കോഴിക്കോട് : സംസ്ഥാന സ്കൂള് കായികമേള അഞ്ചാം ദിനത്തിലേക്ക് കടക്കുമ്പോഴും മാറ്റുരയ്ക്കുന്ന വരുംകാല കായികതാരങ്ങള്ക്ക് അതേ ഊര്ജ്ജവും ഉന്മേഷവും പകര്ന്ന് മേളയിലെ പ്രത്യേക പോഷകാഹാര വിരുന്ന്. മേളയുടെ ആദ്യദിനം മുതല് ഒരു തടസ്സവുമില്ലാതെ, ഗുണനിലവാരത്തിലും ശുചിത്വത്തിലും ഒട്ടും വിട്ടുവീഴ്ച ചെയ്യാതെയാണ് ഭക്ഷണവിതരണം മുന്നേറുന്നത്. കലാ, കായികമേളകളില് വര്ഷങ്ങളുടെ പരിചയസമ്പത്തുള്ള പാചകവിദഗ്ദ്ധന് പഴയിടം മോഹനന് നമ്പൂതിരിയുടെ നേതൃത്വത്തിലാണ് ആയിരക്കണക്കിന് കായികപ്രതിഭകള്ക്കും സംഘാടകര്ക്കും മേളയുമായി ബന്ധപ്പെട്ട് പ്രവര്ത്തിക്കുന്നവര്ക്കും ദിവസവും രുചികരവും ആരോഗ്യദായകവുമായ ഭക്ഷണം ഒരുങ്ങുന്നത്.കലാമേളകളില് നിന്ന് വ്യത്യസ്തമായി, കായികതാരങ്ങളുടെ ശരീരത്തിന് ആവശ്യമായ കലോറിയും പ്രോട്ടീനും കൃത്യ അളവില് ഉറപ്പുവരുത്തുന്ന സര്ക്കാരിന്റെ പ്രത്യേക മെനുവാണ് ഇക്കഴിഞ്ഞ അഞ്ച് ദിവസങ്ങളിലും വിളമ്പിയത്. പാല്, മുട്ട, ചിക്കന്, ബീഫ് തുടങ്ങിയ പോഷകസമ്പുഷ്ടമായ ഭക്ഷണപദാര്ത്ഥങ്ങള് ഉള്പ്പെടുത്തിയുള്ള മെനുവാണ് താരങ്ങള്ക്ക് സമയാസമയങ്ങളില് വിളമ്പുന്നത്. പ്രതിദിനം 8,000 മുതല് 10,000 വരെ ആളുകളാണ് വിവിധ വേദികളിലായി ഭക്ഷണം കഴിക്കുന്നത്. ഇതിനായി നൂറോളം വരുന്ന വിദഗ്ദ്ധ ജീവനക്കാരാണ് രാത്രിയെന്നോ പകലെന്നോ വ്യത്യാസമില്ലാതെ 24 മണിക്കൂറും പാചകപ്പുരയില് സജീവമായി പ്രവര്ത്തിക്കുന്നത്. 2001-ല് എറണാകുളത്ത് നടന്ന കായികമേള മുതല് തുടര്ച്ചയായി മേളകളില് സ്വാദിന്റെ വിസ്മയം തീര്ക്കുന്ന പഴയിടം, കൃത്യമായ മാനേജ്മെന്റിലൂടെയാണ് കഴിഞ്ഞ നാല് ദിവസങ്ങളായി ആയിരങ്ങളുടെ മനസ്സും വയറും നിറയ്ക്കുന്നത്.പത്ത് വേദികളിലായി നടക്കുന്ന മത്സരങ്ങള്ക്കായി രണ്ടിടങ്ങളിലാണ് പ്രധാനമായും പാചകപ്പുരകള് പ്രവര്ത്തിക്കുന്നത്. ഇവിടെ നിന്ന് തയ്യാറാക്കുന്ന ഭക്ഷണമാണ് മറ്റ് വേദികളിലേക്ക് കൃത്യസമയത്ത് എത്തിച്ചുനല്കുന്നത്. മേളയുടെ ആദ്യ ദിനം മുതല് തന്നെ ഭക്ഷണത്തിന്റെ ഗുണനിലവാരത്തോടൊപ്പം തന്നെ പരിപൂര്ണ്ണമായ ശുചിത്വത്തിനും വന് പ്രാധാന്യമാണ് സര്ക്കാരും ഭക്ഷണക്കമ്മിറ്റിയും നല്കുന്നത്. പാചകപ്പുരയും കലവറയും പൂര്ണ്ണമായും വൃത്തിയായും സൂക്ഷിക്കുന്നതില് സംഘാടകര് തുടക്കം മുതല് അതീവ ജാഗ്രത പുലര്ത്തുന്നുണ്ട്. ജനപ്രതിനിധികള്, ഉദ്യോഗസ്ഥര്, അധ്യാപകര്, ഭക്ഷണക്കമ്മിറ്റി അംഗങ്ങള് എന്നിവര്ക്കൊപ്പം നാട്ടുകാരും പൂര്ണ്ണ പിന്തുണയുമായി മുന്നിട്ടിറങ്ങിയതോടെ കായികമേളയിലെ ഭക്ഷണവിതരണം വന് വിജയകരമായി നാലാം ദിനവും പിന്നിടുകയാണ്.
പൂനൂരിൽ സ്കൂൾ കുട്ടികൾ ഉപയോഗിച്ച ഇരുചക്രവാഹനങ്ങൾ പോലീസ് പിടിച്ചെടുത്തു..
പൂനൂർ: ലൈസൻസില്ലാതെ കൗമാരക്കാർ വാഹനം ഓടിക്കുന്നതിനെതിരെ പരിശോധന ശക്തമാക്കി ബാലുശ്ശേരി പോലീസ്. സ്കൂൾ പരിസരങ്ങളിൽ വാഹനങ്ങളുമായി കുട്ടികളുടെ റോഡിലൂടെയുള്ള അഭ്യാസങ്ങളെക്കുറിച്ച് പ്രാദേശിക ഓൺലൈൻ മാധ്യമങ്ങളിൽ വന്ന വാർത്തകൾക്ക് പിന്നാലെയാണ് നടപടി.പൂനൂർ ഗവ.ഹയർസെക്കൻഡറി സ്കൂളിൽ മഫ്തിയിലെത്തിയ പോലീസ് സംഘം വിദ്യാർത്ഥികൾ ഉപയോഗിച്ചിരുന്ന 25-ഓളം ബൈക്കുകളും, സ്കൂട്ടറുകളും കസ്റ്റഡിയിലെടുത്തു. ബുധനാഴ്ച വൈകീട്ട് നാലുമണിയോടെ സ്കൂൾ വിടാൻ ബെല്ലടിച്ചതിന് പിന്നാലെയാണ് നാടകീയ രംഗങ്ങൾ അരങ്ങേറിയത്.മഫ്തിയിലെത്തിയ പോലീസ് സംഘം വണ്ടികൾ പാർക്ക് ചെയ്തിരുന്ന ഭാഗങ്ങളിൽ നേരത്തെ തന്നെ നിലയുറപ്പിച്ചിരുന്നു. സ്കൂൾ വിട്ടിറങ്ങി വണ്ടിയെടുത്ത് വീട്ടിലേക്ക് പോകാൻ തുടങ്ങിയ വിദ്യാർത്ഥികളെ പോലീസ് തടയുകയായിരുന്നു. പരിഭ്രാന്തരായ വിദ്യാർത്ഥികൾ വാഹനങ്ങൾ ഉപേക്ഷിച്ച് ഓടിരക്ഷപ്പെട്ടു. തുടർന്ന് ഇരുചക്രവാഹനങ്ങൾ പോലീസ് കസ്റ്റഡിയിലെടുത്ത് സ്റ്റേഷനിലേക്ക് മാറ്റി. പ്രായപൂർത്തിയാവാത്ത കുട്ടികൾ വാഹനം ഉപയോഗിക്കുന്നത് നിയമവിരുദ്ധമായതിനാൽ ആർസി ഉടമസ്ഥരെ കണ്ടെത്തി തുടർനടപടികളിലേക്ക് നീങ്ങാൻ ഒരുങ്ങുകയാണ് പോലീസ്.
മുന് എംഎല്എമാരുടെ മിനിമം പെന്ഷന് കൂട്ടി; അഞ്ച് വര്ഷം പൂര്ത്തിയാക്കിയവര്ക്ക് ലഭിക്കുക 25000 രൂപ പെന്ഷന്
തിരുവനന്തപുരം: മുന് എംഎല്എമാരുടെ മിനിമം പെന്ഷന് കൂട്ടി. രണ്ട് വര്ഷം എംഎല്എയായിരുന്നവര്ക്കുള്ള പെന്ഷന് 8000 രൂപ എന്നത് 10,000 രൂപയാക്കി. മൂന്ന് വര്ഷം എംഎല്എ ആയിരുന്നവര്ക്ക് പെന്ഷനായി ലഭിക്കുക 15,000 രൂപയാണ്. നിലവിലെ പെന്ഷന് 12,000 രൂപയായിരുന്നു. നാല് വര്ഷം എംഎല്എ ആയിരുന്നവര്ക്ക് ലഭിക്കുക 20000 രൂപ പെന്ഷനാണ്. മുമ്പ് 16,000 രൂപയയിരുന്നു നാല് വര്ഷം പൂര്ത്തിയാക്കിയ ജനപ്രതിനിധികള്ക്ക് നല്കുന്ന പെന്ഷന്. അഞ്ച് വര്ഷം എംഎല്എ ആയിരുന്നവര്ക്ക് ലഭിക്കുക 25000 രൂപയാണ് മുമ്പ് 20000 രൂപയായിരുന്ന തുകയാണ് ഈ വിധത്തില് കൂട്ടിയിരിക്കുന്നത്അഞ്ച് വര്ഷത്തില് കൂടുതല് എംഎല്എ ആയിരുന്നവര്ക്ക് കൂടുതലുള്ള ഓരോ വര്ഷവും അധിക പെന്ഷന് ലഭിക്കും. മുന് അംഗങ്ങള്ക്ക് 70 വയസ് പൂര്ത്തിയാകുന്ന മുറയ്ക്ക് പ്രതിമാസം 4000 രൂപ അധികമായി ലഭിക്കും.ഇതോടൊപ്പം മന്ത്രിമാരുടെ ശമ്പളവും എംഎല്എമാരുടെ അലവന്സും കൂട്ടാനുള്ള ബില്ലുകള് നിയമസഭയില് എത്തിയിട്ടുണ്ട്. ഗവര്ണറുടെ അനുമതി ലഭിച്ചശേഷം ഇന്ന് രാവിലെയാണ് ബില് സഭയില് വച്ചത്. എംഎല്എമാരുടെ അലവന്സ് 70,000 രൂപയില് നിന്ന് 98,000 രൂപയാകും. മന്ത്രിമാരുടെയും പ്രതിപക്ഷ നേതാവിന്റെയും ശമ്പളം 1,08,000 രൂപയില് നിന്ന് 1,22,000 രൂപയായി വര്ദ്ധിക്കും.
നിപ രോഗികള്ക്ക് നല്കിയത് കാലാവധി കഴിഞ്ഞ മരുന്നുകളെന്ന് സംശയം; അന്വേഷണത്തിന് ഉത്തരവിട്ട് മന്ത്രി കെ മുരളീധരൻ
തിരുവനന്തപുരം: നിപ രോഗികള്ക്ക് നല്കിയത് കാലാവധി കഴിഞ്ഞ മരുന്നുകളാണെന്ന് സംശയമെന്ന് ആരോഗ്യമന്ത്രി കെ മുരളീധരൻ നിയമസഭയിൽ വ്യക്തമാക്കി. സംഭവത്തില് അന്വേഷണം പ്രഖ്യാപിച്ചെന്നും ആരോഗ്യ വകുപ്പ് മന്ത്രി കെ മുരളീധരന് പറഞ്ഞു. നിപ രോഗികള്ക്ക് കാലാവധി കഴിഞ്ഞ റെംഡെസിവര് മരുന്ന് വിതരണം ചെയ്തതായി ആണ് ആരോഗ്യവകുപ്പിന്റെ സംശയം. 2023, 24, 25 വര്ഷങ്ങളില് കാലാവധി കഴിഞ്ഞ മരുന്ന് വിതരണം ചെയ്തതായി സംശയിക്കുന്നുവെന്ന് മന്ത്രി കെ മുരളീധരന് നിയമസഭാ സമ്മേളനത്തിനിടെ വിശദീകരിക്കുകയായിരുന്നു. എംഎല്എ മാത്യു കുഴല്നാടന് സമര്പ്പിച്ച സബ്മിഷനിലാണ് മന്ത്രിയുടെ വിശദീകരണം.നിപ, കോവിഡ് രോഗികള്ക്ക് നല്കിയത് കാലാവധി കഴിഞ്ഞ മരുന്നാണ്. മരുന്ന് നല്കിയ മുഴുവന് രോഗികളുടെയും വിവരങ്ങള് എടുക്കാന് നിര്ദ്ദേശം നല്കിയിട്ടുണ്ട്. ഈ മൂന്നു വര്ഷങ്ങളിലായി ആറ് നിപാ മരണം റിപ്പോര്ട്ട് ചെയ്തിട്ടുണ്ട്. കാലാവധി കഴിഞ്ഞ മരുന്ന് മൂലമാണോ മരണമെന്ന് അന്വേഷിക്കും. ഇതിനായി മെഡിക്കല് ബോര്ഡ് രൂപീകരിക്കുമെന്നും ആരോഗ്യമന്ത്രി വ്യക്തമാക്കി. തിരുവനന്തപുരം മെഡിക്കല് കോളേജ് ഇന്ഫിഷ്യസ് ഡിസീസ് മേധാവി ഡോ. അരവിന്ദിന്റെ നേതൃത്വത്തിലുള്ള മെഡിക്കല് ബോര്ഡിനാണ് അന്വേഷണ ചുമതല.നിപ, കോവിഡ് പോലുള്ള അസുഖങ്ങള്ക്ക് നല്കി വരുന്ന ആൻ്റി വൈറൽ മരുന്നാണ് Rendesivir. അടിയന്തര സാഹചര്യം നേരിടുന്നതിന്റെ ഭാഗമായി രോഗികളുടെ ചികിത്സയ്ക്കും ജീവന് രക്ഷാ ആവശ്യങ്ങള്ക്കുമായി Rendesivir മരുന്ന് ആരോഗ്യവകുപ്പ് സ്ഥാപനങ്ങളിലേക്ക് എത്തിക്കുന്നത്. അവസാനമായി 03-06-2021-ലാണ് KMSCL കാരുണ്യ വഴിയാണ് Rendesivir വാങ്ങിയത്. വിതരണം ചെയത Remdesivir മരുന്നിന്റെ എക്സ്പയറി ഡേറ്റ് 30-05-2023 ആയിരുന്നു. മരുന്ന് കാരുണ്യ വഴി മാത്രമേ വാങ്ങിയിട്ടുള്ളൂ. ഇപ്രാവശ്യം 2026 ജൂണ് 12ന് ബെഹറിനില് നിന്ന് വരുത്തിയാണ് നിപ രോഗിക്ക് മരുന്ന് നല്കിയത്. അങ്ങനെയാണെങ്കില് കോഴിക്കോട് മെഡിക്കല് കോളേജില് നിന്ന് 2023, 2024, 2025 വര്ഷങ്ങളില് രോഗികള്ക്ക് നല്കിയ Rendesivir മരുന്ന് കാലാവധി കഴിഞ്ഞിരുന്നതാണെന്നാണ് ആരോഗ്യവകുപ്പിന്റെ സംശയം. നിയമസഭയില് മന്ത്രി കെ മുരളീധരന് സമര്പ്പിച്ച രേഖകളിലാണ് ഇക്കാര്യങ്ങള് വ്യക്തമാക്കുന്നത്.
അഞ്ച് മരണം, തകർന്നത് നൂറിലേറെ വീടുകൾ, വ്യാപക കൃഷിനാശം; ഒടുവിൽ അർണബ് ചുഴലിക്കാറ്റിന്റെ ശക്തിക്ഷയിച്ചു.
ചെന്നൈ:തീരദേശ മേഖലകളിൽ നാശം വിതച്ച അർണബ് ചുഴലിക്കാറ്റ് ശക്തി ക്ഷയിച്ച് ന്യൂനമർദമായി മാറി. യാനം, ആന്ധ്രാപ്രദേശ്, ഒഡീഷ മേഖലകളിൽ അത്രയേറെ നാശമാണ് അർണബ് വിതച്ചത്. ആന്ധ്രയിൽ അഞ്ച് മരണം റിപ്പോർട്ട് ചെയ്തു. പത്ത് മണിക്കൂറിൽ അധികം നീണ്ട ലാൻഡ് ഫാൾ.അതിതീവ്ര ചുഴലിക്കാറ്റായി മാറിയതു മുതൽ തന്നെ ആന്ധ്രാപ്രദേശ് തീരത്തുണ്ടായ ശക്തമായ കാറ്റും മഴയും. അർണബിന്റെ സംഹാരതാണ്ഡവമായിരുന്നു തീരദേശ മേഖലകളിൽ ഇന്നലെ കണ്ടത്. 125 മുതൽ 150 കിലോമീറ്റർ വരെയായിരുന്നു കാറ്റിൻ്റെ വേഗം.വൈദ്യുതാഘാതമേറ്റും മരംവീണും ആന്ധ്രാപ്രദേശിൽ അഞ്ച് ജീവനുകൾ പൊലിഞ്ഞു. 70,900 ഹെക്ടർ സ്ഥലത്തെ നെൽകൃഷി ഉൾപ്പെടെ, 81,350 ഹെക്ടർ സ്ഥലത്തെ കാർഷിക വിളകൾ പൂർണമായും നശിച്ചു. പതിനൊന്ന് ജില്ലകളിലായി 25 ലക്ഷത്തോളം വീടുകളിലും സ്ഥാപനങ്ങളിലും വൈദ്യുതി നിലച്ചു. മരങ്ങൾക്കൊപ്പം വൈദ്യുതി കാലുകളും വ്യാപകമായി ഒടിഞ്ഞുവീണു.നൂറിലധികം വീടുകൾക്ക് സാരമായ കേടുപാടുകൾ സംഭവിച്ചു. കൊനസീമ, കാക്കിനഡ, വിശാഖപട്ടണം, യാനം തുടങ്ങിയ മേഖലകളിലാണ് വ്യാപക നഷ്ടം ഉണ്ടായത്. 30 സെന്റിമീറ്റർ വരെ മഴയാണ് പലയിടങ്ങളിലും പെയ്തത്. കാറ്റൊഴിഞ്ഞെങ്കിലും പല മേഖലകളും ഇപ്പോഴും വെള്ളക്കെട്ടിലാണ്. ഒഡീഷ, പശ്ചിമബംഗാൾ, ഝാർഖണ്ഡ് തുടങ്ങിയ സംസ്ഥാനങ്ങളിലും അർണബിന്റെ പ്രഭാവത്താൽ ശക്തമായ കാറ്റും മഴയും ഉണ്ടായി. ഇവിടങ്ങളിലും നാശനഷ്ടങ്ങൾ റിപ്പോർട്ട് ചെയ്തു.
പാലക്കാട് 2 കുഞ്ഞുങ്ങളെ വെള്ള ടാങ്കില് മരിച്ചനിലയില് കണ്ടെത്തിയ കേസ്; അമ്മയുടെ ആണ് സുഹൃത്ത് കസ്റ്റഡിയില്
പാലക്കാട്: പാലക്കാട് കൊഴിഞ്ഞാമ്പാറ മേനോന്പാറയില് രണ്ടു കുഞ്ഞുങ്ങളെ വെള്ള ടാങ്കില് മരിച്ചനിലയില് കണ്ടെത്തിയ കേസില് പ്രതിയായ അമ്മ നിവേദ്യയുടെ ആണ് സുഹൃത്ത് കസ്റ്റഡിയില്. കൊലപാതകത്തില് ഇയാള്ക്ക് നേരിട്ട് പങ്കുണ്ടെന്ന് കൊഴിഞ്ഞാമ്പാറ പൊലീസ് അറിയിച്ചു. പ്രതി നിവേദ്യ താമസിച്ച വാടക വീടിന്റെ അടുത്തുള്ള ആളാണ് പൊലീസിന്റെ പിടിയിലായത്.സെപ്റ്റംബര് 29 നാണ് അഞ്ച് വയസ്സുകാരി ജെനിഫര്, മൂന്നു വയസ്സുകാരനായ സഹോദരന് റോബിന് എന്നിവര് വീടിന് മുന്നിലെ കുളിമുറിയിലെ സിമന്റ് ടാങ്കില് വീണ് മരിച്ചത്. കുട്ടികളുടെ പോസ്റ്റ്മോര്ട്ടം നടപടികള് പൂര്ത്തീകരിച്ചെങ്കിലും തെളിവുകള് ലഭിച്ചിരുന്നില്ല. എന്നാല് കുടുംബാംഗങ്ങള് സംശയം ഉന്നയിച്ചതിനെ തുടര്ന്നാണ് പൊലീസ് വിശദമായ ചോദ്യം ചെയ്യല് നടത്തുകയും ഇവര് കുറ്റസമ്മതം നടത്തുകയും ചെയ്തത്. കുട്ടികളുടെ പിതാവ് ജോണ് കുമാര് വീട്ടില് ഇല്ലാതിരുന്ന സമയത്താണ് സംഭവം നടന്നത്.സംഭവത്തില് പൊലീസ് അറസ്റ്റ് ചെയ്ത സമയത്ത് തനിക്ക് ജോലിക്ക് പോകണമെന്നും കുട്ടികള് അതിന് തടസ്സമാകുന്നുവെന്നുമായിരുന്നു നിവേദ്യ പറഞ്ഞത്. തന്റെ സ്വതന്ത്രമായ ജീവിതത്തിന് മക്കള് തടസ്സമാണ്. മോഡലിങിന് പോകാനാണ് താത്പര്യമെന്നും പ്രതി വെളിപ്പെടുത്തിയിരുന്നു. സംഭവം നടന്ന് ഒരു മാസത്തിന് ശേഷം ഇന്നാണ് പൊലീസിന് നിവേദ്യയെ കസ്റ്റഡിയില് ലഭിച്ചത്. തുടര്ന്ന് നടത്തിയ ചോദ്യം ചെയ്യലിലാണ് ആണ്സുഹൃത്തിന്റെ പങ്ക് പുറത്തുവന്നിരിക്കുന്നത്.
ഒളിവിലായിരുന്ന യൂട്യൂബര് ഖാദര് കരിപ്പൊടി കീഴടങ്ങി
കാസര്കോട്: പ്രവാസി വ്യവസായിയെ വധിക്കാന് ശ്രമിച്ചെന്ന കേസില് യൂട്യൂബര് ഖാദര് കരിപ്പൊടി കാസര്കോട് ടൗണ് പൊലീസില് കീഴടങ്ങി. കേസില് ഖാദർ സമർപ്പിച്ച മുന്കൂര് ജാമ്യാപേക്ഷ കഴിഞ്ഞ ദിവസം സുപ്രിംകോടതി തള്ളിയിരുന്നു. അന്വേഷണസംഘത്തിന് മുന്നില് ഹാജരാകണമെന്ന് കോടതി നിര്ദേശിക്കുകയുമുണ്ടായി. പിന്നാലെയാണ് കീഴടങ്ങല്. ഖാദര് കരിപ്പൊടി കഴിഞ്ഞ നാല് മാസമായി ഒളിവിലായിരുന്നു.നേരത്തെ, കാസര്കോട് ജില്ലാ സെഷന്സ് കോടതിയും ഹൈക്കോടതിയും ഇയാളുടെ മുന്കൂര് ജാമ്യാപേക്ഷ തള്ളിയിരുന്നു. കേസിന്റെ ഗൗരവവും പ്രതിക്കെതിരായ മുന്കാല കേസുകളും പരിഗണിച്ചാണ് കോടതികള് ജാമ്യം നിഷേധിച്ചിരുന്നത്.പന്നിക്കര സ്വദേശിയായ അബ്ദുല് അഹദിനെ ആക്രമിച്ച സംഭവത്തില് ഖാദറിന് പുറമെ റാഷിദ് എന്ന സാക്കി, അഷ്റഫ് എന്നിവര്ക്കെതിരെയും കാസര്കോട് ടൗണ് പൊലീസ് കേസെടുത്തിരുന്നു. ഗള്ഫില് വെച്ചുനടന്ന സാമ്പത്തിക ഇടപാടുമായി ബന്ധപ്പെട്ട പ്രശ്നങ്ങളെ തുടര്ന്നായിരുന്നു ആക്രമണം. അബ്ദുല് അഹദിന് മുഖത്തും കൈകാലുകള്ക്കും ഗുരുതരമായി പരിക്കേറ്റിരുന്നു.ഖാദര് കരിപ്പൊടിയും സംഘവും ചേര്ന്ന് ഇന്റര്ലോക്ക് കട്ടകള് ഉപയോഗിച്ച് ആക്രമിച്ചുവെന്നും പേനാക്കത്തി ഉപയോഗിച്ച് കുത്തിക്കൊലപ്പെടുത്താന് ശ്രമിച്ചെന്നും അഹദ് പരാതിപ്പെട്ടിരുന്നു. ഖാദര് കരിപ്പൊടിക്കെതിരെ വിവിധ സ്റ്റേഷനുകളിലായി പത്തോളം കേസുകളുണ്ടെന്നാണ് വിവരം. ഇതാണ് മുന്കൂര് ജാമ്യാപേക്ഷകളില് തിരിച്ചടി വിളിച്ചുവരുത്തിയത്. ഏഴ് വര്ഷം വരെ തടവ് ലഭിച്ചേക്കാവുന്ന വകുപ്പുകളും പ്രതികള്ക്ക് മേല് ചുമത്തിയിട്ടുണ്ട്.
ജീവിതത്തിലെ ആദ്യ അനുഭവം, ധൈര്യമായി എങ്ങനെ ജോലി ചെയ്യും: ഭക്ഷണത്തിലെ പുഴു വിവാദത്തില് പഴയിടം
കോഴിക്കോട്: സംസ്ഥാന സ്കൂള് കായികമേളയിലെ ഭക്ഷണത്തില് പുഴുവിനെ കണ്ടെത്തിയെന്ന ആരോപണം പൂര്ണ്ണമായും നിഷേധിച്ച് പഴയിടം മോഹനന് നമ്പൂതിരി. പിന്നില് കൃത്യമായ അജണ്ടയുണ്ടെന്നും ഇത് തന്റെ ജീവിതത്തിലെ ആദ്യ അനുഭവമാണെന്നും പഴയിടം മോഹനന് നമ്പൂതിരി പറഞ്ഞു. ‘കലോത്സവ ചരിത്രത്തില് കൂടി ആദ്യമാണിത്. ഇത്രയും ഹീനമായ രീതിയില് പ്രവര്ത്തിക്കണമെങ്കില് എന്തൊക്കെ മാനസിക വൈകൃതമുള്ളയാളാവണം. ഇതിന്റെ പിന്നില് കൃത്യമായ അജണ്ടയുണ്ട്. അത് പുറത്തുവരണം. ഇത്തരമൊരു സംഭവം ഉണ്ടാകില്ലെന്ന് ഉറപ്പാണ്’, പഴയിടം മോഹനന് നമ്പൂതിരി പറഞ്ഞു.ആദ്യദിവസത്തെ വാര്ത്ത കണ്ടപ്പോള് തന്നെ ഭക്ഷണ കമ്മിറ്റി കണ്വീനറോട് സംസാരിച്ചിരുന്നുവെന്നും ആരോപണം വ്യാജമാണെന്നും ഇതിനെക്കുറിച്ച് അന്വേഷിക്കണം എന്നുമായിരുന്നു ആവശ്യം എന്നും പഴയിടം വ്യക്തമാക്കി. ‘ഏതൊരു പാചകക്കാരനും എത്രമാത്രം ഭീതിയോടെയാകും ഓരോ കലോത്സവങ്ങള്ക്കും പാചകം ചെയ്യുക. കേരളത്തിലെ മേളകള് തുടങ്ങിയതേയുള്ളൂ. ഏതെല്ലാം മേളകള് വരാന് കിടക്കുന്നു. എങ്ങനെ ധൈര്യമായി ജോലി ചെയ്യാന് പറ്റും. ഇപ്പോള് പുഴുവിട്ടയാള് മറ്റെന്തെങ്കിലും ചെയ്യില്ലെന്ന് എന്താണ് ഉറപ്പ്. അന്വേഷിച്ച് പിന്നിലെ ശക്തിക്കളെ കണ്ടെത്തണം. മാതൃകാപരമായി ശിക്ഷിക്കണം. കായികമേള മൂന്ന് ദിവസം കൂടിയുണ്ട്. സുരക്ഷ ശക്തമാക്കാന് ആവശ്യപ്പെട്ടിട്ടുണ്ട്’, എന്നും പഴയിടം പറഞ്ഞു.അതേസമയം ഭക്ഷണത്തില് പുഴുവിനെ കണ്ടെന്ന് ആരോപിച്ച അധ്യാപകന്റെ അറസ്റ്റ് രേഖപ്പെടുത്തി. പെരുമ്പാവൂര് വെങ്ങോല ശലേം സ്കൂളിലെ കായിക അധ്യാപകന് ജിജോ ജെയിംസിനെയാണ് കസ്റ്റഡിയിലെടുത്ത് അറസ്റ്റ് രേഖപ്പെടുത്തിയത്. കായിക മേളയ്ക്കിടെ കലാപം ഉണ്ടാക്കാന് ശ്രമിച്ചു, സാമ്പാറില് നിന്ന് ലഭിച്ചെന്ന വ്യാജേന പുഴുവിനെ പ്രദര്ശിപ്പിച്ചെന്നും എഫ്ഐആറില് ആരോപിക്കുന്നു.ഇന്നലെ രാവിലെയായിരുന്നു കായികമേളയ്ക്കിടെ വിളമ്പിയ സാമ്പാറില് പുഴുവെന്ന ആരോപണം ഉയര്ന്നത്. സംഭവം വലിയ ചര്ച്ചകള്ക്ക് വഴിവെച്ചതോടെ അധ്യാപകന് ജിജോ ജെയിംസ് തനിക്ക് പരാതിയില്ലെന്ന് എഴുതി നല്കിയിരുന്നു. എന്നാല് ഇദ്ദേഹത്തെ കസ്റ്റഡിയിലെടുത്ത് അറസ്റ്റ് രേഖപ്പെടുത്തുകയായിരുന്നു.
കായികമേളയിലെ ഭക്ഷണത്തിൽ പുഴു കണ്ടെന്ന വ്യാജപ്രചാരണം: കായികാധ്യാപകൻ ജിജോ ജെയിംസിനെ സസ്പെൻഡ് ചെയ്തു; സംഭവത്തിന് പിന്നിൽ ഗൂഢാലോചനയെന്ന് വിദ്യാഭ്യാസ വകുപ്പ്.
കോഴിക്കോട് : സംസ്ഥാന സ്കൂള് കായികമേളയിലെ ഭക്ഷണത്തില് പുഴു കണ്ടെന്ന് ആരോപിച്ച അധ്യാപകനെ സസ്പെൻഡ് ചെയ്തു. പെരുമ്പാവൂര് വെങ്ങോല ശലേം സ്കൂളിലെ കായികാധ്യാപകന് ജിജോ ജെയിംസിനെതിരെയാണ് പൊതു വിദ്യാഭ്യാസ വകുപ്പ് നടപടി സ്വീകരിച്ചത്. വ്യാജ പ്രചരണം നടത്തിയെന്നും സംഭവത്തിൽ ഗൂഢാലന തെളിഞ്ഞെത് പ്രകാരമാണ് നടപടിയെന്നും മന്ത്രിയുടെ ഓഫിസ് അറിയിച്ചു. സംഭവത്തിൽ ജിജോ ജെയിംസ് നേരത്തേ അറസ്റ്റിലായിരുന്നു. കായിക മേളയിൽ വിളമ്പിയ സാമ്പാറില് നിന്ന് ലഭിച്ചെന്ന വ്യാജേന പുഴുവിനെ പ്രദര്ശിപ്പിച്ചെന്നും കലാപത്തിന് ശ്രമിച്ചെന്നുമാണ് കേസ്. ഭക്ഷണത്തിൽ പുഴുവിനെ കൊണ്ടിട്ട് കുട്ടികളുടെ കായിക മേള അലങ്കോലപ്പെടുത്താൻ ശ്രമിച്ചെന്നും സംഭവത്തിനു പിന്നിൽ രാഷ്ട്രീയ ഗൂഢാലോചനയുണ്ടെന്നും വകുപ്പുതല നടപടിയുണ്ടാകുമെന്നും വിദ്യാഭ്യാസ മന്ത്രി എന്.ഷംസുദ്ദീന് വ്യക്തമാക്കിയിരുന്നു. തുടർന്നാണ് അധ്യാപകനെ സസ്പെൻഡ് ചെയ്തത്. ᴋᴏᴢʜɪᴋᴏᴅᴇ ʟɪᴠᴇകഴിഞ്ഞ ദിവസം രാവിലെയായിരുന്നു സാമ്പാറില് പുഴുവിനെ കണ്ടെന്ന രീതിയിൽ ആരോപണം ഉയര്ന്നത്. കായികമേളയിലെ ഭക്ഷണവിതരണ കേന്ദ്രത്തിൽനിന്ന് എന്ന വ്യാഖ്യാനത്തോടെ ഭക്ഷണത്തിൽ പുഴുവുണ്ടെന്ന് കാണിച്ച് പ്രതി സമൂഹമാധ്യമങ്ങളിൽ ലൈവ് വിഡിയോ പ്രചരിപ്പിക്കുകയായിരുന്നു. എന്നാൽ, സംഭവം വിവാദമായതോടെ അധ്യാപകന് പരാതിയില്ലെന്ന് രേഖാമൂലം അറിയിച്ചിരുന്നെങ്കിലും ഇദ്ദേഹത്തെ കസ്റ്റഡിയിലെടുത്ത് അറസ്റ്റ് രേഖപ്പെടുത്തുകയായിരുന്നു പൊലീസ്. രാഷ്ട്രീയ താൽപര്യത്തോടെയുള്ള നാടകമാണ് അരങ്ങേറിയതെന്നും ചില മാധ്യമപ്രവർത്തകരും അതിന് കൂട്ടുനിന്നെന്നും പൊലീസ് ഇതിന്റെ ഗൂഢാലോചന അന്വേഷിക്കണമെന്നും എല്ലാത്തിലും പ്രശ്നങ്ങൾ കാണുന്നതൊക്കെ മോശം പ്രവൃത്തിയാണെന്നും മന്ത്രി മാധ്യമങ്ങളോട് പ്രതികരിച്ചിരുന്നു. അതേസമയം പുഴുവിനെ കണ്ടെത്തിയെന്ന ആരോപണം പൂർണമായും നിഷേധിച്ച് പഴയിടം മോഹനന് നമ്പൂതിരി രംഗത്തെത്തി. സംഭവത്തിൽ കൃത്യമായ രാഷ്ട്രീയ അജണ്ടയുണ്ടെന്നും ഇത് ജീവിതത്തിൽ ഇതുവരെ ഉണ്ടാകാത്ത അനുഭവമാണെന്നും പഴയിടം മാധ്യമങ്ങളോട് വ്യക്തമാക്കി. ആദ്യദിവസം വാര്ത്ത കണ്ടപ്പോള് തന്നെ ഭക്ഷണ കമ്മിറ്റി കണ്വീനറോട് സംസാരിച്ചിരുന്നുവെന്നും ആരോപണം വ്യാജമാണെന്ന് കണ്ടെത്തിയിരുന്നു.
കുട്ടി ഡ്രൈവർമാരെ തൂക്കി പൊലീസ്; സ്പെഷ്യൽ ഡ്രൈവിൽ കുടുങ്ങിയത് 51 പേർ.
കോഴിക്കോട്: പ്രായപൂര്ത്തിയാകാത്തവര് വാഹനമോടിക്കുന്നത് തടയുന്നതിനായി വടക്കൻ ജില്ലകളിൽ പൊലീസിന്റെ പ്രത്യേക പരിശോധന. കണ്ണൂര് റേഞ്ചിന് കീഴിലെ വിവിധ ജില്ലകളിൽ കഴിഞ്ഞ ദിവസം നടത്തിയ പരിശോധനയില് 51 കേസുകള് രജിസ്റ്റര് ചെയ്തു. കണ്ണൂര് റേഞ്ച് ഡി.ഐ.ജി കെ. കാര്ത്തിക്കിന്റെ പ്രത്യേക നിര്ദേശപ്രകാരമാണ് സ്പെഷ്യല് ഡ്രൈവ് നടത്തിയത്.പരിശോധനയില് കോഴിക്കോട് റൂറലിലാണ് ഏറ്റവും കൂടുതല് കേസുകള് റിപ്പോര്ട്ട് ചെയ്തത്. 14 കേസുകളാണ് ഇവിടെ രജിസ്റ്റര് ചെയ്തത്. കാസര്കോട് ജില്ലയില് 13 കേസുകളും കണ്ണൂര് സിറ്റിയില് 12, കണ്ണൂര് റൂറല് 06, കോഴിക്കോട് സിറ്റി 05, വയനാട് ഒരു കേസും രജിസ്റ്റര് ചെയ്തു. പ്രായപൂര്ത്തിയാകാത്തവര്ക്ക് വാഹനം നല്കുന്ന ആര്.സി ഉടമകള്ക്കെതിരെയും നിയമനടപടി സ്വീകരിക്കുമെന്ന് ഉദ്യോഗസ്ഥര് അറിയിച്ചു.



