spot_img
Saturday, November 21, 2026
Home Blog Page 180

പ്രിയദർശിനി സൗജന്യ യാത്ര’; ആദ്യ ദിവസം യാത്ര ചെയ്തത് 13 ലക്ഷം വനിതകൾ.

0

തിരുവനന്തപുരം: സംസ്ഥാനത്ത് വനിതകൾക്കായി ആരംഭിച്ച ‘പ്രിയദർശിനി സൗജന്യ യാത്രാ’ പദ്ധതിക്ക് മികച്ച പ്രതികരണം. പദ്ധതി നടപ്പിലാക്കിയതിന് പിന്നാലെ കെഎസ്ആർടിസി ഓർഡിനറി ബസുകളിൽ യാത്ര ചെയ്യുന്ന സ്ത്രീകളുടെ എണ്ണത്തിൽ വൻ വർധനവാണ് രേഖപ്പെടുത്തിയിരിക്കുന്നത്. കണക്കുകൾ പ്രകാരം മുൻ ആഴ്ചകളെ അപേക്ഷിച്ച് ലക്ഷക്കണക്കിന് അധികം വനിതകളാണ് ഒറ്റ ദിവസം കൊണ്ട് യാത്രാസൗകര്യം പ്രയോജനപ്പെടുത്തിയത്.

യാത്രക്കാരുടെ എണ്ണത്തിൽ മുൻപ് ഉണ്ടായിരുന്നതിനേക്കാൾ വലിയ കുതിപ്പാണ് പുതിയ കണക്കുകൾ സൂചിപ്പിക്കുന്നത്.ലഭിച്ച വിവരങ്ങൾ പ്രകാരം ഇന്നലെ മാത്രം 13,29,938 സ്ത്രീ യാത്രക്കാരാണ് ഓർഡിനറി ബസുകളെ ആശ്രയിച്ചത്. തൊട്ടുമുൻപുള്ള തിങ്കളാഴ്ച ഇത് 7,34,693 ആയിരുന്നു.

അതായത്, ഒറ്റദിവസം കൊണ്ട് 5,95,245 വനിതാ യാത്രക്കാരുടെ വർധനവാണ് ഉണ്ടായിരിക്കുന്നത്. സാധാരണക്കാർക്കും ജോലിക്ക് പോകുന്ന സ്ത്രീകൾക്കും ഈ പദ്ധതി വലിയ ആശ്വാസമായി മാറിയിരിക്കുകയാണ് എന്നാണ് ഈ കണക്കുകൾ വ്യക്തമാക്കുന്നത്.സൗജന്യ യാത്രാ പദ്ധതിയുടെ ഭാഗമായി നൽകുന്ന ‘സീറോ ടിക്കറ്റ്’ ഉപയോഗിച്ച് ഇന്നലെ 7,83,115 വനിതകളാണ് യാത്ര ചെയ്തത്.സ്ത്രീ ശാക്തീകരണത്തിനും അവരുടെ സുരക്ഷിതമായ യാത്രയ്ക്കും ഈ പദ്ധതി വലിയ തോതിൽ സഹായിക്കുന്നുണ്ട്.

എന്നാൽ, ഈ സൗജന്യ യാത്ര ഗതാഗത വകുപ്പിന് വലിയ സാമ്പത്തിക ബാധ്യതയും സൃഷ്ടിക്കുന്നുണ്ട്. കണക്കുകൾ പ്രകാരം ഇന്നലെ മാത്രം സീറോ ടിക്കറ്റ് നൽകിയകിലൂടെ 1,59,56,801 രൂപയുടെ വരുമാന നഷ്ടമാണ് ഉണ്ടായിരിക്കുന്നത്. മികച്ച ജനപിന്തുണ ലഭിക്കുമ്പോഴും, ഈ സാമ്പത്തിക ബാധ്യത എങ്ങനെ പരിഹരിക്കും എന്നത് വരും ദിവസങ്ങളിൽ നിർണായകമാകും.

സർക്കാർ ഞങ്ങളെക്കൂടി ശ്രദ്ധിക്കണം’; മിനിമം ചാർജ് 50 രൂപയാക്കണമെന്ന ആവശ്യത്തിലുറച്ച് ഓട്ടോറിക്ഷാ തൊഴിലാളികൾ.

0

തിരുവനന്തപുരം: മിനിമം ചാര്‍ജ് 50 രൂപയാക്കണമെന്ന ആവശ്യത്തിലുറച്ച് ഓട്ടോറിക്ഷാ തൊഴിലാളികള്‍. ഇന്ധനവില ഉയരുന്നതിനനുസരിച്ച് ഓട്ടോ ചാര്‍ജും വര്‍ദ്ധിപ്പിക്കണമെന്നാണ് ആവശ്യം. സിഐടിയുവിന്റെ നേതൃത്വത്തില്‍ ഇന്ന് സെക്രട്ടേറിയറ്റ് മാര്‍ച്ച് സംഘടിപ്പിക്കും. ജില്ലാ കേന്ദ്രങ്ങളില്‍ നിന്ന് കളക്ടറേറ്റുകളിലേക്കാണ് മാര്‍ച്ച് നടത്തുക.പഴയ റേറ്റില്‍ ഇപ്പോള്‍ ഓടാന്‍ പറ്റില്ലെന്നും നാല് വര്‍ഷത്തിന് മുമ്പേയാണ് ചാര്‍ജ് കൂട്ടിയതെന്നും തലസ്ഥാനത്തെ ഓട്ടോറിക്ഷാ ഡ്രൈവര്‍മാര്‍ റിപ്പോര്‍ട്ടറിനോട് പറഞ്ഞു.

സര്‍ക്കാര്‍ തങ്ങളെക്കൂടി ശ്രദ്ധിക്കണമെന്നും അവര്‍ പറയുന്നു.കെഎസ്ആര്‍ടിസിയില്‍ സ്ത്രീകള്‍ക്ക് സൗജന്യ യാത്ര അനുവദിച്ച പദ്ധതി തിരിച്ചടിയായെന്നും ഇവര്‍ പറയുന്നു. ഇന്ധനവില ദിനംപ്രതി ഉയരുന്ന സാഹചര്യത്തിൽ ചാര്‍ജ് വര്‍ധനവ് ആവശ്യപ്പെട്ട് മുഖ്യമന്ത്രിക്കും ഗതാഗത വകുപ്പ് മന്ത്രിക്കും ഓട്ടോ തൊഴിലാളികള്‍ പരാതി നല്‍കിയിരുന്നു.

കാലവർഷം ഒതുങ്ങുന്നു; ഇന്ന് രണ്ട് ജില്ലകളിൽ യെല്ലോ അലേർട്ട്.

0

സംസ്ഥാനത്ത് കാലവർഷം ദുർബലപ്പെടുന്നു. ഇന്ന് രണ്ട് ജില്ലകളിലാണ് കേന്ദ്ര കാലാവസ്ഥ നിരീക്ഷണ കേന്ദ്രം യെല്ലോ അലർട്ട് പ്രഖ്യാപിച്ചത്. എറണാകുളം, കോട്ടയം ജില്ലകളിലാണ് യെല്ലോ അലർേട്ട് പ്രഖ്യാപിച്ചത്. മറ്റു ജില്ലകളിലും മഴ മുന്നറിയിപ്പുകൾ ഇല്ല. ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്.

24 മണിക്കൂറിൽ 64.5 മില്ലിമീറ്റർ മുതൽ 115.5 മില്ലിമീറ്റർ വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് അർത്ഥമാക്കുന്നത്.അതേസമയം ശക്തമായ കാറ്റിനും ഒറ്റപ്പെട്ട മ‍ഴയ്ക്കും സാധ്യതയുള്ളയതായി കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകിയിട്ടുണ്ട്.

മണിക്കൂറിൽ 40 കിലോമീറ്റർ വരെ വേഗതയിൽ വീശാവുന്ന കാറ്റിന് സാധ്യതയുണ്ടെന്നാണ് മുന്നറിയിപ്പ്. നാളെ ഒരു ജില്ലകളിലും നിലവിൽ മഴ മുന്നറിയില്ല.16/06/2026 മുതൽ 18/06/2026 വരെ തെക്കൻ തമിഴ്‌നാട് തീരം, ഗൾഫ് ഓഫ് മാന്നാർ, അതിനോട് ചേർന്ന കന്യാകുമാരി പ്രദേശം, ശ്രീലങ്കൻ തീരം, തെക്കു പടിഞ്ഞാറൻ ബംഗാൾ ഉൾക്കടൽ, തെക്കു കിഴക്കൻ ബംഗാൾ ഉൾക്കടൽ എന്നിവിടങ്ങളിൽ 40 മുതൽ 50 കിലോമീറ്റർ വരെയും ചില അവസരങ്ങളിൽ 60 കിലോമീറ്റർ വരെ ശക്തമായ കാറ്റിനും മോശം കാലാവസ്ഥയ്ക്കും സാധ്യതയുണ്ട്.

പ്രിയദർശിനി; ‘ഓർഡിനറി ബസുകൾ സിറ്റി ഫാസ്റ്റ് ആക്കിയിട്ടില്ല, തെറ്റായ വാർത്ത വിശ്വസിക്കരുത്’: കെഎസ്ആർടിസി.

തിരുവനന്തപുരം: ഓര്‍ഡിനറി ബസുകള്‍ സിറ്റി ഫാസ്റ്റ് ആക്കിയെന്ന വാര്‍ത്ത നിഷേധിച്ച് കെഎസ്ആര്‍ടിസി. ഓര്‍ഡിനറി ബസ്സുകള്‍ സിറ്റി ഫാസ്റ്റ് ആക്കിയിട്ടില്ലെന്ന് കെഎസ്ആര്‍ടിസി അറിയിച്ചു. സ്ത്രീകള്‍ക്ക് സൗജന്യ യാത്ര ഓര്‍ഡിനറി ബസുകളില്‍ മാത്രമാണുള്ളതെന്നും സിറ്റി ഫാസ്റ്റ് സര്‍വീസുകള്‍ പദ്ധതിയില്‍ ഉള്‍പ്പെട്ടിട്ടില്ലെന്നും കെഎസ്ആര്‍ടിസി വ്യക്തമാക്കി.

സിറ്റി ഫാസ്റ്റിന് പ്രത്യേക നിരക്കും പ്രത്യേക സര്‍വീസ് വിഭാഗവുമാണ്. ഓര്‍ഡിനറി ബസുകള്‍ എല്ലാം പഴയതുപോലെ തന്നെ തുടരുന്നു. പദ്ധതിയില്‍ ഉള്‍പ്പെട്ട ബസുകളില്‍ വ്യക്തമായ സ്റ്റിക്കറുകള്‍ പതിപ്പിച്ചിട്ടുണ്ട്. തിരുവനന്തപുരം നഗരത്തില്‍ 384 സിറ്റി ഫാസ്റ്റ് ബസുകള്‍ സര്‍വീസ് നടത്തുന്നുണ്ടെന്നും കെഎസ്ആര്‍ടിസി അറിയിച്ചു.

687 ഓര്‍ഡിനറി ബസുകളും സര്‍വീസിലുണ്ടെന്നാണ് കണക്ക്. സോഷ്യല്‍ മീഡിയയില്‍ പ്രചരിക്കുന്ന തെറ്റായ വാര്‍ത്തകള്‍ വിശ്വസിക്കരുതെന്നും പ്രിയദര്‍ശിനി പദ്ധതിയുമായി ബന്ധപ്പെട്ട വിവരങ്ങള്‍ നേരത്തേ തന്നെ പൊതുജനങ്ങള്‍ക്ക് നല്‍കിയിരുന്നുവെന്നും കെഎസ്ആര്‍ടിസി വിശദീകരിച്ചു.അതേസമയം തിരുവനന്തപുരം നഗരത്തില്‍ സൗജന്യ ബസ്സുകള്‍ കുറവാണെന്നാണ് കണക്ക്. നഗരത്തില്‍ 95 ശതമാനവും സിറ്റി ഫാസ്റ്റ് മാത്രമാണുള്ളത്. വെള്ളനാട് നിന്ന് നഗരത്തിലേക്ക് നേരിട്ട് ഓര്‍ഡിനറി ബസ്സില്ല. സിറ്റി ഡിപ്പോ പരിധിയില്‍ ആണ് വെള്ളനാട് ഉള്‍പ്പെടുന്നത്. മറ്റ് സിറ്റി ഡിപ്പോകളിലും ഓര്‍ഡിനറി വളരെ കുറവാണ്.

എന്നാല്‍ തിരുവനന്തപുരം നഗരം വിട്ടാല്‍ ഓര്‍ഡിനറി ധാരാളം ഉണ്ട്. കോര്‍പ്പറേഷന്‍ കൊടുത്ത സ്മാര്‍ട്ട് സിറ്റി ഇലക്ട്രിക് ബസ്സുകള്‍ സിറ്റി ഫാസ്റ്റ് ആണ്.തിങ്കളാഴ്ച മുതലാണ് സ്ത്രീകള്‍ക്ക് കെഎസ്ആര്‍ടിസി ഓര്‍ഡിനറി ബസുകളില്‍ സൗജന്യയാത്ര അനുവദിക്കുന്ന പദ്ധതിയായ പ്രിയദര്‍ശിനി പദ്ധതി ആരംഭിച്ചത്. മുഖ്യമന്ത്രി വി ഡി സതീശനാണ് പദ്ധതി ഉദ്ഘാടനം നിർവഹിച്ചത്. തിരുവനന്തപുരം പാപ്പനംകോഡ് ഡിപ്പോയുടെ ബസില്‍ തമ്പാനൂര്‍ മുതല്‍ പെരുമാതുറ വരെയായിരുന്നു പ്രിയദര്‍ശിനി പദ്ധതിയുടെ ഉദ്ഘാടന യാത്ര.

സൗജന്യ യാത്രയ്ക്കായി സ്ത്രീകള്‍ക്കും ട്രാന്‍സ്ജെന്‍ഡര്‍ വ്യക്തികള്‍ക്കും തിരിച്ചറിയല്‍ കാര്‍ഡോ രജിസ്ട്രേഷനോ ആവശ്യമില്ല. പ്രായമുള്‍പ്പെടെ മാനദണ്ഡവുമല്ല. എല്ലാ സ്ത്രീകള്‍ക്കും സൗജന്യ യാത്ര അനുവദിച്ചതിനാല്‍ വിദ്യാര്‍ത്ഥിനികള്‍ക്ക് ഓര്‍ഡിനറി കെഎസ്ആര്‍ടിസി ബസുകളില്‍ ഇനി കണ്‍സെഷന്‍ ടിക്കറ്റ് ആവശ്യമില്ല. സൗജന്യ യാത്ര അനുവദിക്കുന്ന ബസുകളുടെ മുന്നിലും സൈഡിലുമായി ‘പ്രിയദര്‍ശിനി സ്ത്രീ സൗജന്യ യാത്ര’ എന്ന് എഴുതിയിട്ടുണ്ടാകും.

പ്ലസ്‌ വൺ ആദ്യ അലോട്ട്മെന്റ്; പ്രവേശനം നാളെവരെ.

തിരുവനന്തപുരം: പ്ലസ്‌ വൺ ആദ്യ അലോട്ട്മെന്റ് ലഭിച്ച വിദ്യാർഥികളുടെ പ്രവേശന നടപടികൾ ആരംഭിച്ചു. ബുധൻ വൈകിട്ട്‌ അഞ്ചുവരെ പ്രവേശനം നേടാം. ഒന്നാം ഓപ്‌ഷൻ ലഭിച്ചവർ സ്ഥിരപ്രവേശനം നേടണം. മറ്റ് ഓപ്ഷനുകൾ ലഭിച്ചവർ സ്ഥിരപ്രവേശനമോ താൽക്കാലിക പ്രവേശനമോ നേടാം. അടുത്ത അലോട്ട്മെന്റുകളിൽ ഉയർന്ന ഓപ്ഷൻ ലഭിച്ചാൽ അതനുസരിച്ച് മാറാൻ ഇവർക്ക് അവസരമുണ്ട്‌. ആവശ്യമെങ്കിൽ തെരഞ്ഞെടുത്ത ഏതാനും ഉയർന്ന ഓപ്ഷനുകൾ മാത്രമായി റദ്ദാക്കാം. അതിനുള്ള അപേക്ഷയും പ്രവേശനം നേടുന്ന സ്‌കൂളിൽ നൽകണം.

അലോട്ട്‌മെന്റ് ലഭിച്ചിട്ടും താൽക്കാലിക പ്രവേശനം നേടാതിരിക്കുന്ന വിദ്യാർഥികളെ തുടർന്നുള്ള അലോട്ട്മെന്റുകളിൽ പരിഗണിക്കില്ല. ഹയർ സെക്കൻഡറിയിൽ 2,46,638 പേർക്ക്‌ അലോട്ട്മെന്റ് ലഭിച്ചു. 71,264 സീറ്റ്‌ ഒഴിവുണ്ട്. ആകെ 4,44,772 അപേക്ഷകളാണ് ഉള്ളത്.പ്രവേശന സമയത്ത് അനധികൃത പിരിവ് നടത്തിയാൽ സ്‌കൂൾ അധികൃതർക്കെതിരെ കർശന അച്ചടക്ക നടപടി സ്വീകരിക്കുമെന്ന്‌ പൊതുവിദ്യാഭ്യാസ ഡയറക്ടർ അറിയിച്ചു. അലോട്ട്‌മെന്റ് ലെറ്ററിൽ സൂചിപ്പിച്ചിട്ടുള്ള ഫീസ് അല്ലാതെ മറ്റൊരു തരത്തിലും സ്കൂ‌ളിൽ ഫീസോ, ഫണ്ടോ നൽകേണ്ടതില്ല.

അനധികൃത പിരിവ് നടന്നാൽ ബന്ധപ്പെട്ട ഫോൺ നമ്പറുകളിൽ അറിയിക്കുന്നതിനൊപ്പം ictcelldge@gmail.comവഴിയും പരാതി അയക്കാം. പ്രിൻസിപ്പൽമാർക്കും നിർദേശം നൽകിയിട്ടുണ്ട്. പരാതികളുടെ അടിസ്‌ഥാനത്തിൽ സംസ്ഥാന, ജില്ലാ തലത്തിൽ സ്‌ക്വാഡുകൾ രൂപീകരിച്ച് മിന്നൽ പരിശോധനയും ആരംഭിച്ചു.

പരാതിപ്പെടാവുന്ന 
നമ്പറുകൾപൊതുവിദ്യാഭ്യാസ ഡയറക്‌ടർ: 0471 –2580508, 0471 – 580522ജോയിന്റ് ഡയറക്‌ടർ (അക്കാദമിക്): 0471 – 2580742സീനിയർ ഫിനാൻസ് ഓഫീസർ: 0471 – 2580730കോർഡിനേറ്റർ ഐസിടി സെൽ: 0471 – 2529855

വയനാട്ടിലെ വയോധികയുടെ കൊലപാതകം; 17 കാരൻ പിടിയിൽ.

0

വയനാട്: വൈപ്പടിയിൽ വയോധികയുടെ കൊലപാതകത്തിൽ 17 വയസുകാരൻ പിടിയിൽ. വൈപ്പടി സ്വദേശിനി 85 വയസുകാരി ഫാത്തിമ മേയ് 24 നാണ് കൊല്ലപ്പെട്ടത്. പണം ചോദിച്ചിട്ട് നൽകാത്തതിലുള്ള വിരോധത്തിലാണ് കൊലപാതകം.ക്രൂരമായി മർദിച്ച് വീടിന്റെ കിടപ്പുമുറിയിൽ വെച്ച് കഴുത്തിൽ വള്ളി ചുറ്റി കൊലപ്പെടുത്തുകയായിരുന്നു. 17 വയസ്സുകാരനെ ജുവനൈൽ ജസ്റ്റിസ് ബോർഡിൽ ഹാജരാക്കി. കൊലപാതകം നടന്ന് 22 ദിവസതിന് ശേഷമാണ് പ്രതി പൊലീസ് പിടിയിലായത്.

സമനില പിടിച്ച് രക്ഷപ്പെട്ട് ബെൽജിയവും ഉറൂഗ്വേയും.

0

മയാമി: അവസാന മിനുട്ടിൽ മുന്നേറ്റ താരം മാക്സ്മിലിയാനോ അറാഹോ നേടിയ ഗോളിന്റെ ബലത്തിൽ സൗദി അറേബ്യക്കതിരെ സമനില പിടിച്ച് ഉറുഗ്വേ. സമനിലയോടെ ഗ്രൂപ്പ് എച്ചിൽ സ്പെയ്നിനെ മറികടന്ന് ഉറുഗ്വേ ഒന്നാം സ്ഥാനത്തേക്ക് കയറി. ആദ്യ പകുതിയിൽ അബ്ദുല്ല അൽ അമ്രിയുടെ ഗോളിലാണ് സൗദി മത്സരത്തിൽ ലീഡെടുക്കുന്നത്.

ഡാർവിൻ ന്യൂനസ്, റോഡ്രിഗോ ബെന്റാങ്കർ, ഫെഡറികോ വൽവർഡേ തുടങ്ങിയ പ്രമുഖരെ അണിനിരത്തിയിറങ്ങിയ ലാറ്റിൻ അമേരിക്കൻ വമ്പന്മാർക്കെതിരെ മികച്ച തുടക്കമാണ് സൗദിക്ക് ലഭിച്ചത്.

ആദ്യ മിനിറ്റുകളിൽ തന്നെ സൗദി നടത്തിയ മുന്നേറ്റങ്ങൾ നേരിയ വ്യത്യാസത്തിൽ പുറത്തേക്ക് പോയി. എന്നാൽ ആദ്യ പകുതി അവസാനിക്കുന്നതിന് തൊട്ട് മുമ്പായി നടന്ന സൗദി മുന്നേറ്റം ഉറുഗ്വൻ ഗോൾകീപ്പർ ഫെർണാണ്ടോ മുസ്‌ലേറയെ കീഴ്പ്പെടുത്തി.ഗ്രൂപ്പ് ജിയിലെ ആദ്യ മത്സരത്തിൽ ശക്തരായ ബെൽജിയത്തെ ഈജിപ്ത് സമനിലയിൽ തളച്ചു. ഇമാം അശൗറിന്റെ ഗോളിൽ ലീഡെടുത്ത ഈജിപ്തിനെതിരെ മുഹമ്മദ് ഹാനിയുടെ സെൽഫ് ഗോളാണ് ബെൽജിയത്തിന് തുണയായത്. ഗ്രൂപ്പിലെ രണ്ടാം മത്സരത്തിൽ ഇറാൻ – ന്യൂസിലൻഡിനെ നേരിടും. ഇന്ത്യൻ സമയം പകൽ 6:30ന് യുഎസിലെ ലോസ് ആഞ്ചലസ്‌ സ്റ്റേഡിയത്തിലാണ് മത്സരം.

കരിപ്പൂരിൽ റെസ നിർമാണം ഡിസംബറിൽ പൂർത്തിയാകുമെന്ന് വിമാനത്താവളം ഡയറക്ടർ.

0

കരിപ്പൂർ: കോഴിക്കോട് അന്താരാഷ്ട്ര വിമാനത്താവളത്തിലെ റെസ നിർമാണം ഡിസംബറിൽ പൂർത്തിയാകുമെന്ന് വിമാനത്താവളം ഡയറക്ടർ മുകേഷ് യാദവ് അറിയിച്ചു. ഇതോടെ വലിയ വിമാനങ്ങൾക്ക് കോഴിക്കോട് എത്താനുള്ള വഴി തെളിയുമെന്നും അദ്ദേഹം പറഞ്ഞു.റെസയുടെ അറുപതു ശതമാനം നിർമാണവും പൂർത്തിയായി.

ഇതിന്റെ ഭാഗമായി ഇല്ലാതായ റൺവേ ക്രോസ് റോഡ് മറ്റൊരിടത്ത് നിർമിക്കാൻ ആവശ്യമെങ്കിൽ വിമാനത്താവള അതോറിറ്റിയുടെ ഭൂമി ലഭ്യമാക്കുമെന്നും ഡയറക്ടർ അറിയിച്ചു.ഗൾഫ് യുദ്ധം കോഴിക്കോട്ടെ 80 ശതമാനം വരെ സർവീസുകളെയും ബാധിച്ചു. വിമാന താവളത്തിൽ നിന്ന് ഒഴുകുന്ന വെള്ളം സമീപ വാസികൾക്ക് പ്രശ്നങ്ങൾ സൃഷ്ടിക്കുന്നത് തടയാൻ അഴുക്കു ചാലുകൾ വീതികൂട്ടും. സംസ്ഥാന സർക്കാറിന് ഇതുമായി ബന്ധപ്പെട്ട് അപേക്ഷ സമർപ്പിച്ചിട്ടുണ്ട്. ജില്ലാ ഭരണകൂടത്തിന്റെ നിർദേശമനുസരിച്ച് വിമാനത്താവള കോർപ്പറേറ്റ് ഫണ്ടിൽ നിന്ന് തുക അനുവദിക്കും.

വിമാനത്താവളത്തിൽ എത്തുന്ന പാസഞ്ചർ വാഹനങ്ങളിൽ നിന്ന് പ്രവേശനഫീസ് ഈടാക്കില്ല. 13 മിനിറ്റിൽ കൂടുതൽ തങ്ങുന്ന വാഹനങ്ങൾക്ക് മാത്രമാണ് പാർക്കിങ് ഫീസ്, എന്നാൽ കൊമേഴ്സ്യൽ വാഹനങ്ങൾക്ക് നൂറുരൂപ പ്രവേശന ഫീസ് ഈടാക്കും. വിമാനത്താവളത്തിൽ യാത്രക്കാരെ ഇറക്കുന്ന ഓല, ഊബർ തുടങ്ങിയ വാഹനങ്ങൾക്കും പ്രവേശന ഫീസില്ല. എന്നാൽ യാത്രക്കാരെ കയറ്റുന്ന ഇത്തരം വാഹനങ്ങളിൽ നിന്ന് ഫീസ് ഈടാക്കും.

തുരങ്കപാത പ്രവൃത്തി ദ്രുതഗതിയിൽ; വലതു വശത്തെ തുരങ്കം അൻപതുമീറ്റർ തുരന്നു, 24 മണിക്കൂറും പ്രവൃത്തി.

0

കോഴിക്കോട് : മലബാറിന്റെ വികസനക്കുതിപ്പിന്‌ പുതിയ വഴിത്തിരിവുണ്ടാക്കുന്ന ആനക്കാംപൊയിൽ-കള്ളാടി-മേപ്പാടി തുരങ്കപാതയുടെ നിർമാണം ദ്രുതഗതിയിൽ പുരോഗമിക്കുന്നു. ഇരട്ടത്തുരങ്കത്തിന്റെ വലതുവശത്തെ തുരങ്കം അൻപതുമീറ്ററിലധികം തുരന്നുകഴിഞ്ഞു. ഇടതുവശത്തെ തുരങ്കത്തിന്റെ പ്രവൃത്തിയും തുടങ്ങിയിട്ടുണ്ട്. മറുഭാഗത്ത് വയനാട് മേപ്പാടി കള്ളാടി ഭാഗത്തും നിർമാണപ്രവൃത്തി പുരോഗമിക്കുകയാണ്.

ഈ ഭാഗത്ത് തുടക്കത്തിൽ പാറകളില്ല. മലയോരത്ത് ഇടമുറിയാതെ മഴപെയ്യുന്നുണ്ടെങ്കിലും നിർമാണപ്രവൃത്തിയെ ഒരിക്കലും പ്രതികൂലമായി ബാധിച്ചിട്ടില്ല. രാത്രിയും ജോലി തകൃതിയാണ്. 24 മണിക്കൂർ ഷിഫ്റ്റിലാണ് പണിപുരോഗമിക്കുന്നത്.

ന്യൂ ഓസ്ട്രിയൻ ടണലിങ് മെത്തേഡിലാണ് തുരങ്കപാത നിർമാണം.കഴിഞ്ഞ മാർച്ച് ആറിന് അന്നത്തെ മുഖ്യമന്ത്രി പിണറായി വിജയനാണ് പാറതുരക്കൽ പ്രവൃത്തികൾക്ക് തുടക്കംകുറിച്ചത്. മറിപ്പുഴയിൽ താത്കാലികപാലത്തിന്റെ പ്രവൃത്തി പൂർത്തിയായിട്ടുണ്ട്. 2134.5 കോടി രൂപ വിനിയോഗിച്ചാണ് തുരങ്കപാതയുടെ നിർമാണം. കൊങ്കൺ റെയിൽവേ കോർപ്പറേഷൻ ലിമിറ്റഡിനാണ് നിർമാണച്ചുമതല. തുരങ്കപാതയുടെ നിർമാണക്കരാർ ഭോപാൽ ആസ്ഥാനമായുള്ള ദിലീപ് ബിൽഡ്കോൺ കമ്പനിയും സ്റ്റീൽ ബോസ്ട്രിങ് പാലത്തിന്റെ കരാർ ഹരിയാണ ആസ്ഥാനമായ പുനിയ കൺസ്ട്രക്‌ഷൻ കമ്പനിയുമാണ് ഏറ്റെടുത്തിരിക്കുന്നത്.

മറിപ്പുഴയിൽ ഇരുവഴിഞ്ഞിപ്പുഴയ്ക്ക് കുറുകേ പണിയുന്ന ഈ പാലത്തിന്റെ നിർമാണം വൈകാതെ തുടങ്ങുമെന്ന് നോഡൽ ഓഫീസറുടെ ചുമതലയുള്ള പൊതുമരാമത്ത് വകുപ്പ് ഡെപ്യൂട്ടി എക്സിക്യുട്ടീവ് എൻജിനിയർ സി.ആർ. സജിത്ത് ‘മാതൃഭൂമി’യോട് പറഞ്ഞു.8.735 കിലോമീറ്റർ ദൈർഘ്യമുള്ള തുരങ്കപാതയാണ് നിർമിക്കുന്നത്. നാലുവർഷംകൊണ്ട് പദ്ധതി പൂർത്തിയാക്കാൻ സാധിക്കുമെന്നാണ് പ്രതീക്ഷ. ജൂൺ 21-ന് പരിസ്ഥിതി ഉന്നതാധികാരസമിതി സ്ഥലം സന്ദർശിക്കും.

കോഴിക്കോട്ട് ശക്തമായ കാറ്റിൽ മരം പൊട്ടിവീണു; സ്കൂട്ടർ യാത്രികന് ദാരുണാന്ത്യം; പിന്നിൽ സഞ്ചരിച്ചയാൾക്ക് ഗുരുതര പരിക്ക്.

0

കോഴിക്കോട്: ജില്ലയിൽ വീശിയടിച്ച ശക്തമായ കാറ്റിൽ മരം പൊട്ടിവീണ് സ്കൂട്ടർ യാത്രക്കാരൻ മരിച്ചു. ഉള്ള്യേരിയിൽ തിങ്കളാഴ്ച വൈകിട്ടോടെയായിരുന്നു അപകടം. തെരുവത്തുകടവ് ലക്ഷംവീട് ‘ഉന്നതി’യിൽ ഹരിദാസൻ ആണ് മരിച്ചത്.

അപകടത്തിൽ ഹരിദാസനൊപ്പം സ്കൂട്ടറിൽ യാത്ര ചെയ്തിരുന്ന പടിഞ്ഞാറെ കക്കട്ടിൽ സ്വദേശി ശശിക്ക് ഗുരുതരമായി പരിക്കേറ്റു. തിങ്കളാഴ്ച വൈകിട്ട് നാല് മണിയോടെയായിരുന്നു നാടിനെ നടുക്കിയ ദുരന്തമുണ്ടായത്. ശക്തമായ കാറ്റിൽ റോഡരികിലെ മരം പെട്ടെന്ന് സ്കൂട്ടറിന് മുകളിലേക്ക് പൊട്ടിവീഴുകയായിരുന്നു.പരിക്കേറ്റ ശശിയെ ഉടൻ തന്നെ സമീപത്തെ സ്വകാര്യ ആശുപത്രിയിൽ പ്രവേശിപ്പിച്ചു. ഇദ്ദേഹം നിലവിൽ തീവ്രപരിചരണ വിഭാഗത്തിൽ ചികിത്സയിലാണ്.