തിരുവനന്തപുരം: കേരള മീഡിയ അക്കാദമി, ഐ ആൻഡ് പിആർഡിയുടെയും കേരള പത്രപ്രവർത്തക യൂണിയന്റെയും സഹകരണത്തോടെ സംഘടിപ്പിക്കുന്ന ‘കേരള മീഡിയ കോണ്ക്ലേവ്- 24’ ഇന്റർനാഷണല് ജേർണലിസം ഫെസ്റ്റിവല് മാർച്ച് 2, 3, 4 തീയതികളില് കാക്കനാട് കേരള മീഡിയ അക്കാദമി ക്യാമ്പസില് നടക്കും. ‘മീഡിയ കോണ്ക്ലേവ്’ ഇന്ന് വൈകുന്നേരം അഞ്ചിന് മുഖ്യമന്ത്രി പിണറായി വിജയൻ ഉദ്ഘാടനം ചെയ്യും.
കേരള മീഡിയ അക്കാദമിയുടെ 2023ലെ മീഡിയ പേഴ്സണ് ഓഫ് ദ- ഇയർ അവാർഡ് ജേതാവ് വയേല് അല് ദഹ്ദൂഹ്, വേള്ഡ് പ്രസ് ഫോട്ടോഗ്രഫി അവാർഡ് നേടിയ കാശ്മീരി ഫോട്ടോ ജേർണലിസ്റ്റ് സന ഇർഷാദ് മട്ടു, ഇന്ത്യൻ മീഡിയ പേഴ്സണ് സ്പെഷല് അവാർഡ് നേടിയ മാധ്യമ പ്രവർത്തകൻ ആർ. രാജഗോപാല് എന്നിവർക്ക് മുഖ്യമന്ത്രി പുരസ്കാരങ്ങള് സമ്മാനിക്കും.
കേരള മീഡിയ കോണ്ക്ലേവ് 2, 3, 4 തീയതികളില് നടക്കുന്ന ഇന്റർനാഷണല് ജേർണലിസം ഫെസ്റ്റിവല് ഉദ്ഘാടനത്തിന് മുന്നോടിയായി ഇന്നുരാവിലെ 11ന് ‘മലയാള പത്ര പ്രവർത്തനം 175 വർഷം’ എന്ന വിഷയത്തെ അധികരിച്ച് സെഷൻ നടക്കും.
ഏഷ്യൻ സ്കൂള് ഓഫ് ജേണലിസം ചെയർമാൻ ശശികുമാർ, മുതിർന്ന മാധ്യമപ്രവർത്തകൻ ബി.ആർ.പി. ഭാസ്കർ, അക്കാദമി മുൻ ചെയർമാൻമാരായ തോമസ് ജേക്കബ്, കെ. മോഹനൻ, എസ്.ആർ. ശക്തിധരൻ, എൻ.പി. രാജേന്ദ്രൻ , സെർജി ആന്റണി എന്നിവരും മാധ്യമ നിരീക്ഷകൻ ഡോ. സെബാസ്റ്റ്യൻ പോള്, മുതിർന്ന മാധ്യമപ്രവർത്തകൻ കെ.സി. നാരായണൻ, ന്യൂസ് മിനിറ്റ് ചീഫ് എഡിറ്റർ ധന്യ രാജേന്ദ്രൻ, അക്കാദമി ജനറല് കൗണ്സില് അംഗം പി.പി. ശശീന്ദ്രൻ എന്നിവരും പ്രസംഗിക്കും.
