spot_img
Friday, November 20, 2026
Home Blog Page 17

68-ാമത് സംസ്ഥാന സ്‌കൂള്‍ കായികമേളയ്ക്ക് ആവേശോജ്ജ്വല സമാപനം; അടുത്ത മേള കൊല്ലത്ത്.

0

കോഴിക്കോട്: മീറ്റ് റെക്കോര്‍ഡുകളുടെ പെരുമഴയും മികച്ച ജനപങ്കാളിത്തവും കൊണ്ട് ശ്രദ്ധേയമായ 68-ാമത് സംസ്ഥാന സ്‌കൂള്‍ കായികമേളയ്ക്ക് കോഴിക്കോട്ട് ആവേശോജ്ജ്വല സമാപനമായി. സമാപന സമ്മേളനത്തിൽ അധ്യക്ഷത വഹിച്ച പൊതുവിദ്യാഭ്യാസ വകുപ്പ് മന്ത്രി എൻ. ഷംസുദ്ദീൻ, അടുത്ത വർഷത്തെ 69-ാമത് കായികമേള കൊല്ലം ജില്ലയിൽ വെച്ച് നടത്തുമെന്ന് പ്രഖ്യാപിച്ചു. വിദ്യാർഥികൾക്കിടയിൽ മികച്ച കായികസംസ്‌കാരം വളർത്തിയെടുക്കുകയാണ് സർക്കാരിന്റെ ലക്ഷ്യമെന്ന് വ്യക്തമാക്കിയ മന്ത്രി, സ്കൂളുകളിൽ കായിക അധ്യാപകരുടെ തസ്തിക നിലനിർത്താനുള്ള കുറഞ്ഞ കുട്ടികളുടെ എണ്ണം 500-ൽ നിന്ന് 300 ആയി കുറച്ചതായും കൂടുതൽ സ്കൂളുകളിൽ കായികവിദ്യാഭ്യാസം ലഭ്യമാക്കാൻ വിദഗ്ധ സമിതിയെ നിയോഗിച്ചതായും അറിയിച്ചു. ഭിന്നശേഷി കുട്ടികളെ ഉൾപ്പെടുത്തിയുള്ള ഇൻക്ലൂസീവ് മത്സരങ്ങളും ആറ് മീറ്റ് റെക്കോർഡുകളും തിരുത്തിക്കുറിച്ച ഈ മേളയിൽ തിരുവനന്തപുരത്തിന്റെ ശ്രീഹരി, കോട്ടയത്തിന്റെ വിഷ്ണു യാദവ്, ആലപ്പുഴയുടെ അതുൽ ടി.എം, അനാമിക അജേഷ്, മലപ്പുറം സീനിയർ ബോയ്‌സ് റിലേ ടീം എന്നിവർ മികച്ച നേട്ടങ്ങൾ കൈവരിച്ചു. ചടങ്ങിൽ മുഖ്യാതിഥികളായി പങ്കെടുത്ത ഭരണപരിഷ്കരണ കമ്മീഷൻ ചെയർപേഴ്സൺ ഡോ. എം.കെ. മുനീർ അടിസ്ഥാന സൗകര്യ വികസനത്തിന് ഊന്നൽ നൽകിയപ്പോൾ, ഇവിടുത്തെ പ്രതിഭകൾ 2036 ഒളിമ്പിക്സിൽ ഇന്ത്യയുടെ പ്രതീക്ഷകളാണെന്നും പ്രായതട്ടിപ്പുകൾക്കെതിരെ ശക്തമായ നടപടി വേണമെന്നും ഒളിമ്പ്യൻ അഞ്ജു ബോബി ജോർജ് അഭിപ്രായപ്പെട്ടു.

68-ാമത് കേരള സംസ്ഥാന സ്‌കൂള്‍ കായികമേളയ്ക്ക് സമാപനം.

0

കുന്നമംഗലം :സംസ്ഥാനത്ത് പുതിയ കായിക സംസ്‌കാരം വളര്‍ത്തിയെടുക്കുന്നതിനും കായികരംഗത്തെ കൂടുതല്‍ ശക്തിപ്പെടുത്തുന്നതിനുമായി സര്‍ക്കാര്‍ പുതിയ കായിക നിയമം തയ്യാറാക്കിവരികയാണെന്നും അടുത്ത നിയമസഭ സമ്മേളനത്തില്‍ ബില്‍ അവതരിപ്പിക്കുമെന്നും ആഭ്യന്തര മന്ത്രി രമേശ് ചെന്നിത്തല. ഏഷ്യയിലെ തന്നെ ഏറ്റവും വലിയ കായിക മേളയായ സംസ്ഥാന സ്‌കൂള്‍ കായികമേളയുടെ സമാപന സമ്മേളനം പ്രധാനവേദിയായ കോഴിക്കോട് ചാത്തമംഗലം നാഷണല്‍ ഇന്‍സ്റ്റിറ്റ്യൂട്ട് ഓഫ് ടെക്‌നോളജിയിലെ മേജര്‍ ധ്യാന്‍ചന്ദ് സ്റ്റേഡിയം കോംപ്ലക്‌സില്‍ ഉദ്ഘാടനം ചെയ്യുകയായിരുന്നു അദ്ദേഹം.കുട്ടികളെ കായികരംഗത്തേക്ക് ആകര്‍ഷിക്കുന്നതിലൂടെ സംസ്ഥാനത്ത് വര്‍ധിച്ചുവരുന്ന ലഹരി ഉപയോഗം തടയാന്‍ സാധിക്കുമെന്ന് മന്ത്രി പറഞ്ഞു. പുതിയ തലമുറയെയും യുവാക്കളെയും ലക്ഷ്യമിട്ട് പ്രവര്‍ത്തിക്കുന്ന ലഹരിമാഫിയകള്‍ക്കെതിരായ പോരാട്ടത്തില്‍ കായിക-കലാ രംഗങ്ങളെ പ്രോത്സാഹിപ്പിക്കുന്നതിന് വലിയ പ്രാധാന്യമുണ്ട്. കുട്ടികളുടെ ഊര്‍ജവും കഴിവുകളും ക്രിയാത്മകമായി വിനിയോഗിക്കാന്‍ കായികരംഗത്തിന് കഴിയണം. ഇതിന് അനുയോജ്യമായ കായികനയവും അടിസ്ഥാന സൗകര്യങ്ങളും ഒരുക്കാന്‍ സര്‍ക്കാര്‍ പ്രതിജ്ഞാബദ്ധമാണെന്നും മന്ത്രി വ്യക്തമാക്കി.മഴയുടെ ഭീഷണിയുണ്ടായിരുന്നിട്ടും യാതൊരു തടസ്സവുമില്ലാതെ മേള വിജയകരമായി പൂര്‍ത്തിയാക്കാന്‍ നേതൃത്വം നല്‍കിയ വിദ്യാഭ്യാസ മന്ത്രിയെ അദ്ദേഹം പ്രത്യേകം അഭിനന്ദിച്ചു. അധ്യാപക സംഘടനകള്‍ ഉള്‍പ്പെടെ എല്ലാവരും ഒറ്റക്കെട്ടായി പ്രവര്‍ത്തിച്ചതിന്റെ ഫലമായാണ് പതിനായിരത്തോളം കായികതാരങ്ങള്‍ ഏഴു ദിനരാത്രങ്ങളിലായി പങ്കെടുത്ത കായികമേള ചരിത്രവിജയമായത്. ഗ്രാമീണ മേഖലയിലെ സ്‌കൂളുകളില്‍നിന്നുള്‍പ്പെടെ പുതിയ കായിക പ്രതിഭകളെ കണ്ടെത്താനും അവര്‍ക്ക് മികച്ച പരിശീലനവും അവസരങ്ങളും ഒരുക്കാനും കഴിയണം. പി.ടി. ഉഷ, അഞ്ജു ബോബി ജോര്‍ജ് തുടങ്ങിയ ദേശീയ, അന്തര്‍ദേശീയ തലങ്ങളില്‍ രാജ്യത്തിന് അഭിമാനമായി മാറിയ നിരവധി കായികതാരങ്ങളെ സംഭാവന ചെയ്ത സംസ്ഥാനമാണ് കേരളം. മൈതാനങ്ങളില്ലാത്ത സ്‌കൂളുകളില്‍ ആവശ്യമായ അടിസ്ഥാന സൗകര്യങ്ങള്‍ ഒരുക്കുന്നതിനും ഓരോ പഞ്ചായത്തിലും സ്റ്റേഡിയങ്ങള്‍ നിര്‍മിക്കുന്നതിനും നടപടിയുണ്ടാകണമെന്നും മന്ത്രി പറഞ്ഞു.കേരള പോലീസും പൊതുവിദ്യാഭ്യാസ വകുപ്പും ലഹരിക്കെതിരെ സംയുക്തമായി നടപ്പാക്കിയ ‘ഓപ്പറേഷന്‍ തൂഫാന്‍’ വലിയ വിജയമായിരുന്നുവെന്നും മന്ത്രി പറഞ്ഞു. പദ്ധതിയുടെ വിജയത്തിന് വിദ്യാഭ്യാസ മന്ത്രി നടത്തിയ ഇടപെടലുകളും പരിശ്രമങ്ങളും നിര്‍ണായകമായി. ലോകകപ്പ് ഫുട്‌ബോള്‍ സമയത്ത് ‘വണ്‍ മില്യണ്‍ ഗോള്‍സ്’ എന്ന ലക്ഷ്യത്തോടെ ആരംഭിച്ച പ്രവര്‍ത്തനത്തിലൂടെ സ്‌കൂളുകള്‍ക്ക് അഞ്ച് മില്യണ്‍ ഗോളുകള്‍ നേടാനായത് കായികരംഗത്തെ വലിയ നേട്ടമാണ്. കുട്ടികളില്‍ ഫുട്‌ബോളിനോടും കായിക വിനോദങ്ങളോടും താല്‍പര്യം വളര്‍ത്താന്‍ ഈ സംരംഭത്തിന് കഴിഞ്ഞുവെന്നും അദ്ദേഹം കൂട്ടിച്ചേര്‍ത്തു. മത്സരങ്ങളില്‍ സമ്മാനങ്ങള്‍ നേടുന്നതിനേക്കാള്‍ പ്രാധാന്യം കായികമേളയിലെ പങ്കാളിത്തമാണെന്ന് മന്ത്രി ഓര്‍മിപ്പിച്ചു. മേളയില്‍ പങ്കെടുത്ത മുഴുവന്‍ വിദ്യാര്‍ഥികളെയും അദ്ദേഹം അഭിനന്ദിച്ചു.മേളയില്‍ മീറ്റ് റെക്കോര്‍ഡ് നേടിയ കായികതാരങ്ങള്‍ക്ക് മന്ത്രി പുരസ്‌കാരങ്ങള്‍ വിതരണം ചെയ്തു. ചടങ്ങില്‍ പൊതുവിദ്യാഭ്യാസ വകുപ്പ് മന്ത്രി അഡ്വ. എന്‍ ഷംസുദ്ദീന്‍ അധ്യക്ഷനായി

കാലിക്കറ്റ് സര്‍വകലാശാല ക്യാമ്പസ് അനിശ്ചിതകാലത്തേക്ക് അടച്ചു.

0

തേഞ്ഞിപ്പലം : വിദ്യാര്‍ഥി സംഘര്‍ഷത്തെ തുടര്‍ന്ന് കാലിക്കറ്റ് സര്‍വകലാശാല ക്യാമ്പസ് അനിശ്ചിതകാലത്തേക്ക് അടച്ചു. പഠന വകുപ്പുകളടക്കം ഇനി ഒരു അറിയിപ്പുണ്ടാകുന്നത് വരെ പ്രവര്‍ത്തിക്കില്ലന്ന് സര്‍വകലാശാല അധികൃതര്‍ പറഞ്ഞു. മെന്‍സ് ഹോസ്റ്റലില്‍ താമസിക്കുന്ന മുഴുവന്‍ വിദ്യാര്‍ഥികളും ഒഴിയണമെന്നും അറിയിപ്പ് നല്‍കിയിട്ടുണ്ട്. പൊലീസിന്റെ കൂടി അഭ്യര്‍ഥന പരിഗണിച്ചാണ് അധികൃതരുടെ നടപടി. ക്യാമ്പസ് ഡിപ്പാര്‍ട്ട്‌മെന്റ് സ്റ്റുഡന്റ്‌സ് യൂണിയന്‍ തെരഞ്ഞെടുപ്പുമായി ബന്ധപ്പെട്ട് വ്യാപക സംഘര്‍ഷമുണ്ടായിരുന്നു. വോട്ടെണ്ണല്‍ ദിനമാണ് എസ്എഫ്‌ഐ, യുഡിഎസ്എഫ് പ്രവര്‍ത്തകര്‍ ഏറ്റുമുട്ടിയത്. നിരവധി വിദ്യാര്‍ഥികള്‍ക്ക് പരിക്കേറ്റിരുന്നു. ഇപ്പോഴും സംഘര്‍ഷാവസ്ഥ നിലനില്‍ക്കുന്ന സാഹചര്യത്തിലാണ് ക്യാമ്പസ് അനിശ്ചിതകാലത്തേക്ക് അടച്ചിടാന്‍ തീരുമാനിച്ചത്.

കേരള സ്‌കൂൾ കായിക മേള :മാധ്യമപ്രവർത്തകർക്ക് യാത്രയയപ്പ് നൽകി.

0

കോഴിക്കോട് :കേരള സ്‌കൂൾ കായിക മേളയിൽ സമർപ്പിത സേവനം നിർവഹിച്ച മാധ്യമപ്രവർത്തകർക്ക് മീഡിയ കമ്മറ്റി യാത്രയയപ്പ് നൽകി.അഡ്വ.ഫൈസൽ ബാബു എം എൽ എ ഉദ്ഘാടനം ചെയ്തു. വൈസ് ചെയർമാൻ കമാൽ വരദൂർ അധ്യക്ഷത വഹിച്ചു.മാധ്യമപ്രവർത്തകർക്കുള്ള സ്‌നേഹ സമ്മാനം എം എൽ എ യിൽ നിന്നും റിങ്കുരാജ് മട്ടാഞ്ചേരി ( മനോരമ), അജീഷ് അത്തോളി (ജീവൻ ടി വി) എന്നിവർ ഏറ്റുവാങ്ങി.മീഡിയ കമ്മറ്റി പുറത്തിറക്കിയ ‘ജെൻസി കുതിപ്പ്’ സപ്ലിമെൻ്റ് ചീഫ് എഡിറ്റർ എൻ പി എ കബീറിനെ ആദരിച്ചു.പ്രസ് ക്ലബ്ബ് ജേർണലിസം വിദ്യാർഥികളായ സി എസ് അനുജ , എൻ പി, സംഗീത, മണാശേരി എം എ എം ഒ കോളജ് വിദ്യാർഥികളായ കെ അംന തഹ്സിൻ ,ഷെഹ ഫാത്തിമ എന്നിവർ വോളണ്ടിയർ സർട്ടിഫിക്കറ്റ് ഏറ്റുവാങ്ങി. എ ഡി പി ഐ സി എ സന്തോഷ്, ജില്ല ഇർഫൻമേഷൻ ഓഫീസർ മുഹമ്മദ് ഉഗ്രപുരം, വിദ്യാഭ്യാസ മന്ത്രിയുടെ പി ആർ ഒ എസ് സാജൻ , ജനറൽ കൺവീനറും ജില്ല വിദ്യാഭ്യാസ ഡെപ്യൂട്ടി ഡയറക്ടറുമായ സി എസ് അമൃത, സ്പോർട്സ് ഓർഗനൈസർ അജിത്ത് വർഗീസ്, കമ്മറ്റി വൈസ് ചെയർമാൻ പി എം മുഹമ്മദലി, ജോയിൻ്റ് കൺവീനർമാരായ എം പി ഫാസിൽ, പി കെ എം ഹിബത്തുള്ള, ടി കെ ജുമാൻ , കെ കെ സുബൈർ, എ ശിവപ്രസാദ്, കെ പി മുജീബ് റഹ്മാൻ, ലത്തീഫ് മലോറം, പി ജിമേഷ് , കെ എസ് രേഷ്‌മ ( അമൃത ടിവി), ദീപ്തിഷ് കൃഷ്ണ (മനോരമ) എന്നിവർ ആശംസകൾ നേർന്നു.കൺവീനർ പി കെ സത്താർ സ്വാഗതവും ഇ സി നൗഷാദ് നന്ദിയും പറഞ്ഞു.

സ്വർണക്കപ്പ് തിരുവനന്തപുരത്തിന്; അത്‌ലറ്റിക്‌സിൽ മലപ്പുറം ജേതാക്കൾ

0

സംസ്ഥാന സ്‌കൂൾ കായികമേളയിൽ തിരുവനന്തപുരം ഓവറോൾ ചാമ്പ്യൻമാർ. 2012.3 പോയിന്റോടെ തിരുവനന്തപുരം സ്വർണക്കപ്പ് സ്വന്തമാക്കി. തൃശൂർ രണ്ടാമതും മലപ്പുറം മൂന്നാമത്തുമെത്തി. തൃശൂർ 965.3 പോയിന്റ് നേടിയപ്പോൾ മലപ്പുറം 923.3 പോയിന്റ് നേടി. അത്‌ലറ്റിക്‌സിൽ മലപ്പുറം ജേതാക്കളായി.ഗെയിംസ്, അക്വാട്ടിക്‌സ് ഇനങ്ങളിൽ ആധിപത്യം പുലർത്തിയാണ് തിരുവനന്തപുരം മുന്നേറിയത്. ഗെയിംസ് ഇനങ്ങളിൽ നിന്ന് 1310 പോയിന്റാണ് തിരുവനന്തപുരം നേടിയത്. 151 സ്വർണവും 92 വെള്ളിയും 106 വെങ്കലവും ഗെയിംസ് ഇനങ്ങളിൽ നേടി. അക്വാട്ടിക്‌സ് ഇനങ്ങളിൽ തിരുവനന്തപുരം 606 പോയിന്റും നേടി. അക്വാട്ടിക്‌സ് ഇനങ്ങളിൽ 160 പോയിന്റുമായി എറണാകുളം രണ്ടാമതും 120 പോയിന്റുമായി തൃശൂർ മൂന്നാമതുമാണ്. ഗെയിംസിൽ 813 പോയിന്റുമായി കണ്ണൂർ രണ്ടാമതും 796 പോയിന്റുമായി തൃശൂർ മൂന്നാമതുമെത്തി.അത്‌ലറ്റിക്‌സിൽ മലപ്പുറമാണ് ജേതാക്കൾ. മലപ്പുറം 204.3 പോയിന്റോടെയാണ് ജേതാക്കളായത്. 19 സ്വർണവും 23 വെള്ളിയും 19 വെങ്കലവും മലപ്പുറം അത്‌ലറ്റിക്‌സിൽ കരസ്ഥമാക്കി. 161.5 പോയിന്റോടെ പാലക്കാട് രണ്ടാമതും 109 പോയിന്റോടെ ആലപ്പുഴ മൂന്നാമതുമെത്തി.ഐഡിയൽ ഇ. എച്ച്. എസ്.എസ് കടകശ്ശേരി, കെ.എച്ച്. എം.എച്ച്.എസ് ആലത്തിയൂർ സ്‌കൂളുകളുടെ മികച്ച പ്രകടനത്തിന്റെ ബലത്തിലാണ് മലപ്പുറം ഒന്നാമത്തെത്തിയത്. അത്‌ലറ്റിക്‌സിൽ ഐഡിയൽ കടകശ്ശേരി തുടർച്ചയായ അഞ്ചാം തവണയും ജേതാക്കളായി. 75.3 പോയിന്റോടെയാണ് ഐഡിയൽ സ്‌കൂൾ ഒന്നാമതെത്തിയത്.

പ്രവാസികള്‍ക്ക് ആശ്വാസം, യുഎഇയില്‍ ഇന്ധനവില കുറഞ്ഞു; നവംബര്‍ മുതലുള്ള നിരക്ക് ഇങ്ങനെ

0

ദുബായ്: യുഎഇയില്‍ ഇന്ധനവില കുറഞ്ഞു. മൂന്ന് മാസത്തെ വിലവര്‍ദ്ധനവിന് ഒടുവിലാണ് വില കുറച്ചത്.സംഘര്‍ഷങ്ങളെത്തുടര്‍ന്ന് മാസങ്ങളിലായി ഇന്ധനവില ഉയര്‍ന്നു നില്‍ക്കുകയായിരുന്നു. ഫെബ്രുവരി 28-ന് പടിഞ്ഞാറന്‍ ഏഷ്യയില്‍ യുദ്ധം ആരംഭിച്ചതിനുശേഷം യുഎഇയിലെ റീട്ടെയില്‍ ഇന്ധനവിലയില്‍ 60 ശതമാനത്തിലധികം വര്‍ദ്ധനവുണ്ടായിട്ടുണ്ട്.കഴിഞ്ഞ ജൂലൈയിലാണ് ഇനിന് മുമ്പ് ഇന്ധനവിലയില്‍ കുറവുണ്ടായത്. എന്നാല്‍ ഓഗസ്റ്റ് മുതല്‍ വില വീണ്ടും ഉയര്‍ന്നു. ഇന്ധനവില കുറയുന്നതോടെ പ്രവാസികളുടെ പ്രതിമാസ ബജറ്റില്‍ ആശ്വാസമാകും. നവംബര്‍ മാസത്തേക്കുള്ള പുതുക്കിയ ഇന്ധനവില പ്രഖ്യാപിച്ചു.പുതിയ നിരക്കുകള്‍ പ്രകാരം സൂപ്പര്‍ 98 പെട്രോളിന് ലിറ്ററിന് 4.16 ദിര്‍ഹമായിരിക്കും വില. ഒക്ടോബറില്‍ ഇത് 4.40 ദിര്‍ഹമായിരുന്നു. സ്പെഷ്യല്‍ 95 പെട്രോളിന് നിലവിലെ 4.28 ദിര്‍ഹത്തില്‍ നിന്ന് 4.04 ദിര്‍ഹമായും ഇ-പ്ലസ് 91 പെട്രോളിന് 4.21 ദിര്‍ഹത്തില്‍ നിന്ന് 3.97 ദിര്‍ഹമായും വില കുറഞ്ഞു. ഡീസല്‍ ലിറ്ററിന് 4.80 ദിര്‍ഹത്തില്‍ നിന്ന് 4.75 ദിര്‍ഹമായാണ് താഴ്ന്നത്.

അറിയിപ്പ്:- 2026 ഒക്ടോബർ മാസത്തെ റേഷൻ വിതരണം ഇന്ന് (31.10.2026 – ശനിയാഴ്ച) അവസാനിക്കുന്നതാണ്

0

01.11.2026, 02.11.2026 എന്നീ ദിവസങ്ങളിൽ റേഷൻ കടകൾക്ക് അവധി ആയിരിക്കും.(3) 2026 നവംബർ മാസത്തെ റേഷൻ വിതരണം 03.11.2026 (ചൊവ്വാഴ്ച) മുതൽ ആരംഭിക്കുന്നതാണ്.(4) 2026 ഒക്ടോബർ-നവംബർ-ഡിസംബർ ക്വാർട്ടറിൽ, വൈദ്യുതി ഉള്ള വീടുകളിലെ AAY കാർഡിന് ആകെ 1 ലിറ്റർ മണ്ണെണ്ണയും, PHH, NPS, NPNS കാർഡുകൾക്ക് ആകെ 0.5 ലിറ്റർ മണ്ണെണ്ണയും, വൈദ്യുതി ഇല്ലാത്ത വീടുകളിലെ കാർഡുകൾക്ക് ആകെ 6 ലിറ്റർ മണ്ണെണ്ണയും ലഭിക്കുന്നതാണ്.(5) എല്ലാ വിഭാഗം റേഷൻ കാർഡുകൾക്കും അനുവദിച്ചിട്ടുള്ള 2026 നവംബർ മാസത്തിലെ റേഷൻ വിഹിതം ചുവടെയുള്ള ചിത്രത്തിൽ ഉൾപ്പെടുത്തിയിരിക്കുന്നു…(NB: ഓരോ റേഷൻ കാർഡിനും അനുവദിച്ചിട്ടുള്ള റേഷൻ സാധനങ്ങളുടെ ഇനം തിരിച്ചുള്ള അളവ് അറിയുന്നതിനായി https://epos.kerala.gov.in/SRC_Trans_Int.jsp എന്ന ലിങ്ക് ഉപയോഗിക്കാവുന്നതാണ്.)

സൈബർ സുരക്ഷയുള്ള കേരളം കെട്ടിപ്പടുക്കണം’; പൊലീസിന്റെ ‘ക്ലിക്ക്’ പദ്ധതി ഉദ്ഘാടനം ചെയ്ത് മമ്മൂട്ടി.

0

തിരുവനന്തപുരം : സൈബർ സുരക്ഷയുള്ള കേരളം കെട്ടിപ്പടുക്കാൻ പൊലീസിന്റെ ‘ക്ലിക്ക്’ പദ്ധതിയ്ക്ക് സാധിക്കട്ടെയെന്ന് ആശംസിച്ച് ജനപ്രിയ താരം മമ്മൂട്ടി. കേരള പൊലീസിന്റെ സൈബർ സുരക്ഷാ പദ്ധതിയായ ‘ക്ലിക്ക്’ ഉദ്ഘാടനം ചെയ്ത് സംസാരിക്കുകയായിരുന്നു താരം.സൈബർ കുറ്റകൃത്യങ്ങൾക്കെതിരെ പൊതുജനങ്ങളിൽ ജാഗ്രതയുണ്ടാക്കുകയാണ് ഈ പദ്ധതിയുടെ പ്രധാന ലക്ഷ്യം.എഐ കാലത്തെ തട്ടിപ്പിൽ ജാ​ഗ്രത വേണമെന്ന് അദ്ദേഹം മുന്നറിയിപ്പ് നൽകി. സംശയകരമായത് ശ്രദ്ധയിൽപ്പെട്ടാൽ അപ്പോൾ തന്നെ പൊലീസുമായി ബന്ധപ്പെടാൻ പൊതുജനങ്ങൾ തയാറാകണമെന്നും സൈബർ സെല്ലിന്റെ സഹായത്തോടെ ഇത്തരം കുറ്റകൃത്യങ്ങളെ ഫലപ്രദമായി നേരിടാൻ സാധിക്കുമെന്നും അദ്ദേഹം പറഞ്ഞു.പദ്ധയ്ക്ക് എല്ലാവിധ പിന്തുണയും താരം ആശംസിച്ചു. ബിടെക്, എംടെക് വിദ്യാർത്ഥികളുടെ അറിവും സാങ്കേതികമികവും സൈബർ സുരക്ഷിതമായ കേരളം കെട്ടിപ്പടുക്കാൻ സഹായകമാകുമെന്ന് അദ്ദേഹം അഭിപ്രായപ്പെട്ടു. വേദിയിൽ അദ്ദേഹത്തിന് ഉപഹാരം നൽകി ആദരിച്ചു.

ടൗൺഷിപ്പ് 149 കുടുംബങ്ങൾക്ക് കൂടി തണലൊരുങ്ങുന്നു​രണ്ടാംഘട്ട വീടുകളുടെ നറുക്കെടുപ്പ് ഇന്ന്.

0

കൽപ്പറ്റ: വയനാട് പുഞ്ചിരിമട്ടം ഉരുൾ ദുരന്തബാധിതരുടെ പുനരധിവാസത്തിന് കൽപ്പറ്റയിൽ നിർമിക്കുന്ന ടൗൺഷിപ്പിൽ 149 കുടുംബങ്ങൾക്ക് കൂടി തണലൊരുങ്ങുന്നു. ഫേസ് രണ്ട് എ, ഫേസ് രണ്ട് ബി, അപ്പീൽ പട്ടികയിൽ ഉൾപ്പെട്ട ദുരന്ത ബാധിതർക്കാണ് വീടുകൾ നൽകുന്നത്. വീടുകളുടെ നറുക്കെടുപ്പ് ഇന്ന് നടത്തി.എംഎസ്എ ഓഡിറ്റോറിയത്തിൽ റവന്യൂ മന്ത്രി എ.പി. അനിൽകുമാർ ഉദ്ഘാടനം ചെയ്തു. കൃഷി മന്ത്രി ടി. സിദ്ദിഖ് അധ്യക്ഷത വഹിച്ചു.​ടൗൺഷിപ്പിൽ സോൺ ഒന്നിൽ 23, സോൺ മൂന്നിൽ ആറ്, സോൺ നാലിൽ 14, സോൺ അഞ്ചിൽ 106 എന്നിങ്ങനെയാണ് രണ്ടാം ഘട്ടത്തിൽ വീടുകൾ പണിയുന്നത്. നവംബറിൽ വീടുകൾ കൈമാറും.​പുഞ്ചിരിമട്ടം ഉരുൾ ദുരന്തത്തിൽ മുണ്ടക്കൈ, ചൂരൽമല പ്രദേശങ്ങളിൽ നാശനഷ്ടം സംഭവിച്ച വാണിജ്യ കെട്ടിട ഉടമകൾക്കും ലൈസൻസുള്ള വ്യാപാരികൾക്കും നഷ്ടപരിഹാരമായി 7.19 കോടി രൂപ അനുവദിച്ച് സംസ്ഥാന സർക്കാർ ഉത്തരവായി. ​മുഖ്യമന്ത്രിയുടെ ദുരിതാശ്വാസനിധിയിൽനിന്നാണ് തുക അനുവദിച്ചത്. മുണ്ടക്കൈ, ചൂരൽമല പ്രദേശങ്ങളിലെ 48 പേരുടെ ഉടമസ്ഥതയിലുള്ള 128 വാണിജ്യ കടമുറികൾക്ക് നഷ്ടപരിഹാരം നൽകുന്നതിന് 5,14,50,000 രൂപയാണ് അനുവദിച്ചത്. ​ഇതിൽ 16 എണ്ണം നോഗോ സോണിൽ ഉൾപ്പെടുന്നതും ചൂരൽമല പാലം നിർമാണവുമായി ബന്ധപ്പെട്ട് ഏറ്റെടുക്കൽ പരിധിയിൽ വരുന്നതുമാണ്. ദുരന്തബാധിത പ്രദേശത്തെ ലൈസൻസുള്ള 28 വ്യാപാര-വാണിജ്യ സംരംഭകർക്ക് നഷ്ടപരിഹാരമായി 2,05,49,400 രൂപ നൽകും.

68-ാമത് സംസ്ഥാന സ്കൂൾ കായികമേളയ്ക്ക് കോഴിക്കോട്ട് ഇന്ന് തിരശ്ശീല വീഴും; സമാപന സമ്മേളനം മന്ത്രി രമേശ് ചെന്നിത്തല ഉദ്ഘാടനം ചെയ്യും

0

കോഴിക്കോട് : ഏഴു ദിനങ്ങൾ, പത്ത് വേദികൾ, ആയിരത്തിലേറെ കായികതാരങ്ങൾ, ആവേശം അലതല്ലിയ ദിനരാത്രങ്ങൾ. 68-ാമത് സംസ്ഥാന സ്കൂൾ കായികമേളയ്ക്ക് ആതിഥ്യമൊരുക്കി കോഴിക്കോട് നഗരം ഉത്സവലഹരിയിലായപ്പോൾ ട്രാക്കിലും ഫീൽഡിലും പിറന്നത് ആവേശത്തിന്റെ പുതിയ ചരിത്രം.നാടിന്റെ നാനാഭാഗത്തു നിന്ന് കായിക പ്രതിഭകളെയും അവരെ പ്രോത്സാഹിപ്പിക്കാൻ ഒഴുകിയെത്തിയ കായികപ്രേമികളെയും വരവേറ്റ കോഴിക്കോട്, ഏഴു ദിവസം നീണ്ട കായിക മാമാങ്കത്തിന് ഇന്ന് തിരശ്ശീലയിടും. ചാത്തമംഗലം എൻ.ഐ.ടി മേജർ ധ്യാൻചന്ദ് സ്റ്റേഡിയത്തിൽ വൈകിട്ട് നാലിന് നടക്കുന്ന സമാപന സമ്മേളനം ആഭ്യന്തരമന്ത്രി രമേശ് ചെന്നിത്തല ഉദ്ഘാടനം ചെയ്യും. പൊതുവിദ്യാഭ്യാസ മന്ത്രി എൻ. ഷംസുദ്ദീൻ അദ്ധ്യക്ഷത വഹിക്കും. വ്യവസായ മന്ത്രി പി.കെ. കുഞ്ഞാലിക്കുട്ടി വിജയികൾക്കുള്ള സമ്മാനങ്ങൾ വിതരണം ചെയ്യും.25ന് തുടക്കമായ മേളയിൽ 14 ജില്ലകളിൽ നിന്നുള്ള ആയിരത്തിലേറെ താരങ്ങളാണ് വിവിധ ഇനങ്ങളിൽ മാറ്റുരച്ചത്. മെഡലുകൾക്കും റെക്കോഡുകൾക്കുമായുള്ള പോരാട്ടങ്ങൾക്കൊപ്പം പുതിയ താരോദയങ്ങൾക്കും മേള സാക്ഷിയായി. കായികതാരങ്ങളുടെ ആവേശത്തിനൊപ്പം കാണികളുടെയും നാട്ടുകാരുടെയും പിന്തുണ മേളയെ ആഘോഷമാക്കി.