spot_img
Friday, November 20, 2026
Home Blog Page 85

ഓണം 2026: ജില്ലയില്‍ വിപുലമായ ആഘോഷ പരിപാടികള്‍24ന് മന്ത്രി പി.കെ കുഞ്ഞാലിക്കുട്ടി ഉദ്ഘാടനം നിര്‍വഹിക്കും

0

സംസ്ഥാന വിനോദസഞ്ചാര വകുപ്പ്, ഡി.ടി.പി.സി കോഴിക്കോട്, കോഴിക്കോട് ജില്ലാ ഭരണകൂടം എന്നിവയുടെ ആഭിമുഖ്യത്തില്‍ സംഘടിപ്പിക്കുന്ന ജില്ലാതല ഓണാഘോഷത്തിന്റെ ഭാഗമായി ഓഗസ്റ്റ് 22 മുതല്‍ വിവിധ കേന്ദ്രങ്ങളില്‍ വൈവിധ്യമാര്‍ന്ന പരിപാടികള്‍ അരങ്ങേറുമെന്ന് സംഘാടക സമിതി ഭാരവാഹികള്‍ വാര്‍ത്താ സമ്മേളനത്തില്‍ അറിയിച്ചു.ഓഗസ്റ്റ് 24ന് വൈകീട്ട് ആറിന് കോഴിക്കോട് ബീച്ചിലെ പ്രധാന വേദിയില്‍ വ്യവസായം, ഇന്‍ഫര്‍മേഷന്‍ ടെക്‌നോളജി വകുപ്പ് മന്ത്രി പി.കെ കുഞ്ഞാലിക്കുട്ടി ഓണാഘോഷ പരിപാടികളുടെ ഉദ്ഘാടനം നിര്‍വഹിക്കും. കൃഷി വകുപ്പ് മന്ത്രി ടി സിദ്ദീഖ് മുഖ്യാതിഥിയാകും. കോഴിക്കോട് നഗരത്തില്‍ കോഴിക്കോട് ബീച്ച് (ഓഗസ്റ്റ് 24-30), ടൗണ്‍ ഹാള്‍ (ഓഗസ്റ്റ് 25-29), ബട്ട് റോഡ് (ഓഗസ്റ്റ് 25-29), മാനാഞ്ചിറ (ഓഗസ്റ്റ് 25-27) കുറ്റിച്ചിറ (ഓഗസ്റ്റ് 25-27), തളി (ഓഗസ്റ്റ് 25-27) എന്നീ കേന്ദ്രങ്ങളാണ് വേദിയാവുക. നഗരത്തിന് പുറത്ത് 25ന് കോരപ്പുഴയില്‍ ജലോത്സവം, 26ന് അകലാപ്പുഴ, 27ന് കാപ്പാട്, 29ന് ഉള്ളൂര്‍ കടവ് എന്നിവിടങ്ങളില്‍ കയാക്കിങ് ഫെസ്റ്റ് ഉള്‍പ്പെടെയുള്ള പരിപാടികളും നടക്കും. ഓണാഘോഷ വിളംബര ഘോഷയാത്ര ഓഗസ്റ്റ് 23ന് വൈകീട്ട് മൂന്നിന് കോഴിക്കോട് സൗത്ത് ബീച്ച് മുതല്‍ ഫ്രീഡം സ്‌ക്വയര്‍ വരെ നടക്കും.ജില്ലയിലെ തദ്ദേശ സ്വയംഭരണ സ്ഥാപനങ്ങള്‍ക്കുള്ള ‘തദ്ദേശ പൂക്കള മത്സരം 2026’ ആണ് ഓണാഘോഷത്തിന്റെ പ്രധാന ആകര്‍ഷണം. ഗ്രാമപഞ്ചായത്തുകള്‍, ബ്ലോക്ക് പഞ്ചായത്തുകള്‍, മുനിസിപ്പാലിറ്റികള്‍, കോഴിക്കോട് കോര്‍പ്പറേഷന്‍ എന്നിവയുടെ 11 ക്ലസ്റ്ററുകളിലായി 91 തദ്ദേശ സ്വയംഭരണ സ്ഥാപനങ്ങള്‍ മത്സരത്തില്‍ പങ്കെടുക്കും. ഓരോ തദ്ദേശ സ്ഥാപനങ്ങളും അവരുടെ ആസ്ഥാനത്താണ് പൂക്കളങ്ങള്‍ ഒരുക്കുക. മത്സര വിജയികള്‍ക്ക് ആകര്‍ഷകമായ സമ്മാനങ്ങളാണ് നല്‍കുന്നത്. ഒന്ന്, രണ്ട്, മൂന്ന് സ്ഥാനക്കാര്‍ക്ക് യഥാക്രമം ഒരു ലക്ഷം രൂപ, 50000 രൂപ, 25000 രൂപ എന്നിങ്ങനെ ക്യാഷ് പ്രൈസും ട്രോഫിയും സമ്മാനിക്കും. വിവിധ കാറ്റഗറികളില്‍ ഒന്നും രണ്ടും മൂന്നും സ്ഥാനത്തെത്തുന്ന ടീമുകള്‍ക്ക് പ്രത്യേക ട്രോഫിയും സര്‍ട്ടിഫിക്കറ്റും നല്‍കും. പ്ലാസ്റ്റിക്, കൃത്രിമ നിറങ്ങള്‍, സിന്തറ്റിക് വസ്തുക്കള്‍ എന്നിവ പൂര്‍ണമായും ഒഴിവാക്കി 100 ശതമാനം പ്രകൃതിദത്ത വസ്തുക്കള്‍ ഉപയോഗിച്ചാണ് പൂക്കളം ഒരുക്കുക. ഓഗസ്റ്റ് 22ന് രാവിലെ ഒമ്പത് മുതല്‍ ഉച്ചക്ക് 12 വരെയാണ് മത്സരങ്ങള്‍. ഒരു തദ്ദേശ സ്വയംഭരണ സ്ഥാപനത്തില്‍നിന്ന് മൂന്ന് മുതല്‍ അഞ്ച് വരെ അംഗങ്ങള്‍ അടങ്ങുന്ന ടീമിനാണ് മത്സരത്തില്‍ പങ്കെടുക്കാനാകുക.ജില്ലയുടെ സാംസ്‌കാരിക തനിമയും കലാപെരുമയുമെല്ലാം കോര്‍ത്തിണക്കിയാണ് ഇത്തവണത്തെ ഓണാഘോഷ പരിപാടികള്‍ ആസൂത്രണം ചെയ്തിട്ടുള്ളത്. പ്രധാന വേദിയായ കോഴിക്കോട് ബീച്ചില്‍ ഓഗസ്റ്റ് 24ന് തൈക്കൂടം ബാന്‍ഡിന്റെ സംഗീത പരിപാടി അരങ്ങേറും. 25ന് നര്‍ത്തകിയും നടിയുമായ ലക്ഷ്മി ഗോപാലസ്വാമിയും സംഘവും ഒരുക്കുന്ന നൃത്തപരിപാടി, ഹരീഷ് കണാരനും നിര്‍മല്‍ പാലാഴിയും അവതരിപ്പിക്കുന്ന കോമഡി ഷോ, 26ന് നരേഷ് അയ്യരുടെയും സംഘത്തിന്റെയും സംഗീത പരിപാടി, ധ്വനിതരംഗ് കൊച്ചിയുടെ ഡാന്‍സ് പ്രോഗ്രാം, 27ന് ഹരിശങ്കര്‍ ആന്‍ഡ് പാര്‍ട്ടിയുടെ ഗാനമേള, ബിജുല ബാലകൃഷ്ണന്റെ കുച്ചിപ്പുടി എന്നിവ അരങ്ങുണര്‍ത്തും. 28ന് കേരള സര്‍ക്കാരിന്റെ സാംസ്‌കാരിക വിനിമയ കേന്ദ്രമായ ഭാരത് ഭവനും സൗത്ത് സോണ്‍ കള്‍ച്ചറല്‍ സെന്ററും ചേര്‍ന്നൊരുക്കുന്ന പഞ്ചാബ്, രാജസ്ഥാന്‍, ഉത്തര്‍പ്രദേശ്, പശ്ചിമ ബംഗാള്‍, തമിഴ്‌നാട് സംസ്ഥാനങ്ങളിലെ കലാരൂപങ്ങള്‍ കോര്‍ത്തിണക്കിയുള്ള ‘ഇന്ത്യന്‍ വസന്തോത്സവം 2026’ പരിപാടി അരങ്ങേറും. തുടര്‍ന്ന് ഷഹബാസ് അമന്റെ ഗസല്‍ നൈറ്റും ഉണ്ടാകും. 29ന് മധു ബാലകൃഷ്ണന്‍ അവതരിപ്പിക്കുന്ന ഗാനമേളയും സൗഷ്ഠവ അവതരിപ്പിക്കുന്ന നൃത്തപരിപാടിയും അരങ്ങേറും.ഓഗസ്റ്റ് 30ന് സമാപന സമ്മേളനം റവന്യു വകുപ്പ് മന്ത്രി എ പി അനില്‍കുമാര്‍ ഉദ്ഘാടനം ചെയ്യും. തുടര്‍ന്ന് സ്റ്റീഫന്‍ ദേവസ്സിയുടെ സംഗീതപരിപാടിയുണ്ടാകും.ഓഗസ്റ്റ് 25 മുതല്‍ 29 വരെ ഭട്ട് റോഡ് ബീച്ചില്‍ സൂഫി ഡാന്‍സ്, ഗാനമേള, നൃത്തപരിപാടികള്‍ എന്നിവയും ടൗണ്‍ ഹാളില്‍ നാടകവും അരങ്ങേറും. 25 മുതല്‍ 27 വരെ മാനാഞ്ചിറയില്‍ നാടന്‍ കലകള്‍, കുറ്റിച്ചിറയില്‍ ഗസല്‍, കോല്‍ക്കളി, വനിതാ ഗാനമേള, തളിയില്‍ ക്ലാസിക്കല്‍ ഡാന്‍സ്, മ്യൂസിക് എന്നിവയും വേദിയുണര്‍ത്തും. വിനോദസഞ്ചാരവകുപ്പ് അനുവദിച്ച 40 ലക്ഷം രൂപക്ക് പുറമെ വിവിധ വ്യാപാര സ്ഥാപങ്ങളുടെയും സംഘടനകളുടെയും സഹകരണത്തോടെയാണ് പരിപാടി സംഘടിപ്പിക്കുന്നത്.വാര്‍ത്താ സമ്മേളനത്തില്‍ എം.എല്‍.എമാരായ അഡ്വ. കെ ജയന്ത്, അഡ്വ. ഫൈസല്‍ ബാബു, ജില്ലാ പഞ്ചായത്ത് പ്രസിഡന്റ് മില്ലി മോഹന്‍, ജില്ലാ കലക്ടര്‍ എം.എസ് മാധവിക്കുട്ടി, ടൂറിസം വകുപ്പ് ഡെപ്യൂട്ടി ഡയറക്ടര്‍ പ്രദീപ് ചന്ദ്രന്‍, പ്രോഗ്രാം കോഓഡിനേറ്റര്‍ അഡ്വ. നിയാസ്, ഫൈനാന്‍സ് കണ്‍വീനര്‍ സുബ്രഹ്‌മണ്യന്‍ തുടങ്ങിയവര്‍ പങ്കെടുത്തു.

ഓപ്പറേഷൻ തൂഫാൻ: അറസ്റ്റ് 10,015 കടന്നു, ഏറ്റവും കൂടുതൽ കേസുകൾ കോഴിക്കോട്.

0

കോഴിക്കോട്: ഓപ്പറേഷൻ തൂഫാന്റെ ഭാഗമായി സംസ്ഥാനത്ത് നടത്തിയ റെയ്ഡിൽ കഴിഞ്ഞ ദിവസം 74 പേർ കൂടി അറസ്റ്റിലായി. ഇതോടെ അറസ്റ്റിലായവരുടെ ആകെ എണ്ണം 10,015 ആയി. ഇതുവരെ 9280 കേസുകൾ രജിസ്റ്റർ ചെയ്തു.8289.409 ഗ്രാം എം.ഡി.എം.എ, 1004.784 കി.ഗ്രാം കഞ്ചാവ്, 2382 കഞ്ചാവ് ചെടികൾ എന്നിവയും പിടിച്ചെടുത്തു.ജില്ല തിരിച്ചുള്ള കണക്കിൽ ഏറ്റവും കൂടുതൽ കേസുകൾ കോഴിക്കോട് സിറ്റിയിൽ – 929. എന്നാൽ ഏറ്റവും കൂടുതൽ അറസ്റ്റ് മലപ്പുറത്താണ് – 999 പേർ. 875 കേസുകളുമായി മലപ്പുറം രണ്ടാം സ്ഥാനത്തുണ്ട്. കൊച്ചി സിറ്റി, പാലക്കാട് ജില്ലകളിൽ 700-ലധികം കേസുകൾ വീതമുണ്ട്. ഏറ്റവും കുറവ് കണ്ണൂർ റൂറലിൽ – 137 കേസുകളും 139 അറസ്റ്റും.കഴിഞ്ഞ ദിവസത്തെ കേസുകളിൽ സ്മാൾ ക്വാണ്ടിറ്റി 20, മീഡിയം 7, കൊമേഴ്ഷ്യൽ 2 എന്നിവ ഉൾപ്പെടുന്നു. എൻ.ഡി.പി.എസ് ആക്ട് പ്രകാരം 38 കേസുകളും കോട്പ പ്രകാരം 46 കേസുകളും രജിസ്റ്റർ ചെയ്തു. ഇവരിൽ നിന്ന് 47.322 ഗ്രാം എം.ഡി.എം.എയും 25.451 കി.ഗ്രാം കഞ്ചാവും 501 കഞ്ചാവ് ചെടികളും കണ്ടെടുത്തു.ബോധവത്കരണത്തിന്റെ ഭാഗമായി ഇതുവരെ 9147 ക്ലാസുകളും 578 കൗൺസിലിങ്ങുകളും നടത്തി. സ്കൂൾ, കോളേജ് പ്രൊട്ടക്ഷൻ ഗ്രൂപ്പുകൾ 6561 പരിപാടികളും സംഘടിപ്പിച്ചു.

ഓണക്കോടിക്കും പൂക്കൾക്കും പച്ചക്കറിക്കും മാത്രമല്ല, ഡിജിറ്റൽ ഗാഡ്ജറ്റുകൾക്കും ഹോം അപ്ലയൻസസിനും ആവശ്യക്കാരേറെ.

0

കോഴിക്കോട് : ഓണക്കോടിക്കും പൂക്കൾക്കും പച്ചക്കറിക്കും മാത്രമല്ല ഡിജിറ്റൽ ഗാഡ്ജറ്റുകൾക്കും ഹോം അപ്ലയൻസസിനും ആവശ്യക്കാരേറെയാണ്. കിടിലൻ ഓഫറുകളാണ് ആവശ്യക്കാരെ ഓണക്കാലത്ത് ആകർഷിക്കുന്നത്. ബ്രാൻഡുകളിലെ വ്യത്യസ്തതയ്ക്കൊപ്പം വാങ്ങുന്ന ഉൽപന്നത്തിനൊപ്പം വ്യാപാര സ്ഥാപനങ്ങൾ ഉറപ്പു നൽകുന്ന സമ്മാനങ്ങളും ഉത്സവകാലത്ത് ആവശ്യക്കാരെ ആകർക്കുന്നു.വാങ്ങുന്ന ഉൽപന്നങ്ങൾക്ക് കമ്പനി നൽകുന്നതിനേക്കാൾ വാറന്റി കാലാവധി അധികം നൽകിയും ഉറപ്പായ സമ്മാനങ്ങൾ വാഗ്ദാനം നൽകിയും നറുക്കെടുപ്പിലൂടെ നൽകുന്ന വമ്പൻ സമ്മാനങ്ങളിലൂടെയും ഉപയോക്താക്കളെ ആകർഷിക്കുന്നു വ്യാപാരികൾ. ടിവി, വാഷിങ് മെഷിൻ എന്നിവയുടെ വിൽപന ഉയർന്നിട്ടുണ്ട്. 32 ഇഞ്ച് ടിവി മുതൽ ഹൈസെൻസ് കമ്പനി പുതുതായി പുറത്തിറക്കിയ 116 ഇഞ്ച് വലിപ്പം വരുന്ന ഭീമാകാരമായ ടിവി വരെ വിപണിയിലുണ്ട്.മൊബൈൽ ഫോണുകൾക്കും ആവശ്യക്കാരേറെ.

ഓണക്കച്ചവടം മുന്നിൽ കണ്ട് സ്റ്റോക്കുകളുടെ എണ്ണം കൂട്ടിയതിനൊപ്പം ആളുകളെ വരവേൽക്കാനും ഉൽപന്നങ്ങൾ കാണിക്കാനുമായി സെയിൽസ് ടീമിന്റെയും എണ്ണം വർധിപ്പിച്ചിട്ടുണ്ട് വ്യാപാരികൾ. 2000 കോടിക്കു മുകളിലാണ് പല വ്യാപാര ശൃംഖലകളും ഓണക്കാല വിൽപന ലക്ഷ്യമിടുന്നത്. സ്കൂൾ വിദ്യാർഥികൾക്ക് പരീക്ഷയായതിനാലും ഓണാവധിക്ക് ഇനിയും ദിവസങ്ങളുള്ളതിനാലും ഇത്തരം സ്ഥാപനങ്ങളിലേക്ക് ആളുകളുടെ തള്ളിക്കയറ്റം തുടങ്ങാനിരിക്കുന്നതേയുള്ളൂ. ഓഫിസ് സമയത്തിനു ശേഷം വൈകുന്നേരങ്ങളിൽ ഒരുപാട് പേർ സ്ഥാപനങ്ങളിൽ എത്തുന്നുണ്ട്.

തമിഴ്‌നാട് മുഖ്യമന്ത്രിയുമായി കൂടിക്കാഴ്ച്‌ച നടത്തി വി.ഡി. സതീശൻ.

0

ദക്ഷിണേന്ത്യൻ സംസ്ഥാനങ്ങളിലെ മുഖ്യമന്ത്രിമാർ പങ്കെടുക്കുന്ന 31-ാമത് ദക്ഷിണ മേഖലാ കൗൺസിൽ യോഗത്തിന് മുന്നോടിയായി മുഖ്യമന്ത്രി വി.ഡി. സതീശൻ തമിഴ്നാട് മുഖ്യമന്ത്രി സി. ജോസഫ് വിജയിയുമായി കൂടിക്കാഴ്ച നടത്തി. ചെന്നൈയിലെ മഹാബലിപുരത്ത് നടന്ന കൂടിക്കാഴ്ചയിൽ വ്യവസായ മന്ത്രി പി.കെ. കുഞ്ഞാലിക്കുട്ടിയും സന്നിഹിതനായിരുന്നു.കഴിഞ്ഞ ദിവസം ഡൽഹി ഇന്ദിരാ ഭവനിൽ എ.ഐ.സി.സി പ്രവർത്തക സമിതി യോഗത്തിൽ പങ്കെടുത്ത ശേഷമാണ് സതീശൻ ചെന്നൈയിലെത്തിയത്.

ഡൽഹിയിലെ കേരള ഹൗസിൽ ഓണാഘോഷ പരിപാടിയും മുഖ്യമന്ത്രി ഉദ്ഘാടനം ചെയ്തു.മുഖ്യമന്ത്രിമാർക്കും ചീഫ് സെക്രട്ടറിമാർക്കും പുറമെ കേന്ദ്ര സംസ്ഥാന സർക്കാരുകളിലെ മുതിർന്ന ഉദ്യോഗസ്ഥരുമാണ്, കൗൺസിൽ ചെയർമാനായ കേന്ദ്ര ആഭ്യന്തരമന്ത്രി അമിത് ഷായുടെ നേതൃത്വത്തിൽ നടക്കുന്ന യോഗത്തിൽ പങ്കെടുക്കുന്നത്. കേരളം, കർണാടക, ആന്ധ്രപ്രദേശ്, തെലങ്കാന, തമിഴ്നാട് എന്നീ സംസ്ഥാനങ്ങളാണ് ദക്ഷിണ മേഖലാ കൗൺസിലിലെ അംഗങ്ങൾ.യോഗത്തിൽ ദക്ഷിണേന്ത്യൻ സംസ്ഥാനങ്ങൾ തമ്മിലുള്ള തർക്കങ്ങൾ, ജലവിഹിത പ്രശ്‌നങ്ങൾ, പ്രാദേശിക വികസനം, കേന്ദ്ര സംസ്ഥാന ഏകോപനം തുടങ്ങിയ വിഷയങ്ങൾ ചർച്ച ചെയ്യുമെന്നാണ് പ്രതീക്ഷ.

ദക്ഷിണേന്ത്യൻ സംസ്ഥാനങ്ങൾക്കിടയിൽ വർഷങ്ങളായി തുടരുന്ന അന്തർസംസ്ഥാന ജലവിഹിത തർക്കങ്ങൾ യോഗത്തിലെ പ്രധാനചർച്ചാവിഷയങ്ങളിലൊന്നായേക്കും.ജലവിഭവങ്ങളുടെ പങ്കിടൽ, സംസ്ഥാനങ്ങൾ തമ്മിലുള്ള ഏകോപനം തുടങ്ങിയ വിഷയങ്ങളിൽ കേന്ദ്രത്തിന്റെ ഇടപെടലും ചർച്ചയാകും.ദക്ഷിണേന്ത്യൻ സംസ്ഥാനങ്ങൾ നേരിടുന്ന പൊതുവായ പ്രശ്‌നങ്ങളിൽ സംയുക്ത പരിഹാരം കണ്ടെത്തുന്നതിനുള്ള വേദിയായാണ് സോണൽ കൗൺസിൽ യോഗം പ്രവർത്തിക്കുന്നത്.

വർഷങ്ങൾക്കുശേഷം കെഎസ്ആർടിസി ജീവനക്കാർക്കും പെൻഷൻകാർക്കും ഓണം ആനുകൂല്യങ്ങൾ; 33.92 കോടി രൂപ അനുവദിച്ചു.

0

തിരുവനന്തപുരം : ഓണക്കാലം പ്രമാണിച്ച് കെഎസ്ആർടിസി ജീവനക്കാർക്കും പെൻഷൻകാർക്കും ഉത്സവബത്തയും അഡ്വാൻസും വിതരണം ചെയ്യാൻ തീരുമാനിച്ചതായും ഇതിനായി 33.92 കോടി രൂപ അനുവദിച്ചതായും ഗതാഗത മന്ത്രി സി.പി ജോൺ അറിയിച്ചു. പെൻഷൻകാർക്ക് ഓണം അലവൻസും സ്ഥിരം ജീവനക്കാർക്ക് സാലറി അഡ്വാൻസും ഉൾപ്പെടെയുള്ള ആനുകൂല്യങ്ങളാണ് ഇത്തവണ അനുവദിച്ചിരിക്കുന്നത്.സ്ഥിരം ജീവനക്കാർക്ക് 10,000 രൂപ സാലറി അഡ്വാൻസും 3,000 രൂപ ഉത്സവബത്തയും ലഭിക്കും.

കൂടാതെ അർഹതയുള്ള ജീവനക്കാർക്ക് ബോണസും ലഭിക്കുന്നതാണ്. താൽക്കാലിക ജീവനക്കാർക്ക് 1,000 രൂപ ഉത്സവബത്തയായി ലഭിക്കും. വർഷങ്ങൾക്ക് ശേഷം ആദ്യമായി പെൻഷൻകാർക്ക് 1,250 രൂപ ഓണം ഉത്സവബത്തയായി അനുവദിച്ചിട്ടുണ്ട്.സ്ഥിരം ജീവനക്കാർക്ക് 10,000 രൂപ ഓണം അഡ്വാൻസ് നൽകാൻ 21.5 കോടി രൂപ കെ.എസ്.ആർ.ടി.സി.ക്ക് മന്ത്രിസഭാ തീരുമാനപ്രകാരമാണ് അനുവദിക്കുന്നത്. പെൻഷൻകാർക്ക് 1250 രൂപ ഉത്സവബത്ത നൽകുന്നതിന് 5.32 കോടി രൂപയും പ്രത്യേക ധനസഹായമായി മന്ത്രിസഭ കെ.എസ്.ആർ.ടി.സി.ക്ക് അനുവദിച്ചു.

കെ.എസ്.ആർ.ടി.സി.യിൽ പെൻഷൻകാർക്കുള്ള ഓണം അലവൻസ് 2019-ന് ശേഷം ആദ്യമായാണ് നൽകുന്നത്. ഓണം സാലറി അഡ്വാൻസ് 2023-ന് ശേഷം നൽകിയിരുന്നില്ല. പെൻഷൻകാരുടെ ദീർഘനാളത്തെ ആവശ്യമായ പെൻഷൻ പരിഷ്‌കരണത്തിൽ ഇതുവരെ അന്തിമ തീരുമാനം ആയിട്ടില്ലെങ്കിലും, ഓണക്കാലത്ത് അനുവദിച്ച ഈ തുക അവർക്ക് വലിയൊരു ആശ്വാസമാകും.കടുത്ത സാമ്പത്തിക പ്രതിസന്ധികൾക്കിടയിലും ജീവനക്കാരുടെ ആത്മാർഥതയും അർപ്പണബോധവും പരിഗണിച്ചാണ് ഓണം ഫെസ്റ്റിവൽ ആനുകൂല്യങ്ങൾ നൽകാൻ മന്ത്രിസഭ തീരുമാനിച്ചതെന്ന് മന്ത്രി സി.പി. ജോൺ അറിയിച്ചു.

കഴിഞ്ഞ ചില മാസങ്ങളിൽ നേരിട്ട ചെറിയ പ്രതിസന്ധികൾ പരിഹരിച്ചുകൊണ്ട് കോർപ്പറേഷൻ കൂടുതൽ ജനകീയമായി മുന്നോട്ടു പോകുന്നതിനിടയിലാണ് ജീവനക്കാരുടെ ഓണം ഉഷാറാക്കാനുള്ള പുതിയ തീരുമാനം വന്നിരിക്കുന്നത്.മുൻ വർഷങ്ങളിൽ ഓണക്കാലത്ത് കടുത്ത സാമ്പത്തിക പ്രതിസന്ധി അനുഭവിച്ചിരുന്ന കെ.എസ്.ആർ.ടി.സി ജീവനക്കാരുടെയും പെൻഷൻകാരുടെയും കുടുംബങ്ങൾക്ക് വലിയ സന്തോഷം നൽകുന്നതാണ് സർക്കാരിന്റെ ഈ തീരുമാനം.

കേരളത്തിലേക്ക് ഉടനെത്തുന്നു വന്ദേസ്ലീപ്പർ, റൂട്ട് കാത്തിരിക്കുന്നു, ഈ വർഷം ICF ഇറക്കുന്നത് രണ്ടെണ്ണം.

0

കോഴിക്കോട്: ചെന്നൈ ഇന്റഗ്രൽ കോച്ച് ഫാക്ടറി നിർമിക്കുന്ന 10 വന്ദേസ്ലീപ്പർ തീവണ്ടികളിൽ ഒന്ന് കേരളത്തിലേക്ക്. ഈവർഷം പുറത്തിറങ്ങുന്ന രണ്ടെണ്ണത്തിൽ ഒന്നാണ് കേരളത്തിലെത്തുക. ദക്ഷിണ റെയിൽവേക്ക് അനുവദിച്ച 16 കോച്ച് (റേക്ക്) വന്ദേ സ്ലീപ്പറിന് ആദ്യ മുൻഗണന കേരളം ഉൾപ്പെട്ട റൂട്ടുകൾക്കാണ്. മംഗളുരു-തിരുവനന്തപുരം ((631 കി.മീ), തിരുവനന്തപുരം-ചെന്നൈ (922 കിമീ), മംഗളുരു-ചെന്നൈ (889 കിമീ) എന്നിവയാണവ.ചെന്നൈ ബേസിൻ ബ്രിഡ്‌ജിലെ മെക്കാനിക്കൽ വിഭാഗത്തിനും ഇതിനുള്ള നിർദേശം ലഭിച്ചു കഴിഞ്ഞു. ചെന്നൈ ഇന്റഗ്രൽ കോച്ച് ഫാക്‌ടറിയിൽ നിന്ന് ഇറങ്ങുന്ന വന്ദേഭാരത് പരിശോധനകൾക്ക് ശേഷം കമ്മിഷൻ ചെയ്യുന്നത് ബേസിൻ ബ്രിഡ്ജ് യാർഡിലാണ്.മുഴുവൻ ശീതീകരിച്ച 16 കോച്ച് വന്ദേസ്ലീപ്പറിൽ 823 ബർത്താണ് ഉള്ളത്. നിലവിൽ ഭാരത് എർത്ത് മൂവേഴ്സ് ലിമിറ്റഡ് (ബെമൽ) നാല് വണ്ടികളാണ് നിർമിക്കുന്നത്. അതിൽ രണ്ടെണ്ണം പുറത്തിറങ്ങി. ഹൗറ-കമാഖ്യ-ഹൗറ റൂട്ടിൽ രണ്ടു വന്ദേസ്ലീപ്പർ ഓടുന്നു. ഈവർഷം രണ്ടെണ്ണം കൂടെ ഇറങ്ങും. ഇത് മുംബൈ-ബംഗളുരു റൂട്ടിലാണ്.ചെന്നൈ ഐ.സി.എഫിന് ആദ്യഘട്ടം 10 വന്ദേസ്ലീപ്പർ നിർമിക്കാനാണ് കരാർ. ഇതിന്റെ പ്രവൃത്തി തുടങ്ങി. ഇതിൽ രണ്ടെണ്ണമാണ് ഈവർഷം പുറത്തിറങ്ങുക. ഐ.സി.എഫിൽ നടക്കുന്ന വന്ദേഭാരത് നിർമാണ പദ്ധതിയിൽ (എട്ട്, 16, 20 ചെയർകാർ) നിന്നുള്ള 16 കോച്ചുള്ള 10 റേക്ക് എടുത്താണ് സ്ലീപ്പർ ആയി മാറ്റുന്നത്.രാജ്യത്തിന്റെ ന്യൂജെൻ തീവണ്ടി പതിപ്പായ വന്ദേഭാരതിന്റെ നിർമാണം 100 കഴിഞ്ഞതോടെ നിർത്തിവച്ച നിലയിലാണ്. രാജ്യത്തിൻ്റെ പ്രധാന റൂട്ടുകളിലെല്ലാം വന്ദേഭാരത് എത്തിക്കഴിഞ്ഞു. ഇപ്പോൾ അമൃത് ഭാരത് പതിപ്പുകളിലും വന്ദേസ്ലീപ്പറിലുമാണ് റെയിൽവേയുടെ ശ്രദ്ധ.

കുതിരവട്ടം മാനസികാരോഗ്യ കേന്ദ്രം എല്ലാം പഴയ പടി; വേണം, അധികൃതരുടെ ശ്രദ്ധ

0

കോഴിക്കോട്: അന്താരാഷ്ട്ര നിലവാരത്തിലേക്ക് ഉയർത്താനുള്ള ശ്രമങ്ങൾ നടക്കുമ്പോഴും കുതിരവട്ടം ഗവ. മാനസികാരോഗ്യ കേന്ദ്രത്തിന്റെ പരാധീനതകൾ അവസാനിക്കുന്നില്ല. തിരുവനന്തപുരത്തെയും തൃശൂരിലെയും മാനസികാരോഗ്യ കേന്ദ്രങ്ങളെ അപേക്ഷിച്ച് അൽപം മെച്ചമാണെങ്കിലും മാറാതെ കിടക്കുന്ന പലതുമുണ്ട് അവിടെ. ഗേറ്റ് കടന്ന് വരുന്ന ഓരോ മനുഷ്യനെയും, തന്നെ കൊണ്ടുപോകാൻ വരുന്നവരാണോ എന്ന പ്രതീക്ഷയോടെ നോക്കുന്ന അന്തേവാസികളാണ് അതിൽ ഒന്നാമത്. 10 വർഷം കഴിഞ്ഞാലും ഈ കാഴ്ച ഇങ്ങനെ തുടരാനാണ് സാധ്യതയും.

നിലവിൽ കുതിരവട്ടം മാനസികാരോഗ്യ കേന്ദ്രത്തിൽ 400ലേറെ അന്തേവാസികളുണ്ടെന്ന് സൂപ്രണ്ട് ഡോ. സരള നായർ പറഞ്ഞു. പുരുഷ അന്തേവാസികളാണ് കൂടുതലുള്ളത്. എണ്ണത്തിൽ കൂടുതലുള്ള ഇതരസംസ്ഥാനക്കാരായ അന്തേവാസികളുടെ പുനരധിവാസമാണ് നേരിടുന്ന മറ്റൊരു പ്രശ്നം.രോഗം ഭേദമായിട്ടും സ്വന്തം നാട്ടിലേക്ക് പോകാനാകാതെ കാത്തിരിപ്പു തുടരുകയാണ് പലരും. ഇവരെ കുടുംബത്തോടു ചേർക്കാൻ കേന്ദ്ര ആഭ്യന്തര മന്ത്രാലയം റിട്ട. ഉദ്യോഗസ്ഥനും സാമൂഹിക പ്രവർത്തകനുമായ കോട്ടൂളി സ്വദേശി എം. ശിവന്റെ നേതൃത്വത്തിൽ പുനരധിവാസപ്രവർത്തനങ്ങൾ നടക്കുന്നുണ്ട്. ശിവൻ മുൻകൈയെടുത്ത് കോഴിക്കോട് മാനസികാരോഗ്യ കേന്ദ്രത്തിൽ 400ലേറെ ഇതരസംസ്ഥാനക്കാരായ അന്തേരാസികളുടെ പുനരധിവാസം സാധ്യമാക്കിയിട്ടുണ്ട്. പലതരക്കാരാണ് ആളുകൾ. രേഷ്മ(55) എന്ന ഛത്തിസ്ഗഢ് സ്വദേശിയുടെ പുനരധിവാസം ഉടൻ നടക്കും. ഇടക്കിടെ ദേഷ്യപ്പെടുന്ന, ചിലപ്പോൾ മിണ്ടാതിരിക്കുന്ന, പരസ്പര ബന്ധമില്ലാതെ സംസാരിക്കുന്ന ഇവരുടെ ഭാഷകൾ മനസ്സിലാക്കി നിരന്തരം സംസാരിച്ചാണ് ശിവൻ മനസ്സിന്റെ നൂലു പൊട്ടിപ്പോയ ഈ മനുഷ്യർ ഏതു നാട്ടുകാരാണെന്ന് കണ്ടെത്തുന്നത്.

മറ്റു സംസ്ഥാനങ്ങളിൽനിന്ന് വഴിതെറ്റിയെത്തി അലഞ്ഞുനടക്കുന്ന ആളുകളെ പൊലീസും സന്നദ്ധസംഘടനകളിൽ പെട്ടവരുമാണ് മാനസികാരോഗ്യ കേന്ദ്രത്തിൽ എത്തിക്കുന്നത്. ഇവിടത്തെ 150ഓളം അന്തേവാസികൾ മലയാളികളാണ്.അവരിൽ വിദ്യാസമ്പന്നരടക്കം ഉണ്ട്. ഒരിക്കൽ മനോരോഗിയായി മുദ്രചാർത്തിയാൽ ഇവർക്ക് കുടുംബങ്ങളിലേക്കുള്ള മടക്കം അസാധ്യമാണ്. ഇത്തരത്തിൽ രോഗം മാറി 80 ഓളം പേർ കുടുംബം ഏറ്റെടുക്കാത്തവരായി ഇവിടെ തുടരുന്നുണ്ട്. ദീർഘകാലം ഇവർക്ക് അഭയം നൽകാനുള്ള സംവിധാനം ഈ ആരോഗ്യകേന്ദ്രത്തിന് ഇല്ലതാനും. ഇങ്ങനെ നോക്കുമ്പോൾ ചികിത്സ പ്രതിസന്ധിയേക്കാൾ വലിയ പ്രശ്നമാണ് പുനരധിവാസം. അന്തേവാസികളുടെ വിവരങ്ങൾ പുറംലോകത്തിന് അന്യമാണ്. ഇവിടേക്ക് കടക്കാനും കടമ്പകൾ ഒരുപാടുണ്ട്.

കാലപ്പഴക്കം ചെന്ന കെട്ടിടങ്ങളും ആവശ്യത്തിന് ജീവനക്കാരില്ലാത്തതുമാണ് മാനസികാരോഗ്യ കേന്ദ്രം നേരിടുന്ന മറ്റൊരു പ്രശ്നം. 400ലേറെ അന്തേവാസികളുടെ സുരക്ഷക്കായി ആവശ്യത്തിന് സുരക്ഷ ജീവനക്കാരില്ല. 20 സുരക്ഷ ജീവനക്കാർ വേണ്ടിടത്ത് നിലവിൽ നാലോ അഞ്ചോ ആളുകൾ മാത്രമാണുള്ളത്. സുരക്ഷ വീഴ്ചകൾ കാരണം കൊലപാതക കേസ് പ്രതികളടക്കം മതിൽ ചാടി രക്ഷപ്പെടുന്ന സംഭവങ്ങൾ ഉണ്ടാകുന്നു.

നിലവിലുള്ള ജീവനക്കാർക്ക് വലിയ ജോലിഭാരമാണ് അനുഭവപ്പെടുന്നത്. എംപ്ലോയ്‌മെന്റ് എക്സ്ചേഞ്ച് വഴി താൽക്കാലിക സുരക്ഷ ജീവനക്കാരെ നിയമിക്കാൻ സർക്കാർ ശ്രമിക്കുന്നുണ്ടെങ്കിലും ശമ്പളം ആകർഷകമല്ലാത്തതിനാൽ പലരും ജോലിക്ക് കയറാൻ താൽപര്യപ്പെടുന്നില്ല. മാനസികാരോഗ്യ കേന്ദ്രത്തിന്റെ അവസ്ഥ നേരിട്ടറിയാൻ രണ്ട് ഹൈകോടതി ജഡ്ജിമാർ അടുത്തിടെ സന്ദർശനം നടത്തിയിരുന്നു. അവരുടെ റിപ്പോർട്ട് പുറത്തുവന്നിട്ടില്ല.1872ൽ സ്ഥാപിതമായ ഈ മാനസികാരോഗ്യ കേന്ദ്രത്തിൽ ഇപ്പോഴും ആധുനിക സൗകര്യങ്ങളുടെ ലഭ്യത വളരെ കുറവാണ്. ഈ സാഹചര്യത്തിൽ കുതിരവട്ടത്തെ ആഗോള മാതൃകയിലുള്ള സന്തോഷ കേന്ദ്രമാക്കി മാറ്റുന്നതിനുള്ള വിശദമായ പദ്ധതി രേഖ അധികാരികൾക്ക് കൈമാറിയിട്ടുണ്ട്. 400 കോടിയുടെ വികസന മാസ്റ്റർ പ്ലാൻ ആശുപത്രിയെ അന്താരാഷ്ട്ര നിലവാരത്തിലുള്ള ഒരു ഗവേഷണ-ചികിത്സ കേന്ദ്രമാക്കി മാറ്റാൻ ലക്ഷ്യമിട്ടുള്ള നാല് ഘട്ടങ്ങളായാണ് വിഭാവനം ചെയ്തിരിക്കുന്നത്. ആദ്യഘട്ടം പൂർത്തിയാക്കാൻ 100 കോടി രൂപ വേണം. ആധുനിക ഒ.പി വിഭാഗം, കുട്ടികൾക്കായി ചൈൽഡ് സൈക്യാട്രി സെന്റർ, തടവുകാരായ അന്തേവാസികൾക്ക് പ്രത്യേക വാർഡുകൾ, അഡ്മിനിസ്ട്രേറ്റീവ് ബ്ലോക്ക് എന്നിവയാണ് അതിൽ ലക്ഷ്യമിടുന്നത്.

സാങ്കേതികത്തകരാർ, സർവീസ് പ്രശ്നങ്ങൾ: കൊച്ചിയിലും കോഴിക്കോട്ടും വിമാനങ്ങൾ റദ്ദാക്കി.

0

കോഴിക്കോട് : സാങ്കേതിക തകരാറും സർവീസ് പ്രശ്നങ്ങളും കാരണം കൊച്ചിയിലും കോഴിക്കോട്ടും വിമാന സർവീസുകൾ റദ്ദാക്കി. കോഴിക്കോട് വിമാനത്താവളത്തിൽ നിന്ന് ദുബായിലേക്കുള്ള സ്‌പൈസ്‌ജെറ്റ് വിമാനവും കൊച്ചിയിൽ നിന്ന് ദോഹയിലേക്കുള്ള ഖത്തർ എയർവേയ്സ് വിമാനവുമാണ് റദ്ദാക്കിയത്. വിവരം വൈകിയാണ് അറിയിച്ചതെന്നാരോപിച്ച് ഇരുവിടങ്ങളിലും യാത്രക്കാർ പ്രതിഷേധിച്ചു.ഇന്നലെ വൈകിട്ട് 6.40നുള്ള സ്പൈസ്‌ജെറ്റ് വിമാനമാണ് റദ്ദാക്കിയത്. യാത്രക്കാർ വിവരമറിഞ്ഞത് വിമാനത്താവളത്തിലെത്തിയശേഷം മാത്രമാണ്. വാക്കുതർക്കത്തിനു പിന്നാലെ ജീവനക്കാരും യാത്രക്കാരും തമ്മിൽ ഉന്തും തള്ളുമുണ്ടായതായാണ് വിവരം. ഇക്കഴിഞ്ഞ തിങ്കളാഴ്ചയും ഇതേ വിമാനം റദ്ദാക്കിയിരുന്നു.

അന്നത്തെ യാത്രക്കാരെ കൊണ്ടുപോകുമെന്ന് അറിയിച്ചിരുന്നെങ്കിലും അതുമുണ്ടായില്ല. ടിക്കറ്റ് റീഫണ്ട് ചെയ്തു നൽകുമെന്നാണ് പിന്നീട് അറിയിച്ചിരുന്നത്. എന്നിട്ടും ഇന്നലെ വൈകിട്ടത്തെ വിമാനത്തിനായി മുഴുവൻ യാത്രക്കാരും വിമാനത്താവളത്തിലെത്തിയ ശേഷമാണ് റദ്ദാക്കിയ വിവരം അറിയിച്ചതെന്നാണ് പരാതി. സർവീസ് പ്രശ്നങ്ങൾ മുൻകൂട്ടി അറിയാമായിരുന്നിട്ടും യാത്രക്കാരെ സ്പൈസ‌ജെറ്റ് അധികൃതർ പ്രയാസപ്പെടുത്തിയെന്നാണ് ആക്ഷേപം.കൊച്ചിയിൽ നിന്നു പുലർച്ചെ ദോഹയിലേക്കുള്ള പോകേണ്ടിയിരുന്ന ഖത്തർ എയർവേയ്സ് വിമാനവും സാങ്കേതികത്തകരാറിനെ തുടർന്നു റദ്ദാക്കി.

ഇന്നലെ പുലർച്ചെ 4.15 ന് കൊച്ചിയിൽ നിന്നു പുറപ്പെടേണ്ട വിമാനമാണിത്. 290 യാത്രക്കാരാണ് ഈ വിമാനത്തിൽ പോകാനുണ്ടായിരുന്നത്. ദോഹയിൽനിന്നെത്തിയ വിമാനം കൊച്ചിയിൽനിന്നു യാത്രക്കാരുമായി മടങ്ങും മുൻപ് എൻജിനീയറിങ് വിഭാഗം നടത്തിയ പതിവു പരിശോധനയിലാണു വിമാനത്തിന്റെ ഹൈഡ്രോളിക് സംവിധാനത്തിൽ തകരാർ കണ്ടെത്തിയത്. തുടർന്ന് വിമാനത്തിന്റെ യാത്ര റദ്ദാക്കി. ഇതിനിടെ യാത്രക്കാർ വിമാനത്താവളത്തിൽ പ്രതിഷേധിച്ചു. പിന്നീട് ഇവരെ ഹോട്ടലുകളിലേക്ക് മാറ്റി. തകരാർ പരിഹരിച്ച ശേഷം വിമാനം ദോഹയിലേക്ക് സർവീസ് നടത്തുമെന്നാണ് അറിയിച്ചത്.

ചാലിയാറിൽ-മാവൂർഎളമരം കടവിൽപാലത്തിനു സമീപംപുഴയിൽ ഒഴുകി വരുന്ന നിലയിൽ മൃതദേഹം കണ്ടെത്തി

0

മാവൂർ :ഇന്ന് രാവിലെ ആറരയോടെയാണ്പാലത്തിനു മുകളിൽ വ്യായാമം ചെയ്യുന്നവർ പുഴയിലൂടെ മൃതദേഹം ഒഴുകിവരുന്നത് കണ്ടത്.ഉടൻതന്നെ മാവൂർ പോലീസിലും മാവൂർ ഫയർ യൂണിറ്റിലും വിവരമറിയിച്ചു.പോലീസും ഫയർ യൂണിറ്റും സ്ഥലത്തെത്തി നാട്ടുകാരുടെ സഹായത്തോടെ മൃതദേഹം കരക്ക് എത്തിച്ചു.ദേഹ പരിശോധനയിൽലഭിച്ച രേഖകളിൽഒറ്റപ്പാലം അയ്യന്നൂർസ്വദേശിയായ ദിലീപ്(30)ആണ് മരിച്ചതെന്ന് വ്യക്തമായിട്ടുണ്ട്.മാവൂർ പോലീസിന്റെ നേതൃത്വത്തിൽ തുടർനടപടികൾ സ്വീകരിച്ച് മൃതദേഹം കോഴിക്കോട് മെഡിക്കൽ കോളേജ് മോർച്ചറിയിലേക്ക് മാറ്റും.

ശുഭയാത്ര സുരക്ഷിത യാത്ര’; ഓണാഘോഷത്തിൻ്റെ ഭാ​ഗമായി ട്രെയിനുകളിലും റെയിൽവേ സ്റ്റേഷനുകളിലും കർശന സുരക്ഷ

0

തിരുവനന്തപുരം: സംസ്ഥാനത്ത് ഓണാഘോഷവുമായി ബന്ധപ്പെട്ട് ട്രെയിനുകളിലും റെയില്‍വേ സ്റ്റേഷനുകളിലും സുരക്ഷ ശക്തമാക്കി ഇന്ത്യന്‍ റെയില്‍വേ. ‘ശുഭയാത്ര സുരക്ഷിത യാത്ര’ എന്ന പദ്ധതിയുടെ ഭാഗമായി റെയില്‍വേ പൊലീസും ആര്‍പിഎഫും സംയുക്തമായി ചേർന്നായിരിക്കും പരിശോധന. ഓഗസ്റ്റ് 30 വരെയായിരിക്കും പരിശോധന നടത്തുക.

അതിര്‍ത്തി കടന്നെത്തുന്ന ട്രെയിനുകളില്‍ വ്യാജമദ്യം, മയക്കുമരുന്ന്, പണം എന്നിവ കടത്തുന്നത് തടയാന്‍ പ്രത്യേകമായ പരിശോധനകള്‍ ഉണ്ടാകും. ഇതിനെതുടര്‍ന്ന് ജനറല്‍ കമ്പാര്‍ട്ട്‌മെന്റുകളിലും ലഗേജ്-പാര്‍സല്‍ ബോഗികളിലും പാര്‍ക്കിംഗ് ഏരിയകളിലും പരിശോധന കടുപ്പിച്ചിട്ടുണ്ട്. പ്രധാന സ്റ്റേഷനുകളില്‍ ഡോഗ് സ്‌ക്വാഡിനെയും ബോംബ് സ്‌ക്വാഡിനെയും വിന്യസിക്കുമെന്നും ലഹരി ഉപയോഗിക്കുന്നവര്‍ ട്രെയിനില്‍ കയറുന്നില്ലെന്ന് ഉറപ്പാക്കാനായി ഇന്റലിജന്‍സ് ഡാന്‍സാഫ് സംഘങ്ങളെ നിയോഗിച്ചിട്ടുണ്ടെന്നും ഉദ്യോഗസ്ഥര്‍ വ്യക്തമാക്കി. ലേഡീസ് കോച്ചുകളിലും നിരീക്ഷണം ശക്തമാക്കാന്‍ റെയില്‍വേ പൊലീസ് സൂപ്രണ്ട് നിര്‍ദ്ദേശം നല്‍കിയിട്ടുണ്ട്. സംശയകരമായ സാഹചര്യങ്ങള്‍ എന്തെങ്കിലും ശ്രദ്ധയില്‍പ്പെട്ടാല്‍ 112, 139 അല്ലെങ്കില്‍ 9846200100 എന്നീ നമ്പറുകളില്‍ പൊലീസിനെ അറിയിക്കാമെന്നും റെയില്‍വെ ഉദ്യോഗസ്ഥര്‍ അറിയിച്ചിട്ടുണ്ട്.