വിദ്യാലയങ്ങളിലേക്ക് പോകുന്ന കുട്ടികൾ അനുഭവിക്കുന്ന ഏറ്റവും വലിയ ബുദ്ധിമുട്ടുകളിൽ ഒന്നായ ബാഗിൻ്റെ ഭാരം കുറക്കാനും ബാക്ക് ബെഞ്ചേഴ്സിനെ ഇല്ലാതാക്കാനും ഒരുങ്ങി കേരളത്തിലെ വിദ്യാഭ്യാസ രംഗം. സംസ്ഥാനത്തെ പൊതുവിദ്യാഭ്യാസ രംഗത്ത് ഗുണപരമായ മാറ്റങ്ങൾ ലക്ഷ്യമിട്ടുള്ള രണ്ട് സുപ്രധാന നിർദ്ദേശങ്ങൾ നടപ്പിലാക്കുന്നതിന്റെ ഭാഗമായി സംസ്ഥാന കരിക്കുലം സ്റ്റിയറിംഗ് കമ്മിറ്റി കരട് റിപ്പോർട്ടിന് അംഗീകാരം നൽകിയതായി പൊതുവിദ്യാഭ്യാസവും തൊഴിലും വകുപ്പ് മന്ത്രി വി ശിവൻകുട്ടി അറിയിച്ചു.

കുട്ടികളുടെ ശാരീരികവും മാനസികവുമായ ഉല്ലാസം ഉറപ്പാക്കുന്നതിനായി സ്കൂൾ ബാഗിന്റെ ഭാരം കുറയ്ക്കുക, ക്ലാസ് മുറികളിലെ ജനാധിപത്യവൽക്കരണത്തിന്റെ ഭാഗമായി ‘ബാക്ക് ബെഞ്ചേഴ്സ്’ ഇല്ലാത്ത പഠന അന്തരീക്ഷം സൃഷ്ടിക്കുക എന്നീ ആശയങ്ങളാണ് നടപ്പിലാക്കാൻ ഉദ്ദേശിക്കുന്നത്.ഈ നിർദ്ദേശങ്ങളെക്കുറിച്ച് വിശദമായി പഠിക്കാൻ നേരത്തെ എസ്.സി.ഇ.ആർ.ടി -യെ ചുമതലപ്പെടുത്തിയിരുന്നു. ഇതിന്റെ അടിസ്ഥാനത്തിൽ തയ്യാറാക്കിയ റിപ്പോർട്ടുകൾ ഇന്ന് ചേർന്ന സംസ്ഥാന കരിക്കുലം സ്റ്റിയറിംഗ് കമ്മിറ്റി വിശദമായി ചർച്ച ചെയ്യുകയും കരട് റിപ്പോർട്ടിന് അംഗീകാരം നൽകുകയും ചെയ്തുവെന്ന് മന്ത്രി പറഞ്ഞു.

വിദ്യാഭ്യാസ പ്രക്രിയയിൽ സമൂഹത്തിന്റെയാകെ പങ്കാളിത്തം ഉറപ്പാക്കുന്നതിനായി ഈ കരട് റിപ്പോർട്ട് പൊതുജനങ്ങളുടെ അഭിപ്രായത്തിനായി സമർപ്പിക്കാൻ തീരുമാനിച്ചിട്ടുണ്ട്. റിപ്പോർട്ട് എസ്.സി.ഇ.ആർ.ടി വെബ്സൈറ്റിൽ ലഭ്യമാക്കും. അധ്യാപകർക്കും രക്ഷിതാക്കൾക്കും വിദ്യാർത്ഥികൾക്കും പൊതുജനങ്ങൾക്കും ഇത് സംബന്ധിച്ച അഭിപ്രായങ്ങളും നിർദ്ദേശങ്ങളും ജനുവരി 20 വരെ അറിയിക്കാവുന്നതാണ്.പൊതുജനങ്ങളിൽ നിന്നും ലഭിക്കുന്ന നിർദ്ദേശങ്ങൾ കൂടി പരിഗണിച്ച്, വരുന്ന അധ്യയന വർഷം തന്നെ ഈ മാറ്റങ്ങൾ വിദ്യാലയങ്ങളിൽ നടപ്പിലാക്കാനാണ് പൊതുവിദ്യാഭ്യാസ വകുപ്പ് ലക്ഷ്യമിടുന്നത്. നമ്മുടെ വിദ്യാലയങ്ങളെ കൂടുതൽ ശിശുസൗഹൃദവും ജനാധിപത്യപരവുമാക്കാൻ ഈ മാറ്റങ്ങൾ സഹായിക്കുമെന്നും മന്ത്രി പറഞ്ഞു.

കൊച്ചി: പ്രശസ്ത മിമിക്രി കലാകാരൻ രഘു കളമശേരി അന്തരിച്ചു. കടവന്ത്ര ഇന്ദിരാ​ഗാന്ധി ആശുപത്രിയിൽ ഇന്ന് രാവിലെയാണ് അന്ത്യം. നേവൽ ബേസ് ജീവനക്കാരനായിരുന്നു.

മിമിക്രി കലാകാരനായിരുന്ന രഘു ഏഷ്യാനെറ്റിലെ ‘സിനിമാല’ എന്ന പ്രോഗ്രാമിലൂടെയാണ് ശ്രദ്ധേയനായത്. അന്തരിച്ച മുൻ മുഖ്യമന്ത്രി ഉമ്മൻ ചാണ്ടിയുടെ അപരനായി നിരവധി വേദികളിൽ വേഷമിട്ടിട്ടുണ്ട്. പി എസ് രഘു എന്നതാണ് മുഴുവൻ പേര്.

മുന്‍മന്ത്രിയും മുസ്‍ലിംലീഗ് മുതിര്‍ന്ന നേതാവുമായ വി.കെ.ഇബ്രാഹിംകുഞ്ഞ് (73) അന്തരിച്ചു. കൊച്ചിയിലെ സ്വകാര്യ ആശുപത്രിയിൽ ചികില്‍സയിലായിരുന്നു. നാലു തവണ എംഎല്‍എയും രണ്ടു തവണ മന്ത്രിയുമായി. മധ്യകേരളത്തിലെ ലീഗിന്‍റെ ജനകീയമുഖമായിരുന്നു.വ്യവസായ വകുപ്പ്, പൊതുമരാമത്ത് വകുപ്പുകള്‍ കൈകാര്യം ചെയ്തു. 2001ല്‍ മട്ടാഞ്ചേരിയില്‍ നിന്ന് ആദ്യ നിയമസഭാ തിരഞ്ഞെടുപ്പ് വിജയിച്ചു. 2006ല്‍ മട്ടാഞ്ചേരിയില്‍ നിന്നും 2011ലും 2016ലും കളമശ്ശേരിയില്‍ നിന്നും വിജയിച്ചു.

കോഴിക്കോട്: ഇന്നലെ പുലർച്ചെ കോവൂർ ഇരിങ്ങാടൻപള്ളി ജംക്‌ഷനിലുണ്ടായ അപകടത്തിൽ റോഡിൽ ഒഴുകിയതു 2989 കുപ്പി ബീയർ. കർണാടക ഹാസനിൽ നിന്നു 700 കെയ്സ് ബീയർ ബവ്റിജസ് കോർപറേഷൻ എറണാകുളം ഗോഡൗണിലേക്കു കൊണ്ടുപോകുമ്പോഴാണു കാറിടിച്ചു ലോറി നിയന്ത്രണം വിട്ടു മറിഞ്ഞത്. അതിൽ, 249 കെയ്സ് ബീയറിന്റെ കുപ്പി പൂർണമായും പൊട്ടി. മറ്റൊരു കെയ്സിലെ ഒരു കുപ്പിയും പൊട്ടിയിട്ടുണ്ട്. ലോറി നിയന്ത്രണം വിട്ടു മറിഞ്ഞതോടെ ബീയർ കുപ്പികൾ റോഡിൽ ചിതറി. പുലർച്ചെ 4ന് അപകട വിവരം അറിഞ്ഞ ഉടൻ എക്സൈസ് സ്ട്രൈക്കിങ് ഫോഴ്സും ചേവായൂർ എസ്ഐ അബ്ദുൽ മുനീറിന്റെ നേതൃത്വത്തിലുള്ള പൊലീസും സ്ഥലത്തെത്തി.

കാബിനുള്ളിൽ കുടുങ്ങി ലോറി ഡ്രൈവർ അപകടത്തിന്റെ ശബ്ദം കേട്ടും മറ്റും ഓടിയെത്തിയ നാട്ടുകാർ ലോറിക്കുള്ളിൽ കുരുങ്ങിപ്പോയ ഡ്രൈവർ അഖിൽ കൃഷ്ണനെ പുറത്തെടുക്കാനാകാതെ വലഞ്ഞു. നെഞ്ചിന്റെ താഴ്ഭാഗം പൂർണമായും കാബിനുള്ളിൽപെട്ട ഡ്രൈവറെ പുറത്തെടുക്കാനും മറ്റും ശ്രമിക്കുന്നതോടൊപ്പം അഗ്നിരക്ഷാ സേനയെയും പൊലീസിനെയും വിവരം അറിയിച്ചു. വെള്ളിമാടുകുന്ന് ഫയർ സ്റ്റേഷനിൽ നിന്ന് അസിസ്റ്റന്റ് സ്റ്റേഷൻ ഓഫിസർ അബ്ദുൽ ഫൈസിയുടെ നേതൃത്വത്തിൽ എത്തിയ ഫയർഫോഴ്സ്, കാബിനിൽ കുരുങ്ങിയ ലോറി ഡ്രൈവർ അഖിൽ കൃഷ്ണനെ പുറത്തെടുത്ത് ആശുപത്രിയിൽ എത്തിച്ചു.

ഗതാഗതം മുടങ്ങി, ഭീഷണിയായി കുപ്പിച്ചില്ല്ലോറി മറിഞ്ഞതിനെ തുടർന്നു ജംക്‌ഷനിൽനിന്നു ചേവരമ്പലം ഭാഗത്തേക്കുള്ള റോഡിൽ ഗതാഗതം തടസ്സപ്പെട്ടു. നേരം പുലർന്നു തിരക്കു വർധിക്കും മുൻപു ലോറി നിവർത്തിയും റോഡിൽ ചിതറിയ കുപ്പിച്ചില്ലുകൾ മാറ്റിയും ഗതാഗതം സുഗമമാക്കി. അഗ്നിരക്ഷാസേനയും പൊലീസും വിവരം അറിഞ്ഞെത്തിയ നാട്ടുകാരും ചേർന്നാണു ചില്ലുകൾ റോഡിൽ നിന്നു മാറ്റിയത്. പെട്ടികൾ പൊട്ടി ചിതറിയ ബീയർ കുപ്പികൾ മോഷണം പോകാതിരിക്കാൻ എക്സൈസ് ഉദ്യോഗസ്ഥരും ജാഗ്രത പുലർത്തി. എക്സൈസ് ഡപ്യൂട്ടി കമ്മിഷണർ ജിമ്മി ജോസഫ്, സിഐ ഗിരീഷ്, ഇൻസ്പെക്ടർ നിഷിൽ കുമാർ തുടങ്ങിയവരുടെ നേതൃത്വത്തിൽ വൻ എക്സൈസ് സംഘം സ്ഥലത്തുണ്ടായിരുന്നു. അവരുടെ നേതൃത്വത്തിലാണു പൊട്ടാത്ത ബീയർ കുപ്പികൾ എണ്ണി തിട്ടപ്പെടുത്തി മറ്റൊരു ലോറിയിലേക്കു മാറ്റിയത്.

അപകട കാരണം അമിതവേഗം അപകട കാരണം കാറിന്റെ അമിതവേഗമാണ് എന്നു പൊലീസ്. കാർ അമിതവേഗത്തിൽ അശ്രദ്ധമായി ഓടിച്ചുവന്നു ലോറിയുടെ പിൻഭാഗത്തു തട്ടുകയായിരുന്നു. ലോറി താരതമ്യേന കുറഞ്ഞ വേഗത്തിൽ ജംക്‌ഷൻ കടന്നുപോകുന്നതിനിടെ കാറിന്റെ ഇടിയേറ്റ് നിയന്ത്രണം വിട്ടു. കാറിന്റെ മുൻഭാഗവും തകർന്നു. സിഗ്നൽ ലൈറ്റ് പ്രവർത്തിക്കാത്തപ്പോഴും ജംക്‌ഷൻ മുന്നറിയിപ്പു നൽകുന്ന മഞ്ഞ ലൈറ്റ് തെളിയാറുണ്ട്. അത് ആരും ശ്രദ്ധിക്കാറില്ല. ഇന്നലെ കാർ ഓടിച്ചയാൾ അതു ശ്രദ്ധിക്കാത്തതാണ് അപകടത്തിനു കാരണമെന്നു നാട്ടുകാർ പറഞ്ഞു.

കൊച്ചി: നടൻ പുന്നപ്ര അപ്പച്ചൻ അന്തരിച്ചു.1965-ൽ ഉദയ സ്റ്റുഡിയോ നിർമ്മിച്ച ‘ഒതേനന്റെ മകൻ’ എന്ന ചിത്രത്തിലൂടെയാണ് അപ്പച്ചൻ വെള്ളിത്തിരയിൽ അരങ്ങേറ്റം കുറിക്കുന്നത്. സത്യൻ നായകനായ ഈ ചിത്രത്തിന് ശേഷം ഉദയയുടെ നിരവധി സിനിമകളിൽ അദ്ദേഹം ഭാഗമായി. എന്നാൽ കെ.എസ്. സേതുമാധവൻ സംവിധാനം ചെയ്ത ‘അനുഭവങ്ങൾ പാളിച്ചകൾ’ എന്ന ചിത്രത്തിലെ തൊഴിലാളി നേതാവിന്റെ വേഷമാണ് അദ്ദേഹത്തിന് വലിയ ബ്രേക്ക് നൽകിയത്.മലയാള സിനിമയിലെ എല്ലാ സൂപ്പർതാരങ്ങളുടെയും കൂടെ അപ്പച്ചൻ അഭിനയിച്ചിട്ടുണ്ട്. വില്ലൻ വേഷങ്ങളിലും ക്യാരക്ടര്‍ വേഷങ്ങളിലുമാണ് പുന്നപ്ര അപ്പച്ചൻ അഭിനയിച്ചിട്ടുള്ളത്. കന്യാകുമാരി, പിച്ചിപ്പു, നക്ഷത്രങ്ങളേ കാവല്‍, അങ്കക്കുറി, ഇവര്‍, വിഷം, ഓപ്പോള്‍, കോളിളക്കം, ഇത്തിരി നേരം ഒത്തിരി കാര്യം, ആട്ടക്കലാശം, അസ്‍ത്രം, പാവം ക്രൂരൻ തുടങ്ങിയവയാണ് പുന്നപ്ര അപ്പച്ചന്റെ ശ്രദ്ധേയ ചിത്രങ്ങള്‍.