spot_img
Friday, November 20, 2026
Home Blog Page 41

ഇന്ധനവിലയും ജീവിതച്ചെലവും കുതിക്കുന്നു; ഓട്ടോ തൊഴിലാളികൾ ദുരിതത്തിൽ.

0

കോഴിക്കോട് : ഇന്ധനവിലയും ജീവിതച്ചെലവും കുതിക്കുമ്പോൾ സർക്കാർ നിശ്ചയിച്ച പഴയ നിരക്കിൽ തന്നെ ഓട്ടോ ഓടിക്കാൻ കഴിയില്ലെന്ന് തൊഴിലാളികൾ. നാല് വർഷത്തിലേറെയായി നിരക്ക് പരിഷ്കരിക്കാത്ത സാഹചര്യത്തിൽ മിനിമം ചാർജ് 50 രൂപയാക്കണമെന്ന ആവശ്യവുമായി ഓട്ടോറിക്ഷ തൊഴിലാളി സംഘടനകൾ രംഗത്ത്. 2022 മേയിലാണ് സംസ്ഥാനത്ത് അവസാനമായി ഓട്ടോറിക്ഷ നിരക്ക് പരിഷ്കരിച്ചത്. ശേഷം ഇന്ധനം, വാഹന അറ്റകുറ്റപ്പണി, സ്പെയർപാർട്സ്, ഇൻഷുറൻസ്, നികുതി തുടങ്ങിയവയുടെ ചെലവിൽ വലിയ വർദ്ധനയുണ്ടായിട്ടും ഓട്ടോ നിരക്കിൽ മാറ്റമുണ്ടായില്ല. ദിവസവും ലഭിക്കുന്ന വരുമാനത്തിൽനിന്ന് ഇന്ധനച്ചെലവും വാഹനപരിപാലനവും മറ്റ് ചെലവുകളും കഴിഞ്ഞാൽ കുടുംബം പുലർത്താൻ പോലും പ്രയാസമാണെന്നാണ് തൊഴിലാളികൾ പറയുന്നത്. ജില്ലയിൽ ഏതാണ്ട് 25000 പെർമിറ്റുള്ള ഓട്ടോ സർവീസ് നടത്തുന്നുണ്ട്. കോർപ്പറേഷൻ പരിധിയിൽ 7500 എണ്ണവും. ഇവരെ ആശ്രയിച്ച് കഴിയുന്ന കുടുംബാംഗങ്ങൾ ഉൾപ്പെടെ ഏകദേശം ഒരു ലക്ഷം പേരാണ് മേഖലയുമായി ബന്ധപ്പെട്ട് കഴിയുന്നത്. വാഹന നികുതി, ഇന്ധനവുമായി ബന്ധപ്പെട്ട നികുതികൾ, വിവിധ ഫീസുകൾ, പിഴകൾ എന്നിവയ്ക്കു പുറമേ ടയറുകളും മറ്റ് സ്പെയർപാർട്സുകളും ഉൾപ്പെടെയുള്ള വാഹനപരിപാലനച്ചെലവും വർദ്ധിച്ചു. ഇൻഷുറൻസ് പ്രീമിയവും ഉയർന്നു. ഇതിനൊപ്പം ഭക്ഷണം, വിദ്യാഭ്യാസം, ചികിത്സ തുടങ്ങിയ കുടുംബച്ചെലവുകൾ കൂടിയതോടെ നിലവിലെ നിരക്കിൽ ഓട്ടോ സർവീസ് നടത്തുന്നത് സാമ്പത്തികമായി ബുദ്ധിമുട്ടാണെന്ന് തൊഴിലാളികൾ പറയുന്നത്. നിലവിലെ ഒന്നര കിലോമീറ്ററിനുള്ള മിനിമം ചാർജ് 30 രൂപയിൽനിന്ന് 50 രൂപയായി ഉയർത്തണമെന്നാണ് പ്രധാന ആവശ്യം. മിനിമം ദൂരത്തിന് ശേഷമുള്ള ഓരോ കിലോമീറ്ററിനും നിലവിലുള്ള 15 രൂപയിൽനിന്ന് 25 രൂപയായി നിരക്ക് വർദ്ധിപ്പിക്കണമെന്നും സംഘടനകൾ ആവശ്യപ്പെടുന്നു. ടൗൺ പരിധിക്ക് പുറത്തേക്ക് സർവീസ് നടത്തിയ ശേഷം തിരിച്ചുവരുമ്പോൾ യാത്രക്കാരെ ലഭിക്കാത്ത സാഹചര്യം പതിവാണ്. ഇത്തരം സർവീസുകളിൽ ടൗൺ പരിധി വരെയുള്ള റിട്ടേൺ ചാർജ് ഈടാക്കാൻ അനുമതി നൽകണം. രാത്രിയിൽ മീറ്റർ നിരക്കിന്റെ 50 ശതമാനം അധികം ഈടാക്കുന്ന നിലവിലെ രീതി ഒഴിവാക്കി റിട്ടേൺ ചാർജ് അനുവദിക്കണമെന്നും തൊഴിലാളികൾ ആവശ്യപ്പെടുന്നു. 15 മിനിറ്റിന് നിലവിലുള്ള 10 രൂപ വെയിറ്റിംഗ് ചാർജ് കുറഞ്ഞത് 25 രൂപയാക്കണമെന്നും ആവശ്യമുണ്ട്. ഓട്ടോറിക്ഷ നിരക്കുമായി ബന്ധപ്പെട്ട 2004 ലെ സർക്കാർ ഉത്തരവിലെ പല വ്യവസ്ഥകളും ഇപ്പോഴും തുടരുകയാണെന്നും തൊഴിലാളി സംഘടനകൾ ചൂണ്ടിക്കാട്ടുന്നു. ഇന്ധനവില, വാഹനപരിപാലനച്ചെലവ്, സ്പെയർപാർട്സ് വില, ഇൻഷുറൻസ്, നികുതി എന്നിവയിലുണ്ടായ മാറ്റങ്ങൾ പരിഗണിച്ച് നിരക്ക് നിശ്ചയിക്കുന്ന മാനദണ്ഡങ്ങൾ കാലാനുസൃതമായി ശാസ്ത്രീയമായി പരിഷ്കരിക്കണ മെന്നാണ് വിവിധ സംഘടനകളുടെ ആവശ്യം.

കെഎസ്ആർടിസിക്ക് ബസ് വാങ്ങി നൽകാൻ 40 ലക്ഷം കൈമാറി എംഎൽഎ; കേരളത്തിൽ ഇതാദ്യം

0

കോഴിക്കോട് : കെഎസ്ആർടിസിക്ക് ബസ് വാങ്ങാൻ എംഎൽഎ ഫണ്ടിൽ നിന്ന് തുക കൈമാറി കൊയിലാണ്ടി എംഎൽഎ കെ. പ്രവീൺകുമാർ. കേരളത്തിൽ ആദ്യമായാണ് ഇത്തരത്തിൽ കെഎസ്ആർടിസിക്കു ബസ് വാങ്ങാൻ ഒരു എംഎൽഎ ഫണ്ട് വകയിരുത്തുന്നത്. ഇതിനുളള നിർദേശ പത്രം കോഴിക്കോട് ജില്ലാ കലക്ടർ എം.എസ്. മാധവിക്കുട്ടിക്ക് എംഎൽഎ കൈമാറി. കലക്ടറുടെ ചേംബറിൽ നടന്ന ചടങ്ങിൽ ബസ് വാങ്ങാൻ 40 ലക്ഷം രൂപയുടെ നിർദേശമാണ് കൈമാറിയത്. ജനപ്രതിനിധികളുമായി ആലോചിച്ച് ബസിന്റെ റൂട്ട് തീരുമാനിക്കുമെന്ന് കെ. പ്രവീൺകുമാർ പറഞ്ഞു. ചടങ്ങിൽ കൊയിലാണ്ടി നഗരസഭ ചെയർപഴ്സൻ യു.കെ. ചന്ദ്രൻ, ജനപ്രതിനിധികൾ തുടങ്ങിയവർ പങ്കെടുത്തു.കെഎസ്ആർടിസി ബസ് നവീകരിക്കുന്നതിനും പൊതുഗതാഗത സൗകര്യങ്ങൾ മെച്ചപ്പെടുത്തുന്നതിനുമായി എംഎൽഎമാരുടെ ആസ്തി വികസന ഫണ്ട് വിനിയോഗിച്ച് ബസ് വാങ്ങി നൽകാൻ സർക്കാർ കഴിഞ്ഞ മാസമാണ് പ്രത്യേകാനുമതി നൽകിയത്. 2026-27 സാമ്പത്തിക വർഷത്തെ നിയമസഭ മണ്ഡല ആസ്തി വികസന പദ്ധതിയിൽ ഉൾപ്പെടുത്തി ഒരു എംഎൽഎക്ക് പരമാവധി മൂന്ന് ബസുകൾ വരെ വാങ്ങാനാണ് അനുമതി നൽകിയത്.വാങ്ങുന്ന ബസുകളുടെ സീറ്റുകളുടെ എണ്ണം, ഇന്ധന വിഭാഗം എന്നിവ കെഎസ്‌ആർടിസി സിഎംഡി ആലോചിച്ചാകും തീരുമാനിക്കുക. താൽപര്യമുള്ള ജനപ്രതിനിധികൾ വിഹിതം അനുവദിച്ചുള്ള നിർദേശം ഒക്ടോബർ 15 ന് അകം ജില്ല കലക്ടർമാർക്ക് നൽകണമെന്നും ഉത്തരവിൽ വ്യക്തമാക്കിയിരുന്നു. ഓർഡിനറി, ഫാസ്റ്റ് പാസഞ്ചർ ഉൾപ്പെടെ ഏത് വിഭാഗത്തിലും ഈ ബസുകൾ വിന്യസിക്കാൻ കെഎസ്‌ആർടിസിക്ക് അധികാരമുണ്ടായിരിക്കും. ഇന്ധനം, ജീവനക്കാരുടെ ശമ്പളം, അറ്റകുറ്റപ്പണികൾ, മറ്റ് പ്രവർത്തനച്ചെലവുകൾ എന്നിവ പൂർണമായി കെഎസ്‌ആർടിസി തന്നെ വഹിക്കും. ബസുകളുടെ റൂട്ടും സർവീസും നിശ്ചയിക്കുമ്പോൾ അതത് എംഎൽഎമാരുമായി കൂടിയാലോചിച്ച് മണ്ഡലത്തിലെ യാത്രക്കാരുടെ ആവശ്യങ്ങൾക്ക് മുൻഗണന നൽകണമെന്നും ഉത്തരവിൽ വ്യക്തമാക്കിയിരുന്നു.

ഇടിമിന്നലോട് കൂടിയ മഴയ്ക്കും ശക്തമായ കാറ്റിനും സാധ്യത: കാലാവസ്ഥാ വകുപ്പിന്റെ ജാഗ്രതാ നിർദേശം

0

തിരുവനന്തപുരം: സംസ്ഥാനത്ത് അടുത്ത അഞ്ച് ദിവസം ശക്തമായ മഴയ്ക്ക് സാധ്യതയെന്ന് കേന്ദ്ര കാലാവസ്ഥ വകുപ്പിന്റെ മുന്നറിയിപ്പ്. വിവിധ ജില്ലകളിൽ കേന്ദ്ര കാലാവസ്ഥ വകുപ്പ് മഞ്ഞ (Yellow) അലർട്ട് പ്രഖ്യാപിച്ചു.​ഒക്ടോബർ 6-ന് പത്തനംതിട്ട, കോട്ടയം, ഇടുക്കി, എറണാകുളം, തൃശൂർ, പാലക്കാട്, മലപ്പുറം, കോഴിക്കോട്, വയനാട് ജില്ലകളിലും; ഒക്ടോബർ 9-ന് പത്തനംതിട്ട, കോട്ടയം, ഇടുക്കി, എറണാകുളം, മലപ്പുറം, വയനാട് ജില്ലകളിലും; ഒക്ടോബർ 10-ന് പത്തനംതിട്ട, കോട്ടയം, ഇടുക്കി ജില്ലകളിലുമാണ് മഞ്ഞ അലർട്ട് പ്രഖ്യാപിച്ചിട്ടുള്ളത്. 24 മണിക്കൂറിൽ 64.5 മില്ലിമീറ്റർ മുതൽ 115.5 മില്ലിമീറ്റർ വരെ ലഭിക്കുന്ന ഒറ്റപ്പെട്ട ശക്തമായ മഴയ്ക്കാണ് സാധ്യത.​മഴയ്ക്കൊപ്പം ശക്തമായ ഇടിമിന്നലിനും കാറ്റിനും സാധ്യതയുള്ളതിനാൽ സംസ്ഥാന ദുരന്ത നിവാരണ അതോറിറ്റി പ്രത്യേക ജാഗ്രതാ നിർദേശങ്ങൾ പുറപ്പെടുവിച്ചു. ഒക്ടോബർ 6, 09, 10 തീയതികളിൽ മണിക്കൂറിൽ 40-50 കി.മീ വരെ വേഗതയിലും, ഒക്ടോബർ 07, 08 തീയതികളിൽ 30-40 കി.മീ വരെ വേഗതയിലും ശക്തമായ കാറ്റുവീശാൻ സാധ്യതയുണ്ട്.​ഇടിമിന്നൽ അപകടകാരിയായതിനാൽ കാർമേഘങ്ങൾ കണ്ടുതുടങ്ങുമ്പോൾ തന്നെ മുൻകരുതലുകൾ സ്വീകരിക്കണം. ഇടിമിന്നലുള്ള സമയത്ത് തുറസായ സ്ഥലങ്ങളിലും വൃക്ഷച്ചുവട്ടിലും നിൽക്കരുത്. ജനലും വാതിലും അടച്ചിട്ട് കെട്ടിടങ്ങൾക്കുള്ളിൽ തന്നെ തുടരുക. ഗൃഹോപകരണങ്ങളുടെ വൈദ്യുതി ബന്ധം വിഛേദിക്കാനും, ഫോൺ ഉപയോഗവും ജലാശയങ്ങളിലിറങ്ങുന്നതും ഒഴിവാക്കാനും അധികൃതർ നിർദേശിച്ചു. മിന്നലേറ്റ വ്യക്തിക്ക് ഉടനടി പ്രഥമശുശ്രൂഷ നൽകണമെന്നും വൈദ്യസഹായം ലഭ്യമാക്കണമെന്നും ദുരന്ത നിവാരണ അതോറിറ്റി അറിയിച്ചു.

മണ്ണിനടിയിൽനിന്ന് അപ്രതീക്ഷിതമായി ജലപ്രവാഹം; നാട്ടുകാരിൽ കൗതുകവും ആശങ്കയും

0

പാനൂർ : ചമ്പാട് മീത്തലെ മനയത്ത് വയലിൽ മണ്ണിനടിയിൽനിന്ന് അപ്രതീക്ഷിതമായി വെള്ളം റോഡിലേക്ക് കുത്തിയൊഴുകിയത് നാട്ടുകാരിൽ കൗതുകവും ആശങ്കയും സൃഷ്ടിച്ചു. ഹനീഫയുടെ ഉടമസ്ഥതയിലുള്ള പറമ്പിലാണു സംഭവം. ഇന്നലെ ഉച്ചയ്ക്ക് രണ്ടോടെയാണ് വെള്ളം പ്രവഹിക്കാൻ തുടങ്ങിയത്. പറമ്പിൽ വീടോ കിണറോ കുഴൽക്കിണറോ ഇല്ല. പ്രദേശത്തുകൂടി പൈപ്‌ലൈനും കടന്നുപോകുന്നില്ല. അഞ്ചു മണിക്കൂറിലേറെ തുടർച്ചയായി വെള്ളം ഒഴുകിയതോടെ ഭൂഗർഭജലത്തിന്റെ സമ്മർദമോ മണ്ണിനടിയിലെ ജലസ്രോതസ്സിന്റെ സാന്നിധ്യമോ ആകാമെന്ന സംശയത്തിലാണ് നാട്ടുകാർ. എന്നാൽ കൃത്യമായ കാരണം ശാസ്ത്രീയ പരിശോധനയിലൂടെ മാത്രമേ വ്യക്തമാകൂ. വിവരമറിഞ്ഞ് പന്ന്യന്നൂർ പഞ്ചായത്ത് പ്രസിഡന്റ് എസ്.സ്നോയ, മെംബർമാരായ നസീർ ഇടവലത്ത്, കെ.പി.ലീല എന്നിവർ സ്ഥലത്തെത്തി. ജിയോളജി വകുപ്പിന് വിവരം നൽകി.

ചുരുളഴിഞ്ഞിട്ട് 7 വർഷം: കൂടത്തായി കൊലപാതകങ്ങളിൽ ഒരു കേസിലും വിചാരണ പൂർത്തിയായില്ല

0

കോഴിക്കോട്: ചുരുളഴിഞ്ഞിട്ട് 7 വർഷം പിന്നിട്ടിട്ടും ഒരു കേസിന്റെ പോലും വിചാരണ പൂർത്തിയാക്കാതെ കൂടത്തായിയിലെ കൊലപാതകങ്ങൾ. ഒരേ കുടുംബത്തിലെ 6 പേരുടെ മരണവും കൊലപാതകമാണെന്ന സംശയത്തിൽ, 6 മൃതദേഹങ്ങളുടെയും ഭാഗങ്ങൾ പൊലീസ് പുറത്തെടുത്തു പരിശോധനയ്ക്ക് അയച്ചത് 2019 ഒക്ടോബർ നാലിനായിരുന്നു.2002നും 2016നും ഇടയിൽ റിട്ട.വിദ്യാഭ്യാസ വകുപ്പ് ഉദ്യോഗസ്ഥൻ കൂടത്തായി പൊന്നാമറ്റം ടോം തോമസ് (66), ഭാര്യ റിട്ട.അധ്യാപിക അന്നമ്മ തോമസ് (60), മകൻ റോയ് തോമസ് (40), അന്നമ്മയുടെ സഹോദരൻ എം.എം. മാത്യു മഞ്ചാടിയിൽ (68), ടോം തോമസിന്റെ സഹോദരന്റെ മകനായ ഷാജു സ്കറിയയുടെ മകൾ ആൽഫൈൻ (2), ഷാജു സ്കറിയയുടെ ഭാര്യ സിലി (44) എന്നിവരുടേതു കൊലപാതകമാണെന്നാണു പൊലീസിന്റെ കണ്ടെത്തൽ. മരിച്ച റോയ് തോമസിന്റെ ഭാര്യ ജോളി ജോസഫാണ് 6 കൊലപാതകങ്ങളിലെയും മുഖ്യപ്രതിയെന്നാണു കുറ്റപത്രത്തിൽ ആരോപിച്ചിരിക്കുന്നത്. ബന്ധുക്കളുടെ മരണത്തിൽ സംശയം പ്രകടിപ്പിച്ചു ടോം തോമസിന്റെ മകൻ റോജോ തോമസ് നൽകിയ പരാതിയിൽ അന്നത്തെ കോഴിക്കോട് റൂറൽ ജില്ലാ പൊലീസ് മേധാവി കെ.ജി. സൈമൺ ആണ് അന്വേഷണത്തിനു തുടക്കമിട്ടത്. ഇതിൽ റോയ് തോമസ് കൊലപാതക കേസിന്റെ വിചാരണ കോഴിക്കോട് സ്പെഷൽ അഡീഷനൽ സെഷൻസ് കോടതിയിൽ (മാറാട് കേസുകൾക്കുള്ള പ്രത്യേക കോടതി) അന്തിമഘട്ടത്തിലാണ്. കേസുകൾ അന്വേഷിച്ച അന്നത്തെ പ്രത്യേകസംഘത്തിനു നേതൃത്വം നൽകിയ ഡിവൈഎസ്പി ആർ.ഹരിദാസന്റെ വിസ്താരമാണ് നടക്കുന്നത്.

പൂജ, ദീപാവലി അവധിക്കും ആലപ്പുഴ വഴി സ്പെഷൽ ട്രെയിൻ ഇല്ല; അനുവദിച്ച എല്ലാ ട്രെയിനുകളും കോട്ടയം വഴി

0

ആലപ്പുഴ : ഓണക്കാലത്തിനു പിന്നാലെ പൂജ, ദീപാവലി അവധികളിലെ സ്പെഷൽ ട്രെയിനുകളിലും ഇടമില്ലാതെ ആലപ്പുഴ. പൂജ, ദീപാവലി ദിനങ്ങളിൽ നാട്ടിലേക്കു വരുന്നവർക്കായി റെയിൽവേ അനുവദിച്ച പ്രത്യേക ട്രെയിനുകളിലൊന്നു പോലും തീരദേശ റെയിൽപാതയിലൂടെയില്ല. എല്ലാ ട്രെയിനുകളും കോട്ടയം വഴിയാണ് സഞ്ചരിക്കുക. ഈ പാതയിൽ ഉൾപ്പെട്ട ജില്ലയിലെ ചെങ്ങന്നൂർ, മാവേലിക്കര, കായംകുളം എന്നിവിടങ്ങളിലാണ് ചില ട്രെയിനുകൾക്കെങ്കിലും സ്റ്റോപ്പുകളുള്ളത്.റെയിൽവേ ഓണത്തിന് 148 സ്പെഷൽ സർവീസുകൾ ഓടിച്ചിരുന്നെങ്കിലും ഒരു സ്പെഷൽ ട്രെയിൻ പോലും ആലപ്പുഴ വഴിയില്ലായിരുന്നു. ഇതിനെതിരെ വലിയ പ്രതിഷേധം ഉയർന്നെങ്കിലും റെയിൽവേ കണ്ടില്ലെന്ന് നടിക്കുകയായിരുന്നു. അടുത്ത അവധിക്കാലങ്ങളിലെങ്കിലും തീരദേശപാത വഴി സ്പെഷൽ ട്രെയിനുകൾ അനുവദിക്കുമെന്ന പ്രതീക്ഷയാണ് ഇല്ലാതാകുന്നത്. തിരുവനന്തപുരം നോർത്ത് – സാന്ദ്രഗച്ചി എക്സ്പ്രസ് സ്പെഷൽ, തിരുവനന്തപുരം സെൻട്രൽ – മദാർ ജംക്‌ഷൻ എക്സ്പ്രസ് സ്പെഷൽ, ചെന്നൈ എഗ്‌മൂർ – കൊല്ലം വീക്ക്‌ലി എക്സ്പ്രസ് സ്പെഷൽ തുടങ്ങിയവയെല്ലാം കോട്ടയം വഴിയാണ് കടന്നുപോകുന്നത്. ഇരുപതിലേറെ സർവീസുകൾ നടത്തുന്ന ഈ സ്പെഷൽ ട്രെയിനുകൾക്കായി റിസർവേഷൻ ദക്ഷിണ റെയിൽവേ ആരംഭിച്ചു കഴിഞ്ഞിട്ടുണ്ട്.സിംഗിൾ ലൈൻ പാതയാണ് എന്ന കാരണം പറഞ്ഞാണ് ആലപ്പുഴയെ തഴയുന്നതെങ്കിലും ഇത് നീതീകരിക്കാവുന്നതല്ല എന്നാണ് യാത്രക്കാർ പറയുന്നത്. മറ്റു പല സിംഗിൾ ലൈൻ പാതകളിലൂടെയും സ്പെഷൽ ട്രെയിനുകൾ പോകുന്നുണ്ടെന്നും കാര്യക്ഷമമായ രീതിയിൽ സമയക്രമീകരണം നടത്തിയാൽ ആലപ്പുഴ വഴിയും സ്പെഷൽ ട്രെയിനുകൾ ഓടിക്കാൻ സാധിക്കുമെന്നും ഇവർ ചൂണ്ടിക്കാണിക്കുന്നു. കഴിഞ്ഞ വർഷം ആലപ്പുഴ വഴി സ്പെഷൽ ട്രെയിനുകൾ ഓടിയിരുന്നു. അവധി നാളുകളിൽ ആലപ്പുഴ വഴിയുള്ള ട്രെയിനുകൾക്കെല്ലാം ഇപ്പോൾ തന്നെ ടിക്കറ്റ് കിട്ടാത്ത സ്ഥിതിയാണ്. ഇനി പ്രഖ്യാപിക്കുന്ന സ്പെഷൽ ട്രെയിനുകളിലെങ്കിലും ആലപ്പുഴയെ പരിഗണിക്കണമെന്നും വിഷയത്തിൽ ജനപ്രതിനിധികൾ കാര്യക്ഷമമായി ഇടപെടണമെന്നുമാണ് യാത്രക്കാരുടെ ആവശ്യം.

വിദ്യാർഥികളെ കയറ്റിയില്ല; സ്വകാര്യബസ് തടഞ്ഞ് നാട്ടുകാർ

0

പാലേരി: ചെറിയകുമ്പളം ലിമിറ്റഡ് ബസ് സ്റ്റോപ്പിൽ വിദ്യാർഥികളെ കയറ്റാതെ സ്വകാര്യ ബസുകൾ കടന്നുപോകുന്നത് പതിവായതിനെ തുടർന്ന് നാട്ടുകാർ ബസ് തടഞ്ഞു. കഴിഞ്ഞ ദിവസം സ്റ്റോപ്പിൽ കാത്തുനിന്ന 40ഓളം വിദ്യാർഥികളെ കയറ്റാതെ പോയ ബസാണ് ജനപ്രതിനിധിയുടെയും നാട്ടുകാരുടെയും നേതൃത്വത്തിൽ തടഞ്ഞത്.ചെറിയകുമ്പളം സ്റ്റോപ്പിൽ ബസുകൾ നിർത്താതെ പോകുന്നത് കാരണം വിദ്യാർഥികളും മറ്റ് യാത്രക്കാരും കടുത്ത യാത്രാദുരിതമാണ് നേരിടുന്നത്. നേരത്തെയും ഇതുസംബന്ധിച്ച് നാട്ടുകാർ പൊലീസിൽ പരാതി നൽകിയിരുന്നു. പരാതിയെ തുടർന്ന് ഏതാനും ദിവസങ്ങളിൽ ബസുകൾ നിർത്തിയെങ്കിലും വീണ്ടും പഴയപടി തുടർന്നു.കഴിഞ്ഞ ദിവസവും വിദ്യാർഥികളെ വഴിയാധാരമാക്കി ബസ് പോയതോടെ വാർഡ് മെമ്പർ ഉബൈദ് വാഴയിലിന്റെ നേതൃത്വത്തിൽ നാട്ടുകാർ ബസ് തടഞ്ഞു. വിഷയത്തിൽ സ്ഥിരമായ പരിഹാരം വേണമെന്നും വിദ്യാർഥികളുടെ പഠനത്തെ ബാധിക്കുന്ന നിലപാടുകൾക്കെതിരെ അധികൃതർ നടപടി സ്വീകരിക്കണമെന്നും നാട്ടുകാർ ആവശ്യപ്പെട്ടു.ലിമിറ്റഡ് സ്റ്റോപ്പിൽ ബസുകൾ നിർബന്ധമായും നിർത്തുന്നുണ്ടെന്ന് ഉറപ്പാക്കാൻ മോട്ടോർ വാഹന വകുപ്പും പോലീസും കൃത്യമായ പരിശോധന നടത്തണമെന്നാണ് പ്രദേശവാസികളുടെ ആവശ്യം. സംഭവത്തിൽ വാർഡ് മെമ്പർ ഉബൈദ് വാഴയിൽ പോലീസ് സ്റ്റേഷനിൽ രേഖാമൂലം പരാതി നൽകി.

മദ്യലഹരിയിലുണ്ടായ തർക്കത്തിൽ താമരശ്ശേരി സ്വദേശിയെ കൊലപ്പെടുത്തിയ കേസിൽ രണ്ടു പേർ പിടിയിൽ

0

പുൽപ്പള്ളി: മദ്യലഹരിയിലുണ്ടായ തർക്കത്തെ തുടർന്ന് ഒരാൾ വെട്ടേറ്റ് മരണപ്പെടുകയും, മറ്റൊരാൾക്ക് വെട്ടേറ്റ് ഗുരുതര പരിക്കേൽക്കുകയും ചെയ്ത സംഭവത്തിൽ പ്രതികളെ അറസ്റ്റ് ചെയ്‌തു. ചേകാടി തോണിക്കടവ് ടി.എസ്. ശേഖരൻ (52), തമിഴ്‌നാട്, നാഗപട്ടണം, പനീർശെൽവം കാതൻ (59) എന്നിവരെയാണ് പുൽപ്പള്ളി പോലീസ് അറസ്റ്റ് ചെയ്തത്. താമരശ്ശേരി മലപുറം അപ്പുറത്ത് പൊയ്യിൽ ലൈജു (40) വാണ് മരിച്ചത്. ലൈജുവിൻ്റെ സുഹൃത്ത് കൊല്ലം സ്വദേശിഷഫീഖ് (35 ) പരിക്കുകളോടെ കോഴിക്കോട് മെഡിക്കൽ കോളേജിൽ ചികിത്സയിലാണ്.കഴിഞ്ഞ ശനിയാഴ്ച (03.10.2026) രാത്രി ഒൻപത് മണിയോടെയാണ് ലൈജുവും ഷഫീഖും താമസിക്കുന്ന ആനപ്പാറയിലെ ക്വാർട്ടേഴ്സിൽ വെച്ച് മദ്യലഹരിയിൽ സംഘർഷമുണ്ടായത്. ഇവരെ പനീർശെൽവവും ശേഖരനും ചേർന്ന് വെട്ടുകത്തി കൊണ്ട് ആക്രമിക്കുകയായിരുന്നു. ഗുരുതരമായി പരിക്കേറ്റ ലൈജു ഞായറാഴ്ച മരണപ്പെട്ടു.

സംസ്ഥാനത്ത് ഇന്നും നാളെയും പരക്കെ മഴ; യെല്ലോ അലര്‍ട്ട്

0

ചക്രവാതച്ചുഴിയുടെയും ന്യൂനമര്‍ദ്ദ പാത്തിയുടെയും സ്വാധീനഫലമായി സംസ്ഥാനത്ത് ചൊവ്വാഴ്ച വരെ ഒറ്റപ്പെട്ട സ്ഥലങ്ങളില്‍ ശക്തമായ മഴയ്ക്ക് സാധ്യത. മഴയ്ക്കൊപ്പം ഒറ്റപ്പെട്ട സ്ഥലങ്ങളില്‍ ഇടിമിന്നലിനും മണിക്കൂറില്‍ 50 കിലോമീറ്റര്‍ വരെ വേഗത്തില്‍ ശക്തമായ കാറ്റിനും സാധ്യതയെന്നും കേന്ദ്ര കാലാവസ്ഥ വകുപ്പ് അറിയിച്ചു.

ജാഗ്രതയുടെ ഭാഗമായി ഇന്ന് പത്തനംതിട്ട, ഇടുക്കി, മലപ്പുറം, വയനാട്, കണ്ണൂര്‍, കാസര്‍കോട് ജില്ലകളിലും ചൊവ്വാഴ്ച ഇടുക്കി, എറണാകുളം, തൃശ്ശൂര്‍, പാലക്കാട്, മലപ്പുറം, വയനാട് ജില്ലകളിലും ഒറ്റപ്പെട്ട സ്ഥലങ്ങളില്‍ ശക്തമായ മഴയാണ് പ്രവചിക്കുന്നത്. ജാഗ്രതയുടെ ഭാഗമായി ഈ ജില്ലകളിലും യെല്ലോ അലര്‍ട്ട് പ്രഖ്യാപിച്ചു. 24 മണിക്കൂറില്‍ 64.5 മില്ലിമീറ്റര്‍ മുതല്‍ 115.5 മില്ലിമീറ്റര്‍ വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് അര്‍ത്ഥമാക്കുന്നത്.

മന്നാര്‍ കടലിടുക്കിനും സമീപ തെക്കന്‍ തമിഴ്നാട് തീരപ്രദേശങ്ങള്‍ക്കും മുകളില്‍, സമുദ്രനിരപ്പില്‍ നിന്ന് 0.9 കിലോമീറ്റര്‍ ഉയരത്തിലാണ് ചക്രവാതച്ചുഴി നിലനില്‍ക്കുന്നത്. ഈ ചക്രവാതച്ചുഴിയില്‍ നിന്ന് വടക്കന്‍ തമിഴ്നാടും വടക്കന്‍ കേരളവും വഴി, മധ്യ കിഴക്കന്‍ അറബിക്കടല്‍ വരെ 0.9 കിലോമീറ്റര്‍ ഉയരത്തില്‍ ന്യൂനമര്‍ദ്ദപാത്തിയും നിലനില്‍ക്കുന്നുണ്ട്. ഇതിന്റെയെല്ലാം സ്വാധീനഫലമായാണ് മഴ ലഭിക്കുന്നതെന്നും മുന്നറിയിപ്പില്‍ പറയുന്നു.

കെഎസ്ആർടിസി ടെർമിനലുകളിൽ നാപ്കിൻ വെൻഡിംഗ് മെഷീനും ഇൻസിനറേറ്ററും; പ്രവർത്തനോദ്ഘാടനം നാളെ

0

സംസ്ഥാനത്തെ 14 കെഎസ്ആർടിസി ബസ് ടെർമിനലുകളിൽ സ്ഥാപിക്കുന്ന സാനിറ്ററി നാപ്കിൻ വെൻഡിംഗ് മെഷീനുകളുടെയും ഇൻസിനറേറ്ററുകളുടെയും സംസ്ഥാനതല പ്രവർത്തനോദ്ഘാടനം ഒക്ടോബർ 6 വൈകിട്ട് 4.30ന് വനിതാശിശു വികസന വകുപ്പ് മന്ത്രി ബിന്ദു കൃഷ്ണ നിർവഹിക്കും. തിരുവനന്തപുരം തമ്പാനൂർ കെഎസ്ആർടിസി ബസ് ടെർമിനലിൽ നടക്കുന്ന ചടങ്ങിൽ ഗതാഗത വകുപ്പ് മന്ത്രി സി പി ജോൺ അധ്യക്ഷനാകും. മേയർ വി വി രാജേഷ് മുഖ്യാതിഥിയാകും. ഗതാഗത വകുപ്പ് സെക്രട്ടറി അനുപമ ടി വി, വനിതാ ശിശു വികസന വകുപ്പ് സ്‌പെഷ്യൽ സെക്രട്ടറി ഷീബാ ജോർജ്ജ്, ഡയറക്ടർ വി വിഘ്‌നേശ്വരി, കെഎസ്ആർടിസി സിഎംഡി ഡോ. പി എസ് പ്രമോജ് ശങ്കർ, കൗൺസിലർ ആർ ഹരികുമാർ എന്നിവർ പങ്കെടുക്കും.വനിതാ ശിശു വികസന വകുപ്പിന്റെ ‘Women On the Move & Menstrual Needs’ പദ്ധതിയുടെ ഭാഗമായിട്ടാണ് കെഎസ്ആർടിസി ബസ് ടെർമിനലുകളിൽ നാപ്കിൻ വെൻഡിംഗ് മെഷീനുകളും ഇൻസിനറേറ്ററുകളും സ്ഥാപിക്കുന്നത്.