തിരുവനന്തപുരം: കർക്കിടക വാവുബലി തർപ്പണത്തിനായി എത്തുന്ന ഭക്തർക്ക് പ്രത്യേക ജാഗ്രത നിർദേശവുമായി കേരള പോലീസ്. സംസ്ഥാനത്ത് നിലവിൽ പ്രതികൂല കാലാവസ്ഥയും ശക്തമായ ഒഴുക്കും നിലനിൽക്കുന്നതിനാൽ അപകടസാധ്യത കണക്കിലെടുത്ത് ജലാശയങ്ങളിൽ ഇറങ്ങുന്നത് പൂർണ്ണമായും ഒഴിവാക്കണമെന്ന് അധികൃതർ അറിയിച്ചു.ബലി തർപ്പണത്തിനായി നദികൾ, മറ്റ് ജലാശയങ്ങൾ, കടൽ എന്നിവയിൽ ഇറങ്ങുന്നത് ഒഴിവാക്കണം. പകരം, ബലി തർപ്പണ ചടങ്ങുകൾക്കായി പ്രത്യേകം സജ്ജീകരിച്ചിട്ടുള്ള പ്ലാറ്റ്ഫോമുകളോ അല്ലെങ്കിൽ അധികൃതർ നിർദേശിക്കുന്ന മറ്റ് സുരക്ഷിത സ്ഥലങ്ങളോ മാത്രം ഉപയോഗിക്കാൻ ഭക്തർ ശ്രദ്ധിക്കണം.സുരക്ഷ ഉറപ്പാക്കുന്നതിനായി പോലീസ്, റവന്യൂ, ഫയർ ആൻഡ് റെസ്ക്യൂ, ലൈഫ് ഗാർഡ് എന്നീ വിഭാഗങ്ങളിലെ ഉദ്യോഗസ്ഥരുടെ നിർദ്ദേശങ്ങൾ കർശനമായി പാലിക്കേണ്ടതാണ്. ചടങ്ങുകൾക്ക് എത്തുന്നവർ കുട്ടികളുടെയും മുതിർന്നവരുടെയും കാര്യത്തിൽ പ്രത്യേകം ശ്രദ്ധ പുലർത്തണം. തിരക്ക് നിയന്ത്രിക്കുന്നതിനും എല്ലാവരുടെയും സുരക്ഷ ഉറപ്പാക്കുന്നതിനും ഉദ്യോഗസ്ഥരുമായി പൂർണ്ണമായി സഹകരിക്കണമെന്നും നിർദേശത്തിൽ പറയുന്നു.യാതൊരുവിധ അടിയന്തര സാഹചര്യങ്ങളും ശ്രദ്ധയിൽപ്പെട്ടാൽ ഉടൻ തന്നെ പോലീസിനെയോ ബന്ധപ്പെട്ട മറ്റ് ഉദ്യോഗസ്ഥരെയോ അറിയിക്കണമെന്ന് സ്റ്റേറ്റ് പോലീസ് മീഡിയ സെന്റർ അറിയിച്ചു.
30ല് താഴെയാണോ പ്രായം?, 50 വയസ് കഴിഞ്ഞോ?, ഡ്രൈവിങ് ലൈസന്സ് കാലാവധി എത്ര?; ഓരോ പ്രായത്തിന്റെയും റൂള് അറിയാം
2019ല് മോട്ടോര് വെഹിക്കിള് ആക്റ്റ് ഭേദഗതി ചെയ്യുന്നതു വരെ നോണ് ട്രാന്സ്പോര്ട്ട് വാഹനങ്ങളുടെ ഡ്രൈവിങ് ലൈസന്സിന്റെ കാലാവധി പരമാവധി 20 വര്ഷമോ അല്ലെങ്കില് അമ്പത് വയസാകുന്നതു വരെയോ ആയിരുന്നു. 50 വയസിനു ശേഷം 5 വര്ഷം വീതം കാലാവധി നല്കിയിരുന്നു. എന്നാല് 2019ലെ ഭേദഗതിയോടെ അതിനു ശേഷമെടുത്ത/ പുതുക്കിയ ലൈസന്സുകളുടെ കാലാവധിയില് മാറ്റം വന്നിട്ടുണ്ട്.
മീഡിയം/ഹെവി വാഹന ലൈസന്സ് (Trans) കാലാവധി 2019ന് മുന്പ് മൂന്ന് വര്ഷമായിരുന്നു. 2019ന് ശേഷം എടുത്തതോ പുതുക്കിയതോ ആണെങ്കില് 5 വര്ഷമായി കാലാവധി ഉയര്ത്തിയിട്ടുണ്ട്. മോട്ടോര് വാഹന നിയമം സെക്ഷന് 14 പ്രകാരം ലൈസന്സ് നല്കുമ്പോഴോ പുതുക്കുമ്പോഴോ ഉള്ള പ്രായത്തിന്റെ അടിസ്ഥാനത്തിലുള്ള ലൈസന്സിന്റെ പുതുക്കിയ കാലാവധി ചുവടെ:
ലൈസന്സ് എടുക്കുമ്പോള് 30 വയസിന് താഴെയാണ് പ്രായമെങ്കില് പുതിയ ഭേദഗതി അനുസരിച്ച് ലൈസന്സിന്റെ കാലാവധി 40 വയസ് തികയുന്നത് വരെയാണ്.
30 വയസ് മുതല് 50 വയസിന് താഴെയാണ് പ്രായമെങ്കില് ലൈസന്സ് നല്കുമ്പോഴും പുതുക്കുമ്പോഴും ലൈസന്സിന് പത്തുവര്ഷം കാലാവധിയാണ് ലഭിക്കുക
50 വയസ് മുതല് 55 വയസിന് താഴെയാണ് പ്രായമെങ്കില് ലൈസന്സ് നല്കുമ്പോഴും പുതുക്കുമ്പോഴും ലൈസന്സിന് കാലാവധി 60 വയസ് തികയുന്നത് വരെയാണ്
55 വയസും അതിന് മുകളിലുമാണ് പ്രായമെങ്കില് ലൈസന്സ് നല്കുമ്പോഴും പുതുക്കുമ്പോഴും ലൈസന്സിന്റെ കാലാവധി അഞ്ചുവര്ഷമാണ്.
ലൈസന്സ് കാലാവധി അവസാനിച്ചാലും കാലാവധി അവസാനിച്ച തീയതി മുതല് 30 ദിവസം വരെ ലൈസന്സ് പ്രാബല്യത്തില് തുടരും. 2026 ഓഗസ്റ്റ് 15 മുതലാണ് ഇത് പ്രാബല്യത്തില് വരിക.
ഉദാഹരണമായി 28-ാം വയസില് ലൈസന്സ് എടുത്ത ആളിന് 40 വയസ് വരെ ലൈസന്സ് ഉപയോഗിക്കാം. ഇതിന് ശേഷം പുതുക്കണം. 35-ാം വയസിലാണ് ലൈസന്സ് എടുക്കുന്നതെങ്കില് 45-ാം വയസ് വരെ ലൈസന്സ് ഉപയോഗിക്കാം. തുടര്ന്ന് പുതുക്കണം. പുതുക്കുമ്പോള് വീണ്ടും ഒരു പത്തുവര്ഷം വരെ ലൈസന്സ് ഉപയോഗിക്കാന് അനുവദിക്കും.
52-ാം വയസിലാണ് പുതുക്കുന്നതെങ്കില് 60 വയസ് വരെ ലൈസന്സ് ഉപയോഗിക്കാം. തുടര്ന്ന് വീണ്ടും പുതുക്കുമ്പോള് അഞ്ചു വര്ഷം വരെ മാത്രമേ ലൈസന്സ് ഉപയോഗിക്കാന് കഴിയൂ. ഇതിന് ശേഷം ലൈസന്സ് പുതുക്കേണ്ടതായി വരും. 58-ാം വയസില് പുതുക്കിയാല് അഞ്ചുവര്ഷം ലൈസന്സ് ഉപയോഗിക്കാം. അതായത് 63 വയസ് വരെ ഉപയോഗിക്കാം. തുടര്ന്നും ലൈസന്സ് വേണമെങ്കില് വീണ്ടും പുതുക്കണം. ഇത്തരത്തില് പുതുക്കിയാല് അഞ്ചുവര്ഷം കൂടി ലൈസന്സ് ഉപയോഗിക്കാമെന്ന് മോട്ടോര് വാഹനവകുപ്പ് വ്യക്തമാക്കുന്നു.
ഇ- കെവൈസി ഇനിയും പൂര്ത്തിയാക്കിയില്ലേ?, ഇനി ദിവസങ്ങള് മാത്രം; ഗ്യാസ് സിലിണ്ടറിന് ഉയര്ന്ന വില വരാതിരിക്കാന് ചെയ്യേണ്ടത് ഇത്രമാത്രം
ന്യൂഡല്ഹി: എല്പിജി ഗാര്ഹിക സിലിണ്ടര് ഉപയോക്താക്കള്ക്ക് ഇ- കെവൈസി പൂര്ത്തിയാക്കാന് ഇനി ദിവസങ്ങള് മാത്രമാണ് ശേഷിക്കുന്നത്. ഓഗസ്റ്റ് പതിനഞ്ചിനകം ഇ-കെവൈസി നിര്ബന്ധമായി നല്കണമെന്നാണ് പൊതുമേഖല എണ്ണ കമ്പനികള് നല്കിയിട്ടുള്ള നിര്ദേശം. ഇത് പൂര്ത്തിയാക്കാത്തവര്ക്ക് സബ്സിഡി നിരക്കില് സിലിണ്ടറുകള് ലഭിക്കില്ലെന്നും വാണിജ്യ നിരക്കില് സിലിണ്ടറുകള് വാങ്ങേണ്ടി വന്നേക്കാമെന്നുമാണ് റിപ്പോര്ട്ടുകള് വ്യക്തമാക്കുന്നത്.
നിശ്ചിത തീയതിക്കകം ബയോമെട്രിക് അപ്ഡേഷന് നല്കിയില്ലെങ്കില് ഗാര്ഹിക സിലിണ്ടര് ആനൂകൂല്യം ലഭിക്കില്ല എന്ന തരത്തില് കമ്പനികള് ഉപഭോക്താക്കള്ക്ക് സന്ദേശം അയക്കുന്നുണ്ട്. ഇതുസംബന്ധിച്ച് ഗ്യാസ് ഏജന്സികള്ക്കും നിര്ദേശം നല്കിയിട്ടുണ്ട്. 2024ല് ആരംഭിച്ച ഇ- കെവൈസി അപ്ഡേഷന് കര്ശനമാക്കിയത് പശ്ചിമേഷ്യന് സംഘര്ഷത്തെ തുടര്ന്ന് സിലിണ്ടര് ക്ഷാമം രൂക്ഷമായ സാഹചര്യത്തിലാണ്. ഗ്യാസ് സിലിണ്ടര് യഥാര്ഥ ഉടമകള് തന്നെയാണ് ഉപയോഗിക്കുന്നതെന്ന് ഉറപ്പിക്കാനാണ് അപ്ഡേഷന് എന്നാണ് കമ്പനികളുടെ വാദം.
വിതരണ ഏജന്സികള് മുഖേനെയും കമ്പനികളുടെ ആപ്പ് വഴി ഓണ്ലൈനായും അപ്ഡേഷന് നടത്താം. സിലിണ്ടര് വിതരണത്തിനായി ഏജന്സി ജീവനക്കാര് വീട്ടിലെത്തുമ്പോഴും അപ്ഡേഷന് നടത്താവുന്നതാണ്. ഓണ്ലൈന് അപ്ഡേഷനായി കമ്പനി ആപ്പും ചിത്രം എടുക്കാനായി ആധാര് ഫെയ്സ് ആര്ഡി ആപ്പും ഫോണില് ഡൗണ്ലോഡ് ചെയ്യണം. സംശയങ്ങള്ക്ക് ടോള്ഫ്രീ നമ്പര്: 1800 2333555ല് ബന്ധപ്പെടാവുന്നതാണ്.
ഇന്ഡേന്, എച്ച്പി ഗ്യാസ്, ഭാരത് ഗ്യാസ് എന്നിവയ്ക്കായി ഇ- കെവൈസി പൂര്ത്തിയാക്കേണ്ട വിധം താഴെ:
1. എല്പിജി സിലിണ്ടര് കമ്പനിയുടെ ആപ്പ് ഡൗണ്ലോഡ് ചെയ്യുക
2. എല്പിജി അക്കൗണ്ടുമായി ബന്ധിപ്പിച്ചിരിക്കുന്ന മൊബൈല് നമ്പര് ഉപയോഗിച്ച് ലോഗിന് ചെയ്യുക
3. രജിസ്റ്റര് ചെയ്ത നമ്പറിലേക്ക് വരുന്ന ഒടിപി നല്കി മൊബൈല് നമ്പര് വെരിഫൈ ചെയ്യുക
4. എല്പിജി അക്കൗണ്ട് ലിങ്ക് ചെയ്യുകയോ ആക്സസ് ചെയ്യുകയോ ചെയ്യുക
ഇന്ഡേന് ഗ്യാസ്: അക്കൗണ്ടുമായി ബന്ധിപ്പിക്കാന് 16 അക്ക എല്പിജി ഐഡി നല്കുക
ബിപിസിഎല്, എച്ച്പിസിഎല് ആപ്പുകളില് ഇ-കെവൈസി ഓപ്ഷന് നേരിട്ട് ലഭ്യമാണ്
5. ഇ- കെവൈസി ഓപ്ഷന് ഓപ്പണ് ചെയ്യുക
ഇന്ഡേന് ഗ്യാസ്: മൈ പ്രൊഫൈല് വിഭാഗത്തിന് കീഴില് ഇ-കെവൈസി ഓപ്ഷന് കാണാം
ഭാരത് ഗ്യാസ്: ഹോം പേജില് തന്നെ ഇ-കെവൈസി ഓപ്ഷന് ലഭ്യമാണ്
എച്ച്പി ഗ്യാസ്: എച്ച്പി പേ ആപ്പില് എല്പിജി സെക്ഷന് കീഴില് ഇ- കെവൈസി ഓപ്ഷന് കാണാം
6. നിബന്ധനകള് വായിച്ച് മനസിലാക്കിയ ശേഷം ആധാര് അധിഷ്ഠിത ഫെയ്സ് ഓതന്റിക്കേഷന് സമ്മതം നല്കുക
7. ഫെയ്സ് സ്കാന് ടാപ്പ് ചെയ്ത് ആധാര് ഫെയ്സ്ആര്ഡി ആപ്പിനെ മുഖം സ്കാന് ചെയ്യാന് അനുവദിക്കുക. തുടര്ന്ന് ഇ- കെവൈസി നടപടികള് പൂര്ത്തിയാക്കുക.
5 കിലോമീറ്റർ ചുറ്റളവിൽ നീന്തൽക്കുളങ്ങൾ; സ്കൂളുകളിൽ ‘അക്വാഫിറ്റ്’ പദ്ധതി വരുന്നു.
കോഴിക്കോട്: വിദ്യാർഥികളെ നീന്തൽ പരിശീലിപ്പിക്കാൻ ‘അക്വാഫിറ്റ്’ പദ്ധതിയുമായി പൊതുവിദ്യാഭ്യാസ വകുപ്പ്. സർക്കാരിന്റെ നൂറുദിന കർമപദ്ധതിയുടെ ഭാഗമാണ് പദ്ധതി.വിദ്യാർഥികളുടെ ശാരീരികക്ഷമത, ജലസുരക്ഷാ അവബോധം, ജീവൻരക്ഷാ നൈപുണ്യം എന്നിവ വികസിപ്പിക്കുകയാണു ലക്ഷ്യം. ആദ്യഘട്ടത്തിൽ 14,000 വിദ്യാർഥികൾക്ക് പരിശീലനം നൽകും. ഓരോ ജില്ലയിൽനിന്നും 1000 വിദ്യാർഥികൾക്കുവീതം. പരിശീലനത്തിനായി സ്കൂളിൽനിന്ന് അഞ്ചുകിലോമീറ്റർ പരിധിക്കുള്ളിലെ അനുയോജ്യമായ നീന്തൽക്കുളങ്ങൾ തിരഞ്ഞെടുക്കും.
ഇതിന് തദ്ദേശസ്ഥാപനങ്ങളുടെയും മറ്റു വകുപ്പുകളുടെയും സഹകരണം തേടും.കേരളം നദികളും പുഴകളും ജലാശയങ്ങളും ഏറെയുള്ള സംസ്ഥാനമായതിനാൽ നീന്തൽ അറിയുക എന്നത് കായികപരമായ കഴിവ് മാത്രമല്ല, ജീവൻരക്ഷാ നൈപുണ്യം കൂടിയാണെന്നു വിലയിരുത്തിയാണ് പദ്ധതി.മുങ്ങിമരണത്തെ സംസ്ഥാന ദുരന്തമായിപ്രഖ്യാപിച്ച് അപകടങ്ങൾ കുറയ്ക്കാൻ നടപടിയെടുക്കണമെന്ന് മനുഷ്യാവകാശ കമ്മിഷൻ നേരത്തെ ഉത്തരവിട്ടിരുന്നു. ദേശീയ ക്രൈം റെക്കോഡ്സ് ബ്യൂറോയുടെ 2024-ലെ കണക്കുപ്രകാരം സംസ്ഥാനത്ത് 1385 പേരാണ് മുങ്ങിമരിച്ചത്. ഇതിൽ 1160 പേർ പുരുഷൻമാരാണ്. 2021-ൽ 1307 പേരും 2022-ൽ 1419 പേരും 2023-ൽ 1344 പേരും മുങ്ങിമരിച്ചതായാണ് കണക്കുകൾ. മുങ്ങിമരണങ്ങൾ വർധിക്കുമ്പോഴും ശാസ്ത്രീയ നീന്തൽ പരിശീലനം ലഭ്യമാക്കുന്നതിനുള്ള അവസരങ്ങൾ കുറവാണ്. ഈ സാഹചര്യത്തിലാണ് നീന്തൽ പരിശീലന പരിപാടിയുമായി പൊതുവിദ്യാഭ്യാസ വകുപ്പ് രംഗത്തെത്തുന്നത്.
ഹജ്ജ് ആദ്യ ഗഡു അടയ്ക്കാനുള്ള സമയം നീട്ടി; ഈ മാസം 17 വരെ പണമടയ്ക്കാം.
തിരുവനന്തപുരം: ഹജ്ജ് തീർത്ഥാടകരായി തിരഞ്ഞെടുക്കപ്പെട്ടവർക്ക് ആദ്യ ഗഡു തുക അടയ്ക്കുന്നതിനുള്ള സമയം ഒരാഴ്ച കൂടി നീട്ടി കേന്ദ്ര ഹജ്ജ് കമ്മിറ്റി.ഈ മാസം 17 വരെ ആദ്യ ഗഡു അടയ്ക്കാൻ അവസരം ലഭിക്കും.നേരത്തെ ഈ മാസം 10നകം ആദ്യ ഗഡു അടയ്ക്കണമെന്നായിരുന്നു നിർദേശം. രണ്ടാം ശനിയാഴ്ചയും ഞായറാഴ്ചയും ഉള്പ്പെടെ പൊതു അവധികള് വന്നതിനാല് നിരവധി തീർത്ഥാടകർക്ക് നിശ്ചിത സമയത്തിനുള്ളില് പണമടയ്ക്കാൻ ബുദ്ധിമുട്ടുണ്ടാകുമെന്ന് ചൂണ്ടിക്കാട്ടിയാണ് സമയം നീട്ടണമെന്ന് ഹജ്ജ് വകുപ്പ് മന്ത്രി എൻ. ഷംസുദ്ദീൻ കേന്ദ്രമന്ത്രി കിരണ് റിജിജുവിനോട് ആവശ്യപ്പെട്ടത്.മന്ത്രിയുടെ ആവശ്യം പരിഗണിച്ചാണ് കേന്ദ്ര ഹജ്ജ് കമ്മിറ്റി പണമടയ്ക്കാനുള്ള സമയപരിധി ഒരാഴ്ച കൂടി നീട്ടിയത്. പുതിയ സമയപരിധി പ്രകാരം തീർത്ഥാടകർക്ക് 17 വരെ ആദ്യ ഗഡു അടയ്ക്കാം.
ചപ്പാത്തി മെഷീനിൽ കൈ കുരുങ്ങി; സ്ഥാപന ഉടമയായ വീട്ടമ്മയ്ക്ക് ദാരുണാന്ത്യം.
മൂവാറ്റുപുഴ: ഹാഫ് കുക്ഡ് ചപ്പാത്തി മെഷീനിൽ കൈ കുരുങ്ങി ഗുരുതരമായി പരുക്കേറ്റ വ്യാപാരിയായ വീട്ടമ്മ മരിച്ചു. വാഴക്കുളം സ്റ്റാർ ചപ്പാത്തി കട ഉടമ പള്ളിക്കുന്നേൽ റെജിമോൾ ജസ്റ്റിൻ (52) ആണ് ദാരുണമായ അപകടത്തെ തുടർന്ന് മരിച്ചത്.വിൽപനയ്ക്കായുള്ള ചപ്പാത്തി ഉണ്ടാക്കുന്നതിനിടെ കൈ യന്ത്രത്തിൽ കുരുങ്ങുകയായിരുന്നു. യന്ത്രത്തിൽ നിന്നുള്ള അസാധാരണമായ ശബ്ദവും മണവും പുറത്തു വന്നതിനെ തുടർന്ന് സ്ഥാപനത്തോടു ചേർന്നുള്ള വീട്ടിൽ നിന്നു മകൻ എത്തിയപ്പോഴാണ് റെജിമോളെ യന്ത്രത്തിൽ കൈ കുടുങ്ങി കിടക്കുന്ന നിലയിൽ കണ്ടെത്തിയത്. ഉടൻ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.ഭർത്താവ് ജസ്റ്റിൻ മരിച്ചതിനെ തുടർന്ന് കുട്ടികളെ വളർത്താൻ റെജിമോൾ തുടങ്ങിയ സ്ഥാപനമായിരുന്നു സ്റ്റാർ ചപ്പാത്തി കട. ഭർത്താവിന്റെ വേർപാടും ദുരിതങ്ങളും മറികടന്ന് ജീവിതം തിരികെ പിടിക്കാൻ ശ്രമിക്കുന്നതിനിടെയാണു അവിചാരിതമായി ദുരന്തം ഉണ്ടായത്. റെജിമോളുടെ സംസ്കാരം നാളെ രാവിലെ 10.30ന് വസതിയിൽ ശുശ്രൂഷകൾക്ക് ശേഷം വാഴക്കുളം സെന്റ് ജോർജ് ഫൊറോന പള്ളിയിൽ. മക്കൾ: ജാസ്മിൻ, ജ്യോതി ദർശന, ജസ്റ്റോ.
നാളികേര പുനരുദ്ധാരണ പദ്ധതി ഉടൻ ആരംഭിക്കും: മന്ത്രി ടി. സിദ്ദിഖ്.
കോഴിക്കോട്:കേരളത്തിൽ നാളികേര ഉത്പാദനം വർധിപ്പിക്കു ന്നതിനുള്ള നാളികേര പുനരുദ്ധാരണ പദ്ധതി ഉടൻ ആരംഭി ക്കുമെന്ന് മന്ത്രി ടി.സിദ്ദിഖ്.വേങ്ങേരി തടമ്പാട്ടുതാഴത്തെ കാർഷിക വിപണന കേന്ദ്രം സന്ദർശിച്ച ശേഷം സം സാരിക്കുകയായിരുന്നു മന്ത്രി. ഇന്ത്യയിൽ ഏറ്റവും കൂടുതൽ വിസ്തൃതിയിൽ നാളികേരം കൃഷി ചെയ്യുന്ന സംസ്ഥാനമായിട്ടും ഏറ്റവും കുറവ് ഉൽപാദനം ഇവിടെയാണ്. ഇത് പരിഹരിക്കാൻ മികച്ച ഉൽപാദന ക്ഷമതയുള്ള തെങ്ങിൻതൈകൾ കൈമാറും. നാളികേര പുനരുദ്ധാരണ പദ്ധതിയുമായി ബന്ധപ്പെട്ട് കർഷക ദിനത്തിൽ പ്രാഥമിക ചർച്ചകൾ നട ക്കുമെന്നും മന്ത്രി പറഞ്ഞു.ഓണവുമായി ബന്ധപ്പെട്ട് കൃഷി വകുപ്പിൻ്റെ നേതൃത്വ ത്തിൽ കേരളത്തിൽ 2000 പച്ചക്കറി ചന്തകൾ ആരംഭിക്കാൻ നടപടിയെടുത്തിട്ടുണ്ട്.
ഓണക്കാലത്ത് വിലവർധന തടയു ന്നതിനുള്ള നടപടികളുമായി മുന്നോട്ട് പോകുകയാണെ ന്നും മന്ത്രി പറഞ്ഞു.വേങ്ങേരി മാർക്കറ്റിൽ സ്ഥിരം ജൈവ പച്ചക്കറി ചന്ത ആരംഭിക്കും. നാളികേരത്തിന്റെ പ്രധാന ഇടമാക്കി ഇതിനെ മാറ്റും. മാർക്കറ്റിലെ മാലിന്യ നിർമാർജന സംവിധാനം വിപു ലമാക്കും. കൃഷിസംബന്ധമായ കാര്യങ്ങൾക്കല്ലാതെ മാർക്കറ്റ് ഉപയോഗിക്കുന്നത് അനുവദിക്കില്ല.ഉപയോഗിക്കാതെ കിടക്കുന്ന ഭൂമി കൃഷി ഉപയുക്തമാക്കും. വേങ്ങേരി മാർക്കറ്റുമായി ബന്ധപ്പെട്ട് ആവശ്യപ്പെട്ടിട്ടുള്ള റിപ്പോർട്ടുകൾ ലഭിച്ചുകഴിഞ്ഞാൽ ഉടൻ തിരുവനന്ത പുരത്ത് ഉന്നതതല യോഗം ചേരുമെന്നും മന്ത്രി കൂട്ടിച്ചേർത്തു. അഡ്വ. കെ ജയന്ത് എം എൽഎ ഉൾപ്പെടെയുള്ളവർ മന്ത്രിയെ അനുഗമിച്ചു.
ഭാര്യയെ പ്രസവത്തിനായി എത്തിച്ചു; പിന്നാലെ ആശുപത്രിക്കു സമീപം ജീപ്പിനുള്ളിൽ യുവാവ് മരിച്ച നിലയിൽ
കോഴിക്കോട് :ഭാര്യയെ പ്രസവത്തിനായി എത്തിച്ച യുവാവിനെ മെഡിക്കൽ കോളജ് ആശുപത്രിക്കു സമീപം നിർത്തിയിട്ട ജീപ്പിനുള്ളിൽ മരിച്ച നിലയിൽ കണ്ടെത്തി. കോഴിക്കോട് കായക്കൊടി സ്വദേശി വിനു പ്രസാദ് (27) ആണ് മരിച്ചത്. കായക്കൊടി കുറ്റ്യാടി റൂട്ടിലെ ജീപ്പ് ഡ്രൈവറാണ്.
ഭാര്യയെ മെഡിക്കൽ കോളജിലെ മാതൃശിശു സംരക്ഷണ കേന്ദ്രത്തിൽ പ്രസവത്തിന് എത്തിച്ച ശേഷം തിങ്കളാഴ്ച രാത്രി ജീപ്പിൽ വിശ്രമിക്കാൻ പോയതായിരുന്നു വിനു. ചൊവ്വാഴ്ച വിനുവിനെ കാണാതായതിനെ തുടർന്ന് നടത്തിയ തിരച്ചിലിലാണ് രാവിലെ എട്ടു മണിയോടെ ജീപ്പിൽ മരിച്ച നിലയിൽ കണ്ടെത്തിയത്. മരണകാരണം വ്യക്തമല്ല.ഇൻക്വസ്റ്റ് നടപടികൾ പൂർത്തിയാക്കിയ ശേഷം മൃതദേഹം മെഡിക്കൽ കോളജ് ആശുപത്രി മോർച്ചറിയിലേക്കു മാറ്റി. സംഭവത്തിൽ മെഡിക്കൽ കോളജ് പൊലീസ് വിശദമായ അന്വേഷണം തുടങ്ങി. മരണത്തിന്റെ കൃത്യമായ കാരണം സ്ഥിരീകരിക്കാൻ പോസ്റ്റ്മോർട്ടം റിപ്പോർട്ട് വരേണ്ടതുണ്ടെന്നു പൊലീസ് അറിയിച്ചു
പിഎസ്സിയിൽ എൽഡിഎഫ് നിലപാട്: റാങ്ക് പട്ടികക്കാർക്ക് പിന്തുണ; ക്രമക്കേടുകളിൽ നിശ്ശബ്ദത.
തിരുവനന്തപുരം : സെക്രട്ടേറിയറ്റിനു മുന്നിൽ പിഎസ്സി റാങ്ക് ഹോൾഡർമാരുടെ സമരപ്പന്തലിലെത്തി പിന്തുണ അറിയിക്കുന്ന ഇടതുമുന്നണി നേതാക്കൾ പിഎസ്സിയിൽ നടന്ന പരീക്ഷാ ക്രമക്കേടുകൾക്കെതിരെ നിശ്ശബ്ദത തുടരുന്നു. പരീക്ഷാ ക്രമക്കേടിൽ കേസെടുത്ത് അന്വേഷണം ആരംഭിച്ചെങ്കിലും കഴിഞ്ഞ ദിവസം പ്രതിപക്ഷ നേതാവ് പിണറായി വിജയൻ പിഎസ്സിയെ പിന്തുണച്ച് രംഗത്തെത്തിയിരുന്നു. എസ്എഫ്ഐയോ ഇടതുയുവജന സംഘടനകളോ കേരളത്തിലെ പിഎസ്സി പരീക്ഷാ ക്രമക്കേടിൽ മിണ്ടിയിട്ടില്ല.
പ്ലാനിങ് ബോർഡ് ചീഫ് പരീക്ഷയിൽ ഉദ്യോഗാർഥി പരാതിപ്പെട്ടിട്ടുപോലും സ്വയം പരിശോധിച്ച് ക്രമക്കേട് കണ്ടെത്താൻ പിഎസ്സി തയാറായില്ല. ഉദ്യോഗാർഥികൾ പരീക്ഷയിലെ മാർക്ക് ആവശ്യപ്പെട്ട് വിവരാവകാശ കമ്മിഷനെ സമീപിക്കുകയും മാർക്ക് നൽകാൻ കമ്മിഷൻ ഉത്തരവിടുകയും ചെയ്തു. എന്നിട്ടും മാർക്ക് പുറത്തുവിടാൻ തയാറാകാതെ പിഎസ്സി, ഉദ്യോഗാർഥിക്കെതിരെ കോടതിയിലേക്കു നീങ്ങുകയാണ്. 3 തസ്തികയിലേക്കു നടന്ന ഒറ്റപ്പരീക്ഷയായതിനാൽ മൂന്നാമത്തെ പരീക്ഷയുടെ ഫലം കൂടി പ്രസിദ്ധീകരിച്ച ശേഷമേ മാർക്ക് പുറത്തുവിടൂ എന്നാണ് പിഎസ്സി നിലപാട്.മൂന്നാമത്തെ പരീക്ഷയുടെ നടപടിക്രമങ്ങൾ വേഗത്തിലാക്കി മാർക്ക് ഒരുമിച്ചു പുറത്തുവിടാൻ പിഎസ്സി ശ്രമിക്കുന്നില്ല. റാങ്കിൽ പിന്നിലായ ഉദ്യോഗാർഥി കേരള അഡ്മിനിസ്ട്രേറ്റീവ് ട്രൈബ്യൂണലിനെ സമീപിച്ചപ്പോഴാണ് ഉത്തരക്കടലാസ് മൂല്യനിർണയം നടത്താതെയാണ് മാർക്ക് തയാറാക്കിയതെന്ന് പിഎസ്സി സമ്മതിക്കാൻ തയാറായത്. നിലവിലെ പിഎസ്സി ചെയർമാനും അംഗങ്ങളും എൽഡിഎഫ് നോമിനികളായി നിയമിക്കപ്പെട്ടവരാണ്.
കാറിൽ ഒരാൾ മാത്രമായി നഗരത്തിലേക്ക് വന്നാൽ നടപടിയെടുക്കണം; കോഴിക്കോട് സിറ്റി പൊലീസ് കമ്മീഷണര്ക്ക് തുറന്ന കത്തുമായി ഓട്ടോ ഡ്രൈവര്
കോഴിക്കോട്: ഓട്ടോ തൊഴിലാളികളുടെ വേദനകൾ പങ്കുവച്ച് കോഴിക്കോട് സിറ്റി പൊലീസ് കമ്മീഷണര്ക്ക് തുറന്ന കത്തുമായി ഓട്ടോ ഡ്രൈവര്. കോഴിക്കോട് നഗരത്തിൽ കഴിഞ്ഞ 30 വര്ഷമായി ഓട്ടോ ഓടിക്കുന്ന നാസര് പെരുമണ്ണയാണ് ഫേസ്ബുക്കിലൂടെ പങ്കുവച്ചിരിക്കുന്നത്. ഞായറാഴ്ച പങ്കുവച്ച പോസ്റ്റ് ഇതിനോടക 8000ത്തിലധികം പേരാണ് വായിച്ചിരിക്കുന്നത്. ആയിരത്തിലധികം പേര് കമന്റ് ചെയ്തിട്ടുണ്ട്. 900ത്തോളം പേര് പോസ്റ്റ് ഷെയര് ചെയ്തിട്ടുമുണ്ട്.ദിവസം തോറും കോഴിക്കോട് സ്റ്റിയിൽ വാഹനങ്ങൾ പെരുകിക്കൊണ്ടിരിക്കുകയാണെന്നും ഓണമാകുമ്പോൾ ഇതിന്റെ പത്ത് മടങ്ങാകുമെന്നും നാസര് ചൂണ്ടിക്കാട്ടുന്നു. നഗരത്തിലേക്ക് വരുന്ന 70 ശതമാനം പേരും കാറുമായി വരുന്നവരാണ്. ഓണം അടുക്കുമ്പോൾ കാറിൽ ഒരാൾ മാത്രം സിറ്റിയിലേക്ക് വരുകയാണെങ്കിൽ കർശന നടപടി സ്വീകരിക്കണമെന്നും നാസര് ആവശ്യപ്പെടുന്നു.
നാസറിന്റെ ഫേസ്ബുക്ക് പോസ്റ്റ് ബഹുമാനപ്പെട്ട കോഴിക്കോട് സിറ്റി പൊലീസ് കമ്മീഷണർ ഷൗക്കത്തലി സാർ..എന്റെ പേര് നാസർ. ഞാൻ കോഴിക്കോട് സിറ്റിയിലെ ഒരു സാധാരണക്കാരനായ ഓട്ടോ ഡ്രൈവറാണ് കഴിഞ്ഞ 30 വർഷമായി കോഴിക്കോട് സിറ്റിയിൽ ഓട്ടോ ഓടിച്ച് ജീവിക്കുന്നു. ഞാൻ നിങ്ങളുടെ ഫോട്ടോ വെച്ച് ഇങ്ങനെ ഒരു പോസ്റ്റ് ഇടാൻ കാരണം എന്റെയും എന്റെ സഹപ്രവർത്തകരുടെയും വേദനകൾ പറയാൻ വേണ്ടിയാണ് സാർ.കോഴിക്കോട് സിറ്റിയിൽ ഓരോ ദിവസം തോറും വാഹനങ്ങൾ പെരുകിക്കൊണ്ടിരിക്കുകയാണ്. ഇപ്പോൾ പല സ്ഥാപനങ്ങളും പല മാളുകളും സിറ്റിയിൽ വന്നതോടുകൂടി പല നാടുകളിൽ നിന്നും ആളുകൾ വരുന്നു. അവരിൽ നൂറിൽ 70% വും കാറുമായിട്ടാണ് വരുന്നത്. അവർക്ക് പാർക്ക് ചെയ്യാനുള്ള സൗകര്യങ്ങൾ സിറ്റിയിൽ ഇല്ല. അതുകൂടാതെ 4337 സിറ്റി പെർമിറ്റുള്ള ഓട്ടോറിക്ഷകൾ കോഴിക്കോട് ഉണ്ടായിരുന്നുള്ളൂ. ഇപ്പോൾ അത് 7500 അടുത്തായി. അതുകൂടാതെ ഓൺലൈൻ ടാക്സികൾ കാറുകൾ ഇതെല്ലാം കൂടി കോഴിക്കോട് സിറ്റിയിൽ നിറഞ്ഞു. തുളുമ്പുകയാണ് ഈ ഗതാഗതക്കുരുക്ക് പൊലീസിന് നിയന്ത്രിക്കുന്നതിൽ ഒരു പരിധിയുണ്ട് .
സാർ ഞാൻ ഈ പോസ്റ്റ് ഇടാൻ കാരണം. ഓണം അടുത്തു വരുന്നു ഇപ്പോൾ ഉള്ളതിന്റെ പത്ത് മടങ്ങ് ബ്ലോക്ക് ഉണ്ടാകും. ഓണം കഴിയുന്നതുവരെ എങ്കിലും ഇതിൻറെ മുൻപ് ഉണ്ടായിരുന്ന കമ്മീഷണർ ചെയ്തത് പോലെ ബഹുമാനപ്പെട്ട ഷൗക്കത്തലി സാർ ചെയ്യണം. എങ്ങനെ എന്നല്ലേ ഓണം അടുക്കുമ്പോൾ കാറിൽ ഒരാൾ മാത്രം സിറ്റിയിലേക്ക് വരുകയാണെങ്കിൽ കർശന നടപടി സ്വീകരിക്കണം. അല്ലെങ്കിൽ ഒരു ഓർഡർ പോലും ഞങ്ങൾക്ക് എടുക്കാൻ പറ്റില്ല .ഇപ്പോൾ തന്നെ 30 രൂപയുടെ ഓട്ടം പോയാൽ 20 രൂപയുടെ ഇന്ധനം തീരുന്നു ഈ സാഹചര്യത്തിൽ ബഹുമാനപ്പെട്ട സാർ ഒരു കർശന നടപടി സ്വീകരിച്ചില്ലെങ്കിൽ പാവപ്പെട്ട ഓട്ടോ ഡ്രൈവർമാരായ ഞങ്ങളുടെ സ്ഥിതി വളരെ ദയനീയമായിരിക്കും സാർ.ഒരു ആഘോഷം വന്നാൽ സിറ്റിയിൽ ആളുകൾ വന്നു കൂടും നല്ല ഓട്ടം കിട്ടും. പക്ഷേ ഓടാൻ കഴിയില്ല. ഇത് കഴിഞ്ഞ വർഷങ്ങളോളമായി ഞങ്ങൾ അനുഭവിക്കുന്ന വേദനകളാണ് ഞങ്ങൾക്ക് ബോണസ് തരാൻ ആരുമില്ല. അഡ്വാൻസ് തരാൻ ആരുമില്ല. ഞങ്ങൾ ഓട്ടോ ഓടിച്ച് കാശ് കിട്ടിയിട്ട് വേണം ഓണത്തിന് മക്കൾക്ക് ഡ്രസ്സ് വാങ്ങാനും മറ്റ് സാധനങ്ങൾ എല്ലാം വാങ്ങാൻ ഇത്രയും താഴ്മയോടെ കൂടി നിങ്ങളോട് പറയുന്നത് വേദന കൊണ്ടാണ് അത് മനസ്സിലാക്കാനുള്ള മനസ്സ് സാർ കാണിക്കണം .പാവങ്ങളായ ഞങ്ങളെ കൈവിടരുത് പ്ലീസ്.



