കൊയിലാണ്ടി: പാചകം ചെയ്യുന്നതിനിടെ പ്രഷർ കുക്കർ പൊട്ടിത്തെറിച്ച് യുവതിക്ക് പരിക്ക്. കുറുവങ്ങാട് സ്വദേശിനിക്കാണ് പരിക്കേറ്റത്. ഇന്ന് രാവിലെ 8.10 ഓടെയായിരുന്നു അപകടം.വീട്ടിലെ അടുക്കളയിൽ പാചകം ചെയ്യുന്നതിനിടെ ഗ്യാസ് അടുപ്പിൽ വച്ച പ്രഷർ കുക്കർ പൊട്ടിത്തെറിക്കുകയായിരുന്നു. തൊട്ടടുത്തുണ്ടായിരുന്ന അലീഷയുടെ മുഖത്തേക്ക് കുക്കറിന്റെ വെയ്റ്റ് വന്ന് അടിക്കുകയായിരുന്നു. ഉടൻ തന്നെ യുവതിയെ കൊയിലാണ്ടി താലൂക്ക് ആശുപത്രിയിലെത്തിച്ചു. മൂക്കിന് പരിക്ക് ഗുരുതരമായതിനാൽ അവിടെ നിന്നും യുവതിയെ കോഴിക്കോട് മെഡിക്കൽ കോളേജിലേക്ക് മാറ്റി.
നേപ്പാളിൽ കുടുങ്ങിയവരിൽ കോഴിക്കോട്ടെ വിനോദയാത്ര സംഘവും; എല്ലാവരും സുരക്ഷിതർ..
ഉളേളരി (കോഴിക്കോട്): മിന്നൽ പ്രളയം ദുരന്തംവിതച്ച നേപ്പാളിൽ കുടുങ്ങിയ ഉളേള്യരിയിൽ നിന്നുള്ള വിനോദയാത്രാ സംഘം സുരക്ഷിതർ. ഇക്കഴിഞ്ഞ 21നാണ് സ്ത്രീകളും കുട്ടികളും അടങ്ങുന്ന 42 അംഗ സംഘം നേപ്പാളിലേക്ക് യാത്രതിരിച്ചത്.ബാലുശ്ശേരിയിലെ സ്വകാര്യ ടൂർ ഏജൻസിക്ക് കീഴിലായിരുന്നു യാത്ര. കഴിഞ്ഞ മൂന്ന് ദിവസമായി നേപ്പാളിലെ പ്രധാന നഗരമായ പൊക്രയിൽ ആയിരുന്നു ഇവർ.
വ്യാഴാഴ്ച കാഠ്മണ്ഡുവിലേക്ക് യാത്ര തിരിക്കേണ്ടതായിരുന്നു സംഘം. പ്രളയത്തെ തുടർന്ന് അവിടേക്കുള്ള റോഡ് ഗതാഗതം നിലച്ചിരിക്കുകയാണ്.ബദൽ സൗകര്യമുള്ള റോഡ് സൈന്യത്തിന്റെ രക്ഷാപ്രവർത്തനത്തിന് മാത്രമാണ് ഉപയോഗിക്കുന്നത്. ഇതോടെയാണ് സംഘത്തിന്റെ യാത്ര തടസ്സപ്പെട്ടത്.ഇവർ രണ്ട് ദിവസമായി പൊക്രയിലെ ഹോട്ടലിൽ തുടരുകയാണ്.ടൂർ സംഘത്തിൽ പാചകക്കാർ അടക്കം ഉള്ളതിനാൽ ഭക്ഷണത്തിനും മറ്റും പ്രയാസങ്ങൾ ഇല്ലെന്നും ഗതാഗതം പുനഃസ്ഥാപിക്കുന്ന മുറക്ക് നാട്ടിലേക്ക് യാത്രത തിരിക്കാനാവുമെന്നാണ് പ്രതീക്ഷയെന്നും സംഘത്തിലുള്ള ഉളേളരി മാമ്പൊയിൽ സ്വദേശി രഞ്ജിത്ത് മാസ്റ്റർ പറഞ്ഞു.
ചരിത്രത്തിൽ ആദ്യം! സഭയില് മുഖ്യമന്ത്രിയുടെ കസേര വിട്ട് മന്ത്രിമാര്ക്കിടയിലിരുന്ന് ജോസഫ് വിജയ്
ചെന്നൈ: നിയമസഭയില് മുഖ്യമന്ത്രിയുടെ സീറ്റില് നിന്ന് മാറി മന്ത്രിമാര്ക്കൊപ്പം ഇരുന്ന് തമിഴ്നാട് മുഖ്യമന്ത്രി സി ജോസഫ് വിജയ്. വ്യാഴാഴ്ചയാണ് നിയമസഭയില് അത്യപൂര്വമായ സംഭവമുണ്ടായത്. മന്ത്രിമാര്ക്കൊപ്പം ആദ്യ നിരയില് നിലയുറപ്പിച്ച വിജയ് പരമ്പരാഗത രീതികളെ മറികടക്കുകയായിരുന്നു. സാധാരണയായി, സ്പീക്കറുടെ ഇരിപ്പിടത്തിന് തൊട്ടടുത്ത് മുഖ്യമന്ത്രിക്ക് പ്രത്യേകവും വിശാലവുമായ ഒരു ഇരിപ്പിടമാണുള്ളത്. മന്ത്രിമാര് അദ്ദേഹത്തിന് തൊട്ടടുത്ത്, മുന്നിരയില് തങ്ങളുടെ പദവികളുടെ മുൻഗണന അനുസരിച്ച് പ്രത്യേകം ഇരിക്കുന്നതാണ് രീതി.234 അംഗങ്ങളുള്ള സഭയിലെ അംഗബലം അനുസരിച്ച് പ്രതിപക്ഷ നേതാവും വിവിധ നിയമസഭാ കക്ഷി നേതാക്കളും എതിര്വശത്തെ നിരയില് ഇരിക്കുന്നു. ഇവരുടെ പിന്നിലായി അതത് പാര്ട്ടിയിലെ അംഗങ്ങളും ഇരിക്കുന്നു. ഉച്ചയ്ക്കുശേഷമുള്ള സമ്മേളനത്തിനിടെ, സ്പീക്കര് ജെസിഡി പ്രഭാകറിന്റെ വലതുവശത്തുള്ള തന്റെ ഇരിപ്പിടത്തില് നിന്ന് വിജയ് അനായാസം എഴുന്നേറ്റ്, മന്ത്രിമാരായ കെ എ സെങ്കട്ടയ്യന്, ആധവ് അര്ജുന എന്നിവര്ക്കിടയിലായി ചെന്നിരിക്കുകയായിരുന്നു. ചരിത്രത്തിലാദ്യമായാണ് ഒരു മുഖ്യമന്ത്രി സഭയില് മന്ത്രിമാര്ക്കൊപ്പം ഇരിക്കുന്നത് എന്നാണ് വിവരം.
സാധാരണഗതിയില്, മന്ത്രിമാരോ ജനപ്രതിനിധികളോ സഹപ്രവര്ത്തകരുമായി സംസാരിക്കാനായി തങ്ങളുടെ ഇരിപ്പിടങ്ങളില് നിന്ന് അല്പനേരത്തേക്ക് മാറി ഇരിക്കാറുണ്ട്. എന്നാല്, സഹപ്രവര്ത്തകരുമായി സംസാരിക്കാനായി ഒരു മുഖ്യമന്ത്രി തന്റെ ഔദ്യോഗിക ഇരിപ്പിടത്തില് നിന്ന് മാറി ഇരിക്കുന്നത് ഒരുപക്ഷേ ഇതാദ്യമായാകാം എന്നാണ് നിയമസഭാ വൃത്തങ്ങള് നല്കുന്ന വിവരം.അതേസമയം സഭയില് അംഗങ്ങള് പ്രധാനപ്പെട്ട വിഷയങ്ങള് ഉന്നയിക്കുമ്പോള് ബന്ധപ്പെട്ട വകുപ്പ് സെക്രട്ടറിമാരോട് സഭയില് ഹാജരാകാന് നിര്ദ്ദേശിക്കണമെന്ന് പ്രതിപക്ഷ നേതാവ് ഉദയനിധി സ്റ്റാലിന് ആവശ്യപ്പെട്ടു. ‘മുന് ഡിഎംകെ ഭരണകാലത്ത് കരൂര് സംഭവത്തെക്കുറിച്ച് അന്നത്തെ മുഖ്യമന്ത്രി സംസാരിച്ച കാര്യം സ്പീക്കര് സൂചിപ്പിക്കുകയുണ്ടായി. അന്ന് ഞങ്ങളുടെ നേതാവും മുഖ്യമന്ത്രിയുമായ എം കെ സ്റ്റാലിനും ചീഫ് സെക്രട്ടറിയും വകുപ്പ് സെക്രട്ടറിമാരും സഭയിലുണ്ടായിരുന്നു. എന്നാല് ഇപ്പോള് മുഖ്യമന്ത്രിയും വകുപ്പ് സെക്രട്ടറിമാരും സഭയിലില്ല,’ ഉദയനിധി പറഞ്ഞു. ഇതിന് മറുപടിയായി, സെക്രട്ടറിമാര് തൊട്ടടുത്തുള്ള ‘വാര് റൂമില്’ ഉണ്ടെന്നും അംഗങ്ങളുടെ പ്രസംഗങ്ങള് കുറിച്ച് എടുക്കുന്നുണ്ടെന്നും ആദവ് അര്ജുന പറഞ്ഞു. ഉദയനിധിയുടെ അഭിപ്രായം ശരിവെച്ച സ്പീക്കര്, നിയമസഭാ സമ്മേളന സമയത്ത് മുതിര്ന്ന ഉദ്യോഗസ്ഥരോട് സഭയില് ഹാജരാകാന് നിര്ദ്ദേശം നല്കുമെന്ന് അറിയിച്ചു. നേരത്തെ ചില സര്ക്കാര് പരിപാടികളില് പങ്കെടുത്ത ശേഷമായിരുന്നു മുഖ്യമന്ത്രി സഭയിലെത്തിയത്.
ഇന്ന് ഗുരുദേവ ജയന്തി; ശിവഗിരിയിലും ചെമ്പഴന്തിയിലും വിപുലമായ ചടങ്ങുകള്
തിരുവനനന്തപുരം: ശ്രീനാരായണ ഗുരുവിന്റെ 172-മത് ജയന്തി ആഘോഷം ഇന്ന്. ഗുരുവിന്റെ ജന്മംകൊണ്ട് പവിത്രമായ വയല്വാരം വീട് സ്ഥിതിചെയ്യുന്ന ചെമ്പഴന്തി ഗുരുകുലത്തിലും മഹാസമാധി സ്ഥാനമായ ശിവഗിരിയിലും വിപുലമായ പരിപാടികളാണ് സംഘടിപ്പിച്ചിട്ടുള്ളത്.ചെമ്പഴന്തി ഗുരുകുലത്തില് വൈകിട്ട് 6.30ന് തിരുജയന്തി മഹാസമ്മേളനം മുഖ്യമന്ത്രി വിഡി സതീശന് ഉദ്ഘാടനം ചെയ്യും. വി.മുരളീധരന് എം.എല്.എ അദ്ധ്യക്ഷത വഹിക്കും. ശ്രീനാരായണ ധര്മ്മസംഘം ട്രസ്റ്റ് പ്രസിഡന്റ് സ്വാമി സച്ചിദാനന്ദ ജയന്തി സന്ദേശം നല്കും. ട്രസ്റ്റ് ബോര്ഡ് അംഗം സ്വാമി സൂക്ഷ്മാനന്ദ അനുഗ്രഹ പ്രഭാഷണം നടത്തും. ഡോ. ശശിതരൂര് എം.പി, കെ.യു.ജനീഷ് കുമാര് എം.എല്.എ എന്നിവര് സംസാരിക്കും. രാവിലെ 10ന് ശ്രീനാരായണ ദാര്ശനിക സമ്മേളനം മന്ത്രി ബിന്ദുകൃഷ്ണ ഉദ്ഘാടനം ചെയ്യും. തിരുവനന്തപുരം നഗരസഭ മേയര് വി.വി.രാജേഷ് അദ്ധ്യക്ഷത വഹിക്കും. ശ്രീനാരായണ ധര്മ്മസംഘം ട്രസ്റ്റ് മുന് ജനറല് സെക്രട്ടറി സ്വാമി ഋതംഭരാനന്ദയും ശ്രീനാരായണഗുരു വിശ്വസംസ്കാരഭവന് സെക്രട്ടറി സ്വാമി ശങ്കരാനന്ദയും പ്രഭാഷണം നടത്തും.
ശിവഗിരിയിലെ തിരുജയന്തി സമ്മേളനം രാവിലെ 9.30ന് നിയമസഭാ സ്പീക്കര് തിരുവഞ്ചൂര് രാധാകൃഷ്ണന് ഉദ്ഘാടനം ചെയ്യും. വിവിധ പുസ്തകങ്ങളുടെ പ്രകാശനവും വിപുലമായ ഘോഷയാത്രയും അടക്കം പരിപാടികളും ചതയ ദിനാഘോഷത്തിന്റെ ഭാഗമായി ഒരുക്കിയിട്ടുണ്ട്. സ്വാമി ശുഭാംഗാനന്ദ, സ്വാമി ശാരദാനന്ദ, അടൂര് പ്രകാശ് എം.പി, വി.ജോയ് എം.എല്.എ, വര്ക്കല നഗരസഭാ ചെയര്പേഴ്സണ് ഗീതാഹേമചന്ദ്രന് തുടങ്ങിയവര് പങ്കെടുക്കും.11.30ന് ശ്രീനാരായണധര്മ്മ ചര്ച്ചാസമ്മേളനം മന്ത്രി എം.ലിജു ഉദ്ഘാടനം ചെയ്യും. സ്വാമി സച്ചിദാനന്ദ അദ്ധ്യക്ഷത വഹിക്കും. സ്വാമി ശുഭാംഗാനന്ദ, സ്വാമി ശാരദാനന്ദ, സ്വാമി അംബികാനന്ദ, ബി.ബി.ഗോപകുമാര് എം.എല്.എ തുടങ്ങിയവര് സംസാരിക്കും.വൈകിട്ട് 5ന് പുറപ്പെടുന്ന വര്ണാഭമായ ഘോഷയാത്രയില് എഴുന്നള്ളിക്കുന്ന ഗുരുദേവ റിക്ഷയ്ക്ക് അകമ്പടിയായി പഞ്ചവാദ്യം, മുത്തുക്കുടകള്, ഗുരുദേവ വിഗ്രഹം വഹിക്കുന്ന കമനീയമായ രഥം, ശിങ്കാരിമേളം, കലാരൂപങ്ങള്, ഗുരുദേവദര്ശനത്തെ ആസ്പദമാക്കിയുള്ള പ്ലോട്ടുകള് തുടങ്ങിയവ അണിനിരക്കും
നേപ്പാളിലെ മിന്നൽ പ്രളയം: മരണസംഖ്യ ഇതുവരെ 392 ആയി; ഭോട്ടെ കോശി നദിയിൽ വീണ്ടും പ്രളയ മുന്നറിയിപ്പ്
കാഠ്മണ്ഡു: നേപ്പാളിലുണ്ടായ മിന്നൽ പ്രളയത്തിൽ മരണസംഖ്യ ഉയരുന്നു. ഇതുവരെ 392 മൃതദേഹങ്ങൾ കണ്ടെത്തയതായാണ് ഔദ്യോഗിക വിശദീകരണം. 1400ലേറെപ്പോരെ കാണാതായിട്ടുണ്ടെന്നും അധികൃതർ അറിയിച്ചു. മണ്ണിടിച്ചിലിനെ തുടർന്നുണ്ടായ അതിശക്തമായ വെള്ളപ്പാച്ചിൽ പ്രദേശത്തെ പട്ടണങ്ങളിലും താഴ്വരകളിലും വൻ നാശനഷ്ടമാണ് വിതച്ചത്. പ്രതികൂല സാഹചര്യത്തിലും രക്ഷാപ്രവർത്തനം പുരോഗമിക്കുകയാണ്. ഇതിനിടെ ഭോട്ടെ കോശി നദിയിൽ വീണ്ടും പ്രളയ മുന്നറിപ്പ് നൽകിയിട്ടുണ്ട്. ഇത് രക്ഷാപ്രവർത്തനത്തെ പ്രതിസന്ധിയിലാക്കിയിട്ടുണ്ട്. ചൈന– നേപ്പാൾ അതിർത്തിക്ക് സമീപം നദിയുടെ ഒഴുക്ക് തടഞ്ഞ് തടയണ രൂപപ്പെട്ടു. ഈ തടയണ ഏത് സമയവും പൊട്ടാം എന്നാണ് മുന്നറിയിപ്പ് നൽകിയിട്ടുള്ളത്. 30 ലക്ഷം ഘനമീറ്റർ വെള്ളം കൂടി ഉടൻ തടാകത്തിലേക്ക് എത്തും. നദീ തീരത്തുള്ളവർക്ക് ജാഗ്രത നിർദേശം നൽകിയിട്ടുണ്ട്.അപകടത്തെ തുടർന്ന് 290 ഇന്ത്യാക്കാരെ കാണാതായതായാണ് അധികൃതർ അറിയിക്കുന്നത്. ദുരന്തത്തിൽ കാണാതായവരിൽ 796പേരെ രക്ഷപ്പെടുത്തിയെന്നും ഇതിൽ 50ഓളം പേർ വിദേശികളാണെന്നുമാണ് നേപ്പാൾ പൊലീസ് അറിയിക്കുന്നത്. നേപ്പാൾ അധികൃതർ നൽകുന്ന വിവരം അനുസരിച്ച് ഏതാണ് 910 ആളുകളെയാണ് അപകടതത്തിൽ കാണാതായിരിക്കുന്നത്. ടിബറ്റിലെ അധികൃതർ 558പേരെ കാണാതായതായി എന്ന വിവരമാണ് പങ്കുവെയ്ക്കുന്നത്. ദുരന്തത്തെ തുടർന്ന് നേപ്പാളിലും ടിബറ്റിലുമായി ഏതാണ്ട് 1468 പേരെ കാണാതായി എന്നാണ് ഔദ്യോഗികമായി ലഭിക്കുന്ന വിവരം.
ഇതിനിടെ കാണാതായവരിൽ 84 പേരെ ഇന്ത്യ രക്ഷിച്ചിട്ടുണ്ട്. ഇതിൽ 63 പേർ തൃശ്ശൂലി നദിയിലെ ഹൈഡ്രോളിക് പ്രോജക്ടിലെ തൊഴിലാളികളാണ്. ഇതിൽ 21 പേർ തമിഴ്നാട് സ്വദേശികളാണ്. ഇതിനിടെ ഇന്ത്യ നേപ്പാളിലേയ്ക്ക് 47.5 ടൺ ദുരിതാശ്വാസ സാമഗ്രികൾ അയച്ചിട്ടുണ്ട്. ബുധനാഴ്ച 10 ടൺ സാമഗ്രികൾ അയച്ചതിന് പിന്നാലെ കഴിഞ്ഞ ദിവസം 37.5 ടൺ സാമഗ്രികൾ കൂടി അയക്കുകയായിരുന്നു.4.4 തീവ്രത രേഖപ്പെടുത്തിയ ഭൂചലനമെന്ന് ആദ്യം കരുതിയ ദുരന്തം യഥാർഥത്തിൽ ഹിമാനിയിലെ പാറയും മഞ്ഞും പെട്ടെന്ന് തകർന്നുവീണതിനെ തുടർന്ന് ഉണ്ടായ ഭൂകമ്പസമാനമായ ചലനമായിരുന്നുവെന്ന് അമേരിക്കൻ ജിയോളജിക്കൽ സർവേ (യു.എസ്.ജി.എസ്.) വ്യക്തമാക്കിയിട്ടുണ്ട്. ഇതിന് പിന്നാലെ വൻതോതിലുള്ള മണ്ണും പാറയും കലർന്ന ഒഴുക്കും ഉണ്ടായി. പ്ലാനറ്റ് ലാബ്സ് നടത്തിയ പ്രാഥമിക ഉപഗ്രഹചിത്ര വിശകലനത്തിൽ, മഞ്ഞും പാറയും ഉൾപ്പെട്ട വൻ മണ്ണിടിച്ചിലാണ് ല്ഹെൻഡെ നദിയിലൂടെ അവശിഷ്ടങ്ങൾ നിറഞ്ഞ ശക്തമായ വെള്ളപ്പാച്ചിലിന് കാരണമായതെന്ന് കണ്ടെത്തി. നേപ്പാൾ-ചൈന അതിർത്തിയിലെ റാസുവാഗാധി അതിർത്തി ചെക്ക്പോസ്റ്റിൽ നിന്ന് ഏകദേശം 20 കിലോമീറ്റർ വടക്കുകിഴക്കായാണ് ഈ ദുരന്തം ഉണ്ടായത്.ബുധനാഴ്ച പുലർച്ചെയായായിരുന്നു നേപ്പാളിലെ ടിബറ്റൻ അതിർത്തിക്കടുത്ത് മിന്നൽപ്രളയമുണ്ടായത്. മഞ്ഞുമല ഇടിഞ്ഞുവീണതാണ് പ്രളയത്തിന് കാരണമായതെന്ന് നേപ്പാൾ ദുരന്തനിവാരണ അതോറിറ്റിയുടെ പ്രാഥമിക വിലയിരുത്തൽ. ഗ്രാമങ്ങളും നൂറുകണക്കിന് ട്രക്കുകളും ഒലിച്ചുപോയ പ്രളയത്തിൽ നേപ്പാളിലെ ഒരു ഡസനോളം ജലവൈദ്യുത പദ്ധതികൾ തകരാറിലായിട്ടുണ്ട്.
മാടാക്കര പള്ളിയിൽ പൊലീസ് കയറിയ സംഭവം; ചോമ്പാല എസ്എച്ച്ഒ ഉൾപ്പടെ 5 പൊലീസുകാരെ സ്ഥലംമാറ്റി
വടകര: മാടാക്കര പള്ളിയിൽ പൊലീസ് കയറിയ സംഭവത്തിൽ നടപടിയുമായി ആഭ്യന്തരവകുപ്പ്. ചോമ്പാല എസ്എച്ച്ഒ ഷെമീലിനെ കോഴിക്കോട് റൂറൽ ആസ്ഥാനത്തേക്ക് സ്ഥലം മാറ്റി. ചോമ്പാല പൊലീസ് സ്റ്റേഷനിലെ മറ്റ് 4 പേരെയും സ്ഥലംമാറ്റി. അതേസമയം, ചേരിതിരിഞ്ഞ് ഏറ്റുമുട്ടിയ സംഭവത്തിൽ നാലുപേർക്കെതിരെ പൊലീസ് കേസെടുത്തു.മനോജൻ എംവി, അനിൽ കുമാർ എൻപി, മനോജ് കുമാർ കെഎം, പ്രവീൺ കുമാർ സി എന്നിവരെയാണ് കോഴിക്കോട് റൂറൽ ആസ്ഥാനത്തേക്ക് സ്ഥലം മാറ്റിയത്. പയ്യോളി എസ്എച്ച്ഒ ജയ്മോൻ പിജെയെ ചോമ്പാല എസ്എച്ച്ഒ ആയി നിയമിച്ചു.പയ്യോളി സ്റ്റേഷനിലെ ജയദാസൻ എംകെയെ പയ്യോളി എസ്എച്ച്ഒ ആയും നിയമിച്ചു.കഴിഞ്ഞ ചൊവ്വാഴ്ച രാത്രി പ്രാർഥനയ്ക്കിടെയാണ് അനിഷ്ട സംഭവങ്ങൾ ഉണ്ടായത്. തുടർന്ന് പൊലീസ് അവിടെ എത്തി സംഭവത്തിൽ ഇടപെട്ടു. പള്ളിക്കുള്ളിൽ പൊലീസ് കയറുകയും ചെയ്തു. പിന്നാലെ ഇത് വിവാദമാകുകയായിരുന്നു
കോഴിക്കോട് ബീച്ചിൽ ട്രാഫിക് നിയന്ത്രണം ശക്തമാക്കി പോലീസ്; നടപ്പാതയിലെ പാർക്കിങ്ങിന് പിഴ ചുമത്തും.
കോഴിക്കോട്: ബീച്ചിലെത്തുന്ന സന്ദർശകർ ട്രാഫിക് കുരുക്കിൽപ്പെടുന്നത് ഒഴിവാക്കുന്നതിനായി കോഴിക്കോട് സിറ്റി പോലീസ് കർശന നിയന്ത്രണങ്ങൾ ഏർപ്പെടുത്തി. ബീച്ചിലെ നടപ്പാതകളിൽ വാഹനങ്ങൾ കയറ്റി പാർക്ക് ചെയ്യുന്നവർക്കെതിരെ ഉയർന്ന പിഴ ചുമത്തുമെന്നും, റോഡ് ഗതാഗതം തടസ്സപ്പെടുത്തുന്ന രീതിയിലുള്ള വഴിയോര കച്ചവടങ്ങൾ പൂർണ്ണമായി നിരോധിച്ചതായും പോലീസ് അറിയിച്ചു. സന്ദർശകർക്കായി ഒരുക്കിയിട്ടുള്ള സൗജന്യ പാർക്കിങ് സൗകര്യങ്ങൾ പരമാവധി പ്രയോജനപ്പെടുത്താനും പോലീസ് നിർദ്ദേശിച്ചിട്ടുള്ള ട്രാഫിക് നിയന്ത്രണങ്ങൾ കർശനമായി പാലിക്കാനും കോഴിക്കോട് സിറ്റി പോലീസ് അഭ്യർത്ഥിച്ചു.
എന്റെ ജീവിത മാർഗം തകർത്തു; മരണത്തിന് ഉത്തരവാദി MVD’, വാഹനത്തിന് ഫിറ്റ്നസ് സർട്ടിഫിക്കറ്റ് ലഭിക്കാത്തതിൽ മനംനൊന്ത് ഓട്ടോ ഡ്രൈവർ ജീവനൊടുക്കി
മലപ്പുറം: ഫിറ്റ്നസ് സര്ട്ടിഫിക്കറ്റ് നല്കാത്തതിനെ തുടര്ന്ന് മലപ്പുറത്ത് ഓട്ടോ ഡ്രൈവര് ജീവനൊടുക്കിയ സംഭവത്തില് റിപ്പോര്ട്ട് നല്കി ഗതാഗത കമ്മീഷണര്. സുരക്ഷാ വീഴ്ച മൂലമാണ് ഫിറ്റ്നസ് സര്ട്ടിഫിക്കറ്റ് നിരസിച്ചതെന്നാണ് മന്ത്രിക്ക് നല്കിയ റിപ്പോര്ട്ടില് പറയുന്നത്. വാഹനത്തിലെ അനധികൃത മാറ്റങ്ങള് നീക്കാന് അസിസ്റ്റന്റ് മോട്ടോര് വെഹിക്കിള് ഇന്സ്പെക്ടര് നിര്ദേശിച്ചിരുന്നുവെന്നും റിപ്പോര്ട്ടിലുണ്ട്.2025 നവംബറിന് ശേഷം ഓട്ടോ സിഎഫ് ടെസ്റ്റിനായി എത്തിച്ചിട്ടില്ലെന്ന് ഗതാഗത കമ്മീഷണറുടെ റിപ്പോര്ട്ട് പറയുന്നു. 2025 നവംബര് 11ലെ പരിശോധനയ്ക്ക് ശേഷം മാറ്റങ്ങള് വരുത്തി വീണ്ടും ഫിറ്റ്നസ് ടെസ്റ്റിനായി ആര്ടി ഓഫീസില് എത്തിച്ചിട്ടില്ല. ഉദ്യോഗസ്ഥര്ക്കും ഏജന്റുമാര്ക്കും എതിരെയുള്ള ആരോപണത്തില് വകുപ്പുതല അന്വേഷണം തുടരുകയാണ്. വീഡിയോയിലുള്ള എഎംവിഐ പ്രേംകുമാറിനെ 2026 മാര്ച്ച് 16ന് രാമനാട്ടുകര സബ് ആര്ടിഒയിലേക്ക് സ്ഥലം മാറ്റിയിരുന്നു. സംഭവത്തില് പൊലീസും സമാന്തര അന്വേഷണം നടത്തുന്നുണ്ടെന്നും മുമ്പ് ആര്ടി ഓഫീസിലടക്കം ഷൗക്കത്ത് മറ്റ് പരാതികള് ഒന്നും നല്കിയിരുന്നില്ലെന്നും ഗതാഗത കമ്മീഷണര് റിപ്പോര്ട്ടില് പറയുന്നു.മലപ്പുറം കീഴിശ്ശേരി മുണ്ടംപറമ്പ് സ്വദേശി ഷൗക്കത്താണ് മോട്ടോര് വാഹന വകുപ്പിനെതിരെ ഗുരുതര ആരോപണങ്ങള് ഉന്നയിച്ച് ജീവനൊടുക്കിയത്. ഓട്ടോയുടെ ഫിറ്റ്നസിനായി ഏജന്റ് വഴിയല്ലാതെ നേരിട്ട് എംവിഡിയെ ബന്ധപ്പെട്ടപ്പോള് നിരന്തരം ഫിറ്റ്നസ് നിഷേധിച്ചെന്നായിരുന്നു ആരോപണം. തന്റെ മരണത്തിന് ഉത്തരവാദി മോട്ടോര് വാഹന വകുപ്പ് ആണെന്ന ഫേസ്ബുക്ക് പോസ്റ്റ് പങ്കുവെച്ചായിരുന്നു ഷൗക്കത്ത് ജീവനൊടുക്കിയത്.
കൈക്കൂലി കൊടുത്തില്ലെന്ന ഏക കാരണം കൊണ്ട് അവര് ജീവിത മാര്ഗം തന്നെ തകര്ത്തു എന്നാണ് ആരോപണം. കഴിഞ്ഞ പത്ത് മാസമായി താന് ഏജന്റ് ഓഫീസുകള് കയറിയിറങ്ങിയെന്നും ഓട്ടോ ഡ്രൈവറുടെ കുറിപ്പില് പറയുന്നുണ്ട്. ഇനി തന്റെ മുന്പില് മറ്റു മാര്ഗങ്ങളില്ലെന്നും അടുത്ത ഇര നിങ്ങളാവരുത് എന്നാണെങ്കില് മരണത്തിന് ശേഷമെങ്കിലും തനിക്ക് നീതി വാങ്ങി തരിക എന്നതാണ് ഒരു ഇന്ത്യന് സിറ്റിസണ് എന്ന നിലയില് നിങ്ങള് ഓരോരുത്തരും ചെയ്യേണ്ടതെന്നും ഫേസ്ബുക്ക് പോസ്റ്റില് പറഞ്ഞിരുന്നു. സിസ്റ്റത്തോടുള്ള പ്രതിഷേധം കൂടിയാണ് ജീവനൊടുക്കാനുള്ള തീരുമാനമെന്നും ഇയാള് പറഞ്ഞു. ഓട്ടോയില് സ്റ്റീല് വര്ക്ക് ഉണ്ടെന്ന് കണ്ടെത്തിയെന്ന് പറഞ്ഞാണ് എംവിഡി ഫിറ്റ്നസ് നിഷേധിച്ചത്. ആഭ്യന്തര മന്ത്രിയും, ഹൈക്കോടതിയും വിഷയത്തില് ഇടപെടണമെന്നാണ് അവസാന ആഗ്രഹമെന്നും കുറിപ്പില് പറയുന്നുണ്ട്. സംഭവത്തില് എംവിഡി ഉദ്യോഗസ്ഥര്ക്കെതിരെ വ്യാപക വിമര്ശനമാണ് ഉയരുന്നത്.
നേപ്പാള് മിന്നല് പ്രളയം; മരണസംഖ്യ 332 ആയി, കാണാതായ 288 ഇന്ത്യക്കാരില് 33 പേര് മലയാളികള്
കാഠ്മണ്ഡു: നേപ്പാളിലെ മിന്നല് പ്രളയത്തില് 288 ഇന്ത്യക്കാരെ കാണാതായതായി വിദേശകാര്യ വക്താവ് രണ്ദീര് ജയ്സ്വാള് അറിയിച്ചു. ഇതില് 33 പേര് മലയാളികളാണ്. പശ്ചിമബംഗാളില് നിന്നുള്ള 32 പേരെയും കാണാതായിട്ടുണ്ട്. തമിഴ്നാട്ടില് നിന്നുള്ള 85 പേരെ കുറിച്ചും വിവരമില്ല. കാണാതായവരില് ഒരുസംഘം ത്രിശൂലി -1 വൈദ്യുത പദ്ധതിയുമായി സഹകരിച്ച് പ്രവര്ത്തിക്കുന്നവരാണ്. മറ്റൊരു സംഘം കൈലാസ് മാനസരോവര് തീര്ത്ഥാടനത്തിനെത്തിയ തമിഴ്നാട്ടുകാരാണ്.
ഇതുകൂടാതെ വിവിധ ഇന്ത്യന് സംസ്ഥാനങ്ങളില് നിന്നുള്ള 61 പേരെയും കേരളത്തില് നിന്നുള്ള 33 പേരെയും ബന്ധപ്പെടാന് കഴിയുന്നില്ലെന്ന് വിദേശകാര്യ മന്ത്രാലയം വ്യക്താക്കി.നേപ്പാളിലെ രാസുവ, നുവാകോട്ട്, ധാഡിങ്, ഗോര്ഖ ജില്ലകളിലാണ് പ്രളയത്തില് വന് നാശനഷ്ടമുണ്ടായിരിക്കുന്നത്. കഴിഞ്ഞദിവസം രാവിലെ 8.30ഓടെ ഭോട്ടേകോശി, ത്രിശൂലി നദികളിലാണ് വെള്ളപ്പൊക്കമുണ്ടായത്. ആശയവിനിമയത്തിനായുള്ള സംവിധാനങ്ങളെല്ലാം പൂര്ണമായും തകര്ന്ന നിലയിലാണ്. മിന്നല് പ്രളയത്തില് മരിച്ചവരുടെ എണ്ണം 332ആയി ഉയര്ന്നു.അതേസമയം 178 ഇന്ത്യക്കാര് ഉള്പ്പെടെ 644 വിനോദസഞ്ചാരികളെ കാണാതായതായാണ് നേപ്പാള് ടൂറിസം ബോര്ഡ് ഔദ്യോഗിക വെബ്സൈറ്റിലൂടെ പുറത്തുവിട്ടിരിക്കുന്ന വിവരം.
ട്രക്കിങ്- ട്രാവല് കമ്പനികള് നല്കിയ വിവരങ്ങളുടെ അടിസ്ഥാനത്തിലാണ് പ്രളയബാധിത പ്രദേശങ്ങളില് നിന്നും 650ഓളം പേരെ കാണാതായെന്ന പ്രാഥമിക റിപ്പോര്ട്ട് പുറത്തുവിട്ടിരിക്കുന്നത്. ട്രാവല് ഏജന്സികള്, ഗൈഡുകള്, പ്രാദേശിക അധികൃതര്, സുരക്ഷാ ഏജന്സികള് എന്നിവയുമായി ചേര്ന്ന് ഈ വിവരം പരിശോധിച്ച് വരികയാണ്. നേപ്പാള് പൗരന്മാര് ഉള്പ്പെടെ 33 രാജ്യങ്ങളില് നിന്നുള്ള ആളുകളാണ് ഇതില് ഉള്പ്പെടുന്നത്.നേപ്പാൾ ടൂറിസം ബോർഡിന്റെ കണക്കുപ്രകാരം കാണാതായവരില് ഏറ്റവും കൂടുതല് പേര് ഇന്ത്യയില് നിന്നുള്ളവരാണ്.
നേപ്പാള്-127, യുഎസ്-65, യുക്രെയ്ന് – 53, മലേഷ്യ -51, ഓസ്ട്രേലിയ- 35, യുകെ- 33, കാനഡ-25, ജര്മനി-8, റഷ്യ-8, സൗത്ത് ആഫ്രിക്ക- 6, ലാത്വിയ-6, ജപ്പാന്-5, ഫ്രാന്സ്-4 എന്നിങ്ങനെയാണ് ഓരോ രാജ്യങ്ങളില് നിന്നും കാണാതായവരുടെ കണക്കുകള്. കുടുങ്ങി കിടക്കുന്നവരെ അടക്കം രക്ഷപ്പെടുത്താനുള്ള നടപടികള് പുരോഗമിക്കുകയാണെന്നും നേപ്പാള് ടൂറിസം ബോര്ഡ് വ്യക്തമാക്കിയിട്ടുണ്ട്.1234 (ടോള് ഫ്രീ എമര്ജന്സി നമ്പര്), 1144 (ഹോട്ട്ലൈന് നമ്പര്), 9851289445 (ടൂറിസം പൊലീസ് സഹായം) എന്നീ നമ്പറുകളില് അത്യാവശ്യ ഘട്ടങ്ങളില് ബന്ധപ്പെടാമെന്നും ടൂറിസം വകുപ്പ് അറിയിച്ചിട്ടുണ്ട്. അതേസമയം വിദേശകാര്യമന്ത്രി എസ് ജയശങ്കര് ഉന്നതതല ഉദ്യോഗസ്ഥരുമായി ചര്ച്ച നടത്തി. വിദേശകാര്യ സെക്രട്ടറിയും കാഠ്മണ്ഡു, ബീജിങ് എന്നിവിടങ്ങളിലെ അംബാസിഡര്മാരും പങ്കെടുത്ത ചര്ച്ചയില് ഇന്ത്യന് പൗരന്മാരുടെ സുരക്ഷ ഉറപ്പാക്കാനുള്ള നടപടിക്രമങ്ങളടക്കം അവലോകനം ചെയ്തു.
അമ്പായത്തോട്ടിലെ ഫ്രഷ് കട്ട് അടച്ചുപൂട്ടും: രേഖാമൂലം ഉറപ്പുലഭിച്ചതായി സമരസമിതി; കേസുകൾ റദ്ദാക്കാനും ധാരണ
കോഴിക്കോട് : താമരശ്ശേരി അമ്പായത്തോട്ടിൽ പ്രവർത്തിക്കുന്ന ഫ്രഷ് കട്ട് ഓർഗാനിക് പ്രോഡക്ട് കോഴിയറവു മാലിന്യ സംസ്കരണ പ്ലാന്റ് 2027 മാർച്ച് മാസത്തോടെ അടച്ചുപൂട്ടാൻ ധാരണ. കമ്പനി അധികൃതർ ഇതുമായി ബന്ധപ്പെട്ട് രേഖാമൂലം ഉറപ്പുനൽകിയതായി സമരസമിതി നേതാക്കൾ അറിയിച്ചു. ഉചിതമായ മറ്റൊരു സ്ഥലം കണ്ടെത്തി പ്ലാന്റ് മാറ്റി സ്ഥാപിക്കാനാണ് ഉടമകളുമായുള്ള ചർച്ചയിൽ ധാരണയായതെന്ന് സമരസമിതി ചെയർമാൻ ബാബു കുടുക്കിൽ മനോരമ ഓൺലൈനോട് പറഞ്ഞു.
കമ്പനിയുടെ പ്രവർത്തനം അവസാനിപ്പിക്കാൻ നേരത്തെ ധാരണയായെങ്കിലും നാലായിരത്തോളം കുടുംബങ്ങളെ ബാധിക്കുന്ന വിഷയത്തിൽ രേഖാമൂലം ഉറപ്പു ലഭിച്ചാൽ മാത്രമേ സമരം അവസാനിപ്പിക്കുകയുളളു എന്ന നിലപാടിലായിരുന്നു സമരസമിതി.2027 മാർച്ച് 31ന് മുൻപായി നിലവിലെ പ്ലാന്റിന്റെ പ്രവർത്തനം നിർത്താനാണ് ഇക്കഴിഞ്ഞ ചൊവ്വാഴ്ച കമ്പനി അധികൃതരുമായി നടത്തിയ ചർച്ചകൾ പ്രകാരം കരാർ ആയതെന്ന് അദ്ദേഹം പറഞ്ഞു. ഒത്തുതീർപ്പ് വ്യവസ്ഥകൾ പ്രകാരം കമ്പനിയിൽ നിലവിൽ കെട്ടിക്കിടക്കുന്ന മാലിന്യങ്ങൾ സംസ്കരിക്കാൻ ഓഗസ്റ്റ് 27 മുതൽ പ്ലാന്റ് താൽക്കാലികമായി പ്രവർത്തിക്കും.
എന്നാൽ പ്രതിദിനം 25 ടൺ മാലിന്യം മാത്രമാകും ഇവിടെ സംസ്കരിക്കുക. ഇത്തരത്തിൽ മാലിന്യം സംസ്കരിക്കുമ്പോൾ ദുർഗന്ധമുണ്ടാകാതിരിക്കാൻ നടപടി സ്വീകരിക്കുമെന്ന് കമ്പനി ഉടമകൾ ഉറപ്പു നൽകിയിട്ടുണ്ട്. ഇത് ലംഘിക്കപ്പെട്ടാൽ ധാരണയിൽ നിന്ന് പിൻമാറുമെന്ന് സമരസമിതി അറിയിച്ചതായും ബാബു കുടുക്കിൽ പറഞ്ഞു.ഓഗസ്റ്റ് എട്ടിന് താമരശ്ശേരിയിൽ എംഎൽഎമാരായ പി.കെ. ഫിറോസ്, സി.കെ.കാസിം, എം.എ. റസാഖ് എന്നിവരുടെ സാന്നിധ്യത്തിലും തുടർന്ന് 19ന് തിരുവനന്തപുരത്ത് വ്യവസായ മന്ത്രി പി.കെ.കുഞ്ഞാലിക്കുട്ടിയുടെ സാന്നിധ്യത്തിൽ നടന്ന ചർച്ചകളുടെ അടിസ്ഥാനത്തിലാണ് സമരസമിതിയും ഫ്രഷ് കട്ട് കമ്പനി പ്രതിനിധികളും തമ്മിൽ ധാരണയിലെത്തിയത്.
ജനവാസമില്ലാത്ത ഒരിടത്തേക്ക് പ്ലാന്റ് മാറ്റുന്നതിനും അതിനുള്ള അനുമതികൾ വേഗത്തിലാക്കാനും ബന്ധപ്പെട്ട സർക്കാർ വകുപ്പുകൾക്ക് നിർദേശം നൽകാനും തീരുമാനമായി.കേസുകൾ റദ്ദാക്കാനും ധാരണഫ്രഷ് കട്ട് സമരവുമായി ബന്ധപ്പെട്ട് സമരസമിതി പ്രവർത്തകർക്കും നാട്ടുകാർക്കും എതിരെ നൽകിയ കേസുകളും ഫ്രഷ് കട്ട് കമ്പനി ഉടമകൾക്കെതിരെ നിലവിലുളള കോടതി കേസുകളും റദ്ദാക്കാനുള്ള നടപടികളിലേക്ക് കടക്കാനും ധാരണയായി. നിലവിൽ മലിനീകരണ നിയന്ത്രണ ബോർഡിന്റെ ഉത്തരവിനെതിരെ ഹൈക്കോടതി നൽകിയ സ്റ്റേ ഓർഡർ പരിഗണിക്കുമ്പോൾ ഇരുഭാഗത്തെയും അഭിഭാഷകർ ഇക്കാര്യം കോടതിയെ ധരിപ്പിക്കും. തുടർസമരങ്ങളിലൂടെ വിവാദത്തിലായ ഫ്രഷ് കട്ട് അറവുമാലിന്യ സംസ്കരണ ഫാക്ടറിക്കെതിരെ സമീപത്തെ മൂന്നു പഞ്ചായത്തുകളിലെ ജനങ്ങളാണ് സമരസമിതി രൂപീകരിച്ച് സമരം നടത്തിവന്നത്.
ഫാക്ടറിയിൽ നിന്ന് മാലിന്യസംസ്കരണത്തിന്റെ ഭാഗമായി അസ്സഹനീയമായ ദുർഗന്ധം ഉണ്ടാകുന്നതായും സമീപത്തെ ഇരുവഞ്ഞിപ്പുഴയിലേക്ക് ഫ്രഷ് കട്ട് കമ്പനിയിൽ നിന്നുള്ള മാലിന്യം എത്തുന്നു എന്നുമായിരുന്നു ആക്ഷേപം ഉയർന്നത്.കഴിഞ്ഞ വർഷം ഒക്ടോബർ 21ന് ഫ്രഷ് കട്ട് മാലിന്യ പ്ലാന്റ് പരിസരത്ത് സമരക്കാരും പൊലീസും ഏറ്റുമുട്ടിയിരുന്നു. നാട്ടുകാർ നടത്തിയ പ്രതിഷേധം സംഘർഷത്തിൽ കലാശിക്കുന്നതിനിടെ ചിലർ പ്ലാന്റിനു തീവയ്ക്കുകയും ഫ്രഷ്കട്ടിന്റെ മാലിന്യ ശേഖരണ വാഹനങ്ങൾക്കു നേരെ കല്ലെറിയുകയും ചെയ്തു. കല്ലേറിൽ റൂറൽ എസ്പി ഉൾപ്പെടെ ഒട്ടേറെ പൊലീസുകാർക്കു പരുക്കേറ്റിരുന്നു. 2019 മുതലാണ് പ്ലാന്റ് താമരശ്ശേരി അമ്പായത്തോട്ടിൽ പ്രവർത്തനം തുടങ്ങിയത്.



