spot_img
Friday, November 20, 2026
Home Blog Page 42

ഓൺലൈൻ തട്ടിപ്പുകൾക്കെതിരെ അതീവ ജാഗ്രത വേണം: കേരള പോലീസ് മുന്നറിയിപ്പ്​

0

തിരുവനന്തപുരം: സംസ്ഥാനത്ത് ഓൺലൈൻ തട്ടിപ്പുകൾ വർദ്ധിച്ചു വരുന്ന സാഹചര്യത്തിൽ ഇന്റർനെറ്റും ഡിജിറ്റൽ സേവനങ്ങളും ഉപയോഗിക്കുമ്പോൾ പൊതുജനങ്ങൾ അതീവ ജാഗ്രത പാലിക്കണമെന്ന് കേരള പോലീസ് മുന്നറിയിപ്പ് നൽകി. ചെറിയൊരു ശ്രദ്ധക്കുറവ് പോലും വലിയ സാമ്പത്തിക നഷ്ടത്തിനോ വ്യക്തിഗത വിവരങ്ങൾ ചോരുന്നതിനോ കാരണമായേക്കാമെന്ന് പോലീസ് വ്യക്തമാക്കുന്നു.

ഡിജിറ്റൽ യുഗത്തിൽ സുരക്ഷിതമായിരിക്കാൻ പൊതുജനങ്ങൾ താഴെ പറയുന്ന മുൻകരുതലുകൾ നിർബന്ധമായും പാലിക്കണം:​ലിങ്കുകളിൽ ക്ലിക്ക് ചെയ്യരുത്: അറിയാത്ത സ്രോതസ്സുകളിൽ നിന്നും വാട്ട്‌സ്ആപ്പ്, എസ്.എം.എസ്, ഇമെയിൽ എന്നിവ വഴി ലഭിക്കുന്ന സംശയാസ്പദമായ ലിങ്കുകളിൽ ഒരു കാരണവശാലും ക്ലിക്ക് ചെയ്യരുത്.​രഹസ്യ വിവരങ്ങൾ പങ്കുവെക്കരുത്: ബാങ്ക് അക്കൗണ്ട് വിവരങ്ങൾ, എ.ടി.എം പിൻ, സി.വി.വി (CVV), ഒ.ടി.പി (OTP) എന്നിവ ബാങ്ക് ജീവനക്കാരാണെന്ന് പറഞ്ഞ് വിളിക്കുന്നവരുമായി പോലും പങ്കുവെക്കരുത്. ബാങ്കുകൾ ഒരിക്കലും ഫോണിലൂടെയോ സന്ദേശങ്ങളിലൂടെയോ ഇത്തരം വിവരങ്ങൾ ചോദിക്കാറില്ല.​വ്യാജ ആപ്പുകൾ ഒഴിവാക്കുക: ഗൂഗിൾ പ്ലേ സ്റ്റോർ, ആപ്പിൾ ആപ്പ് സ്റ്റോർ എന്നിവയ്ക്ക് പുറത്തുനിന്നുള്ള അപരിചിതമായ ആപ്പുകളോ ഫയലുകളോ ഫോണിൽ ഇൻസ്റ്റാൾ ചെയ്യരുത്. ഫോണിന്റെ പൂർണ്ണ നിയന്ത്രണം തട്ടിപ്പുകാർക്ക് നൽകുന്ന റിമോട്ട് ആക്സസ് ആപ്ലിക്കേഷനുകൾ ഇൻസ്റ്റാൾ ചെയ്യുന്നത് വലിയ അപകടമുണ്ടാക്കും.​വ്യാജ വാഗ്ദാനങ്ങളിൽ വീഴരുത്: സമ്മാനങ്ങൾ ലഭിച്ചെന്നോ, പാർട്ട് ടൈം ജോലിയിലൂടെ ഉയർന്ന വരുമാനം നേടാമെന്നോ ഉള്ള വ്യാജ വാഗ്ദാനങ്ങളിൽ കബളിപ്പിക്കപ്പെടരുത്.​’ഡിജിറ്റൽ അറസ്റ്റ്’ തട്ടിപ്പ്: പോലീസിന്റെയോ മറ്റ് കേന്ദ്ര അന്വേഷണ ഏജൻസികളുടെയോ പേരിൽ ഭീഷണിപ്പെടുത്തി പണം തട്ടുന്ന ‘ഡിജിറ്റൽ അറസ്റ്റ്’ സന്ദേശങ്ങൾ കണ്ടാൽ പരിഭ്രാന്തരാകാതെ ഉടൻ തന്നെ പോലീസിനെ വിവരമറിയിക്കുക.

തട്ടിപ്പിനിരയായാൽ ചെയ്യേണ്ടത്:​ഏതെങ്കിലും തരത്തിലുള്ള സൈബർ സാമ്പത്തിക തട്ടിപ്പിനിരയായാൽ ആദ്യത്തെ ‘ഗോൾഡൻ ഹവറി’ൽ (Golden Hour) തന്നെ പരാതിപ്പെടാൻ ശ്രദ്ധിക്കുക. ഇതിനായി 1930 എന്ന സൈബർ ഹെൽപ്പ് ലൈൻ നമ്പറിലോ www.cybercrime.gov.in എന്ന ഔദ്യോഗിക വെബ്സൈറ്റിലോ ഉടൻ തന്നെ പരാതി രജിസ്റ്റർ ചെയ്യേണ്ടതാണ്.

ഇതര സംസ്ഥാനക്കാരായ കുട്ടികളോട് അധ്യാപിക വിവേചനപരമായി പെരുമാറിയെന്ന പരാതി: ബാലാവകാശ കമ്മീഷന്‍ കേസെടുത്തു.

0

പാലക്കാട്: കഞ്ചിക്കോട് ഗവണ്‍മെന്റ് വൊക്കേഷണല്‍ ഹയര്‍ സെക്കന്‍ഡറി സ്‌കൂളില്‍ അതിഥി തൊഴിലാളികളുടെ മക്കളോട് അധ്യാപിക വിവേചനപരമായി പെരുമാറുകയും ഇതേ തുടര്‍ന്ന് ആറാം ക്ലാസ് വിദ്യാര്‍ത്ഥികളായ ഇരട്ട സഹോദരങ്ങള്‍ പഠനം നിര്‍ത്തുകയും ചെയ്തുവെന്നപരാതിയില്‍ ഇടപെട്ട് സംസ്ഥാന ബാലാവകാശ കമ്മീഷന്‍. സംഭവത്തില്‍ ബാലാവകാശ കമ്മീഷന്‍ സ്വമേധയാ കേസെടുത്തു. ഇതര സംസ്ഥാനക്കാരായ കുട്ടികളോട് അധ്യാപിക വിവേചനപരമായി പെരുമാറിയതുമായി ബന്ധപ്പെട്ട വാര്‍ത്ത റിപ്പോര്‍ട്ടറായിരുന്നു പുറത്തുവിട്ടത്.ആറാം ക്ലാസ് വിദ്യാര്‍ത്ഥികളായ ചന്ദന്‍ കുമാറും കുന്ദന്‍ കുമാറുമാണ് പഠനം നിര്‍ത്തിയത്. ഈ അധ്യയനവര്‍ഷം സ്‌കൂളില്‍ പ്രവേശനം നേടിയ സഹോദരങ്ങളെ ക്ലാസില്‍നിന്ന് പുറത്താക്കിയെന്നും, ഇതര സംസ്ഥാനക്കാരെ സ്‌കൂളില്‍ പഠിപ്പിക്കില്ലെന്നും അധ്യാപിക പറഞ്ഞതായായിരുന്നു ആരോപണം. കുട്ടികളുടെ അമ്മ ചോട്ടു മഞ്ചിയാണ് ആരോപണം ഉന്നയിച്ച് രംഗത്തെത്തിയത്. മറ്റ് വിദ്യാര്‍ഥികളുടെ മുന്നില്‍വച്ച് അധ്യാപിക കുട്ടികളെ അധിക്ഷേപിച്ചെന്നും ഇത് കുട്ടികളെ മാനസികമായി ബാധിച്ചതായും പരാതിയില്‍ ആരോപിച്ചിരുന്നു.

അവയവമാറ്റ ആശുപത്രിക്ക് വേഗതയേറി ഉടൻ പൂർത്തിയാകും: മുഖ്യമന്ത്രി.

0

കോഴിക്കോട് : കോഴിക്കോട്ട് ഒരുങ്ങുന്ന കേരള ഇൻസ്റ്റിറ്റ്യൂട്ട് ഓഫ് ഓർഗൻ ആൻഡ് ടിഷ്യൂ ട്രാൻസ്പ്ലാന്റിന്റെ നിർമ്മാണത്തിന് വേഗം കൂട്ടി സർക്കാർ. 30 മാസത്തിനകം അവയവമാറ്റ ആശുപത്രിയുടെ നിർമാണം പൂർത്തിയാക്കാനാണ് മുഖ്യമന്ത്രി വി.ഡി. സതീശന്റെ നിർദ്ദേശം. ടെൻഡർ നടപടികൾ പൂർത്തിയാക്കി വർക്ക് ഓർഡർ നൽകിയതോടെ നിർമ്മാണം ഉടൻ ആരംഭിക്കാനുള്ള തയ്യാറെടുപ്പിലാണ് അധികൃതർ. ചേവായൂർ ഗോൾഫ് ലിങ്ക് റോഡിലെ 20 ഏക്കർ സ്ഥലത്താണ് അത്യാധുനിക സൗകര്യങ്ങളോടെ ആശുപത്രി സമുച്ചയം ഒരുങ്ങുന്നത്. അവയവമാറ്റ ശസ്ത്രക്രിയയുമായി ബന്ധപ്പെട്ട മുഴുവൻ സേവനങ്ങളും ഒരിടത്ത് ലഭ്യമാക്കുകയാണ് ലക്ഷ്യം. ഇതോടെ നിലവിൽ സ്വകാര്യ ആശുപത്രികളിൽ ഉയർന്ന ചെലവിൽ ലഭിക്കുന്ന അവയവമാറ്റ ചികിത്സയുടെ ചെലവ് മൂന്നിലൊന്നായി കുറയ്ക്കാൻ കഴിയുമെന്നാണ് പ്രതീക്ഷ. 500ലേറെ കിടക്കകളുള്ള ആശുപത്രിയാണ് വിഭാവനം ചെയ്തിരിക്കുന്നത്. ആദ്യഘട്ടത്തിൽ 350 കിടക്കകളും 10 ഓപ്പറേഷൻ തിയേറ്ററുകളും ഒരുക്കും. ഐ.സി.യു, എച്ച്.ഡി.യു, ഡയാലിസിസ് സെന്റർ എന്നിവയ്ക്കുപുറമെ 14 സ്പെഷ്യാലിറ്റി വിഭാഗങ്ങളും പ്രവർത്തിക്കും. ട്രാൻസ്പ്ലാന്റേഷൻ മേഖലയിലെ ഡോക്ടർമാർക്കും പാരാമെഡിക്കൽ ജീവനക്കാർക്കുമുള്ള പരിശീലന കേന്ദ്രമായും ഗവേഷണ സ്ഥാപനമായും ആശുപത്രി പ്രവർത്തിക്കും.കോർണിയ, വൃക്ക, കരൾ, ഹൃദയം, ശ്വാസകോശം, മജ്ജ തുടങ്ങിയവയുടെ മാറ്റിവയ്ക്കൽ ശസ്ത്രക്രിയകൾ നടത്താനുള്ള സൗകര്യങ്ങളാണ് ഇവിടെ ഒരുക്കുന്നത്. വർഷം 1100 കോർണിയ, 520 വൃക്ക, 50 ഹൃദയം, 40 ശ്വാസകോശം, 120 മജ്ജ മാറ്റിവയ്ക്കൽ ശസ്ത്രക്രിയകൾ നടത്താനാണ് ലക്ഷ്യമിടുന്നത്. ᴋᴏᴢʜɪᴋᴏᴅᴇ ʟɪᴠᴇസ്ഥിരം ആശുപത്രിയുടെ നിർമാണം പൂർത്തിയാകുന്നതിന് മുമ്പ് അവയവമാറ്റ ചികിത്സ ആരംഭിക്കുന്നതിനായി കോഴിക്കോട് മെഡിക്കൽ കോളേജിലും താത്കാലിക ട്രാൻസ്പ്ലാന്റ് സെന്റർ ഒരുക്കുന്നുണ്ട്. പി.എം.എസ്.എസ് ബ്ലോക്കിലെ ഒന്നാം നിലയിലും മൂന്നാം നിലയിലുമാണ് സൗകര്യങ്ങൾ സജ്ജമാക്കുന്നത്. 20 കിടക്കകളും രണ്ട് ഓപ്പറേഷൻ തിയേറ്ററുകളും രണ്ട് ഐ.സി.യു സൗകര്യങ്ങളും ഇവിടെ ഒരുക്കും. ആദ്യഘട്ടത്തിൽ കരൾ, വൃക്ക മാറ്റിവയ്ക്കൽ ശസ്ത്രക്രിയകൾക്കാണ് സൗകര്യമൊരുക്കുക. ചേവായൂരിലെ പ്രധാന ആശുപത്രി യാഥാർldഥ്യമാകുന്നതോടെ അവയവമാറ്റ ചികിത്സയ്ക്കൊപ്പം പരിശീലനവും ഗവേഷണവും ഉൾപ്പെടുന്ന സമഗ്ര കേന്ദ്രമായി സ്ഥാപനത്തെ വികസിപ്പിക്കാനാണ് സർക്കാർ ലക്ഷ്യമിടുന്നത്.

ഏഷ്യന്‍ ഗെയിംസിന് വിരാമം; 85 മെഡലുകളുമായി ഇന്ത്യ, നാലാം സ്ഥാനം.

0

ഐച്ചി-നഗോയ : രണ്ടാഴ്ച നീണ്ടുനിന്ന ഏഷ്യന്‍ ഗെയിംസ് കായിക മാമാങ്കത്തിന് സുവര്‍ണ്ണ തിളക്കത്തോടെ ഇന്ത്യ വിരാമമിട്ടു. ഏഷ്യന്‍ ഗെയിംസിന്റെ അവസാന ദിനത്തില്‍ മാത്രം 5 സ്വര്‍ണവും 2 വെള്ളിയും 2 വെങ്കലവും ഉള്‍പ്പെടെ 9 മെഡലുകളാണ് ഇന്ത്യന്‍ താരങ്ങള്‍ അടിച്ചെടുത്തത്. ഇതോടെ 21 സ്വര്‍ണവും 27 വെള്ളിയും 37 വെങ്കലവും അടക്കം ആകെ 85 മെഡലുകളുമായി ഇന്ത്യ മെഡല്‍ പട്ടികയില്‍ ഉസ്‌ബെക്കിസ്ഥാനെ മറികടന്ന് നാലാം സ്ഥാനത്തെത്തി ചരിത്രം കുറിച്ചു. പുരുഷ ഹോക്കി ഫൈനലില്‍ മലേഷ്യയെ ഒന്നിനെതിരെ അഞ്ച് ഗോളുകള്‍ക്ക് (5-1) തകര്‍ത്ത് ഇന്ത്യ സ്വര്‍ണം നിലനിര്‍ത്തി. ഈ വിജയത്തോടെ 2028-ലെ ലോസ് ആഞ്ചലസ് ഒളിംപിക്സിനും ടീം യോഗ്യത നേടി. കബഡിക്കും ക്രിക്കറ്റിനും ശേഷം ഏഷ്യന്‍ ഗെയിംസിന്റെ ഒരേ പതിപ്പില്‍ പുരുഷ-വനിതാ ടീമുകള്‍ ഒരുമിച്ച് സ്വര്‍ണം നേടുന്ന (ഇരട്ട സ്വര്‍ണം) മൂന്നാമത്തെ കായിക ഇനമായി ഇതോടെ ഹോക്കി മാറി.ആവേശകരമായ പുരുഷ ക്രിക്കറ്റ് ഫൈനലില്‍ ചിരവൈരികളായ പാകിസ്താനെ 19 റണ്‍സിന് പരാജയപ്പെടുത്തി ഇന്ത്യ സ്വര്‍ണം സ്വന്തമാക്കി. വനിതാ ടീമിന്റെ സ്വര്‍ണനേട്ടത്തിന് പിന്നാലെ പുരുഷന്മാരും ചാംപ്യന്മാരായതോടെ ക്രിക്കറ്റിലും ഇന്ത്യ ഇരട്ട സ്വര്‍ണം പൂര്‍ത്തിയാക്കി. വനിതകളുടെ വ്യക്തിഗത റിക്കര്‍വ് അമ്പെയ്ത്തില്‍ സ്വര്‍ണം നേടുന്ന ആദ്യ ഇന്ത്യന്‍ വനിതയായി കുങ്കും മൊഹോദ് ചരിത്രം കുറിച്ചു. കടുത്ത സമ്മര്‍ദ്ദത്തിനൊടുവില്‍ ഷൂട്ട്-ഓഫിലാണ് കുങ്കും സ്വര്‍ണം എറിഞ്ഞിട്ടത്. ഈ നേട്ടത്തോടെ 2028 ഒളിംപിക്സ് ക്വാട്ടയും ഇന്ത്യ സ്വന്തമാക്കി. ഇതേ ഇനത്തില്‍ പുരുഷന്മാരുടെ വിഭാഗത്തില്‍ നീരജ് ചൗഹാന്‍ വെങ്കലം നേടി.ഗോള്‍ഫ് മൈതാനത്ത് നിന്ന് പ്രണവി ഉറസ് ഇന്ത്യയ്ക്കായി ചരിത്രത്തിലെ ആദ്യ വ്യക്തിഗത സ്വര്‍ണം നേടി. കൂടാതെ പ്രണവി, അതിഥി അശോക്, ദീക്ഷ ദാഗര്‍ എന്നിവരടങ്ങിയ സംഘം വനിതാ ടീം ഇനത്തില്‍ ഇന്ത്യയ്ക്കായി വെള്ളിയും കരസ്ഥമാക്കി. പുരുഷന്മാരുടെ 57 കിലോഗ്രാം ഫ്രീസ്‌റ്റൈല്‍ ഗുസ്തിയില്‍ അമന്‍ സെഹ്രാവത് സ്വര്‍ണം നേടി. മല്‍സരത്തിന്റെ അവസാന മിനിറ്റ് വരെ 7-6 ന് പിന്നിലായിരുന്ന അമന്‍, അവസാന നിമിഷങ്ങളില്‍ അഞ്ച് പോയിന്റുകള്‍ തുടര്‍ച്ചയായി നേടി തകര്‍പ്പന്‍ തിരിച്ചുവരവോടെയാണ് സ്വര്‍ണം പിടിച്ചെടുത്തത്. ഗുസ്തിയില്‍ അന്തിം പംഗല്‍ വെള്ളിയും ദീപക് പുനിയ വെങ്കലവും നേടി.

വീണ്ടും പനി കിടക്കയിൽ കേരളം; സംസ്ഥാനത്ത് പകർച്ചവ്യാധി വ്യാപനം രൂക്ഷം.

0

മലപ്പുറം: അസാധാരണമായ കാലാവസ്ഥാ മാറ്റങ്ങൾക്കിടെ സംസ്ഥാനത്ത് പകർച്ചവ്യാധി വ്യാപനം രൂക്ഷം. ഇന്നലെ മാത്രം 7740 പേരാണ് പനി ബാധിച്ച് ചികിത്സ നേടിയത്. മലപ്പുറം ജില്ലയിലാണ് പനികണക്ക് കൂടുതൽ. ഇൻഫ്ലുവൻസ വ്യാപനവും തുടരുകയാണ്. അത്യാവശ്യ മരുന്നുകളുടെ സ്റ്റോക്ക് സർക്കാർ ആശുപത്രിയിൽ കുറവെന്നതും സ്ഥിതി വഷളാക്കുന്നു.1345 പേർക്കാണ് ഇന്നലെ തിരുവനന്തപുരത്ത് പനി ബാധിച്ചത്. ഇന്നലെ മാത്രം 34 പേർക്ക് ഡെങ്കിപ്പനി സ്ഥിരീകരിച്ചു. ഡെങ്കിപ്പനി സംശയത്തെ തുടർന്ന് 107 പേർ നിരീക്ഷണത്തിലാണ്.10 പേർക്ക് എലിപ്പനിയും 5 പേർക്ക് മലേറിയയും സ്ഥിരീകരിച്ചു. രണ്ട് ഷിഗല്ല കേസുകളും 24 മഞ്ഞപ്പിത്ത കേസുകളുമുണ്ട്. ഈ വർഷം സംസ്ഥാനത്ത് ഏറ്റവും കൂടുതൽ മരണത്തിനിടയാക്കിയ ഇൻഫ്ലുവൻസ 39 പേർക്കാണ് നിലവിൽ സ്ഥിരീകരിച്ചിട്ടുള്ളത്. ഇൻഫ്ലുവൻസ വൈറസ് മൂലം ശ്വാസകോശത്തെയും തൊണ്ടയും ബാധിക്കുന്ന പകർച്ചവ്യാധിയാണിത്.മലപ്പുറം ജില്ലയിലാണ് പനിബാധിതർ കൂടുതലുള്ളത്.തിരുവനന്തപുരം, എറണാകുളം, തൃശൂർ, പാലക്കാട്, കോഴിക്കോട്, കാസർഗോഡ് ജില്ലകളിൽ വിവിധതരം പനി ബാധിച്ച് ഒരു ദിവസം ചികിത്സ തേടുന്നത് അഞ്ഞൂറിലധികം ആളുകൾ. മഴയും കാലാവസ്ഥ മാറ്റവുമാണ് പകർച്ചവ്യാധി വ്യാപനത്തിന് കാരണമെന്നാണ് ആരോഗ്യവകുപ്പ് വിലയിരുത്തുന്നത്.ശരീരവേദന, ക്ഷീണം തുടങ്ങിയ ലക്ഷണങ്ങൾ അനുഭവപ്പെടുന്നവർ സ്വയം ചികിത്സ തേടാതെ ആരോഗ്യപ്രവർത്തകരുടെ നിർദേശപ്രകാരം പരിശോധനയും ചികിത്സയും തേടണമെന്നാണ് വിദഗ്ധരുടെ നിർദേശം.

സംസ്ഥാനത്ത് മഴ മുന്നറിയിപ്പില്‍ മാറ്റം; ഇന്ന് ഏഴ് ജില്ലകളില്‍ യെല്ലോ അലേര്‍ട്ട്

0

തിരുവനന്തപുരം: സംസ്ഥാനത്ത് മഴ മുന്നറിയിപ്പില്‍ മാറ്റം. ഇന്ന് മുതല്‍ അടുത്ത രണ്ടുദിവസം ശക്തമായ മഴയ്ക്ക് സാധ്യതയെന്നാണ് കേന്ദ്രകാലാവസ്ഥാ വകുപ്പിന്‌റെ മുന്നറിയിപ്പ്. ഇന്ന് ഏഴ് ജില്ലകളില്‍ യെല്ലോ അലേര്‍ട്ട് പ്രഖ്യാപിച്ചിട്ടുണ്ട്. പത്തനംതിട്ട, കോട്ടയം, എറണാകുളം, ഇടുക്കി, വയനാട്, കോഴിക്കോട്, മലപ്പുറം ജില്ലകളിലാണ് യെല്ലോ അലേര്‍ട്ട്. ഇടിമിന്നലോട് കൂടിയ മഴയ്ക്കാണ് സാധ്യത. നാളെയും മറ്റന്നാളും ആറ് ജില്ലകളില്‍ യെല്ലോ അലേര്‍ട്ടാണ്. നാളെ കാസര്‍കോട്, കണ്ണൂര്‍, വയനാട്, മലപ്പുറം, ഇടുക്കി, പത്തനംതിട്ട ജില്ലകളില്‍ യെല്ലോ അലേര്‍ട്ടാണ്. മറ്റന്നാള്‍ വയനാട്, മലപ്പുറം, പാലക്കാട്, തൃശൂര്‍, എറണാകുളം, ഇടുക്കി ജില്ലകളിലും യെല്ലോ അലേര്‍ട്ട് പ്രഖ്യാപിച്ചിട്ടുണ്ട്.കേരളത്തിൽ ഒറ്റപ്പെട്ടയിടങ്ങളിൽ ഇന്ന് മുതൽ 06/10/2026 വരെ ഇടിമിന്നലോട് കൂടിയ മഴയ്ക്കും മണിക്കൂറിൽ 40 – 50 കിലോമീറ്റർ വരെ വേഗതയിൽ ശക്തമായ കാറ്റിനും, 07/10/2026, 08/10/2026 ന് ഒറ്റപ്പെട്ടയിടങ്ങളിൽ ഇടിമിന്നലോട് കൂടിയ മഴയ്ക്കും മണിക്കൂറിൽ 30 – 40 കിലോമീറ്റർ വരെ വേഗതയിൽ ശക്തമായ കാറ്റിനും സാധ്യതയുണ്ടെന്നും കേന്ദ്ര കാലാവസ്ഥാ വകുപ്പ് അറിയിച്ചു.

അമ്പതാമത് വയലാര്‍ അവാര്‍ഡ് ആര്‍ രാജശ്രീയുടെ ആത്രേയകത്തിന്

0

തിരുവനന്തപുരം: അമ്പതാമത് വയലാര്‍ അവാര്‍ഡ് ആര്‍ രാജശ്രീയുടെ ആത്രേയകം നോവലിന്. ഒരു ലക്ഷം രൂപയും ശില്‍പവും പ്രശസ്തി പത്രവുമുള്‍പ്പെടുന്നതാണ് പുരസ്‌കാരം. ഒ വി ഉഷ, സുഭാഷ് ചന്ദ്രന്‍, വി വിജയകുമാര്‍ എന്നിവരാണ് അവാര്‍ഡ് നിര്‍ണയ ജൂറിയില്‍ ഉണ്ടായിരുന്നത്. വയലാര്‍ രാമവര്‍മ്മ മെമ്മോറിയല്‍ ട്രസ്റ്റാണ് അവര്‍ഡ് പ്രഖ്യാപിച്ചത്.സമകാലിക സാഹിത്യത്തില്‍ ഏറ്റവും കൂടുതല്‍ ചര്‍ച്ച ചെയ്യപ്പെട്ട നോവലുകളില്‍ ഒന്നായിരുന്നു ആത്രേയകം. പുരസ്‌കാര നേട്ടത്തില്‍ ഒരുപാട് സന്തോഷമെന്ന് ആര്‍ രാജശ്രീ പ്രതികരിച്ചു. എഴുത്ത് നിര്‍ത്തിയിട്ട് പിന്നീട് തിരിച്ചുവന്ന ഒരാളാണ് താന്‍, തന്നേ പോലുള്ളവര്‍ക്ക് രണ്ടാമൂഴം ഉണ്ടെന്ന് വ്യക്തമാക്കുന്നതാണ് ഈ പുരസ്‌കാരമെന്നും ആര്‍ രാജശ്രീ റിപ്പോര്‍ട്ടറിനോട് പറഞ്ഞു.കണ്ണൂര്‍ ജില്ലയിലെ പറശ്ശിനിക്കടവില്‍ ജനിച്ച ആര്‍ രാജശ്രീ ‘കല്യാണിയെന്നും ദാക്ഷായിണിയെന്നും പേരായ രണ്ട് സ്ത്രീകളുടെ കത’ എന്ന നോവലിലൂടെയാണ് ശ്രദ്ധേയയായത്. ഈ നോവലിന് 2021-ലെ കേരള സാഹിത്യ അക്കാദമി പുരസ്‌കാരം ലഭിച്ചു. നായികാ നിര്‍മിതി, വഴിയും പൊരുളും, അപസര്‍പ്പകാഖ്യാനങ്ങള്‍: ഭാവനയും രാഷ്ട്രീയവും, കൃഷ്ണനുവേണ്ടിയുണ്ടായ പെണ്ണുങ്ങള്‍ എന്നിവയാണ് മറ്റ് പ്രധാന കൃതികള്‍. ഈ മാസം 27ന് തിരുവനന്തപുരം നിശാഗന്ധി ഓഡിറ്റോറിയത്തില്‍ വെച്ച് നടക്കുന്ന ചടങ്ങില്‍ മുഖ്യമന്ത്രി വി ഡി സതീശന്‍ പുരസ്‌കാരം സമര്‍പ്പിക്കും.

കേരളത്തിൽ വീണ്ടും മഴ ശക്തമാകുന്നു.

0

സംസ്ഥനത്ത് വരും ദിവസങ്ങളില്‍ ശക്തമായ മഴയ്ക്ക് സാധ്യതയെന്ന് കേന്ദ്ര കാലാവസ്ഥാ വകുപ്പ്. ഇന്ന് മുതല്‍ ചൊവ്വാഴ്ച വരെ ഒക്ടോബര്‍ നാല് മുതല്‍ ഏഴ് വരെ കേരളത്തില്‍ പരക്കെ ശക്തമായ മഴയ്ക്ക് സാധ്യതയുണ്ടെന്നാണ് മുന്നറിയിപ്പ്. ഇന്ന് നാല് ജില്ലകളില്‍ യെല്ലോ അലേര്‍ട്ടാണ്. ഇടുക്കി, എറണാകുളം, കോട്ടയം, പത്തനംതിട്ട ജില്ലകളിലാണ് യെല്ലോ മുന്നറിയിപ്പ്. മണിക്കൂറില്‍ 30 മുതല്‍ 40 കിലോമീറ്റര്‍ വരെ വേഗതയില്‍ വീശിയടിച്ചേക്കാവുന്ന കാറ്റിനും ഇടിമിന്നലിനും സാധ്യതയുണ്ട്.കേരളത്തില്‍ വ്യാപകമായും ലക്ഷദ്വീപില്‍ ചില സ്ഥലങ്ങളിലും ഇടിയോടുകൂടിയ മഴയ്ക്ക് സാധ്യയുണ്ട്. അടുത്ത മൂന്ന് മണിക്കൂറില്‍ കേരളത്തിലെ തൃശൂര്‍ ജില്ലയില്‍ ഒറ്റപ്പെട്ടയിടങ്ങളില്‍ ഇടിമിന്നലോട് കൂടിയ നേരിയ/ഇടത്തരം മഴയ്ക്കും മണിക്കൂറില്‍ 40 കിലോമീറ്റര്‍ വരെ വേഗതയില്‍ ശക്തമായ കാറ്റിനും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.ചൊവ്വാഴ്ച വരെ മഴ തുടരും. നാളെ മലപ്പുറം, ഇടുക്കി, പത്തനംതിട്ട ജില്ലകളില്‍ മഴ മുന്നറിയിപ്പ് നല്‍കിയിട്ടുണ്ട്. ചൊവ്വാഴ്ച ഇടുക്കി, പാലക്കാട്, വയനാട് ജില്ലകളിലും യെല്ലോ മുന്നറിയിപ്പുണ്ട്. ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്. 24 മണിക്കൂറില്‍ 64.5 മില്ലിമീറ്ററില്‍ മുതല്‍ 115.5 മില്ലിമീറ്റര്‍ വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് കേന്ദ്ര കാലാവസ്ഥ വകുപ്പ് അര്‍ത്ഥമാക്കുന്നത്.

മിൽമയിലെ അഴിമതി; അന്വേഷണത്തിന് ഉത്തരവിട്ട് ക്ഷീരവികസനവകുപ്പ് ഡയറക്ടർ

0

കോഴിക്കോട്: മലബാർ മേഖല സഹകരണ ക്ഷീരോൽപാദക യൂണിയൻ ക്രമക്കേടുകളും ക്രമവിരുദ്ധ പ്രവർത്തനങ്ങളും നടന്നതായ ആരോപണത്തിൽ ക്ഷീര വികസനവകുപ്പ് ഡയറക്ടർ അന്വേഷണത്തിന് ഉത്തരവിട്ടു.ജോ. ഡയറക്ടർ ജയസുജീഷ്, ഡെപ്യൂട്ടി ഡയറക്ടർമാരായ ഒ.സജിനി, ഫെമി വി. മാത്യു, അസി. ഡയറക്ടർമാരായ സിജോൺ ജോൺസൺ, എം.കെ. സ്മിത എന്നിവരടങ്ങിയ സംഘമാണ് അന്വേഷിക്കുക. വൻതുക ചെലവഴിച്ച് പുറമെ നിന്നുള്ള കമ്പനികൾ നിർമിക്കുന്ന ആയുർവേദ, ഹോമിയോ മരുന്നുകൾ മതിയായ ലൈസൻസ് ഇല്ലാതെ മലബാർ മേഖല സഹകരണ ക്ഷീരോൽപാദക ലേബൽ പതിപ്പിച്ച് മലബാർ റൂറൽ ഡെവലപ്മെന്റ് ഫൗണ്ടേഷൻ മുഖേന ക്ഷീരസംഘങ്ങളിലൂടെ അനധികൃതായി വിൽപന നടത്തി മലബാർ റൂറൽ ഡവലപ്മെന്റ് ഫൗണ്ടേഷനും ക്ഷീരസംഘങ്ങൾക്കും വലിയ നഷ്ടം ഉണ്ടാക്കി.ഫൗണ്ടേഷൻ ധനസഹായം നൽകിയത് സംബന്ധിച്ച്, 2022ന് ശേഷം ഫൗണ്ടേഷന്റെ വാർഷിക റിപ്പോർട്ടുകളും ഓഡിറ്റ് ചെയ്ത കണക്കുകളും യൂനിയൻ പൊതുയോഗത്തിൽ അവതരിപ്പിക്കാത്തതുസംബന്ധിച്ചും കാസർകോട് ഡയറിയിൽ ഗുണമേൻമ ഉറപ്പു വരുത്താതെ മുൻകൂർ പണമടച്ച് സമ്പത്റാവു ദേശ്മുഖ് കോ ഓപറേറ്റീവ് മിൽക് യൂണിയനിൽ നിന്ന് പാൽവാങ്ങിയത് സംബന്ധിച്ചും മലപ്പുറം ഡയറിയുടെ ഉദ്ഘാടനവുമായി ബന്ധപ്പെട്ട ധനദുർവിനിയോഗം സംബന്ധിച്ചും അന്വേഷിക്കണമെന്ന് ഉത്തരവിൽ വ്യക്തമാക്കി.മലപ്പുറം ഡയറിയിൽ നെയ്യ് ഉൾപടെ പാലുൽപന്നങ്ങളുടെ സ്റ്റോക്കിൽ സോഫ്റ്റ് വെയർ എഡിറ്റിങ് അനുവദിച്ച് വിശ്വാസവഞ്ചന , നിയവിരുദ്ധ നിയമനം, 2026 ഫെബ്രുവരി 28ന് പണം അടയ്ക്കാതെ 49,931 ലിറ്റർ പാൽ കടത്ത്, സംബന്ധിച്ചും പത്ത് ലക്ഷം രൂപ ചെലവഴിച്ച് ക്രമവിരുദ്ധമായി പോസ്റ്റൽ സ്റ്റാമ്പ് റിലീസ് ചെയ്തത് തുടങ്ങിയവ അന്വേഷണപരിധിയിൽ വരും.

അധ്യാപകർ ഉൾപ്പെട്ട എം.ഡി.എം.എ കേസ്; മുഖ്യ പ്രതിയെ പിടികൂടാനെത്തിയ പൊലീസ് സംഘത്തിന് നേരെ ആക്രമണം.

0

പേരാമ്പ്ര: വടകര എം.ഡി.എം.എ കേസിലെ പ്രതിയെ പിടികൂടാനെത്തിയ കോഴിക്കോട് റൂറൽ ഡാൻസാഫ് സംഘത്തിന് നേരെ കൂത്താളിയിൽ ആക്രമണം. സംഘത്തിലെ ടി. കെ. ഷോബിത്, എസ്.ഐ. മനോജ്, എ.എസ്.ഐ. ഷാജി, പി. അതുൽ, എസ്. അനൂപ് സെൻ, ലിതിൻ, മിഥുൻ മോഹനൻ, സുനിൽകുമാർ, ലിസ്ന എന്നിവർക്കാണ് പരിക്കേറ്റത്. ശനിയാഴ്ച രാവിലെ 6.30 ഓടെ ചെമ്പോടൻപൊയിലിലെ വീട്ടിലാണ് സംഭവം.വടകര പൊലീസ് സ്റ്റേഷനിൽ രജിസ്റ്റർ ചെയ്ത ക്രൈം നമ്പർ 648/2026 കേസിലെ ഒന്നാം പ്രതിയായ കൂത്താളി സ്വദേശി അനസിനെ (28) കസ്റ്റഡിയിലെടുക്കാനെത്തിയ പൊലീസ് സംഘത്തിനുനേരെയാണ് പ്രതികളും ബന്ധുക്കളും ആക്രമണം നടത്തിയത്.വീട്ടിലെ കിടപ്പുമുറിയിൽനിന്ന് അനസിനെ കസ്റ്റഡിയിലെടുക്കാൻ ശ്രമിക്കുന്നതിനിടെ ഇയാൾ ഇരുമ്പുവടി ഉപയോഗിച്ച് പൊലീസ് ഉദ്യോഗസ്ഥന്റെ നെറ്റിയിൽ അടിച്ച് പരിക്കേൽപ്പിച്ചെന്നാണ് എഫ്.ഐ.ആറിലുള്ളത്. തുടർന്ന്, ഇയാളുടെ സഹോദരൻ ആസിഫ് കമ്പിവടി ഉപയോഗിച്ച് മറ്റൊരു ഉദ്യോഗസ്ഥന്റെ തലക്ക് അടിക്കാൻ ശ്രമിച്ചെങ്കിലും തടയുന്നതിനിടെ കൈക്കും പരിക്കേറ്റു.മറ്റ് ഉദ്യോഗസ്ഥരുടെ സഹായത്തോടെ അനസിനെ ബലപ്രയോഗത്തിലൂടെ കീഴടക്കി ഹാളിലെത്തിച്ചപ്പോൾ ബന്ധുക്കൾ വീണ്ടും പൊലീസ് സംഘത്തെ ആക്രമിക്കുകയും ഔദ്യോഗിക കൃത്യനിർവഹണം തടസ്സപ്പെടുത്തുകയും ചെയ്തതായും എഫ്.ഐ.ആറിൽ വ്യക്തമാക്കുന്നു.ഇതിനിടെ ആസിഫിന്റെ കൈവശമുണ്ടായിരുന്ന ഏകദേശം രണ്ടുവയസ്സുള്ള കുട്ടിയെ ഉയർത്തിപ്പിടിച്ച്, അനസിനെ വിട്ടയച്ചില്ലെങ്കിൽ കുട്ടിയെ നിലത്തിട്ട് കൊല്ലുമെന്ന് ഭീഷണിപ്പെടുത്തിയതായും പരാതിയിലുണ്ട്.ഡാൻസാഫ് അംഗം ഷോബിത് നൽകിയ മൊഴിയുടെ അടിസ്ഥാനത്തിലാണ് പേരാമ്പ്ര പൊലീസ് കേസെടുത്തത്. പേരാമ്പ്ര എസ്.ഐ. മുഹമ്മദ് ബഷീറിനാണ് കേസിന്റെ അന്വേഷണച്ചുമതല.