തിരുവനന്തപുരം: സംസ്ഥാനത്ത് ഒറ്റപ്പെട്ട ഇടങ്ങളിൽ ശക്തമായ മഴയ്ക്ക് സാധ്യത. ഇന്ന് ഇടുക്കി, മലപ്പുറം, കണ്ണൂർ, കാസർകോട് ജില്ലകളിൽ യെല്ലോ അലർട്ട് പ്രഖ്യാപിച്ചിട്ടുണ്ട്. മണിക്കൂറിൽ 40 മുതൽ 50 കിലോമീറ്റർ വരെ വേഗതയിൽ കാറ്റ് വീശാനുള്ള സാധ്യതയുണ്ട്.

സംസ്ഥാനത്ത് അതിതീവ്ര മഴക്ക് ശമനമായതോടെ ഇന്നലെ റെഡ് അലർട്ട് എല്ലാം പിൻവലിച്ചിരുന്നു.ഇന്നലെ കണ്ണൂർ, കാസർകോട് ജില്ലകളിലാണ് അതിതീവ്ര മഴ മുന്നറിയിപ്പായ റെഡ‍് അലർട്ട് പ്രഖ്യാപിച്ചിരുന്നത്. റെഡ് അലർട്ട് പിൻവലിച്ചെങ്കിലും ഈ രണ്ട് ജില്ലകളിലും ഓറഞ്ച് അലർട്ട് പ്രഖ്യാപിച്ചിട്ടുണ്ട്. അതായത് അതിശക്ത മഴക്ക് സാധ്യതയെന്നാണ് അറിയിപ്പ്. ഇന്ന് ഇടുക്കി, മലപ്പുറം, കണ്ണൂർ, കാസർകോട് ജില്ലകളിൽ യെല്ലോ അലർട്ട് പ്രഖ്യാപിച്ചിട്ടുണ്ട്. ഇടുക്കി, മലപ്പുറം, വയനാട്, കണ്ണൂർ, കാസർകോട് ജില്ലകളിൽ നാളെ യെല്ലോ അലർട്ട് പ്രഖ്യാപിച്ചിട്ടുണ്ട്

അനധികൃതമായി സേവനങ്ങളിൽ നിന്നും വിട്ടു നിൽക്കുന്ന മെഡിക്കൽ വിദ്യാഭ്യാസ വകുപ്പിന് കീഴിലുള്ള 51 ഡോക്ടർമാരെ സർവീസിൽ നിന്നും നീക്കം ചെയ്യാൻ സർക്കാർ ഉത്തരവിട്ടതായി ആരോഗ്യ മന്ത്രി വീണാ ജോർജ് അറിയിച്ചു. പല തവണ അവസരം നൽകിയിട്ടും സർവീസിൽ പ്രവേശിക്കുന്നതിന് താത്പര്യം പ്രകടിപ്പിക്കാത്ത ജീവനക്കാരെയാണ് നീക്കം ചെയ്തത്. അനധികൃതമായി ജോലിക്ക് ഹാജരാകാത്ത ജീവനക്കാരെ കണ്ടെത്തി റിപ്പോർട്ട് നൽകുന്നതിനും കർശനമായ അച്ചടക്ക നടപടി സ്വീകരിക്കുന്നതിനും വകുപ്പിന് കർശന നിർദ്ദേശം നൽകിയിരുന്നു. ഇതിനെത്തുടർന്നാണ് നടപടി.ഇത്രയധികം നാളുകളായി സർവീസിൽ നിന്നും വിട്ടുനിൽക്കുന്നത് വകുപ്പിന്റെ പ്രവർത്തനത്തെ ബാധിക്കുകയും ഇത്തരം ജീവനക്കാരെ സർവീസിൽ തുടരാനനുവദിക്കുന്നത് സേവനതൽപരരായ അർഹരായ ഉദ്യോഗാർത്ഥികൾക്ക് അവസരം നഷ്ടപ്പെടുത്തുന്നതിന് ഇടയാക്കുകയും ചെയ്യും. അതിനാലാണ് കർശന നടപടി സ്വീകരിച്ചത്.

ഇന്‍ഷുറന്‍സ് ഇല്ലാത്ത വാഹനം എടുക്കാറുണ്ടോ? എങ്കില്‍ മുട്ടന്‍ പണി വരുന്നുണ്ട്… രണ്ടര ലക്ഷം രൂപ വരെ പിഴ വര്‍ധിപ്പിക്കാനുള്ള നിര്‍ദേശങ്ങളാണ് കേന്ദ്ര സര്‍ക്കാര്‍ പരിഗണിക്കുന്നത്. മോട്ടര്‍ വാഹന വകുപ്പില്‍ ഇക്കാര്യങ്ങള്‍ കൂടി ഉള്‍ക്കൊള്ളിച്ചുകൊണ്ടുള്ള ഭേദഗതി സംഭവിക്കുന്നതോടെ ഇന്‍ഷുറന്‍സ് ഇല്ലാതെ വാഹനം എടുക്കുന്നതിനെക്കുറിച്ച് ആരും ചിന്തിക്കാന്‍ പോലും ധൈര്യപ്പെട്ടെന്ന് വരില്ല. നിലവില്‍ ഇന്‍ഷുറന്‍സില്ലാതെ വാഹനം ഓടിക്കുന്നവര്‍ക്ക് രണ്ടായിരം രൂപയാണ് പിഴ. കുറ്റം ആവര്‍ത്തിച്ചാല്‍ പിഴ 4,000 രൂപയായി ഉയരും. നിലവിലെ നിയമപ്രകാരം മൂന്നു മാസം തടവു വരെ ശിക്ഷ ലഭിക്കാവുന്ന കുറ്റമാണിത്. ഇന്‍ഷുറന്‍സ് പ്രീമിയത്തിന് അനുസരിച്ച് പിഴ തുകയും ഉയരുന്ന രീതിയിലേക്ക് മാറ്റാനുള്ള നിര്‍ദേശമാണ് നിലവില്‍ സര്‍ക്കാരിന് മുമ്പാകെ ലഭിച്ചിരിക്കുന്നത്. ആഡംബര വാഹനങ്ങള്‍ ഉപയോഗിക്കുന്നവരുടെ പിഴ ലക്ഷങ്ങളാവുമെന്ന് ചുരുക്കം.

പുതിയ നിര്‍ദേശങ്ങള്‍ പ്രകാരം ആദ്യ തവണ ഇന്‍ഷുറന്‍സ് ഇല്ലാത്ത കുറ്റത്തിന് പ്രീമിയത്തിന്റെ മൂന്നിരട്ടിയും കുറ്റം ആവര്‍ത്തിച്ചാല്‍ അഞ്ചിരട്ടിയുമാണ് പിഴ നല്‍കേണ്ടി വരിക. തേഡ് പാര്‍ട്ടി പ്രീമിയമായി 1500 രൂപയോളം അടക്കുന്ന ഇരുചക്ര വാഹന ഉടമകള്‍ക്ക് നിലവില്‍ രണ്ടായിരം രൂപയാണ് പിഴ നല്‍കേണ്ടി വരുക. പുതിയ നിര്‍ദേശപ്രകാരം ആദ്യ തവണ ഇന്‍ഷുറന്‍സില്ലാത്ത കുറ്റത്തിന് ഇവര്‍ 4,500 രൂപയും ആവര്‍ത്തിച്ചാല്‍ 7,500 രൂപയും അടക്കേണ്ടി വരും. 50,000 രൂപ വരെ ഇന്‍ഷുറന്‍സ് പ്രീമിയം അടക്കുന്ന ആഡംബര കാര്‍ ഉടമകള്‍ക്കാണ് രണ്ടര ലക്ഷം രൂപ വരെ പിഴ ഉയരുക. ഇന്‍ഷുറന്‍സില്‍ മാത്രമായി ഗതാഗത നിയമ പരിഷ്‌ക്കരണ നിര്‍ദേശങ്ങള്‍ ഒതുങ്ങുന്നില്ല. 55 വയസില്‍ കൂടുതല്‍ പ്രായമുള്ളവര്‍ക്ക് ഡ്രൈവിങ് ലൈസന്‍സ് പുതുക്കുമ്പോള്‍ ഡ്രൈവിങ് ടെസ്റ്റ് നടത്താനും നിര്‍ദേശമുണ്ട്. അമിത വേഗത, മദ്യപിച്ചുള്ള വാഹനം ഓടിക്കല്‍ തുടങ്ങിയ ഗുരുതര കുറ്റങ്ങള്‍ നടത്തുന്നവര്‍ക്കും ലൈസന്‍സ് പുനസ്ഥാപിച്ചു കിട്ടാന്‍ ഡ്രൈവിങ് ടെസ്റ്റ് നടത്തണമെന്നതും നിര്‍ദേശങ്ങളിലുണ്ട്. ഉത്തരവാദിത്വമുള്ള വാഹന ഉടമകള്‍ തീര്‍ച്ചയായും ഇന്‍ഷുറന്‍സിന്റെ കാര്യം ശ്രദ്ധിച്ചിരിക്കും. അതുകൊണ്ടുതന്നെ പിഴയെ ചൊല്ലിയുള്ള ആശങ്കകള്‍ മാറ്റിവച്ചുകൊണ്ട് ഇന്‍ഷൂറന്‍സ് അടച്ച ശേഷം മാത്രം വാഹനം ഓടിക്കുകയെന്നതിലേക്കെത്തിക്കാന്‍ ഗതാഗത നിയമ പരിഷ്‌ക്കരണങ്ങള്‍ സഹായിച്ചേക്കും.

കൊച്ചി: തകര്‍ന്ന ഇടപ്പള്ളി – മണ്ണൂത്തി ദേശീയപാതയിലെ ടോള്‍ പിരിവ് മരവിപ്പിച്ച് ഹൈക്കോടതി. ദേശീയപാതയിലെ ഗതാഗത പ്രശ്‌നം പരിഹരിക്കാന്‍ കേന്ദ്ര സര്‍ക്കാര്‍ അടിയന്തിരമായി ഇടപെടണം. ഗതാഗത പ്രശ്‌നം നാലാഴ്ചയ്ക്കകം പരിഹരിച്ച് റിപ്പോര്‍ട്ട് നല്‍കണമെന്നുമാണ് ഡിവിഷന്‍ ബെഞ്ചിന്റെ ഇടക്കാല ഉത്തരവ്.തകര്‍ന്ന പാതയിലെ ടോള്‍ പിരിവിലാണ് കേന്ദ്ര സര്‍ക്കാരിനും ദേശീയപാതാ അതോറിറ്റിക്കും തിരിച്ചടിയായ ഹൈക്കോടതി ഉത്തരവ്. തകര്‍ന്ന ദേശീയപാതയിലെ ടോള്‍ പിരിവാണ് പ്രശ്നമെന്ന് നിരീക്ഷിച്ചാണ് ഹൈക്കോടതിയുടെ നടപടി. ഇടക്കാല ഉത്തരവനുസരിച്ച് പാലിയേക്കര ടോള്‍ പ്ലാസയില്‍ നാലാഴ്ചത്തേക്ക് ടോള്‍ പിരിവ് പാടില്ല. ദേശീയപാതയിലെ ഗതാഗത പ്രശ്‌നം പരിഹരിക്കാന്‍ കേന്ദ്ര സര്‍ക്കാര്‍ അടിയന്തിരമായി ഇടപെടണം. സര്‍വീസ് റോഡുകള്‍ ഉടന്‍ ഗതാഗത യോഗ്യമാക്കണം. പ്രശ്‌നം പരിഹരിച്ച് നാലാഴ്ചയ്ക്കകം റിപ്പോര്‍ട്ട് നല്‍കണമെന്നുമാണ് ഹൈക്കോടതിയുടെ ഇടക്കാല ഉത്തരവ്.

പൗരന്മാരാണ് ടോള്‍ പിരിവിന്റെ ബാധ്യതയേല്‍ക്കേണ്ടി വരുന്നതെന്ന വിമര്‍ശനം ഉയര്‍ത്തിയാണ് ജസ്റ്റിസുമാരായ എ മുഹമ്മദ് മുഷ്താഖ്, ജോണ്‍സണ്‍ ജോണ്‍ എന്നിവര്‍ ഉള്‍പ്പെട്ട ഡിവിഷന്‍ ബെഞ്ചിന്റെ നടപടി. ദേശീയപാതാ അതോറിറ്റി ഒരുമാസം മുന്‍പ് നല്‍കിയ വാക്ക് പാലിച്ചില്ലെന്നായിരുന്നു ഹൈക്കോടതി നേരത്തെ ഉയര്‍ത്തിയ വിമര്‍ശനം.രണ്ടാഴ്ചയ്ക്കകം പ്രശ്നം പരിഹരിക്കാനാകുമെന്നാണ് ഒരു മാസം മുന്‍പ് അറിയിച്ചത്. എത്രനാള്‍ക്കകം പ്രശ്നം പരിഹരിക്കാനാകുമെന്നും ആയിരുന്നു കഴിഞ്ഞ തവണ ഹര്‍ജി പരിഗണിക്കവെ ദേശീയപാതാ അതോറിറ്റിയോടുള്ള ചോദ്യം. ദേശീയപാതയിലെ ഗതാഗതപ്രശ്നം മൂന്നാഴ്ചയ്ക്കകം പ്രശ്നം പരിഹരിക്കാനാകുമെന്ന് ആയിരുന്നു ദേശീയപാതാ അതോറിറ്റി തിങ്കളാഴ്ച നല്‍കിയ വിശദീകരണം.

തിരുവനന്തപുരം : ഓണത്തിനു സബ്‌സിഡി നിരക്കില്‍ രണ്ടു ലിറ്റര്‍ വെളിച്ചെണ്ണ സപ്ലൈകോയിലൂടെ നല്‍കുമെന്ന് മന്ത്രി ജി.ആര്‍.അനില്‍. എല്ലാ റേഷന്‍ കാര്‍ഡ് ഉടമകള്‍ക്കും കാര്‍ഡ് ഒന്നിന് രണ്ടു ലീറ്റര്‍ വെളിച്ചെണ്ണ നല്‍കുമെന്നാണ് മന്ത്രി അറിയിച്ചത്. സര്‍ക്കാര്‍ ഇടപെടലിലൂടെ സംസ്ഥാനത്ത് വെളിച്ചെണ്ണ വില ഇനിയും കുറയുമെന്നും അദ്ദേഹം പറഞ്ഞു.

ഈ മാസം ഒരു റേഷന്‍ കാര്‍ഡിന് ഒരു ലീറ്റര്‍ വെളിച്ചെണ്ണ സബ്‌സിഡി നിരക്കില്‍ 349 രൂപ നിരക്കില്‍ സപ്ലൈകോയിലൂടെ ലഭിക്കും. അതേ കാര്‍ഡുകാരന് അടുത്ത മാസവും നാലാം തീയതി വരെ സബ്‌സിഡി നിരക്കില്‍ വെളിച്ചെണ്ണ വാങ്ങാവുന്നതാണ്. അഞ്ചാം തീയതി ഓണത്തിനു സബ്‌സിഡി നിരക്കില്‍ വെളിച്ചെണ്ണ നല്‍കുന്നുണ്ട്. ഇതുപ്രകാരം ഓണത്തിന് ഒരു കാര്‍ഡുകാരന് സബ്‌സിഡി നിരക്കില്‍ രണ്ടു ലീറ്റര്‍ വെളിച്ചെണ്ണ ലഭിക്കുന്ന സ്ഥിതിയുണ്ടാകും. വിപണിയിലെ മോശം വെളിച്ചെണ്ണ വില്‍പ്പന കണ്ടെത്താന്‍ ഭക്ഷസുരക്ഷാ വകുപ്പിനു നിര്‍ദേശം നല്‍കിയിട്ടുണ്ടെന്നും ജി.ആർ.അനിൽ പറഞ്ഞു.