തമിഴ് സിനിമ നടൻ റോബോ ശങ്കർ(46) അന്തരിച്ചു. കഴിഞ്ഞ ആഴ്ച വീട്ടിൽ കുഴഞ്ഞ് വീണതിനെ തുടർന്ന് ഒരു സ്വകാര്യ ആശുപത്രിയിൽ ചികിത്സയിൽ ആയിരുന്നു. ഇന്നലെ രാത്രി 8.30 ഓടെ അദ്ദേഹത്തിന്റെ ആരോഗ്യനില വഷളാവുകയും മരണമടയുകയും ചെയ്തു.ഭാര്യ പ്രിയങ്കയോടൊപ്പം ദമ്പതികളുടെ ടെലിവിഷൻ ഷോയുടെ ചിത്രീകരണത്തിനിടെ താരം കുഴഞ്ഞുവീഴുകയായിരുന്നു. അണിയറപ്രവർത്തകർ ഉടൻതന്നെ അദ്ദേഹത്തെ അടുത്തുള്ള ഒരു സ്വകാര്യ ആശുപത്രിയിലേക്ക് കൊണ്ടുപോയി,ചികിത്സയിൽ ഇരിക്കെയാണ് മരണം.രണ്ട് വർഷം മുൻപ് മഞ്ഞപിത്തം ബാധിച്ച് അത്യാഹിത നിലയിലായിരുന്നു താരം. തമിഴ് സിനിമ മേഖലയിൽ നിന്നും നിരവധി താരങ്ങൾ അനുശോചനം രേഖപ്പെടുത്തി രംഗത്തെത്തുന്നുണ്ട്. കമൽ ഹാസൻ തന്റെ സോഷ്യൽ മീഡിയ അക്കൗണ്ടിൽ വൈകാരിക കുറിപ്പ് പങ്കുവെച്ചിരുന്നു.

പത്തനംതിട്ട: ശബരിമല ദര്‍ശനം നടത്തി രാഹുല്‍ മാങ്കൂട്ടത്തില്‍ എംഎല്‍എ. പുലര്‍ച്ചെ അഞ്ചിന് നട തുറന്നപ്പോള്‍ ദര്‍ശനം നടത്തുകയായിരുന്നു. പമ്പയില്‍ നിന്നും കെട്ട് നിറച്ചാണ് മല ചവിട്ടിയത്. വിവാദങ്ങള്‍ക്കിടെ കഴിഞ്ഞ ദിവസമാണ് രാഹുല്‍ മാങ്കൂട്ടത്തില്‍ ശബരിമലയിലെത്തിയത്. രാത്രി 10 മണിയോടെ രാഹുല്‍ മാങ്കൂട്ടത്തില്‍ പമ്പയില്‍ എത്തി.പമ്പയില്‍ നിന്നും കെട്ട് നിറച്ച് സന്നിധാനത്തേക്ക് പുറപ്പെടുകയായിരുന്നു. എന്നാല്‍ വൈകിട്ട് നട അടച്ചശേഷമാണ് രാഹുല്‍ മാങ്കൂട്ടത്തില്‍ പമ്പയില്‍ എത്തിയത്. കഴിഞ്ഞ ദിവസം ആരംഭിച്ച നിയമസഭാ സമ്മേളനത്തിന്റെ ആദ്യ ദിവസം രാഹുല്‍ മാങ്കൂട്ടത്തില്‍ നിയമസഭയിലെത്തിയിരുന്നു. എന്നാല്‍ പിന്നീടുള്ള ദിവസങ്ങളില്‍ എത്തിയിരുന്നില്ല. മണ്ഡലത്തില്‍ സജീവമാകുമെന്നായിരുന്നു വിവരം. അതിന് മുന്നോടിയായാണ് ശബരിമല ദര്‍ശനം

തൃശൂർ അതിരൂപതയുടെ മുൻ ആർച്ച് ബിഷപ്പ് മാർ ജേക്കബ് തൂങ്കുഴിയുടെ വിയോഗത്തിൽ മുഖ്യമന്ത്രി പിണറായി വിജയൻ അനുശോചനം രേഖപ്പെടുത്തി. തൃശൂർ അതിരൂപത ആർച്ച് ബിഷപ്, മാനന്തവാടി രൂപതയുടെ പ്രഥമ ബിഷപ്, താമരശേരി രൂപതാ ബിഷപ് എന്നീ സ്ഥാനങ്ങളിൽ ഇരുന്നുകൊണ്ട് അദ്ദേഹം സ്തുത്യർഹ സേവനം അനുഷ്ഠിച്ചു. 1997 ൽ തൃശൂർ അതിരൂപത ആർച്ച് ബിഷപ് സ്ഥാനമേറ്റെടുത്ത മാർ ജേക്കബ് തുങ്കുഴി നീണ്ട 10 വർഷക്കാലം ആ സ്ഥാനത്തു തുടർന്നു. രണ്ടുതവണ കാത്തലിക് ബിഷപ്സ് കോൺഫറൻസ് ഓഫ് ഇന്ത്യയുടെ വൈസ് പ്രസിഡന്റ് പദവിയും വഹിച്ചു. ജീവൻ ടിവിയുടെ സ്ഥാപക ചെയർമാൻ ആയിരുന്നു അദ്ദേഹം. അദ്ദേഹത്തിന്റെ വിയോഗം നികത്താനാവാത്ത വിടവാണ് സൃഷ്ടിച്ചിരിക്കുന്നതെന്ന് മുഖ്യമന്ത്രി പറഞ്ഞു.

മൈസൂരു : മൈസൂരു ദസറയ്ക്ക് തിങ്കളാഴ്ച തുടക്കമാകും. ഒക്ടോബർ രണ്ടിന് അവസാനിക്കും. മറ്റു സംസ്ഥാനങ്ങളിനിന്ന് ആയിരക്കണക്കിനുപേരാണ് ദസറ ആഘോഷത്തിനായി നഗരത്തിലെത്തുക.

ഒക്‌ടോബർ രണ്ടിനാണ് ആഘോഷങ്ങളുടെ പ്രധാന ആകർഷണമായ ജംബു സവാരി. ഇക്കുറി ഒൻപതു ദിവസത്തിനു പകരം 11 ദിവസമാണ് ആഘോഷം.

ആഘോഷങ്ങൾക്കും അതിഥികളെ വരവേൽക്കാനുമായി നഗരം ഒരുങ്ങി. പ്രധാന റോഡുകളെല്ലാം നവീകരിച്ചു. നഗരത്തിലെ പ്രധാന കേന്ദ്രങ്ങളിൽ വൈദ്യുതാലങ്കാരങ്ങൾ ഒരുക്കി.

ദസറ ഉദ്ഘാടനം ചെയ്യുന്നത് എഴുത്തുകാരിയും ബുക്കർ പ്രൈസ് ജേതാവുമായ ബാനു മുഷ്താഖാണ്. ഇവരെ ഉദ്ഘാടകയാക്കിയതിനെതിരേ ബിജെപി വൻ പ്രതിഷേധം ഉയർത്തിയിരുന്നു. എന്നാൽ, ഇതിനെ പ്രതിരോധിച്ച് സർക്കാരും കോൺഗ്രസും രംഗത്തെത്തുകയായിരുന്നു. സർക്കാർ തീരുമാനത്തെ ചോദ്യംചെയ്ത് മൈസൂരു മുൻ എംപി ബിജെപിയുടെ പ്രതാപ് സിൻഹ ഉൾപ്പെടെയുള്ളവർ നൽകിയ പൊതുതാത്പര്യ ഹർജികൾ കർണാടക ഹൈക്കോടതി തള്ളിയിരുന്നു.

മൈസൂരു കൊട്ടാരം, ചാമുണ്ഡിക്ഷേത്ര പരിസരം, നഗരത്തിലെ പ്രധാന സഞ്ചാരകേന്ദ്രങ്ങൾ എന്നിവിടങ്ങളിലെല്ലാം സൗന്ദര്യവത്കരണം അവസാന ഘട്ടത്തിലാണ്. കൊട്ടാരത്തിലെ ദർബാർ ഹാളിനുള്ളിൽ രാജകീയ നിലവിളക്കുകളുടെ അറ്റകുറ്റപ്പണികൾ ആരംഭിച്ചു. പബ്ലിക് ദർബാർ ഹാൾ, പ്രൈവറ്റ് ദർബാർ ഹാൾ, കല്യാണ മണ്ഡപ് എന്നിവയുടെ മേൽക്കൂര അലങ്കരിക്കുന്ന അമൂല്യമായ lതൂക്കുവിളക്കുകളുടെ അറ്റകുറ്റപ്പണികൾ മൈസൂർ കൊട്ടാരം ബോർഡ് ഏറ്റെടുത്തിട്ടുണ്ട്. കേടായ ബൾബുകൾ മാറ്റിസ്ഥാപിക്കയാണ് ഇപ്പോൾ.

മനോഹരമായ വൈദ്യുതി വിളക്കുകൾ, വെള്ള, ചുവപ്പ്, പച്ച നിറങ്ങളിലുള്ള താഴികക്കുടം, 1926-ൽ ചെക്കോസ്ലോവാക്യയിൽനിന്ന് ഇറക്കുമതി ചെയ്ത നിലവിളക്ക് എന്നിവയെല്ലാം കൊട്ടാരത്തിൽ ഒരുക്കുന്നുണ്ട്.

ഇവയിൽ, പബ്ലിക് ദർബാർ ഹാളിൽ ഒൻപത് നിലവിളക്കുകളുണ്ട്. സ്വകാര്യ ദർബാർ ഹാളിൽ എട്ടെണ്ണവും.

കോഴിക്കോട് :യുവജനങ്ങള്‍ക്കിടയില്‍ വോട്ടിന്റെ പ്രാധാന്യം ഉണര്‍ത്തുക, സമ്മതിദായകരുടെ പങ്കാളിത്തം ഉറപ്പാക്കുക എന്നീ സന്ദേശങ്ങളുമായി ജില്ലാ ഭരണകൂടം, തെരഞ്ഞെടുപ്പ് വിഭാഗം, സ്വീപ്, എന്‍എസ്എസ്, ഇലക്ടറല്‍ ലിറ്ററസി ക്ലബുകള്‍, ജില്ലാ കലക്ടറുടെ ഇന്റേണ്‍സ് എന്നിവരുടെ നേതൃത്വത്തില്‍ വോട്ടര്‍ ബോധവത്കരണ കലാജാഥ സംഘടിപ്പിച്ചു. അന്താരാഷ്ട്ര ജനാധിപത്യ ദിനത്തോടനുബന്ധിച്ച് കലക്ടറേറ്റില്‍നിന്നാരംഭിച്ച കലാജാഥ ജില്ലാ കലക്ടര്‍ സ്‌നേഹില്‍ കുമാര്‍ സിംഗ് ഫ്‌ളാഗ് ഓഫ് ചെയ്തു. സാമൂതിരി ഗുരുവായൂരപ്പന്‍ കോളേജിലെ വിദ്യാര്‍ഥികളുടെ നേതൃത്വത്തില്‍ നടന്ന കലാജാഥ ജെഡിടി, ലോ കോളേജ്, ദേവഗിരി കോളേജ്, മലബാര്‍ ക്രിസ്ത്യന്‍ കോളേജ്, ഐഎച്ച്ആര്‍ഡി കോളേജ്, പുതിയ ബസ്സ്റ്റാന്‍ഡ്, കോഴിക്കോട് ബീച്ച് എന്നിവിടങ്ങളില്‍ പര്യടനം നടത്തി.

ഇലക്ഷന്‍ ഡെപ്യൂട്ടി കലക്ടര്‍ ഗോപിക ഉദയന്‍, ജില്ലാ സ്വീപ് കോഓഡിനേറ്റര്‍ ഡെപ്യൂട്ടി കലക്ടര്‍ സി ബിജു, ജില്ലാ ഇന്‍ഫര്‍മേഷന്‍ ഓഫീസര്‍ സി പി അബ്ദുല്‍ കരീം, കാലിക്കറ്റ് യൂനിവേഴ്‌സിറ്റി ജില്ലാ നാഷണല്‍ സര്‍വീസ് സ്‌കീം കോഓഡിനേറ്റര്‍ ഫസീല്‍ അഹ്‌മദ്, ജില്ലാ ഇലക്ടറല്‍ ലിറ്ററസി ക്ലബ് കോഓഡിനേറ്റര്‍ ഡോ. നിജീഷ് എ, സാമൂതിരി ഗുരുവായൂരപ്പന്‍ കോളേജ് എന്‍എസ്എസ് കോഓഡിനേറ്റര്‍ ജിബിന്‍ ബേബി, അധ്യാപിക പി ഐ മീര എന്നിവര്‍ പങ്കെടുത്തു.

കോഴിക്കോട് :ജില്ലാ പ്രവാസി പരാതി പരിഹാര സമിതി യോഗം സെപ്റ്റംബര്‍ 22ന് വൈകിട്ട് നാലിന് ജില്ലാ കലക്ടറുടെ ചേംബറില്‍ ചേരും. യോഗത്തില്‍ പരിഗണിക്കേണ്ട പരാതികള്‍ 21ന് വൈകീട്ട് അഞ്ചിനകം കോഴിക്കോട് ജില്ലാ ജോയിന്റ് ഡയറക്ടറുടെ കാര്യാലയത്തില്‍ നേരിട്ടോ തപാല്‍ മുഖേനയോ ഇ-മെയില്‍ ആയോ നല്‍കണം. പരാതികള്‍ കണ്‍വീനര്‍, ജില്ലാതല പ്രവാസി പരാതി പരിഹാര സമിതി ആന്‍ഡ് ഡെപ്യൂട്ടി ഡയറക്ടര്‍, ജില്ലാ ജോയിന്റ് ഡയറക്ടറുടെ കാര്യാലയം, തദ്ദേശ സ്വയംഭരണ വകുപ്പ്, സിവില്‍ സ്റ്റേഷന്‍ പിഒ, കോഴിക്കോട് -673020 എന്ന വിലാസത്തില്‍ നല്‍കണം. ജില്ലാതല പ്രവാസി പരാതി പരിഹാര സമിതിയിലേക്കുള്ള പരാതി എന്ന് പ്രത്യേകം രേഖപ്പെടുത്തണം. ഇ-മെയില്‍: jdlsgdkzd@gmail.com. ഫോണ്‍: 0495 2371799, 2371916.