നത്തെ കാലത്ത് പൊലീസ് സേനയിലും കാലത്തിനനുസരിച്ച് മാറ്റങ്ങള് വരുത്തുമെന്നും രമേശ് ചെന്നിത്തല കൂട്ടിച്ചേര്ത്തു. കുറ്റകൃത്യങ്ങുടെ സ്വഭാവത്തില് മാറ്റം വരുന്നത് പോലെ അത് കണ്ടെത്തുന്ന രീതിയിലും മാറ്റം വരേണ്ടതുണ്ട്. അതിന് വേണ്ടി പൊലീസ് സേനയുടെ എണ്ണം വര്ദ്ധിപ്പിക്കണമെന്നത് ആവശ്യമുള്ള കാര്യമാണെന്നും ഇതിനായി പൊലീസ് ഓഡിറ്റ് നടപ്പാക്കും എന്നും അദ്ദേഹം കൂട്ടിച്ചേര്ത്തു.
കേസുകള് സമയബന്ധിതമായി തീര്ക്കുന്നുണ്ടോ എന്നും ഓഡിറ്റ് ചെയ്യും. കൂടാതെ പൊലീസ് സ്റ്റേഷനില് പിടികൂടിയ വാഹനങ്ങള്, മുഴുവന് നിയമ പ്രശ്നങ്ങളും പരിഹരിച്ച ശേഷം മാറ്റാനുള്ള നടപടികള് ഉണ്ടാകും എന്നും കൂട്ടിച്ചേര്ത്തു. കാസര്കോഡ് വാഹനാപകടത്തില് പൊലീസുകാര്ക്ക് പരിക്ക് പറ്റിയതിലും മന്ത്രി പ്രതികരിച്ചു. അപകടത്തില് പെടുന്ന പൊലീസുകാര്ക്ക് പ്രത്യേക ധനസഹായ പദ്ധതി നടപ്പിലാക്കുമെന്നും രമേശ് ചെന്നിത്തല അറിയിച്ചു.
‘നികുതിവെട്ടിപ്പുകാരോട് നോ കോംപ്രമൈസ്’; സംസ്ഥാനത്ത് ടാക്സ് ഡ്രൈവുമായി സർക്കാർ
ടാക്സ് ഡ്രൈവുമായി സർക്കാർ. സംസ്ഥാനത്ത് ടാക്സ് ഡ്രൈവ് നടത്തും. ജനങ്ങളുടെ മേൽ നികുതിഭാരം വർദ്ധിപ്പിക്കാതെയും ജി എസ് ടി സംവിധാനം പുനസംഘടിപ്പിച്ചും നികുതി വരുമാനം വർദ്ധിപ്പിക്കും. നികുതിവെട്ടിപ്പുകാരോട് നോ കോംപ്രമൈസ്. നിയമാനുസൃതം നികുതി അടയ്ക്കുന്നവർക്ക് എല്ലാ സംരക്ഷണവും നൽകുമെന്നും മുഖ്യമന്ത്രി വ്യക്തമാക്കി.
ഞങ്ങൾ ശ്രദ്ധയോടെ എല്ലാ കാര്യവും ചെയ്യും. കേരള താത്പര്യത്തിന് വിരുദ്ധമായി ഒന്നും ചെയ്യില്ല. ബജറ്റിൽ പറഞ്ഞ കാര്യങ്ങൾ മൂന്നുമാസത്തിനുള്ളിൽ നടപ്പാക്കാൻ തുടങ്ങും. തെറ്റ് ചെയ്താൽ തെറ്റാണെന്ന് ബോധ്യപ്പെട്ടാൽ പിൻവലിക്കും. അതിനെ യൂടേൺ എന്നോ എന്തുവേണമെങ്കിലും പറഞ്ഞോളുവെന്നും മുഖ്യമന്ത്രി പറഞ്ഞു.
നികുതിവെട്ടിപ്പ് സംസ്ഥാനത്ത് വ്യാപകമാണ്. അത് തടയും. സാമ്പത്തിക അവസ്ഥയിൽ 2 വഴിയാണ് മുന്നിലുള്ളത്. ഒന്നും ചെയ്യാൻ കഴിയാത്ത നിസ്സഹായ അവസ്ഥയിലേക്ക് എത്തും. ആ വണ്ടി എവിടെയും ഇടിച്ച് നിൽക്കാതെ അനസ്യൂതം യാത്ര ചെയ്യാനുള്ള തയ്യാറെടുപ്പാണ് ബജറ്റ്. 40 ലക്ഷത്തിനും 50 ലക്ഷത്തിനും ഇടയിൽ ആളുകൾ ഇവിടെ ജോലി ചെയ്യുന്നുണ്ട്.
മദ്യപിക്കുന്ന പണം മാത്രമാണ് സർക്കാരിലേക്ക് വരുന്നത്. പണം കിട്ടിയാൽ ഉടനെ അവർ ഗൂഗിൾ പേയിൽ പൈസ അയക്കുകയാണ്. നമ്മുടെ സമ്പത്തിന്റെ അടിത്തറയാണ്;എന്നുവച്ച് അവരെ പറഞ്ഞുവിടാൻ കഴിയുമോ. ഈ സർക്കാർ അത് വിശദമായി പഠിക്കും. പരമാവധി നിക്ഷേപം കൊണ്ടുവരിക എന്നതാണ് രക്ഷപ്പെടനുള്ള മാർഗം.
ലൈഫ് ഭവന പദ്ധതിക്ക് പണം നീക്കിവെച്ചിട്ടുണ്ട്. പട്ടികജാതി പട്ടിക വിഭാഗങ്ങൾക്ക് പ്രത്യേക ഭവന പദ്ധതി ആവിഷ്കരിച്ചത് തെരഞ്ഞെടുപ്പ് വാഗ്ദാനമാണ്. അവർക്ക് ഒറ്റ പദ്ധതിയാകുമ്പോൾ ആനുകൂല്യങ്ങൾ ലഭിക്കുന്നില്ല. അത് മാറ്റുമെന്നത് ഞങ്ങളുടെ വാഗ്ദാനമാണെന്നും മുഖ്യമന്ത്രി വ്യക്തമാക്കി.
പ്ലസ്സ് വൺ മൂന്നാം അലോട്ട്മെൻറ്: പ്രവേശനം ജൂൺ 29 മുതൽ ജൂലൈ 3 വരെ.
പ്ലസ്സ് വൺ പ്രവേശനത്തിന്റെ മെറിറ്റ് ക്വാട്ടയുടെ മുഖ്യഘട്ടത്തിലെ മൂന്നാമത്തേതും അവസാനത്തേതുമായ അലോട്ട്മെന്റ് റിസൾട്ട് ജൂൺ 29 ന് രാവിലെ 11 മണി മുതൽ പ്രവേശനം സാധ്യമാകുന്നവിധം പ്രസിദ്ധീകരിക്കും. പ്രവേശനം ജൂൺ 29 ന് രാവിലെ 11 മണി മുതൽ ജൂലൈ 3 ന് വൈകിട്ട് 5 മണി വരെ നടക്കും. അലോട്ട്മെൻറ് വിവരങ്ങൾ അഡ്മിഷൻ വെബ്സൈറ്റായ www.hscap.kerala.gov.in ലെ Candidate Login-SWS ലെ Third Allot Results ലിങ്കിലൂടെ ലഭിക്കും.
അലോട്ട്മെൻറ് ലഭിച്ചവർ കാൻഡിഡേറ്റ് ലോഗിനിലെ Third Allot Results എന്ന ലിങ്കിൽ നിന്നും ലഭിക്കുന്ന അലോട്ട്മെന്റ് ലെറ്ററിൽ പ്രതിപാദിച്ചിരിക്കുന്ന അലോട്ട്മെന്റ് ലഭിച്ച സ്കൂളിൽ രക്ഷകർത്താവിനോടൊപ്പം പ്രവേശനത്തിനായി ആവശ്യമുള്ള സർട്ടിഫിക്കറ്റുകളുടെ അസ്സൽ സഹിതം ഹാജരാകണം. വിദ്യാർത്ഥികൾക്ക് പ്രവേശനത്തിന് ആവശ്യമുള്ള അലോട്ട്മെന്റ് ലെറ്റർ അലോട്ട്മെൻറ് ലഭിച്ച സ്കൂളിൽ നിന്നും പ്രിൻറ് എടുത്ത് അഡ്മിഷൻ സമയത്ത് നൽകും. രണ്ട് അലോട്ട്മെൻറുകളിൽ താൽക്കാലിക പ്രവേശനം നേടിയ വിദ്യാർത്ഥികൾക്ക് ഈ അലോട്ട്മെൻറിൽ ഉയർന്ന ഓപ്ഷനിൽ അലോട്ട്മെന്റ് ലഭിച്ചിട്ടില്ലെങ്കിൽ പുതിയ അലോട്ട്മെന്റ് ലെറ്റർ ആവശ്യമില്ല.
താൽക്കാലിക പ്രവേശനത്തിലുള്ള വിദ്യാർത്ഥികൾക്ക് ഹയർ ഓപ്ഷൻ നിലനിർത്താൻ ഇനി റാങ്ക് വിവരങ്ങൾ അവസരം ഉണ്ടായിരിക്കുകയില്ല. അതുകൊണ്ട് തന്നെ അലോട്ട്മെന്റ് ലഭിച്ച എല്ലാ വിദ്യാർത്ഥികളും ഫീസടച്ച് സ്ഥിരപ്രവേശനം നേടണം. അലോട്ട്മെന്റ് ലഭിച്ചിട്ടും പ്രവേശനം നേടാതിരിക്കുന്ന വിദ്യാർത്ഥികളെ തുടർന്നുള്ള സപ്ലിമെൻററി അലോട്ട്മെൻറുകളിൽ പരിഗണിക്കില്ല. വിദ്യാർത്ഥികൾക്ക് തങ്ങൾ അപേക്ഷിച്ച ഓരോ സ്കൂളിലേയും കാറ്റഗറി തിരിച്ചുള്ള അവസാന റാങ്ക് വിവരങ്ങൾ പരിശോധിക്കാം.
അലോട്ട്മെന്റ് ലഭിച്ച വിദ്യാർത്ഥികളെല്ലാം രക്ഷകർത്താക്കളോടൊപ്പം ജൂലൈ 3 ന് വൈകിട്ട് 5 മണിയ്ക്ക് മുൻപായി തന്നെ സ്കൂളുകളിൽ പ്രവേശനത്തിന് ഹാജരാകണം.സ്പോർട്സ് ക്വാട്ടയുടെ മുഖ്യഘട്ടത്തിലെ അവസാന അലോട്ട്മെൻറും ഇതോടൊപ്പം പ്രസിദ്ധീകരിക്കും. പ്രവേശനം ജൂൺ 29 ന് രാവിലെ 11 മണിയ്ക്ക് ആരംഭിച്ച് ജൂലൈ 2 ന് വൈകിട്ട് 4 മണി വരെയാണ്. പട്ടികജാതി/പട്ടിക വർഗ്ഗ വികസന വകുപ്പുകളുടെ കീഴിലുള്ള മോഡൽ റെസിഡെൻഷ്യൽ സ്കൂളുകളിലേയ്ക്കുള്ള പ്രവേശനത്തിന്റെ മുഖ്യഘട്ടത്തിലെ മൂന്നാമത്തേതും അവസാനത്തേതുമായ അലോട്ട്മെൻറ് റിസൽട്ടും ഇതോടൊപ്പം പ്രസിദ്ധീകരിക്കുന്നുണ്ട്.
പ്രവേശനം ജൂൺ 29 ന് രാവിലെ 11 മണിയ്ക്ക് ആരംഭിച്ച് ജൂലൈ 3 ന് വൈകിട്ട് 5 മണി വരെയാണ്.മെരിറ്റ് ക്വാട്ട മൂന്നാം അലോട്ട്മെൻറിനോടൊപ്പം സ്പോർട്ട്സ് ക്വാട്ട രണ്ടാം അലോട്ട്മെൻറ് പ്രകാരമുള്ള അഡ്മിഷൻ മറ്റ് ക്വാട്ടകളിലെ അഡ്മിഷൻ എന്നിവയും നടക്കുന്നതിനാൽ ഒന്നിൽ പ്രവേശനത്തിന് അർഹത നേടുന്ന വിദ്യാർത്ഥികൾ അവർക്ക് ഏറ്റവും കൂടുതൽ ക്വാട്ടകളിൽ അനുയോജ്യമായ ക്വാട്ടയിലെ പ്രവേശനം തെരഞ്ഞെടുക്കണം.
പ്രവേശന നടപടികൾ കാലയളവിൽ നടക്കുന്നതിനാൽ ഏതെങ്കിലും ക്വാട്ടയിൽ പ്രവേശനം നേടിയാൽ മറ്റൊരു ക്വാട്ടയിലെക്ക് പ്രവേശനം മാറ്റാൻ സാധിക്കുകയില്ല.ഇതുവരെ അപേക്ഷിക്കുവാൻ കഴിയാത്തവർക്ക് സപ്ലിമെൻററി അലോട്ട്മെൻറിനായി പുതിയ അപേക്ഷകൾ സമർപ്പിക്കാം. മുഖ്യഘട്ടത്തിൽ തെറ്റായ വിവരങ്ങൾ നൽകിയതു മൂലവും ഓപ്ഷനുകൾ നൽകാത്തതിനാലും അലോട്ട്മെൻറിന് പരിഗണിക്കാത്ത അപേക്ഷകർക്കും സപ്ലിമെൻററി ഘട്ടത്തിൽ പുതിയ അപേക്ഷകൾ/ നിലവിലുള്ള അപേക്ഷകൾ പുതുക്കി സമർപ്പിക്കാം.
മുഖ്യഘട്ടത്തിൽ അപേക്ഷിച്ചിട്ടും അലോട്ട്മെൻറ് ലഭിക്കാത്തവർക്ക് സപ്ലിമെൻററി അലോട്ട്മെന്റിനായി പ്രസിദ്ധീകരിക്കുന്ന ഒഴിവുകളിലേക്ക് പരിഗണിക്കുന്നതിന് അപേക്ഷ പുതുക്കി നൽകാം. മുഖ്യഘട്ടത്തിൽ അലോട്ട്മെന്റ് ലഭിച്ചിട്ടും തെറ്റായ വിവരങ്ങൾ അപേക്ഷയിൽ ഉൾപ്പെട്ടതിനാൽ പ്രവേശനം നിരാകരിക്കപ്പെട്ടവർക്ക് ഈ അവസരത്തിൽ തെറ്റു തിരുത്തി അപേക്ഷ പുതുക്കി സമർപ്പിക്കാം. തുടർ അലോട്ട്മെന്റുകൾക്കുള്ള വേക്കൻസിയും നോട്ടിഫിക്കേഷനും മുഖ്യഘട്ട പ്രവേശന സമയ പരിധിക്കുശേഷം വെബ്സൈറ്റിൽ പ്രസിദ്ധീകരിക്കും.
തൃശൂരിൽ എംബിബിഎസ് വിദ്യാർഥിനി ഹോസ്റ്റൽ കെട്ടിടത്തിൽനിന്ന് ചാടി മരിച്ചു
തൃശൂർ : തൃശൂരിൽ ഹോസ്റ്റൽ കെട്ടിടത്തിൽനിന്ന് ചാടിയ എംബിബിഎസ് ഒന്നാം വർഷ വിദ്യാർഥിനി മരിച്ചു. കോട്ടയം സ്വദേശി സ്നേഹ പൗലോസ് ആണ് മരിച്ചത്. തൃശ്ശൂർ ജൂബിലി മിഷൻ മെഡിക്കൽ കോളേജ് ഹോസ്റ്റലിന്റെ നാലാം നിലയിൽ നിന്നുമാണ് കുട്ടി ചാടിയത്. കാരണം വ്യക്തമല്ല. സംഭവത്തിൽ തൃശ്ശൂർ ഈസ്റ്റ് പോലീസ് അന്വേഷണം ആരംഭിച്ചു.
വൈദ്യുതി തകരാർ: കൊല്ലം–എറണാകുളം മെമു വൈകുന്നു; വലഞ്ഞ് യാത്രക്കാർ
കൊല്ലം : കൊല്ലത്തുനിന്ന് 11 മണിക്ക് പുറപ്പെടേണ്ട കൊല്ലം–എറണാകുളം മെമു ട്രെയിൻ വൈകുന്നു. വെെദ്യുതി തകരാറായതിനെ തുടർന്ന് സർവീസ് വൈകുമെന്ന് ട്രെയിനിൽ കയറിയിരുന്നതിനുശേഷമാണ് യാത്രക്കാർക്ക് അറിയിപ്പ് ലഭിച്ചത്. ഇതോടെ ട്രെയിനിനകത്തും പ്ലാറ്റ്ഫോമിലുമായി യാത്രക്കാർ തുടർന്നു. മുക്കാൽ മണിക്കൂറോളം യാത്രക്കാർ കാത്തിരുന്നതിനു ശേഷമാണ് പകരം സംവിധാനം ഏർപ്പെടുത്താമെന്ന് റെയിൽവേ അറിയിച്ചത്. എന്നാൽ ഇതുവരെയും പകരമെത്തിയ ട്രെയിൻ പുറപ്പെട്ടിട്ടില്ല.
ദേശീയ പാതയിൽ പാലക്കുളത്ത് ബസ് സ്കൂട്ടറിലിടിച്ച് അപകടം; സ്കൂട്ടർ യാത്രക്കാരിക്ക് പരിക്ക്.
കൊയിലാണ്ടി: ദേശീയ പാതയിൽ പാലക്കുളത്ത് ബസ് സൂട്ടറിലിടിച്ച് അപകടം. അപകടത്തിൽ സ്കൂട്ടർ യാത്രക്കാരിക്ക് പരിക്കേറ്റു. പാലക്കുളം സ്വദേശിനി പ്രിയങ്കക്കാണ് പരിക്കേറ്റത്. ഇന്ന് രാവിലെ 8.55നായിരുന്നു അപകടം.മൂടാടിയിൽ നിന്നും കൊയിലാണ്ടിയിലേക്ക് ജോലിക്കു പോകുകയായിരുന്നു പ്രിയങ്ക. കോഴിക്കോട് നിന്നും കണ്ണൂരിലേക്ക് പോകുന്ന KL 11AW 8379നമ്പറിലുള്ള ശ്രീവിലാസം ബസ് സ്കൂട്ടറിലിടിക്കുകയായിരുന്നു. അമിതവേഗതയിൽ തെറ്റായ ദിശയിലൂടെയായിരുന്നു ബസ് സഞ്ചരിച്ചത് എന്ന് ദൃക്സാക്ഷികൾ പറഞ്ഞു.
കോഴിക്കോട് നിന്നും വടകരയിലേക്ക് പോകുന്ന ‘മോഹൻസ്’ എന്ന ആംബുലൻസിന്റെ സി സി ടി വിയിൽ അപകടത്തിന്റെ ദൃശ്യങ്ങൾ പതിഞ്ഞിട്ടുണ്ട്.അപകടത്തിൽ പരിക്കേറ്റ പാലക്കുളം സ്വദേശിനിയെ നാട്ടുകാർ ചേർന്നാണ് കൊയിലാണ്ടി താലൂക്കാശുപത്രിൽ എത്തിച്ചത്. കൈക്ക് പരിക്ക് ഗുരുതരമായതിനാൽ യുവതിയെ പിന്നീട് കോഴിക്കോട് സ്വകാര്യ ആശുപത്രിയിൽ പ്രവേശിപ്പിച്ചു.
92-ാം മിനിറ്റിൽ ഗോൾ; ദക്ഷിണാഫ്രിക്കയെ തോൽപ്പിച്ച് കാനഡ പ്രീ-ക്വാർട്ടറിൽ.
ലോസ് ആഞ്ജലസ് : ലോകകപ്പിൽ പ്രീ-ക്വാർട്ടറിലെത്തുന്ന ആദ്യ ടീമായി കാനഡ. റൗണ്ട് ഓഫ് 32 മത്സരത്തിൽ ദക്ഷിണാഫ്രിക്കയെ കാനഡ കീഴടക്കി. എതിരില്ലാത്ത ഒരു ഗോളിനാണ് ജയം. 92-ാം മിനിറ്റിലാണ് കാനഡയുടെ വിജയഗോൾ പിറക്കുന്നത്. ഇതാദ്യമായാണ് കാനഡ ലോകകപ്പിന്റെ പ്രീ-ക്വാർട്ടറിലെത്തുന്നത്.മത്സരം ആരംഭിച്ചത് മുതൽ ഇരുടീമുകളും ആക്രമണഫുട്ബോൾ പുറത്തെടുത്തു. ആറാം മിനിറ്റിൽ ദക്ഷിണാഫ്രിക്കൻ താരം ടെബോഹോ മോകോന ഗോളിനടുത്തെത്തി. പക്ഷേ, ലക്ഷ്യത്തിലെത്തിയില്ല.
ഏഴാം മിനിറ്റിൽ കാനഡയുടെ സ്റ്റീഫൻ എസ്റ്റാക്വിയോയുടെ ഷോട്ട് ഗോൾ ബാറിന് മുകളിലൂടെ പോയി. പിന്നാലെ മികച്ച നീക്കങ്ങളുമായി ഇരുടീമുകളും കളംനിറയുന്നതാണ് കണ്ടത്. 17-ാം മിനിറ്റിൽ കോർണറിൽ നിന്ന് ജൊനാഥൻ ഡേവിഡ് ഷോട്ടുതിർത്തെങ്കിലും പുറത്തേക്ക് പോയി.ആദ്യപകുതിയുടെ അവസാനം കാനഡയുടെ ഗോളെന്നുറച്ച ഷോട്ടുകൾ ദക്ഷിണാഫ്രിക്കൻ പ്രതിരോധം പണിപ്പെട്ടാണ് തടുത്തത്. കോർണറിൽ നിന്നായിരുന്നു കാനഡയുടെ ഗോൾ ശ്രമം. ഗോൾ ലൈൻ സേവുമായി ദക്ഷിണാഫ്രിക്കൻ പ്രതിരോധതാരം രക്ഷകനായി. പിന്നാലെ സേവുമായി ദക്ഷിണാഫ്രിക്കൻ ഗോൾകീപ്പർ റോൺവെൻ വില്ല്യംസുമെത്തി.
അതോടെ ആദ്യപകുതി ഗോൾരഹിതമായി അവസാനിച്ചു. ആദ്യ പകുതിയിൽ ഷോട്ടുകളിലും അവസരങ്ങൾ സൃഷ്ടിക്കുന്നതിലും കാനഡയാണ് മുന്നിട്ടുനിന്നത്.രണ്ടാം പകുതിയിൽ ഗോൾ ലക്ഷ്യമിട്ട് ഇരുടീമുകളും മുന്നേറ്റം കടുപ്പിച്ചു. പകരക്കാരെ കളത്തിലിറക്കുകയും ചെയ്തു. 62-ാം മിനിറ്റിൽ ദക്ഷിണാഫ്രിക്കൻ താരം ഒസ്വിൻ അപ്പോലിസിന്റെ ഷോട്ട് പുറത്തേക്ക് പോയി. പിന്നാലെ കാനഡയുടെ കൗണ്ടർ അറ്റാക്ക് ദക്ഷിണാഫ്രിക്കൻ ഗോൾമുഖം വിറപ്പിച്ചു. കാനഡ ഗോളിനടുത്തെത്തിയെങ്കിലും ദക്ഷിണാഫ്രിക്ക കൃത്യമായി പ്രതിരോധിച്ച് അപകടം ഒഴിവാക്കി. മികച്ച കൗണ്ടർ അറ്റാക്കുകളുമായി ദക്ഷിണാഫ്രിക്കയും കാനഡയുടെ പെനാൽറ്റി ബോക്സിൽ ഇരച്ചെത്തി.
75-ാം മിനിറ്റിൽ അൽഫോൺസോ ഡേവിസെത്തിയതോടെ കാനഡയുടെ മുന്നേറ്റങ്ങൾക്ക് വേഗത കൂടി.മത്സരം സമനിലയിൽ അവസാനിക്കുമെന്ന് തോന്നിച്ചെങ്കിലും ഇഞ്ചുറി ടൈമിൽ കാനഡ ലീഡെടുത്തു. സ്റ്റീഫൻ എസ്റ്റക്വിയോയാണ് വലകുലുക്കിയത്. വലതുവിങ്ങിലെ ക്രോസ്സ് ദക്ഷിണാഫ്രിക്ക പ്രതിരോധിച്ചെങ്കിലും പന്ത് കിട്ടിയ സ്റ്റീഫൻ കിടിലൻ ഷോട്ടിലൂടെ ഗോളടിച്ചു. പിന്നീട് ദക്ഷിണാഫ്രിക്കയ്ക്ക് മത്സരത്തിലേക്ക് തിരിച്ചുവരാനായില്ല.
പ്ലസ് വൺ സീറ്റ് പ്രതിസന്ധി മലബാറിൽ 120 താത്കാലിക ബാച്ചുകൾ അനുവദിച്ചേക്കും, മന്ത്രിസഭാ യോഗം തീരുമാനമെടുക്കും.
തിരുവനന്തപുരം : മലബാർ മേഖലയിലെ പ്ലസ് വൺ സീറ്റ് പ്രതിസന്ധി മറികടക്കാൻ 120 താത്കാലിക ബാച്ചുകൾ അനുവദിക്കണമെന്ന് വിദ്യാഭ്യാസ വകുപ്പിന്റെ ശുപാർശ. പാലക്കാട്, മലപ്പുറം, കണ്ണൂർ, കാസർകോട് ജില്ലകളിലാണിത്. നാളെ ചേരുന്ന മന്ത്രിസഭായോഗം തീരുമാനമെടുക്കും. മലബാർ മേഖലയിൽ കഴിഞ്ഞ വർഷം അനുവദിച്ച താത്കാലിക ബാച്ചുകൾ ഈ വർഷവും തുടരാൻ തീരുമാനിച്ചിരുന്നെങ്കിലും സീറ്റ് പ്രതിസന്ധി മറികടക്കാനാകുന്നില്ലെന്നാണ് വിദ്യാഭ്യാസ വകുപ്പിന്റെ വിലയിരുത്തൽ.
കൂടുതൽ സീറ്റുകൾ അനുവദിക്കണമെന്ന് ആവശ്യപ്പെട്ട് നിരവധി അപേക്ഷകളാണ് ലഭിക്കുന്നത്. 120 താത്കാലിക ബാച്ചുകൾ അനുവദിച്ചാൽ അപേക്ഷിച്ച എല്ലാവർക്കും പ്രവേശനം നൽകാനാകും. അപേക്ഷിച്ച എല്ലാവർക്കും പ്ലസ് വൺ പ്രവേശനം നൽകണമെന്നാണ് വിദ്യാഭ്യാസ വകുപ്പിന്റെ നിലപാട്.അധിക സാമ്പത്തിക ബാദ്ധ്യതയുണ്ടാകാത്ത തരത്തിലുള്ള ക്രമീകരണമാണ് താത്കാലിക ബാച്ചുകളിലൂടെ ലക്ഷ്യമിടുന്നത്. കഴിഞ്ഞ മന്ത്രിസഭായോഗത്തിൽ ഈ ആവശ്യം വിദ്യാഭ്യാസ വകുപ്പ് മുന്നോട്ട് വച്ചിരുന്നു.
മൂന്നാമത്തെ അലോട്ട്മെന്റും കഴിഞ്ഞശേഷം തീരുമാനമെടുക്കാമെന്ന് ധാരണയിലെത്തി. മലബാർ മേഖലയിൽ പട്ടികജാതി, പട്ടിക വർഗം, സാമ്പത്തികമായും സാമൂഹ്യമായും പിന്നാക്കം നിൽക്കുന്നവർക്കടക്കം സംവരണം ചെയ്തിട്ടുള്ള സീറ്റുകളിൽ അർഹതപ്പെട്ട വിദ്യാർത്ഥികളില്ലാത്തതിനാൽ മൂന്നാമത്തെ അലോട്ട്മെന്റിൽ അവ മെരിറ്റ് സീറ്റുകളാക്കി മാറ്റിയിരുന്നു.
മൂന്നാമത്തേയും അവസാനത്തേയും അലോട്ട്മെന്റ് പ്രസിദ്ധീകരിച്ചപ്പോൾ മലപ്പുറത്ത് 71 സീറ്റുകൾ മാത്രമാണ് ഒഴിവുള്ളത്. മറ്റു ജില്ലകളിൽ നിന്നുള്ള 8213 അപേക്ഷകരുൾപ്പെടെ 82,753 അപേക്ഷകളുണ്ട്. മെരിറ്റ് സീറ്റുകൾ ആകെ 57,428. എല്ലാവർക്കും പ്രവേശനം ലഭ്യമാക്കാനാണ് താത്കാലിക ബാച്ചുകളിലൂടെ ലക്ഷ്യമിടുന്നത്
സാരഥി’ പോർട്ടൽ എന്നും ഹാങ്ങ്; നെട്ടോട്ടമോടി അപേക്ഷകർ.
കോഴിക്കോട് : വാഹൻ – സാരഥി പോർട്ടൽ പണിമുടക്കുന്നത് തുടർക്കഥയായതോടെ അപേക്ഷകർ നെട്ടോട്ടത്തിൽ. ലൈസൻസ് പുതുക്കൽ, ലേണേഴ്സ് ടെസ്റ്റ് ഉൾപ്പെടെയുള്ള സേവനങ്ങൾ മുടങ്ങിയതോടെ ആർ.ടി.ഒ ഓഫീസുകളിൽ മണിക്കൂറുകളോളം കാത്തിരുന്ന് മടങ്ങേണ്ട അവസ്ഥയാണ്. കേന്ദ്രഉപരിതല ഗതാഗതമന്ത്രാലയത്തിന്റെ നിയന്ത്രണത്തിലുള്ള ‘സാരഥി’ സോഫ്റ്റ്വെയർ വഴിയാണ് ലേണേഴ്സ് ടെസ്റ്റ്, ഡ്രൈവിംഗ് ലൈസൻസ് പുതുക്കൽ, വിലാസം മാറ്റൽ അപേക്ഷകൾ സമർപ്പിക്കേണ്ടത്.എന്നാൽ
കഴിഞ്ഞ ഒരു മാസമായി തുടർച്ചയായുള്ള തകരാറുകൾ മൂലം സേവനങ്ങൾ പൂർണ്ണമായി തടസപ്പെട്ടു. ഇതോടെ അപേക്ഷ സമർപ്പിക്കാനോ, പുതുക്കാനോ കഴിയാതെയായി. ലേണിംഗ് ലൈസൻസ് ടെസ്റ്റ് എഴുതാനെത്തിയവരാണ് ഏറെ കുഴയുന്നത്. അവധിയെടുത്തും പഠനസമയം മാറ്റിവെച്ചും ടെസ്റ്റിനെത്തുന്നവർ മണിക്കൂറുകളോളം കാത്തിരുന്നിട്ടും പരീക്ഷ പൂർത്തിയാക്കാനാകാതെ മടങ്ങുകയാണ്.കോഴിക്കോട് ആർ.ടി.ഒ ഓഫീസിന് കീഴിൽ മാത്രം പ്രതിദിനം 100 ലേണിംഗ് ടെസ്റ്റുകൾ നടക്കാറുണ്ട്. ജില്ലയിലെ വിവിധ സബ് ആർ.ടി.ഒ ഓഫീസുകൾ ഉൾപ്പെടെ പ്രതിദിനം ജില്ലയിൽ 500-ഓളം ഉദ്യോഗാർത്ഥികളാണ് ലേണിംഗ് ടെസ്റ്റ്എഴുതാനെത്തുന്നത്.
എന്നാൽ കഴിഞ്ഞ ദിവസങ്ങളിൽ വിവിധ ആർ.ടി.ഒ ഓഫീസുകളിലെത്തിയ ആർക്കും പരീക്ഷയെഴുതാൻ സാധിച്ചില്ല. ടെസ്റ്റ് ആരംഭിച്ച് നാലോ അഞ്ചോ ചോദ്യങ്ങൾ പൂർത്തിയാകുമ്പോഴേക്കും സിസ്റ്റം ഹാങ്ങാവും. തുടർന്ന് പരീക്ഷ തുടരാനാകാതെ ടെസ്റ്റ് റദ്ദാക്കേണ്ടി വരുന്നു. ചില ദിവസങ്ങളിൽ ഒരു ടെസ്റ്റ് പോലും നടത്താൻ കഴിയാത്ത അവസ്ഥയും ഉണ്ടായതായി ഉദ്യോഗസ്ഥർ പറയുന്നു. പരീക്ഷ മുടങ്ങുന്നതോടെ വീണ്ടും സ്ലോട്ട് ലഭിക്കാൻ ദിവസങ്ങളോ ആഴ്ചകളോ കാത്തിരിക്കേണ്ടി വരുന്നതും ഉദ്യോഗാർത്ഥികളെ കൂടുതൽപ്രതിസന്ധിയിലാക്കുകയാണ്.സോഫ്റ്റ്വെയറിലെ സാങ്കേതിക പ്രശ്നമാണ് ടെസ്റ്റുകൾ മുടങ്ങാൻ കാരണമെന്നാണ് മോട്ടോർ വാഹന വകുപ്പിന്റെ വിശദീകരണം.
സംസ്ഥാനത്തെ എല്ലാ ഓഫീസുകളിലും സമാന പ്രശ്നം തുടരുകയാണെന്നും പരിഹരിക്കാൻ നടപടി ആരംഭിച്ചിട്ടുണ്ടെങ്കിലും ഇത് എപ്പോൾ പരിഹരിക്കപ്പെടുമെന്നതിൽ നിശ്ചയമില്ല. അതേ സമയം ലേണിംഗ് ടെസ്റ്റിനായി പല ആർ.ടി.ഒ ഓഫീസുകളിലും ഇപ്പോഴും പത്തുവർഷത്തിലേറെ പഴക്കമുള്ള കമ്പ്യൂട്ടർ സംവിധാനങ്ങളാണ് ഉപയോഗിക്കുന്നത്. ഇതും സേവനങ്ങൾ വെെകാൻ ഇടയാക്കുന്നു.



