കോഴിക്കോട്: പൗരാവകാശത്തെ കുറിച്ചുള്ള യുവാക്കളുടെ കാഴ്ചപ്പാട് രൂപീകരിക്കുന്നത് തെരഞ്ഞെടുപ്പുകളിലൂടെയാണെന്ന് ജില്ലാ കലക്ടർ സ്നേഹില് കുമാർ സിംഗ്. കോഴിക്കോട് നെഹ്റു യുവ കേന്ദ്രയുടെയുടെയും ഫാറൂഖ് കോളജ്, ഫാറൂഖ് ട്രെയിനിംഗ് കോളജ് എൻഎസ്എസ് യൂണിറ്റുകളുടെയും സംയുക്ത ആഭിമുഖ്യത്തില് ജില്ലയിലെ വിവിധ കോളേജുകളിലെ എൻഎസ്എസ് വളണ്ടിയർമാർക്കായി നടത്തിയ ജില്ലാതല നെയ്ബർഹുഡ് യൂത്ത് പാർലമെന്റ് ഫാറൂഖ് കോളജ് ഓഡിറ്റോറിയത്തില് ഉദ്ഘാടനം ചെയ്ത് സംസാരിക്കുകയായിരുന്നു കലക്ടർ.
പാർലമെന്ററി വ്യവസ്ഥയെ കുറിച്ച് യുവജനങ്ങളില് വ്യക്തത ഉണ്ടാകുമ്പോഴാണ് കൃത്യമായ രീതില് വോട്ട് ആർക്ക് ചെയ്യണം എന്ന ബോധ്യം നമ്മളില് ഉണ്ടാവുകയുള്ളുവെന്നും അദ്ദേഹം പറഞ്ഞു. അസിസ്റ്റന്റ് കലക്ടർ പ്രതീക് ജെയ്ൻ അധ്യക്ഷത വഹിച്ചു.
നാഷണല് യൂത്ത് പാർലമെന്റിന്റെ ഭാഗമായി നടന്ന മത്സരത്തില് വിജയികളായ പി. നിവേദിത, പി.പി. അഭിരാം എന്നിവർക്കുള്ള സമ്മാനദാനം കലക്ടറും അസി. കലക്ടറും ചേർന്ന് നിർവഹിച്ചു.
