spot_img
Sunday, November 22, 2026
Home Blog Page 340

ഹൈക്കോടതി ഉത്തരവ് ലംഘിച്ച് ഗുരുവായൂര്‍ ക്ഷേത്ര പരിസരത്ത് വിഡിയോ ചിത്രീകരിച്ചു; ജസ്‌ന സലീമിനെതിരെ കേസ്

0

ഹൈക്കോടതി ഉത്തരവ് ലംഘിച്ച് ഗുരുവായൂര്‍ ക്ഷേത്ര പരിസരത്ത് വിഡിയോ ചിത്രീകരിച്ച യുവതിക്ക് എതിരെ കലാപാഹ്വാനത്തിന് കേസ്. കോഴിക്കോട് സ്വദേശിനി ജസ്‌ന സലീമിനെതിരെ ഗുരുവായൂര്‍ ടെമ്പിള്‍ പൊലീസാണ് കേസെടുത്തത്.

ചിത്രകാരിയാണ് ജസ്‌ന സലിം. കൃഷ്ണഭക്ത എന്ന നിലയില്‍ സമൂഹ മാധ്യമങ്ങളിലടക്കം ശ്രദ്ധയാകര്‍ഷിച്ച വ്യക്തി കൂടിയാണ്. നേരത്തെ ഗുരുവായൂരമ്പലത്തിന് സമീപത്ത് വച്ച് കേക്ക് മുറിച്ച് അതിന്റെ വീഡിയോ സമൂഹ്യ മാധ്യമങ്ങളിലടക്കം പ്രചരിപ്പിച്ചതുമായി ബന്ധപ്പെട്ട് ഇവരുടെ പേരില്‍ വിവാദമുണ്ടായിരുന്നു. സംഭവത്തില്‍ ഗുരുവായൂര്‍ ക്ഷേത്രം നല്‍കിയ പരാതിയില്‍ ഹൈക്കോടതി ശക്തമായ നിലപാട് സ്വീകരിക്കുകയായിരുന്നു. ക്ഷേത്രങ്ങള്‍ ഭക്തര്‍ക്കുള്ള ഇടമാണ്. ഇത്തരത്തില്‍ ചിത്രങ്ങളെടുത്ത് സാമൂഹിക മാധ്യമങ്ങളില്‍ ഉള്‍പ്പടെ പ്രചരിപ്പിക്കുന്നത് അംഗീകരിക്കാനാവില്ലെന്ന നിലപാടാണ് ഹൈക്കോടതി സ്വീകരിച്ചത്.

ഇതിന് പിന്നാലെ കഴിഞ്ഞ മാസം അമ്പലത്തിന്റെ വടക്കേ നടയിലുള്ള ഇ – കാണിക്കയ്ക്ക് മുകളിലെ കൃഷ്ണ വിഗ്രഹത്തില്‍ മാല ചാര്‍ത്തിക്കൊണ്ട് വീണ്ടുമൊരു വീഡിയോ ഇവര്‍ ചിത്രീകരിച്ചു. ഇത് സോഷ്യല്‍ മീഡിയ വഴി പങ്കുവെക്കുകയും ചെയ്തു. ഇതുമായി ബന്ധപ്പെട്ടാണ് ഗുരുവായൂര്‍ ദേവസ്വം ബോര്‍ഡ് ഗുരുവായൂര്‍ ടെമ്പിള്‍ പൊലീസില്‍ പരാതി നല്‍കുകയായിരുന്നു. ആ പരാതിയിലാണ് കേസെടുത്തത്.

ഇനി റീല്‍സ് കാ‍ഴ്ച അത്ര എ‍ളുപ്പമാകില്ല! വമ്പൻ മാറ്റത്തിനൊരുങ്ങി ഇൻസ്റ്റ

0

ഇൻസ്റ്റഗ്രാം റീലുകള്‍ അടിമുടി മാറുന്നു. ലോക്ക് ചെയ്ത റീലുകൾ ആണ് പുതുതായെത്തുന്ന ഇൻസ്റ്റയിലെ ഫീച്ചര്‍. ഒരു രഹസ്യ കോഡിൻ്റെ സഹായത്തോടെ അണ്‍ലോക്ക് ചെയ്ത് കാണാ‍ൻ ക‍ഴിയുന്ന തരത്തില്‍ റീല്‍സ് സജ്ജീകരിക്കുന്നതാണ് ഈ ഫീച്ചര്‍. ചാനലുകളിലൂടെയും പ്രൊഫൈലിലൂടെയും ആരാധകർക്കിടയിൽ തങ്ങളുടെ വ്യാപ്തി വർദ്ധിപ്പിച്ച സ്രഷ്ടാക്കളെയും ബ്രാൻഡുകളെയും ലക്ഷ്യമിട്ടാണ് പ്ലാറ്റ്‌ഫോം ഇത്തരമൊരു ഫീച്ചര്‍ അവതരിപ്പിച്ചിരിക്കുന്നത്. ഈ ഫീച്ചര്‍ നിലവില്‍ ടെസ്റ്റിങ്ങിലാണ്. ഇത് വിജയകരമായാല്‍ ഫീച്ചര്‍ ഉടന്‍ തന്നെ എല്ലാ ഉപയോക്താക്കളിലേക്കും എത്തിയേക്കുമെന്നാണ് റിപ്പോര്‍ട്ട്.

പ്ലാറ്റ്‌ഫോമിൽ ഉപയോക്താക്കളെ വ്യാപൃതരാക്കുന്നതിനുള്ള ഒരു ആവേശകരമായ മാർഗമാണ് സീക്രട്ട് കോഡ് ഉപയോഗിക്കുന്നത്. മാത്രമല്ല ഒരു റീലിലേക്ക് തെരഞ്ഞെടുത്ത ആളുകൾക്ക് മാത്രം ആക്‌സസ് നല്‍ൻ കഴിയുന്ന കോഡുള്ള റീലുകൾ ഉള്ള രസകരമായ ഗെയിമുകൾ ഉപയോഗിച്ച് അതിന്റെ പരസ്യദാതാക്കൾ (ബ്രാൻഡുകൾ) അവരുടെ പ്രേക്ഷകരെ തൃപ്തിപ്പെടുത്തുന്നുവെന്നത് ഇൻസ്റ്റാഗ്രാം ഇതിലൂടെ വ്യക്തമായി കാണുന്നുണ്ട്.

ALSO READ: വെടിക്കെട്ട് ക്യാമറ, കിടിലോല്‍ക്കിടിലൻ ബാറ്ററി: ഐക്യു Z10 സീരീസ് ലോഞ്ച് ചെയ്തു

സാധാരണ ഇൻസ്റ്റാഗ്രാം ഉപയോക്താക്കൾക്ക്, തിരഞ്ഞെടുത്ത ഒരു കൂട്ടം സുഹൃത്തുക്കൾക്കായി റീലുകൾ ക്രിയേറ്റ് ചെയ്യാനും കോഡ് ഉപയോഗിച്ച് അത് പങ്കിടാൻ അവരെ അനുവദിക്കാനും കഴിയും. അതേസമയം കോഡുകൾക്കായി പസിലുകൾ സോ‍ള്‍വ് ചെയ്യേണ്ടതുണ്ട്. അതുകൊണ്ട് ഇതില്‍ താൽപ്പര്യമില്ലാത്ത ആളുകൾ ഒരു റീൽ കാണാൻ ആഗ്രഹിക്കുന്നുണ്ടെങ്കില്‍ ഫീച്ചർ എല്ലാവർക്കും പ്രാവർത്തികമാക്കുന്നതിന് ശരിയായ ബാലൻസ് കണ്ടെത്തേണ്ടതുണ്ട്. ഇൻസ്റ്റാഗ്രാമിലെ പുതിയ ഫീച്ചർ കൗമാരക്കാർക്ക് അനുയോജ്യമാകും. പക്ഷേ അവർക്ക് ഇനി പ്ലാറ്റ്‌ഫോമിൽ ലൈവ് പോകാന്‍ ക‍ഴിയില്ല. ഏറ്റവും പുതിയ മാറ്റങ്ങൾ ആദ്യം യുണൈറ്റഡ് സ്റ്റേറ്റ്സ്, ബ്രിട്ടൻ, കാനഡ, ഓസ്‌ട്രേലിയ എന്നിവിടങ്ങളിലെ ഉപയോക്താക്കൾക്കാകും ബാധകമാകുക എന്നാണ് വിവരം.

കോഴിക്കോട് രൂപത അതിരൂപതയാക്കി ഉയർത്തി; ഡോ. വർഗീസ് ചക്കാലക്കൽ പ്രഥമ ആർച്ച് ബിഷപ്പ്

0

കോഴിക്കോട് രൂപതയെ അതിരൂപതയായി ഉയർത്തി വത്തിക്കാൻ. ഡോ.വർഗീസ് ചക്കാലക്കലിനെ ആർച്ച് ബിഷപ്പായി പ്രഖ്യാപിച്ചു. കണ്ണൂർ, സുൽത്താൻപേട്ട് രൂപതകളാണ് കോഴിക്കോട് അതിരൂപതയ്ക്ക് കീഴിൽവരുന്നത്. കോഴിക്കോട് രൂപത സ്ഥാപിതമായി 102 വർഷം പിന്നിടുമ്പോഴാണ് സുപ്രധാന പ്രഖ്യാപനം.1923 ജൂൺ 12 നാണ് കോഴിക്കോട് രൂപത സ്ഥാപിതമായത്.

ഫ്രാന്‍സിസ് മാര്‍പ്പാപ്പയുടെ പ്രഖ്യാപനം വായിച്ചത് തലശ്ശേരി ബിഷപ്പ് മാർ ജോസഫ് പാംപ്ലാനിയാണ്. ഓശന ഞായർ സമ്മാനമാണ് ലഭിച്ചതെന്ന് തലശ്ശേരി ആർച്ച് ബിഷപ്പ് ജോസഫ് പാംപ്ലാനി പ്രതികരിച്ചു. അതിരൂപതയായി ഉയർത്തിയതോടെ ബിഷപ്പ് വര്‍ഗീസ് ചക്കാലക്കല്‍ കോഴിക്കോട് അതിരൂപതയുടെ പ്രഥമ ആര്‍ച്ച് ബിഷപ്പ് ആയി.2012 ലാണ് വര്‍ഗീസ് ചക്കാലക്കല്‍ കോഴിക്കോട് ബിഷപ്പായി ചുമതലയേറ്റത്. തൃശൂര്‍ മാള സ്വദേശിയാണ്.

യുപിഐ സേവനങ്ങള്‍ തകരാറില്‍, പ്രശ്‌നം പരിഹരിക്കാനുള്ള ശ്രമത്തിലെന്ന് എന്‍പിസിഐ

0

ഡിജിറ്റല്‍ പണമിടപാട് സേവനമായ യുപിഐയില്‍ തകരാര്‍. വിവിധ യുപിഐ ആപ്പുകളുടെ പ്രവര്‍ത്തനത്തില്‍ തടസം നേരിടുന്നതായാണ് വിവരം. ഒരു മാസത്തിനിടെ ഇത് മൂന്നാം തവണയാണ് യുപിഐ സേവനങ്ങള്‍ തടസപ്പെടുന്നത്.

ഡൗണ്‍ ഡിറ്റക്ടര്‍ വെബ്‌സൈറ്റ് നല്‍കുന്ന റിപ്പോര്‍ട്ട് അനുസരിച്ച് ശനിയാഴ്ച രാവിലെ 11.26 ഓടുകൂടിയാണ് യുപിഐ സേവനങ്ങളില്‍ തടസം നേരിട്ടുതുടങ്ങിയത്. 11.40 ആയപ്പോഴേക്കും അത് രൂക്ഷമായി.അതേസമയം, പ്രശ്‌നം പരിഹരിക്കാനുള്ള ശ്രമത്തിലാണെന്ന് നാഷണല്‍ പേമെന്റ്‌സ് കോര്‍പ്പറേഷന്‍ ഓഫ് ഇന്ത്യ (എന്‍പിസിഐ) അറിയിച്ചു.

ഇതെവിടെ ചെന്ന് നിൽക്കും? ഇന്നും കുതിപ്പ് തന്നെ, ആദ്യമായി 70,000 കടന്ന് സ്വർണവില

0

ആദ്യമായി എഴുപതിനായിരം കടന്ന് സ്വർണ വില. ഇന്ന് പവന് 200 രൂപയാണ് കൂടിയത്. ഇതോടെ ഒരു പവൻ സ്വർണത്തിന്‍റെ വില 70,160 രൂപയായി. ഗ്രാമിന് ഇന്ന് കൂടിയത് 25 രൂപയാണ്.
2025ൽ വൻവർദ്ധനയാണ് സ്വർണ വിലയിൽ രേഖപ്പെടുത്തുന്നത്. ഈ വർഷം ഇതിനകം പവന് 13,280 രൂപ കൂടി. ഗ്രാമിനാകട്ടെ 1,660 രൂപയും. കഴിഞ്ഞ നാല് ദിവസത്തിനിടെ പവന് 4,360 രൂപയാണ് വർദ്ധിച്ചത്.

ഏപ്രിൽ 4ന് ഒരു പവൻ സ്വർണത്തിന് 1280 രൂപയും ഏപ്രിൽ 5ന്  720 രൂപയും കുറഞ്ഞതോടെ ഉപഭോക്താക്കൾക്കുണ്ടായ നേരിയ ആശ്വാസം ഏറെ നീണ്ടുനിന്നില്ല. പിന്നീടുള്ള ദിവസങ്ങളിൽ സമാനതകളില്ലാത്ത കുതിപ്പാണ് സ്വർണ വിലയിൽ കണ്ടത്.   ചരിത്രത്തിലാദ്യമായി ഒറ്റ ദിവസത്തെ ഏറ്റവും വലിയ വർധന സ്വർണ വിലയിലുണ്ടായത് ഏപ്രിൽ 10നാണ്.  പവന് 2160 രൂപയാണ് ഒറ്റയടിക്ക് വർദ്ധിച്ചത്.

ഏപ്രിലിലെ  സ്വർണ വില ഇങ്ങനെ…
ഏപ്രിൽ 1 – ഒരു പവൻ സ്വർണത്തിന് 680 രൂപ ഉയർന്നു. വിപണി വില  68,080 രൂപ
ഏപ്രിൽ 2 – സ്വർണവിലയിൽ മാറ്റമില്ല. വിപണി വില  68,080 രൂപ
ഏപ്രിൽ 3 – ഒരു പവൻ സ്വർണത്തിന് 400 രൂപ ഉയർന്നു. വിപണി വില  68,480 രൂപ
ഏപ്രിൽ 4 – ഒരു പവൻ സ്വർണത്തിന് 1280 രൂപ കുറഞ്ഞു. വിപണി വില  67,200 രൂപ
ഏപ്രിൽ 5 – ഒരു പവൻ സ്വർണത്തിന് 720 രൂപ കുറഞ്ഞു. വിപണി വില  66,480 രൂപ
ഏപ്രിൽ 6 – സ്വർണവിലയിൽ മാറ്റമില്ല. വിപണി വില  66,480 രൂപ
ഏപ്രിൽ 7 – ഒരു പവൻ സ്വർണത്തിന് 200 രൂപ കുറഞ്ഞു.  വിപണി വില  66,280 രൂപ
ഏപ്രിൽ 8 –  ഒരു പവൻ സ്വർണത്തിന് 480 രൂപ കുറഞ്ഞു.  വിപണി വില  65,800 രൂപ
ഏപ്രിൽ 9 –  ഒരു പവൻ സ്വർണത്തിന് 520 രൂപ ഉയർന്നു.  വിപണി വില  66,320 രൂപ
ഏപ്രിൽ 10 –  ഒരു പവൻ സ്വർണത്തിന് 2160 രൂപ ഉയർന്നു.  വിപണി വില  68,480 രൂപ
ഏപ്രിൽ 11 –  ഒരു പവൻ സ്വർണത്തിന് 1480 രൂപ ഉയർന്നു.  വിപണി വില  69960 രൂപ
ഏപ്രിൽ 12- ഒരു പവൻ സ്വർണത്തിന്  200 രൂപ കൂടി. വിപണി വില 70,160 രൂപ

സ്റ്റൂളിന്റെ നടുവിൽ ദ്വാരം ഇടുന്നത് വെറുതേയല്ല; കാര്യം ഇതാണ് 

0

ഇന്ന് സ്‌റ്റൂളില്ലാത്ത വീടുകൾ ഉണ്ടാവില്ല. എളുപ്പത്തിൽ ഉപയോഗിക്കാനും അതുകഴിഞ്ഞ് സൂക്ഷിക്കാനുമൊക്കെ വലിയ ബുദ്ധിമുട്ടില്ലാത്തതിനാൽ സ്റ്റൂളിന് നിരവധി ഉപയോഗങ്ങളാണ് വീടുകളിലുള്ളത്. ചിലർ ഇരിക്കാനും മറ്റ്‌ ചിലർ സാധനങ്ങൾ സൂക്ഷിക്കാനുമൊക്കെ സ്റ്റൂൾ ഉപയോഗിക്കാറുണ്ട്. പലതരം മെറ്റീരിയലിലാണ് സ്റ്റൂൾ നിർമ്മിച്ചിട്ടുള്ളത്. എന്നാൽ വീടുകളിൽ സാധാരണമായി ഉപയോഗിക്കുന്നത് പ്ലാസ്റ്റിക് സ്റ്റൂളുകളാണ്. കണ്ട് പരിചിതമായ കാഴ്ചയാണ് സ്റ്റൂളിന് നടുവിലെ വൃത്തത്തിലുള്ള ദ്വാരം. ശരിക്കും എന്തിനായിരിക്കും സ്ടൂളിന് നടുവിൽ ദ്വാരം ഇടുന്നത്. നിങ്ങൾ എപ്പോഴെങ്കിലും ഇതെന്തിനാണെന്ന് ആലോചിച്ചിട്ടുണ്ടോ? ഇതിന് പിന്നിൽ പലതരം ഉദ്ദേശങ്ങളുണ്ട്. അവ എന്തൊക്കെയാണെന്ന് അറിഞ്ഞാലോ.

1. പെട്ടെന്ന് സ്റ്റൂളിന്റെ ഘടന മാറിപോകാതെ സന്തുലിതമായി നിലനിൽക്കാൻ വേണ്ടിയാണ് സ്റ്റൂളിന് നടുവിൽ വൃത്താകൃതിയിൽ ദ്വാരം ഇടുന്നത്. 

2. ആളുകൾ ഇരിക്കുമ്പോൾ സ്റ്റൂളിന്റെ എല്ലാ വശങ്ങളിലും ഭാരം ഒരുപോലെ നിയന്ത്രിക്കാനും ഈ ദ്വാരം സഹായിക്കുന്നു. അതിനാൽ തന്നെ പെട്ടെന്ന് പൊട്ടിപ്പോവുകയുമില്ല. 

3. വീട്ടിൽ ഒന്നിൽകൂടുതൽ സ്റ്റൂളുകളുണ്ടെങ്കിൽ അവയെല്ലാം ഒരുമിച്ച് അടുക്കി വയ്ക്കാറുണ്ട്. ഇങ്ങനെ വയ്ക്കുമ്പോൾ സ്റ്റൂളുകൾ മുറുകിയിരിക്കുകയും പിന്നീട് ഒന്നിൽ നിന്നും മറ്റൊന്ന് വേർപ്പെടുത്താൻ ബുദ്ധിമുട്ടാവുകയും ചെയ്യുന്നു. എന്നാൽ സ്റ്റൂളിൽ ദ്വാരം ഉള്ളതിനാൽ വായുവിന്റെ മർദ്ദം കുറയ്ക്കാൻ സഹായിക്കുകായും എളുപ്പത്തിൽ സ്റ്റൂൾ വേർപ്പെടുത്താൻ സാധിക്കുകയും ചെയ്യുന്നു.

4. സ്റ്റൂൾ ലൈറ്റ് വെയ്റ്റ് ആയതിനാൽ ദ്വാരത്തിലൂടെ വിരലെത്തിച്ച് എളുപ്പത്തിൽ എവിടേക്ക് വേണമെങ്കിലും മാറ്റുവാനും പിന്നീട് എടുത്ത് ഉപയോഗിക്കാനും സൗകര്യപ്രദമാണിത്. 

5. അതേസമയം ഈ ദ്വാരം കൂടുതൽ വലിപ്പമുള്ളതോ ചെറുതോ ആകാൻ പാടില്ല. വലിപ്പമുള്ളതായാൽ സ്റ്റൂളിന്റെ ഘടനയിൽ മാറ്റങ്ങൾ ഉണ്ടാവുകയും ഇനി ചെറുതാണെങ്കിൽ ഉപയോഗിക്കാൻ ബുദ്ധിമുട്ടാവുകയും ചെയ്യുന്നു

ഷഹബാസ് വധക്കേസിൽ പ്രതികളായ 6 കുട്ടികളുടെയും ജാമ്യാപേക്ഷ തള്ളി കോടതി

0

താമരശ്ശേരി ഷഹബാസ് വധക്കേസിൽ പ്രതികളായ ആറു കുട്ടികളുടെ ജാമ്യാപേക്ഷ കോടതി തള്ളി. ജുവനൈൽ ഹോമിലെ താമസ കാലാവധി 14 ദിവസം കൂടി നീട്ടുകയും ചെയ്തു. കോഴിക്കോട് ജില്ലാ സെഷൻസ് കോടതിയാണു ജാമ്യാപേക്ഷ തള്ളിയത്. നേരത്തെ ജുവനൈൽ ജസ്റ്റിസ് ബോർഡ് ജാമ്യാപേക്ഷ തള്ളിയതോടെയാണ് ഇവർ ജില്ലാ കോടതിയെ സമീപിച്ചത്. പ്രായപൂർത്തിയാകാത്തതിനാൽ ജാമ്യം അനുവദിക്കണമെന്ന പ്രതികളായ കുട്ടികളുടെ അഭിഭാഷകരുടെ വാദം കോടതി പൂർണമായും തള്ളി. ഒന്നര മാസത്തോളമായി ജുവനൈൽ ഹോമിൽ കഴിയുകയാണെന്നും ഇതു കുട്ടികളുടെ മാനസികാവസ്ഥയെ സാരമായി ബാധിക്കുമെന്നും കോടതിയെ ബോധിപ്പിച്ചിരുന്നു. കഴിഞ്ഞ ദിവസം ജാമ്യാപേക്ഷ പരിഗണിച്ച കോടതി വിധി ഇന്നത്തേക്ക് മാറ്റി വയ്ക്കുകയായിരുന്നു

ജാമ്യം നൽകരുതെന്നും പ്രായപൂർത്തിയാകാത്ത കാര്യം കേസിൽ പരിഗണിക്കരുതെന്നും പ്രോസിക്യൂഷനും ഷഹബാസിന്റെ കുടുംബവും ആവശ്യപ്പെട്ടിരുന്നു. ഇവരെ പുറത്തുവിട്ടാൽ സമൂഹത്തിനു തെറ്റായ സന്ദേശമാകും നൽകുന്നത്. കൃത്യമായി ആസൂത്രണം ചെയ്തു നടത്തിയ കൊലപാതകമാണ്. ജാമ്യം കിട്ടി പുറത്തിറങ്ങിയാൽ ഇവർ സാക്ഷികളെ സ്വാധീനിക്കുന്നതുൾപ്പെടെയുള്ള കാര്യങ്ങളിലേക്കു നീങ്ങുമെന്നും കോടതിയെ അറിയിച്ചിരുന്നു.പൊലീസും ജാമ്യം നൽകുന്നതിനെ എതിർത്തു. കുട്ടികളെ പുറത്തുവിട്ടാൽ അത് അവരുടെ സുരക്ഷയ്ക്കു തന്നെ ഭീഷണിയാകാൻ ഇടയുണ്ടെന്ന് പൊലീസ് അറിയിച്ചു. ഇതോടെ കോടതി ജാമ്യാപേക്ഷ തള്ളുകയായിരുന്നു. ഫെബ്രുവരി 28നാണു താമരശേരിയിൽ വിദ്യാർഥികൾ തമ്മിൽ ഏറ്റുമുട്ടിയത്. നഞ്ചക്കുകൊണ്ടുള്ള അടികൊണ്ട് ഷഹബാസിനു തലയ്ക്കു ഗുരുതരമായി പരുക്കേറ്റു. മാർച്ച് ഒന്നിന്‌ കോഴിക്കോട് മെഡിക്കൽ കോളജ് ആശുപത്രിയിൽ ചികിത്സയിലിരിക്കെയാണ് ഷഹബാസ് മരിച്ചത്.

കൊവിഡ് ബാധിതയെ ആംബുലന്‍സിൽ പീഡിപ്പിച്ച കേസ്; പ്രതിക്ക് ജീവപര്യന്തം തടവ് ശിക്ഷ

0

 പത്തനംതിട്ടയിൽ കൊവിഡ് ബാധിതയെ ആംബുലൻസിൽ പീഡിപ്പിച്ച കേസിൽ പ്രതിക്ക് ജീവപര്യന്തം തടവ് ശിക്ഷ വിധിച്ച് കോടതി. കായംകുളം സ്വദേശി നൗഫിലിനെയാണ് ജീവപര്യന്തം തടവിന് പത്തനംതിട്ട കോടതി ശിക്ഷിച്ചത്.  ജീവപര്യന്തം തടവ് ശിക്ഷയ്ക്ക് പുറമെ 1,08000 രൂപ പിഴയും കോടതി വിധിച്ചു. ആറു വകുപ്പുകളിലായാണ് കോടതി ശിക്ഷ പുറപ്പെടുവിച്ചിരിക്കുന്നതെന്നും ഏറെ സങ്കീര്‍ണമായ അന്വേഷണമാണ് കൊവിഡ് കാലത്ത് നടന്നതെന്നും സമയബന്ധിതമായി കുറ്റപത്രം നൽകിയെന്നും കോടതി ഉത്തരവിനുശേഷം പത്തനംതിട്ട അഡീഷണൽ എസ്‍പി ആര്‍ ബിനു പറഞ്ഞു.

പത്തനംതിട്ട പ്രിന്‍സിപ്പൽ സെഷൻസ് കോടതിയാണ് ശിക്ഷ വിധിച്ചത്. സമൂഹ മനസാക്ഷിയെ ഏറെ ‌ഞെട്ടിച്ച കേസിലാണ് കോടതിയുടെ ശിക്ഷാവിധി പുറത്തുവന്നത്. കേസിലെ പ്രതിയായ കായംകുളം സ്വദേശിയായ ആംബുലന്‍സ് ഡ്രൈവര്‍ നൗഫൽ കുറ്റക്കാരനാണെന്ന് കോടതി കഴിഞ്ഞ ദിവസം വിധിച്ചിരുന്നു. 2020 സെപ്റ്റംബര്‍ അഞ്ചിനാണ് കൊവിഡ് രോഗിയെ ആംബുലന്‍സിൽ വെച്ച് നൗഫൽ പീഡിപ്പിച്ചത്.

കൊവിഡ് കെയർ സെന്‍ററിലേക്ക് കൊണ്ടുപോകുന്നതിനിടെയാണ് യുവതിയെ നൗഫൽ പീഡിപ്പിച്ചത്.  രോഗബാധിതയായ യുവതിയെ കൊവിഡ് കെയർ സെന്‍ററിലേക്ക് കൊണ്ടുപോകേണ്ടതിനു പകരം ആറന്മുളയിലെ ആളൊഴിഞ്ഞ സ്ഥലത്തേക്ക് തട്ടിക്കൊണ്ടുപോയി പീഡിപ്പിച്ചെന്നാണ് പ്രോസിക്യൂഷൻ കേസ്. പീഡന ശേഷം പ്രതി ക്ഷമാപണം നടത്തിയത് യുവതി മൊബൈലിൽ ചിത്രീകരിച്ചിരുന്നു. ഇത് കേസിൽ നിർണായക തെളിവായി.

കനിവ് 108 ആംബുലൻസ് ഡ്രൈവറായിരുന്നു നൗഫൽ. 19കാരിയായ പെൺകുട്ടിയുമായി ഇയാൾ ഒറ്റയ്ക്കാണ് അടൂരിലേക്ക് പോയത്. വഴിമധ്യേ ആംബുലൻസ് ആറന്മുളയിലെ ഒഴിഞ്ഞ സ്ഥലത്തേക്ക് തിരിച്ചുവിട്ടു. ഇവിടെ വച്ചായിരുന്നു പീഡനം. പിന്നീട് ആശുപത്രിയിലെത്തിച്ചു.

ആശുപത്രിയിലെത്തിയ ഉടനെ പെൺകുട്ടി പീ‍ഡന വിവരം വെളിപ്പെടുത്തി. തെളിവ് പൊലീസിന് കൈമാറുകയും ചെയ്തു.  പ്രതിയെ ഉടൻ അറസ്റ്റ് ചെയ്യുകയും ജോലിയിൽ നിന്ന് പിരിച്ചുവിടുകയും ചെയ്തിരുന്നു. ഹൈക്കോടതി നിർദേശപ്രകാരം കേസിലെ വിചാരണ പൂർണ്ണമായും വീഡിയോയിൽ പകർത്തി രഹസ്യ പാസ് വേ‍ഡ് ഉപയോഗിച്ച് സൂക്ഷിച്ചിട്ടുണ്ട്.

മോഷണക്കേസ് പ്രതിയെ പിടികൂടാനെത്തി; വീട്ടിൽ വെച്ച് യുവാവും ഉമ്മയും ചേർന്ന് പൊലീസുകാരെ വെട്ടി പരിക്കേൽപ്പിച്ചു

0

മുക്കം:പ്രതിയെ പിടിക്കാൻ എത്തിയ പൊലീസുകാർക്ക് കോഴിക്കോട് കാരശ്ശേരി വലിയ പറമ്പിൽ വെച്ച് വെട്ടേറ്റു. വയനാട് എസ് പിയുടെ സ്ക്വഡ് അംഗങ്ങളായ ശാലു , നൗഫൽ എന്നിവർക്കാണ് വെട്ടേറ്റത്. വയനാട് കൽപ്പറ്റയിൽനിന്നും മോഷണം പോയ കാർ മോഷണ കേസിലെ പ്രതിയായ കാരശ്ശേരി വലിയ പറമ്പ് സദേശി അർഷാദും ഉമ്മയുമാണ് പൊലീസുകാരെ വെട്ടിപരിക്കേൽപ്പിച്ചത്.

പ്രതിയുടെ കോഴിക്കോട് കാരശ്ശേരിയിലെ വീട്ടിൽ വെച്ചാണ് പൊലീസുകാരെ ആക്രമിച്ചത്. രണ്ടു പേരുടെയും കൈക്കാണ് വെട്ടേറ്റത്. മൂന്നു പൊലീസുകാരാണ് പ്രതിയെ പിടികൂടാനെത്തിയത്. സംഘത്തിലുണ്ടായിരുന്ന വിപിൻ എന്ന പോലീസുകാരൻ കുറച്ച് ദൂരെയായതിനാൽ ആക്രമണത്തിൽ നിന്ന് രക്ഷപ്പെട്ടു. പരിക്കേറ്റ പൊലീസുകാരെ ആശുപത്രിയിൽ പ്രവേശിപ്പിച്ചു. ഒരു പൊലീസുകാരന്‍റെ തലയ്ക്കും കൈയ്ക്കുമടക്കം ഗുരുതരമായി പരിക്കേറ്റു. മറ്റൊരാളുടെ കൈയ്ക്കാണ് വെട്ടേറ്റത്.

പോലീസിന്റെ ഡ്രോൺ നിരീക്ഷണം 16 കഞ്ചാവ് ചെടികൾ കണ്ടെത്തി

0

രാമനാട്ടുകര : ലഹരിക്കടത്തും ഉപയോഗവും തടയാൻ ആകാശ‘ക്കണ്ണു’മായി പോലീസിന്റെ ഫറോക്ക് സബ്ഡിവിഷൻ ഡ്രോൺ നിരീക്ഷണംതുടങ്ങി. നിരീക്ഷണത്തിനിടെ നഗരമധ്യത്തിൽനിന്ന് 16 കഞ്ചാവ് ചെടികൾ കണ്ടെത്തി. ഒൻപതാം മൈൽസിൽ കണ്ടായി പെട്രോൾപമ്പിനു സമീപത്തെ ആളൊഴിഞ്ഞ പറമ്പിലാണ് കഞ്ചാവ് ചെടികൾ കണ്ടെത്തിയത്.രാമനാട്ടുകര ലോറിപാർക്കിങ് മേഖലകൾ, ബസ്‌സ്റ്റാൻഡ് പരിസരം, പെരുമുഖം റോഡിനോട് ചേർന്നുള്ള ആളൊഴിഞ്ഞ മേഖലകൾ, മേൽപ്പാലത്തിനു സമീപത്തുള്ള ഒഴിഞ്ഞപറമ്പുകൾ എന്നിവിടങ്ങളിലാണ് പരിശോധന നടത്തിയതെന്ന് അസി. കമ്മിഷണർ എ.എം. സിദ്ദീഖ് പറഞ്ഞു.ഫറോക്ക് ഇൻസ്പെക്ടർ ടി.എസ്. ശ്രീജിത്ത്, എസ്ഐമാരായ ആർ.എസ്. വിനയൻ, വർഷ മധു, സ്പെഷ്യൽ ബ്രാഞ്ച് എസ്ഐ പി.സി. സുജിത്ത്, എഎസ്ഐ പ്രതീഷ്, സിപിഒമാരായ, ശാന്തനു, സുകേഷ്, സുമേഷ്, മധുസൂദനൻ മണക്കടവ്, സനീഷ്, പ്രജിത്ത്, സ്പെഷ്യൽ ബ്രാഞ്ചിലെ ഡ്രോൺ സ്പെഷ്യലിസ്റ്റുമാരായ എം. സന്തോഷ്‌ കുമാർ, വി. വിപിൻദാസ് തുടങ്ങിയവരാണ് സംഘത്തിൽ ഉണ്ടായിരുന്നത്.