തിരുവനന്തപുരം: യാത്രക്കാർക്കായി ഫീഡ്ബാക്ക് സംവിധാനവുമായി കെ എസ് ആർ ടി സി. അഭിപ്രായങ്ങളും നിർദേശങ്ങളും നേരിട്ട് ശേഖരിച്ച് സേവന നിലവാരം കൂടുതല് മെച്ചപ്പെടുത്തുകയാണ് ലക്ഷ്യം.കെഎസ്ആർടിസി ചലോ (KSRTC Chalo) മൊബൈല് ആപ്പിലാണ് പുതിയ ഫീഡ്ബാക്ക് – റേറ്റിംഗ് സംവിധാനം ആരംഭിച്ചത്.
യാത്രക്കാരുടെ അനുഭവങ്ങള്ക്ക് കൂടുതല് പ്രാധാന്യം നല്കുകയും അവയെ അടിസ്ഥാനമാക്കി സേവനങ്ങളില് ആവശ്യമായ മാറ്റങ്ങള് നടപ്പിലാക്കുകയും ചെയ്യുക എന്ന ലക്ഷ്യത്തോടെയാണ് ഈ സൗകര്യം ഏർപ്പെടുത്തിയത്. പ്രിയദർശിനി സൗജന്യ യാത്രക്കാർ ഉള്പ്പെടെ എല്ലാ യാത്രക്കാർക്കും ഫീഡ്ബാക്ക് നല്കാമെന്ന് കെഎസ്ആർടിസി അറിയിച്ചു.യാത്രക്കാർക്ക് ഓരോ യാത്രയ്ക്കു ശേഷവും തങ്ങളുടെ യാത്രാനുഭവം കെഎസ്ആർടിസി ചലോ ആപ്പ് വഴി രേഖപ്പെടുത്താം.
യാത്രയുടെ സുരക്ഷ, സമയനിഷ്ഠ, ബസിലെ സൗകര്യങ്ങള്, ശുചിത്വം, ജീവനക്കാരുടെ പെരുമാറ്റം, യാത്രാസൗകര്യം തുടങ്ങിയ വിവിധ ഘടകങ്ങള്ക്ക് റേറ്റിംഗ് നല്കുന്നതിനൊപ്പം യാത്രക്കാർക്ക് തങ്ങളുടെ അഭിപ്രായങ്ങളും നിർദേശങ്ങളും രേഖപ്പെടുത്താം. ചലോ ആപ്പിലൂടെ ലഭിക്കുന്ന ഫീഡ്ബാക്കുകള് ഒരു കേന്ദ്രീകൃത സംവിധാനത്തില് ശേഖരിച്ച് വിശകലനം ചെയ്യുമെന്ന് കെഎസ്ആർടിസി അറിയിച്ചു. ഓരോ സർവീസിന്റെയും പ്രകടനം, ജീവനക്കാരുടെ സേവന മികവ്, യാത്രക്കാരുടെ സംതൃപ്തി എന്നിവ വിലയിരുത്തുന്നതിനും മികച്ച സേവനം നല്കുന്ന ജീവനക്കാരെയും സർവീസുകളെയും തിരിച്ചറിയുന്നതിനും ഈ വിവരങ്ങള് സഹായകരമാകും.
അതോടൊപ്പം യാത്രക്കാർ ചൂണ്ടിക്കാണിക്കുന്ന പോരായ്മകള് സമയബന്ധിതമായി പരിഹരിക്കുന്നതിനും സേവന നിലവാരം ഉയർത്തുന്നതിനും ആവശ്യമായ നടപടികള് സ്വീകരിക്കുമെന്നും കെഎസ്ആർടിസി അറിയിച്ചു.പ്രിയദർശിനി സൗജന്യ യാത്രാ പദ്ധതി ആരംഭിച്ചതോടെ കെഎസ്ആർടിസി ബസുകളില് വനിതാ യാത്രക്കാരുടെ എണ്ണത്തില് ഗണ്യമായ വർധനവാണ് ഉണ്ടായിരിക്കുന്നതെന്ന് കെഎസ്ആർടിസി അറിയിച്ചു. ഈ സാഹചര്യത്തില് വനിതാ യാത്രക്കാരുടെ സുരക്ഷ, സൗകര്യം, സംതൃപ്തി എന്നിവ പ്രത്യേകം വിലയിരുത്തുന്നതിനും അവരുടെ യാത്രാനുഭവങ്ങള് കൂടുതല് മെച്ചപ്പെടുത്തുന്നതിനും പുതിയ ഫീഡ്ബാക്ക് സംവിധാനം സഹായകമാകും.
വനിതാ യാത്രക്കാരില് നിന്നും ലഭിക്കുന്ന അഭിപ്രായങ്ങള് പദ്ധതിയുടെ ഫലപ്രാപ്തി കൂടുതല് മെച്ചപ്പെടുത്തുന്നതിനും ഉപയോഗപ്പെടുത്തുമെന്നും കെഎസ്ആർടിസി അറിയിച്ചു.യാത്രക്കാരുടെ അഭിപ്രായങ്ങള് പൊതുഗതാഗത സ്ഥാപനത്തിന്റെ വളർച്ചയ്ക്കും സേവന നിലവാരം ഉയർത്തുന്നതിനും ഏറ്റവും വിലപ്പെട്ടതാണെന്ന് കെഎസ്ആർടിസി അറിയിച്ചു. യാത്രക്കാർ നല്കുന്ന ഓരോ അഭിപ്രായവും ഗൗരവത്തോടെ പരിശോധിച്ച് ആവശ്യമായ തിരുത്തല് സ്വീകരിക്കും. സുരക്ഷിതവും സമയബന്ധിതവും യാത്രീസൗഹൃദവുമായ പൊതുഗതാഗത സേവനം ഉറപ്പാക്കുക എന്നതാണ് ലക്ഷ്യമെന്ന് കെഎസ്ആർടിസി അറിയിച്ചു.
