ന്യൂഡല്ഹി: ഇന്ഡിഗോ വിമാന സര്വീസില് ശിശുക്കളുടെ യാത്രാ നിരക്ക് വര്ധിപ്പിച്ചു. 2,000 രൂപയില് നിന്ന് 3,000 രൂപയാക്കിയാണ് നിരക്ക് വര്ധിപ്പിച്ചത്. പ്രീ-ബുക്കിംഗ് നിരക്ക് 2,000-ല് നിന്ന് 2,250-ആയി വര്ദ്ധിച്ചു. വിമാനത്താവളത്തിലെ കൗണ്ടറില് നിന്ന് നേരിട്ട് വാങ്ങുമ്പോഴുള്ള നിരക്കാണ് 2,500-ല് നിന്ന് 3,000-ആയി ഉയര്ന്നത്. 2 വയസ്സില് താഴെയുള്ള കുട്ടികള്ക്കാണ് ഈ നിരക്കുകള് ബാധകമാകുന്നത്. ഇവര്ക്ക് പ്രത്യേക സീറ്റ് ലഭിക്കില്ലെങ്കിലും ഇവര്ക്കായി ടിക്കറ്റ് ബുക്ക് ചെയ്യേണ്ടതുണ്ട്. 10 ലക്ഷത്തോളം വരുന്ന കുഞ്ഞുങ്ങളുടെ യാത്രയെ ഇത് ബാധിക്കും എന്നാണ് നിഗമനം.ഒറ്റയ്ക്ക് യാത്ര ചെയ്യുന്ന കുട്ടികള്ക്കായുള്ള ഫീസ് 5,000 ല് നിന്ന് 5,999 രൂപയാക്കി വര്ധിപ്പിച്ചിട്ടുണ്ട്. എയര്ലൈനിന്റെ ബാധകമായ ചട്ടങ്ങള്ക്കനുസൃതമായി, മുതിര്ന്നവരുടെ സംരക്ഷണമില്ലാതെ യാത്ര ചെയ്യുന്ന കുട്ടികള്ക്കാണ് ഈ സേവനം ബാധകമാകുന്നത്. കുട്ടികളുടെ ഒറ്റക്കുള്ള അന്താരാഷ്ട്ര യാത്രകളുടെ നിരക്ക് 12,999 ആയി ഉയര്ന്നു. നിരക്ക് വര്ദ്ധനവുകളിലൂടെ 90 കോടിയുടെ അധിക വരുമാനം ലഭിക്കുമെന്നാണ് ഇന്ഡിഗോയുടെ വിലയിരുത്തന്.അധിക ബാഗേജ് കിലോഗ്രാമിന് 700 രൂപയില് നിന്ന് 800 രൂപയായി വര്ധിപ്പിച്ചിട്ടുണ്ട്. പ്രയോറിറ്റി ചെക്ക്-ഇന് & ബോര്ഡിംഗ് 450 ല് നിന്ന് 650 രൂപയാക്കി. ട്രാവല് സര്ട്ടിഫിക്കറ്റ് ഫീസ് 200 ല് നിന്ന് 300 രൂപയാക്കിയാണ് ഉയര്ത്തിയിരിക്കുന്നത്. മറ്റ് വിമാന കമ്പനികളും നിരക്കുകള് വര്ധിപ്പിച്ചിട്ടുണ്ട്. ഉയര്ന്ന വിമാന ഇന്ധന വില വര്ധനയാണ് നിലയിലെ നിരക്ക് വര്ധനവിന് കാരണം എന്നാണ് വിമാന കമ്പനികള് നല്കുന്ന വിശദീകരണം.
സംസ്ഥാനത്ത് വൈദ്യുതി ഉപയോഗം കൂടുതൽ; ഇന്നും നിയന്ത്രണത്തിന് സാധ്യതയെന്ന് കെഎസ്ഇബി
തിരുവനന്തപുരം: സംസ്ഥാനത്ത് വൈദ്യുതി ഉപയോഗം കൂടുതലെന്ന് കെഎസ്ഇബി. ഈ മാസത്തെ ഏറ്റവും ഉയര്ന്ന ഉപയോഗമാണ് ഇന്നലെ രേഖപ്പെടുത്തിയത്. 99.87 ദശലക്ഷം യൂണിറ്റായിരുന്നു ഇന്നലത്തെ ഉപയോഗം. രാത്രികാല ആവശ്യകത 5305 മെഗാവാട്ട് ആണെന്നും ഇന്ന് 900 മെഗാവാട്ടിന്റെ കുറവ് പ്രതീക്ഷിക്കുന്നുവെന്നും അതുകൊണ്ടുതന്നെ ഇന്ന് വൈദ്യുതി നിയന്ത്രണത്തിന് സാധ്യതയുണ്ടാകുമെന്നും കെഎസ്ഇബി അറിയിച്ചു. ഇന്നലെ വൈദ്യുതി നിയന്ത്രണം ഉണ്ടായിരുന്നില്ലെന്നും വൈദ്യുതി നിയന്ത്രണം ഒഴിവാക്കാനുള്ള വഴികള് തേടുകയാണെന്നും കെഎസ്ഇബി വ്യക്തമാക്കി.കര്ണാടക, തമിഴ്നാട് സംസ്ഥാനങ്ങളിലെ വൈദ്യുതി ഉപഭോഗം കുറഞ്ഞതാണ് സംസ്ഥാനത്ത് ഇന്നലെ വൈദ്യുതി നിയന്ത്രണം ഒഴിവാക്കാൻ സഹായമായത്. ഇത് കേരളത്തിലേക്കുള്ള പവര് ഗ്രിഡിലെ വൈദ്യുതി ലഭ്യത കൂട്ടിയെന്നും പവര് എക്സ്ചേഞ്ച് വഴിയും മതിയായ വൈദ്യുതി ലഭിച്ചുവെന്നും കെഎസ്ഇബി അറിയിച്ചിരുന്നു. 700 മെഗാവാട്ടിന്റെ കുറവുണ്ടായിരുന്നെങ്കിലും മതിയായ അളവില് വൈദ്യുതി സംസ്ഥാനത്തിന് ലഭിച്ചു. കഴിഞ്ഞ 17 ദിവസത്തിനിടെ രാത്രികാല വൈദ്യുതി നിയന്ത്രണം ഇല്ലാതിരുന്ന രണ്ടാം ദിനമായിരുന്നു ഇന്നലെ.അതേസമയം സോളാര് എനര്ജി കോര്പ്പറേഷന് ഓഫ് ഇന്ത്യയുമായി ദീര്ഘകാല വൈദ്യുതി കരാറില് ഒപ്പിട്ടിരിക്കുകയാണ് കെഎസ്ഇബി. ഇതോടെ രാത്രികാലങ്ങളില് 300 മെഗാവാട്ട് വൈദ്യുതി ലഭിക്കും. യൂണിറ്റിന് ആറ് രൂപ നിരക്കിലാവും വൈദ്യുതി ലഭിക്കുക. 2028 മാര്ച്ച് മുതലാവും വൈദ്യുതി ലഭിച്ച് തുടങ്ങുക. 25 വര്ഷത്തേക്കാണ് കരാര്.
കോവിഡ് മരണം; കുടുംബങ്ങൾക്ക് ആശ്വാസവുമായി സംസ്ഥാന സർക്കാർ; 9.96 കോടി രൂപ അനുവദിച്ചു
തിരുവനന്തപുരം: കോവിഡ് ബാധിച്ച് മരിച്ചവരുടെ കുടുംബങ്ങൾക്കായി അനുവദിച്ച സാമ്പത്തിക സഹായ പദ്ധതിയിലേക്ക് 9.96 കോടിയുടെ അധിക തുക അനുവദിച്ച് സംസ്ഥാന സർക്കാർ. കോവിഡ് മൂലം കുടുംബനാഥൻ അല്ലെങ്കിൽ മാതാപിതാക്കൾ നഷ്ടപ്പെട്ട് കടുത്ത സാമ്പത്തിക പ്രതിസന്ധിയിലായ ബിപിഎൽ വിഭാഗത്തിൽപ്പെട്ട കുടുംബങ്ങൾക്ക് പ്രതിമാസം 5,000 രൂപ വീതം നൽകുന്ന പദ്ധതിയിലേക്കാണ് ഈ തുക അനുവദിച്ചിരിക്കുന്നത്. മുഖ്യമന്ത്രിയുടെ ദുരിതാശ്വാസ നിധിയിൽ നിന്നാണ് തുക വകയിരുത്തിയിരിക്കുന്നത്.അർഹരായ കുടുംബങ്ങളുടെ ബാങ്ക് അക്കൗണ്ടുകളിലേക്ക് നേരിട്ടാണ് തുക എത്തുക. തുടർച്ചയായി മൂന്ന് വർഷത്തേക്കാണ് അർഹരായ ബിപിഎൽ കുടുംബങ്ങൾക്ക് ഈ ധനസഹായം ലഭിക്കുന്നത്
വ്യാപാരികൾക്ക് തിരിച്ചടി; യുപിഐ ഇടപാട് ചാർജിന് ജിഎസ്ടി ചുമത്തും
ന്യൂഡൽഹി: യുപിഐ വഴി 2,000 രൂപക്ക് മുകളിലുള്ളഇടപാടുകൾക്ക് ചുമത്തുന്ന ഫീസിന് ജിഎസ്ടിയും ഈടാക്കും. 18 ശതമാനം ജിഎസ്ടിയാണ് ഈടാക്കുക. എന്നാൽ, ജിഎസ്ടി രജിസ്റ്റർ ചെയ്ത വ്യാപാരികൾക്ക് ഇത് ഇൻപുട്ട് ടാക്സ്സ് ക്രെഡിറ്റായി തിരികെ ലഭിക്കും.ഇതുപ്രകാരം ഉദാഹരണമായി 10,000 രൂപയുടെ ഇടപാട് നടത്തുന്ന വ്യാപാരിക്ക് 40 രൂപയാണ് മെർച്ചന്റ് ഡിസ്ക്കൗണ്ട് റേറ്റായി നൽകേണ്ടി വരിക. ഇതിനൊപ്പം ഏഴ് രൂപയോളം ജിഎസ്ടിയും നൽകണം. ഈ ഏഴ് രൂപയാണ് ഇൻപുട്ട് ടാക്സ് ക്രെഡിറ്റിലൂടെ തിരികെ ലഭിക്കുമെന്ന് പറയുന്നത്. എന്നാൽ, ജിഎസ്ടിയിൽ രജിസ്റ്റർ ചെയ്യാത്ത വ്യാപാരികൾക്ക് ഈ തുക കൈയിൽ നിന്നും കൊടുക്കേണ്ടി വരും. ജിഎസ്ടി ഇളവുള്ള ഉൽപന്നങ്ങൾ വിൽക്കുന്ന വ്യാപാരികൾക്കാവും ഇത് തിരിച്ചടിയാവുക.കഴിഞ്ഞ ദിവസമാണ് യുപിഐ ചാർജുകളിൽ വ്യക്തതുമായി കേന്ദ്രസർക്കാർ രംഗത്തെത്തിയത്.2,000 രൂപ വരെയുള്ള യുപിഐ ഇടപാടുകൾ പൂർണമായും സൗജന്യമായി തുടരുമെന്നായിരുന്നു അറിയിപ്പ്. എന്നാൽ, അതിന് മുകളിലുള്ള ഇടപാടുകൾക്ക് 0.4 ശതമാനം എംഡിആർ നൽകേണ്ടി വരും വ്യാപാരികളാണ് ഈ ചാർജ് നൽകേണ്ടത്.എംഡിആർ ചാർജിൽ രാജ്യത്ത് പ്രതിഷേധം ശക്തമാകുന്നതിനിടെയാണ് ജിഎസ്ടി സംബന്ധിച്ച വിവരങ്ങളും പുറത്ത് വരുന്നത്. പുതിയ എംഡിആർ ചാർജ് ചെറിയ വ്യാപാരികളുടെ ഡിജിറ്റൽ പേയ്മെന്റ് ചെലവ് വർധിപ്പിക്കുമെന്ന് റീടെയിലേഴ്സ് അസോസിയേഷൻ ഓഫ് ഇന്ത്യ വ്യക്തമാക്കിയിട്ടുണ്ട്.
ട്രെയിനിന് നിയന്ത്രണം വരുമ്പോൾ കെഎസ്ആർടിസി കൂടുതൽ സർവീസുകൾ തുടങ്ങണം: മനുഷ്യാവകാശ കമ്മീഷൻ
കോഴിക്കോട്: സെപ്റ്റംബർ 17 മുതൽ 30 വരെ ട്രെയിൻ സർവീസുകൾക്ക് നിയന്ത്രണം ഏർപ്പെടുത്തുന്ന സാഹചര്യത്തിൽ മലബാർ മേഖലയിലെ യാത്രക്കാരുടെ ബുദ്ധിമുട്ടുകൾ പരിഹരിക്കുന്നതിന് കോഴിക്കോട്, കണ്ണൂർ, കാസർകോട് ജില്ലകളിലെ പ്രധാന റൂട്ടുകളിൽ അധിക സർവീസുകൾ കെഎസ്ആർടിസി ആരംഭിക്കണമെന്ന് മനുഷ്യാവകാശ കമ്മീഷൻ.റദ്ദാക്കപ്പെടുന്ന ട്രെയിൻ സർവീസുകളുടെ വിവരങ്ങൾ മുൻകൂട്ടി മനസിലാക്കി യാത്രക്കാരുടെ തിരക്ക് അനുഭവപ്പെടുന്ന സ്ഥലങ്ങളിൽ അധിക സർവീസുകൾ ഏർപ്പെടുത്തണമെന്നാണ് ജുഡീഷ്യൽ അംഗം കെ. ബൈജുനാഥ് കെ.എസ്.ആർ.ടി.സി മാനേജിംഗ് ഡയറക്ടർക്ക് നൽകിയ നിർദ്ദേശം. ഉത്തരവിന്റെ അടിസ്ഥാനത്തിൽ സ്വീകരിച്ച നടപടികൾ കെ.എസ്.ആർ.ടി.സി എം.ഡി 15 ദിവസത്തിനകം കമ്മീഷനെ അറിയിക്കണം. അടുത്തമാസം കോഴിക്കോട് നടക്കുന്ന സിറ്റിംഗിൽ കേസ് പരിഗണിക്കും.ട്രെയിൻ സർവീസുകൾക്ക് താൽക്കാലിക നിയന്ത്രണം ഏർപ്പെടുത്തുന്നത് കോഴിക്കോട്, കണ്ണൂർ, കാസർകോട് ജില്ലകളിലെ ട്രെയിൻ യാത്രക്കാരെ പ്രതികൂലമായി ബാധിക്കുമെന്ന് ഉത്തരവിൽ പറഞ്ഞു. ഇത്തരം സാഹചര്യത്തിൽ യാത്രാ പ്രതിസന്ധി ലഘൂകരിക്കുന്നതിനായി പൊതുഗതാഗത സംവിധാനങ്ങൾ ഫലപ്രദമായി വിന്യസിക്കണമെന്ന് കെ. ബൈജുനാഥ് ഉത്തരവിൽ പറഞ്ഞു. കോൺഫെഡറേഷൻ ഓഫ് ഓൾ ഇന്ത്യ റയിൽ യൂസേഴ്സ് അസോസിയേഷൻ വർക്കിംഗ് ചെയർമാൻ ഷെവലിയർ സി.ഇ. ചാക്കുണ്ണി സമർപ്പിച്ച പരാതിയിലാണ് നടപടി.
പുതിയ വാതിൽ തുറന്നു സതീശൻ; ഇനി ‘സരൾ കേരളം’, 19 നിയമങ്ങൾ ഭേദഗതി ചെയ്യും
തിരുവനന്തപുരം : സംസ്ഥാനത്തേക്കു പുതിയ നിക്ഷേപങ്ങളും ബിസിനസ് സംരംഭങ്ങളും ആകർഷിക്കാൻ ലക്ഷ്യമിട്ട് ‘സരൾ കേരളം’ പദ്ധതി നടപ്പാക്കാൻ മുഖ്യമന്ത്രി വി.ഡി.സതീശന്റെ അധ്യക്ഷതയിൽ ചേർന്ന മന്ത്രിസഭായോഗം തീരുമാനിച്ചു. ‘ഒരു സംസ്ഥാനം, ഒരു അനുമതി, ഒരു രേഖ’ എന്ന നയത്തിലൂന്നി ആവശ്യമായ ലൈസൻസുകളും അനുമതികളും അതിവേഗം ഏകജാലകത്തിലൂടെ ലഭ്യമാക്കുകയാണു ലക്ഷ്യം. ഇതിനായി ഏകീകൃത അതോറിറ്റിക്കു രൂപംനൽകും. പദ്ധതി നടപ്പാക്കാൻ 19 നിയമങ്ങൾ ഭേദഗതി ചെയ്യും. ‘സിംപ്ലിഫൈഡ് ആൻഡ് ആക്സിലറേറ്റഡ് റഗുലേറ്ററി അപ്രൂവൽസ് ആൻഡ് ലൈസൻസ്’ എന്നാണ് സരളിന്റെ പൂർണരൂപം.25 കോടി മുതൽ 50 കോടി രൂപ വരെയുള്ള നിക്ഷേപങ്ങൾക്ക് ജില്ലാതല സമിതിയും 50 കോടിക്കു മുകളിലുള്ളവയ്ക്ക് സംസ്ഥാന സമിതിയും അനുമതി നൽകും. വ്യവസായ വികസന കോർപറേഷനാണ് (കെഎസ്ഐഡിസി) ഏകോപനച്ചുമതല. നിക്ഷേപ, സംരംഭ ശുപാർശ ലഭിച്ചാൽ ഓരോ വകുപ്പും നിശ്ചിത ദിവസത്തിനകം പരിശോധന പൂർത്തിയാക്കി മറുപടി നൽകണം. പിന്നാലെ അപ്രൈസൽ ബോഡി വിലയിരുത്തി സമിതിയുടെ മുൻപാകെ സമർപ്പിച്ച് അന്തിമ അനുമതി നൽകും. വകുപ്പുകളുടെ വിയോജിപ്പുകൾ പരിഹരിക്കാൻ അപ്പീൽ സംവിധാനമുണ്ട്.വർഷങ്ങളായി അനുമതി ലഭിക്കാത്ത നിക്ഷേപങ്ങൾക്ക് പദ്ധതി വലിയ ആശ്വാസമാകുമെന്ന് മുഖ്യമന്ത്രി പറഞ്ഞു. സംസ്ഥാനത്തിന്റെ വികസന സാധ്യതകൾക്ക് പുതിയ വാതിൽ തുറക്കും. പദ്ധതി നടപ്പാകുമ്പോൾ വകുപ്പുകളുടെ അധികാരം നഷ്ടമാകില്ല. എല്ലാ വകുപ്പുകളുമായി വിശദ ചർച്ച നടത്തി, അവയുടെ അഭിപ്രായങ്ങൾ കൂടി ഉൾപ്പെടുത്തി തയാറാക്കിയ കരട് രേഖയാണ് മന്ത്രിസഭ അംഗീകരിച്ചതെന്നും മുഖ്യമന്ത്രി പറഞ്ഞു.
മകന്റെ കൂടെ കളിക്കുകയായിരുന്ന നാലു വയസ്സുകാരനോട് ലൈംഗികാതിക്രമം: പ്രതിക്ക് 5 വർഷം തടവും പിഴയും
കോഴിക്കോട് : നാലു വയസ്സുകാരനോട് ലൈംഗികാതിക്രമം നടത്തിയ കേസിൽ നോർത്ത് ബേപ്പൂർ സ്വദേശി മുണ്ടോടി വീട്ടിൽ പയസിനെ(43) ഫാസ്റ്റ്ട്രാക്ക് സ്പെഷൽ കോടതി ജഡ്ജി സി.എസ്.അമ്പിളി 5 വർഷത്തെ കഠിന തടവിനും 40,000 രൂപ പിഴ അടയ്ക്കാനും ശിക്ഷിച്ചു. മാറാട് പൊലീസ് സ്റ്റേഷൻ പരിധിയിൽ 2024 ലാണ് കേസിനാസ്പദമായ സംഭവം നടന്നത്. മകന്റെ കൂടെ കളിക്കുകയായിരുന്ന ആൺകുട്ടിയോട് ലൈംഗിക അതിക്രമം നടത്തിയതെന്നാണ് കേസ്. മാറാട് എസ്ഐ എൽ.വി.അരുൺ കുമാറിന്റെ നേതൃത്വത്തിലാണ് അന്വേഷണം നടന്നത്. പ്രോസിക്യൂഷനു വേണ്ടി അഡ്വ. ആർ.എൻ.രഞ്ജിത്ത് ഹാജരായി.
തൃപ്പൂണിത്തുറയിൽ വൈദ്യുതി തടസപ്പെടുത്തി സാമൂഹിക വിരുദ്ധർ; ട്രാൻസ്ഫോമറുകളിൽ നിന്ന് ഫ്യൂസ് ഊരിയെറിഞ്ഞു
കൊച്ചി: സംസ്ഥാനത്ത് വൈദ്യുതി പ്രതിസന്ധി രൂക്ഷമായി തുടരുന്നതിനിടെ എറണാകുളം തൃപ്പൂണിത്തുറയില് വൈദ്യുതി തടസ്സപ്പെടുത്തി സാമൂഹിക വിരുദ്ധര്. വെള്ളക്കിനാവ്, കിടങ്ങ് ഭാഗങ്ങളിലെ രണ്ട് ട്രാന്സ്ഫോര്മറുകളില് നിന്നാണ് ഫ്യൂസ് ഊരിയത്. ഇതിനെ തുടര്ന്ന് പ്രദേശത്ത് ഒന്നര മണിക്കൂറില് ഏറെ വൈദ്യുതി തടസപ്പെട്ടു. സംഭവത്തില് കെഎസ്ഇബി പൊലീസില് പരാതി നല്കി. വൈദ്യുതി നിയന്ത്രണത്തിന്റെ സമയക്രമം കഴിഞ്ഞിട്ടും വൈദ്യുതി ലഭിക്കാതെ വന്നതോടെ നാട്ടുകാര് കെഎസ്ഇബിയെ വിവരം അറിയിക്കുകയും തുടര്ന്ന് ഉദ്യോഗസ്ഥര് സ്ഥലത്തെത്തി പരിശോധന നടത്തുകയുമായിരുന്നു.വെള്ളക്കിനാവിലെ ട്രാന്സ്ഫോര്മറില് നിന്നും ഊരിമാറ്റിയ ഫ്യൂസ് തോട്ടില് കളഞ്ഞ നിലയിലും മറ്റേത് തകര്ത്ത നിലയിലുമായിരുന്നു. പിന്നീട് ഉദ്യോഗസ്ഥരെത്തി വൈദ്യുതി പുനഃസ്ഥാപിച്ചു. നേരത്തെ പറവൂരിലും സമാനമായ സംഭവം ഉണ്ടാവുകയും പൊലീസ് കേസെടുക്കുകയും ചെയ്തിരുന്നു. കഴിഞ്ഞ ദിവസം അടൂർ നെടുംകുളഞ്ഞിയിലും സാമൂഹിക വിരുദ്ധർ ട്രാൻസ്ഫോർമറിന്റെ ഫ്യൂസ് ഊരിയതിൽ കെഎസ്ഇബി പൊലീസിൽ പരാതി നൽകിയിരുന്നു. അതേസമയം പ്രതിസന്ധിയ്ക്കിടെ കല്പ്പറ്റ നഗരത്തിൽ പട്ടാപകൽ വൈദ്യുതി പാഴാക്കുന്നതിന്റെ ദൃശ്യങ്ങൾ പുറത്തുവന്നു. ചുങ്കം ജംങ്ഷൻ സ്കൂള് മുതല് അയപ്പക്ഷേത്രം വരെയുള്ള പരിസരങ്ങളിലെ എട്ട് തെരുവ് വിളക്കുകളാണ് ആഴ്ചകളായി പകല് സമയങ്ങളില് കത്തി നില്ക്കുന്നത്. എന്നാല് പകല് സമയങ്ങളില് കത്തുന്ന വിളക്കുകള് രാത്രികാലങ്ങളില് തെളിയാറില്ലെന്ന് നാട്ടുകാര് പറയുന്നു. കെഎസ്ഇബിയെ വിവരം അറിയിച്ചിരുന്നുവെന്നും മുനിസിപ്പാലിറ്റിയില് വിവരം അറിയിക്കാനാണ് ഉദ്യോഗസ്ഥര് പറഞ്ഞതെന്നും സംഭവത്തില് ഇതുവരെയും നടപടി ഉണ്ടായിട്ടില്ലെന്നും നാട്ടുകാര് പറഞ്ഞു. പത്തനംതിട്ടയിലും സമാനമായി പകല് സമയങ്ങളില് തെരുവ് വിളക്കുകൾ കത്തി നില്ക്കുന്ന സംഭവം ഉണ്ടായിട്ടുണ്ട്.
ആളിക്കത്തി വെയിൽ; വേനലിന് മുന്നേ വിയർത്ത് തൊഴിലാളികൾ.
കോഴിക്കോട് : ജില്ലയിൽ ചൂട് കനത്തതോടെ കത്തുന്ന വെയിലിൽ ജോലി ചെയ്യാനാവാതെ തൊഴിലാളികൾ ദുരിതത്തിൽ. രാവിലെ മുതൽ ആരംഭിക്കുന്ന കടുത്ത വെയിൽ വൈകിട്ട് വരെ നീളുന്നത് സാധാരണക്കാരുടെ അദ്ധ്വാനത്തെയും ആരോഗ്യത്തെയും സാരമായി ബാധിക്കുന്നു.നിർമ്മാണ തൊഴിലാളികൾ, ചുമട്ടുതൊഴിലാളികൾ, ട്രാഫിക് പൊലീസുകാർ, ഓൺലൈൻ ഡെലിവറി ജീവനക്കാർ, കർഷകർ, ഉന്തുവണ്ടിയിൽ സാധനം വിൽക്കുന്നവർ തുടങ്ങി തുറസ്സായ സ്ഥലങ്ങളിൽ ജോലി ചെയ്യുന്ന വിഭാഗങ്ങളാണ് വലിയ വെല്ലുവിളി നേരിടുന്നത്. അന്തരീക്ഷം കൂടുതൽ തെളിഞ്ഞ് സുഖകരമായ കാലാവസ്ഥ അനുഭവപ്പെടേണ്ട സെപ്തംബറിലാണ് ഇവർ ചൂടിൽ വലയുന്നത്.മഴയുടെ കുറവും കാലാവസ്ഥാ വ്യതിയാനവും മൂലം അനുഭവപ്പെടുന്ന അപ്രതീക്ഷിത വെയിലായതിനാൽ സാധാരണ വേനൽക്കാലത്തോ കനത്ത മഴക്കാലത്തോ ലഭിക്കാറുള്ള അധിക വേതനം ഫുഡ് ഡെലിവറി ജീവനക്കാർക്കിപ്പോൾ ലഭിക്കുന്നില്ല.ചൂട് ഉയർന്നിട്ടും ട്രാഫിക് പൊലീസുകാർക്ക് ജോലി സമയത്തിലോ ക്രമീകരണങ്ങളിലോ പ്രത്യേക ഇളവുകളൊന്നും അനുവദിച്ചിട്ടില്ല. തൊഴിലിടങ്ങളിൽ ആവശ്യത്തിന് ശുദ്ധജലം ലഭ്യമല്ലാത്തത് നിർമ്മാണ തൊഴിലാളികളെ കടുത്ത നിർജ്ജലീകരണത്തിലേക്ക് നയിക്കുന്നുണ്ട്.
വൈദ്യുതി പ്രതിസന്ധി രൂക്ഷം; കേരളത്തില് ഇന്നും പവര്കട്ട് തുടരും
തിരുവനന്തപുരം: വൈദ്യുതി പ്രതിസന്ധിക്ക് പരിഹാരം കാണാന് കഴിയാതെ സംസ്ഥാന സര്ക്കാര്. ഇന്നും പവര്കട്ട് തുടരും. സംസ്ഥാനത്തെ പ്രതിദിന ഉപഭോഗം 94 ദശലക്ഷത്തിന് മുകളിലെത്തി.അതേസമയം, വൈദ്യുതി വാങ്ങുന്നത് സംബന്ധിച്ച് എന്ടിപിസി സിഎംഡിയുമായി കെഎസ്ഇബി ചെയര്മാന് ഇന്ന് കൂടിക്കാഴ്ച നടത്തും. എന്ടിപിസി സര്ക്കാര് സ്ഥാപനമായതിനാല് വലിയ കടമ്പകളില്ലാതെ വാങ്ങാനാവും. എന്ടിപിസി അവസാന ഓപ്ഷനല്ലായെന്ന് മന്ത്രി പറഞ്ഞിരുന്നു. വില കൂടുതല് നല്കിയാലും വൈദ്യുതി വാങ്ങുകയെന്നതാണ് ലക്ഷ്യമെന്ന് വൈദ്യുതി മന്ത്രി നേരത്തെ വ്യക്തമാക്കിയിരുന്നു. 30 രൂപക്ക് വാങ്ങുന്നത് സാമ്പത്തിക ബാധ്യതയാണെങ്കിലും അടിയന്തര സാഹചര്യത്തില് വാങ്ങുക എന്നത് മാത്രമാണ് സര്ക്കാര് ലക്ഷ്യമിടുന്നത്.ആണവനിലയങ്ങളില് നിന്നുള്ള വൈദ്യുതി ലഭ്യത ഉറപ്പാക്കാന് സിഎംഡിയും നേരിട്ട് ഇടപെടുന്നുണ്ട്. കൈമാറ്റ കരാര് അവസാനിച്ചതോടെ പീക്ക് ടൈമില് 300 മെഗാവാട്ട് വൈദ്യുതി ലഭിക്കുമെന്നതാണ് നിലവിലെ ആശ്വാസമെങ്കിലും അതുകൊണ്ട് മാത്രം നിയന്ത്രണം ഒഴിവാക്കാന് കഴിയില്ലെന്ന് ഉദ്യോഗസ്ഥര് വ്യക്തമാക്കിയിരുന്നു. അടുത്ത പതിനഞ്ച് ദിവസം കൂടി സംസ്ഥാനത്ത് വൈദ്യുതി നിയന്ത്രണം തുടരും. പ്രതിസന്ധി പരിഹരിക്കാന് ആണവ നിലയങ്ങളില് നിന്നുള്ള വൈദ്യുതി വാങ്ങുന്നതിനായി കെഎസ്ഇബി ചെയര്മാന് എം ജി രാജമാണിക്യം മുംബൈയിലെത്തി കാര്യങ്ങള് ചര്ച്ച ചെയ്യുമെന്നും ഉദ്യോഗസ്ഥര് അറിയിച്ചിരുന്നു.



