മുട്ടിൽ: കേരളത്തിലെ കർഷകർക്ക് കൃഷിവകുപ്പിന്റെ വിവിധ സേവനങ്ങളും ആനുകൂല്യങ്ങളും കൂടുതൽ എളുപ്പത്തിലും വേഗത്തിലും സുതാര്യമായും ലഭ്യമാക്കുന്നതിനായി നടപ്പാക്കുന്ന സ്മാർട്ട് ഫാർമർ ഐ.ഡി കാർഡിന്റെ സംസ്ഥാനതല ഉദ്ഘാടനം കൃഷി മന്ത്രി അഡ്വ. ടി. സിദ്ദിഖ് നിർവഹിച്ചു. ‘കതിർ’പദ്ധതിയുടെ ഭാഗമായാണ് ഏകീകൃത ഡിജിറ്റൽ കർഷക തിരിച്ചറിയൽ സംവിധാനം നടപ്പാക്കുന്നത്.ഇതോടൊപ്പം മുട്ടിൽ സ്മാർട്ട് കൃഷിഭവന്റെയും സോയിൽ ഹെൽത്ത് കാർഡ് പദ്ധതിയുടെയും ഉദ്ഘാടനവും നടന്നു. കതിർ പദ്ധതിയിൽ രജിസ്റ്റർ ചെയ്ത കർഷകരുടെ വിവരങ്ങളുമായി ബന്ധിപ്പിച്ച് ഓരോ കർഷകനും യൂണീക് ഫാർമർ ഐഡന്റിറ്റി നൽകുകയാണ് സ്മാർട്ട് ഫാർമർ ഐ.ഡി കാർഡിന്റെ ലക്ഷ്യം. കാർഡിലെ ക്യു.ആർ കോഡ് ഉപയോഗിച്ച് അംഗീകൃത സംവിധാനങ്ങളിലൂടെ കർഷകന്റെ കതിർ പ്രൊഫൈലുമായി ബന്ധിപ്പിച്ച വിവരങ്ങൾ വേഗത്തിൽ പരിശോധിക്കാനാകും. കാർഡിൽ ഉൾപ്പെടുത്തിയ എംബഡഡ് ചിപ്പ് ഭാവിയിൽ വിവിധ കാർഷിക സേവനങ്ങൾ, പദ്ധതികൾ, ആനുകൂല്യങ്ങൾ, സേവന ഇടപാടുകൾ എന്നിവ സുരക്ഷിതമായി ബന്ധിപ്പിക്കുന്നതിനും വെരിഫിക്കേഷൻ സംവിധാനങ്ങൾ ശക്തിപ്പെടുത്തുന്നതിനും സഹായിക്കും.സംസ്ഥാനത്തെ 1,076 കൃഷിഭവനുകളിൽ തിരഞ്ഞെടുത്ത 14 സ്മാർട്ട് കൃഷിഭവനുകളിലാണ് സ്മാർട്ട് ഫാർമർ ഐഡി കാർഡ് പൈലറ്റ് അടിസ്ഥാനത്തിൽ നടപ്പാക്കുന്നത്. കാർഡ് തയാറാക്കൽ, കർഷക വിവരങ്ങളുടെ പരിശോധനയും അംഗീകാരവും, പ്രിന്റിങ്, ഡിജിറ്റൽ സംവിധാനങ്ങളുമായുള്ള ബന്ധിപ്പിക്കൽ തുടങ്ങിയവ പൈലറ്റ് ഘട്ടത്തിൽ പരിശോധിക്കും. തുടർന്ന് ഘട്ടംഘട്ടമായി സംസ്ഥാനത്തെ മുഴുവൻ കൃഷിഭവനുകളിലേക്കും പദ്ധതി വ്യാപിപ്പിക്കാനാണ് ലക്ഷ്യം. കർഷകന്റെ കതിർ പ്രൊഫൈലുമായി ബന്ധിപ്പിക്കുന്നതിലൂടെ വിവിധ സേവനങ്ങൾക്ക് ഒരേ വിവരങ്ങൾ ആവർത്തിച്ച് നൽകേണ്ട സാഹചര്യം കുറക്കാനും വെരിഫിക്കേഷൻ നടപടികൾ ലളിതമാക്കാനും സാധിക്കും. ഭൂമി, വിള, മണ്ണ് പരിശോധന, കാർഷിക ഉപദേശങ്ങൾ, പ്ലാന്റ് ഡോക്ടർ, ഇൻപുട്ട് മാനേജ്മെന്റ്, കാർഷിക യന്ത്രവൽക്കരണം, ഇൻഷുറൻസ്, വിവിധ സർക്കാർ പദ്ധതികൾ, വിപണന സഹായം തുടങ്ങിയ സേവനങ്ങളെ ഭാവിയിൽ ഏകീകൃത ഫാർമർ ഐ.ഡി യുമായി ബന്ധിപ്പിക്കുകയാണ് ലക്ഷ്യം.സ്മാർട്ട് ഫാർമർ ഐ.ഡി കാർഡ് തിരിച്ചറിയൽ കാർഡ് എന്നതിലുപരി കർഷക കേന്ദ്രീകൃത ഡിജിറ്റൽ കാർഷിക സേവനങ്ങളുടെ ഏകീകരണത്തിനുള്ള അടിസ്ഥാന സംവിധാനമായാണ് കൃഷി വകുപ്പ് വിഭാവനം ചെയ്യുന്നത്. കർഷകരുടെ വിവരങ്ങൾ കൂടുതൽ കൃത്യമായും ഏകീകൃതമായും കൈകാര്യം ചെയ്യുന്നതിനും പദ്ധതികളുടെ സേവന വിതരണവും നിരീക്ഷണവും കൂടുതൽ കാര്യക്ഷമമാക്കുന്നതിനും ഇത് സഹായകമാകും. പൈലറ്റ് ഘട്ടത്തിൽ നിന്നുള്ള അനുഭവങ്ങളും സാങ്കേതിക പഠനങ്ങളും ഉൾപ്പെടുത്തി സംസ്ഥാനത്തെ മുഴുവൻ കർഷകർക്കും ഏകീകൃത ഡിജിറ്റൽ കാർഷിക ഐഡന്റിറ്റി ലഭ്യമാക്കുകയാണ് ദീർഘകാല ലക്ഷ്യം.
രാജ്യത്തെ ആദ്യ സമ്പൂർണ അവയവ മാറ്റ ഇൻസ്റ്റിറ്റ്യൂട്ട് കോഴിക്കോട്; ചികിത്സച്ചെലവ് മൂന്നിലൊന്നായി കുറയുമെന്ന് മുഖ്യമന്ത്രി.
കോഴിക്കോട് : അവയവമാറ്റ ചികിത്സാരംഗത്ത് വിപ്ലവകരമായ മാറ്റത്തിന് വഴിയൊരുക്കാൻ അവയവമാറ്റ ഇൻസ്റ്റിറ്റ്യൂട്ട് 30 മാസങ്ങൾ കൊണ്ട് പൂർത്തിയാക്കാൻ തീരുമാനം. ഇൻസ്റ്റിറ്റ്യൂട്ടിന്റെ നിർമാണ പ്രവൃത്തിക്കുള്ള വർക്ക് ഓർഡർ ഡൽഹി ആസ്ഥാനമായുള്ള ജാക്സൺ ലിമിറ്റഡിനു കൈമാറി. ദിവസങ്ങൾക്കുള്ളിൽ കെട്ടിടത്തിന്റെ നിർമാണ പ്രവൃത്തി ആരംഭിക്കും. രാജ്യത്തെ ആദ്യത്തെ സമ്പൂർണ അവയവമാറ്റ ഇൻസ്റ്റിറ്റ്യൂട്ട് (ഇൻസ്റ്റിറ്റ്യൂട്ട് ഓഫ് ഓർഗൻ ട്രാൻസ്പ്ലാന്റേഷൻ) കോഴിക്കോട് ചേവായൂരിലെ 20 ഏക്കറിലാണ് യാഥാർഥ്യമാകുക. രാജ്യത്തു തന്നെ ആദ്യമായി സ്ഥാപിക്കുന്ന ഈ ഇൻസ്റ്റിറ്റ്യൂട്ട് കേരളത്തിന്റെയും പ്രത്യേകിച്ച് മലബാർ മേഖലയുടെയും ആരോഗ്യരംഗത്ത് വൻ മുന്നേറ്റത്തിന് കാരണമാകുമെന്നു പ്രതീക്ഷിക്കുന്നു.കെട്ടിടം പൂർത്തിയാകുന്നതിനു മുൻപായി മെഡിക്കൽ കോളജ് കേന്ദ്രീകരിച്ചു ഓർഗൻ ഇൻസ്റ്റിറ്റ്യൂട്ടിന്റെ പ്രവർത്തനം താൽക്കാലികമായി ആരംഭിക്കും. 2022ൽ എൽഡിഎഫ് സർക്കാരിന്റെ കാലത്താണ് സ്ഥാപനം പ്രഖ്യാപിച്ചത്. ഇൻസ്റ്റിറ്റ്യൂട്ട് നിലവിൽ വരുന്നതോടെ കുറഞ്ഞ ചെലവിൽ അവയവമാറ്റ ശസ്ത്രക്രിയകൾ സാധ്യമാകും. സ്വകാര്യ മേഖലയിലെ ചെലവിന്റെ വെറും 25 മുതൽ 35 ശതമാനം നിരക്കിൽ ഇവിടെ ശസ്ത്രക്രിയകൾ നടത്താനാകും. പ്രധാന അവയവങ്ങൾക്കു പുറമേ കോശങ്ങൾ (tissues), സെല്ലുകൾ എന്നിവ മാറ്റിവയ്ക്കൽ, അനുബന്ധ ഗവേഷണം, ഡോക്ടർമാർക്കും പാരാമെഡിക്കൽ ജീവനക്കാർക്കുമുള്ള രാജ്യാന്തര നിലവാരത്തിലുള്ള പരിശീലനം എന്നിവ ഇവിടെ ഉറപ്പാക്കും.
‘അദ്ദേഹം ഞങ്ങളുടെ ടീമിന്റെ ഭാഗമാണെന്നതിൽ അഭിമാനം’; സ്മിത് മച്ചാറിനെ സന്ദർശിച്ച് ശൈഖ് ഹംദാൻ
ദുബൈ: തെൽ അവീവിലേക്കുള്ള ഫ്ലൈ ദുബൈ വിമാനത്തിൽ കോ-പൈലറ്റ് നടത്താൻ ശ്രമിച്ച ഭീകരാക്രമണത്തെ ജീവൻ പണയം വെച്ച് തടഞ്ഞ ഇന്ത്യൻ പൈലറ്റ് സ്മിത് മച്ചാറിനെ നേരിട്ടെത്തി സന്ദർശിച്ച് ദുബൈ കിരീടാവകാശി ശൈഖ് ഹംദാൻ. സെപ്തംബർ 30-ന് ദുബൈയിൽ നിന്ന് പുറപ്പെട്ട ഫ്ളൈദുബൈ FZ1073 വിമാനത്തിൽ വെച്ചാണ് ആക്രമണം നടന്നത്. ദുബൈ സിവിൽ ഏവിയേഷൻ അതോറിറ്റി പ്രസിഡന്റും എമിറേറ്റ്സ് ഗ്രൂപ്പ് ചെയർമാനുമായ ശൈഖ് അഹമ്മദ് ബിൻ സയീദ് അൽ മക്തൂമും ശൈഖ് ഹംദാനൊപ്പം പൈലറ്റിനെ സന്ദർശിക്കാനെത്തിയിരുന്നു. അതിരറ്റ ധൈര്യവും ഉത്തരവാദിത്തബോധവും മനുഷ്യജീവനുകളോടുള്ള കരുതലുമാണ് സ്മിത് മച്ചാർ പ്രകടിപ്പിച്ചത്. യുഎഇയുടെ ചരിത്രത്തിന്റെയും ഞങ്ങളുടെ ടീമിന്റെയും ഭാഗമാണ് അദ്ദേഹമെന്ന് പറയുന്നതിൽ അഭിമാനമുണ്ടെന്നും സന്ദർശനത്തിന് ശേഷം ശൈഖ് ഹംദാൻ വ്യക്തമാക്കി.
വിമാനം പറന്നുയർന്നതിന് പിന്നാലെ കോക്ക്പിറ്റിനുള്ളിൽ വെച്ച് ക്രാഷ് ആക്സ് ഉപയോഗിച്ച് കോ-പൈലറ്റ്, ക്യാപ്റ്റൻ സ്മിത് മച്ചാറിനെ ക്രൂരമായി ആക്രമിക്കുകയും വിമാനത്തിന്റെ നിയന്ത്രണം പിടിച്ചെടുക്കാൻ ശ്രമിക്കുകയുമായിരുന്നു. ഗുരുതരമായി പരിക്കേറ്റിട്ടും ധീരമായി പോരാടിയ സ്മിത് മച്ചാർ വിമാനം സൗദി അറേബ്യയിലെ തബൂക്കിലേക്ക് സുരക്ഷിതമായി ലാന്റ് ചെയ്യിച്ച് നൂറുകണക്കിന് യാത്രക്കാരുടെ ജീവൻ രക്ഷിച്ചു. യുഎഇ പ്രസിഡന്റിന്റെ നയതന്ത്ര ഉപദേഷ്ടാവ് ഡോ. അൻവർ ഗർഗാഷും പൈലറ്റിന് അഭിനന്ദനങ്ങൾ അറിയിച്ചു. അടിയന്തര സമയത്തും സ്മിത് കാണിച്ച പ്രൊഫഷണലിസവും ധാർമികതയും അദ്ദേഹത്തെ ഒരു യഥാർഥ നായകനാക്കുന്നു എന്ന് ഡോ. ഗർഗാഷ് പറഞ്ഞു.
ക്യാപ്റ്റൻ സ്മിത് മച്ചാറിന്റെ ധീരതയെ വാനോളം പുകഴ്ത്തി ഇന്ത്യൻ പ്രധാനമന്ത്രി നരേന്ദ്ര മോദിയും രംഗത്തെത്തിയിരുന്നു. സ്വന്തം ജീവൻ അപകടത്തിലായിട്ടും മറ്റുള്ളവരുടെ ജീവൻ രക്ഷിക്കാൻ സ്മിത് കാണിച്ച നിശ്ചയദാർഢ്യം സമാനതകളില്ലാത്തതാണ്. വലിയൊരു ദുരന്തമാണ് അദ്ദേഹത്തിന്റെ ധീരത കാരണം ഒഴിവായത് എന്ന് മോദി കുറിച്ചു. സമയോചിതമായി ഇടപെട്ട് വിമാനം സുരക്ഷിതമായി നിലത്തിറക്കാൻ സഹായിച്ച ജീവനക്കാർക്കും യാത്രക്കാർക്കും ഫ്ളൈദുബൈ സി.ഇ.ഒ ഗെയ്ത് അൽ ഗെയ്ത് നന്ദി അറിയിച്ചു.
ജീവിത ശൈലി രോഗങ്ങൾക്കെതിരെ ജാഗ്രത വേണം: മന്ത്രി കെ. മുരളീധരൻ
അർബുദവും ഹൃദ്രോഗവും മറ്റ് ജീവിത ശൈലി രോഗങ്ങളും വർദ്ധിച്ചുവരുന്നത് വെല്ലുവിളിയാണെന്നും അവയ്ക്കെതിരെ ശക്തമായ ജാഗ്രത ആവശ്യമാണെന്നും ആരോഗ്യ വകുപ്പ് മന്ത്രി കെ. മുരളീധരൻ പറഞ്ഞു. സംസ്ഥാന ആരോഗ്യ കുടുംബ ക്ഷേമ വകുപ്പ് സംഘടിപ്പിച്ച ലോക ഹൃദയ ദിനാചരണത്തിന്റെ സംസ്ഥാനതല ഉദ്ഘാടനം തിരുവനന്തപുരം അയ്യങ്കാളി ഹാളിൽ നിർവഹിച്ച് സംസാരിക്കുകയായിരുന്നു അദ്ദേഹം. മാറിയ ഭക്ഷണ സംസ്കാരം രോഗങ്ങളുടെ വ്യാപനത്തിന് പ്രധാനപ്പെട്ട കാരണമായി മാറി. അനാരോഗ്യകരമായ ഭക്ഷണ ശീലങ്ങൾക്ക് വലിയ സ്വീകാര്യത ലഭിക്കുന്നത് അപകടകരമാണ്. ചിട്ടയായ ജീവിത ശൈലിയും ഭക്ഷണക്രമവും വ്യായാമവും ശീലമാക്കണമെന്നും മന്ത്രി പറഞ്ഞു.
ഹൃദയാഘാതം മുൻകൂട്ടി കണ്ടെത്താൻ സഹായകമായ ട്രോപ്പോണിൻ ടെസ്റ്റ് നവംബർ മുതൽ സംസ്ഥാനത്ത് ദാരിദ്ര്യ രേഖയ്ക്ക് താഴെയുള്ളവർക്ക് സൗജന്യമായി നൽകും. ജീവിത ശൈലി രോഗങ്ങൾ പ്രതിരോധിക്കാൻ ആരോഗ്യ വകുപ്പ് വിവിധ പദ്ധതികൾ ആവിഷ്കരിക്കുകയാണെന്നും അതിന് എല്ലാ വിഭാഗം ജനങ്ങളുടെയും പിന്തുണയുണ്ടാവണമെന്നും മന്ത്രി പറഞ്ഞു. ജില്ലാ മെഡിക്കൽ ഓഫീസ് തയ്യാറാക്കിയ സി.പി.ആർ. പോസ്റ്റർ മന്ത്രി പ്രകാശനം ചെയ്തു. ഹൃദയം നൽകുന്ന സൂചനകൾ അവഗണിക്കരുതെന്ന സന്ദേശത്തിലൂന്നിയാണ് ഇത്തവണ ലോക ഹൃദയദിനാചരണ പരിപാടികൾ സംഘടിപ്പിച്ചത്.
മേയർ വി.വി. രാജേഷ് അധ്യക്ഷത വഹിച്ച പരിപാടിയിൽ ആരോഗ്യ കുടുംബക്ഷേമ വകുപ്പ് പ്രിൻസിപ്പൽ സെക്രട്ടറി ഡോ. ഷർമിള മേരി ജോസഫ് മുഖ്യപ്രഭാഷണം നടത്തി. ആരോഗ്യകേരളം സ്റ്റേറ്റ് മിഷൻ ഡയറക്ടർ ഡോ. രേണു രാജ് ഹൃദയദിന സന്ദേശം നൽകി. ആരോഗ്യ വകുപ്പ് ഡയറക്ടർ ഡോ. വി. മീനാക്ഷി സ്വാഗതം ആശംസിച്ചു. വാർഡ് കൗൺസിലർ എസ്. ഷെർളി, എൻ.സി.ഡി. നോഡൽ ഓഫീസർ ഡോ. സന്ധ്യ, ജില്ലാ മെഡിക്കൽ ഓഫീസർ ഡോ. ബിന്ദു മോഹൻ, ആരോഗ്യ കേരളം ജില്ലാ പ്രോഗ്രാം മാനേജർ ഡോ. അർനോൾഡ് ദീപക്, കെ.വി.എച്ച്.എസ്. എക്സിക്യൂട്ടീവ് ഡയറക്ടർ ഡോ. സാജു വി. ഇട്ടി, സ്റ്റേറ്റ് എജ്യുക്കേഷൻ മാസ് മീഡിയ ഓഫീസർ ഡോമി ജോൺ എന്നിവർ സംസാരിച്ചു.
ഹൃദയദിനാചരണത്തിന്റെ ഭാഗമായി മ്യൂസിയം മുതൽ അയ്യങ്കാളി ഹാൾ വരെ സംഘടിപ്പിച്ച കൂട്ടയോട്ടവും സൈക്കിൾ റാലിയും ഡെപ്യൂട്ടി പൊലീസ് കമ്മീഷണർ കെ.എസ്. ഷഹൻഷാ ഫ്ലാഗ് ഓഫ് ചെയ്തു. തുടർന്ന് നടന്ന ബോധവത്കരണ സെമിനാറിന് ശ്രീ ചിത്ര തിരുനാൾ ഇൻസ്റ്റിറ്റ്യൂട്ട് കാർഡിയോളജി വിഭാഗം പ്രൊഫസർ ഡോ. എസ്. ഹരികൃഷ്ണൻ നേതൃത്വം നൽകി. തിരുവനന്തപുരം ജനറൽ ആശുപത്രിയിലെ ഡോ. മധു, ഡോ. ശ്രീകാന്ത് എന്നിവരുടെ നേതൃത്വത്തിൽ സി.പി.ആർ പ്രായോഗിക പരിശീലനം നൽകി. സ്റ്റേറ്റ് ന്യൂട്രീഷൻ ബ്യൂറോയുടെ നേതൃത്വത്തിൽ ജീവിത ശൈലി രോഗങ്ങൾ പ്രതിരോധിക്കാൻ ഉപകരിക്കുന്ന ഭക്ഷണ പദാർത്ഥങ്ങളുടെ പ്രദർശനവും ആയുഷ് മിഷന്റെ ആഭിമുഖ്യത്തിൽ യോഗ പരിശീലനവും സംഘടിപ്പിച്ചു. തിരുവനന്തപുരം ഗവ. പബ്ലിക് ഹെൽത്ത് ട്രെയിനിംഗ് സ്കൂളിലെ വിദ്യാർഥികൾ അവതരിപ്പിച്ച ഫ്ലാഷ് മോബ്, സ്കിറ്റ് എന്നിവയും അരങ്ങേറി.
ട്രെയിനിൽ പതിവായി ഒറ്റയ്ക്ക് യാത്ര ചെയ്യുന്നവരാണോ?, സുരക്ഷ ഉറപ്പാക്കാം; പോൽ ആപ്പിൽ റെയിൽ മൈത്രി ഫീച്ചർ
തിരുവനന്തപുരം: നിങ്ങൾ പതിവായി ട്രെയിനിൽ ഒറ്റയ്ക്ക് യാത്ര ചെയ്യുന്നവരാണോ? യാത്രയിൽ സുരക്ഷ ഉറപ്പാക്കാൻ കേരള പൊലീസിന്റെ പോൽ ആപ്പിലെ റെയിൽ മൈത്രി സേവനം പ്രയോജനപ്പെടുത്താവുന്നതാണ്. രാത്രികാലങ്ങളിലോ ദീർഘദൂര യാത്രകളിലോ ഒറ്റയ്ക്ക് സഞ്ചരിക്കുന്ന സ്ത്രീകൾക്കും മുതിർന്ന പൗരന്മാർക്കും പ്രത്യേക സുരക്ഷ ഉറപ്പാക്കാൻ ഇതുവഴി സാധിക്കും. വിവരങ്ങൾ ആപ്പിൽ രജിസ്റ്റർ ചെയ്താൽ റെയിൽവേ പൊലീസിന്റെ നിരീക്ഷണവും സംരക്ഷണവും യാത്രയിലുടനീളം ഉറപ്പാക്കാമെന്ന് കേരള പൊലീസ് ഫെയ്സ്ബുക്ക് കുറിപ്പിലൂടെ അറിയിച്ചു.
ട്രെയിനിലോ പ്ലാറ്റ്ഫോമിലോ നടക്കുന്ന അനിഷ്ട സംഭവങ്ങൾ, അതിക്രമങ്ങൾ എന്നിവ തത്സമയം ഫോട്ടോ/വിവരങ്ങൾ സഹിതം പൊലീസിനെ അറിയിക്കാനുള്ള സൗകര്യവും ഇതിൽ ഒരുക്കിയിട്ടുണ്ട്. യാത്രയ്ക്കിടയിലോ സ്റ്റേഷനിലോ വിലപിടിപ്പുള്ള വസ്തുക്കളോ രേഖകളോ നഷ്ടപ്പെട്ടാൽ റെയിൽവേ പൊലീസിന് ലഭിച്ച സാധനങ്ങളുടെ വിവരങ്ങളും ഫോട്ടോകളുമായി ഒത്തുനോക്കാൻ ലോസ്റ്റ് പ്രോപ്പർട്ടി ഗാലറി ഫീച്ചർ വഴി സാധിക്കുമെന്നും കേരള പൊലീസ് അറിയിച്ചു.
കുറിപ്പ്:
ട്രെയിൻ യാത്രകളിൽ കേരള പോലീസിന്റെ സഹായവും സുരക്ഷയും ലഭ്യമാക്കാൻ Pol-App-ൽ ‘റെയിൽ മൈത്രി’ (Rail Maithri) സേവനങ്ങൾ ഉപയോഗിക്കാവുന്നതാണ്.
യാത്രക്കാർക്കായി Pol App ലെ റെയിൽ മൈത്രി ഒരുക്കുന്ന പ്രധാന സൗകര്യങ്ങൾ:
ലോൺലി പാസഞ്ചർ (Lonely Passenger)
രാത്രികാലങ്ങളിലോ ദീർഘദൂര യാത്രകളിലോ ഒറ്റയ്ക്ക് സഞ്ചരിക്കുന്ന സ്ത്രീകൾക്കും മുതിർന്ന പൗരന്മാർക്കും പ്രത്യേക സുരക്ഷ. വിവരങ്ങൾ ആപ്പിൽ രജിസ്റ്റർ ചെയ്താൽ റെയിൽവേ പോലീസിന്റെ നിരീക്ഷണവും സംരക്ഷണവും യാത്രയിലുടനീളം ഉറപ്പാക്കാം.
ലോസ്റ്റ് പ്രോപ്പർട്ടി ഗാലറി (Lost Property Gallery)
യാത്രയ്ക്കിടയിലോ സ്റ്റേഷനിലോ വിലപിടിപ്പുള്ള വസ്തുക്കളോ രേഖകളോ നഷ്ടപ്പെട്ടോ? റെയിൽവേ പോലീസിന് ലഭിച്ച സാധനങ്ങളുടെ വിവരങ്ങളും ഫോട്ടോകളും ഈ ഗാലറിയിൽ പരിശോധിക്കാം.
സംഭവങ്ങൾ ഉടനടി റിപ്പോർട്ട് ചെയ്യാം (Report An Incident)
ട്രെയിനിലോ പ്ലാറ്റ്ഫോമിലോ നടക്കുന്ന അനിഷ്ട സംഭവങ്ങൾ, അതിക്രമങ്ങൾ എന്നിവ തത്സമയം ഫോട്ടോ/വിവരങ്ങൾ സഹിതം പോലീസിനെ അറിയിക്കാം.
രഹസ്യ വിവരങ്ങൾ പങ്കുവെക്കാം (Secret Information)
ലഹരിക്കടത്ത്, മോഷണം തുടങ്ങിയ സാമൂഹികവിരുദ്ധ പ്രവർത്തനങ്ങൾ സംബന്ധിച്ച വിവരങ്ങൾ വ്യക്തിവിവരങ്ങൾ വെളിപ്പെടുത്താതെ സുരക്ഷിതമായി പോലീസിലേക്ക് കൈമാറാം.
പ്ലാറ്റ്ഫോമിലെ കടകളുടെ വിവരങ്ങൾ (Shops on Platform)
വിവിധ സ്റ്റേഷനുകളിലെ പ്രധാന കടകൾ, ഭക്ഷണശാലകൾ എന്നിവയുടെ വിവരങ്ങൾ എളുപ്പത്തിൽ അറിയാം.
സേവനം ലഭ്യമാക്കാൻ: ഗൂഗിൾ പ്ലേ സ്റ്റോറിൽ നിന്നോ ആപ്പിൾ ആപ്പ് സ്റ്റോറിൽ നിന്നോ Pol-App ഡൗൺലോഡ് ചെയ്ത് ‘Rail Maithri’ സന്ദർശിക്കുക.
സൗദി അറേബ്യയില് വാഹനാപകടം: രണ്ട് മലയാളികള് ഉള്പ്പെടെ അഞ്ച് പേര് മരിച്ചു
റിയാദ്: സൗദി അറേബ്യയില് വാഹനാപകടത്തില് രണ്ട് മലയാളികള് ഉള്പ്പെടെ അഞ്ച് പേര് മരിച്ചു. കോട്ടയം സ്വദേശികളായ ജെയ്സി മോള് മാത്യു, ജോബിന ജോണി എന്നിവരാണ് മരിച്ച മലയാളികള്. ഇരുവരും സൗദിയില് നഴ്സായി ജോലി ചെയ്യുന്നവരാണ്.
കഴിഞ്ഞ ദിവസമാണ് അപകടമുണ്ടായത്. തഞ്ചാവൂര് പട്ടുകോട്ടയ് സ്വദേശി ദേവമണി ഹെപ്സിബ (33), ചെന്നൈ സ്വദേശി വിജയലക്ഷ്മി (36) എന്നിവരാണ് മരിച്ച തമിഴ്നാട് സ്വദേശികള്. വാഹനമോടിച്ചിരുന്ന സൈദി പൗരനാണ് മരിച്ച മറ്റൊരാള്. മരിച്ച നാല് പേരും നഴ്സുമാരാണ്. സൗദി ആരോഗ്യ മന്ത്രാലയത്തിന് കീഴില് മക്ക മേഖലയില് അല്ഗഫയിലും അല് വ െഎന്നിവിടങ്ങളിലുള്ള ഡിസ്പെന്സറികളിലാണ് ഇവര് ജോലി ചെയ്തിരുന്നത്.
അവധി ദിവസമായിരുന്നതിനാല് ഷോപ്പിംഗിനായി ഇറങ്ങിയതായിരുന്നു ഇവര്. 100 കിലോമീറ്റര് അകലെയുള്ള റാനിയ എന്ന സ്ഥലത്തേക്കായിരുന്നു യാത്ര. ഈ വാഹനത്തില് മറ്റൊരു വാഹനം വന്ന് ഇടിക്കുകയായിരുന്നുവെന്നാണ് റിപ്പോര്ട്ട്.
ഇടിവെട്ടി മഴ പെയ്യും! തിരുവനന്തപുരം ജില്ലയിൽ അടുത്ത 3 മണിക്കൂർ ഓറഞ്ച് അലർട്ട്; ശക്തമായ മഴയ്ക്ക് സാധ്യത.
തിരുവനന്തപുരം : തിരുവനന്തപുരം ജില്ലയിൽ അടുത്ത മൂന്ന് മണിക്കൂറിലേക്ക് കേന്ദ്ര കാലാവസ്ഥാ വകുപ്പ് ഓറഞ്ച് അലർട്ട് പ്രഖ്യാപിച്ചു. ജില്ലയിൽ ഒറ്റപ്പെട്ടയിടങ്ങളിൽ ഇടിമിന്നലോട് കൂടിയ ശക്തമായ മഴയ്ക്കും, മണിക്കൂറിൽ 50 കിലോമീറ്റർ വരെ വേഗതയിൽ ശക്തമായ കാറ്റിനും സാധ്യതയുണ്ടെന്നാണ് ഔദ്യോഗിക അറിയിപ്പ്.ഇതിനുപുറമെ, ഇടുക്കി ജില്ലയിലും ഒറ്റപ്പെട്ടയിടങ്ങളിൽ ഇടിമിന്നലോടുകൂടിയ മഴയ്ക്കും കാറ്റിനും സാധ്യതയുണ്ട്. ഈ പ്രദേശങ്ങളിലും മണിക്കൂറിൽ 50 കിലോമീറ്റർ വരെ വേഗതയിൽ കാറ്റ് വീശിയേക്കാമെന്ന് മുന്നറിയിപ്പിൽ വ്യക്തമാക്കുന്നു.തുടർച്ചയായ മഴയും ശക്തമായ കാറ്റും നിലനിൽക്കുന്ന സാഹചര്യത്തിൽ പൊതുജനങ്ങൾ അതീവ ജാഗ്രത പാലിക്കണമെന്ന് അധികൃതർ നിർദ്ദേശിച്ചു. കാലാവസ്ഥാ മുന്നറിയിപ്പുകളിൽ പെട്ടെന്ന് മാറ്റങ്ങൾ ഉണ്ടാകാൻ സാധ്യതയുള്ളതിനാൽ ജനങ്ങൾ ഔദ്യോഗിക അറിയിപ്പുകൾ കൃത്യമായി ശ്രദ്ധിക്കണമെന്നും അധികൃതർ ഓർമ്മിപ്പിച്ചു.
NOCAP വിലക്ക്:’അഭിപ്രായ സ്വാതന്ത്ര്യത്തെ അടിച്ചമർത്താൻ UDFസർക്കാർ നടത്തുന്ന ശ്രമങ്ങളുടെ ഏറ്റവും പുതിയ ഉദാഹരണം
തിരുവനന്തപുരം: മലയാള സ്വതന്ത്ര ഡിജിറ്റല് മാധ്യമമായ നോക്യാപിന്റെ ഫേസ്ബുക്ക് പേജ് മെറ്റ ഇന്ത്യയില് വിലക്കിയതിൽ പ്രതിഷേധം അറിയിച്ച് പ്രതിപക്ഷ നേതാവ് പിണറായി വിജയന്. അഭിപ്രായ സ്വാതന്ത്ര്യത്തെ അടിച്ചമര്ത്താന് യുഡിഎഫ് സര്ക്കാര് നടത്തുന്ന ശ്രമങ്ങളുടെ ഏറ്റവും പുതിയ ഉദാഹരണമാണ് പ്രമുഖ ഡിജിറ്റല് മാധ്യമമായ നോക്യാപിന് (NOCAP) നേരിടേണ്ടി വന്നതെന്ന് പിണറായി വിജയന് ഫേസ്ബുക്കില് കുറിച്ചു. സമൂഹമാധ്യമങ്ങളിലെ സെന്സര്ഷിപ്പില് സര്ക്കാരിന് പങ്കില്ലെന്ന് നിരന്തരം പറയുമ്പോഴാണ് മാധ്യത്തിന് വിലക്ക് നേരിട്ടതെന്നും സര്ക്കാരിന്റെ നേരിട്ടുള്ള ഇടപെടലാണ് ഈ വിലക്കിന് പിന്നിലെന്ന് മെറ്റ തന്നെ തുറന്നുകാട്ടുന്നുണ്ടെന്നും അദ്ദേഹം ചൂണ്ടിക്കാട്ടി.വിമര്ശനങ്ങളോടും മാധ്യമസ്വാതന്ത്ര്യത്തോടുമുള്ള സര്ക്കാരിന്റെ കടുത്ത അസഹിഷ്ണുതയാണ് ഇതിലൂടെ വെളിപ്പെടുന്നത്. നരേന്ദ്ര മോദിയും സംഘപരിവാറും നടപ്പിലാക്കുന്ന അതേ മാധ്യമവേട്ട തന്നെയാണ് കേരളത്തില് മുഖ്യമന്ത്രി വി ഡി സതീശനും യുഡിഎഫ് സര്ക്കാരും നടത്തുന്നതെന്നും പിണറായി വിജയന് വിമര്ശിച്ചു.സര്ക്കാരില് നിന്നുള്ള നോട്ടീസിന്റെ അടിസ്ഥാനത്തിലാണ് നോക്യാപിന്റെ ഫേസ്ബുക്ക് പേജിന് ഇന്ത്യയില് വിലക്ക് ഏർപ്പെടുത്തിയതെന്നാണ് മെറ്റയില് നിന്ന് ലഭിച്ച വിശദീകരണം. ‘നിയമവിരുദ്ധ പ്രവര്ത്തനം’ നടത്തുന്നതായി ചൂണ്ടിക്കാട്ടി ഐടി ആക്ട്, 2000-ലെ സെക്ഷന് 79(3)(ബി) പ്രകാരം സര്ക്കാര് മെറ്റയ്ക്ക് നല്കിയ നോട്ടീസിനെ തുടര്ന്നാണ് പേജിന് വിലക്കേര്പ്പെടുത്തിയതെന്നാണ് വിശദീകരണം ലഭിച്ചതെന്ന് ചീഫ് എഡിറ്റര് അലി ഹൈദര് പ്രസ്താവനയിലൂടെ അറിയിച്ചു. എന്നാല് നോക്യാപ് പ്രസിദ്ധീകരിച്ച ഏത് ഉള്ളടക്കമാണ് ‘നിയവിരുദ്ധമായത്’ എന്നത് സംബന്ധിച്ച വ്യക്തമായ വിശദീകരണം മെറ്റയില് നിന്നോ സര്ക്കാരില് നിന്നോ ഇതുവരെ ലഭിച്ചിട്ടില്ല.അഭിപ്രായ സ്വാതന്ത്ര്യത്തെ അടിച്ചമർത്താൻ യുഡിഎഫ് സർക്കാർ നടത്തുന്ന ശ്രമങ്ങളുടെ ഏറ്റവും പുതിയ ഉദാഹരണമാണ് പ്രമുഖ ഡിജിറ്റൽ മാധ്യമമായ നോക്യാപിന് (NOCAP) നേരിടേണ്ടി വന്ന ഫേസ്ബുക്ക് വിലക്ക്.സമൂഹമാധ്യമങ്ങളിലെ സെൻസർഷിപ്പിൽ തങ്ങൾക്ക് യാതൊരു പങ്കുമില്ലെന്ന് സർക്കാർ നിരന്തരം കൈമലർത്തുമ്പോഴും, സർക്കാരിന്റെ നേരിട്ടുള്ള ഇടപെടലാണ് ഈ വിലക്കിന് പിന്നിലെന്ന് മെറ്റ തന്നെ തുറന്നുകാട്ടുന്നു. ഐ.ടി നിയമത്തിലെ സെക്ഷൻ 79(3)(b) ഉപയോഗിച്ച് സർക്കാർ നൽകിയ നിർദ്ദേശപ്രകാരമാണ് പേജ് പൂട്ടിയതെന്ന് മെറ്റ വിശദീകരിക്കുമ്പോഴും, യഥാർത്ഥത്തിൽ എന്ത് നിയമലംഘനമാണ് നോക്യാപിന്റെ ഭാഗത്തുനിന്നും ഉണ്ടായതെന്ന് വ്യക്തമാക്കാൻ ഇരുവരും ഇതുവരെ തയ്യാറായിട്ടില്ല.വിമർശനങ്ങളോടും മാധ്യമസ്വാതന്ത്ര്യത്തോടുമുള്ള സർക്കാരിന്റെ കടുത്ത അസഹിഷ്ണുതയാണ് ഇതിലൂടെ വെളിപ്പെടുന്നത്. നരേന്ദ്ര മോദിയും സംഘപരിവാറും നടപ്പിലാക്കുന്ന അതേ മാധ്യമവേട്ട തന്നെയാണ് കേരളത്തിൽ മുഖ്യമന്ത്രി വി ഡി സതീശനും യു.ഡി.എഫ് സർക്കാരും നടത്തുന്നത്. എതിർക്കുന്നവരെ മുഴുവൻ ഇല്ലാതാക്കാൻ ശ്രമിക്കുന്ന ഇത്തരം നീക്കങ്ങൾ അടിയന്തരാവസ്ഥക്കാലത്തെ ഇരുണ്ട ദിനങ്ങളെ വീണ്ടും ഓർമ്മിപ്പിക്കുന്നു. അക്കാലത്തെ ഫാസിസ്റ്റ് അടിച്ചമർത്തലുകളെ പോരാടി തോൽപ്പിച്ച പാരമ്പര്യമുള്ള കേരളത്തിൽ ഇത്തരം നടപടികൾ ഒരിക്കലും വെച്ചുപൊറുപ്പിക്കാനാകില്ല.ഭരണകൂടത്തിന്റെ തെറ്റുകൾ ചൂണ്ടിക്കാണിക്കുക എന്നത് ഒരു കുറ്റകൃത്യമല്ല; മറിച്ച്, ഏതൊരു മാധ്യമത്തിന്റെയും കടമയാണ്. അതുകൊണ്ട്, എതിർസ്വരങ്ങൾ ഇല്ലാതാക്കാൻ ശ്രമിക്കുന്നവർക്ക് ശക്തമായ മറുപടി നൽകാൻ ജനങ്ങൾ തയ്യാറാകണം. പ്രതിസന്ധിയിൽ തളരാതെ പുതിയ പേജുമായി തങ്ങളുടെ മാധ്യമപ്രവർത്തനം തുടരാൻ തീരുമാനിച്ച നോക്യാപ് ടീമിന് അഭിവാദ്യങ്ങൾ. മാധ്യമ ധാർമ്മികതയും സാമൂഹിക പ്രതിബദ്ധതയും സത്യസദ്ധതയും ഉയർത്തിപ്പിടിച്ച് മുന്നോട്ടു പോകാനും നീതിക്കായി വിട്ടുവീഴ്ചയില്ലാതെ നിലയുറപ്പിക്കാനും അവർക്ക് സാധിക്കട്ടെ.
പാലക്കാട് ജില്ലാ ആശുപത്രിയിലെ മരുന്നുക്ഷാമം നേരിട്ട് പരിഹരിച്ച് ജില്ലാ പഞ്ചായത്ത്; 4.25 കോടി രൂപ ചെലവഴിച്ചു
പാലക്കാട്: പാലക്കാട് ജില്ലാ ആശുപത്രിയിലെ മരുന്ന് ക്ഷാമം നേരിട്ട് പരിഹരിച്ച് പാലക്കാട് ജില്ലാ പഞ്ചായത്ത്. ആരോഗ്യവകുപ്പ് മരുന്ന് എത്തിക്കാതായതോടെ ജില്ലാ പഞ്ചായത്ത് 4.25 കോടി ചെലവിട്ടാണ് മരുന്നെത്തിക്കുന്നത്. പാലക്കാട് ജില്ലാ ആശുപത്രിയില് അവശ്യ മരുന്നുകള് കഴിഞ്ഞ ദിവസങ്ങളില് മിക്കതും തീര്ന്നിരുന്നു. മരുന്ന് എത്തിക്കാന് സര്ക്കാര് വൈകുമെന്ന് ഉറപ്പായതോടെയാണ് പ്രതിസന്ധി പരിഹരിക്കാന് നേരിട്ട് ഇറങ്ങിയതെന്ന് ജില്ലാ പഞ്ചായത്ത് അധ്യക്ഷന് എസ് ബി രാജു പറഞ്ഞു.ആശുപത്രിയിലെ കെട്ടിട നിര്മ്മാണത്തിനും നവീകരണ പ്രവര്ത്തനങ്ങള്ക്കും ഉപയോഗിക്കേണ്ട ഫണ്ടാണ് സര്ക്കാര് കാരണം മരുന്ന് വാങ്ങുന്നതിനായി ചെലവഴിക്കേണ്ടി വരുന്നതെന്ന് ജില്ലാ പഞ്ചായത്ത് അധ്യക്ഷന് വ്യക്തമാക്കി. തദ്ദേശസ്ഥാപനങ്ങളുടെ ഫണ്ട് സര്ക്കാര് വെട്ടി കുറച്ചതിനാല് എത്രനാള് ജില്ലാ ആശുപത്രിയിലേക്ക് മരുന്ന് എത്തിക്കാന് കഴിയുമെന്ന കാര്യത്തിലും ആശങ്കയുണ്ട്. ആശുപത്രി മാനേജ്മെന്റ് കമ്മിറ്റിയുടെ ഫണ്ടും മരുന്ന് എത്തിക്കാന് ഉപയോഗിക്കുന്നുണ്ടെന്നാണ് ജില്ലാ പഞ്ചായത്ത് പറയുന്നത്.
മുഖ്യമന്ത്രിക്കും മന്ത്രിമാര്ക്കും സുരക്ഷ ഒരുക്കുന്നതില് പൊലീസിന് വീഴ്ച; ഇന്റലിജന്സ് റിപ്പോര്ട്ട്
തിരുവനന്തപുരം: മുഖ്യമന്ത്രിക്കും മന്ത്രിമാര്ക്കും സുരക്ഷ ഒരുക്കുന്നതില് പൊലീസിന് വീഴ്ച എന്ന് ഇന്റലിജന്സ് റിപ്പോര്ട്ട്. പ്രതിഷേധമുണ്ടാകുമെന്ന് നേരത്തെ മുന്നറിയിപ്പ് നല്കിയെങ്കിലും പൊലീസ് ജാഗ്രത കാണിച്ചില്ലെന്നാണ് റിപ്പോര്ട്ട്. പാര്ട്ടി ഓഫീസുകള്ക്ക് സുരക്ഷ ഒരുക്കണമെന്ന് നേരത്തെ അറിയിച്ചെങ്കിലും ഉദ്യോഗസ്ഥരെ നിയോഗിച്ചില്ല. കെ എം ഷാജിയെ 20 മിനിറ്റോളം വഴിയില് തടഞ്ഞിട്ടും പൊലീസ് സാന്നിധ്യം ഉണ്ടായില്ലെന്നും വിമര്ശനവുണ്ട്. തിരുവനന്തപുരത്തെ പ്രതിഷേധങ്ങളില് ഡിജിപി കമ്മീഷണറോട് റിപ്പോര്ട്ട് തേടിയിരിക്കുകയാണ്.മന്ത്രിമാര്ക്കെതിരായ പ്രതിഷേധത്തിന് പിന്നാലെ സുരക്ഷ ശക്തിപ്പെടുത്താനാണ് നിര്ദ്ദേശം നല്കിയിരിക്കുന്നത്. ഇന്നും കരിങ്കൊടി പ്രതിഷേധം ഉണ്ടാകുമെന്നാണ് മുന്നറിയിപ്പ് നല്കിയിരിക്കുന്നത്. മന്ത്രിമാര് പങ്കെടുക്കുന്ന പരിപാടികളിലും യാത്രകളിലും കൂടുതല് പൊലീസുകാരെ വിന്യസിക്കും. പ്രതിഷേധമുണ്ടായാല് ശക്തമായ നടപടി സ്വീകരിക്കണമെന്നാണ് അറിയിച്ചിരിക്കുന്നത്. ജാമ്യമില്ലാ വകുപ്പുകള് ചുമത്തിയാകും കേസ് എടുക്കുക. കെ എം ഷാജിക്ക് എതിരായ പ്രതിഷേധത്തില് പൊലീസിന് വീഴ്ച എന്ന ആക്ഷേപം ശക്തമാണ്. സെക്രട്ടറിയേറ്റിന് അര കിലോമീറ്റര് അകലെ നടന്ന പ്രതിഷേധത്തിലാണ് സുരക്ഷാ വീഴ്ച എന്നതാണ് ഏറ്റവും ഗൗരവതരം. കോണ്ഗ്രസ് നേതാക്കള് വിഷയത്തില് അതൃപ്തി പരസ്യമാക്കിയിട്ടുണ്ട്.കേന്ദ്ര ആഭ്യന്തരമന്ത്രി അമിത് ഷാക്കെതിരെ കൊല്ലത്ത് നടന്ന കരിങ്കൊടി പ്രതിഷേധത്തിന് പിന്നാലെയാണ് സംസ്ഥാനത്ത് വ്യപകമായി മന്ത്രിമാരെ ബിജെപി വഴിയില് തടയാന് തുടങ്ങിയത്. ഇത് സംബന്ധിച്ച അറിയിപ്പ് നേരത്തെ തന്നെ ഇന്റലിജന്സ് നല്കിയിരുന്നു. ഡല്ഹയില് നിന്ന് എത്തി ഔദ്യോഗിക വസതിയിലേക്ക് പോകുമ്പോള് ചാക്കയില് വെച്ചാണ് യുവമോര്ച്ച പ്രവര്ത്തകര് മുഖ്യമന്ത്രിയെ കരിങ്കൊടി കാണിക്കുന്നത്. അവിടെ പൊലീസ് സാനിധ്യം ഉണ്ടായിരുന്നില്ല എന്നതും ഗൗരവമാണ്. മന്ത്രി ഒ ജെ ജനീഷിനെതിരെ നെയ്യാറ്റിന്കരയിലുണ്ടായ പ്രതിഷേധത്തിലും പിന്നാലെ കെ എം ഷാജിക്കെതിരായ പ്രതിഷേധത്തിലും പൊലീസിന്റെ നിഷ്ക്രിയത്വം വ്യക്തമായിരുന്നു. യൂണിവേഴ്സിറ്റി ഹോസ്റ്റല് സംഘര്ഷത്തിന് പിന്നാലെ എസ്എഫ്ഐ – ഡിവൈഎഫ്ഐ പ്രവര്ത്തകരും സമരവുമായി രംഗത്ത് ഉണ്ട്. ഇന്നലെ മാത്രം എട്ടോളം തവണയാണ് മന്ത്രി ഒ ജെ ജനീഷിനെ സമരക്കാര് വഴിയില് തടഞ്ഞത്.



