മലപ്പുറം : നീണ്ട ഇടവേളയ്ക്കുശേഷം, കോഴിക്കോട് – കൊച്ചി – തിരുവനന്തപുരം വിമാന സർവീസ് പുനരാരംഭിക്കാൻ സാധ്യത തെളിയുന്നു. കോഴിക്കോടിനെയും കൊച്ചിയെയും സംസ്ഥാന തലസ്ഥാനവുമായി ബന്ധിപ്പിക്കുന്ന നേരിട്ടുള്ള വിമാന സർവീസ് തുടങ്ങുന്നതുമായി ബന്ധപ്പെട്ട് ഇൻഡിഗോ ഉന്നത ഉദ്യോഗസ്ഥർ മുഖ്യമന്ത്രി വി.ഡി.സതീശൻ, മന്ത്രി പി.കെ.കുഞ്ഞാലിക്കുട്ടി എന്നിവരുമായി ചർച്ച നടത്തി. കോഴിക്കോട്– കൊച്ചി– തിരുവനന്തപുരം സെക്ടറിൽ നേരത്തേ വിമാന സർവീസുണ്ടായിരുന്നു. പിന്നീട് ഇതു നിർത്തി.സർവീസ് പുനരാരംഭിക്കണമെന്നതു മലബാറിലെ വ്യവസായ സമൂഹം ഉൾപ്പെടെ ഏറെ നാളായി ഉയർത്തുന്ന ആവശ്യമാണ്. വിമാന സർവീസ് പുനരാരംഭിക്കാൻ നടപടിയെടുക്കുമെന്ന്, മുഖ്യമന്ത്രിയാകുന്നതിനു മുൻപ് വി.ഡി.സതീശൻ ഉറപ്പു നൽകിയിരുന്നു. യുഡിഎഫ് സർക്കാർ അധികാരമേറ്റതിനു പിന്നാലെ, മന്ത്രി പി.കെ.കുഞ്ഞാലിക്കുട്ടി നടത്തിയ ഇടപെടലുകൾ കൂടിയാണ് സർവീസ് പുനരാരംഭിക്കുന്നതിനു വഴിയൊരുക്കുന്നത്. ഇന്നലെ നടന്ന ചർച്ചയോടെ നടപടികൾക്കു കൂടുതൽ വേഗം കൈവരുമെന്നാണു പ്രതീക്ഷ. മലബാറിലെയും കൊച്ചിയിലെയും വ്യവസായികൾക്കും സംരംഭകർക്കും നിക്ഷേപകർക്കും പൊതുജനങ്ങൾക്കും തലസ്ഥാനത്തേക്കുള്ള യാത്ര കൂടുതൽ എളുപ്പമാക്കാൻ ഈ സർവീസ് സഹായിക്കും.വ്യവസായ കേന്ദ്രങ്ങൾ, ഐടി സ്ഥാപനങ്ങൾ, വാണിജ്യ മേഖലകൾ എന്നിവ തമ്മിലുള്ള ബന്ധവും കൂടുതൽ ശക്തമാകും. കോഴിക്കോട് – കൊച്ചി – തിരുവനന്തപുരം നഗരങ്ങളെ വിമാനമാർഗം ബന്ധിപ്പിക്കുന്നതിലൂടെ കേരളത്തിന്റെ വടക്കൻ, മധ്യ, തെക്കൻ മേഖലകൾ തമ്മിലുള്ള യാത്രാ-വ്യവസായ ബന്ധത്തിൽ പുതിയ സാധ്യതകൾ തുറക്കും.
ചെറുവണ്ണൂർ മേൽപാലം ഗർഡറുകൾ സ്ഥാപിക്കൽ; ദേശീയപാത അടക്കുന്നതുമായി ബന്ധപ്പെട്ട് പരിശോധന.
ഫറോക്ക്: ചെറുവണ്ണൂർ മേൽപാലത്തിൽ രണ്ടാംഘട്ട ഗർഡറുകൾ സ്ഥാപിക്കുന്നതിന്റെ ഭാഗമായി സമ്പൂർണ ഗതാഗത നിയന്ത്രണം ഏർപ്പെടുത്തുന്നതിനു മുന്നോടിയായി ജില്ല കലക്ടറുടെ നിർദേശ പ്രകാരം വിവിധ വകുപ്പുകളിലെ ഉദ്യോഗസ്ഥ സംഘം ചെറുവണ്ണൂരിൽ സന്ദർശനം നടത്തി. ഗതാഗതം പൂർണമായും നിയന്ത്രിക്കുന്നതിന്റെ ഭാഗമായുള്ള സാധ്യതകൾ വിലയിരുത്താൻ ട്രാഫിക് പൊലീസ്, മോട്ടർ വാഹന വകുപ്പ്, പൊതുമരാമത്ത് ഉദ്യോഗസ്ഥർ, ജനപ്രതിനിധികൾ എന്നിവരാണ് പരിശോധനക്കെത്തിയത്.പഴയ ദേശീയ പാതയിലെ പുതിയപാലം മുതൽ ചെറുവണ്ണൂർ കരുണ സ്റ്റോപ്പുവരെയാണ് അടക്കുകയെങ്കിലും ഒന്നാം ഘട്ടത്തിൽ ചെയ്തതുപോലെ കോഴിക്കോടിനും രാമനാട്ടുകരക്കുമിടയിൽ ഗതാഗതം പൂർണമായും നിരോധിക്കുകയാണ് ലക്ഷ്യം. തിങ്കളാഴ്ച മുതൽ വ്യാഴാഴ്ച വരെ ഗതാഗതം തടഞ്ഞു കൊണ്ട് 18 ഗർഡറുകൾ സ്ഥാപിക്കാനാണ് ഏകദേശ ധാരണയിലെത്തിയത്. തീരുമാനം ജില്ല കലക്ടർക്ക് സമർപ്പിച്ചതിനു ശേഷമാണ് ഔദ്യോഗികമായി അറിയിപ്പ് പുറത്തുവിടുക. കഴിഞ്ഞ സെപ്റ്റംബർ 20 മുതൽ 26 വരെ റോഡ് അടച്ചതിനു ശേഷം 24 ഗർഡറുകൾ സ്ഥാപിക്കാൻ തീരുമാനിച്ചിരുന്നുവെങ്കിലും ഗാൻട്രി ക്രെയിൻ ”പണിമുടക്കി”യതു കാരണം ഒരു ദിവസം നേരത്തേ പ്രവൃത്തി നിർത്തിവെക്കേണ്ടി വന്നു.13 ഗർഡറുകൾ മാത്രമേ അന്ന് സ്ഥാപിക്കാൻ കഴിഞ്ഞുള്ളൂ. ഗതാഗതം പൂർണമായും തടഞ്ഞാൽ ദേശീയപാതയിൽ വലിയ ഗതാഗത പ്രതിസന്ധി സൃഷ്ടിച്ചേക്കുമെന്ന ആശങ്കയും ഉയർന്നിട്ടുണ്ട്. പൊതു മരാമത്ത് അസി. എക്സി. എൻജിനീയർ പി. ഇന്ദു, അസി. എൻജിനീയർ ടി.എസ്. ഹൃദ്യ, തഹസിൽദാർ സി. ശ്രീകുമാർ, അസി. കമീഷണർ(ട്രാഫിക് )പി.സി. ചാക്കോ, എം.വി.ഐ ജിനേഷ്, എ.എം.വി.ഐ പ്രേംകുമാർ, കോർപറേഷൻ ടൗൺ പ്ലാനിങ് ചെയർപേഴ്സൻ സി. സന്ദേശ്, കൗൺസിലർ എം.പി. മുനീർ എന്നിവരാണ് ചെറുവണ്ണൂർ സന്ദർശിച്ചത്.
നൂറിലധികം കുട്ടികളുള്ള സ്പെഷൽ സ്കൂളുകൾക്ക് എയ്ഡഡ് പദവിപ്രഖ്യാപനം ഉടനെന്നു മുഖ്യമന്ത്രി.
തിരുവനന്തപുരം: സംസ്ഥാനത്ത്100 ലധികം കുട്ടികളുള്ള എല്ലാ സ്പെഷൽ സ്കൂളുകൾക്കും എയ്ഡഡ് പദവി നൽകുന്ന പ്രഖ്യാപനം ഉടനുണ്ടാകുമെന്നു മുഖ്യമന്ത്രി വി.ഡി. സതീശൻ.സംസ്ഥാന സ്പെഷൽ സ്കൂൾ കലോത്സവത്തിന്റെ ഉദ്ഘാടനം തിരുവനന്തപുരം മണക്കാട് കാർത്തിക തിരുനാൾ ഗവൺ മെന്റ്റ് ഗേൾസ് ഹയർസെക്കൻ ഡറി സ്കൂളിൽ നിർവഹിച്ചു പ്രസംഗിക്കുകയായിരുന്നു മുഖ്യമന്ത്രി.കേരളത്തെ ഇന്ത്യയിലെ ഒന്നാമത്തെ ഭിന്നശേഷി സൗഹ ദസംസ്ഥാനമാക്കി മാറ്റുകയാണ് സർക്കാരിന്റെ പ്രധാന ലക്ഷ്യം. ഇതിനായി ഒരു മാസത്തി നകം സമഗ്ര പദ്ധതികൾ പ്രഖ്യാപിക്കും. ഭിന്നശേഷിക്കാർക്കാ യി പൊതുകെട്ടിടങ്ങളിൽ റാമ്പുകളും പ്രത്യേക ടോറ്റുകളും നിർബന്ധമാക്കിയ രീതിയിൽ സംസ്ഥാനത്തെ എല്ലാ പൊതുവിടങ്ങളിലും എത്തിച്ചേരാനും വാഹനങ്ങളിൽ കയറാനുമുള്ള ക്രമീകരണങ്ങൾ ഉറപ്പാക്കും. സംസ്ഥാനത്തെ ഭിന്ന ശേഷിക്കാരായ മുഴുവൻ ആളു കളുടെയും വിവരങ്ങൾ ഉൾപ്പെ ടുത്തി സമഗ്ര ഡേറ്റ ശേഖരിക്കുകയും അത് തുടർച്ചയായി പുതുക്കുകയും ചെയ്യും. ഭിന്നശേ ഷിക്കുട്ടികളുടെ ആവശ്യങ്ങൾക്ക് സംസ്ഥാനത്തിൻ്റെ ധനപ്ര തിസന്ധി തടസമാവില്ല. മുൻഗ ണന നൽകി ഖജനാവിൽ നിന്ന് ആവശ്യമായ തുക ലഭ്യമാക്കും.ഭിന്നശേഷി ലക്ഷണങ്ങൾ മുൻകൂട്ടി കണ്ടെത്തുന്നതിലൂടെ 60 മുതൽ 70 ശതമാനം വരെ പ്രശ്നങ്ങൾ ഭേദപ്പെടുത്താനും കൃത്യമായ പരിശീലനത്തിലൂടെ കുട്ടികളുടെ ശേഷി വർധിപ്പിക്കാനും സാധിക്കും. ഇതിനായി ലോകനിലവാരത്തിലുള്ള ആധുനിക സംവിധാനങ്ങൾ കേരളത്തിലേക്ക് കൊണ്ടു വരും. തങ്ങളുടെ കാലശേഷം കുഞ്ഞു ങ്ങളെ ആര് സംരക്ഷിക്കുമെന്ന കാര്യത്തിൽ മാതാപിതാക്കൾക്ക് യാതൊരു ആകുലതയും വേണ്ടതില്ലെന്നും കേരളം ഈ മക്കളെ ചേർത്തു നിർത്തുമെ ന്നും മുഖ്യമന്ത്രി ഉറപ്പുനൽകി.
നഴ്സുമാരുടെ സ്ഥലംമാറ്റം: ഡി.എം.ഒ ഓഫിസിന് മുന്നിൽ പ്രതിഷേധം.
കോഴിക്കോട്: ജില്ലയിലെ നഴ്സുമാരുടെ അന്യായ സ്ഥലംമാറ്റത്തിൽ പ്രതിഷേധിച്ച് കേരള ഗവ. നഴ്സസ് അസോസിയേഷൻ ജില്ല കമ്മിറ്റി ഡി.എം.ഒ ഓഫിസിനു മുന്നിൽ സൂചന പ്രതിഷേധ സമരം നടത്തി. സംസ്ഥാന വൈസ് പ്രസിഡന്റ് കെ.പി. ഷീന ഉദ്ഘാടനം ചെയ്തു. ജില്ല സെക്രട്ടറി പി. പ്രജിത്ത് സംസാരിച്ചു. യാതൊരു മാനദണ്ഡവും പാലിക്കാതെ അന്യായമായി 50 മുതൽ 70 കിലോമീറ്റർ ദൂരെയാണ് നഴ്സുമാരെ തെരഞ്ഞുപിടിച്ച് സ്ഥലം മാറ്റിയതെന്ന് അസോസിയേഷൻ കുറ്റപ്പെടുത്തി.ഇതിൽ തന്നെ അഞ്ചുവർഷം വരെ സ്വന്തം സ്ഥാപനത്തിൽ തുടരാൻ സംരക്ഷണം ഉള്ള, പെൺകുട്ടികൾ മാത്രമുള്ള രണ്ട് വനിതകൾ ഉണ്ട്. തികച്ചും മനുഷ്യത്വരഹിതമായ സമീപനമാണ് സ്ഥലം മാറ്റത്തിൽ സ്വീകരിച്ചിട്ടുള്ളത്. കോഴിക്കോട് നഗരത്തിലെ ബീച്ച് ജനറൽ ആശുപത്രി, കുതിരവട്ടം മാനസികാരോഗ്യ കേന്ദ്രം ഉൾപ്പെടെ 30 ഇൽ പരം ഒഴിവുകൾ ഉണ്ടായിട്ടും രണ്ടു പുരുഷ നഴ്സുമാരെ സ്ഥലം മാറ്റി പകരം ആളുകളെ അവിടേക്ക് നിയമിക്കാതെ 70ലധികം കിലോമീറ്റർ ദൂരമുള്ള ജില്ല ആശുപത്രി വടകര, പ്രാഥമിക ആരോഗ്യ കേന്ദ്രം, നരിപ്പറ്റ എന്നിവിടങ്ങളിലേക്കാണ് സ്ഥലം മാറ്റിയത്.സമയ ക്ലിപ്തത പോലും നോക്കാതെ രോഗി പരിചരണത്തിന് മുൻഗണന നൽകി ജോലി ചെയ്യുന്ന വിഭാഗമായ നഴ്സുമാരുടെ ഇടയിൽ ഇത്തരത്തിൽ ഭരണപരമായ സ്ഥലംമാറ്റം ഇതാദ്യമാണ്. രണ്ട് മാസം മുൻപാണ് ജില്ലയിൽ നഴ്സുമാരുടെ പൊതുസ്ഥലംമാറ്റം നടന്നത്. തുടരെയുള്ള സ്ഥലം മാറ്റങ്ങൾ ആരോഗ്യ മേഖലയെ തകർക്കാനും നഴ്സുമാരുടെ മനോവീര്യം തകർക്കാനും മാത്രമേ ഉപകരിക്കൂ. ഭരണാനുകൂല സംഘടനകൾക്ക് യഥേഷ്ടം അഴിമതിക്ക് കളമൊരുക്കാനുള്ള നീക്കം കൂടിയാണ് സ്ഥലം മാറ്റം.ഇക്കാര്യങ്ങൾ ചൂണ്ടിക്കാട്ടി സംഘടന ജില്ല മെഡിക്കൽ ഓഫിസർക്ക് നിവേദനം നൽകി. അനുകൂല നടപടി ഉടൻ ഉണ്ടായില്ലെങ്കിൽ ജില്ലയിലെ ആരോഗ്യ കേന്ദ്രങ്ങളുടെ പ്രവർത്തനം സ്തംഭിക്കുന്ന രീതിയിലുള്ള സമരവുമായി മുന്നോട്ടു പോകും. എ. ബിന്ദു, പി. റെജിന , എൻ.പി. വിനീത്, എം.ആർ. പുഷ്പലത തുടങ്ങിയവർ സമരത്തിന് നേതൃത്വം നൽകി.
അഴിമതി തടയാൻ ജില്ലാ വിജിലൻസ് കമ്മിറ്റി: പരാതികൾ പൊതുജനങ്ങൾക്ക് നേരിട്ട് നൽകാം.
കോഴിക്കോട് : സർക്കാർ, പൊതുമേഖലാ ഓഫീസുകളിലെ അഴിമതി തടയുന്നതിനും പൊതുജനങ്ങളുടെ പരാതികൾ വേഗത്തിൽ പരിഹരിക്കുന്നതിനുമായി ജില്ലാ വിജിലൻസ് കമ്മിറ്റി രൂപീകരിച്ച് ജില്ലാ കളക്ടർ എം. എസ്. മാധവിക്കുട്ടി ഉത്തരവിറക്കി. അഴിമതിരഹിതവും സുതാര്യവുമായ സിവിൽ സർവീസ് ഉറപ്പാക്കുകയാണ് ഈ സമിതിയുടെ പ്രധാന ലക്ഷ്യം. സർക്കാർ മാർഗനിർദ്ദേശങ്ങളുടെയും വിജിലൻസ് ആൻഡ് ആൻറി കറപ്ഷൻ ബ്യൂറോ ഡയറക്ടറുടെ നിർദ്ദേശത്തിൻ്റെയും അടിസ്ഥാനത്തിലാണ് കമ്മിറ്റി രൂപീകരിച്ചിട്ടുള്ളത്. ജില്ലാ കളക്ടർ ചെയർപേഴ്സണായും വിജിലൻസ് ആൻഡ് ആന്റി കറപ്ഷൻ ബ്യൂറോ യൂണിറ്റ് ഡെപ്യൂട്ടി പോലീസ് സൂപ്രണ്ട് കൺവീനറായും പ്രവർത്തിക്കും. റേഞ്ച് പോലീസ് സൂപ്രണ്ടാണ് സമിതിയിലെ പ്രത്യേക ക്ഷണിതാവ്.റവന്യൂ, പോലീസ്, സിവിൽ സപ്ലൈസ്, തദ്ദേശസ്വയംഭരണം, കൃഷി, പൊതുമരാമത്ത്, വാട്ടർ അതോറിറ്റി, കെ.എസ്.ഇ.ബി, എക്സൈസ്, മോട്ടോർ വാഹനം, രജിസ്ട്രേഷൻ, ആരോഗ്യം തുടങ്ങിയ വകുപ്പുകളിലെ ജില്ലാതല ഉദ്യോഗസ്ഥർ കമ്മിറ്റിയിൽ അംഗങ്ങളാണ്. കൂടാതെ ജനപ്രതിനിധികൾ, റെസിഡന്റ്സ് അസോസിയേഷനുകൾ, മനുഷ്യാവകാശ സംഘടനകൾ, ഉപഭോക്തൃ സംരക്ഷണ ഫോറങ്ങൾ, സന്നദ്ധ സംഘടനകൾ, പ്രമുഖ കോളേജുകൾ, രാഷ്ട്രീയ പാർട്ടി പ്രതിനിധികൾ എന്നിവരും സമിതിയുടെ ഭാഗമാണ്.മൂന്ന് മാസത്തിലൊരിക്കൽ യോഗം ചേർന്ന് കമ്മിറ്റിയുടെ പ്രവർത്തനങ്ങൾ വിലയിരുത്തുകയും ഇതുസംബന്ധിച്ച റിപ്പോർട്ട് ജില്ലാ കളക്ടർ മുഖേന വിജിലൻസ് ഡയറക്ടർക്ക് സമർപ്പിക്കുകയും ചെയ്യും. സർക്കാർ ജീവനക്കാർക്കെതിരെ പരാതിയുള്ള പൊതുജനങ്ങൾക്ക് കമ്മിറ്റി യോഗത്തിൽ നേരിട്ട് പങ്കെടുത്ത് പരാതികൾ അവതരിപ്പിക്കാം. പരാതികളുമായി ബന്ധപ്പെട്ട് ഏത് ഉദ്യോഗസ്ഥനെയും യോഗത്തിലേക്ക് വിളിച്ചുവരുത്താനും വിശദീകരണം തേടാനുമുള്ള അധികാരം കമ്മിറ്റിക്കുണ്ടായിരിക്കും. ലഭിക്കുന്ന പരാതികളിൽ ബന്ധപ്പെട്ട ഉദ്യോഗസ്ഥരുമായി ചർച്ച ചെയ്ത് അടിയന്തര പരിഹാര നടപടികൾ സ്വീകരിക്കുമെന്നും ഉത്തരവിൽ വ്യക്തമാക്കുന്നു.
സൂക്ഷ്മ ജലസേചനത്തിന് വൻ സബ്സിഡി: അപേക്ഷകൾ ക്ഷണിച്ചു.
തിരുവനന്തപുരം: കേന്ദ്ര-സംസ്ഥാന സർക്കാരുകൾ സംയുക്തമായി നടപ്പാക്കുന്ന രാഷ്ട്രീയ കൃഷി വികാസ് യോജന പദ്ധതിയുടെ ഭാഗമായി കൃഷിയിടങ്ങളിൽ ഡ്രിപ്പ്, സ്പ്രിംഗ്ളർ തുടങ്ങിയ സൂക്ഷ്മ ജലസേചന സംവിധാനങ്ങൾ സ്ഥാപിക്കുന്നതിന് കർഷകരിൽ നിന്ന് അപേക്ഷ ക്ഷണിച്ചു. പദ്ധതിച്ചെലവിന്റെ അനുവദനീയ തുകയുടെ 55 ശതമാനം ചെറുകിട, നാമമാത്ര കർഷകർക്കും 45 ശതമാനം മറ്റ് കർഷകർക്കും ധനസഹായമായി ലഭിക്കും. കൂടാതെ, നിബന്ധനകൾക്ക് വിധേയമായി നാളികേര കർഷകർക്ക് 30 ശതമാനം അധിക ധനസഹായവും ലഭ്യമാണ്. താല്പര്യമുള്ള കർഷകർക്ക് ജില്ലകളിലെ കൃഷി അസിസ്റ്റന്റ് എക്സിക്യൂട്ടീവ് എഞ്ചിനീയറുടെ കാര്യാലയവുമായോ അടുത്തുള്ള കൃഷിഭവനുമായോ ബന്ധപ്പെടാവുന്നതാണ് (ഫോൺ: 9400722150, 9048183643, 9446429642).
കുഴൽക്കിണർ നിർമ്മാണം: ഭൂജല അതോറിറ്റി രജിസ്ട്രേഷൻ നിർബന്ധമാക്കി; ലംഘിച്ചാൽ ഒരു ലക്ഷം രൂപ പിഴയും കണ്ടുകെട്ടലും.
തിരുവനന്തപുരം : സംസ്ഥാനത്ത് പ്രവർത്തിക്കുന്ന എല്ലാ കുഴൽക്കിണർ നിർമ്മാണ ഏജൻസികളും യൂണിറ്റുകളും ഭൂജല അതോറിറ്റിയിൽ രജിസ്റ്റർ ചെയ്യണമെന്ന് സർക്കാർ നിർദേശം നൽകി.സാധുവായ രജിസ്ട്രേഷൻ സർട്ടിഫിക്കറ്റില്ലാത്ത നിർമാണ യൂണിറ്റുകൾ ഉപയോഗിച്ച് കുഴൽക്കിണർ, ട്യൂബ് വെൽ, ഫിൽറ്റർ പോയിന്റ് വെൽ എന്നിവ നിർമ്മിച്ചാൽ ഒരു ലക്ഷം രൂപ പിഴ ഈടാക്കും. കൂടാതെ, നിയമലംഘനം നടത്തുന്ന യൂണിറ്റുകളുടെ യന്ത്രസാമഗ്രികൾ കണ്ടുകെട്ടുന്നത് ഉൾപ്പെടെയുള്ള കർശന നടപടികൾ സ്വീകരിക്കുമെന്ന് അധികൃതർ മുന്നറിയിപ്പ് നൽകി.പൊതുജനങ്ങൾ കുഴൽക്കിണറോ അനുബന്ധ നിർമ്മാണങ്ങളോ നടത്തുമ്പോൾ കരാറുകാരന് സാധുവായ ഭൂജല അതോറിറ്റി രജിസ്ട്രേഷൻ സർട്ടിഫിക്കറ്റ് ഉണ്ടെന്ന് ഉറപ്പുവരുത്തണമെന്ന് ഭൂജലവകുപ്പ് ജില്ലാ ഓഫീസർ അറിയിച്ചു.
ഓപ്പറേഷൻ തൂഫാൻ 5 മാസം: 15,000-ത്തിലേറെ അറസ്റ്റ്, കോടികളുടെ ലഹരിമരുന്ന് പിടിച്ചെടുത്തു.
തിരുവനന്തപുരം:ഓപ്പറേഷന് തൂഫാന് ആരംഭിച്ചതിന് ശേഷമുള്ള അഞ്ച് മാസത്തിനിടെ സംസ്ഥാനത്ത് 14,369 കേസുകളിലായി 15,515 പേര് അറസ്റ്റിലായതായി നോഡല് ഓഫീസര് ഐ.ജി. പുട്ട വിമലാദിത്യ അറിയിച്ചു. 28.659 കി.ഗ്രാം എം.ഡി.എം.എ., 1960.139 കിലോ കഞ്ചാവ്, 7.261 കി.ഗ്രാം ഹാഷിഷ് ഓയില്, 10,341 കഞ്ചാവ് ചെടികള് അടക്കം വൻ ലഹരിമരുന്ന് ശേഖരവും 186 വാഹനങ്ങളും 801 മൊബൈല് ഫോണുകളും പിടിച്ചെടുത്ത പോലീസ് പ്രതികളുടെ 148 ബാങ്ക് അക്കൗണ്ടുകൾ മരവിപ്പിച്ചു. ലഹരി ഉപയോഗിച്ച് ഗുണ്ടാപ്രവർത്തനം നടത്തിയ 137 പേർക്കെതിരെ കാപ്പാ പ്രകാരവും 134 പേർക്കെതിരെ പി.ഐ.ടി. എന്.ഡി.പി.എസ്. പ്രകാരവും നടപടിയെടുക്കുകയും വിദേശത്തേക്ക് കടന്ന പ്രതികൾക്കായി റെഡ് കോർണർ ഉൾപ്പെടെയുള്ള നോട്ടീസുകൾ പുറപ്പെടുവിക്കുകയും ചെയ്തു. ലഹരിവില്പനയും ഉപയോഗവും തടയുന്നതിനൊപ്പം സർക്കാർ സ്കൂളുകളിൽ സിസിടിവി ക്യാമറകൾ സ്ഥാപിക്കുന്ന ‘തൂഫാൻ ഐസ്’, ബോധവത്കരണ-കൗൺസിലിങ് പദ്ധതികളായ ‘തൂഫാൻ കെയർ’, ‘തൂഫാൻ തദ്ദേശം 2.0’ എന്നിവയിലൂടെ പ്രതിരോധത്തിനും പുനരധിവാസത്തിനും വലിയ പ്രാധാന്യമാണ് പദ്ധതിക്ക് കീഴിൽ നൽകുന്നത്.
കുതിച്ചു കയറി സ്വർണ്ണവില; 24 മണിക്കൂറിനിടെ 4680 രൂപ പവന് വര്ധിച്ചു.
കേരളത്തില് സ്വര്ണവിലയില് വന് കുതിപ്പ്. ഇന്നലെയും ഇന്നുമായി 5000 രൂപയോളം ഒരു പവന് വര്ധിച്ചു. സര്വകാല റെക്കോര്ഡിലേക്ക് സ്വര്ണം കുതിക്കുമോ എന്നാണ് ആശങ്ക. നിലവിലെ വിപണി സാഹചര്യം അതിന് അനിയോജ്യമാണ്. 24 മണിക്കൂറിനിടെയാണ് 4680 രൂപ ഒരു പവന് വര്ധിച്ചിരിക്കുന്നത്. ഇനിയും വില കൂടിയേക്കുമെന്നാണ് വ്യാപാരികള് നല്കുന്ന സൂചന.അമേരിക്കയിലെ ഇടക്കാല തെരഞ്ഞെടുപ്പ് ഫലം വിപണിയെ സ്വാധീനിച്ചിരിക്കുന്നു എന്നാണ് വിലയിരുത്തൽ ട്രംപ് പരാജയം ഏറ്റുവാങ്ങിയതിനെത്തുടർന്ന് ക്രൂഡോയിൽ വില കുറഞ്ഞു.മൂന്ന് ദിവസം മുമ്പ് ക്രൂഡ് ഓയില് ബാരല് വില 105 ഡോളറിന് മുകളിലായിരുന്നു. ഇന്ന് 93 ഡോളറായി ഇടിഞ്ഞു. ഇത്രയും വലിയ ഇടിവ് പെട്ടെന്ന് സംഭവിച്ചതോടെ വിപണി താളംതെറ്റി. ഡോളര് സൂചിക ഇടിയാന് തുടങ്ങി. മറ്റു കറന്സികള് മൂല്യം കൂടി. അവ ഉപയോഗിച്ച് കൂടുതല് പേര് സ്വര്ണം വാങ്ങാന് ആരംഭിച്ചതോടെ സ്വര്ണവില കുതിച്ചു.കേരളത്തില് ഇന്ന് ഒരു പവന് സ്വര്ണത്തിന് 2360 രൂപയാണ് കൂടിയത്. ഇന്നലെ രണ്ട് തവണയായി 2400 രൂപയോളം വര്ധിച്ചു. ഇന്ന് ഒരു പവന് സ്വര്ണത്തിന്റെ വില 107080 രൂപയാണ്. ഗ്രാമിന് 13385 രൂപയുമായി. ആഗോള വിപണിയില് സ്വര്ണവില 4140 ഡോളറിലെത്തി. രണ്ട് ദിവസം മുമ്പ് 3800ലായിരുന്നു വില്പ്പന. കേരളത്തില് വെള്ളിയുടെ ഗ്രാം വില 210 ഡോളറായി വര്ധിച്ചു.നിലവില് ഓഹരി വിപണി സജീവമായിട്ടുണ്ട്. അമേരിക്കയിലെ ട്രംപ് ഭരണകൂടത്തിന് ഒറ്റയ്ക്ക് തീരുമാനങ്ങള് എടുത്ത് നടപ്പാക്കാന് സാധിക്കാത്ത അവസ്ഥയാണ്. അതുകൊണ്ടുതന്നെ ട്രംപിന്റെ നയങ്ങള് നടപ്പാക്കല് മരവിച്ചേക്കും. ഈ പ്രതീക്ഷയാണ് വിപണിയെ ഉണര്ത്തിയത്. യുദ്ധം അവസാനിക്കുമെന്ന പ്രതീക്ഷയും വ്യാപിച്ചു. ഡോളറിലേക്കും ബാങ്ക് നിക്ഷേപങ്ങളിലേക്കും മടങ്ങിയവര് തിരിച്ചെത്തി സ്വര്ണം വാങ്ങിക്കൂട്ടാന് തുടങ്ങി.നിലവിലെ ട്രെന്ഡ് തുടര്ന്നാല് സ്വര്ണവില കൂടും. എന്നാല് വലിയ ലാഭം കിട്ടുമെന്ന് മനസിലാക്കി നിക്ഷേപകര് സ്വര്ണം വില്ക്കാന് ആരംഭിച്ചാല് സ്വര്ണവില താഴും. വൈകാതെ ഈ അവസ്ഥയുണ്ടാകുമെന്ന് പ്രതീക്ഷിക്കുന്ന വിപണി നിരീക്ഷകരുമുണ്ട്. എങ്കിലും ഇപ്പോള് വില കയറുന്ന പോലെ വന്തോതില് താഴില്ല. ക്രമേണയായിരിക്കും ആ മാറ്റം സംഭവിക്കുക.പ്രധാന വിദേശ കറൻസികളുമായി ഇന്ത്യൻ രൂപയുടെ ഇന്നത്തെ വിനിമയ നിരക്കുകൾ താഴെ നൽകുന്നു:യു.എസ് ഡോളർ (USD) 94.45 INRയു.എ.ഇ ദിർഹം (AED) 25.68 INRസൗദി റിയാൽ (SAR) 25.14 INRഖത്തർ റിയാൽ (QAR) 25.91 INRഒമാനി റിയാൽ (OMR) 245.64 INRകുവൈറ്റ് ദിനാർ (KWD) 303.96 INRബഹ്റൈനി ദിനാർ (BHD) 250.18 INRയൂറോ (EUR) 106.41 INRബ്രിട്ടീഷ് പൗണ്ട് (GBP) 127.42 INRസിംഗപ്പൂർ ഡോളർ (SGD) 74.04 INRകനേഡിയൻ ഡോളർ (CAD) 67.74 INRഓസ്ട്രേലിയൻ ഡോളർ (AUD) 66.27 INRമലേഷ്യൻ റിംഗിറ്റ് (MYR) 23.29 INR
വിലയിടിഞ്ഞ് ക്രൂഡ്: ബാരലിന് 94 ഡോളറായി, പ്രതീക്ഷയോടെ ആഗോള വിപണി
അമേരിക്കൻ ഇടക്കാല തിരഞ്ഞെടുപ്പിൽ ഡെമോക്രാറ്റിക് പാർട്ടി നേടിയ ചരിത്രപരമായ വിജയത്തിന് തൊട്ടുപിന്നാലെ ആഗോള വിപണിയിൽ അസംസ്കൃത എണ്ണവിലയിൽ വൻ തകർച്ച. ബുധനാഴ്ചത്തെ വ്യാപാരത്തിൽ ഒമ്പതു ശതമാനത്തോളം രേഖപ്പെടുത്തിയ കുത്തനെയുള്ള ഇടിവിനുശേഷം വ്യാഴാഴ്ചയും എണ്ണവില താഴേക്കുതന്നെ നീങ്ങി. ഇന്ത്യ ഉൾപ്പെടെയുള്ള എണ്ണ ഇറക്കുമതിയെ വൻതോതിൽ ആശ്രയിക്കുന്ന വളർന്നുവരുന്ന സമ്പദ്വ്യവസ്ഥകൾക്ക് ആശ്വാസമേകുന്നതാണ് ഈ വിലയിടിവ്.ഇറക്കുമതിച്ചെലവ് കുറയുന്നതും പണപ്പെരുപ്പ ഭീഷണി അയയുന്നതും പ്രാദേശിക വിപണികളിലും അനുകൂല തരംഗം സൃഷ്ടിച്ചേക്കും. പശ്ചിമേഷ്യൻ സംഘർഷത്തിന് നയതന്ത്രപരമായ പരിഹാരം ഉണ്ടായേക്കാമെന്ന വിപണിയുടെ പ്രതീക്ഷകളാണ് എണ്ണവിലയിലെ ഈ പെട്ടെന്നുള്ള തിരുത്തലിന് വഴിവെച്ചത്.ബ്രെന്റ് ക്രൂഡ്: ബാരലിന് 93.51ഡോളറിലേക്ക് താഴ്ന്നു. മുൻ വ്യാപാരത്തേക്കാൾ 1.05 ഡോളറിന്റെ (ഒരു ശതമാനത്തിലധികം) കുറവ്. കഴിഞ്ഞ വ്യാപാരത്തിൽ 8.7 ശതമാനം (8.98 ഡോളർ) ഇടിഞ്ഞ് 94.62 ഡോളറിലാണ് ബ്രെന്റ് ക്രൂഡ് വ്യാപാരം അവസാനിപ്പിച്ചത്.ഡബ്ല്യു.ടി.ഐ. ക്രൂഡ് : ബാരലിന് 87 ഡോളറിന് താഴേക്ക് വില ഇടിഞ്ഞു (1.35 ശതമാനം ഇടിവ്). മുൻ വ്യാപാരത്തിൽ 8.3 ശതമാനം (7.97 ഡോളർ) കുറഞ്ഞ് 88.12 ഡോളറിലായിരുന്നു ക്ലോസിങ്. ഓഗസ്റ്റ് 31-നു ശേഷമുള്ള ഏറ്റവും കുറഞ്ഞ നിരക്കാണിത്.അമേരിക്കയിലെ ആഭ്യന്തര തിരഞ്ഞെടുപ്പ് ഫലം രാജ്യത്തെ ഭരണസംവിധാനത്തെ മാത്രമല്ല ആഗോള ഊർജ സുരക്ഷയെയും വിദേശനയ നിലപാടുകളെയും നേരിട്ട് നിർണയിക്കുന്ന ഘടകമാണ്. വാഷിങ്ടണിലെ ജനപ്രതിനിധി സഭയിലും സെനറ്റിലും ഡെമോക്രാറ്റിക് പാർട്ടി കൈവരിച്ച സമഗ്രമായ വിജയം ട്രംപ് ഭരണകൂടത്തിന് കടുത്ത രാഷ്ട്രീയ തിരിച്ചടിയാണ് നൽകിയിരിക്കുന്നത്.ഇരുസഭകളുടെയും നിയന്ത്രണം ഡെമോക്രാറ്റുകൾ പിടിച്ചെടുത്തതോടെ, ഇറാന് എതിരെയുള്ള സൈനിക നടപടികളിൽ ട്രംപ് ഭരണകൂടത്തിന് കടുത്ത നിയമനിർമ്മാണ നിയന്ത്രണങ്ങൾ നേരിടേണ്ടി വരുമെന്ന് വിലയിരുത്തുന്നു. ഇത് ഇറാനുമായുള്ള യുദ്ധം നയതന്ത്ര ചർച്ചകളിലൂടെ അവസാനിപ്പിക്കാൻ അമേരിക്കൻ ഭരണകൂടത്തെ നിർബന്ധിതരാക്കുമെന്ന പ്രതീക്ഷയിലാണ് സാമ്പത്തിക ലോകം.



