കണ്ണൂർ :വീടിന് വടക്കുവശത്തെ ക്ഷേത്രത്തിലെ കുലദേവതയെ വണങ്ങി ബ്രാഹ്മണ ആചാരത്തോടെ താലിചാർത്തല്‍. തുടർന്ന് പഞ്ചായത്ത് പ്രസിഡന്റിന്റെയും വാർഡംഗങ്ങളുടെയും നേതൃത്വത്തില്‍ വധൂവരന്മാരെ അനുഗ്രഹിച്ച്‌ മാപ്പിളപ്പാട്ട്.

കണ്ണൂർ വളപട്ടണത്ത് നടന്ന വേറിട്ട കല്യാണത്തിന്റെ ദൃശ്യങ്ങള്‍ സാമൂഹികമാധ്യമങ്ങളില്‍ വൈറലായി.

വളപട്ടണം ഗ്രാമപ്പഞ്ചായത്തംഗവും മുൻ പ്രസിഡന്റുമായ വടക്കെ ഇല്ലം കൂടോത്ത് ലളിതാദേവിയുടെ മകൻ വി.കെ.മനോജിന്റെ മകള്‍ അഞ്ജനയും കോഴിക്കോട് മാങ്കാവ് സ്വദേശി തയ്യില്‍ ഇല്ലത്ത് ഹരിനാഥുമാണ് വിവാഹിതരായത്. ബെംഗളൂരു ഇൻഫോസിസില്‍ സോഫ്റ്റ്വേർ എൻജിനീയറാണ് അഞ്ജന. ഹരിനാഥ് മുംബൈയില്‍ ബാങ്ക് ഉദ്യോഗസ്ഥനും. ‘മതസൗഹാർദത്തിന് മാതൃക’ എന്ന കുറിപ്പോടെയാണ് കല്യാണാഘോഷത്തിന്റെ വീഡിയോ പ്രചരിക്കുന്നത്.

വളപട്ടണത്തെ വീട്ടില്‍ നടന്ന വിവാഹത്തില്‍ പഞ്ചായത്ത് പ്രസിഡന്റ് പി.പി.ഷമീല, വൈസ് പ്രസിഡന്റ് വി.കെ.സി.ജംഷീറ, സ്ഥിരംസമിതി ചെയർമാൻ സമീറ, വാർഡംഗങ്ങളായ മൈമൂനത്ത്, ഖദീജ, രാധിക എന്നിവർ ചേർന്നാണ് വധൂവരന്മാരെ ഇരുത്തി മാപ്പിളപ്പാട്ട് പാടിയത്. നാട്ടുകാരും ബന്ധുക്കളും പാട്ടിനൊപ്പം ചുവടുവെച്ചു. കളരിവാതുക്കല്‍ ക്ഷേത്ര സമുദായസ്ഥാനികൻ കേശവൻ മൂത്ത പിടാരരുടെ നേതൃത്വത്തില്‍ മധുരവിതരണവുമുണ്ടായിരുന്നു. പാട്ട് വൈറലായതില്‍ സന്തോഷമുണ്ടെന്ന് വളപട്ടണം പഞ്ചായത്ത് പ്രസിഡന്റ് പി.പി.ഷമീലയും രണ്ടുതവണ പഞ്ചായത്ത് പ്രസിഡന്റായ റിട്ട. അധ്യാപിക ലളിതാദേവിയും പറഞ്ഞു.

മാനന്തവാടിയില്‍നിന്നും മയക്കുവെടി വെച്ച് പിടികൂടി കര്‍ണാടകയിലെ ബന്ദിപ്പൂരിലെ രാമപുര ആന ക്യാമ്പിലെത്തിച്ച തണ്ണീര്‍ കൊമ്പൻ ചരിഞ്ഞു. ഇന്ന് പുലര്‍ച്ചെയാണ് ദാരുണമായ സംഭവം. തണ്ണീര്‍ കൊമ്പൻ ചരിയാനുണ്ടായ കാരണം വ്യക്തമല്ല. തണ്ണീര്‍ കൊമ്പൻ ചരിഞ്ഞതായി കര്‍ണാടക പ്രിന്‍സിപ്പില്‍ ഫോറസ്റ്റ് കണ്‍സര്‍വേറ്റര്‍ സ്ഥിരീകരിച്ചു. ബന്ദിപ്പൂരിലെത്തിച്ചശേഷമാണ് ആന ചരിഞ്ഞത്. ആനയ്ക്ക് എന്താണ് സംഭവിച്ചതെന്ന് പരിശോധിക്കാൻ പ്രത്യേകസംഘത്തെ നിയോഗിച്ചു.വെറ്ററിനറി സർജൻമാരുടെ സംഘം ഉടൻ ബന്ദിപ്പൂരിലെത്തും. ഇന്ന് തന്നെ ആനയുടെ പോസ്റ്റ്മോര്ടട്ടം നടത്തും. 20 ദിവസത്തിനിടെ ആന രണ്ടു തവണ മയക്കുവെടി ദൗത്യത്തിന് വിധേയമായിരുന്നു. ആനയക്ക് മറ്റെന്തെങ്കിലും പരിക്കുകളുണ്ടായിരുന്നോ എന്ന കാര്യവും പരിശോധിക്കുന്നുണ്ട്.പതിനേഴര മണിക്കൂര്‍ നീണ്ട ദൗത്യത്തിനൊടുവിലാണ് കര്‍ണാടക വനംവകുപ്പിന്‍റെ ബന്ദിപ്പൂരിലുള്ള ആന ക്യാമ്പില്‍ തണ്ണീര്‍ കൊമ്പനെ എത്തിച്ചിരുന്നത്.

ആന പൂര്‍ണ ആരോഗ്യവാനാണെന്നായിരുന്നു നേരത്തെ വനംവകുപ്പ് അറിയിച്ചിരുന്നതെങ്കിലും അപ്രതീക്ഷിതമായാണ് ചരിഞ്ഞുവെന്ന വിവരം അധികൃതര്‍ സ്ഥിരീകരിക്കുന്നത്. ഇന്നലെ പുലര്‍ച്ചെ മുതല്‍ വയനാട്ടിലെ മാനന്തവാടി നഗരത്തിലിറങ്ങിയ തണ്ണീര്‍ കൊമ്പൻ എന്ന പേരുള്ള കാട്ടാനയെ രാത്രിയോടെയാണ് മയക്കുവെടിവെച്ച് പിടികൂടാനായത്. തുടര്‍ന്ന് എലിഫന്‍റ് ആംബുലന്‍സില്‍ കര്‍ണാടകയിലേക്ക് കൊണ്ടുപോവുകയായിരുന്നു. പ്രാഥമിക പരിശോധനകള്‍ക്കുശേഷം തണ്ണീര്‍ കൊമ്പനെ കാട്ടിലേക്ക് തുറന്നുവിടാനുള്ള തീരുമാനത്തിനിടെയാണ് ദാരുണ സംഭവം. ബന്ദിപ്പൂരില്‍ എത്തിച്ചശേഷം ആനയെ പരിശോധനയ്ക്ക് വിധേയമാക്കിയിരുന്നു. തണ്ണീര്‍ കൊമ്പന്‍റെ ജഡം ബന്ദിപ്പൂരിലെ രാമപുര ക്യാമ്പിലാണുള്ളത്. ആനയുടെ പരിക്ക്, ശാരീരികഅവസ്ഥ എന്നിവ വിശദമായി പരിശോധിക്കും. ഇന്ന് തന്നെ പോസ്റ്റ്മോര്‍ട്ടം നടത്തുമെന്ന് അധികൃതര്‍ അറിയിച്ചു. വെറ്റിനറി സര്‍ജന്മാരുടെ സംഘം സ്ഥലത്തെത്തി പരിശോധന നടത്തുകയാണ്. കേരളത്തിലെയും കര്‍ണാടകയിലെയും വെറ്ററിനറി ടീം സംയുക്തമായിട്ടായിരിക്കും പോസ്റ്റ്മോര്‍ട്ടം നടത്തുക

കൊച്ചി: കേരള മീഡിയ അക്കാദമിയുടെ 2023– 24 ലെ സൂക്ഷ്‌മ ഗവേഷക ഫെലോഷിപ്പുകൾ ടി എസ് അഖിലിനും (സബ്‌എഡിറ്റർ, ദേശാഭിമാനി), ജെബി പോളിനും (സീനിയർ റിപ്പോർട്ടർ, മംഗളം) നൽകുമെന്ന്‌ ചെയർമാൻ ആർ എസ്‌ ബാബു വാർത്താ സമ്മേളനത്തിൽ പറഞ്ഞു. ഒരുലക്ഷം രൂപയാണ്‌ സൂക്ഷ്മ ഗവേഷക ഫെലോഷിപ്പ്‌.

സമഗ്ര ഗവേഷക ഫെലോഷിപ്പിന് എം പ്രശാന്ത് (ദേശാഭിമാനി), അപർണ കുറുപ്പ് (ന്യൂസ് 18), കെ രാജേന്ദ്രൻ (കൈരളി), നിലീന അത്തോളി (മാതൃഭൂമി), എ പി ഷെബിൻ മെഹബൂബ് (മാധ്യമം), എം വി നിഷാന്ത് (ഏഷ്യനെറ്റ് ന്യൂസ്), കെ എ ഫൈസൽ (മാധ്യമം), ദീപക് ധർമ്മടം (24 ന്യൂസ്), പി ആർ റിസിയ (ജനയുഗം) എന്നിവർക്ക് നൽകും. 75,000 രൂപയാണ് ഇവർക്ക് ലഭിക്കുക.

പൊതു ഗവേഷണ മേഖലയിൽ കെ ആർ അജയൻ (ദേശാഭിമാനി), ബിജു പരവത്ത് (മാതൃഭൂമി), അലീന മരിയ വർഗ്ഗീസ് (മാതൃഭൂമി), ബിലു അനിത് സെൻ (കേരള ടുഡേ), അജിത്ത് കണ്ണൻ (ന്യൂ ഇന്ത്യൻ എക്‌സ്പ്രസ്), സി റഹീം (മലയാളം ന്യൂസ്), എ ആർ ആനന്ദ് (വീക്ഷണം), പി സുബൈർ (മാധ്യമം), സുനി അൽഹാദി (സുപ്രഭാതം), പി എസ് റംഷാദ് (സമകാലിക മലയാളം), പി നഹീമ (മാധ്യമം), ജി ഹരികൃഷ്ണൻ (മംഗളം), എ കെ വിനോദ്കുമാർ- (ജനം), കെ എൻ സുരേഷ്‌കുമാർ – (കേരള കൗമുദി) എന്നിവർക്ക് 10,000- രൂപ വീതം ഫെലോഷിപ്പ് നൽകും.

തോമസ് ജേക്കബ്, ഡോ. സെബാസ്റ്റ്യൻ പോൾ, എം പി അച്യുതൻ, ഡോ. പി കെ രാജശേഖരൻ, എ ജി ഒലീന, ഡോ.നീതു സോന എന്നിവരടങ്ങുന്ന വിദഗ്‌ധ സമിതിയാണ് ഫെലോഷിപ്പിന് അർഹരായവരെ തെരഞ്ഞെടുത്തത്. ഈമാസം അവസാനം തിരുവനന്തപുരത്ത് നടക്കുന്ന മാധ്യമ പ്രതിഭാ സംഗമത്തിൽ ധനകാര്യ മന്ത്രി കെ എൻ ബാലഗോപാൽ ഫെലോഷിപ്പുകൾ വിതരണം ചെയ്യും.