spot_img
Saturday, November 21, 2026
Home Blog Page 299

നിങ്ങളുടെ വാഹനത്തിന് ഇന്‍ഷുറന്‍സ് ഇല്ലേ? ഇനി പിഴ ചുമത്തുക 2.5 ലക്ഷം വരെ; പുതിയ നീക്കവുമായി ഗതാഗത മന്ത്രാലയം

0

ഇന്‍ഷുറന്‍സ് ഇല്ലാത്ത വാഹനം എടുക്കാറുണ്ടോ? എങ്കില്‍ മുട്ടന്‍ പണി വരുന്നുണ്ട്… രണ്ടര ലക്ഷം രൂപ വരെ പിഴ വര്‍ധിപ്പിക്കാനുള്ള നിര്‍ദേശങ്ങളാണ് കേന്ദ്ര സര്‍ക്കാര്‍ പരിഗണിക്കുന്നത്. മോട്ടര്‍ വാഹന വകുപ്പില്‍ ഇക്കാര്യങ്ങള്‍ കൂടി ഉള്‍ക്കൊള്ളിച്ചുകൊണ്ടുള്ള ഭേദഗതി സംഭവിക്കുന്നതോടെ ഇന്‍ഷുറന്‍സ് ഇല്ലാതെ വാഹനം എടുക്കുന്നതിനെക്കുറിച്ച് ആരും ചിന്തിക്കാന്‍ പോലും ധൈര്യപ്പെട്ടെന്ന് വരില്ല. നിലവില്‍ ഇന്‍ഷുറന്‍സില്ലാതെ വാഹനം ഓടിക്കുന്നവര്‍ക്ക് രണ്ടായിരം രൂപയാണ് പിഴ. കുറ്റം ആവര്‍ത്തിച്ചാല്‍ പിഴ 4,000 രൂപയായി ഉയരും. നിലവിലെ നിയമപ്രകാരം മൂന്നു മാസം തടവു വരെ ശിക്ഷ ലഭിക്കാവുന്ന കുറ്റമാണിത്. ഇന്‍ഷുറന്‍സ് പ്രീമിയത്തിന് അനുസരിച്ച് പിഴ തുകയും ഉയരുന്ന രീതിയിലേക്ക് മാറ്റാനുള്ള നിര്‍ദേശമാണ് നിലവില്‍ സര്‍ക്കാരിന് മുമ്പാകെ ലഭിച്ചിരിക്കുന്നത്. ആഡംബര വാഹനങ്ങള്‍ ഉപയോഗിക്കുന്നവരുടെ പിഴ ലക്ഷങ്ങളാവുമെന്ന് ചുരുക്കം.

പുതിയ നിര്‍ദേശങ്ങള്‍ പ്രകാരം ആദ്യ തവണ ഇന്‍ഷുറന്‍സ് ഇല്ലാത്ത കുറ്റത്തിന് പ്രീമിയത്തിന്റെ മൂന്നിരട്ടിയും കുറ്റം ആവര്‍ത്തിച്ചാല്‍ അഞ്ചിരട്ടിയുമാണ് പിഴ നല്‍കേണ്ടി വരിക. തേഡ് പാര്‍ട്ടി പ്രീമിയമായി 1500 രൂപയോളം അടക്കുന്ന ഇരുചക്ര വാഹന ഉടമകള്‍ക്ക് നിലവില്‍ രണ്ടായിരം രൂപയാണ് പിഴ നല്‍കേണ്ടി വരുക. പുതിയ നിര്‍ദേശപ്രകാരം ആദ്യ തവണ ഇന്‍ഷുറന്‍സില്ലാത്ത കുറ്റത്തിന് ഇവര്‍ 4,500 രൂപയും ആവര്‍ത്തിച്ചാല്‍ 7,500 രൂപയും അടക്കേണ്ടി വരും. 50,000 രൂപ വരെ ഇന്‍ഷുറന്‍സ് പ്രീമിയം അടക്കുന്ന ആഡംബര കാര്‍ ഉടമകള്‍ക്കാണ് രണ്ടര ലക്ഷം രൂപ വരെ പിഴ ഉയരുക. ഇന്‍ഷുറന്‍സില്‍ മാത്രമായി ഗതാഗത നിയമ പരിഷ്‌ക്കരണ നിര്‍ദേശങ്ങള്‍ ഒതുങ്ങുന്നില്ല. 55 വയസില്‍ കൂടുതല്‍ പ്രായമുള്ളവര്‍ക്ക് ഡ്രൈവിങ് ലൈസന്‍സ് പുതുക്കുമ്പോള്‍ ഡ്രൈവിങ് ടെസ്റ്റ് നടത്താനും നിര്‍ദേശമുണ്ട്. അമിത വേഗത, മദ്യപിച്ചുള്ള വാഹനം ഓടിക്കല്‍ തുടങ്ങിയ ഗുരുതര കുറ്റങ്ങള്‍ നടത്തുന്നവര്‍ക്കും ലൈസന്‍സ് പുനസ്ഥാപിച്ചു കിട്ടാന്‍ ഡ്രൈവിങ് ടെസ്റ്റ് നടത്തണമെന്നതും നിര്‍ദേശങ്ങളിലുണ്ട്. ഉത്തരവാദിത്വമുള്ള വാഹന ഉടമകള്‍ തീര്‍ച്ചയായും ഇന്‍ഷുറന്‍സിന്റെ കാര്യം ശ്രദ്ധിച്ചിരിക്കും. അതുകൊണ്ടുതന്നെ പിഴയെ ചൊല്ലിയുള്ള ആശങ്കകള്‍ മാറ്റിവച്ചുകൊണ്ട് ഇന്‍ഷൂറന്‍സ് അടച്ച ശേഷം മാത്രം വാഹനം ഓടിക്കുകയെന്നതിലേക്കെത്തിക്കാന്‍ ഗതാഗത നിയമ പരിഷ്‌ക്കരണങ്ങള്‍ സഹായിച്ചേക്കും.

പാലിയേക്കരയില്‍ ടോള്‍ തടഞ്ഞ് ഹൈക്കോടതി

0

കൊച്ചി: തകര്‍ന്ന ഇടപ്പള്ളി – മണ്ണൂത്തി ദേശീയപാതയിലെ ടോള്‍ പിരിവ് മരവിപ്പിച്ച് ഹൈക്കോടതി. ദേശീയപാതയിലെ ഗതാഗത പ്രശ്‌നം പരിഹരിക്കാന്‍ കേന്ദ്ര സര്‍ക്കാര്‍ അടിയന്തിരമായി ഇടപെടണം. ഗതാഗത പ്രശ്‌നം നാലാഴ്ചയ്ക്കകം പരിഹരിച്ച് റിപ്പോര്‍ട്ട് നല്‍കണമെന്നുമാണ് ഡിവിഷന്‍ ബെഞ്ചിന്റെ ഇടക്കാല ഉത്തരവ്.തകര്‍ന്ന പാതയിലെ ടോള്‍ പിരിവിലാണ് കേന്ദ്ര സര്‍ക്കാരിനും ദേശീയപാതാ അതോറിറ്റിക്കും തിരിച്ചടിയായ ഹൈക്കോടതി ഉത്തരവ്. തകര്‍ന്ന ദേശീയപാതയിലെ ടോള്‍ പിരിവാണ് പ്രശ്നമെന്ന് നിരീക്ഷിച്ചാണ് ഹൈക്കോടതിയുടെ നടപടി. ഇടക്കാല ഉത്തരവനുസരിച്ച് പാലിയേക്കര ടോള്‍ പ്ലാസയില്‍ നാലാഴ്ചത്തേക്ക് ടോള്‍ പിരിവ് പാടില്ല. ദേശീയപാതയിലെ ഗതാഗത പ്രശ്‌നം പരിഹരിക്കാന്‍ കേന്ദ്ര സര്‍ക്കാര്‍ അടിയന്തിരമായി ഇടപെടണം. സര്‍വീസ് റോഡുകള്‍ ഉടന്‍ ഗതാഗത യോഗ്യമാക്കണം. പ്രശ്‌നം പരിഹരിച്ച് നാലാഴ്ചയ്ക്കകം റിപ്പോര്‍ട്ട് നല്‍കണമെന്നുമാണ് ഹൈക്കോടതിയുടെ ഇടക്കാല ഉത്തരവ്.

പൗരന്മാരാണ് ടോള്‍ പിരിവിന്റെ ബാധ്യതയേല്‍ക്കേണ്ടി വരുന്നതെന്ന വിമര്‍ശനം ഉയര്‍ത്തിയാണ് ജസ്റ്റിസുമാരായ എ മുഹമ്മദ് മുഷ്താഖ്, ജോണ്‍സണ്‍ ജോണ്‍ എന്നിവര്‍ ഉള്‍പ്പെട്ട ഡിവിഷന്‍ ബെഞ്ചിന്റെ നടപടി. ദേശീയപാതാ അതോറിറ്റി ഒരുമാസം മുന്‍പ് നല്‍കിയ വാക്ക് പാലിച്ചില്ലെന്നായിരുന്നു ഹൈക്കോടതി നേരത്തെ ഉയര്‍ത്തിയ വിമര്‍ശനം.രണ്ടാഴ്ചയ്ക്കകം പ്രശ്നം പരിഹരിക്കാനാകുമെന്നാണ് ഒരു മാസം മുന്‍പ് അറിയിച്ചത്. എത്രനാള്‍ക്കകം പ്രശ്നം പരിഹരിക്കാനാകുമെന്നും ആയിരുന്നു കഴിഞ്ഞ തവണ ഹര്‍ജി പരിഗണിക്കവെ ദേശീയപാതാ അതോറിറ്റിയോടുള്ള ചോദ്യം. ദേശീയപാതയിലെ ഗതാഗതപ്രശ്നം മൂന്നാഴ്ചയ്ക്കകം പ്രശ്നം പരിഹരിക്കാനാകുമെന്ന് ആയിരുന്നു ദേശീയപാതാ അതോറിറ്റി തിങ്കളാഴ്ച നല്‍കിയ വിശദീകരണം.

നവാസിനെ അവസാനമായി കാണാനെത്തിയവരെയും വിടാതെ ‘സെല്‍ഫി’; പ്രകോപിതരാകാതെ ക്ഷമയോടെ താരങ്ങൾ

0

അകാലത്തിൽ വിടപറഞ്ഞ കലാഭവൻ നവാസിനെ അവസാനമായി കാണാനെത്തിയ സഹ പ്രവർത്തകരുടെ വഴിമുടക്കി സെൽഫി എടുക്കാനായി മത്സരിച്ചവർക്കെതിരെ വിമർശനം.  നവാസിന്റെ ഭൗതിക ശരീരം അവസാനമായി കാണാനായി നടൻ സായി കുമാർ, ജയസൂര്യ, സുരേഷ് കൃഷ്ണ, ദേവൻ, ലാൽ, തുടങ്ങി കലാരംഗത്തെ നിരവധി പ്രമുഖർ എത്തിയിരുന്നു.  സായികുമാറിനരികെ സെൽഫി എടുക്കാനായി ഒരാൾ എത്തിയപ്പോൾ സായികുമാർ അയാളെ പിന്തിരിപ്പിക്കുന്ന വിഡീയോ വൈറലായിരുന്നു. ജയസൂര്യ, നവാസിനെ കാണാൻ എത്തിയപ്പോഴും സെൽഫി എടുക്കാനായി ആളുകൾ ഓടിയെത്തി. സെൽഫി എടുക്കാൻ ഫോണുമായി എത്തിയ ആളെ ക്ഷുഭിതമായ ഒരു നോട്ടം കൊണ്ട് നേരിട്ട ജയസൂര്യയുടെ വിഡിയോയും വൈറലായിരുന്നു

സിനിമാ താരം കലാഭവന്‍ നവാസിന്‍റെ സംസ്കാര ചടങ്ങുകള്‍ ആലുവ ടൗൺ ജുമാമസ്ജിദിലായിരുന്നു നടന്നത്. ആലുവ ചൂണ്ടയിലെ വീട്ടിലും  ജുമാമസ്ജിദിലുമായി നടന്ന പൊതുദര്‍ശനത്തിലാണ് സിനിമ മേഖലയിലുള്ളവര്‍ തങ്ങളുടെ പ്രിയ സുഹൃത്തിനെ കാണാനെത്തിയത്. നവാസിന്റെ വിയോഗവാർത്തയറിഞ്ഞെത്തിയ സിനിമാതാരങ്ങളെ കണ്ട് പരിസരം മറന്ന് സെല്‍ഫിയെടുക്കാനായി ആരാധകർ ഓടിയെത്തി.  ആലുവ ടൗൺ ജുമാമസ്ജിദിലെത്തിയ സിനിമാ താരം ലാലിനൊപ്പവും നടന്‍ ദേവനൊപ്പവും പലരും സെല്‍ഫിയെടുത്തു.  താല്പര്യമില്ലാതെയെങ്കിലും സെൽഫിക്കായി സഹകരിക്കുന്ന താരങ്ങളുടെ വിഡിയോ സോഷ്യൽ മീഡിയയിൽ പ്രചരിച്ചു.

നടൻ സായി കുമാർ ഭാര്യ ബിന്ദുപണിക്കർക്കൊപ്പമാണ് എത്തിയത്.  സായ്കുമാറിനൊപ്പം സെൽഫി എടുക്കാനെത്തിയ ആളെ താരം പിന്തിരിപ്പിച്ചിരുന്നു. ‘നീ ഒരു തവണ എടുത്തതല്ലേ സെൽഫി, ഇനി മതി’ എന്ന് സായ്കുമാർ ശാന്തമായി പറയുകയായിരുന്നു. അതു കേട്ട ശേഷവും സെൽഫി എടുക്കാനെത്തിയ ആൾ വീണ്ടും ഫോട്ടോ എടുക്കാനായി ശ്രമിക്കുകയായിരുന്നു.  നവാസിന്റെ അന്ത്യകർമ്മങ്ങളിൽ പങ്കെടുക്കനെത്തിയ ഒട്ടുമിക്ക എല്ലാ താരങ്ങളോടും സമാനമായ രീതിയിലാണ് ആളുകൾ പ്രതികരിച്ചത്.

സഹപ്രവർത്തകന്റെ വിയോഗ വാർത്ത അറിഞ്ഞെത്തിയ സിനിമാതാരങ്ങളെ നേരവും കാലവും നോക്കാതെ സെൽഫി എടുക്കാൻ തുനിഞ്ഞവരെ കണക്കറ്റ് വിമർശിക്കുകയാണ് സോഷ്യൽ മീഡിയ.  ജയസൂര്യ ചെയ്തതാണ് ശരിയായ കാര്യമെന്നും അദ്ദേഹത്തിന്റെ നോട്ടത്തിൽ എല്ലാമുണ്ട് എന്നുമായിരുന്നു പലരും സോഷ്യൽ മീഡിയയിൽ കമന്റു ചെയ്തത്.

സന്ദർഭം നോക്കാതെ പെരുമാറുന്ന സെൽഫി ഭ്രാന്തന്മാർക്ക് ഇത് കിട്ടണമെന്ന തരത്തിലാണ് സോഷ്യല്‍ മീഡിയയിലെ കമന്‍റുകള്‍. മറ്റൊരാളുടെ ദുഃഖത്തിൽ പങ്കുചേരാൻ പോകുന്ന സ്ഥലമാണ് മരണവീട്. അവിടെ പാലിക്കേണ്ട മര്യാദകളെക്കുറിച്ച് ഒരു മടിയുമില്ലാതെ പലരും മറക്കുന്നു. സെൽഫി എടുക്കാനും റീൽസ് ചെയ്യാനും ഓടുന്ന ആൾക്കൂട്ടം മനുഷ്യത്വമില്ലാത്തവരാണെന്നും ചിലർ കുറിച്ചു.

സ്കൂള്‍ ഓണപ്പരീക്ഷ ഓഗസ്റ്റ് 18 മുതല്‍ 29 വരെ

0

സ്കൂള്‍ ഓണപ്പരീക്ഷ 18 മുതല്‍ 29 വരെ നടത്താൻ പൊതുവിദ്യാഭ്യാസ ഡയറക്ടറുടെ അധ്യക്ഷതയില്‍ ചേർന്ന വിദ്യാഭ്യാസ ഗുണമേന്മാ സമിതി (ക്യുഐപി) യോഗം തീരുമാനിച്ചു.

ഹയർ സെക്കൻഡറിയിലെ പരീക്ഷയാണ് 18 മുതല്‍ 29 വരെ നടക്കുക. എല്‍പി വിഭാഗത്തില്‍ 20-ന് തുടങ്ങും. പരീക്ഷകള്‍ പൂർത്തിയാക്കി, എല്ലാ സ്കൂളിലും 29-ന് ഓണാഘോഷം സംഘടിപ്പിച്ച്‌ ഓണാവധിക്കായി സ്കൂള്‍ അടയ്ക്കും. ഗണേശോത്സവം പ്രമാണിച്ച്‌ കാസർകോട് ജില്ലയില്‍ 27-ന് പരീക്ഷ ഉണ്ടാവില്ല. അന്നത്തെ പരീക്ഷ 29-ന് നടക്കും. ഓണാഘോഷവും നടത്തും.

ലഹരിഭീഷണി ചെറുക്കാനും വിദ്യാർഥികളുടെ മാനസികസമ്മർദം നേരിടാനുമായി അധ്യാപകരെ പ്രാപ്തരാക്കാനുള്ള കൗണ്‍സലിങ് പരിശീലനം 11, 12 തീയതികളില്‍ തിരുവനന്തപുരത്തു നടക്കും. ആദ്യഘട്ടത്തില്‍ എട്ടുമുതല്‍ 12 വരെ ക്ലാസുകളില്‍ പഠിപ്പിക്കുന്ന 200 അധ്യാപകർക്കാണ് പരിശീലനം. കായികാധ്യാപകരുടെ തസ്തിക 300:1 അനുപാതത്തില്‍ പരിഷ്കരിച്ച ഉത്തരവ് വൈകാതെ പുറത്തിറങ്ങുമെന്ന് പൊതുവിദ്യാഭ്യാസ ഡയറക്ടർ അറിയിച്ചു.

നടനും പ്രേംനസീറിന്‍റെ മകനുമായ ഷാനവാസ് അന്തരിച്ചു

0

തിരുവനന്തപുരം: അതുല്യ നടന്‍ പ്രേം നസീറിന്റെ മകനും നടനുമായ ഷാനവാസ് (71) അന്തരിച്ചു. വൃക്ക രോഗത്തെ തുടര്‍ന്ന് തിരുവനന്തപുരത്തെ ആശുപത്രിയില്‍ ചികിത്സയില്‍ കഴിയുന്നതിനിടെയാണ് മരണം സംഭവിച്ചത്. രാത്രി 11 മണിയോടെയാണ് മരണം സംഭവിച്ചത്. ഇന്നലെ വൈകീട്ടോടെ ആരോഗ്യനില മോശമാകുകയായിരുന്നു. മലയാളം, തമിഴ് ഭാഷകളിലായി അന്‍പതോളം ചിത്രങ്ങളില്‍ ഷാനവാസ് അഭിനയിച്ചിട്ടുണ്ട്.

1981ല്‍ പ്രേമഗീതങ്ങള്‍ എന്ന ചിത്രത്തില്‍ അഭിനയിച്ചു കൊണ്ടാണ് ഷാനവാസ് വെള്ളിത്തിരയിലേക്ക് എത്തുന്നത്. 1982ല്‍ അദ്ദേഹം ആറ് സിനിമകളില്‍ വേഷമിട്ടതോടെ കൂടുതല്‍ ശ്രദ്ധിക്കപ്പെട്ടു.മഴനിലാവ്, ഈയുഗം, നീലഗിരി, ചൈനാ ടൗണ്‍, ഗര്‍ഭശ്രീമാന്‍, സക്കറിയായുടെ ഗര്‍ഭിണികള്‍, ചിത്രം തുടങ്ങിയ നിരവധി ചിത്രങ്ങളില്‍ അദ്ദേഹം ശ്രദ്ധേയമായ വേഷങ്ങള്‍ അവതരിപ്പിച്ചിട്ടുണ്ട്.പൃഥ്വിരാജ് ചിത്രം ‘ജനഗണമന’യിലാണ് ഒടുവില്‍ വേഷമിട്ടത്. കൂടാതെ ശംഖുമുഖം, വെളുത്തകത്രീന, കടമറ്റത്തുകത്തനാര്‍, സത്യമേവ ജയതേ, സമ്മന്‍ ഇന്‍ അമേരിക്ക മുതലായ സീരിയലുകളിലും വേഷമിട്ടു. ഹബീബ ബീവിയാണ് മാതാവ്. ഭാര്യ: ആയിഷ. മക്കള്‍: ഷമീര്‍ ഖാന്‍, അജിത് ഖാന്‍

ഓണത്തിനു സബ്‌സിഡി നിരക്കില്‍ രണ്ടു ലീറ്റര്‍ വെളിച്ചെണ്ണ; വില ഇനിയും കുറയുമെന്ന് മന്ത്രി

0

തിരുവനന്തപുരം : ഓണത്തിനു സബ്‌സിഡി നിരക്കില്‍ രണ്ടു ലിറ്റര്‍ വെളിച്ചെണ്ണ സപ്ലൈകോയിലൂടെ നല്‍കുമെന്ന് മന്ത്രി ജി.ആര്‍.അനില്‍. എല്ലാ റേഷന്‍ കാര്‍ഡ് ഉടമകള്‍ക്കും കാര്‍ഡ് ഒന്നിന് രണ്ടു ലീറ്റര്‍ വെളിച്ചെണ്ണ നല്‍കുമെന്നാണ് മന്ത്രി അറിയിച്ചത്. സര്‍ക്കാര്‍ ഇടപെടലിലൂടെ സംസ്ഥാനത്ത് വെളിച്ചെണ്ണ വില ഇനിയും കുറയുമെന്നും അദ്ദേഹം പറഞ്ഞു.

ഈ മാസം ഒരു റേഷന്‍ കാര്‍ഡിന് ഒരു ലീറ്റര്‍ വെളിച്ചെണ്ണ സബ്‌സിഡി നിരക്കില്‍ 349 രൂപ നിരക്കില്‍ സപ്ലൈകോയിലൂടെ ലഭിക്കും. അതേ കാര്‍ഡുകാരന് അടുത്ത മാസവും നാലാം തീയതി വരെ സബ്‌സിഡി നിരക്കില്‍ വെളിച്ചെണ്ണ വാങ്ങാവുന്നതാണ്. അഞ്ചാം തീയതി ഓണത്തിനു സബ്‌സിഡി നിരക്കില്‍ വെളിച്ചെണ്ണ നല്‍കുന്നുണ്ട്. ഇതുപ്രകാരം ഓണത്തിന് ഒരു കാര്‍ഡുകാരന് സബ്‌സിഡി നിരക്കില്‍ രണ്ടു ലീറ്റര്‍ വെളിച്ചെണ്ണ ലഭിക്കുന്ന സ്ഥിതിയുണ്ടാകും. വിപണിയിലെ മോശം വെളിച്ചെണ്ണ വില്‍പ്പന കണ്ടെത്താന്‍ ഭക്ഷസുരക്ഷാ വകുപ്പിനു നിര്‍ദേശം നല്‍കിയിട്ടുണ്ടെന്നും ജി.ആർ.അനിൽ പറഞ്ഞു.

ഫാസ്ടാഗ് വാര്‍ഷിക പാസ് 15 മുതല്‍; അതിബുദ്ധി കാണിച്ചാല്‍ പണി കിട്ടും

0

ദേശീയ പാതകളിലൂടെ തുടര്‍ച്ചയായി യാത്ര ചെയ്യുന്നയാളാണോ നിങ്ങള്‍? എങ്കില്‍ നിങ്ങള്‍ക്ക് അനുയോജ്യമായ പദ്ധതിയാണ് ഓഗസ്റ്റ് 15 മുതല്‍ നിലവില്‍ വരുന്ന ഫാസ്ടാഗ് വാര്‍ഷിക പാസ്. 3,000 രൂപക്ക് 200 തവണ(ഒരു യാത്രക്ക് 15 രൂപ) അല്ലെങ്കില്‍ ഒരു വര്‍ഷത്തേക്ക് യാത്ര ചെയ്യാനുള്ള അവസരമാണ് വാര്‍ഷികപാസ് വഴി ലഭിക്കുക. സ്വകാര്യ കാര്‍, ജീപ്പ്, വാന്‍ എന്നിങ്ങനെ വാണിജ്യേതര വാഹനങ്ങള്‍ ഉപയോഗിക്കുന്നവര്‍ക്കാണ് വാര്‍ഷിക പാസ് ലഭിക്കുക. ബസുകള്‍, ട്രക്കുകള്‍, ടെമ്പോകള്‍ എന്നിവക്കൊന്നും വാര്‍ഷിക പാസ് ലഭിക്കില്ല.

സംസ്ഥാന പാതകളില്‍ ഇല്ല

രാജ്മാര്‍ഗ്‌യാത്ര മൊബൈല്‍ ആപ്ലിക്കേഷന്‍ വഴിയോര ദേശീയ പാതാ അതോറിറ്റി(NHAI)യുടേയോ ഔദ്യോഗിക വെബ് സൈറ്റ് വഴിയോ വാര്‍ഷിക ഫാസ്ടാഗ് എടുക്കാനാവും. നിങ്ങളുടെ വാഹനത്തിന്റെ വിശദാംശങ്ങള്‍ നല്‍കി യോഗ്യത ഉറപ്പിച്ച് പണം അടച്ചു കഴിഞ്ഞാല്‍ രണ്ട് മണിക്കൂറിനകം തന്നെ വാര്‍ഷിക ഫാസ്ടാഗ് ഉപയോഗിക്കാനാവും.

ദേശീയപാതകളിലും അതിവേഗ എക്‌സ്പ്രസ് വേകളിലും വാര്‍ഷിക ഫാസ്ടാഗ് ഉപയോഗിക്കാനാവും. അതേസമയം സംസ്ഥാന പാതകളിലും സംസ്ഥാനങ്ങള്‍ നിയന്ത്രിക്കുന്ന എക്‌സ്പ്രസ് വേകളിലുമൊന്നും വാര്‍ഷിക ഫാസ്ടാഗ് പ്രവര്‍ത്തിക്കില്ല. ഇത്തരം ടോള്‍ പ്ലാസകളില്‍ പണം കൊടുത്തു തന്നെ പോവേണ്ടി വരും. ഇക്കാര്യം കൂടി കണക്കിലെടുത്ത് വേണം വാര്‍ഷിക ഫാസ്ടാഗ് എടുക്കാന്‍.

പറ്റിക്കാന്‍ നോക്കണ്ട, പണി കിട്ടും


നിങ്ങളുടെ വാഹനത്തിന്റെ രജിസ്‌ട്രേഷന്‍ നമ്പര്‍ രേഖപ്പെടുത്തിയിട്ടുള്ള ഫാസ്ടാഗില്‍ മാത്രമാവും വാര്‍ഷിക ഫാസ് ടാഗ് ലഭിക്കുക. സ്വകാര്യ വാഹനത്തില്‍ വാര്‍ഷിക ഫാസ്ടാഗ് എടുത്ത് വാണിജ്യ വാഹനങ്ങളില്‍ ഒട്ടിച്ച് തട്ടിപ്പു നടത്താനൊന്നും ആരും ശ്രമിക്കേണ്ടതില്ല. അങ്ങനെ ചെയ്യുന്നവര്‍ കയ്യോടെ പിടിക്കപ്പെടുകയും ചെയ്യും. ഇത്തരം വാര്‍ഷിക പാസുകള്‍ സ്വയം നിര്‍ജീവമാവുകയും ചെയ്യും. രജിസ്റ്റര്‍ ചെയ്ത വാഹനത്തിന്റെ മുന്നിലെ വിന്‍ഡ് ഷീല്‍ഡിലെ ഗ്ലാസിലാണ് ഫാസ്ടാഗ് ഒട്ടിക്കേണ്ടതെന്നും എന്‍എച്ച്എഐ അറിയിക്കുന്നുണ്ട്.

എങ്ങനെ ആക്ടിവേറ്റ് ചെയ്യാം?

നിങ്ങളുടെ കൈവശമുള്ള സ്മാര്‍ട്ട് ഫോണിലൂടെ രാജ്മാര്‍ഗ്‌യാത്ര മൊബൈല്‍ ആപ്ലിക്കേഷന്‍ വഴിയോ എന്‍എച്ച്എഐ ഔദ്യോഗിക വെബ്‌സൈറ്റ് വഴിയോ വാര്‍ഷിക ഫാസ്ടാഗ് ആക്ടിവേറ്റ് ചെയ്യാനാവും. ഇതിനായി നിലവിലെ നിങ്ങളുടെ ഫാസ്ടാഗ് വിവരങ്ങള്‍ നല്‍കിക്കൊണ്ട് ലോഗ്ഇന്‍ ചെയ്യണം. രജിസ്റ്റര്‍ ചെയ്ത മൊബൈല്‍ നമ്പറോ വാഹനത്തിന്റെ രജിസ്‌ട്രേഷന്‍ നമ്പറോ ഫാസ്ടാഗ് ഐഡിയോ ഒക്കെ ചോദിക്കാനിടയുണ്ട്.

നിങ്ങളുടെ വാഹനത്തിന് വാര്‍ഷിക ഫാസ്ടാഗിന് യോഗ്യതയുണ്ടോ എന്ന് പരിശോധിച്ച് അറിയിക്കും. വെരിഫിക്കേഷന്‍ നടപടികള്‍ വിജയകരമായി പൂര്‍ത്തിയാക്കിയാല്‍ 3,000 രൂപ അടക്കാന്‍ അവസരം ലഭിക്കും. സാധാരണ ഡിജിറ്റല്‍ പണ ഇടപാടുകളായ യുപിഐ, ഇന്റര്‍നെറ്റ് ബാങ്കിങ്, ഡെബിറ്റ് കാര്‍ഡ്, ക്രെഡിറ്റ് കാര്‍ഡ് എന്നിവയിലേതെങ്കിലും തെരഞ്ഞെടുത്ത് പണം അടക്കുന്നത് പൂര്‍ത്തിയാക്കാം

കാസ്റ്റിംഗ് കൗച്ച് ഇല്ലാതാക്കണം; സിനിമാ മേഖലയിൽ ഏകീകൃത പെരുമാറ്റച്ചട്ടം, നയരൂപീകരണ കരട് പുറത്ത്

0

 കേരളത്തിൽ ആദ്യമായി സമഗ്ര ചലച്ചിത്രനയം രൂപീകരിക്കുന്നതിൻ്റെ ഭാഗമായി സിനിമാ കോൺക്ലേവിന് തുടക്കമായി. സിനിമ മേഖലയിലെ സ്ത്രീകളും ലിംഗ ന്യൂനപക്ഷങ്ങളും നേരിടുന്ന വെല്ലുവിളികൾ പരിഹരിക്കുന്നതിന് ഊന്നൽ നൽകുന്നതാണ് കരട് രേഖ.

കരട് നയത്തിലെ പ്രധാന നിർദ്ദേശങ്ങൾ

  • സിനിമ സെറ്റുകളിൽ വിവേചനം, ലൈംഗികാതിക്രമം, അധികാര ദുർവിനിയോഗം എന്നിവ നിരോധിക്കണം.
  • ‘കാസ്റ്റിംഗ് കൗച്ച്’ പൂർണ്ണമായും ഇല്ലാതാക്കണം; ഇതിനെതിരെ സീറോ ടോളറൻസ് നയം ഉറപ്പാക്കണം. കുറ്റവാളികളെ ബ്ലാക്ക് ലിസ്റ്റ് ചെയ്യണം.
  • ഓഡിഷന് കേന്ദ്രീകൃതമായ പ്രോട്ടോക്കോൾ നടപ്പാക്കുകയും സിനിമ മേഖലയിൽ ഏകീകൃത പെരുമാറ്റച്ചട്ടം കൊണ്ടുവരികയും വേണം.
  • അടിസ്ഥാന സൗകര്യങ്ങളായ ശുചിമുറി, വിശ്രമമുറി എന്നിവ ഉറപ്പാക്കണം.
  • ‘പോഷ്’ (POSH) നിയമം കർശനമായി നടപ്പാക്കണം.
  • സൈബർ പോലീസിന് കീഴിൽ ആൻ്റി പൈറസിക്ക് വേണ്ടി പ്രത്യേക സെൽ തുടങ്ങണം.
  • അതിക്രമങ്ങൾ തുറന്നുപറയുന്നവർക്ക് പൊതു പിന്തുണ ഉറപ്പാക്കണം.
  • ചലച്ചിത്ര പ്രവർത്തകരെ ലക്ഷ്യമിട്ടുള്ള ഓൺലൈൻ ആക്രമണങ്ങൾ തടയണം.
  • പുതിയ ആളുകൾക്ക് സിനിമാ മേഖലയിലേക്ക് കടന്നുവരാൻ മെൻ്റർഷിപ്പ് പ്രോഗ്രാമുകൾ നടപ്പാക്കണം.

ഇന്ത്യയിൽ ആദ്യമായി ഇത്രയും വിശാലമായ ചലച്ചിത്രനയം രൂപീകരിക്കുന്നത് കേരളത്തിലാണെന്ന് മന്ത്രി സജി ചെറിയാൻ പറഞ്ഞു. ഈ കോൺക്ലേവ് സിനിമാ നയമാറ്റത്തിലെ നിർണായക ചുവടുവെപ്പാണ്. സമഗ്രമായ ചലച്ചിത്രനയം രൂപീകരിക്കാനുള്ള പ്രാരംഭഘട്ടമാണിത്. ചലച്ചിത്രമേഖലയിലെ ഒൻപതോളം വിഷയങ്ങൾ ഇവിടെ സമഗ്രമായി ചർച്ച ചെയ്യുമെന്നും മന്ത്രി വ്യക്തമാക്കി. ഏറ്റവും ദൃഢമായ ചലച്ചിത്രനയം രൂപീകരിക്കാൻ എല്ലാവരും സഹകരിക്കണമെന്ന് അദ്ദേഹം അഭ്യർത്ഥിച്ചു. വനിതാ സിനിമാ പ്രവർത്തകർ മുഖ്യമന്ത്രിക്ക് നൽകിയ നിവേദനത്തിൻ്റെ അടിസ്ഥാനത്തിലാണ് നയം രൂപീകരിക്കാൻ തീരുമാനിച്ചതെന്നും മന്ത്രി കൂട്ടിച്ചേർത്തു.

കലാഭവൻ നവാസിന് വിടചൊല്ലി നാട്; ചിരിപടർത്തിയ കലാകരന് കണ്ണീരിൽ കുതിർന്ന യാത്രയയപ്പ്

0


കലാഭവൻ നവാസിന് വിടചൊല്ലി നാട്. ആലുവ ടൗൺ ജുമാമസ്ജിദ് പള്ളിയിലാണ് ഖബറടക്കം നടന്നത്. മൂന്ന് പതിറ്റാണ്ടിലേറെയായി അഭ്രപാളിയിലും മലയാളികളുടെ സ്വീകരണമുറിയിലും ചിരിപടർത്തിയ കലാകരന് കണ്ണീരിൽ കുതിർന്ന യാത്രയയപ്പ്. നിരവധി സിനിമകളിലൂടെയും സ്റ്റേജ് ഷോകളിലൂടെയും സുപരിചതനായ പ്രിയനടന് വിതുമ്പലോടെ യാത്രപറഞ്ഞ് സിനിമാ മേഖലയും പൊതുസമൂഹവും.

മൈ ഡിയർ കരടിയിലെയും ജൂനിയർ മാന്ഡ്രാക്കിലെയും മാട്ടുപ്പെട്ടി മച്ചാനിലെയും കഥാപാത്രങ്ങൾ ഈ ദിവസം മലയാളി പ്രേക്ഷകരുടെ മനസിൽ നിന്ന് മായാതെ നിൽക്കുകയാണ്. കലാഭവനിലെ മിമിക്രി ട്രൂപ്പിലൂടെ ആരംഭിച്ച കലാജീവിതം മൂന്ന് പതിറ്റാണ്ടുകൾ കടന്ന് അവസാനശ്വാസം വരെ തുടർന്നു. മരിക്കുന്നതിന് മണിക്കൂറുകൾ മുമ്പുവരെ ക്യാമറക്കുമുന്നിലായിരുന്നു.

ഇന്നലെ രാത്രി 8:40 ഓടെയാണ് ഹൃദയാഘാതത്തെ തുടർന്ന് ചോറ്റാനിക്കരയിലെ ഹോട്ടൽമുറിയിൽ കുഴഞ്ഞുവീണത്. കളമശ്ശേരി മെഡിക്കൽ കോളേജിൽ നിന്ന് പോസ്റ്റ്മോർട്ടം പൂർത്തിയാക്കിയതിനുശേഷം ആലുവ നാലാം മയിലിലുള്ള വീട്ടിലെത്തിച്ച മൃതദ്ദേഹത്തിൽ സമൂഹത്തിന്റെ വ്യത്യസ്ത തുറയിൽ നിന്നുള്ള നിരവധിപേർ അന്തിമോപചാരം അർപ്പിച്ചു. അവതരിപ്പിച്ച കഥാപാത്രങ്ങളും വേദികളും കാഴ്ച്ചക്കാർക്ക് വിട്ടുനൽകി കലാഭവൻ നവാസ് യാത്രയായി.

പ്രൊഫ. എം കെ സാനു അന്തരിച്ചു

0

കൊച്ചി: പ്രൊഫ. എം കെ സാനു (99 ) അന്തരിച്ചു. വൈകുന്നേരം 5 .35 നാണ് മരണം സംഭവിച്ചത്.എറണാകുളത്തെ ആശുപത്രിയില്‍ ചികിത്സയിലായിരുന്നു. വീട്ടില്‍ വെച്ച് ഉണ്ടായ ഒരു വീഴ്ചയെ തുടര്‍ന്നാണ് അദ്ദേഹത്തെ ആശുപത്രിയില്‍ പ്രവേശിപ്പിച്ചത്. പിന്നീട് ന്യുമോണിയ ബാധിക്കുകയായിരുന്നു. നാളെ രാവിലെ എട്ടുമണിക്ക് മൃതദേഹം ആശുപത്രിയിൽ നിന്ന് വീട്ടിലേക്ക് കൊണ്ടുവരും. രാവിലെ ഒമ്പതുമണി മുതൽ 10 വരെ വീട്ടിൽ പൊതുദർശനം ഉണ്ടാവും. രാവിലെ 10 മുതൽ എറണാകുളം ടൗൺ ഹാളിലായിരിക്കും പൊതുദര്‍ശനം.

മലയാള സാഹിത്യലോകം കണ്ട ഏറ്റവും മികച്ച സാഹിത്യ നിരൂപകരില്‍ ഒരാളാണ് വിടവാങ്ങിയത്. എഴുത്തുകാരന്‍, പ്രഭാഷകന്‍, ചിന്തകന്‍ എന്നിങ്ങനെ വ്യത്യസ്ത തലങ്ങളില്‍ അദ്ദേഹം സംഭാവനകൾ നല്‍കിയിട്ടുണ്ട്. മലയാള സാഹിത്യ ലോകത്തിന് തീരാത്ത നഷ്ടമാണ് ഉണ്ടായിരിക്കുന്നത്. മഹാരാജാസ് കോളേജ് ഉൾപ്പെടെയുള്ള സംസ്ഥാനത്തെ വിവിധ കോളേജുകളില്‍ അധ്യാപകനായി പ്രവര്‍ത്തിച്ചിട്ടുണ്ട്. കേന്ദ്ര സാഹിത്യ അക്കാദമി പുരസ്കാരം, കേരള സാഹിത്യ അക്കാദമി പുരസ്കാരം, വയലാര്‍ അവാര്‍ഡ്, എഴുത്തച്ഛന്‍ പുരസ്കാരം ഉള്‍പ്പെടെ നിരവധി അവാര്‍ഡുകൾ നേടിയിട്ടുണ്ട്. വാര്‍ധക്യത്തിലും സാഹിത്യ സാമൂഹിക പ്രവര്‍ത്തനങ്ങളില്‍ സജീവമായിരുന്നു സാനു മാഷ്.

അസാധാരണമായ ഉൾക്കാഴ്ചയോട് കൂടിയ ജീവചരിത്ര രചനയില്‍ അദ്ദേഹം പ്രാഗല്‍ഭ്യം പുലര്‍ത്തിയ എഴുത്തുകാരനായിരുന്നു പ്രൊഫസര്‍ സാനു. ശ്രീനാരായണ ഗുരുദേവന്‍റെ ദര്‍ശനങ്ങളെ മലയാളികളില്‍ ആഴത്തില്‍ ഇറങ്ങുന്ന വിധത്തില്‍ മികച്ച രചനകൾ നടത്താന്‍ എംകെ സാനുവിന് സാധിച്ചിട്ടുണ്ട്. ചങ്ങമ്പുഴ കൃഷ്ണപിള്ളയെ കുറിച്ചുള്ള നക്ഷത്രങ്ങളുടെ സ്നേഹഭാജനം എന്ന സാനു മാഷ് എഴുതിയ ജീവചരിത്ര പുസ്തകം മലയാളത്തിലെ എണ്ണം പറഞ്ഞ ജീവചരിത്ര പുസ്തകങ്ങളില്‍ ഒന്നാണ്.  പികെ ബാലകൃഷ്ണന്‍, വൈക്കം മുഹമ്മദ് ബഷീര്‍ തുടങ്ങി 40 ലധികം പേരുടെ ജീവചരിത്രം എംകെ സാനു രചിച്ചിട്ടുണ്ട്. പ്രായമായതിന്‍റെ അവശതകൾ അദ്ദേഹം തന്‍റെ എഴുത്തിലും സാമൂഹിക പ്രവര്‍ത്തനങ്ങളിലെ നാൾവഴികളിലും ഒരിക്കലും കാണിച്ചിരുന്നില്ല.